Roubini on TV

Here's Roubini on TV



OK, kiddin'... Here's the real Roubini



Is it me, or do you also notice that Nouriel Roubini sounds very much like the Count from Sesame Street.

絕對保證大米唔會短缺

短缺。

真係唔可以講笑，短缺呢味嘢真係非常可怕。

你每日嘅生活，如果一直面對開短缺，咁只係生活嘅一部份。不過如果一直買乜都供應充足，突然間短缺就會好麻煩。

情況就如你一路以嚟都冇電用，繼續冇電用，感覺上只係有一份可惜。不過你試吓我哋特區人，忽然要面對一日冇電用嘅生活，淨係冇得睇電視、追劇集，都可以暴動。

唔好話冇電用咁嚴重，如果因為慢咗交寬頻單，搞到冇得上網，你屋企又有一個十幾歲嘅小朋友，咁就肯定出事。

價格浮動預防絕招

所以，孫柏文作為一個熱心社會，搞咗公共政策智庫組織「獅子山學會」嘅人。我當然幫手諗吓，如何防止短缺情況喺香港出現。不論社會主義、共產主義、自由市場，只要可以防止短缺情況，我都會支持。

咁啱得咁蹺，只有自由市場，可以提供防止短缺嘅方法，所以我都逼不得已，支持自由市場。

自由市場防止短缺出現嘅方法，就係容許價格自由浮動。只要價格可以郁，就唔會出現排隊、貨架冇貨等標誌着短缺嘅現象。價格自由浮動就係一粒絕對打死短缺嘅銀子彈。

較早時，特區忽然出現搶購大米。好多同香港人思維脫節嘅傳媒工作者、民粹議員，就話「擔心大米會出現短缺」。咁冇我做副局長支持嘅馬時亨局長，就反射式出嚟話「無需要擔心大米出現短缺」。

防止趁火打劫法例

大佬！大米冇短缺，呢個就所有香港人都知，因為香港行自由市場，冇價格控制。

搶購大米嘅人，只係好似舊年宣佈有資金自由行嘅股民一樣，瘋狂入市，唔係驚股票短缺，只係驚冇上車。所以如果當日馬局長有我做副局長支持，佢就可能會話：「買米好正常，不過價格可升可跌，所以各位師奶應該量力而為。」

不過大家可能會問：「如果自由市場可以防止短缺，咁點解上個禮拜花旗國有超級市場話要限制顧客買米數量？玩配給？」

因為花旗國嘅民粹議員，通過賦予政府防止「趁火打劫 price gouging」嘅法例。所以超市每次加價，都心驚膽跳。就係咁，寧願啲人有錢、有需要都買唔到米，好過加價跟住益晒啲律師。

特區其實都想通過防止「趁火打劫」嘅法例。叫做「計劃競爭法」。咁最支持呢條法例係邊個？咪就係公民黨囉！

最後重申一次，價格自由浮動，保證一定冇短缺！

土產「藍衣衛士」曾俊華

噚日睇電視機見到一段新聞片段，令孫柏文覺得，我哋政府又為咗啲只得象徵性意義嘅嘢，再一次阻礙祖國崛起嘅大業。

我呢排成日都話，如果有人要搶去得象徵性意義嘅嘢，咪畀佢攞咗去囉。佢哋搶嘅時候若用咗低裝手段，因為過程會被傳媒報道，我哋嘅形象就會靚晒。仲因為我哋沉得住氣，世人，特別係啲可以制止中國人買油公司嘅鬼佬政府，就覺得中國人係可信嘅夥伴。

以前蔣介石夫人宋美齡做得到，我哋今時今日只要畀心機，冇理由做唔到。都係嗰句，Unocal，never again。

所以，噚日睇到嗰段電視新聞片段，我覺得非常可惜。大家可能會問：「咁嗰段新聞講乜呀？」如果你估係講奧運聖火喺澳洲堪培拉傳送嘅過程，咁我就對你非常失望。因為噚日係聖火第一次有智慧咁傳送。澳洲啲差佬卒之成功保護啲「保護聖火組嘅藍衣衛士」。

點保護啲藍衣衛士？Protected them from their own stupidity。所以，噚日唔係呢單新聞令我沮喪。

其實，噚日港交所（388）嘅股東為咗兩名獨立董事嘅位進行普選。股壇長毛David Webb就推舉咗個滋事分子去參選。選舉結果就係兩名現任被標籤為「親政府」嘅中國人，成功連任。

港交所獨立性何在？

有人話呢兩名「親政府」董事能夠成功連任，係因為財政司司長曾俊華舊年買嘅股份，投咗畀佢哋兩個。

如果係真，真係硬膠。

入股已硬膠，支持「親政府」嘅人做港交所獨立董事仲硬膠。法例已經講到明，港交所過半數董事由政府揀選。即係就算冇晒「親政府」嘅人做獨立董事，政府都係話晒事。港交所獨立董事，就有如奧運聖火一樣，得象徵式意義。

聖火俾搶咗，就會冇奧運咩？西藏能夠成功分裂咩？同一道理，港交所獨立董事位俾鬼佬搶咗，港交所會停止買賣咩？會俾人收購咩？

現在又唔知外國傳媒會點樣上綱上線。曾俊華一向係我嘅偶像，點知今日已經變成土產「藍衣衛士」。

香港富家子弟大喜訊

大家都知道，花旗國人民好多年都係信貸「癮君子」。借錢呢樣嘢已完全融入佢哋嘅文化當中。佢哋每日24小時嘅起居飲食，甚至預見嘅未來生活計劃，統統都倚賴佢哋一向享受到嘅信貸。

自從舊年信貸危機開始，呢種對借無窮無盡資金嘅依賴，就開始引發好多影響花旗國人民一向生活模式嘅現象。

花旗國信貸泡沫爆破，簡單嚟講就係借錢難咗。信用卡、樓宇按揭、汽車貸款等嘅信貸活動不斷萎縮。結果就係消費下降、樓價下跌、汽車銷售冇眼睇。直至現在，以上三種類別，都係最多人講嘅信貸問題。自自然然令好多人，集中講呢三種信貸活動萎縮嘅結果。

原來除咗以上嘅信貸類別出問題，仲有一個信貸市場現在已經變成花旗國最迫切性嘅問題。呢種信貸，就係學生借錢去讀書。

美學生貸款大幅縮減

以前，學生貸款非常容易。首先有政府嘅直接貸款，其次就有政府作擔保人，由私人公司放債。如果咁都未夠，啲學生仲可以借專為他們而設嘅貸款。

不過，今時唔同往日。上個禮拜，全美最大學生貸款嘅放債公司Sallie Mae嘅總裁已警告，學生貸款嚟緊會非常難借。同一個禮拜，花旗銀行同美銀都跟早排美國滙豐一樣，宣佈撤出學生貸款市場。

結果係點？好多大學生為今年9月開學嘅學費同生活費煩惱。分分鐘好似我大學第二年（97年）嘅9月一樣，有好多來自南韓、印尼嘅同學放暑假後從校園中消失。

以前，如果普遍社會預期經濟周期將會逆轉，或已步入衰退，大家都會見到啲大學，特別係後學士學位嘅課程，會特別多人報讀。不過，今年報讀生就會好似花旗國消費者一樣，唔係冇心，只係因為借唔到錢，而有心無力。

不過呢個情況，對特區富家子弟嚟講係大喜訊。如果有一批人突然唔報讀大學課程，剩餘報讀生面對嘅競爭就會大減。所以如果你一向想去花旗國留學，手頭又已經有錢讀書。現在就係好時機，應該開始去準備考試，攞定推薦書，準備填表，因為09年9月開班嘅課程，應該會比較易入。

供股供到咳 中行發英鈔？

唔係個別事件咩？舊年，紐卡素市作為總部嘅前宗主國銀行Northern Rock，因為市場相信佢資不抵債，所以出現危機。借錢畀佢嘅存戶，就排隊擠提。一路有買Northern Rock短債嘅投資者，就罷買新債。舊債一到期，佢還唔到錢，英倫銀行就將佢國有化。

當時，好多話Northern Rock係個別事件，其他前宗主國銀行只會傷，唔會死。到今日，究竟以上推斷是否錯誤，就真係取決於點樣界定「傷」同「死」。

以Northern Rock為例，存戶最終只係恐慌一場。英倫銀行嘅介入，就全面保證啲存戶冇事。唔好話死，傷都冇傷過。

不過，Northern Rock嘅股東就慘，可以話全軍覆沒。噚日，皇家蘇格蘭銀行The Royal Bank of Scotland（RBS）就宣佈為咗集資，要股東供股。集資嘅原因，係佢哋嘅Tier-1 capital太少，即係資金比起負債嘅百分比唔夠充足。每18股要供11股，作價200便士。07年RBS仲賣緊700便士呀！陰功。

唔賣資產股東就慘

RBS 資金唔夠充足，因為手上嘅資產不斷貶值。問題就係，如果資產繼續貶值，佢哋又會再集資。如果RBS管理層企硬，唔賣「核心資產」，例如佢哋手上揸着喺地球另一面嘅中國銀行（3988）幾百億股，咁啲股東將會供股供到氣咳。

RBS管理層已經話，08年要撇嘅撇賬，已經撇晒。言下之意，毋須再集資。孫柏文只可以話：「冇可能！」

其實，如果RBS繼續出事，佢哋會賣手上嘅中行股份，絕對唔奇。而事態發展，可能因為實在有太多前宗主國銀行一齊出事，政府只有容許外國銀行全面收購佢哋。

前宗主國人已經習慣「溫布頓效應」，即係場地佢出，不過本地球員冇份打。RBS作為中行嘅策略性股東，即係雙方已經有來有往。如果 RBS俾人收購，中行分分鐘會係主角。

最過癮嘅地方，就係RBS係發鈔銀行，發英鎊鈔票。如果被中行收購，唔通中行發英鈔？

Before...



After...

反「藍衣衛士」的真正理由

上個禮拜一，施永青先生同我去咗有線做Money Cafe節目嘅嘉賓。講關於傳遞奧運聖火。

喺節目裏面，我同施老闆都同意負責保護奧運聖火嘅「藍衣衛士」，特別喺倫敦同巴黎站嘅表現，只能用「做得唔啱」嚟形容。不過，講到「藍衣衛士」嫌有個傳聖火嘅英國鬼妹跑手，舉聖火唔夠高，鑑粗捉住、推高佢隻手時，我問咗個問題，令施老闆展示激情嘅一面。

問題係，事件發生後，英國傳媒一面倒形容「藍衣衛士」為兇漢。
佢哋啲鬼佬一定會諗，一班中國派去嘅部隊，喺佢哋嘅首都，喺幾百個鏡頭面前，，都可以為得象徵性意義嘅聖火，去推人。
咁如果喺西藏、冇鏡頭，為咗我國領土完整，呢個任何國家最不可侵犯嘅原則，中國政府又會點樣「關門教仔」？文化滅絕？佢哋骨子裏分分鐘相信，中國政府會種族滅絕。

在乎鬼佬感覺

施老闆就係覺得「藍衣衛士」嘅「唔啱動作」，都唔可以咁樣上綱上線。唔可以話有理由相信，中國政府喺西藏進行文化滅絕。呢點孫柏文絕對同意。幾個未見得大場面嘅鄉下仔「藍衣衛士」，丟哂13億人民嘅架，絕對不能證明中國政府喺西藏做緊啲乜。相反我自己相信，中央政府已經大幅補貼西藏居民，只係外間唔知。

不過嗰日，我嘅問題唔係「現實係點」，而係「啲鬼佬有嘅推斷，點算？」

大家可能會話：「清者自清，現實先至最重要。啲鬼佬嘅三流推斷同感覺，who cares？」

初頭，我都覺得啲鬼佬嘅三流推斷，毋須理會。不過唔知點解，骨子裏非常在乎啲鬼佬對我國嘅感覺。經過一個禮拜思考，我卒之領略到點解。

我係最想見到祖國崛起嘅人。問題係要崛起，中國人手裏最多有啲乜？同時又會最需要啲乜？冇錯，我哋有最多嘅就係美元，最需要係原材料。就因為咁，所以我好在乎鬼佬對我國嘅感覺。點解？

小不忍亂大謀

05年中，中海油（883）宣佈以185億美元作價，全面收購花旗國油公司 Unocal。當時作為石油股分析員嘅我，當然日日追住事態發展。最後，花旗國Chevron，只係出171億美元，就成功擊退中海油。結果令我呆咗，永不忘記。

中國人手上1.08美元，購買力居然細過鬼佬手上嘅1美元。

我問自己，點解會咁？原因係喺佢哋心目中我哋形象差。

每次我哋衝擊家樂福、圍堵CNN 嘅Cafferty、支持「藍衣衛士」，中國人手上美元嘅購買力折扣就會增加。為達到祖國崛起，除非有軍力去搶原材料，小不忍則亂大謀。

所以如果你同我一樣反「藍衣衛士」，希望香港傳聖火當日，有好多差佬保護啲「藍衣衛士」to protect them from their own stupidity，不過俾人問點解，你只需答：「Unocal，never again。」

做香港馬主？要買Late Foal！

時辰八字對於好多中國人嚟講，非常重要。有啲人甚至信時辰八字已定一生。多唔好講，好多年前有日孫柏文同個妹，從電郵中收到一個時辰八字測命數嘅網址。打入出身時間之後，個網站就話我個妹最適宜做「醫師」，而我就應該會係從事「寫作、投機、詩人」嘅工作。今時今日，我個妹就喺前宗主國做醫生，我就成為一個財經口水佬。時辰八字呢樣嘢，真係唔信唔得。就係以上理由，我見到兩篇文，一睇題目，仲估又係時辰八字作怪。

數據傾斜有原因

第一篇文，就係話歐洲啲足球員，好多時都係喺一年頭幾個月出世。呢個現象喺少年隊更甚，例如英格蘭啲頂尖少年足球員，有一半喺1、2、3月出世。德國就有52個尖子足球員喺頭三個月出世，相比之下得4個喺年尾出世。如果唔係時辰八字，咁又點解？

第二篇文，就係話睇花旗國職業棒球員嘅出生日期，8月出世嘅人數，遠比隨機分報嘅12分之1高。2月至7月出世嘅棒球員，平均只有300幾人，而8月出世嘅有503人，9月至11出世嘅都有平均400人。不過，以上只係計算喺花旗國出世嘅棒球員，喺外國出世，不過喺花旗國搵食嘅棒球員，出世月份就平均散佈喺 12個月中。點解呢？

原來，喺歐洲嘅少年足球聯賽，都係以1月1日做年齡級別嘅分水嶺。所以年頭出世嘅球員，往往被其他隊友成熟得早，啲隊友交波畀佢嘅機會都多啲。令鑽研技術嘅機會多咗。技術鑽研得比人多，自自然然就會好波啲。

去到呢度，相信大家都估到，啲花旗國少年棒球聯賽年齡級別分水嶺，就係定喺8月1日。一個11、12歲嘅球員，大人半年已經着數得多，自然令出賽鑽研技術嘅機會都多咗。所以數據出現傾斜，未必係時辰八字作怪。

其實，任何有日子作年齡級別分水嶺嘅運動，都會出現同一現象。例如，喺賽馬運動中，一匹馬最威水可以贏嘅一場馬，做係打吡derby。而每個區域嘅打吡，都係限制喺某個年齡先至可以跑，多數定喺3歲。如果你係香港馬主，你會買隻幾時出世嘅馬呢？

近分水嶺非着數

如果你答：「越近分水嶺越着數。」咁你就唔熟香港賽馬。因為天氣有別，南北半球馬嘅分水嶺相差半年。香港因為有南北半球馬出賽，所以為公平，馬會將香港打吡參賽年齡定喺4歲。正當全世界買家，都想買近分水嶺出世嘅馬，遲出世嘅late foal，價錢自然就有折讓。所以講值博率，做香港馬主要買Late Foal。

華懋公司文化已死？

香港作為一個自由經濟社會，當然好自由同經濟蓬勃。經濟蓬勃當然衍生出好多唔同嘅公司，自由亦令佢哋百花齊放。

而香港做得「經濟神話」，本身就一定因為有好多好傳奇嘅公司。

「傳奇」呢樣嘢就可能同「性感」一樣，有時若隱若現，反而會更「傳奇」。所以作為一間公司，最「傳奇」嘅可能就係啲冇上市嘅公司。

記得以前，孫柏文仲係石油股分析員時，老闆曾經講過：「一間公司上市，本招股書裏面睇到嘅嘢，就好似一個女人剝光豬，赤裸裸畀你任睇。」任睇？Not sexy。

一幢幢樓冇人住

咁喺大家心目中，究竟覺得邊間冇上市嘅公司好傳奇？如果十年前有人問我同一問題，我都係同一個答案，特區最傳奇嘅公司一定係華懋集團。

我仲記得點解會得出呢個結論。十年前，我放暑假跟老竇去跑夜馬，入沙田馬場聯絡父子感情。嗰一刻，我哋企喺大看台，睇住某場長途賽。我就買咗隻放頭馬，點知一開閘已漏閘，所以隻眼就睇吓其他嘢。點知畀我發現喺城門河對面，有一幢幢冇人住嘅樓。腦海中充滿迷思。

最傳奇最慳公司

場馬跑完之後，我指向嗰幾幢冇人住嘅樓問：「老竇，上次放假時嗰啲樓已經起好，點解仲係冇人住？」佢解釋嗰啲樓係華懋起嘅，佢哋唔中意賣就唔賣。到咗十年後嘅今日，嗰啲樓都仲未賣晒。華懋仲唔「傳奇」？

如果要問大家用一個字去總結華懋嘅公司管理文化，相信大家都會揀個「慳」字。今日，我要講華懋嘅原因，就係因為我察覺到華懋呢個「慳」嘅公司管理文化，有被蠶食嘅迹象。

XX是美德，唔通特區最後一個「美德碉堡」被攻陷？

我哋壹傳媒嘅中環直播室，就係喺一幢華懋擁有嘅商業大廈裏面。一直以嚟，啲廁所冇廁紙。第一次見到時，都忍唔住問咗句：「咩世紀呀，大佬？」不過，對上兩個禮拜，我就開始發現啲廁格有廁紙。

大家都知，免費就只會鼓勵人哋浪費，美德事小，破壞環境事大。我返到《蘋果日報》，就問咗財經版前輩Winery，有廁紙係咪代表華懋嘅文化已死？Winery冇答到，反而問：「啲廁紙會唔會係陳振聰擺架？」

伯南克只做一屆？

根據小道消息。真係非常小道嘅消息。早兩個禮拜，有人喺個社交場合中，同前聯儲局局長Paul Volcker（沃爾克）講起今時今日嘅聯儲局。講到現任聯儲局局長伯南克，沃爾克就一句到尾咁話：「He's a one-termer（佢只係做一屆）。」

講真，究竟呢個小道消息有幾可靠，孫柏文真係唔知。不過，沃爾克作為成功殺掉70年代通脹巨龍，79至87年嘅聯儲局局長，已經因為伯南克同舊年開始爆發嘅金融風暴，破咗戒，破咗「唔會為繼任人做嘅嘢作出評論」嘅戒。所以就算唔知沃爾克有冇為伯南克，作過一個咁樣嘅預測，起碼唔係天方夜譚。

伯南克「八萬五」政策

伯南克究竟可唔可以冧莊，我估都會幾難。後果應該會同特首董建華或沃爾克嘅前任局長G. William Miller一樣，因為實在做得「太好」，所以「升職」。

董特首就靠「八萬五」嘅威力，被「升」做國家副主席，幫大陸樓市降溫。

G. William Miller就令通脹率去到10%，所以「升」做花旗國財長。

咁乜嘢會成為伯南克嘅「八萬五」？噚日，我分享過上個禮拜有份訪問商品大王羅杰斯嘅經驗。而喺個訪問裏，我就得出可能會係伯南克「八萬五」嘅政策。

我問：「你經常批評，今時今日伯南克嘅聯儲局。咁喺當今世上，有冇任何一個經濟學家或其他人選，你覺得可以做一個好嘅聯儲局局長？」我問完之後，羅杰斯又重複佢一貫嘅睇法，就係聯儲局需要解體，花旗國毋須要中央銀行。花旗國社會同金融業，會好似以前未有聯儲局時，自行發展貨幣。

不過，佢特別提咗個問題：「聯儲局，今時今日問啲銀行攞咗5000億美元以按揭、信用卡、汽車貸款等為收入嘅垃圾債券。大家都知道揸住張按揭債券，要搵番你個債仔間屋已經好難。如果聯儲局揸住嘅債券出事，啲人斷供，聯儲局呢啲典型政府官僚機構，起碼要15年先至知邊間屋係個債仔。聯儲局做債主最好，你就算斷供，都可15年免租咁住。」

收數。唔通就係伯南克嘅「八萬五」？

羅杰斯：原材料價照升

噚日，相信大家都應該睇到，我哋《蘋果日報》財經版專訪，有「商品大王」之稱、國際大鱷索羅斯前合夥人羅杰斯。

孫柏文有幸係其中一位有份參與訪問嘅同事。雖然訪問當日，我睇落去非常淡定，不過我真係非常緊張，個心扑扑跳。

冇辦法，因為唯一能夠明白我當日心情嘅人，就係嗰啲見到韓國歌手Rain嘅十幾歲o靚妹fan屎。真係有如當年軟硬天師話齋，我差啲就「見到偶像，成個彈起」。

當然，我已經唔係十幾歲。我明白一個「偶像」，可以「遠睇誇啦啦、近睇吹喇叭」，所以令緊張心情更複雜。好彩，訪問完後，我更崇拜佢。

我由知道有份參與訪問個刻起，幾晚瞓唔着覺，不斷反覆咁諗問啲乜呢？

最後，因為我今時今日係一個原材料大好友，好大原因都係因為佢，所以就決定問佢老人家，一啲動搖我對原材料升浪信念嘅問題。好似教徒問教宗一樣。

我問：「好多人話，新興市場對原材料嘅需求增幅，只係因為嗰啲原材料被變成出口貨品，去美國或歐洲嘅市場。一旦因為樓市爆破、信貸危機，嗰啲地方嘅消費者投降，原材料需求就會縮減。原材料價格就會下跌。」

供求失衡價易升難跌

羅杰斯答：「需求縮減就一定。如果皮鞋需求縮減，皮革嘅需求就會下跌。不過，喺我以前本書《Hot Commodities》裏面曾經用過鉛做例子。以前，鉛嘅兩個最大用途，就係用嚟製造有鉛電油同油漆。喺最近幾十年，世界各國已經停售呢兩種產品。你一定會覺得鉛價會大跌。最大兩個用途冇咗喎！仲唔跌？

點知，今時今日鉛價喺歷史高位徘徊。點解？因為鉛礦嘅供應比需求跌得仲快。所以原材料升浪，一定會繼續。」

聽佢講完之後，我就諗，究竟有乜嘢原材料，好似鉛一樣，最大用途突然消失，不過供應比需求跌得快得多。大家作為《金手指》嘅fan屎，都知我諗緊嘅原材料就係白銀。所以再次重申一注獨贏買白銀！

中油香港業績分析

等咗成個周末，中油香港（135）噚日終於出咗07年全年業績。啲大數一睇，真係好差。收入跌1.3%，盈利仲慘跌20.3%。

首先，大家買油股或孫柏文叫「一注獨贏買中油香港」，始終都係因為覺得油價會升。用布蘭特油價計，07年平均油價比06年，真係升咗大約10%。

不過就算油價升10%，中油香港盈利都仲跌20.2%，真係失望。有跟我買中油香港嘅人，應該同我一樣非常唔過癮。

一向以嚟，中油香港開採石油嘅平均成本都係高。而賣嘅油就因為比較難提煉，所以永遠都比布蘭特質素嘅油價要打個定額折扣，即係永遠都要平例如定額10元。

不過就係因為平均成本高、賣油又有定額折扣，所以一旦油價飛升，就會有槓桿作用。每桶石油嘅盈利升幅百分比，應該比油價多。

不升反跌有兩原因

其實，中油香港有受惠於呢個槓桿作用。
例如喺哈薩克斯坦嘅油田，產量只升2.5%，不過盈利就升咗22.5%。
泰國油田，產量升2.6%，盈利升22.4%。

有時候，因為啲油嘅質素，差到賣油價非常接近平均成本，所以普遍油價一升，帶嚟嘅槓桿就好厲害。例如中油香港喺阿曼同秘魯嘅油田，產量雖然下跌，不過盈利就升四成至一倍。

大家會問：「咁勁，盈利又會跌 20.2%？」因為問題有兩個。

第一就係中油香港喺大陸嘅兩個油田。兩個油田產量都跌，跌4.3%至7.6%，而呢個跌幅我都預咗。不過唔同阿曼同秘魯嘅油田，油價嘅上升，就不能彌補產量跌。每桶石油嘅毛利率仲要收窄。

講真，除咗人民幣升值，推高成本之外。我諗最大嘅損害，係因為嗰兩個油田賣油油價，冇乜點升。多都唔講，中油香港國外油田，賣油油價一定要清清楚楚，因為當地政府靠油價抽稅。大陸？要全民對抗通脹嗎。不過兩個大陸油田盈利貢獻百分比，將會越來越少。國外盈利貢獻喺未來應該可以頂得住。

第二個問題係中油香港始終都要搵油田。而搵油成本就升咗2.6倍，用咗五億幾。大家要記得，公司盈利都只係 13億元。呢度嘅使費，喺來季應該下調，不過都希望搵到石油。中油香港現水平仲係非常吸引。不過我絕對要承認，要下調目標價。短期之內會更新。

為格林斯潘平反

兩年前《金手指》創欄時，分享過一個關於現今花旗國共和黨總統候選人──McCain（麥凱恩）嘅故事。

當時，我話：「2000年花旗國共和黨初選時，曾經有記者問挑戰小布殊嘅麥凱恩（John McCain）對貨幣政策嘅睇法，特別係對格林斯潘工作表現嘅意見，佢話：「格林斯潘做得很好，好到如果局長遭到甚麼不測，我會替他的遺體戴上一副太陽眼鏡，安放在聯儲局辦公室的大班椅上，讓眾人覺得他繼續工作。」

用IMF程式計算

大家係咪好掛住嗰個年代呢？一個身居要職，分分鐘做下屆花旗國總統嘅人，覺得格林斯潘嘅表現，好到就算死咗，副軀體都仲可以為美元帶來穩定。真係long long time ago。

除咗股民鍾意跟風之外，財經口水佬亦都鍾意，所以今時今日就有好多批評格林斯潘嘅文章出現，孫柏文都寫過唔少。就係因為咁，前宗主國《金融時報》撰稿員Martin Wolf最近嘅文章，就令小弟非常有興趣去睇。因為篇文嘅題就係「Why Greenspan does not bear most of the blame」。

基本上，佢話用IMF嘅指標方程式，格林斯潘當年唔覺得樓市有泡沫係啱。佢仲話花旗國樓市升幅，比前宗主國少，算溫和。

大佬呀！你估前宗主國嘅樓唔會跌到一仆一碌咩？只係可能冇日本咁慘。不過，Martin Wolf覺得格林斯潘當時認為樓市冇泡沫係啱，只因佢用IMF嘅方程式。

我以前講過，政府就係戇居居跟住呢啲仲估可以預測未來嘅方程式，作出干預市場、褫奪市民選擇權嘅決定，就會引來Black Swan式嘅禍害。

想做炒家抑或博士

以前講過《Black Swan》一本書當中，講過以下兩個人。

第一個就係投資銀行裏面，盲目相信方程式嘅統計學博士。
第二個就係投資銀行裏面，由「派信仔」做起嘅炒家。

如果你問佢兩個：「有隻銀仔擲毫連續開99鋪『公』，咁第100鋪開『公』嘅機會率又有幾高？」
統計學博士（或特區高官）就會話：「跟據方程式，下次開『公』或『字』嘅機會率都係50%。」不過高級炒家會話：「連續99鋪『公』，咁個銀仔肯定有問題啦！第100鋪肯定都係『公』！」

Martin Wolf就係嗰個統計學博士。咁你想做博士定炒家？

甘泉航空死因研究

都唔知係咪互聯網世代，啲嘢發生起嚟，可以好快。例如，幾個禮拜前，投行Bear Stearns可以喺幾日之內由有變冇。噚日，我哋特區都發生同類事故，「廉價航空」甘泉突然宣佈結業。

噚日嘅乘客，上飛機時間公司仲好地地，落機時間嘢冇咗。

今日，孫柏文就幫甘泉航空，做死因研究。

不過，我首先想講畀大家知，我搭過甘泉。原本我一路都想分享搭甘泉嘅經驗，點知都冇機會，直到甘泉玩完嗰日，先至有得寫。其實，作為一名搭客，甘泉真係唔錯。尤其有朋友笑說：「飛甘泉，食嘢唔serve豬扒，係豬扒serve食嘢。」我覺得絕對唔啱，甘泉空姐同國泰嗰啲差唔多。講真，兩間都係香港航空公司，請嘅空姐始終都係港女。

直接死因–融資困難

入正題。甘泉航空，就好似一個又煙又酒又唔做運動嘅人，行行吓街突然心臟病發死亡。又煙又酒又唔做運動，就係引致死亡嘅基本因素，不過嗰一刻嘅直接死因，就係心臟病。

如果要我估，甘泉航空嘅直接死因，就係融資出咗問題。大家要記得，甘泉出世時，全世界都生活喺一個非常大嘅信貸泡沫中。甘泉航空就好似啲銀行一樣，借短期內要還嘅錢。

心諗，還款期到嗰日，咪再借新錢還舊債。

不過甘泉就遇到，呢場就連花旗銀行都難借錢嘅金融風暴。舊債到期冇錢還，就即時死亡。大家可能會問：「如果企業本身健康，又點會借唔到錢？」冇錯，講完直接死因，就要講引致死亡嘅基本因素。

基本死因–成本唔低

其實，low cost carrier概念繙譯成「廉價航空」已經係大錯特錯。應該繙譯成「低成本航空」。

成本點解低？因為航空公司其中一個最大成本，就係飛機折讓成本。飛機 24小時不斷折讓，所以誰能夠令折讓成本有最大效益，成本就會「低」。

即係要飛機每日喺空中嘅時間越長，成本就會越「低」。

咁「低成本航空」嘅成功地方，就是將降落後整理、入油等嘅需時大幅降低。如果每日都要降落、起飛幾次，每次省咗嘅時間加埋就會好厲害。不過，如你係飛長途機，每24小時先降落、起飛一次，就完全冇咗「低成本航空」嘅着數。到時候你只會係收費便宜嘅普通航空公司。

---------------------------

By the way... Prescience from Mr Wan

難搞廢物原來值592億

大家作為《金手指》嘅fan屎，都知道孫柏文成日搞爛gag。所以我相信大家見到今日條題「難搞廢物原來值592億」，可能會覺得我講嘅「廢物」，又係嗰啲次按債券。因為咁，所以我想首先澄清，今日講嘅「廢物」，真係如假包換嘅垃圾。

大家可能會問：「真正垃圾，真係可以值592億（港元）？」珍珠都冇咁真。

大家都知，呢幾年世界上出現原材料大牛市。好多以前「冇價值」、甚至乎「負價值」嘅嘢，忽然好值錢。情況好似擺喺我屋企廿幾年，嗰堆日對夜對、篤眼篤鼻，令孫媽媽煩擾嘅「垃圾」超合金模型，原來可以賣好多錢。

例如，以前原材料冇咁值錢時，啲人採礦往往只係攞走礦物濃度高嘅石頭。濃度比較低嘅石頭，就會留番喺個礦附近。如果你住喺附近，日日對住一堆堆嘅石頭，你都唔會開心。一個唔好彩，政府仲要你負責，要你搵方法搞掂啲石頭。

點知，因為原材料價格飛升，啲石頭嘅礦物濃度，忽然值得提煉。就係咁，廢物變成寶物，好多人問你買啲石頭。

其實，如果問大家當今世上最難處理嘅廢物，就一定係核廢料。根據《美國今日報》，花旗國聯邦政府嘅「審計署」，啱啱宣佈有一堆唔知道點樣處理嘅核廢料，原來因為鈾價由2000年賣7美元一磅，升至今時今日賣73美元一磅，所以呢堆核廢料變成價值592億嘅資產。

核廢料變發電燃料

根據資料搜集，呢啲核廢料以前好多都會用嚟做啲能夠穿過盔甲嘅子彈。今時今日，居然可以再提煉，用嚟做發電燃料，真係可喜可賀。

就係咁，畀咗個機會我教大家英文。以前細個打機做巫師，就有個魔法叫做「swords to ploughshare」，即係將用嚟鑄造刀劍嘅鋼鐵循環再用，變成用嚟耕田嘅鋤頭。估唔到，因為原材料價格飛升，到我大個之後，可以見到真人版。

點解唔email聖火呢？

任何一樣商品或服務，特別係推出期有時限嘅，主辦單位都會搞啲「造勢活動」。有時限嘅意思，就係例如搞展覽、的士高派對等產品。當然，參與選舉嘅政客候選人，都係「有時限產品」，所以佢哋都好喜歡搞「造勢活動」去宣傳。

傳遞聖火宣傳效果大

不過，如果要孫柏文揀一種項目，最能代表啱啱提過嘅「有時限」特質。我相信一定係體育運動。而體育運動項目當中，最多人睇同感到興奮嘅就一定係世界盃足球大賽。第二先至係奧運會。

多都唔講，對上一次中國各大省市人民自發性走上街慶祝，係為乜？唔係申奧成功囉，而係中國隊02年打入世界盃。世界盃就有buzz，奧運會只得 hype。係咪北京搞，我都係咁話。

不過，奧運始終都係「有時限」嘅產品，開始之後，兩三個禮拜內就會完，所以奧運都搞「造勢活動」。而相信大家都知，近幾屆奧運嘅主辦單位，覺得最有效、最終極嘅造勢活動，就肯定係傳遞聖火。

雖然我唔知點解咁有效，不過啲主辦單位往往講到聖火嚟到時，我哋會興奮到好似耶穌基督再世咁。

其實，大家真心問自己一句。對上咁多次奧運嘅傳遞聖火，你又記得幾多個片段？咪又係傳傳吓，個火熄咗嗰次。

講真，傳遞聖火呢樣嘢，你唔做，你估啲人會唔知奧運即將舉行？

根據我嘅資料搜查，1976年蒙特利爾奧運會，佢哋傳遞聖火嘅方法，就係依靠衞星傳送。用得衞星就當然快過打針，幾秒鐘就由希臘傳到加拿大，所以啲人話冇feel冇造勢。

email聖火安全快捷

不過今時今日，相信祖國政府一定有人諗：「如果可以用番衞星傳遞，就唔使煩！」

當然，今時今日已經唔係430穿梭機、閃電傳真機嘅年代。所以如果祖國要玩科技傳遞，最好就係email個聖火。除非有搞分裂分子做hacker，個聖火應該安全。

最後，大家唔好覺得啲歐洲人針對我哋中國人，係要搞寸我哋個派對。你估如果今次係花旗國搞奧運，會冇人示威咩？

繼續整理銀行殘骸

呢場國際銀行金融風暴，如果由舊年8月開始計，其實已打咗8個月風。大家應該同孫柏文一樣，覺得好疲倦。最能代表呢種打呵欠嘅態度，莫過於上個禮拜，UBS行出嚟話又要撇賬190億美元，仲要換埋管理層，不過市場冇乜大反應。

190億美元！差唔多1500億港元！當年成個「玫瑰園計劃」都係1600億港元！一季就炸毀青馬大橋，整沉赤鱲角機場，冇埋西九、西隧！原本唔想用咁多感嘆號，不過就算上季撇咗190億美元，應該仲有囉！

風暴過後滿目瘡痍

舊年8月16日，我寫咗篇題為「呢場信貸風暴叫Katrina」嘅文。基本上話過呢場信貸風暴，就會令金融業好似颶風Katrina打過嘅新奧爾良一樣。場風就算過去，剩下嚟只有頹垣敗瓦，人口得打風前嘅六成。

冇辦法，有如新奧爾良一樣，金融業係戰略高地，不能就咁放棄。重建工作有幾辛苦，都要去做。

近排就有兩個會計指引改變，值得一提。首先，就係關於近乎銷聲匿迹嘅 SIV。最新嘅花旗國會計指引，卒之將Qualifying Special Purpose Entity漏洞堵塞，我只係知從今開始，銀行唔可以再喺自己賬簿以外範圍，成立名義上獨立、不過實際上銀行要攬上身嘅SIV。

銀行仲要喺09年之前，「搞掂」啲SIV，一係整死佢，一係攬上身。

作為一個誠實財經口水佬，我第一個認會掛住啲SIV，因為實在提供過太多寫作題材，曾幾何時爆一間SIV，能夠寫足一個禮拜。

除咗會冇SIV呢樣嘢之外，聯儲局好似會用「拖字訣」去解決銀行嘅壞資產。希望可以拖拖吓，未來有足夠嘅盈利，先至慢慢撇數。因為如果今時今日，一次過撇數，將會同花旗國30年代大蕭條嘅開始一樣，銀行倒閉、資金冇渠道、經濟癱瘓。

原來有新指引，如果銀行資產有價有市，不過銀行覺得個價「唔靚」，就毋須要用市價計算資產價值。即係銀行話值幾多就幾多。呢場風暴之後，重建真係辛苦。

Come visit!

股場 Matrix 熊證 Neo

大家作為《金手指》fan屎，應該睇過一齣《22世紀殺人網絡》（Matrix）嘅電影。如果未睇過，唔該今晚租隻VCD去睇睇。因為覺得《金手指》好睇嘅人，都應該會覺得《22世紀殺人網絡》好睇。

不過，如果你睇過，就應該記得戲裏面叫Neo嘅主角奇洛李維斯發現自己可以扭曲時空。就算對方瞄準佢發射，即使子彈亦已離開槍管，佢不但可以避得開，仲有能力還擊。今日重提呢齣電影，係因為噚日孫柏文見到股市版嘅Neo出現。

大家都知道，06年牛熊證開始出現。不過初期成交薄弱，直至到我喺06年寫咗篇文，個題用咗「一注獨贏」四隻字叫大家買某隻恒指熊證之後，成交就開始上升。一定因為係我！我真係一個天才sales。至少朋友利世民都係咁諗。所以利世民就叫我做「熊證之父」。

咁熊證又關Neo乜事呢？相信大家都知，牛熊證同認股證唔同嘅地方，就係牛熊證有「強制性收回價」。即係如果本身股票或指數價升或跌至某個位，牛熊證發行商就可以強制性回收。即係處死。所以回收價亦被稱為「打靶價」。

噚日，喺市未開之前，全世界都覺得恒指會裂口高開好多。好多熊證觸動咗「打靶價」。即係子彈亦已離開槍管。問題係「打靶價」會比「行使價」低，所以就算熊證被收回，都應該會有剩餘價值。到時候，發行商就會發還剩餘價值畀啲熊證持有人。

最後唔死仲有錢賺

不過，計算剩餘價值唔係用「打靶價」計，係用嗰日本身股票或指數最高價位去計。即係如果唔好彩，買咗熊證，不但升到「打靶價」，仲要升穿「行使價」，咁就會乜都冇。

噚日，就有一隻熊證觸動「打靶價」，喺開市前10秒就有人恐慌性拋售，之後當恒指正式報價就停止買賣。不過該10秒嘅交易價，就反映拋售嘅人覺得恒指噚日會升到24476點。

不過，恒指最高只見24195點，熊證未至於完全死亡，發行商將會退番最後交易價嘅逾兩倍嘅金額。噚日係嗰10秒買咗呢隻熊證嘅人，仲唔係股場嘅 Neo？

財經女主播's 港女十式...

Ok, my good friend Mr Wan has mentioned I am in possession of a 港女十式 demonstration video by a certain 財經女主播.

And after the mention, I have been inundated with massive amounts of request to share.

Well, I have always wanted to upload it. But Just have not got round to it. Will do it today or tmr.

Cheers!

金手指貼士第一季總結

4月第二個交易日，係時候總結金手指篤過嘅「一注獨贏」貼士。今年首季嘅表現，附表清楚顯示。跟住孫柏文會講吓08年嘅展望。

白銀：上月不但有消息傳出，世界各地嘅實貨白銀供應出現嚴重短缺，仲遇上對美元完全不負責任嘅聯儲局，又一次大大力減息。我仲估白銀又到快速爆上時。

同一時間，又有好多多年嚟聽過我講點解要買白銀嘅朋友，卒之問我點買。令我覺得白銀吸引咗太多跟紅頂白嘅散戶入市，短期有啲危。最後真係狠狠地跌咗落嚟。

不過就算急跌，都仲係比起年初升咗好多，有錢繼續買，一定冇後悔。作為白銀戰隊隊長「白銀文」，維持原本建議：強力買入。

滙控（005）：喺1月22日，即係「神奇小子」令法興要拆倉嗰日。滙豐完全跌穿我提供嘅「一注獨沽賣滙豐」嘅目標價。由舊年7月叫大家沽滙豐之後，世界各國嘅銀行，都相繼出現嚴重事故。

噚日，UBS出業績，滙豐銀行行政總裁又出嚟講嘢。相信大家同我一樣，究竟啲銀行話自己有幾多資產負債、收入支出等，根本唔會信。不過滙豐始終有支持，因為冇減派息。因為已到咗目標價，我已經冇建議。

中油香港（135）：貼完好快已升18%。不過之後就跌，若買咗現已變超級大閘蟹。4月11日應該出業績，只要公司油產量唔跌得多，07年業績會好過06年好多，希望屆時會升。07年尾油價比06年尾大幅上升，08年更勁，中油香港應該可以交出比市場預期好嘅成績。維持原本建議：強力買入。

建議買入：白銀一盎斯
建議日期：06/03/2006
建議當日開市價：US$10.00
目標價：US$120.00
期限：10年31/3
收市價：US $17.21
建議日至完結日或至今賺/蝕：+72.1%
期間高低位：17/3/08最高見US$21.35；14/6/06最低見US$9.48建議

買入：滙控（沽）
建議日期：30/07/2007
建議當日開市價：HK$140.60
目標價：HK$112.50
期限：已達標
31/3收市價：HK $129.00
建議日至完結日或至今賺/蝕：+19.99%
期間高低位：15/10/07最高見HK$153.5；22/1/08最低見HK$104

建議買入：中油香港
建議日期：25/10/2007
建議當日開市價：HK$5.90
目標價：HK$8.05
期限：1年
31/3收市價：HK$3.58
建議日至完結日或至今賺/蝕：-39.30%
期間高低位：29/10/07最高見HK$7.00；20/3/08最低見HK$3.31

CNBC 誠信破產？

大約十年前，孫柏文仲喺花旗國留學時，我就已經有睇番鬼佬財經台CNBC嘅習慣。每次返學遇到唔開心嘅事，我就會開電視睇CNBC，大口大口喝下從電視畫面播出嚟嘅「心靈雞湯」。

點解當時睇CNBC會令我煩惱盡消？大家要記得，十年前科網泡沫正在膨脹，作為投資者個個都可以快速致富。

最令人振奮嘅地方，就係投資者致富嘅工具，係啲好似我咁嘅樣，當年乳臭未乾，創立啲科網公司嘅小子。

被指經常睇錯市

佢哋個個都係冇畢業，就靠創立啲dotcom發達。令我覺得成績差，面臨被踢出校，只係上天恐怕我嘅天才被一張畢業證書埋沒，所以有此安排，去釋放我嘅天賦才能。令我成為億萬富豪事小，天，一定覺得，畀機會我間dotcom改變人類歷史，先至緊要。

就喺科網泡沫膨脹，繼而泡沫爆破嘅幾年間，CNBC就不幸被批評為「bubblevision」。俾人鬧佢一味睇好，完全誠信破產。CNBC冇錯係請過好多嘉賓，都係不斷睇啲股票會升。就算01年初至02年尾嗰次大熊市，嗰啲嘉賓都係睇升。

不過，大家如果有睇CNBC，除咗個別例子外，由嗰幾年開始至今，佢哋啲嘉賓就不斷覺得原材料會大跌。所以作為一個長期觀眾，我覺得呢個批評係錯嘅。

特區花蟹排第八

不過上個禮拜，就連我對CNBC嘅誠信，都開始動搖。原因係佢哋整咗個表，列出佢哋覺得係「全球十大最美麗鈔票」。我作為一個充滿藝術細胞嘅人，當然睇吓佢哋嘅選擇。

點知一睇，我就大聲問咗句：「Are you fucking blind？」原因係排喺第八位嗰張銀紙，就係特區十蚊紙。都唔知CNBC係咪收咗特區政府錢。