一石二(H5N1)鳥之計

本人作為自由市場支持者，其實都好怕兩類政策的出現。

第一，就係政府走去做生意。好似做得好，都之不過市場有需求，而民營企業無能力同政府財力競爭。做得唔好，千夫所指，繼而要政府出更多資源或給特別牌照及專利去提升「競爭力」。好像成功的，有香港會議展覽中心，做得唔好的，有我們國企主題公園香港「迪士尼」。

第二，就係政府自己行政失誤，繼而通過法例去斜膊，令到不單止勞民傷財，最弊會令到本末倒置。近期例子有，因為海關有失誤，令到有人可以走私帶病雞隻來港，所以要充公香港人飼養的本地雞、鵝、鴨、鴿、鵪鶉及火雞六類家禽。還有像「西九龍」一樣，要雞隻單一機構屠宰，去方便管理。其實可以再進一步，就是單一機構飼養所提及過的禽鳥品種。唯一擔心的是，一旦單一飼養，便會出現壟斷及利益輸送的情況。

本身，雞、鵝、鴨、鴿及鵪鶉都是香港有人飼養的禽鳥，而政府視他們為公共健康的計時炸彈，還可以明白的。但是火雞？…火雞？…火雞？香港政府這次真是罕有地有遠見和危機感，因為政府明白到我們香港人，乜嘢珍禽異獸都鍾意去飼養，所以連冇人飼養的火雞都包括在法例內。

有遠見，是好事，周一嶽局長都明白到，生化DNA科技一日千里。現代禽鳥以絕種的祖先，復活亦指日可待，所以抱著同一精神，香港政府應該囊括更多的動物進法例內，去絕對確保香港人的健康。專家有邏輯地曾經說過，恐龍不是現代爬行動物的祖先，而是現代禽鳥祖先的說法。

所以本人亦都相信，有周一嶽局長質素的官員，很快便會將恐龍加入普通香港人不可飼養禽鳥之例，要單一機構飼養。亦解決利益轉移的問題，飼養權亦要保留在一個政府擁有的機構內。今天的香港，對於「失敗國企主題公園」及「壟斷單一飼養」的問題是有一個可以一石二鳥的解決方法，就是給「香港迪士尼」一個飼養恐龍的專利權。唯一條件，就是「香港迪士尼」改名做「侏羅紀公園」。