石油分析員個腦生係個pat pat到

孫柏文以前做石油分析員既時候，係辦公檯隔籬道牆，貼咗一幅大大幅既世界地圖。等我可以好清楚咁，睇下石油公司既石油開發項目係邊度，又可以睇下耐唔耐同行分析員吹既「國際外交危機」風，係堅定係流，係唔係真係好似D分析咁話係推高油價既原因。

初時，因為自己啱啱入行，又覺得作為一個渺小又被邊緣化既香港人，分析石油走勢，點會叻過果D外國分析員，所以佢哋話XX外交危機係推高油價既原因，而唔係好似自己分析咁覺得係基本供求問題推高油價，都會唔敢出聲。不過後來，自己做石油分析員既時間耐咗，每一次聽到外國分析員話XX外交危機係推高油價原因既時候，我個隻天賦既金手指，就會自自然然咁充滿血液，想去篤爆佢哋D謬論。因為好多時候，只要擰轉身睇睇貼咗係隔籬牆既世界地圖，就知道佢哋講既XX外交危機係流嘢。我每一次聽到D二流外國分析員既分析，就會諗：「佢哋究竟係冇錢買一幅世界地圖，定係個腦生係個pat pat到？」

咁而家我轉咗行做財經口水老之後，每一次吹XX外交危機風既時候，聽到今時今日同行既分析，都發覺自己想問下佢哋同一個問題。當然，我知道作為財經時事口水老，真係一個「唯恐天下不亂」行業。因為如果天下太平，口水老就冇得噴口水，所以當同行好似偏執狂一樣，講到會有第三次世界大戰既時候，我都會客氣一D，同自己講佢哋只係搏收視。因為有得噴口水，財經時事口水老，發夢夢到第三次世界大戰既時候，會興奮到射D未必係花旗國巡航導彈既嘢上天。

近期，吹得非常之利害既風，係話因為花旗國牛仔總統，會用核子武器去炸爆伊朗既核子反應堆，所以令到黃金、石油、白銀全線飛升。仲要好似好有根據咁，話怕有每日全球六分之一石油通過既霍爾木玆海峽(Strait of Mormuz) ，會唔俾油輪過。霍爾木玆海峽唔俾油輪過係唔係好大鑊？係。花旗國用核子武器去炸伊朗，係唔係會令到油輪過唔到霍爾木玆海峽？可能係。咁花旗國係唔係會用核子武器去炸伊朗呢？一定唔會。我相信去到呢度，就算係金手指fan屎既你，都會有小小唔服，會問孫柏文一句：「如果花旗國一定唔會炸伊朗，咁點解白宮西翼會傳出咁多反伊朗風聲呢？」

問得好！如果我D同行，都好似大家一樣咁好學，我隻金手指今日就唔駛要出動去篤爆佢哋D謬論。因為只要有少少邏輯，都知道花旗國牛仔總統，根本就冇興趣去搞伊朗。大家試試由牛仔總統既角度去分析，你係一個派左幾十萬士兵去到世界另一邊既總統，而被你「解放」既國家人民，好多仲係「唔領情」咁同埋你D士兵開緊拖。咁你既首要任務，一定係去「平息」呢D唔領情既人搞出來既反抗。而家，花旗國既士兵就係紮營係伊拉克同阿富汗，咁如果大家好似我以前咁，隔籬道牆貼咗一幅世界地圖，唔該幫我睇睇伊拉克同阿富汗，夾住乜嘢國家。

無錯，伊拉克同阿富汗就係夾住伊朗啦！作為金手指fan屎既你果然醒目。仲有，如果大家有支marker筆，就幫我跟著D軍情報告咁，油咗伊拉克同阿富汗裏面，花旗國士兵仲未控制既地方，大家就會發現全部都係伊朗附近既區域。咁如果你係牛仔總統，相信伊朗係度搞搞震，你都會用核子武器控一控伊朗，叫佢D靚唔好係度搞搞震。所以大家唔好覺得花旗國會炸伊朗。

大家相信會追問，咁黃金、石油、白銀都升咗，如果花旗國同伊朗唔開拖係唔係會跌番落來。孫柏文同大家講黃金、石油、白銀升根本同伊朗無關，係因為本身供求問題，所以先至升。不過，石油股今次升浪算升得少，差不多冇跟住油價升，原因係有好多人覺得石油升係因為伊朗會被人炸，係D短暫因素。所以，孫柏文推斷，只要今次伊朗風波平息之後，市場又見唔到油價跌，就會明白油價升係供求問題，跟住覺吾到石油股大落後，然後會入市追貨。大家最好就而家買定D 883中海油，等伊朗和平。

預測通脹：債市vs金市

尋日，講咗本欄叫<金手指>既原因，唔係因為孫柏文鍾意篤人背脊，係因為想紀念一齣叫「鐵金剛大戰金手指」(Goldfinger)戲，同埋實現齣戲背後既愛祖國精神。咁篇文登咗冇耐，就收到因揍女忙碌，而暫時讓咗篇幅畀我既《利字當頭》一欄總舵主，利世民兄既電話短訊。

佢話未睇過「鐵金剛大戰金手指」齣戲，唔知道齣戲係講述一次祖國想用黃金去反美帝資本主義既「愛國動作」片，不過因行動失敗變成為「愛國動作悲劇」片。問孫柏文有冇得借畀佢睇，原本我只係諗住用電郵寄個BT file叫佢自己網上下載，不過我諗下諗下，呢齣咁愛國既經世巨片，係應該人人都有隻copy。所以我就打電話，叫咗個日日要返深圳既朋友，係羅湖商業城買隻「鐵金剛大戰金手指」既DVD。不單止可以畀利世民兄睇，仲可以出點綿力去反美帝，撐下而家係花旗國，傾緊中美貿易問題，負責外貿商務副總理既吳儀。希望世民兄睇完都覺得好睇。

仲有，尋日收到世民兄既電話短訊之後，我都即刻打番電話畀佢。傾下關於「鐵金剛大戰金手指」齣戲既事，不過因為我唔想透露太多戲情，所以係想轉話題。傾下傾下，我同世民兄都唔知道點解會傾到關於花旗國既通脹問題。佢話：「當年，格林斯潘開口埋口都話債券(Bond)市場走勢係一個「謎團」（conundrum），我話債市(Bond Market)其實好清楚咁同大家講話，唔會有通脹，債市講到明話美金會保持購買力。真正既「謎團」，係點解黃金係咁升，令到大家都覺得，金市話美金購買力會仆直。」

原本我係想同世民兄講關於「上帝大戰凡人」既故事，想同佢講美金債市係凡人既代表，而黃金就天神既代表。咁佢信債市講既嘢，還是信金市講既嘢呢？不過，因為世民兄聽我講「上帝大戰凡人」既故事，都至少聽個幾百次，所以我就叫世民兄唔駛諗咁多，一收到我畀佢個隻「鐵金剛大戰金手指」既DVD，即刻去睇睇。我仲用隻金手指幫佢篤咗戲裏面其中一幕，嗰一幕有一個對話，睇完就可以明白今時今日債市同埋金市，對美金購買力有乜嘢講，就係：

Bond: 「Do you expect me to talk？」
Goldfinger: 「No, Mr. Bond. I expect you to die。」

債券先生：「你有預期我會講嘢咩？」
金手指先生：「冇，債券先生。我有預期你會死。」

我相信世民兄睇完應該會有點啟發。
花旗國反黑工：全球衰退

講起花旗國問題，花旗國政府今日除咗同祖國貨品入口有問題之外，佢哋呢排對鄰國墨西哥既黑工入口問題都議論紛紛。有花旗國政客想一次過，將而家係花旗國大約一千二百萬個墨西哥黑工遞解出境，仲話要侵犯祖國既知識產權，係墨西哥同花旗國邊境去起個B貨萬里長城，等啲墨西哥人唔可以偷渡入境，根據民調，呢個方案係得到花旗國大多數人支持。不過又有政客，因為人道理由及整體經濟大局，想大量發放工作証畀啲黑工等佢哋可以合法化。咁孫柏文早排都用過「通識教育」既討論方法，去分析這個問題。

總結下嗰日篇文從經濟角度既分析。因為而家花旗國勞動人口緊張，如果花旗國忽然無晒黑工，咁就會有沉重既通脹壓力，令到聯儲局局長伯南克，要瘋狂加息去壓抑通脹。咁如果瘋狂加息，就會震散全球經濟。

咁嗰日從政治理論角度分析呢件事，衍生出來既問題係，政客係應該有道義責任好「貼市」咁代表選民每分每秒都會轉變既慾望？還是係應該有道義責任就算反對民意，都做自己覺得啱既嘢，選民唔likey可以下次唔投票選佢呢？

咁今日，我再用而家好in既「新君王論」去分析呢件事。係花旗國想做總統，加州同德州係兵家必爭之地。而因為兩個州都係同墨西哥為鄰，所以好多非法入境者衍生既問題，都反繞呢兩個州既人民。近四十年，花旗國民主黨都係好倚靠少數民族去贏選舉，而共和黨就好靠白人選票。而其中一樣最多白人就係打擊墨西哥來既非法入境者，在一九九三年加州共和黨就係靠一條反非法入境者法例贏選舉。不過，因為居住加州既墨西哥裔選民越來越多，共和黨為了贏九三年既選舉，就付出了係加州銷聲匿跡既代價。唯一一個可以係加州贏選舉既共和黨人就係亞樂舒華辛力加。佢而家好慘，如果支持黑工就會損失白人選票，不過如果反對黑工就會損失墨西哥裔人選票，祝佢成功連任好運。

最後，除咗加州之外，共和黨都要係全國面對呢個選票取捨方程式，所以今年１１月選舉共和黨都會幾大鑊。

<金手指>名從何來

孫柏文謹代表<金手指>一欄，要同社會各界講一句：「多謝！」。多得一班社工同好心人，好似我呢D患有注意力缺乏∕過份活躍症(Attention Deficit/Hyperactivity Disorder ADHD)既長期病患者，亦都開始受到社會有關人士既注視。蘋果日報為求可以清楚明白，社會對呢隻病既長期病患者，有幾高既容忍程度，所以度左一條好橋，進行一場大型既社會實驗。方法就係將<金手指>一欄發大，睇下大家可以忍到幾時，先至大規模寫信來叫孫柏文收番隻金手指。所以，由今天開始，試用性咁畀<金手指>多D篇幅。

<金手指>一欄，作為fan屎既你，肯定作過好多關於本欄點解叫<金手指>既猜測。大家作為香港人，孫柏文都已經估到，你地一定係諗緊：「孫柏文硬係鍾意篤人背脊，所以先至叫佢個專欄<金手指>。」大家都估錯啦！本欄叫<金手指>既原因，除咗我鍾意用隻金手指去篤爆D謬論之外，其實係想紀念一齣戲。齣戲名係「鐵金剛大戰金手指」(Goldfinger)。

想紀念呢齣戲既原因，係因為戲中講，祖國政府英勇地計劃了一場，可以在美帝手中，攞番我哋中華人民多年來被搶去黃金白銀既行動。在戲中，祖國政府又憑共產真理成功說服了，在外國崇尚自由貿易既親華人仕，得到佢地既支持同合作。可惜，那個叫Auric Goldfinger既親華人仕，因為資源缺乏，迫不得已之下要修改行動計劃。抱著一個「中華人民冇，美帝都要冇」既革命精神，由原先要攞番美帝手中既黃金，改為完全摧毀美帝手中既黃金。不過到最後，這場精心策劃既行動，被一個道德敗壞，喜歡嫖、賭、飲、蕩、吹，既酗酒濫交英帝間諜，好扶轆咁破壞咗。

孫柏文就係希望延續「還祖國人民，黃金白銀」既精神，將本欄改名為<金手指>啦。

白銀又新高既啟示

講起白銀，上個禮拜五又再一次係多年新高位收市。白銀呢個日日創新高既現象，已經有如每日潮水漲退般穩定，都係學番鬼老個句：「Another Day，Another New High」。

要達到金手指係三月六日，為大家篤出既120美元目標價，已經唔需要升十二倍。而家只要升十倍都已經到目標價。主要原因係花旗國交易所(American Stock Exchange) 既揸fit人，話花旗國證監，會批准「白銀投資基金」呢個禮拜開始進行買賣。咁點解呢個「白銀基金」會搞到銀價日日創新高呢？

金手指曾經為大家篤過有關巴克萊銀行「白銀基金」既細節。總結下呢個白銀基金，佢係一個有股票篇號既基金，即係話呢個基金可以好似股票咁買賣。你每次買一手基金，巴克萊銀行就會即刻係公開市場，買一盎斯實貨白銀放響個貨倉裏面。等大家買實貨白銀好似買股票一樣咁易。點解要咁做？因為好多花旗國市民，除咗買股票之外，其他投資渠道欠奉。

咁「白銀基金」點樣推高銀價呢？據聞，「白銀基金」上市，已經吸引到足夠資金去買高達1.3億盎斯白銀。做一個比較，每年在各國銀鑛生產出來既白銀都只得6億盎斯，以每年全球白銀需求有8億盎斯。而紐約商品交易所(Comex) 白銀存倉量，也只剩1.24億盎斯，比九十年代中下跌70%。如果「白銀基金」一夜之內，將紐約商品交易所既白銀攞走，咁白銀用家就差唔多要第二日已經開始搶白銀。咁白銀仲去唔到120美元？

雖然，有好多財經口水佬話「白銀基金」一上市，白銀就會有回吐，不過孫柏文唔係短線走勢既「專家」，所以我都係No Comment。我隻金手指只係知道，話「白銀基金」上市，白銀就會有回吐既財經口水佬，講到「白銀基金」好似一間公司上市咁，上市之後會有一段時間唔批新股。完全忽視如果基金上市之後，投資者追買基金單位，「白銀基金」就要再去買白銀。所以如果大家諗住用「白銀基金」上市等白銀回吐呢個入市機會，我都係得一句：「祝君Timing好運！」

最後，千萬要記得孫柏文曾經講過，隨時都係入市買白銀既好時機。

Caption：大家千祈唔可以用容忍，一個反中亂港既英帝間諜

石油唔跌就會番十番既投資 (The one trade that you can retire on - 李怡先生 and I also discussed this trade and 佢都話 two thumbs up!)

只從孫柏文隻金手指，係３月６日開始日日同大家見面之後，fan屎數目有如幾何般咁升。「幾何般咁升」點解？即係嗰種德信佳/盈科數碼動力，仲係1186從九八年至00年既升幅。我fan屎數目升既原因好簡單，就係我呢一種對實貨白銀不離不棄既態度，夾住個一種白銀日日創新高(another day，another new high)既氣勢。

不過呢個香港特區，一個人fan屎多既時候，就自自然然會出現一啲患有「紅眼症」既人。患病既病人，其中一個最明顯既病症，就係運用佢既專欄去「提點」他人既論調同埋建議。其中一個最嚴重「金氏紅眼症」既病患者，就係隔籬《利字當頭》一欄總舵主既利世民兄。而佢對我隻金手指篤出來咁多個既建議，最唔likey既係，我建議大家買白銀，不過可能要喳十年。總結世民兄對孫柏文既提點：「十年？你既投資建議，分分鐘連香港都有民主，都可能仲未派彩啊。」

所以為免又有七十幾歲既長者，帶有７分失望同埋三分希望咁，係本欄隔籬周圍登全版廣告，問小弟一句：「在我有生之年，我會見到放白銀的一天嗎？」今日，孫柏文就想用隻金手指幫大家篤一項可能在兩年之內，將大家既本金番十番既投資。

我既建議，就係大家做半成按揭係加拿大，阿爾伯達省(Alberta)買樓。大家都知道，世界石油需求增加，好大程度上係中國同埋印度既高速增長。而世界石油既後備供應量，根本就係零。所以每一次有一個中國或者印度人，想買多一公升油，佢就要托高出價，去搶人哋已經用緊既油。正當價錢越來越高，就自然會有人想將石油供應量推高。咁係呢世界，最有本錢增加石油供應量既地方就係加拿大，阿爾伯達省啦。佢哋有一樣叫做「油沙」既嘢，油沙以前係唔算有供應石油既潛能，因為開發所需要既成本實在太高。要抵銷開發成本，油價必須要四十美元一桶以上。不過呢幾年來，油價真係徘徊係四十美元一桶以上，所以越來越多油沙既發展項目上馬。
企業發展油沙項目，需要大量工程師同埋普通工人，雖然佢哋已經係同行公司高薪挖角，不過都仲係叫苦連天話請唔到人。人工就自自然然攀升，亦可見到消費力非常之強。大家自然會問，因為市場應該知道，人人有工做，人工又高，又可預見到大量人才移民到去該省，所以樓價應該已經升晒。不過，金手指叫大家係阿爾伯達省買樓既主要原因，就係因為買樓既人唔相信油價可以維持。阿爾伯達省市民，個個都帶著八十年代中，石油泡沫爆破令到樓市仆直既陰影，所以我覺得仲有排升。我相信，阿爾伯達省樓價會係06、07每年升20幾%，乘埋有60%，咁如果大家做半成按揭，咁大家既本金咪可以番十番囉！

首先，孫柏文覺得阿省所有物業都應該升，不過如果買投資物業，當然要留意兩個最大影響物業炒值力能既因素。第一，就係物業成交流通量，第二，就係物業租金收入潛力有幾大。所以，金手指為大家篤既建議，就係保守啲既投資者係阿省兩大城市，卡爾加里(Calgary)或者埃德蒙頓(Edmonton) ，買近市中心既公寓單位。因為經過孫柏文實地視察，兩個城市都出現公路塞車既情妨，所以近市中樓會越來越吃香。又因為，公寓單位流通量比獨立屋高，所以到時候出貨都會易啲。最後，公寓單位比獨立屋易出租，所以租金收入都會比較穩定。

進取啲既投資者，可以考慮買麥嘜厘堡(Fort McMurray) 畀單身人仕住既樓。麥嘜厘堡位於油沙區中既為一城市，人口只得幾萬，不過因為附近有多個幾百億既新油沙項目，所以人口會不斷膨脹。而因新建物業增長數目，不及人口斷膨脹速度，所以樓價必升。不過，麥堡係一個冰封既地獄，一個很難住既地方，令到搬去既人，多數係單身人仕因工作去住，就算有家室，都只會係搵食果個住係麥堡，所以，如果買麥嘜厘堡既樓，就一定要係果啲畀單身人仕住既。

最後，要買就記得要快，如果唔係，到時升左唔好話孫柏文隻金手指冇篤過畀大家。

點解唔會有 Inflation Targeting

今日，孫柏文想用隻金手指，去篤爆一個，我已經再唔可以忍受既謬論。這個令到我想死既謬論，就係伯南克會落實「通脹目標設定」（Inflation Targeting）嚟主宰花旗國貨幣政策。「通脹目標設定」既貨幣政策，其實很簡單，就係如果通脹率高過預設某水平，就機械式咁加息去壓制經濟活動。又或者如果通脹率低過某水平，就機械式咁減息去振興經濟活動。新西蘭為例，就將最高可接受通脹率，定係2%，最低既可接受通脹率，定係0%。
想
不過，呢個係謬論，所以今日孫柏文想一完，我曾幾何時想為人師表既「理想」，誤下大家。

各位同學，跟我讀一次：「There will be no inflation targeting。」好，好，再讀一次：「There will be no inflation targeting。」Good，Good。希望各位，跟我讀完頭先個一句，都會信花旗國唔會落實「通脹目標設定」。

其實，花旗國唔落實「通脹目標設定」既理由都簡單。好多人話，如果有一個通脹率作為目標，貨幣政策就可以好「客觀」。如果貨幣政策好客觀既話，個隻貨幣既購買力會得到最高保障。即係話，越少人為因素干預，越「機械化」既貨幣政策，個隻貨幣既公信力就越強。不過，大家有冇諗過，決定通脹率既計算過程，其實係非常主觀。例如，如果酒吧賣啤酒價錢升30%，不過，豬肉價錢跌20%。一個酗酒既素食者，同埋一個食好多叉燒包不過又唔飲酒既人，手上持有貨幣購買力既變化就好唔同，即係話，面對既通脹率就好唔同。而計算通脹率既官員，就可以決定呢兩個人面對既「平均」通脹率啦。

如果伯南克落實「通脹目標設定」嚟主宰花旗國貨幣政策。即係變相，將貨幣政策既決策權，交畀設定計算通脹率既官員。在大多數國家，設定計算通脹率既官員，係一個唔起眼既中級公務員，試問，你知道香港計算通脹率既官員，係邊個？你又知唔知花旗國計算通脹率既官員，係邊個？

所以，如果當今世上，所有教育市民既人，例如老師、分析員、大學教授、財經口水佬等等，都好似我咁迫大家讀一次There will be no inflation targeting。咁世界就會少啲令我難受既謬論，我隻金手指都唔會咁攰。

教你上一堂通識教育 花旗國種族關係

孫柏文一連幾日都講白銀，大家都知道我係白銀大好友，而且隻金手指邀功都邀到手指軟，所以，今日想講番啲比較宏觀啲既嘢。順便同大家上一堂，通識教育課。通識教育係乜？總括呢講，就係啲冇model answer既學術研究，什至到係冇答案，研究完得出呢既結果係仲多知多點問題。

今日想講既係，花旗國種族關係。孫柏文有幸係花旗國讀大學，仲要係大學被人告到去最高法院，話我母校種族歧視既時候就讀。嗰陣時，真係覺得係種族問題上，黑人同白人冇偈傾。點知而家，真係有樣種族問題，花旗國黑人同白人都係普遍反對。佢哋反對啲乜？就係墨西哥非法移民囉。

根據估計，花旗國而家係有大約一千一百萬個墨西哥非法移民。花旗國人民話佢哋搶飯碗，同埋用晒納稅人既資源。咁今日通識堂，想研究既第一個角度，就係如果花旗國張墨西哥來既黑工，全部趕走晒，會對伯南克主宰既貨幣政策點樣？嗱，墨西哥來既黑工大約佔花旗國勞動人口既4.9%，而花旗國失業率只係4.7%，咁如果花旗國政府真係趕走晒啲黑工，花旗國生產出來既商品同服務既價格，就自然會升。首先，嚴重影響花旗國商品同服務既競爭力，出口減少，令到貿易赤字惡化，美元受壓。再講，如果花旗國商品同服務價格上升，亦都等如通脹率惡化，到時你話伯南克會點做？如果加息，咁香港會點樣？一條花旗國對黑工既法例，足以震散全球經濟。

再用第二個角度研究，花旗國人民係普遍反對被黑工融入花旗國社會既機會。不過，而家係花旗國參議院，係有一條被黑工融入社會既法例，得到過半數議員支持。有啲人話，咁樣係啱既，議員係應該有道義責任做自己覺得啱既嘢，選民唔likey 可以下次唔投票被佢。又有啲人話，咁樣係唔啱既，議員係應該有道義責任好「貼市」咁代表選民既聲音。呢兩種想法，就係麥迪遜式民主制度，同埋傑弗遜式民主制度既分別。係香港，直選議員都好啲，功能組別議員就日日為呢樣嘢掙扎。唔信？你問下會計界既譚議員。

因為字數有限，金手指就篤住咁多先，都知道大家學到好多野呢？所以大家都唔好話，通識教育冇料到。

再論買白銀姿勢與實際

尋日，孫柏文講過３月６日係本欄為大家用隻金手指篤既投資建議，觸動到蘋果財經版兩位高手，分別係禮拜一同埋禮拜二，對小弟作出咗一啲提點。亦因我隻金手指感激無限，我尋日係本欄對王冠一兄，係佢禮拜一「國際視野」欄，題為「有姿勢無實際、點贏？」一文作咗啲回應，以作報答提點之恩。

咁利世民兄，係佢禮拜二，「利字當頭」一欄，題為「姿勢和實際？」一文亦提點過小弟。小弟亦從世民兄文章中，特別係「姿勢上孫兄就笨拙少少」一句，得到很大既教訓。所以，好似尋日咁，孫柏文今日希望對世民兄既教訓，作一啲回應，以作報答教訓之恩。

而家，我試下總結世民兄對小弟既提點。故事起源，小弟３月６日編文，題為「一注獨贏買白銀」建議大家要強力買入實貨白銀，目標價為120美元一盎士，目標價有效年期為10年。咁世民兄對呢個建議，覺得最唔啱 feel 既係關於目標價有效年期為10年，呢樣嘢。世民兄話：「十年投資目標？香港又有幾多人同你等得咁耐？孫兄如果想黎個難道九點五分既動作，就不如同各位讀者分析下三個月白銀價格，又或者話下畀大家知今年底白銀見幾多都好。」

其實，短線炒作白銀唔係冇方法睇，只不過唔係好準。如果係準，孫柏文以經可以靠炒白銀孖展，發咗達。大家見到我仲未左擁右抱，就知道我未發達。如果真係要短炒，我覺得最好既參考工具，就係用白銀價50日同埋200日平均線。雖然我個隻金手指，成日篤爆技術分析係長線呢講，一定係流嘢，不過如果真係要短
炒，50日同埋200日平均線，係可以幫到你。今次大升浪，白銀現價每一次低過200日平均價，多過5%，都係一個冇死錯既入市價，而每一次白銀現價高50日平均價12%，都係一個好靚既短炒出貨價。而家，白銀現價高50日平均價約11%，所以大家如果係短炒，就小心啲啊。

仲有，世民兄禮拜二亦問了一句：「究竟金手指孫兄咁落力谷白銀為乜？」，而世民兄既結論係：「惟一解釋，就係佢一心想出位，想多的人記得佢個大名囉！」其實，繼尋日為自己被指為「相信會有世界末日既悲觀者」辟謠之後，今日想澄清我唔係為咗「出位」而「咁落力谷白銀」。我「咁落力」叫大家買白銀，都只不過出於一分愛港愛國之心。因為，我覺得每一個炎黃子孫，都應該肩負保家衛國既使命，所以，就「咁落力」叫大家買白銀。咁買白銀同愛港愛國又有乜關係？孫柏文會它朝為大家分解。

你仲有冇用ICQ?

禮拜六晚，孫柏文同班朋友劈完酒之後，又再一次一枝公返屋企。孤零零又wing wing地咁坐係部電腦前面，開下已經唔係好流行既網上短訊程式ICQ，睇下有無失蹤咗既女性朋友蒲頭，跟住用隻金手指同佢地溝通，溝通。其實，今時今日既香港，如果你同啲後生仔女話，交換一下「ICQ號碼」。撞正識少少科網歷史既後生仔女，佢哋都祇會笑你「乜咁out既」。撞正啲唔識科網歷史既後生仔女，佢哋就分分鐘會問你ICQ係唔係Telex或者電報年代既一種通訊技術。

其實，我係係花旗國大學讀緊書既時候，開始用ICQ，差唔多都有十年囉。當時，ICQ如日方中，稱霸網上短訊世界。網上短訊程式好唔好用，是決定於有幾多人用緊個隻短訊程式，因為越多人用個隻短訊程式，你就可以透過個隻短訊程同越多人傾偈。如果畀一個短訊程式你，冇其他人用，更好用，都冇用，因為冇其他人，傾唔到偈。呢一個現象，就係叫做「市集效應」（Marketplace Effect）。係古代時候，一個市集要成功，就要人流高。正當買家賣家都人頭湧湧，買方知道呢個市集有全城最多賣家競爭，就會相信到該市集會搵到最低既價錢。掉翻轉頭，賣方如果知道呢個市集有全城最多買家出價，就會相信到該市集會搵到最高既價錢賣貨。
最後，越係旺既市集就會越旺，越冷清既市集就會越冷清，直至到個市集人多到迫爆，就會見到有啲貨品既買賣雙方，自自然然咁去其他地方做交易。去到今時今日，二十一世紀，係虛擬世界係唔會有「迫爆」，所以如果你有一個全城最旺既「市集」應該只會越做越旺。不過，就算有更旺既「市集」，如果唔用心去管理，買賣雙方遲早會走去其他「市集」。我今日用ICQ搵唔到朋友，代表ICQ既沒落。ICQ既息微就係一個好好既例子，ICQ後來被花旗國AOL買咗，AOL又緊著同埋時代華那合併。最後科網爆破，ICQ變成棄嬰，ICQ越來越唔好用。一個唔用心去管理既「市集」，就算可以靠「市集效應」稱霸世界，都可以玩完。