人民幣升值炒乜？

當一啲之前冇鋪排嘅嘢，喺兩個大國之間發生時，你都應估到大鑊嘢發生緊。上個禮拜，花旗國財長蓋特納突然東遊，為今日我哋國家主席胡錦濤喺華盛頓同美國總統奧巴馬見面時有偈傾作準備。不過，蓋特納上京前，就喺我哋特區停一停，見吓我哋啲特區官員。講真，佢返內地前咁樣停香港，實在太似孫柏文啲鬼仔大學同學，因當年啲直航機票太貴，又想喺香港先搞簽證，同想喺香港玩一會，先北上，所以停停香港睇睇風景。

雖然特區政府唔係美債最大嘅買家，不過，財長來見我哋嘅官員，真係有少少似股票上市前，對薦商搞嘅嗰啲路演。美政府始終都係我哋嘅債仔，同我哋債主打招呼，都係個醒目嘅舉動。不過唔明嘅係，講到我哋特區政府外匯、財政儲備投資分配最話得事嘅係金管局總裁陳德霖，蓋特納反而唔見。唔通任總(前金管局總裁任志剛)後嘅金管局，真係再唔係「冇王管嘅獨立王國」？同曾特首、司長見面已足夠？

點都好，當蓋特納臨急臨忙來我國，都應該係為人民幣對美元升值嘅問題出力。我可以同大家講，所有要求人民幣升值嘅花旗政客，骨子裡都知升咗值都係幫唔到美國失業問題。不過為咗「做啲嘢」，都要迫人民幣升值。

大家可能會問：「人民幣升值，內地貨冇咁平，啲美國消費者咪買本地貨。點解你會話幫唔到佢哋本土製造業？」其實睇之前奧巴馬抵制內地車胎就知，當時話到明向內地車胎徵入口稅，係為幫助美國本土車胎製造業。點知實施徵稅後，美國車胎銷售額完全冇變，只係入口國嘅比例變咗，仲要入口嘅車胎貴咗。幫唔到本地工人，仲要害埋消費者。

奧巴馬同蓋特納其實都知迫人民幣升值冇用，不過都要做啲嘢。而人民幣升值，喺呢刻對內地經濟未必冇好處。大家都見內地通脹升溫，貨幣升值係可以幫到呢個情況。不過我國最勁嘅外交手段，就係就算對自己有着數，都要做到好似為咗俾面你，先做。

人民幣就一定升值，不過為締造「俾面你」嘅勢，一向有嚴重篤數之嫌嘅中國數據，都好合拍咁突然公布話幾年來第一次有貿易逆差。到時真係俾人民幣升值時，胡主席就可以望住奧巴馬話：「我哋有貿易逆差，都俾人民幣升值，俾足面啦！」

人民幣升值，可能亦係對壓抑通脹有利，因為入口平咗。最直接影響嘅入口貨，就一定係石油。因為石油要入口，仲要差不多全部喺國內消耗，即成本美元計，收入人民幣計。

所以每次人民幣升值，都可留意買最多外國進口原油、本地賣出成品嘅中國石化(386)。05年人民幣升值嗰轉，中石化輕易跑贏其他內地油公司，今次有機歷史重演，大家應該識部署。