港交所今日會Hang機？

前晚，花旗國中央銀行聯儲局開會議息，一如全世界所料，唔加息。雖然，全世界對前晚聯儲局會否加息有一致意見，不過對未來利率走勢預測，就猶如雨後春筍、百花齊放。首先有牛仔總統啦啦隊成員，話因為花期國經濟「打不死」，所以可能會有通脹壓力，繼而會見到聯儲局加息。又有好似孫柏文咁財經口水佬，話因花旗國樓市繼續爆煲，所以不久將來會開始減息。正當加減雙方議論紛紛，個個講到有紋有路時候，就有我特區中央銀行行長任志剛出來話有排都會見到聯儲局定息不變。

其實，花旗國利息走勢預測分歧咁大，都係因為完全冇人知道究竟花旗國經濟會點，比起以前格林斯潘聯儲局，分別好大。分別就係以前個個覺得格林斯潘乜都知，未來經濟走勢玩弄在股掌之中，只係你問佢「點睇」時候，佢就好似班讀好多書前宗主國人咁，用好鬼深又陰濕英文答你，搞到講等於冇講過。雖然，格林斯潘以前次次對經濟預測都係冇講，不過就給人印象好似佢係乜都知，只不過你自己聽唔明。所以以前，就算全世界都冇人知花旗國經濟會點，最起碼都仲有格林斯潘知。

今時今日聯儲局，份份聲明都好易明，不過就係因為大家都卒之明白聯儲局真正思路，所以大家都覺悟連聯儲局本身都完全知道花旗國經濟會點。情況有如電影「綠野仙蹤」裏面一樣，冇「陰濕英文」簾幕遮掩術士，原來完全「冇料到」。

不過，尋日應承過大家分析聯儲局份聲明，所以今日就為大家睇睇。首先，聯儲局形容經濟前景用詞，比起8月同9月會議聲明，越潑越多冷水。

8月：「強勁經濟增長開始放慢。」
9月：「經濟增長放慢持續。」
10月：「經濟增長放慢持續，未來經濟增長速度會好慢。」

聯儲局話經濟表現放慢原因亦有變。

8月：樓市差、油價高、加息見效。
9月：樓市差
10月：樓市差

所以肯定樓市走勢會主宰聯儲局加減息決定，不過花旗國樓市就好似番鬼佬話齋slow speed train wreck，大家都知道會撞火車，就算大力煞車將火車速度儘量減慢，大家都知道煞唔切車，一定會撞。問題係會死幾多人？同埋呢班火車有毒按揭借貸，會否洩漏出來荼毒國際金融環境？大家都係繼續睇落去，睇下點收科。

最後，熱烈祝賀工行上市，ICBC已經成為I Can Buy China，全球熱錢會繼續追捧依靠大陸繼續經濟增長祖國巨型公司，恆指繼續靠中移動上。今日，成交量、成交宗數全部都有機會破98年紀錄，求神拜佛港交所部電腦頂得順，如果學日本東京早排頂唔順Hang機，又會有大批人出來要道歉、不過唔辭職。哈、哈！