一注獨沽城市電訊，除非……

2012年04月12日

噚日起身一擘大眼，孫柏文就見到城市電訊（ 1137）出售佢哋嘅本業，將成個電訊網絡賣斷。記得好多年前，我啱啱入行做財演，有日收到城市電訊嘅電郵，話請我同佢哋嘅主席王維基見見面。見面時，講到城市電訊嘅長遠策略，當然就要講佢哋嘅光纖網絡。因為喺 90年代中，我中學畢業之後，幫當時係立法會議員嘅陸恭惠做咗一年 intern，有日跟住佢嘅助理去聽政府 Briefing，關於當時做咗冇幾年嘅有線電視。咁嗰陣聽完 Briefing後，我忍唔住舉手問：「點解鋪網嘅線，唔用 Fibre optics（光纖）？」當時係用 Coaxial cable。

王維基賣網要交代

當時政府個官嘅解釋，光纖本身好平，亦係最快，不過線兩端插嘅嗰部機就好貴，收費電視呢個用途用光纖唔合乎成本效益。唔係好多人會喺 95年想像到之後互聯網勁得咁緊要，如果唔係，相信有線寬頻（ 1097）當年就算都係揀鋪 Coaxial cable時，橫掂掘路咁煩同咁貴，一次過同時鋪埋光纖，最多只係擺喺到 Unlit唔着燈，之後等光纖終端機機價跌先用光纖。

就係有呢個記憶，我見王維基時話：「光纖有幾快，唔係條線本身，而係部終端機。個網一鋪好，就唔使再掘路都可以不斷增速，只要冇嘢快過光，光纖網就係最快。」王維基聽到，就笑一笑話 Agree，亦話所以如果要複製同一個網絡，就要同佢哋一樣全港咁掘。我最記得佢嗰句就係：「所以我做緊嘅生意係百年基業，之後個網係可以交畀子子孫孫。」

就係因為咁，噚日睇見城市電訊賣網呢單新聞，對我確實幾震撼。因為王維基賣網，有如李家仁醫生拋棄「小明」， Apple唔再用個「 i」字咁。所以，因為光纖咁掂，前景一片光明嘅話，城電就要向股東交代點解賣網。

第一個理由當然就係因為價好。城電市值 40億元，除手上現金後嘅負債一億幾，家賣個網同其他業務就賣 50億元，理論上，如果股價淨係同交易完畢後每股現金一樣，隻股都應該升兩成半，噚日埋單只升半成，究竟係啲人未瞓醒，定係覺得王維基係會摧毀價值，燒銀紙？

搞電視比想像中難

講到燒錢就要講賣網嘅第二個可能，就係因王維基搞網搞到悶，想搞其他嘢，價好唔好係其次，最緊要有錢玩。咁大家都知佢想大搞電視，以前已話會揼 25億元出來咁做，亦因如壹傳媒（ 282）搞電視，都比想像中困難同貴，睇住王維基講電視，好似見佢企喺焚化爐旁般。

相信有唔少城電股東，其實係唔想王維基搞電視，原本買你隻嘢，就係想好似買公用股咁，光纖真係可以係百年基業，當然賣網唔係唔好，價啱當然賣。不過賣完點可以變身變成咁？

光纖係啱，電視就唔係。所以如果真係咁搞，應該一注獨沽城市電訊，除非梁特首救佢。點救？就係唔發電視牌畀佢。呢幾年「香港營」背後有關勢力咁難先收到 TVB同亞視嘅話事權，突然多咗個控制唔到嘅頻道，點算呢？所以，一注獨沽城市電訊，除非攞唔到牌。

陰跌至央行出手

2012年04月10日

大家可能知道，喺我哋份姊妹報《爽報》度孫柏文同被譽為「有線劉央」嘅梁心欣有個投資倉。而同好多特區人一樣，佢就喺復活節遠行放假，去咗花旗國。我亦聽過佢話會約隔離版《利字當頭》嘅利世民一家大細，去花旗首都逛逛。

咁噚日早上起身時，一攞起電話，就見到梁心欣寄來同利世民嘅合照。原來佢哋一大班人走咗去花旗國嘅最中央權力核心、真正左右世界嘅總部度。冇錯，佢哋去咗聯儲局。

雖然幅相睇唔清楚，但以佢兩個作為香港財經傳媒嘅中堅，有理由相信喺相中正在示威。如果以本報解讀總理溫家寶評特首選舉咁解讀，先有濛眼嘅利世民，代表一眾手持同美元掛鈎港元嘅香港人，示意「冇眼睇」，仿如迷債苦主般以無聲高喊「還錢！還錢！」。

不過見心欣姐隻手豎高兩隻手指，展出「港女十式」中第二式 V型手勢，應該係想多謝量化寬鬆二期 QE2期間為股民帶來大升市，仿如想勸聯儲局快推 QE3。佢哋點示威都好，聯儲局可以再做嘢嘅時辰無多。坊間猜聯儲局如果要郁手，要喺最遲 6月前做，如果唔係就除非好似 08年咁，有大悲劇，否則唔想做嘢谷市，費事一旦共和黨上場，玩秋後算帳。

銅價窄幅橫行待爆

睇我覺得有預測世界經濟走勢嘅銅價，已喺窄幅橫行咗好多個月，似拉到盡嘅橡膠圈咁，待爆。心想入市嘅 fan屎，應該等到銅價有明確方向時，先入市都未遲，到時不但可坐順風車，仲可重手咁買。不過如果要我估，都係覺得大市似會陰跌至央行出手，大跌則央行出手會快啲。

最後想賣個小廣告，我幫港台節目《放馬過來》做咗次客席主持辯護以前港府嘅積極不干預政策，今晚亞視本港台七點。睇完，希望大家俾啲意見。

今季炒股基本六步法

七個禮拜前，孫柏文話過「晒冷買希臘 4月脫歐」。咁依家就已經係 4月，希臘就仲未脫歐，我錯咗。我估唔到希臘走數下，寧可學冰島咁火鳳凰般重新洗牌復活，都唔把握機會，政客們寧願做北方勢力嘅棋子，繼續 Kick The Can Down The Road咁拖。

估再印鈔未必錯

民主，喺發源地已死。我懷疑希臘幾時先再會有個民選領袖呢？依家意大利都係咁，領袖內閣全都係北方欽點兼委任嘅建制派，所以當西班牙民選總理講財赤果陣，話睬歐盟都傻時，應就快被「 Henry Tanged」。

點都好，周二香港凌晨，聯儲局就公開之前嘅 FOMC會議紀錄，點知一出後花旗國股市、黃金白銀等商品價格等全線下滑。因為紀錄中講到聯儲局裡個個都想收水，話到明經濟轉好唔使再出手，咁之前（至呢刻）嗰啲話聯儲局會喺 6月時再印鈔之人，例如高盛等，都面懵。

當然， 6月仲未到，高盛仍未錯，雖然呢排全球 ex南歐嘅採購經理人指數（ PMI）個個向好，不過高盛仲有大把時間可以啱。當喺政治裡面「一個禮拜係好長時間」時，各市場都係央行專政嘅世界，兩個月係足夠時間，可令好多最終「逼」央行出手嘅事發生。

現正重返第一步

大家現在可能會問：「咁啲資金即係點部署呀？」呢個就簡單啦。無他嘅，由 08年雷曼爆煲後，炒股基本六步法就係順序：（一）資產市場暴跌；（二）經濟前景惡劣；（三）全球央行印鈔；（四）資產市場飆升；（五）經濟前景看穩；（六）全球央行停印。咁我哋啱啱過咗第六步，又要循環返去第一步。

以上六步，我今日喺《爽報》都有分享，不過你畀得六蚊買份《蘋果》，當然有更多，等我幫壹傳媒（ 282）試驗吓 Freemium Model。喺《爽報》度話依家返去第一步，即市場要跌，只係請人食餐飯，喺《蘋果》當然就係教大家點樣搵食啦，授人以魚不如授人以漁。

所以，今日喺呢篇文隔離有幅圖，喺畀大家剪出來 Keep喺銀包度。每次你對投資部署有好多疑惑時，就攞出來睇睇。因為我相信，一睇你就知點做。淨喺呢幅圖都值六蚊啦！其餘曾博士、沈大師、陸叔、青姐嘅文就當係送畀大家點話。

國進民退害國企

April 3rd Apple Daily

噚日，孫柏文一直被一個怪現象纏繞住個腦，呢個怪現象就係同 PMI、即採購經理指數有關。咁好多人都覺得呢個指數可預測未來經濟活動，因為各企業負責採購嘅經理人，應該係睇需求最清楚嘅一群。咁喺大陸啱啱出嘅半官方 PMI，就話呢班經理人連續幾個月都睇好。

不過令人費解嘅係點解都係大陸 PMI，不過滙豐計嘅指數，就連續幾個月都係話經理人睇淡。究竟發生乜事？大家都知舊年，特別係下半年，上邊銀行收水收到通街借大耳窿，就算唔係資不抵債，都會因周轉不靈而要走佬，有 Spare cash嘅就個個走去放數。

屈機空間收縮

喺呢段時間，滙豐同半官方計嘅 PMI，走勢相似，兩個都係下滑。不過近呢幾個月背道而馳嘅走勢，引出好多唔同嘅解釋。

我覺得最好嘅解釋，係半官方嘅 PMI比較多大型，即就算唔係國企，都會被國家睇實嘅企業。呢啲企業喺國家計劃經濟式分配資金，仲要因為政策，面對有限度競爭，一定遠易過冇背景企業。同時，呢啲企業嘅客人，多數係國內同胞，所以話佢哋睇好啲唔出奇。

而滙豐嗰個指數就多啲問中小企、民企，難集資，個採購經理如果喺咁嘅情況仲話自己樂觀，直情係對公司及其股東不負責任。

喺呢個睇落似「國進民退」嘅情況下，對任何國企，特別係香港上市嘅國企來說都唔係好事。我哋香港人呢 20年來對國企如癡如醉，係因為當經濟越來越多部份開放，惹來激烈競爭，越來越有效率時，淨番落來，受政府保護嘅企業，屈機搵錢嘅機會就越豐厚。

不過當經濟活動越來越多強制性控制時，本身表現就會越來越差，到時呢啲受政府保護企業屈機嘅空間大大收縮，國進民退先最害國企盈利。

通識恩恤金計畫

孫柏文將會為所有2012新高中考生提供$30,000「通識恩恤金」

條件：

1. 新高中考試考5科或以上
2. 除通識科外全A
3. 通識科要考，考完成績不合格。

成績公佈之日，達以上條件者，請聯絡我。人數不限，所有達標者均有$30000

一注獨贏梁振英連任

今日孫柏文同大家講，梁振英將會喺 2017年成功連任做特首。

講未來，先講歷史。咁如果同啲玩開大國政治嘅人，例如彭定康（肥彭）傾大趨勢同地緣政治，往往都會由冇雷公咁遠開始，例如由 1648年嘅 Peace of Westphalia講起。咁大家都話呢次梁振英當選，係香港遊戲規則嘅大改變。大家一定同我一樣咁問，改就改，不過會點改先？中央話事人睇香港，究竟我哋一路以來為國家帶來乜嘢影響。所以我哋就要睇番 19世紀香港被英帝強搶之後嘅事（「開埠」一詞係英帝嘅 spin）。

香港往績案底累累

我哋香港曾出過孫中山，最後推翻清朝，根據陸恭惠所講，喺 1949年前，曾經係中國共產黨喺華南地區最大基地。睇往績，香港案底累累，多年來一次又一次顛覆當時嘅中國政權。如果係玩真正嘅大國政治，香港一定要被收復，仲要收復嘅係人心，解放軍坦克唔可以硬來。要做到坦克來時行彌敦道，兩旁港人自發性咁搖旗歡迎。

大家可能話，我哋已經好靠大陸，冇佢哋已死。咁我要解釋，你哋講緊嘅就係我哋香港有如一個好勁嘅外科醫生，依家絕大部份都係睇大陸病人，冇咗佢哋搵少好多嘅嗰隻「背靠祖國」。我講緊係要做到呢個外科醫生，借到盡揸咗四層豪宅，一個浪冚埋嚟，負資產兼被人 Call loan，問老竇老母撲錢簽賣身契嘅嗰隻「依賴祖國」。

一路以來香港可以選擇性被收復，要搞啲乜嘢一國兩制畀我哋，就係因為唔使其他人接濟。自己搵自己食，當然唔使聽你支笛。即係我哋香港嘅財政儲備，亦成為保障我哋選擇性被收復嘅金盾。如果冇計算錯，有關人士出到咁盡嘅招去控制特區政府，就係要拆散呢隻金盾。有如希臘般，德國毋須一兵一卒，連總理都幫你揀埋，財政點使亦寫晒。所以梁振英將會用盡全力去燒走儲備。

大家會話，即係勁使啦！啱緊部份，我敢預測，如果世界各央行繼續係又印唔係又印，梁特首勁使，佢第一屆任期都可以年年有財政盈餘，方法就係收入更多就得。大家聽到必問，年年有餘又如何燒走儲備呢？

本地零售大升特升

我相信，梁特首將會大規模增加政府做貸款擔保，斷萬億計嗰隻，又會入股（經特區主權基金？）公司，甚至學董特首整隻盈動（當年嘅 1186）畀你炒。買樓？學生？生意佬？通通借錢都有政府擔保，銀行每放貸有如買咗香港政府出嘅債券。當債仔們嘅利息開始狂跌，個個就會勁借，谷行經濟，稅收狂升。甚至現有居屋唔使補地價下「正常化」，業權同私樓睇齊，可以按上按。

就同房利美、愛爾蘭政府一樣，信貸泡沫未爆前，話事人萬人愛戴，香港人要乜有乜，最驚你冇「強烈要求」。守財奴？冇㗎啦，連度橋嘅政務官（ AO）都因冇財政束縛愛振英。仲要年年盈餘，梁振英嘅第一屆任期將會比彭定康更輝煌。儲備，用有利嘅會計制度，更可越來越多。仲因政府畀錢你，唔同市場制嘅顧客，唔係因為你做得好，而係政治力量多，所以示威會有回報。大家未來呢五年，就係要 position自己去攞呢筆錢。唔易，不過將會搵一轉，就可以個孫打跛腳都無憂。做本地客嘅本地銀行，將大受惠，本地客零售例如領匯（ 823）將會大升特升。

咁 2017連任後香港會點？問榮智健啦。

仲有冇「香港」？呢個問題，今日來個了斷。

保衛香港核心價值，我哋已經派出最強陣容。

我哋出到李嘉誠做隊長都保唔住，就真係game over。

傷心？係。不過起碼有個了斷。

God Bless 香港。

自封頁岩氣解放軍司令

2012年03月22日 

今日未入正題之前，孫柏文想為本欄禮拜二題為「富士康大獲全勝」一文中，提及組織「大學師生監察無良企業行動」 SACOM嘅部份道歉。

篇文話，個幾月前有個喺美國全國公共廣播電台播放 NPR，有位叫 Mike Daisey製作嘅報道話幫蘋果（ AAPL）做代工嘅富士康（ 2038）虐待啲員工。

之後 NPR罕有收回全集報道，仲話報道違反記者操守。而當日我話 Mike Daisey靠我哋香港 SACOM啲料做報道。

事實係調番轉。啲踢爆 Daisey嘅人，其實係用 SACOM啲料去指證 Daisey嘅不盡不實。 SACOM啲料其實救咗富士康，而唔係鋤死佢。我錯咗， Sorry。

科技進步開採成本降

好，入正題。大家作為《金手指》 Fan屎，都知道我係白銀大好友。六年前，即未有金融海嘯時，《金手指》開欄嗰日已講話聯儲局為首嘅「紙幣狂魔」會不斷攻擊紙幣購買力，所以，要買白銀保護自己，變成白銀戰隊一份子，我就成為白銀戰隊隊長，亦於同日話白銀將會喺十年之內升 12倍。

今日，我要宣佈另一長買長勝概念，就係大陸 Shale Gas頁岩氣！早兩個禮拜，其實我已提過頁岩氣呢樣嘢。頁岩氣，其實只係喺頁岩石中開採嘅天然氣。傳統天然氣，喺地底時有如氣球裏面嘅氣體，插支管入去就攞到出來。

而頁岩氣就係好似焗蛋糕時，原本係液體嘅蛋白，拂起變泡時內藏嘅氣體。你焗過蛋糕的話，就會問：「點樣釋放啲氣出來呀？」其實同我當年家政堂老師所講，拂蛋白唔好振個容器嘅原理一樣，只要個 Structure開始微裂，內藏嘅氣體就會被釋放（冇錯， 90年代初我中學已教 molecular gastronomy）。個問題係點微振啲藏有天然氣嘅頁岩石。

之前，頁岩氣同加拿大嘅油砂，都係面對太高成本嘅問題，所以冇被開發，亦被標籤為「科幻小說」先會用嘅能源。不過亦同近十年嘅油砂一樣，不但需求帶動令價格上升至有得做嘅地步，仲要微振頁岩石嘅科技，令開採成本不斷下滑。到臨爆金融海嘯時，大量項目喺花旗國拍板上馬。

中華煤氣唔會被壓價

到 2010年，開發項目開始投產，令就算有一浪接一浪嘅央行「量化寬鬆」印鈔下，天然氣價格越跌越低，天然氣價喺花旗國每單位由 6蚊美金跌到依家兩個幾，同時中國油價敏感度好高嘅布蘭特期油價就升咗五成。畀你做我國中央，睇見都流口水，根本就想大做特做。

有咩公司受惠？ 3月 7日我已嗌一注獨贏珠江鋼管（ 1938），因為內地天然氣零售價一定被發改委壓住，賣氣冇得賺，網絡營運商都冇，要賺就只得鋪網嗰啲公司。

不過有間公司，不但可以買氣時越買越平，仲可以唔使畀發改委壓。呢間係乜嘢公司？咪就係因一國兩制，所以可喺香港自由定價嘅中華煤氣（ 003）囉！所以，除打購買力防衞戰嘅白銀戰隊隊長外，今日我就自封兼任頁岩氣解放軍司令！全力釋放頁岩中嘅天然氣！