樓泡爆破遇上「做啲嘢」心態

孫柏文唔記得邊個人講過，不過佢話立法會議員陳婉嫻，每一次覺得有社會問題嘅時 候，對住啲政府官員，就會要求政府「做啲嘢」。當年特首董建華帶領嘅政府，當然順應呢位民選議員嘅要求，做咗好多嘢，特別係設立咗好多乜乜物物「共度時 艱」、「經濟轉型」基金。

原來，立法會議員陳婉嫻巴結外國勢力，將我哋特區啲最優良政客傳統輸出花旗國。大家都知，花旗國樓市泡沫正在爆破，樓泡爆破係 點，我諗除咗日本人之外，肯定係我哋特區人最熟。樓泡爆破其中一個必然現象，就係做按揭買樓嘅人，有啲會斷供，繼而被債主收樓。花旗國嘅樓泡當然冇分別。

為選舉日拉橫額

現 在，花旗國就出現千千萬萬個陳婉嫻議員，個個要求政府「做啲嘢」。好多州政府就順應民意，上排宣佈成立「救斷供人」基金。首先，我都唔研究究竟花旗國係咪 可以做到董建華做唔到嘅嘢，不過根據《華爾街日報》，各州嘅「救斷供人」基金，加埋得5億美元。

大家可能會問：「5億美元？連超保守嘅聯儲局主席伯南克都 話，淨係次按爆煲，都會係個1000億美元嘅氹啦！」冇錯，我相信得5億美元，就連保皇黨嘅議員都會話政府冇誠意。不過最緊要到選舉日，啲議員可以出嚟拉 橫額，話「成功爭取政府做啲嘢！」