格林斯潘 媾女伎倆

今日，前聯儲局局長格林斯潘本《Age of Turbulence》新書，將會面世。格林斯潘要賣書，當然要「忽然高調」接受傳媒訪問。傳媒同行，亦因為被收視推動，好多時候都要問啲比較另類嘅問題，特別係啲私人問題。你問得、佢肯答，你收視高時、佢本書賣得，一家便宜兩家着。

咁其中一個孫柏文覺得需要認真參考嘅問答，就係格林斯潘講媾女。如果我同大家話，原來格林斯潘媾女好勁，大家可能會話：「一定係媾港女！因為格林斯潘識印銀紙！仲印好多、好多！」

錯。嗰次電視節目《60 Minutes》訪問格林斯潘，講起佢當年點樣追求比佢年輕二十年，仲要係個女主播叫做Andrea Mitchell。原來佢哋第一次約會，格林斯潘已經成功 "tum"到Andrea返格林斯潘屋企。

一篇文就 "tum"到女

冇錯，噚日我同啲《蘋果日報》女同事講呢單嘢時，相信同大家喺呢一刻嘅反應一樣：「嘩！乜格林斯潘咁狼死！個Andrea咁冇矜持！」相信大家都想知，格老用咗乜嘢招數咁勁。

不過講之前想大家知，我當年讀經濟學嘅專科就係industrial organization、市場架構分析同花旗國「反壟斷」政策。大家一定係話：「你讀乜，關格林斯潘媾女乜事？」

問得好！原來，當日格林斯潘"tum"到 Andrea返屋企，就係同佢講話：「想畀你睇吓一篇我啱啱寫好嘅文。」就係咁，成功"tum"到返屋企。篇文寫乜？就係講花旗國「反壟斷」政策囉！

原來，孫柏文要成功 "tum"女仔返屋企，只要做兩件事就得。

第一，摷番大學年代，我寫過關於「反壟斷法」嘅文章出嚟。
第二，搵個女主播。

最後，呢幾日一定會陸陸續續有關格林斯潘新書內容嘅消息。而直到現在，我覺得最轟動嘅消息，就係佢坦言話布殊總統攻打伊拉克，真係為咗石油，希望供應會穩定，令油價下跌。其實，如果話係為咗令油價下跌，就倒不如話係為咗保護美元購買力，價跌就等如購買力上升。

繼續捧黃金白銀

就算花旗國民、政府揮霍無度，國庫空空如也，大家心裏都知：「美國佬冇錢還，仲可以揮軍搶嘢去還。」不過今時今日，呢個形象已經嚴重受損，就好似70年代，美軍撤出越南一樣。嗰次之後點樣？全世界對美元喪失信心，黃金、白銀升、升、升！