我挺蘇利民 引入醫護員

上星期聖誕節，當外國傳媒因多人放假、人手短缺之際，好多政府都趁機出咗平時會被鬧爆嘅新聞。首先當然有我國政府，喺聖誕節當日審《08憲章》簽署人之一嘅劉曉波。

花旗國政府財政部又喺平安夜宣布，政府將之前訂下支持兩房嘅金錢限額撤銷。即等於無限量支持佢哋，繼續胡亂以平息借錢俾啲唔應該買樓嘅人買樓。

雖然呢個奧巴馬政權嘅舉動，示意白宮係信聯儲局話，明年第一季後唔會再買新嘅兩房債券唔係講笑，應對美元有利。但本周啲人都係會話：「由有限額支持變成無限量，仲唔係又濫發美鈔？」如歐洲又冇乜新消息，美元近排升勢應要逆轉。

不過，假期放呢啲外國傳媒工作者眼中嘅壞消息，係有好處。真係鬧都少人鬧啲。我國政治化妝技術，已達奧巴馬級數，真是令我鼓舞！

周末，睇到《Now TV》獨家訪問香港醫院管理局行政總裁蘇利民。蘇總其中一段話，長遠來講，特區係要輸入醫生同護士嘅外勞。

呢個建議，我挺！
蘇利民，我挺！

其實，政府成日話醫療開支增長快，又唔夠錢。雖然大家都會同我一樣，話高鐵用少幾百億元都番晒嚟，但都仲有啲人會要求政府搞強醫金，繼續脹大開支。不過，雖話要使就要使，可唔可以每一蚊，成本效益係最大呢？倘外國有平、靚、正嘅醫務人員，佢哋又想來特區，咁就俾佢哋來啦！

我最開心嘅係醫生、護士冇走出來公開反對。佢哋比大律師關心社會得多，倘有人話，自由進口英國頂尖大律師，余大狀又厚顏無恥咁辯護，港人要無奈接受大律師㩒住搶之態。

當然，我挺蘇利民係有利益衝突。因我有個持有三粒星、香港出世、香港大嘅妹，97年9月入大學，攞我阿爸喺香港搵嘅錢去英國讀醫。佢成為放射科專科醫生，為病人服務，但喺英國。依家仲嫁埋俾個老外。

點解？嫁老外就因愛，但冇得返來行醫，係因97年前，喺英國開學嘅香港學生，可以畢業後回港，因受惠當時財政司長曾蔭權為個仔搞出來嘅豁免。我個妹係第一屆冇份。

有人話：「我好窮呀！點解我老竇唔係李嘉誠呀？」
我只可以話：「我個妹有家歸不得！點解我老竇唔係曾蔭權呀？」
不過好彩，我個妹之前考專科時，一次合格，倘唔係，佢會問：「點解我老爺唔係曾蔭權？」

最後再一次，我挺蘇利民！

誰在千禧年代人氣急跌

十年前今日，大家都因互聯網如癡如醉，又為千年蟲擔憂時，有幾個叱吒風雲嘅人，受到萬人敬仰。不過，十年後嘅今日，佢哋因種種理由而人氣急跌，好啲嘅，就光環褪色，差嘅，就未死已被人唾罵。

仲有幾日，由2000年開始嘅千禧年代就會完，今日孫柏文就同大家分享吓，我覺得人氣急跌嘅三個表表者。

第一，就係李澤楷。在1999年，當年股票編號為1186嘅盈科數碼動力，以透明度極低嘅方法，執到塊地，可以興建數碼港。雖然當時David Webb隔日就警告，條款其實唔係特別着數，不過，因為有太多議員重複又重複咁話：「李澤楷有特權！」令投資者真係仲估佢有特權，繼發展數碼港後，分分鐘將成個大嶼山都俾佢，去搞數碼島。

就係咁，盈科數碼動力股價被勁炒高。當年曾聽過股票從業員，被問及盈科嘅基本盈利條件，同買賣策略時，他會這樣回答：「數碼港？掃咗先講！」

當時股價之高，令李澤楷有幾日嘅財富，多過佢老竇。勁！之後用鯨吞天下嘅姿態，食咗間電話公司，股價開始急瀉，又搞合股，股價跟住再瀉。最後連股東他朝個孫希望能返回家鄉嘅機會，都因為私有化失敗告終而熄滅。當年嘅IT楷，今日嘅李澤楷。

第二，就係佢老竇李嘉誠。在1999年，全球電訊股熱賣。和記黃埔(013)搞咗好幾年嘅Orange，忽然成為搶手貨。之後更成功賣甩，李嘉誠創「唔一定靠地產都暴發」嘅香港神話。

不過，天要弄人，邊個紅，就邊個受挫。在十年後今日，李超人光環褪色。點解？全因一個「3」字。就算有加拿大Husky(赫斯基能源)，或又以天價賣出印度嘅流動電話業務，都不敵「3」嘅魔力。

同一個基金經理講起，佢話「3」破壞力最強之處，係多年來用咗和黃管理層好多時間同心機。如果冇「3」，和黃可能已經成為世界頂尖新能源嘅公司。

第三，就係格林斯潘(Alan Greenspan)。呢位前花旗國央行行長，喺十年前，被人譽為神般拜。記得在2000年，花旗總統初選。小布殊同麥凱恩爭做共和黨代表，去挑戰戈爾。麥凱恩被問及關於貨幣政策時，佢話佢嘅政策係，如果格林斯潘出事死咗，佢會幫條屍戴太陽眼鏡，跟住擺佢番聯儲局辦公室嗰度。

因為就算得番個身體，市場都會風平浪靜。咁仲唔係神一般？不過，經過美國樓市爆煲而出現嘅金融海嘯後，格林斯潘已經變成笑話，甚至未死已被人唾罵。

如果要我選千禧年代人氣跌最多之人，相信真係非格林斯潘莫屬了。

上星期真反高潮

上星期日，我寫禮拜一出街嗰篇文時，一看月曆，仲估上個禮拜必是多事之周。點知7日後回頭一望，完全反高潮。

先來杜拜，當全世界估佢哋會一如之前警告，走數唔還錢之際，忽然準時還錢，令市場覺得打後要還嘅債亦會準時還。上星期一，我曾在本欄講過，我收到消息，話杜拜會準時還錢，不過連我都唔係好信。因消息來源嘅後生，講嘢成個可愛教主咁，所以點信？依家不但執唔到禮拜一單日股市反彈嘅錢，仲要請食飯。賠了夫人又折兵，真係反高潮。

上周中，希臘發債。全球投資者都睇實情況，諗住標準普爾降佢嘅信貸評級，今次佢哋仲唔出事，借唔到錢？不過，最後一樣順利完成，利息仲只需5厘。

無他，因歐洲央行現有嘅「毒資產做抵押套錢」計劃，只要三大信貸評級公司中，有一間評「A-」級或以上，資產就可俾歐央行換錢。依家雖先有惠譽同標普降希臘評級，跌穿「A-」，但穆迪未郁手，故銀行為希臘政府先發債，袋好推薦費後，就算自己食晒，可以即交歐央行套現。真係反高潮。

到上星期四，諗住本港報章國際新聞編輯擁護咗好耐嘅哥本哈根反碳會議會有料到，點知最後都係爛尾收場。得個話會協力降低地球溫度兩度嘅聲明。

好彩係咁，我幾驚佢哋話要全球政府立法禁止每日嘅潮水漲退。到時唔知綠色和平嘅成員又要爬中區政府合署幾多次先得？不過要讚吓綠色和平本港分店，冇佢哋特首點會慳番啲飛機油，唔去一個冇料到會議？

上禮拜五，立法會「財毀會」辯論600億元高鐵撥款。我諗住呢個計劃上馬，點知因唔夠時間要延遲至明年1月8日再傾。之後有老外朋友問我點解未通過，我話包括班托派馬克思主義議員(即社民連)反對政府呢次使錢，佢驚訝地話：「馬克思主義者都反對使政府錢？呢個計劃真有問題！」

其實，嗰啲學癌細胞、鯊魚，無思考、只識吸資源不斷漲大嘅政黨，如工聯會等，已用高明手段支持計劃通過。佢哋連啲地盤叔叔都搬埋出來，示威支持，話增加就業。仲驚你唔知佢哋係地盤叔叔，叫埋佢哋戴晒安全帽。唔知佢哋係乜水嘅，一眼仲估佢哋因怕會食汽油彈，所以先笠帽。

分析員出身嘅我幫工聯會計數。特區有5萬地盤工人，計劃斥600億元，即每個工人120萬元。不如為環保直接俾佢哋算啦。如《蘋果日報》專欄作家左丁山叔叔話要講社會回報，唔應淨係講菜園村，話當年講咁多，機場都起唔成。好！又計數。政府話高鐵日後每日有20班車。(I mistyped here, should be 200 per day. IF you believe there really would be 30 million passengers traveling on that railroad per year (ie. 99,000 passengers per day). I of course do not believe that estimate.)係咪好多？咁機場每日有幾多班機起飛？每日400班。所以唔好同我講社會回報。

1月8日，孫柏文都會去，立法會見！

陳德霖無需為我們擔心

金管局總裁陳德霖，喺周一用咗啲央行行長可以最強硬嘅語言，去警告特區上上下下嘅老百姓，現今香港可能會面對嘅資產泡沫。我聽完佢嘅言論，總結係：「陳總無需為我哋膽心！」

點解孫柏文咁講？陳總最主要嘅結論，喺因花旗國聯儲局為首嘅各國央行進行量化政策，即印鈔票，而港元又同美元掛鈎，所以，現有爆發資產泡沫嘅環境同「營養素」都有。即係如果港人要投機買賣，成本好低。

冇錯，成本低就等如資金供應多，不過，讀過一兩堂經濟學嘅人，都知要有成交(即真係借錢去炒嘢)，除供應多之外，亦要資金需求大先得。

究竟啲人係咪會有資金需求、想借錢炒嘢，去一圓陳總嘅泡沫夢，我就冇咁有信心。

大家可能會話：「陳總冇話依家有泡沫，佢只係話一旦有資產開始升，啲人就會開始借錢追捧，之後就大量資金湧入該市場，最後形成不斷吹大泡沫嘅惡性循環。」即係有樣嘢升，就會有羊群追入啦？

如果近十幾年來，我哋香港人學咗嘅嘢得一樣，就係投機買賣唔係決定幾時上車難，而係幾時落車先係最困難。

因股市見一個又一個嘅泡沫，樓就仲喺八萬五之餘溫，重未有泡沫。所以，今時今日如果有例如大陸同胞同我哋呢啲香港人話：「我買咗啲乜乜物物，跟住升咗好多！」我哋第一個反應係：「咁你放咗未？」如果答未，我哋就會心中一笑，口祝好運。就算答有，我哋就會問：「諗唔諗住再入過？」

就係有咁嘅心理同經驗，資金再多、成本再低，但因為驚輸本，都唔係咁易再氹到我哋借錢瞓身谷泡沫。

再講，資產本身價高價低根本同金管局無關，陳總應睇實嘅係過分借貸。大家可能問，分別喺邊度？

例如科網股熱。係咪升得好勁有泡沫？係，仲好大添。不過因為買家冇借錢，最後啲股價下跌，甚至公司執笠，個經濟影響只係有人輸咗積蓄，資源被浪費。但就冇系統性風險。

不過假設好多人想買樓，借錢又易又積極，大家一定諗今次啲樓價仲唔升？但同時又假設政府批地好快，樓嘅需求升幾多，供應都完全可滿足市場，樓價就冇得升喇。

係咪等如冇事？唔係！因為過分借貸，遲早會學花旗國咁，愈借愈離譜，大學生未畢業已可零首期借幾百萬買樓。到時遲早借俾啲根本會走數嘅人，最後佢哋啲銀主盤湧入市場，就算之前樓價冇升過，都可以之後跌番。跌到咁上下，所有銀行都唔掂時，就會爆陳總口中嘅系統性風險。

所以陳總你唔好再擔心泡沫，留意過分借貸仲好。不過我成日話，最能阻止金融機構胡亂借貸，就係金融機構嘅債主。你亂借錢俾人，我就唔借俾你做生意。

銀行嘅債主係存戶，不過當政府包底所有存款，存戶又邊會睇實啲銀行點放債。所以如真係出現過分借貸，陳總你知賴邊個啦！

我都俾杜拜累得慘！

曾經有研究學會的報告講過，喺花旗國嘅「運動」產業，佔佢哋經濟生產總值超過5%。「運動」對經濟嘅貢獻，比起例如電影業等行業為多，特區政府其實都一樣，呢個周末就係最佳例子。


大家可能會問：「唔係嘛？連聯賽足球都冇人睇，唔好話其他體育活動，係咪你睇到特區喺東亞運攞咗個足球金牌，就興奮得滯short咗？」我講嘅當然唔係東亞運，其實係周日喺沙田馬場嘅賽馬國際賽。


我阿爺同老竇由我細細個開始，都成日同我講，話佢哋交好多間接稅。細個時唔知佢哋講緊乜，不過大時就明，因兩人同是超級馬迷，所以就經馬會交咗唔少稅同做唔少善事。呢個孫氏優良傳統，我當然有跟隨。


不過，講開特區政府最大納稅單位搞嘅賽馬國際賽，其實孫柏文由九十年代中開始，就有個一年一度嘅習慣，落注支持杜拜派來嘅馬，噚日亦冇例外。杜拜近廿年來都以銀彈戰術搜羅全球最好嘅馬，所以長跟長贏。


佢哋之前每次派幾隻來，我就會好費神咁揀我覺最好嗰隻。今年就易好多，因受傷等突發事件，最後杜拜得一隻參戰。不過就算係盲目支持，我都上網做吓功課，一搜尋隻馬同馬主名，就搵到一篇來自阿聯酋報章嘅報道。文中訪問個練馬師，佢話隻馬好fit，因佢以前講親都中，有誠信，所以就算隻馬以前來港跑過輸咗，我都落注支持。


結果？我睇住佢跑，一路都佔據有利位置，只要在臨近終點前發力，就可奪魁。點知最後乜都冇，輸咗。


一輸，我第一個反應係：「點解我咁傻呀？」我深信國際體育好講國運。話我迷信嘅，我只可以話乜有唔迷信嘅運動員咩？例如04年奧運頭幾日，好多射擊比賽都係俄羅斯選手領先，點知佢哋好多喺最尾一槍射失，俾中國趕過頭奪金。冇計，祖國國運佳。


不過，今時今日嘅杜拜就差啲，點解我會咁傻呀？佢哋個練馬師有誠信？佢哋啲地產公司以前都有誠信啦！依家咪一樣走數！點解我會咁傻㗎？今次我真係俾班杜拜佬累得慘！卒之親身感受到滙豐控股(005)、渣打(2888)、蘇格蘭皇家銀行等有咩感受。


我仲一廂情願，相信上個禮拜有人放風，話呢兩個禮拜杜拜世界其實只係做咗場大龍鳳，啲債到期(即今日)，會準時還，國運亦因而轉好。之前只係想嚇下啲銀行，等杜拜世界可以講吓數。


睇完場馬，我諗呢批債都係凶多吉少。如果真係還，我又俾佢跣多鑊！

如何靠「碳排放」掠水

相信大家都知，丹麥哥本哈根正召開一個講溫室效應氣體嘅會議。特區各大傳媒機構都鋪天蓋地報道。你可能同好多人一樣，一見「碳排放」呢幾隻字，同自己講話「又係啲環保嘢」，已經唔睇有關新聞。呢個孫柏文唔怪你，因為「環保」呢個品牌喺香港俾人已先騎劫、後搞臭咗。

點都好，究竟哥本哈根想搞乜？佢哋想將會引致溫室效應嘅氣體特別係二氧化碳，排放控制，由依家無限量，變成有限。

咁同本欄講財經、經濟學有何關係？其實當排放有限，即將排放量變成有限量資源，經濟學就係研究有限量資源分配嘅方法。

例如香港，土地係有限資源，究竟邊個可使用某塊地，以前就以拍賣形式賣俾私人發展商，起完樓再以價高者得方法賣，決定分配方法。以呢個方法分配最好嘅地方，係每塊地嘅使用者，係出最高價，亦即最想用嘅人，可確保塊地用得有效益、唔會嘥。

理論上，「碳排放」權利亦一樣，就會令每單位人類排放嘅二氧化碳得到最大效益，唔會嘥。如要落實，政府可以每年進行拍賣，將碳排放權利賣出。

大家可能會問：「咁嗰啲排碳量嘅行業，如發電、做運輸等，咪一定唔制？要問政府買，成本升咁多！」係，所以環保組織就開始諗方法，去收買商家。

環保人士度條絕橋成功收買現有商家。方法係倘若你已經常排放某個量嘅二氧化碳，就會收到同等配額，理論上你諗到方法減排，可將用唔晒嘅配額賣出。最極端係將業務執埋，淨係賣配額都賺到笑。

相信年輕讀者，冇太大感覺，不過，我建議你同年長嘅人傾吓。因以前美國入口成衣係用以上方法控制，香港係有一班人因一早做開成衣生意，有大批配額，好多執咗自己間廠，淨賣配額都發過豬頭。輸家就係之後開業嘅新競爭者。

冇錯，環保人士收買現有商家嘅方法，就係犧牲未入行嘅人。呢條橋其實係工會發明，因收買現有工人最易就係剝奪未入行工人嘅飯碗，最低工資係典範，將冇經驗未入行人士，通通以價格攔住一樣。

宋鴻兵《貨幣戰爭》一書曾話，如有碳排放配額制，美國為首嘅發達國家，就可用配額玩死中國。因佢哋就係排開有配額，我哋問佢哋買。所以每個中國人，都反對洋人依家擺喺談判桌上嘅方案。特區有民主派議員唔知係唔識定係甚麼，盲目地被外國環保組織牽住走。最後想問大家，以上減排放方法係咪好煩？其實要有碳排放，先要燒燃料。要減排，喺燃料抽稅就得，不過，如綠色和平人士爬牆、拉橫額做show嘅老經驗環保組織，是否知道會冇政客支持。有民主派議員都喺去年要政府減汽油稅啦！「環保」？「減碳排」？知道背後真相先，唔好反射式支持啦！

美元跌完 股市亦升完

相信在上星期初，大家同孫柏文一樣，都仲係睇實杜拜，估緊會唔會引發海嘯續集。點知場風好似雷聲大、雨點小，股市完全收復因杜拜世界延期還債所引發嘅跌幅。


結論係乜？壞消息只要冇擴散機會，就會冇事。咁壞消息要傳播，要點才令市場恐慌？就係出事嘅機構，最後搵邊個嚟救，而救嘅方法有冇用。以杜拜為例，政府嘅子公司出事，應由杜拜政府去救。杜拜政府唔救，就會牽連其他子公司。如果政府話救，點知杜拜政府又冇錢，就搵阿聯酋大佬阿布札比出手。如果連阿布札比都唔幫，咁就由債權銀行例如滙豐、渣打、皇家蘇格蘭銀行等硬頂上。


咁市場相信滙豐、渣打頂得順，最多係輸錢，唔會有更大舉動，所以冇乜點郁。而皇家蘇格蘭銀行已被英國政府國有化，所以各國政府之前做嘅「包底」活動，能令市場對壞消息唔多驚。


市場甚至會信愈多壞消息，就愈包底，愈印銀紙，市場愈多資金去炒高。即壞消息，係好消息！


市場只驚一樣，就係包底結束。咁點先會完？就係要有好消息。因當有好消息，各國央行就要諗點退市，結束包底係必要做，資產價格再升到同回報相比之下，出現不合理情況時，就會引發未來更多需要包底情況，直至冇人再信你。唔信就問下，點解再唔會有人肯借錢俾杜拜？


好消息有冇？有！就係花旗國勞工部於上周五宣布嘅失業數字，遠比市場估計好，美元即時反彈。我已經喺本欄再三警告，美匯指數如果反彈，升穿由4月開始一路升唔穿嘅50日平均線，就等於呢個炒美元貶值概念亦玩完。美匯指數就係喺上周五升穿50日平均線，債券、商品全面報跌，特別係之前吸引咗好多做大槓桿炒家嘅黃金。大家可能會問：「不過，美股上周五有得升，你係咪又做明燈？」


上周五係差不多唯一一次喺呢個超級大升浪中，當美匯轉強，股市都有得升。不過，當其他資產特別係債券下跌時，我就會記得分析員David Rosenberg嘅說話，佢話如果債市同股市反映嘅未來，好似對著幹時，信債市冇死。


債市話美元要大幅反彈，亦已喺上周五開始咗。除非美匯指數升穿50日平均線後嘅幾日內又跌穿，否則今次股市會大幅回落，速度仲要好快。我亦想提醒啲槓桿買黃金同白銀嘅粉絲，如呢兩隻貴金屬價格跌穿佢哋嘅50日平均線，你要即時清晒啲好倉，沽、沽、沽！

持牌放債人公會

孫柏文之前係唔知道特區原來有個叫「香港持牌放債人公會」嘅組織。呢個公會啲會員，當然就係特區一群「持牌放債人」。


相信大家都知，呢啲金融機構係放債俾啲因種種理由難借錢嘅人，所以，當借錢人好似總體上會有比較大機會走數時，放債人就會收取較高利息。


當收取較高利息，又要比其他金融機構多拖數客戶，搞到要時常聯絡啲客，去提醒佢哋還錢時，「持牌放債人」呢行就會被啲衛道之士歧視。佢哋係會覺得自己嘅小朋友入呢行，唔係一件光宗耀祖嘅事。


不過，如果你都係呢啲衛道之士，就算係叫做「持牌放債人」，你都會話呢啲金融機構係「財仔」、「大耳窿」，係唔好，咁你就錯。


社會中資金最貧乏嘅人，往往都係還款穩定性最低嘅一群。其他金融機構放棄咗佢哋，令佢哋想借錢交學費，以提高收入能力都唔得，想借錢俾租訂，搬去返工嘅區域，希望慳啲時間，做多幾個鐘又唔得。不過，有持牌放債人嘅出現，冇被政府禁，之前嘅例子就有生機。


所以持牌放債人，唔係衛道之士眼中欺壓弱勢社群嘅敗類，而係釋放弱勢社群潛能嘅解放者！


你可能會話：「今次金融海嘯嘅開端，就係一班還款穩定性低嘅美國人，借到錢買樓所致。所以唔可以歌頌啲大耳窿。」啱，不過唔啱得晒。


金融海嘯，冇錯係因為還款穩定性低嘅美國人借到錢買樓，不過最重要嘅係，因為投資銀行透過財技，令終極提供資金嘅債主，誤以為還款穩定性低，都係安全投資，以低息放債。


在低息放債環境下，令債主不能承受多人走數嘅情況，一旦抵押品樓價下跌，咁就會爆發信貸危機。


特區嘅持牌放債人就唔同，冇將債仔走數嘅風險判上判，自己承擔番晒。所以，佢哋就要收高利息去彌補風險，不過亦令香港嘅制度穩健，能承受多人走數都唔會爆煲。


點都好，我知道有香港持牌放債人公會呢個組織嘅原因，係因為佢哋十周年會慶。我自己幫襯過佢哋啲會員，亦多數再會幫襯，我對佢哋對香港嘅貢獻非常感激，恭賀貴會十周年誌慶！