Tuesday, May 29, 2007

重申一注獨贏買白銀

各位《金手指》嘅fan屎,I'm back!首先,孫柏文要感謝嗰啲自從我喺5月1日開始放假,寫信嚟《蘋果日報》「問候」我嘅fan屎。而我都想用呢個機會闢一闢謠,冇錯,我放假唔係因為腳痛。雖然放假期間真係試過俾我老竇一棍、一棍咁揼,不過同楊傳廣、董建華呢啲漢族中嘅鐵人一樣,我都好快好番。

放假最大娛樂,就係同人傾偈。由本地淫窟中人解釋科技對佢嗰行嘅衝擊,到見沙地國家石油公司Saudi Aramco嘅人解釋點解蝕本都要喺祖國做煉油生意,令我增廣見聞,先至開始知道自己係一隻井底之蛙,游吓、游吓。

不過放假有得就必定有失,先嚟中石油(857)令溫總瞓唔着,再有QDII同「冇料」三招宏觀調控。仲有個超級低B仔,淨係整條超連結hyperlink出嚟,就話自己有罪。

睇個走勢就知點解

當然不能不提班民主派立法會議員,喺《中大學生報》度,好似食咗啞仔藥咁,水淨鵝飛。早知面對呢個情況佢哋會咁,就投票民建聯,起碼有荔枝、蛇宴同肉餅食。今次復出,就當係《金手指》2.0面世,好似《Star Wars》(星戰前傳)第一同第二集咁,我發現,原來孫柏文有個dark side。所以如果大家喺未來感覺到《金手指》有唔同,就係咁解。

作為一個專業、負責任嘅財經口水佬,最後我要為大家提供一個投資建議。相信各位《金手指》嘅忠實fan屎,睇到條題,都已經知道今日孫柏文又 再叫大家買白銀。如果只係提供一個理由點解一定要今日買白銀,相信睇圖就夠(見圖)。圖上記低咗對上三次「重申一注獨贏買白銀」,之後點大家自己睇。


不過 一定要謹記,買白銀要買實貨,而喺兩個禮拜前嘅「《蘋果日報》投資講座」,我應承過教大家點買。喺特區裏面就有間加拿大公司叫做Kitco嘅有得賣,佢哋 嘅電話係2827 7800,我冇收錢賣廣告,我只係以前幫襯過,覺得佢哋幾好,所以你哋都可以打去問一問!千祈唔好話我介紹,佢哋根本唔識我。

2 comments:

  1. under $5 想買實銀都苦無門路......唯有paas啦!

    老兄上次話要買實銀.....本想洗耳恭聽....點知到頭來...siver ETF! -_-... ETF搵人苯嫁! Banker金句: you can't destroy it...dilute it!

    Kitco近日來港,叫幫你打完場la! ^^

    即以往所有叫人買實銀................................都係吹水la.....Heehee...根本搵唔到有local co.可以買到白銀哩!^_^

    下次未verify既野! Hee..hee唔好講咁大聲! 好多金甲一族背後偷偷地在笑啊!

    凡是金銀甲虫都面對過以上困境!

    ReplyDelete
  2. I had to order from Canada's kitco too b4.

    Because local supply ran out.

    Hopefully demand in HK for physical silver bullion will be such that kitco can do immediate delivery.

    Shuen

    ReplyDelete