功能組別有甚麼好

以前，孫柏文喺股票行做分析員時，久不久老闆就會叫啲同事做presentation，分析吓佢哋睇緊嘅版塊，同講吓佢哋嘅見解。咁每次搞呢啲 presentation時，最後必定有出席嘅同事，就算一早已支持present同事嘅見解，都用盡九牛二虎之力，希望擊破present同事嘅見解，而該同事亦要全力以赴咁守住。有時，火藥味濃。

初時，連我都自問為乜要搞埋啲咁嘅辯論，要搞到咁激。不過到我做過「主角」後，先知原來係不可缺少。點解？真係老土講句，真理越辯越明。被人全力「圍毆」完，自己個見解都能服人時，就知真金不怕洪爐火。

而成個過程最重要係，行得出「木人行」嘅投資建議，都因經過精挑細琢，啲客更會買、更會buy。

早前，公民黨同社民連搞嘅補選變相公投，其實係一個大好良機，俾支持功能組別繼續存在嘅人，解釋點解要保留功能組別。淨係話唔好急，都講吓唔急keep住有乜好呀？如果唔係點服呀？點支持2012keep住功能組別呀？

今次就當我係王祖藍扮魔鬼嘅辯護律師Devil's Advocate，以下就係sell功能組別嘅presentation。

「...反對功能組別嘅市民，反對嘅原因，最主要係因為唔係一人一票，有啲人有兩票。你得一票，佢有兩票，呢啲就係叫做『特權』。

不過當時西方人講嘅一人一票，對付嘅『特權』，其實係因為當時嘅歐洲國家，都係有皇帝、貴族。佢哋要求一人一票，背後係反對世襲制嘅不公，有啲人一生出來因血統關係就有特權。

試問，香港有邊個功能組別嘅選民（除咗鄉議局），一出世就有兩票？佢哋有嘅第二票，都係後天先有，仲有每一個今日得一票嘅香港人，都可以憑努力喺現制度下、未來嘅選舉投多一票。

支持功能組別嘅人，感受到管治一個地方，需要學問。不過冇可能考個統一嘅『選民能力試』先可投票，因為相信冇人寫到張試卷試題。

所以，不如叫社會中憑努力、考試等成功嘅人，分擔比其他人重嘅公民責任，去投多票。要有醫生牌嘅人先可幫你睇症、要有大律師牌先可幫你喺高等法院辯護、達標先能經營巴士公司，第二票就係同一樣嘅『特權』。呢個就係功能組別有咩好。...」

真心希望特首曾蔭權同立法會議員余若薇，為我哋越辯越明。