美2012年先加息人幣冇運行

入正題前，孫柏文有兩個消息先同大家分析。第一個消息係呢刻喺澳洲悉尼，25個最重要央行嘅代表，包括人民銀行行長周小川、美國三藩市聯邦儲備銀行總裁葉倫、歐洲央行行長特里謝等開緊秘密閉門會議。由上周末開會至今日。


不過，原先今日先會走嘅特里謝，就因歐盟官員求見，想開「緊急會議」，所以就急急提前鬆人。如果事件冇迫切性，又或可以搵啲細嘅搞掂，個大佬冇理由兩日都等唔切，要即刻返家鄉開會。歐洲應仲有好多嘢爆。


講開爆，前日有伊朗最高宗教領袖哈梅內伊，突然宣布喺佢哋共和國革命31周年嗰日，會有「一拳舂落西方世界，令佢哋目瞪口呆」嘅舉動。哈梅內伊唔係語不驚人誓不休嘅總統，作為最高宗教領袖，佢講呢句說話嘅重要性高得多。


問題係呢個將會係咩舉動？應該就唔會係宣布民主自由，唔通係核爆？如果係的話，油價一定大幅波動，佢一爆，就會在數分鐘內，石油價格即升十幾美元一桶。而以色列一旦有反應，例如派機轟炸，油價可即升至100美元一桶。


咁佢哋31周年係幾時？咪就係聽日囉！大家就拭目以待，買定花生等睇戲。


在09年12月初，高盛分析部就發表研究報告，話佢哋覺得美國聯儲局至2012年先會加息，即係息口一路都會喺零同0.25厘之間。佢哋發表報告時，全場譁然。因為唔好話2012年，當時市場平均嘅預期，係今年第三季已開始加息。到2011年嘅第二季，市場預期將加息至1.5厘。


當時市場咁諗，因聯儲局主席伯南克剛宣布於2010年首季後，將唔會再加碼印銀紙救市。講到幾咁負責任。點知兩個月後嘅噚日，有份制訂短息嘅聯儲局公開市場委員Bullard就話到明：「之前聯儲局都試過，當經濟再現增長後兩、三年先加息。咁如果09年第三季開始有增長，即係2012年先加息。」


喺呢個超低息環境下炒啲乜？慢慢再傾。不過，有樣嘢就應該喺咁嘅情況下冇得升，就係人民幣。大家都知，我國和諧壓倒一切，當全球資金既多又冇成本時，你又有隻貨幣升硬，熱錢就會大量湧入，令資金流向非常不穩定，社會不和諧。所以要人民幣升值，先要聯儲局開始加息、收緊銀根等情況出現。因日本喺八十年代末，容許日圓大升，熱錢湧入，製造泡沫，到90年爆破後，衰到今日。中央係唔會希望踏上日本之路。

今年炒法同08年一樣

剛過去嘅周末，相信各國央行同銀行監管機構嘅職員，又要加班。為乜？咪就係要睇下被監管嘅金融機構，究竟有冇買到啲「歐豬五國」嘅國債，同埋買咗幾多。


孫柏文相信大家都知「歐豬五國」(PIIGS)，就係代表葡萄牙(Portugal)、意大利(Italy)、愛爾蘭(Ireland)、希臘(Greece)及西班牙(Spain)。


希臘政府嘅財政問題，幾星期前已開始困擾全球股市。本周葡萄牙同西班牙會加入呢台戲，金融世界更添火花。希臘政府就跟劇本咁，先推減赤字方案，歐盟亦於上星期話對呢個方案「滿意」，暗示如希臘政府跟足來做，借錢有包底、冇問題。


點知歐盟都未放低隻直豎拇指，希臘政府就被爆原來仲有400億歐元(約4,253億港元)之前冇講過嘅債。大家可能喺金融海嘯下已對大數目麻木。400億歐元即係佔希臘國民生產總值百分之十六，如果用特區國民生產總值作比較，等於特區政府之前喺冇外人知嘅情況下，用咗相等於起4條高鐵嘅錢。


如果你係德國人，歐盟政府叫你捱義氣話，如果冇人肯借錢俾希臘，你就要借，你會點諗？


歐盟官員又話，希臘已作出承諾會改過自新，你又會唔會信？


咁希臘都仲好啲，有個喺國會佔大多數議席嘅執政黨，葡萄牙連呢樣都冇。希臘都仲可以通過雖然冇人信佢哋會咁乖嘅減財赤、財政預算，葡萄牙首相連喺國會通過財政預算嘅票都冇。


大家可能同我一樣，每星期一開市前，都會研究下，上星期五嘅外圍走勢。你有嘅話可能會問：「你呢個燈神，歐洲咁嚴重，美股又會喺臨收市前V型反彈？」冇錯，係V型反彈。但彈嘅原因係市場突傳出歐盟將推救「豬」方案，所以拋空買跌嘅炒家紛紛平倉。


最慘係我落筆嘅呢一刻，都係冇方案。我成日話今年嘅「歐豬五國」，就似08年啲花旗國大行，不過，當時有份講數嘅人，係一間房坐得晒，依家被牽涉嘅官員，係會多到坐爆人民大會堂。所以今年同08年炒法一樣，每次傳有救市「好消息」，就係沽貨嘅好機會。


呢場歐洲悲劇啱啱開始，今轉又唔知幾多銀行買咗啲佢哋會後悔嘅嘢。


最後真係要講，依家炒股，連葡萄牙政局都要睇同分析，為搵錢，真係連老人家都要學小朋友搞通識全球一體化。

點解香港勝紐倫

根據《紐約時報》報道，喺啱啱結束嘅達沃斯世界經濟論壇中，不論印度、中國企業嘅總裁，抑或是南美、非洲嘅官員，會後傾談時，討論嘅議題，都係離唔開兩個禮拜前，即美國麻省參議院補選。


一個人口比香港少嘅國會議席補選，點解會成世界經濟論壇，呢個世界領袖雲集會議嘅主要話題？


如果你有心機咁睇我哋《am730》孫柏文嘅大明燈，之前已知呢場選舉嘅來龍去脈同重要性。唔同其他報紙嘅讀者，你遇到世界權貴時，都即時可以同佢哋「搭訕」。


點都好，今次再講嗰場選舉，係因為美國麻省人民以選票肯定咗我哋特區嘅「政治不正確」嘅政策。肯定我哋咩政策？其中一個美國人民對現政府最不滿嘅政策，就係由07年開始，美國政府屢次拯救銀行，及成為金融機構嘅債主。


特別係政府喺08年以千億美元注入保險公司美國國際集團(AIG)，等AIG再即時將錢交高盛為首嘅世界級大銀行。仲要喺注資後，負責官員千方百計，甚至想用國家保密法，去隱瞞呢次嘅驚世利益輸送。


大家可能會問，民主黨喺08年尾，先以高票奪得美國行政及立法控制權，點解短短十幾個月後，民眾又要「換人」？


全因09年開始執政嘅民主黨，竟然用番之前想隱瞞事實嘅官員，仲要升佢職做財長！亦即係話，09年嘅民主黨，同08年嘅共和黨喺金融政策冇分別。相反，今年嘅共和黨就換人換血換政策，同08年版嘅共和黨割蓆，故在麻省勝出。


其中一個改變，就係新血黨員，要求管理不善嘅銀行如資不抵債就要執笠。亦要嗰啲冇做功課，借錢俾銀行做生意嘅債主，賠本。


呢個美國人民現擁護嘅唔救銀行、要投資者承擔責任嘅政策，係咪好政策？


喺97年金融風暴，剛成立嘅特區政府，眼見當時香港作基地、國際級投資銀行百富勤資不抵債時，冇出手相救，令借錢俾百富勤做生意嘅投資者，從損失中負責任。之後令投資者對本地銀行風險管理特別高要求，結果係特區官員之前成日講嘅「紐、倫、港」，淨得香港喺金融海嘯中冇銀行要被救。


所以，下次你見有投資者輸錢，話要政府出手賠款時，如果你覺得政府要承擔賠款責任，咁你就千祈唔好諗住選議員。因為做得一屆，好似美國麻省咁，選民知政策不對頭時，你就會被擯落台。

你會擔心嗎？

大家試想像，如果喺呢一刻，有好多北京中央政府派來嘅財金專家，喺中環政府合署嘅財政司長辦公室，因特區財政出嚴重問題而獻計，大家會否感不安？

想像我哋香港不但冇晒財政儲備，仲負債纍纍。更嚴重嘅係，因為預計未來幾年，每年都會出現相等於兩條高鐵、特區國民生產總值百分之十二嘅千幾億元政府財政赤字，令本地及海外投資者唔肯再借錢俾我哋。而如果借唔到錢，我哋就還唔到兩批今年四、五月到期，總共千億元嘅債，政府要宣布破產。你會擔心嗎？

最後係政府為減財赤，宣布公務員要大幅減薪，而公務員工會亦同時宣布會喺兩星期內，發動全面罷工及甚至演變成流血衝突、暴動嘅示威。你又會唔會驚到諗住離開香港呢？

以上講過嘅情況，相信大家連諗都唔想諗。不過，呢個就係今時今日希臘人民要面對嘅事實。

希臘政府已經有兩年嘅財政赤字，達到佔國民生產總值百分之十以上，佢哋啱啱被工會大肆批評嘅減財赤建議，要喺三年後，先能將財赤控制於國民生產總值百分之三以下。即使建議就算獲得通過，呢幾年都要不斷借錢度日。

因為希臘政府嘅財政危機，引致歐盟嘅財金官員已被派往首都雅典，去協助希臘政府開源節流。希臘作為主權國，當然可以向歐盟官員提出嘅方案說不，不過，咁做就要同時承擔借錢成本愈來愈貴，或甚至借唔到錢嘅命運。

不過，希臘政府一旦接受歐盟提出嘅開源節流方法，亦即放棄財政自主嘅能力。打後幾年，不論國會會否進行大選，現時執政嘅人會否被替換，財政上將無改變之餘地。咁點解孫柏文今日要大家想像喺希臘發生緊嘅事，如果喺香港發生又會點？

因為不論特區政府嘅官員、議員係點揀出來，如果香港政府一旦染上希臘式嘅財政問題，就算係一個普選出來嘅特首，都要向出手救我哋嘅人，放棄我哋嘅高度自治權。連點使錢都要人哋批時，港人治港、一國兩制呢個大膽試驗，亦會被宣布失敗。

有好多人會問，究竟點解，我哋香港要持有咁多財政儲備？而數額之大，甚至曾被前港督彭定康笑言，媲美歷史傳說中埃及艷后嘅嫁妝。

究竟儲備多好定少好？有冇「合理」嘅水平？我就留番俾大家諗，不過，現水平嘅儲備，就係最實際保護一國兩制嘅盾牌。

嗰啲支持政府自己興建例如「高鐵」等回報成疑嘅基建、要求不斷推高福利開支、又或者要政府帶頭使錢「推動經濟」嘅香港市民，你絕對有權繼續有你嘅要求，覺得呢啲要求有值博率。我只希望你要求嘅同時，知道背後嘅賭注有幾大。