interesting music

My new Blog. 【置頂】

My new Blog.

美孚八期業主點贏

上個禮拜六晚，我同老竇食食下飯，老竇突然一句：「嗰個涂謹申好水皮！」
孫柏文：「今次又咩事？」

老竇：「嗰日睇《鏗鏘集》，睇佢都搞唔掂美孚第八期海皮石油氣庫起樓單嘢。」
我：「嗰度真係勁，起到嘅話，業主可以喺騎樓由原先有無敵海景，變成伸手摸到樓。不過有得阻止咩？有得阻就起唔到『曼克頓山』啦！」

老竇：「你都唔識。」
我：「識嘅話，我都學阿涂去抽水喇。」

老竇：「哪，以前真係停唔到，不過，依家打官司就得。不過涂謹申呢啲級數嘅律師就唔識。」我：「憑咩理據先？同埋點解以前唔得，依家得？」

老竇：「憑一樣叫easement權嘅嘢。Easement權就係例如如果有個人喺你個物業周圍買地，重重包圍你間屋，你係有權要求嗰位人兄喺佢塊地度俾條路你行。咁除咗路之外，easement權亦包括『光』同『空氣』。」
我：「香港唔係冇呢個權嘅咩？記得以前跟你去開業主立案法團會議，你好大聲同屋企後邊啲業主講，佢哋冇呢個權喎。」

老竇：「香港以前真係冇呢個權，因為根據幾百年來案例，easement權只係適用於freehold永遠擁有嘅地，除咗中環St. John's Cathedral塊地之外，香港啲地全部leasehold，即係問政府租，政府先係最終地主。即係除咗St. John's Cathedral之外，冇其他人塊地可要求行使easement權。」

老竇：「不過，如果你上網睇。今年4月終審庭判出咗一單政府同一間叫Sun Honest Development嘅官司，寫判詞嘅外借法官Lord Millet，就將easement權伸延俾leasehold嘅地。終審庭案例喎，下邊啲庭仲唔跟足？」
我：「就係咁簡單？」

老竇：「你如果要打呢啲官司都要小心。因判詞話easement權喺香港要靠prescription，即係隔籬塊地嘅某啲嘢，例如行出去嘅路、陽光等，俾你用咗好多年，就唔可以攞走。所以，要打就要搵個住咗嗰度超過廿年嘅人去做受害者代表。」
我：「美孚交投量咁大，全部都係新業主咪冇得打？」

老竇：「嗰日睇電視都有個話自己住喺嗰度三十年嘅阿伯，喊苦喊忽。搵佢囉。」
我：「咁就易打番轉頭啦。如果我係發展商，就land search搵晒啲合資格業主，跟住高賠償庭外和解，其他啲就唔使理佢哋食自己。地產霸權你估係浪得虛名㗎？」

老竇：「哈，係。冇錯，咁地產商就可以拆招。」
我：「不過第時個個都話唔可以阻陽光，起樓點畫則呀？」

老竇：「關我咩事？我係律師，又唔係則師！」

白銀技術上勢危？

VST 5 day chart

商務部為何潑冷水

上個禮拜，我國中央政府就出現涉嫌洩露國家機密事件，事源好靚嘅出口數據喺正式公佈嘅之前一日流出。市場一聽到呢個消息，即刻炒上，連花旗國股市都隨即爆升。果然大國勃起，一齊開心。

究竟數據點流出，呢啲就流番其他人解釋，孫柏文最感興趣嘅係到數據真正公佈之日，有如上市公司報業績一樣，「管理層」有咩嘅相關評語。

咁我國中央政府商務部就話：「係，5月出口按年真係勁升百分之 48.5，不過首先舊年數據差到不得了，依家又天下大亂，歐洲勢危，你都唔好話對未來唔驚。」

呢句說話，就有傳媒行家形容為「大潑冷水」。用股民心態睇，冷水，必定係用來冷卻熱熾嘅心情，而股民最鍾意自我膨脹，心一定諗：「中央叫我哋唔好炒得咁熱情呀！」

其實，大家都知番工時，team人一大或要跨部門做嘢嘅時候，就會有各派系嘅人玩嘢，搞啲辦公室政治。背後send電郵俾老闆打小報告、高姿態敲老細房門、開會時對住員工甲講嘢，不過啲說話係俾員工乙聽等招數，相信大家屢見不鮮。

咁大家可能會問，今日講呢啲天下烏鴉一樣黑嘅辦公室政治為乜？我國作為人口最多嘅國家，就有歷史已來最大嘅官僚系統，咁當人越多就幾何級咁越多辦公室政治時，我國政府官僚系統仲唔係最多人玩嘢之地？就係因為咁，我相信商務部「大潑冷水」嘅對象，根本唔係我哋呢啲投資者，其實炮咀係對住人行至真。

商務部唔知幾驚因為數據「太靚」，令貨幣政策會收緊。商務部好想啲銀行繼續放水，好似舊年柑，因為錢多時，啲資產價格被炒上，連帶嘅財富效應就可令消費者放心使錢。09年我國信貸額，有如聖經挪亞方舟嗰隻水浸，由股到樓都勁升。

當然，蝸居、通脹等問題亦會衍生出來，不過商務部作為典型嘅官僚，只知其他嘢唔關佢哋事，究竟自己部門係咪「成功」，齋睇經濟增長率。其他事就留俾其他部門處理。

仲有，就係因為中央知內部咁多派系，衰啲講就各懷鬼胎，好啲就係因被唔同嘅政策考慮推動，所以已知要用力統一口徑。咁依家商務部插旗話經濟好多擔憂時，其他部門就唔可以亂來，零星嘅冷卻可以，宏觀打壓就唔得。大家股民識做。

最後，世界盃就開咗鑼，我發覺今屆睇波特別吃力。02年雙失，日頭日日喺屋企睇波都得，到06年，除咗正職就冇乜其他嘢做，所以又可晚晚睇波，不過到今年，原來自己儲埋儲埋都唔少工作要做，我呢行財經演員仲要因口停口停，所以我都妒忌嗰啲可以放大假睇波嘅人。

唔知下屆會唔會更加冇時間呢？依家都只係單身寡仔忙工作，唔知四年之後會點？

唔使再讀凱恩斯！

孫柏文曾經聽過個故仔，今日要同大家分享。有個經濟學家叫John Maynard Keynes，中文叫凱恩斯，如果你讀過香港教育署嘅會考程度經濟科課程，都應該知佢係邊個。

咁佢以前，就喺劍橋教書，有日佢授課時就見有一個之前嗰晚去玩、劈酒嘅學生，因為酒氣未除、筋疲力竭，上課時瞓着咗。

凱恩斯見到佢咁，就即刻大發雷霆，走過去學生度大力拍枱，跟住要求個學生答佢啱啱問嘅問題。
學生即時彈起身，雖然嚇一跳，不過清醒起嚟咁答：「凱 Sir，我真係聽唔到你問乜。不過答案係政府應該加大開支！」

今日要同大家分享嘅原因，係因為凱恩斯真係吓吓得加大政府開支做解決經濟問題嘅答案。例如，問佢：「西班牙失業率百分之20，點先可降低？」佢唔會話叫西班牙檢討吓「老闆唔可以炒人」，呢啲特區著紅色衫後生仔、露事業線後生女社運家最支持，不過最終搞到工人冇工開嘅低能政策。

凱恩斯只會答：「加大政府開支！」

究竟呢條橋得唔得？呢個之後再講，不過吓吓加大政府開支嘅代價，就係政府財政赤字會越來越大，冇儲備就會有國債。最終債台高竹，爆煲等人救。而一救就會喪權辱國，因連使錢權都會俾咗救你嘅「恩人」（IMF、歐盟、北京，大家對號入座），你個政府仲可以做啲乜？

被教育署教科書誤導嘅你會問：「政府加大開支變赤字，只要短暫，經濟一反彈，稅收上升，咪冇事囉？」咁我就只可反問：「財赤對經濟咁好，咁全球政府加碼使錢咗成兩年，點解經濟都係一池死水？」不過凱恩斯如果喺九泉之下聽到我反問，一定經佢個問米佬克老明Paul Krugman答：「咁要再加大政府開支！」

今時今日嘅世界情況，除非你係個只望香港嘅典型特區社運家，凱恩斯學派嘅經濟理論已被證明係錯！錯都算，仲要禍害人間。

所以，依家去到歐洲因政府財政失控，爆連環金融危機，最開心應該係我呢啲讀過中學程度經濟學嘅人。
因為平時啲人問你啲喺中學學過嘅嘢時，你記唔起就只有尷尷尬尬咁轉吓話題，不過今時今日問關於凱恩斯學派嘅經濟學時，大家就可以話：「俾番晒先生啦！乾淨晒！」

我亦奉勸學生哥們，如果你讀Econ，就唔好再讀凱恩斯啲嘢。好似讀天文學仲讀緊本話地球既係平，又係喺宇宙中心嘅書。

你可能話：「不過先生話試卷會出喎！」我只可以答：「呢啲咁嘅A要唔要都罷。」因為個試仲考得凱恩斯啲嘢，個A遲早唔值錢！

補習天王及應屆econ學生

馬會獸醫勝評級公司

Lose!

Win!

上周，我哋特區單一最大納稅單位香港賽馬會，宣佈要罰練馬師梁定華。審訊小組決定，判處罰款七萬五千大元，算係罰得重。咁梁定華做過啲咩要罰得咁重？

首先大家要明馬會練馬師嘅職責，就係幫啲馬主練好佢哋啲馬。由食啲乜、點操練、馬匹瞓覺時舒唔舒服，都係練馬師負責。咁當練馬師覺得隻馬準備好，可以參賽，就會為佢哋報名。

報名後，就唔係練馬師話跑得就會跑得，都要最後獸醫把關，睇吓有冇啲健康問題，冇先跑得。要獸醫最後檢驗，原因有兩，第一當然係為隻馬本身，如果唔跑得都俾佢跑，就真係虐畜囉。第二，當然係保護投注人士嘅利益，一旦係因健康問題而隻馬輸咗，咁就好無辜。

人都係咁，好似我哋國寶劉翔，就算佢其實狀況大勇，又天賦神速，不過一旦摟親隻腳都照跑，咁就唔好囉。

咁點解上周梁練會被罰？原來佢有練隻叫「三扒兩撥」嘅馬，咁就去報名出賽。點知獸醫話健康唔及格，唔准跑。情況就好似啲投資銀行咁，想出批投資產品，點知俾信貸評級公司一睇，就話唔達標。

咁如果楂正來做，梁定華就應該等到隻馬好番，先再報名。不過梁練冇咁做，佢將「三扒兩撥」俾令一個獸醫睇，仲要冇同第二個獸醫講話已經睇過亦唔及格。不過第二個獸醫，雖然唔知隻馬曾被檢驗，不過同第一個獸醫一樣，都唔俾隻馬合格。

唔好理梁練為乜咁想隻馬跑，不過睇落佢真係似獸醫shopping。唔鍾意呢個「不及格」評級，就走去揀獸醫揀到啱為止。情況就好似啲投資銀行咁，批投資產品已被話唔達標之後，唔走去檢討吓自己賣緊乜，反而走去令一間評級公司，希望第二間鬆手啲。

咁梁定華同啲投資銀行有咩唔同？就係把關嗰個唔同。馬會獸醫，係馬會請番來，出糧係馬會，仲要係馬會安排邊個獸醫睇邊個馬房。有咁嘅安排，係因由創立至今，馬會將馬匹嘅安危同馬迷嘅利益放喺第一位，所以獸醫唔使驚你練馬師。

不過投資銀行同評級公司就唔同。當投資銀行出產品要評級時，係投資銀行出錢請評級公司。當然，如果間銀行成日都收唔到「鍾意」嘅評級，你間評級公司就會越來越少生意。結果係啲信貸評級亂來，AAA滿天飛。

馬會就係知，個百年金漆招牌一定要全力衛護，所以練馬師梁定華淨係冇同第二個獸醫講過話，其實隻馬已被令一獸醫驗過，都要被馬會重罰。

所以睇到呢段新聞時，孫柏文覺得馬會獸醫遠勝評級公司，做馬迷好過做債券投資者。

梁定華