dot com惡習 按債還魂

孫柏文記得當年dot com時代，其中一個將泡沫谷大嘅「元兇」，就係一樣叫做vendor financing嘅嘢。Vendor financing就係賣電腦器材嘅公司，同想買器材嘅dot com講：「你今日已經可以攞走啲器材，不過錢就唔使今日畀。當我借住錢畀你先。」因為是賣方提供借貸，所以就叫做Vendor financing。

大家可能會問：「咁點解可以將泡沫谷大？」理由係，一間公司賣嘅器材可能好廢，不過因為提供有利條件，所以成功「賣」出。雖然錢未到手，不過賣方已可入賬，喺公布業績時話賺咗錢。當間間公司都用呢個方法推高生意額同「盈利」，就製造咗一片歌舞昇平嘅氣氛。

大家應該會再問：「如果dot com買方執笠點算？」問得好！當年dot com龍頭──思科Cisco，就係面對一批批攞咗佢哋啲器材嘅dot com執笠，所以進行大幅撇賬。撇到Cisco自己都話係一場百年難得一遇嘅水災，7年之後嘅今日，股價仲係潛水。

不過，未爆煲之前，每季出業績，都會被人稱為英雄中之英雄。

重施故技造靚盤數

今時今日，嗰啲投資銀行，居然重施故技。手上嘅按揭、企業債券可能好廢，不過因為佢哋想造好盤數，所以就同啲專買「財務橫屍」嘅禿鷹基金vulture fund講：「你今日已經可以攞走啲債券，不過錢就唔使今日畀。當我借住錢畀你先。」成功「賣」出之後，賬面上，啲債券價格繼續下跌，已經唔關啲投資銀行事。

到出季度業績時，就會因「解決」咗問題，被人稱為英雄中之英雄。不過，我一定要警告大家，如果有機會見到啲投資銀行家，千祈、千祈唔好問：「如果啲禿鷹基金執笠點算？」因為佢哋一定會話：「如果？如果？咁多如果？今日我公司嘅股價升咗呀！升咗呀！見唔見到呀？升咗呀！」

Blast from the past... From the year 2000

No wonder I am so bad at picking stocks! I called myself a 明燈!!
ahhhhhhhhhhhhhh!!!

政府幫你賣終極廣告

噚日，孫柏文睇到段新聞，話前宗主國首都倫敦有人行街時，聞到啲令身體不適嘅氣體。

倫敦作為恐怖分子襲擊嘅熱點，警方當然嚴正處理，先封鎖範圍，再派着上生化武器保護裝嘅警員，搵源頭。佢哋極速搵到源頭，原來喺間冇開門嘅餐廳內。

警員踢門入屋，希望防止更多氣體洩漏。一入屋，就見到個泰籍廚師，喺度炒辣椒做辣椒醬。

嘩！呢位廚師真係可喜可賀，連政府都話佢啲辣椒醬同生化武器一樣勁。隻辣椒醬不如改名叫做WMD，肯定大賣！

大藍燈籠高高掛

噚日，孫柏文走去自己嘅blog度，睇吓啲fan屎嘅留言。一睇，就見到（又一個）匿名人士留言，佢話：「一注獨贏沽滙豐，輸到阿媽褲穿窿！」今日，我唔直接去答你，用例子答你。

如果大家睇番股市6月至8月大奇迹日嘅走勢，就會發現股市一路升到7月。不過升市同時，有隻藍籌股一路都唔郁，到7月尾，個市總體已經開始缺乏上升動力，呢隻股票就突然大升。之後個市就開始跌，直至大奇迹日。

至愛去恨佢

咁樣嘅股票就叫「藍燈籠」。以上，6月至8月嗰隻「藍燈籠」，就係恒生（011）。



呢幾日，個市跌咗一千點。不過，有隻唔係點郁嘅藍籌突然大升，就係我嘅至愛（至愛去恨佢），滙豐（005）。大家應該知，我喺滙豐140.6元時，曾經叫過大家「一注獨沽賣滙豐」。所以，有如鬼佬話齋：「If I dislike it at $140.6，I hate it at $150。」I stand by my call。

當然，有啲我好尊敬嘅前輩，話滙豐抵買。理由係市盈率得12.19倍，派息回報有4.55厘。如果你係因呢個邏輯想買滙豐，就不如去花旗國買一樣被次按困擾嘅Washington Mutual。佢嘅市盈率得10.2，回報更有6.24厘。不過事先警告，買咗中招，唔好怪我。

中投大手掃？

如果大家問：「不過呢幾日滙豐真係好勁喎！」噚日，曾淵滄教授猜測，啱啱國慶前夕成立，中國政府嘅投資公司大手掃高滙豐（孫柏文加多句，有咁嘅猜測，應該因為如果只得一個腦細胞嘅理性股民，都唔會現在買滙豐）。所以，除非曾教授嘅猜測係啱，滙豐升，我只可以話，大藍燈籠高高掛。

青姐 fans club update

We currently have 56 members only after 4 days of launch of 青姐 fans club on facebook.

I beg everyone of you who is 青姐 fans... look into your friend's list.

AND INVITE EVERYONE YOU KNOW WHO WOULD NOT BE OFFENDED BY YOUR INVITATION TO JOIN.

Whether they join or not is another matter. = )

But let the market speak!


青 姐 ! 青 姐 ! 青 姐 !

To 陳太：This is not a coronation

噚日，收到封朋友寄嚟嘅電郵， Subject係「陳太啓動最大吸票機！」孫柏文打開封電郵，就見到一條超連結。咁我就click落去。

一睇，原來係香港電台嘅一段網上視像新聞短片，主角就係人大常委曾憲梓。講真，我同個朋友一向以嚟都好喜歡睇曾常委同已故全國政協常委徐四民講嘢，因為真係好entertaining。如果特區有棟篤笑文化，佢哋就係攞料嘅金礦。

我同曾憲梓有共鳴

我睇完一段短片之後，就打電話畀嗰個朋友，點知佢劈頭第一句話：「今次大鑊！」我當然問點解，佢話：「以前每次聽曾憲梓講嘢，我會一路笑。跟住就會心裏面讚佢係香港第一代嘅「古惑天皇」，因為佢成功侵犯外國知識產權。不過今次，曾憲梓講咗句說話，令我有共鳴。曾憲梓令我有共鳴囉大佬！仲唔大鑊！」

我問佢曾常委講過啲乜。原來被問及關於陳方安生參選港島區立法會補選時，曾常委話自己感到「莫名其妙」。就係「莫名其妙」呢四個字，令我個朋友有共鳴。

點解？我個朋友同我差唔多大，即係都挨過建華七年之亂嘅蹂躪，成長中睇住彭定康形成今日政治取向。佢亦係港島區選民。理論上，佢應該係一個最典型會投票畀陳方安生嘅人。咁我問佢點解覺得「莫名其妙」，佢話陳太由宣佈參選至今，都未解釋過點解應該投票畀佢。

朋友繼續話：「陳太講過嘅所有嘢，葉劉淑儀都可以講。例如，話最低工資還需研究，政府已經開始落實例如停車熄匙嘅硬膠，去解決空氣污染。就連引發一連串「同納稅人分身家工運」嘅公務員一刀切加薪都認同。佢咁講同葉劉有冇分別？仲想我嗰日起身去投票，揀佢做我嘅立法會代表？唔係話？」

應該用梁家傑隻色

佢再講：「陳太可唔可以最少講一句，葉劉唔講得嘅說話？大佬！連葉劉都講到句「我年輕」啦。講到呢度我仲火滾。陳太答話自己個女都話佢仲好有活力，唔通葉劉個女會話佢阿媽冇活力咩？如果，陳太答話自己係高齡，到達退休之年，所以為港島市民同政府爭取任何嘢時，唔需要再諗「升職」，冇包袱。呢句葉劉咪唔講得囉！都唔知邊個幫陳太諗spin，咁硬膠！我估佢哋十成十仲係諗緊選舉應該用乜顏色，而唔係個選舉message。佢應該用梁家傑嗰隻粉紅色，loser's pink！」

陳太，我個朋友應該係你嘅典型支持者，安撫佢吧！For this is not a coronation。

貼士第三季總結

10月第一個交易日，係時候總結孫柏文隻金手指為大家篤嘅貼士第3季表現。可以用以下12個字總結，「大落大上，祖國好勁，外圍食蕉」。以下成績表（附表）可以清楚顯示第三季表現，跟住我會講講展望。



白銀：呢3個月真係風風雨雨，聯儲局由自稱反通脹第一戰士，變成赤裸裸嘅紙幣狂魔。由8月中開始，濫發鈔票維護建制中嘅銀行，希望可以喺通脹爆發前，美滙指數大跌前，完成救亡。如果問市場參與者，聯儲局係咪真係可以成功喺通脹爆發前先救銀行，金價、銀價已經大大聲話：「No way！」金銀已開始上升，金價仲要挑戰06年高位。白銀升浪指日可待。

等滙控再盈警

滙控（005）：以前港產電視劇，大財閥口中嘅「瑞士銀行」，講緊就係UBS等金融機構。「瑞士銀行」大家都知勁，不過噚日UBS話，因花旗國次按輸咗34億美元。今時今日國際銀行當中，市值最大就係花旗Citigroup。Citigroup大家都知勁，不過噚日就話，因花旗國次按輸咗30幾億美元。特區出產，師奶信佢多過自己老公嘅國際銀行，就係滙豐。滙豐大家都知勁，不過唔知幾時又要發盈警？孫柏文叫大家一注獨沽滙豐，未知鹿死誰手。次按問題解決？我只可以話，靜待滙豐（再）發盈警。

和黃（013）：我8月24日撤銷「一注獨贏買和黃」嘅建議。因為就算3推出革命性收費模式X-Series，都係上唔到客。除非手機有革命性突破，和黃都係賣咗3算。

江西銅業（358）：江銅8月27日到目標價。由年初建議至8月27升咗 48%，幾好。不過之後居然可以再升57%。江銅已經升到我唔識睇嘅地步，大家自己執生。

青姐 fans club update

26 fans so far.

Get those who you know loves 青姐's words.

Thinks 青姐's thoughts make a better equity market in Hong Kong.

Respects 青姐's desire to smarten up retail investor in Hong Kong.

Make sure they join the fan club.