互聯網供應商交資料 白癡不如

孫柏文今日想問大家一個非常簡單既問題。問題就係如果你係一個產品服務供應商，而你係個市場裏面賣緊既產品服務，你同D對手基本上是一模一樣。你同你D對手，鬥來鬥去都係鬥價錢，同埋D無關痛癢既花招，咁而家突然間有人畀機會你，好合法同好合理咁，花少少錢同出少少力，就可以令到你既產品服務係消費者眼中，比其他供應商絕對優勝。甚至乎，你花少少錢同出少少力之後，你個市場裏面最中堅既消費者，不單覺得你既產品優勢，還要覺得你公司係一間有正義感既公司。

亦因上述兩個理由，消費者若蜂擁而至，令你發大達，咁孫柏文問大家：「你會唔會花呢D少錢同出呢點棉力呢？」作為<金手指>fan屎既你，都一定會答：「白癡都會啦，仲問。當你D fan屎傻架？」聽到大家咁樣既答案，作為你哋好崇拜既偶像，孫柏文都好開心。不過，今日真係要用隻金手指幫大家，篤一班就連白癡都不如既人出來。佢哋就係香港四大互聯網寬頻服務供應商，榜上有名既係，和記環球電訊、有線寬頻、電訊盈科同香港寬頻。

大家諗下，互聯網寬頻服務基本上係一模一樣，乜M物M既速度，垃圾既服務態度，非常取巧既收費方法，係四大互聯網寬頻服務供應商當中，邊度有分別？不過，尋日睇新聞報道，話佢哋被高等法院頒令迫要交出D擺電影、音樂上互聯網被人抄既客戶私人資料。咁根據報導，佢哋話經過「徵詢律師意見之後」，就決定投降。入稟法院既電影公司因為忽然有高院，所以就可以要乜有乜，你既身分証號碼、地址、電話、阿媽祖家姓乜、你隻狗既名、你小學係邊度讀等等，供應商通通都要交出。

咁點解你哋會話，佢哋連白癡都不如呢？理由好簡單，係互聯網世界裏面，特別對互聯網敏感、好奇既人，例如年青一輩。都知道互聯網對現代和未來社會最大既威脅，就係私隱難得保全。四方八面，會用盡一切方法，去蠶蝕大家既私隱，例如有D人會話同你有D金錢糾紛、私人恩怨，話要從民事訴訟方式去告你，所以就去你個互聯網供應商，你D私人資料。呢D你私人資料既人，可以係你以前既男朋友，又可以係因日日畀你隻狗嘈醒，而非常之想報仇既鄰居，甚至可以係D電影公司用緊既私家偵探。

而消費者如果可以見到一間互聯網供應商，用盡一切辦法，去維護大家既私隱，就算「徵詢律師意見之後」，都繼續上訴到終審庭，仲要下次有人要求客戶私人資料，呢間互聯網供應商既即時反應係：「No！要既就法庭見，我哋仲會用盡一切辦法，令到你有咁難得咁難打呢場官司，就算次次要打到終審庭，我哋都會。橫惦互聯網係一個咁新既，其他普通法司法地區都未有定案，一定有grounds去上訴。做咁多，都只係因為我哋覺得客戶既私隱係神聖、不可侵犯既。」

當今香港，如果真係有一間互聯網供應商咁做，大家仲唔仆倒去做佢哋既客戶？所以作為互聯網供應商，一份上訴申請，比鋪天蓋地既廣告有效，好過搵千千萬萬個阻街Sale屎幫你sell？佢哋仲唔係連白癡都不如！