倒落海都唔俾你用

呢幾日好多新聞，今日孫柏文就同大家分享吓對其中幾單嘅睇法。

首先，有幫蘋果造iPhone、iPad等產品嘅富士康（2038），不斷出現懷疑自殺事件。最弊係冇能平息猜測嘅解釋，搞到眾說紛紜，滿街謠言。

做緊嘢嘅，就估係咪富士康嘅工作環境苛刻，或者壓力太大，搞到啲員工頂唔順，自尋短見。信風水術數嘅，就問係咪廠嗰到啲風水有問題。

跟住就聽到有朋友話國內啲討論區網站，話因發生第一次懷疑自殺事件時，富士康好心俾咗死者屋企人30萬人民幣嘅援助金，就搞到啲網友話：「想自殺，就去富士康做嘢先。」如果真係因為嗰筆30萬人民幣援助金，令有自殺傾向嘅人，被富士康吸引，就真係當時諗住幫死者屋企人，最大嘅不可預計後果！

不過睇番，富士康集團上上下下員工數目有比屯門區居民人數多嘅85萬人，要睇吓究竟死亡人數係咪比平均多。仲要計埋員工人口嘅年齡及其他特性分部，相比下，係咪真係有事。因為如果唔係，公司管理層突然為員工推出新政策，仲係一定要參與嗰隻，我只怕淨低嗰84萬幾嘅員工會非常反感。

例如，公司顧問話啲員工放假唔夠，咁富士康就迫員工放多啲假。點知，啲員工其實係想有咁多做咁多，因為喺廠附近放假冇意思，最好就係快啲搵多啲，跟住過年時早啲返鄉下團年。

點都好，最唔鍾意啲玩貿易保護主義嘅工會、吓吓唔經大腦賴僱主嘅傳媒機構亂估。你鍾意抽水搵著數或求其趕交稿，我都冇所謂，不過一但你根本唔知真正成因，最後令公司為討好你而冇對正下藥，之後再有人真係跳樓自殺時，你對手有份推佢落去。希望大家小心行事。

番來特區，我哋有局長林鄭月娥，話要睇吓有咩方法，等佢可立法強制市民減少用水。

根據政府自己嘅報告，我哋每年問內地買嘅水，根本用唔晒。真金白銀用錢買完多出來嘅，係會倒落鹹水海。林鄭月娥係倒落海都唔俾你用。政府幾時先會明白，公民黨式嘅環保政策，喺香港冇市場㗎！慳電膽嗰次，係公民黨「成功爭取」，佢哋連街板都印咗等掛出街，點知特首一出事，佢哋就閃晒。

喺公共政策層面，人類用水最多係農業，跟住係工業。我哋兩樣都冇，政府你搞乜呀？大家諗吓自己用水最多係為乜？咪就係清潔囉！從公共衛生來說，冇嘢緊要得過食水。立法減用？唔係嗎？

我僅希望議員、局長，唔好因為上期《Economist》羅來做題材，令你哋啲助手話不如抽水，你哋就要亂來。對你哋嘅討厭，就係咁樣慢慢積返來。