港人又做空姐人質

一個復活節，一路未解決嘅希臘問題又復活。噚日歐洲放完長假之後，佢哋個債市一開，希臘嘅10年長債息率即升0.3厘，至6.83厘。

用400字解釋至今情況，去年尾，市場開始擔心希臘借貸過度，國家政府借新錢嘅成本開始上升。大家特別留意嘅係，因一個人借錢多時，最希望佢首先唔好再支出多過收入。希臘做唔到，就算冇債等住還，今年都要借錢度日。不過，希臘政府不但入不敷支，仲要喺今年4、5月有兩批大額債要還，所以十年後先還嘅國債，由舊年中大約3厘利息升至今年2月嘅7厘。

咁因希臘嘅國債總和，係佢哋國民生產總值嘅130%，等如佢哋如果要為國債付7厘嘅話，同一比例喺香港，相等於每年兩條高鐵成本當還息。

咁如果你在4、5月有好多錢要還，市場就預期你喺3月會搞掂借好新錢，預備還舊債。咁上月仲因有歐洲、國際貨幣基金組織(IMF)官員等，開始話會「幫手」，所以息口回落。不過，無論希臘政府啲債券銷售員點樣落力，希臘都係遠遠借唔足數。上個禮拜，佢哋想借10億歐元(約104億港元)，十二年後還，唔好講幾厘，得約3億歐元(約31億港元)資金有興趣同希臘政府傾利息。即係已達借唔到新錢嘅階段。

自己借，冇新錢，歐盟又同佢說不，得番IMF。經過97印尼、泰國同南韓，大家都知IMF有幾辣，國家就算被「救」，對世界股市都有衝擊。當年骨牌效應要到98年俄羅斯爆埋先算完。希臘還錢大限已到，好快知個局點開。

今年復活節假，又遇到清明節，公眾假期特別長，港人紛紛出埠。噚日為最後一日假期，必定係回港高峰期。如果你係航空交通業從業員，要威脅搞罷工，最好當然係揀噚日去做。

咁國泰航空(293)嘅空姐同機艙服務員，就喺之前揀咗噚日，話如果國泰唔妥協，就罷工，令港人滯留在外。你搵我哋乘客做人質，高招，國泰前日亦屈服。不過你「成功爭取」後開記者招待會，就唔好擘大眼咁講大話：「我哋冇諗過利用市民做談判籌碼」，你班空姐根本就係。但孫柏文諗住國泰一定係勁剝削，所以先逼空姐上梁山。

點知，空姐原來每月編更70工作小時。唔想飛，可搵同事調更，如果調出來係有人多過70小時，就有超時補水。少過70小時都可出番70小時人工。所以出現有人等錢使勁飛，有人想take it easy都有70小時人工。原來國泰想做嘅只係堵塞呢個漏洞。點知一講，空姐就搵我哋做人質。空姐想要嘅係，出唔夠半斤力，都要攞番足八両，如果唔係搵港人滯留外地。啲空姐有冇搞錯？講真，到呢刻，港人係唔會可憐你哋。如果能令國泰癱瘓就香港停頓，我哋港人唯一唔做人質嘅方法，就係結束國泰被政府欽點嘅壟斷。