因住俾人打！

每次被問關於點睇前特首董建華嘅政績時，我都會用我覺得係佢嘅三大德政作為我睇法嘅頭一段。

而董特首嘅三大德政，第一就係亞洲金融風暴中俾百富勤執笠，令胡亂投資嘅銀行家要面對自己做嘅決定衍生出嚟嘅惡果，花旗國嘅奧巴馬、布殊都冇董特首嘅勇氣。

其實，如果上次有救百富勤，我相信今次金融海嘯一定因有「出咗事，政府都會救我」嘅資金，逼啲金融機構管理層亂放債去追業績，令特區金融機構爆煲。

第二，就係肯接受立法會議員（雖然只係功能組別）嘅建議取消遺產稅，令人知道辛苦一生，可以將成果留畀自己心儀嘅人。

第三，就係將長期被政治力強嘅既得利益集團搵笨嘅公屋屋邨商場，一炮過將經營決定割離好鍾意用利益輸送，去換政治支持嘅政府。亦即係今日嘅領匯（823）。

過氣特首三大德政

今日講領匯，係因為前日有新聞報道，話抽水議員梁國雄帶租戶去領匯股東周年大會示威。咁帶啲咩租戶？有個要畀11000元租金嘅租戶話：「我欠領匯六萬六蚊租，仲欠銀行十幾萬債，領匯話我再唔還錢就要封舖，我又冇錢又冇用，死路一條呀。」

首先唔講佢係咪租霸，或佢嘅經營手法有冇進步嘅地方，佢欠債幾十萬，跟梁議員去「爭取」幾千蚊嘅減租係咪救自己盤生意最有效嘅一步？
梁國雄自己係咪又認為叫呢位租戶跟佢去示威，係救生意最有效嘅方法？

點都好，其實去股東大會，要求上市公司自減收入係非常危險。

其他時間，示威者數目遠超維護公司嘅人，不過股東會就唔同。

試諗吓，如果喺電盈股東會，我企起身要求減所有寬頻用戶嘅月費，你估我會唔會俾人打？

如果梁議員有 cojones，下次就要去電盈（008）股東會試吓，一路仲要大嗌：「電盈股東正一吸血鬼！」算啦，cojones始終唔係人人有。