重申一注獨贏買白銀

各位白銀戰隊成員，隊長speaking。我知道上個禮拜五，今個禮拜初辛苦了大家！如果你係靠借錢做margin嚟買白銀，你應該已經被斬倉。不過如果你冇借錢冇做槓桿咁買實貨白銀，今次冇錯係一場災難，不過同時造就咗一次大舉入市嘅良機。

所以今日，我要重申一注獨贏買白銀。
重申建議買入：白銀
目標價：每盎斯120美元
年期：至2016年3月6日

跌浪造就入市良機

有貴金屬淡友話，之前3月個個開口埋口都講「滯脹」時，好多從未買過貴金屬嘅人，都蜂擁入場。到咗今日，已經再冇人講「滯脹」時，當然就掟晒啲黃金、白銀。

呢個見解孫柏文冇異議，我估有好多呢啲新人，喺呢個跌浪已經離場。剩番忠心耿耿，對戰勝紙幣狂魔不離不棄嘅白銀戰隊成員，仲揸住白銀。我哋係唔會賣嘅！冇人再提供沽壓，白銀仲唔見底？

多都唔講，平時白銀喺亞洲交易時段係唔會點郁，平均每日都係喺花旗國開市之後，銀價先至大上大落。不過今次大跌市，銀價嘅低位14美元一盎斯，就係喺香港開市時造嘅，仲要係喺14.5美元一盎斯，以極高速度掟落去。

之前幾日，花旗國市開市已經有咁嘅現象，最後亞洲市都一齊發生。「被人以高速掟落去」即係點解？咪就係啲借錢買白銀嘅人，被終極斬倉。

情況與活塞男相近

最後，白銀戰隊隊員《蘋果批》嘅高明輝忍唔住都想講番幾句：「早排喺蘋果動新聞入面睇到一條歷來最多人睇嘅片段，就係活塞男嘅片段，第一次睇，的確幾好笑。之不過，咁啱嗰幾日，白銀價格亦都直線向下插，我手頭上嘅白銀，竟然巧合地同活塞男當時嘅情況一樣，走又唔得，留低又尷尬。當我望住嗰個圖表，見到白銀價格直插到近14蚊嘅時候，我忍唔住學活塞男咁大嗌咗一聲：嗚呀！」

高明輝係買實貨白銀。所以我要同佢講句：「你僥倖活下來，就要好好活下去。加碼買白銀啦！」

買一磚磚白銀？

呢幾日，孫柏文應承過大家會講點樣買實貨白銀，所以今日我就會同大家分享買嘅方法。大家都知道，孫柏文重複又重複咁叫大家買白銀嘅時候，一定要買實貨。原本，孫柏文好 想好想推介啲賣一磚磚白銀嘅地方。不過呢幾日來，實在有太多人怕將一磚磚白銀擺屋企床下底，所以為求可以唔需要攞一磚磚白銀就可以接實貨，我今日推介大家 買白銀基金Silver ETF 。

因為呢個基金，可以好似股票一樣買賣，而大家每次向基金買一股，佢哋就要買十盎斯白銀。基金管理公司每年會從自動下調基金贖回價，去收取百分之一嘅管理 費當倉租，既公平又易明。大家絕對可以考慮買呢個基金，基金嘅股票編號係「SLV」。大家可能會問：「究竟用邊一個花旗國股票經紀好？」

大家可以考慮用我 用開嘅股票經紀E-trade（電話號碼：31913311）（利益披露：我冇收任何利益）。其實我用咗佢哋好多年都冇問題，所以大家不妨考慮用E- trade。最後，記得要長揸，最好每幾個或每個月儲夠錢就去買。