相信大家如果有留意我地特區上市公司點樣維繫同股東既關係，就會發覺其中一個最重要既伎倆，就係出「公告」announcements。呢D「公告」就係上市公司同市場講關於公司D。例如，有董事辭職、公司轉型、公司大股東有變、主席有喜等等既消息都可以通過「公告」機制去通知股東同其他市場參與者。係我地特區股票市場，孫柏文相信最常見既一種「公告」，就係當一間公司股票成交量有大幅變動既時候，上市公司出既「成交量的不尋常波動」unusual volume movement公告。99%既「成交量的不尋常波動」公告，都係上市公司澄清董事局、高層完全「唔知點解」成交量大升，公司本身「冇乜特別」發生。
咁星期二朝頭早就有一間公司出左個呢D「講左等如冇講過」既成交量不尋常公告，去交代星期一突然高出既成交量，呢間公司就係做可可豆貿易既502環新國際。環新係星期一既成交量比起對上星期五既交易日，多出超過十倍，成交量仲要集中係收市前一小時裡面進行，最後仲令股價升15%。大家可能會問：「咁究竟發生左乜事？」
其實理由好簡單，不過講之前，我相同大家講環新股價升既理由，充分反映我地特區既股票市場裡充斥著好多「奇能異士」，對國際局勢不但瞭如指掌，仲要可以洞悉先機。環新本身做可可豆貿易既方法，就令環新係可可豆價升既情況之下，可以直接得益，所以如果可可豆價升環新股價都應該升。不過，如果大家睇番可可豆價呢幾日既走勢，就會發覺冇乜異動，而各大報章、傳媒都冇辦法解釋環新點解升，淨係話：「農產品當炒！」
原來，係非洲早上時間，全球最大可可豆生產國，沾全球四成生產量既科特迪瓦Cote d'ivoire，佢地既可可豆生產商商同政府談判決裂，生產商罷賣。科特迪瓦政府一路都係壟斷可可豆本地採購權，欺壓生產商，生產商如果想將可可豆出口都要畀出口稅，所以生產商希望可以將政府採購價提升同埋減出口稅。不過呢段新聞，就算係被稱為「民營CIA」既stratfor.com，都要到特區晚上時間先至出，所以當日特區下午時間有份買環新既人，果然消息靈通。
大家可能會問：「不過點解可可豆生產商罷賣，可可豆價都冇乜異動？環新股價都跌番落來？」原來，係99同04年科特迪瓦都發生過呢種談判破裂既情況，不過每一次都一個星期之內解決。尋日，已經有消息傳出生產商暫時中止罷賣行動，話畀政府一個星期去接收生產商既要求。所以最後，星期一買左環新既朋友，消息就一定靈通，不過真係唔知最終佢哋有冇錢賺。
No comments:
Post a Comment