花旗早已國有化

呢排，孫柏文見到花旗國同前宗主國嘅領導，都因為好唔好國有化啲銀行而頭痕。可能因兩國國民都仲覺得，列根同戴卓爾夫人將國有企業私有化好掂，就算今時今日已經係左黨執政，都唔敢高姿態玩國有化。

睇營運權見真章

不過講真，國有化、私有化應該係好多被政客、無知者用錯嘅經濟學詞彙當中，用得最錯嘅表表者。好多人認為，只要普羅大眾手上有某間公司嘅股票，嗰間公司就算係「私有」。如果政府擁有嘅企業，政府賣股出去，就算「私有化」。例如當年特區政府將港鐵（066）上市，就話係「私有化」。

其實，私有化嘅神髓，就係政府唔再控制公司嘅營運，將營運權還番畀普通人。點解要放棄營運權，又要將股份賣出去？冇股權，有錢賺時都冇得袋，普通人又點會有心機經營？

咁即係點解？即係只要一間企業嘅營運權喺政府手上，就算政府冇股權，其實都係「國有」。即港鐵仲係國有，政府委任超過半數董事嘅港交所（388）亦係國有，而賣斷營運權嘅領匯（823）就係真正嘅私有化。

乜都干涉仲唔係

用同一指標，就算政府唔做佔過半數股權嘅股東，唔插人入董事局，其實花旗銀行已經逐步被國有化。

多都唔講，高層搭乜交通工具去見人都要干涉，啲員工嘅薪水都要控制，辦公室裝飾都要話乜嘢可以裝乜嘢唔可以時，國有化咗啦！