商務部為何潑冷水

上個禮拜，我國中央政府就出現涉嫌洩露國家機密事件，事源好靚嘅出口數據喺正式公佈嘅之前一日流出。市場一聽到呢個消息，即刻炒上，連花旗國股市都隨即爆升。果然大國勃起，一齊開心。

究竟數據點流出，呢啲就流番其他人解釋，孫柏文最感興趣嘅係到數據真正公佈之日，有如上市公司報業績一樣，「管理層」有咩嘅相關評語。

咁我國中央政府商務部就話：「係，5月出口按年真係勁升百分之 48.5，不過首先舊年數據差到不得了，依家又天下大亂，歐洲勢危，你都唔好話對未來唔驚。」

呢句說話，就有傳媒行家形容為「大潑冷水」。用股民心態睇，冷水，必定係用來冷卻熱熾嘅心情，而股民最鍾意自我膨脹，心一定諗：「中央叫我哋唔好炒得咁熱情呀！」

其實，大家都知番工時，team人一大或要跨部門做嘢嘅時候，就會有各派系嘅人玩嘢，搞啲辦公室政治。背後send電郵俾老闆打小報告、高姿態敲老細房門、開會時對住員工甲講嘢，不過啲說話係俾員工乙聽等招數，相信大家屢見不鮮。

咁大家可能會問，今日講呢啲天下烏鴉一樣黑嘅辦公室政治為乜？我國作為人口最多嘅國家，就有歷史已來最大嘅官僚系統，咁當人越多就幾何級咁越多辦公室政治時，我國政府官僚系統仲唔係最多人玩嘢之地？就係因為咁，我相信商務部「大潑冷水」嘅對象，根本唔係我哋呢啲投資者，其實炮咀係對住人行至真。

商務部唔知幾驚因為數據「太靚」，令貨幣政策會收緊。商務部好想啲銀行繼續放水，好似舊年柑，因為錢多時，啲資產價格被炒上，連帶嘅財富效應就可令消費者放心使錢。09年我國信貸額，有如聖經挪亞方舟嗰隻水浸，由股到樓都勁升。

當然，蝸居、通脹等問題亦會衍生出來，不過商務部作為典型嘅官僚，只知其他嘢唔關佢哋事，究竟自己部門係咪「成功」，齋睇經濟增長率。其他事就留俾其他部門處理。

仲有，就係因為中央知內部咁多派系，衰啲講就各懷鬼胎，好啲就係因被唔同嘅政策考慮推動，所以已知要用力統一口徑。咁依家商務部插旗話經濟好多擔憂時，其他部門就唔可以亂來，零星嘅冷卻可以，宏觀打壓就唔得。大家股民識做。

最後，世界盃就開咗鑼，我發覺今屆睇波特別吃力。02年雙失，日頭日日喺屋企睇波都得，到06年，除咗正職就冇乜其他嘢做，所以又可晚晚睇波，不過到今年，原來自己儲埋儲埋都唔少工作要做，我呢行財經演員仲要因口停口停，所以我都妒忌嗰啲可以放大假睇波嘅人。

唔知下屆會唔會更加冇時間呢？依家都只係單身寡仔忙工作，唔知四年之後會點？

唔使再讀凱恩斯！

孫柏文曾經聽過個故仔，今日要同大家分享。有個經濟學家叫John Maynard Keynes，中文叫凱恩斯，如果你讀過香港教育署嘅會考程度經濟科課程，都應該知佢係邊個。

咁佢以前，就喺劍橋教書，有日佢授課時就見有一個之前嗰晚去玩、劈酒嘅學生，因為酒氣未除、筋疲力竭，上課時瞓着咗。

凱恩斯見到佢咁，就即刻大發雷霆，走過去學生度大力拍枱，跟住要求個學生答佢啱啱問嘅問題。
學生即時彈起身，雖然嚇一跳，不過清醒起嚟咁答：「凱 Sir，我真係聽唔到你問乜。不過答案係政府應該加大開支！」

今日要同大家分享嘅原因，係因為凱恩斯真係吓吓得加大政府開支做解決經濟問題嘅答案。例如，問佢：「西班牙失業率百分之20，點先可降低？」佢唔會話叫西班牙檢討吓「老闆唔可以炒人」，呢啲特區著紅色衫後生仔、露事業線後生女社運家最支持，不過最終搞到工人冇工開嘅低能政策。

凱恩斯只會答：「加大政府開支！」

究竟呢條橋得唔得？呢個之後再講，不過吓吓加大政府開支嘅代價，就係政府財政赤字會越來越大，冇儲備就會有國債。最終債台高竹，爆煲等人救。而一救就會喪權辱國，因連使錢權都會俾咗救你嘅「恩人」（IMF、歐盟、北京，大家對號入座），你個政府仲可以做啲乜？

被教育署教科書誤導嘅你會問：「政府加大開支變赤字，只要短暫，經濟一反彈，稅收上升，咪冇事囉？」咁我就只可反問：「財赤對經濟咁好，咁全球政府加碼使錢咗成兩年，點解經濟都係一池死水？」不過凱恩斯如果喺九泉之下聽到我反問，一定經佢個問米佬克老明Paul Krugman答：「咁要再加大政府開支！」

今時今日嘅世界情況，除非你係個只望香港嘅典型特區社運家，凱恩斯學派嘅經濟理論已被證明係錯！錯都算，仲要禍害人間。

所以，依家去到歐洲因政府財政失控，爆連環金融危機，最開心應該係我呢啲讀過中學程度經濟學嘅人。
因為平時啲人問你啲喺中學學過嘅嘢時，你記唔起就只有尷尷尬尬咁轉吓話題，不過今時今日問關於凱恩斯學派嘅經濟學時，大家就可以話：「俾番晒先生啦！乾淨晒！」

我亦奉勸學生哥們，如果你讀Econ，就唔好再讀凱恩斯啲嘢。好似讀天文學仲讀緊本話地球既係平，又係喺宇宙中心嘅書。

你可能話：「不過先生話試卷會出喎！」我只可以答：「呢啲咁嘅A要唔要都罷。」因為個試仲考得凱恩斯啲嘢，個A遲早唔值錢！

補習天王及應屆econ學生

馬會獸醫勝評級公司

Lose!

Win!

上周，我哋特區單一最大納稅單位香港賽馬會，宣佈要罰練馬師梁定華。審訊小組決定，判處罰款七萬五千大元，算係罰得重。咁梁定華做過啲咩要罰得咁重？

首先大家要明馬會練馬師嘅職責，就係幫啲馬主練好佢哋啲馬。由食啲乜、點操練、馬匹瞓覺時舒唔舒服，都係練馬師負責。咁當練馬師覺得隻馬準備好，可以參賽，就會為佢哋報名。

報名後，就唔係練馬師話跑得就會跑得，都要最後獸醫把關，睇吓有冇啲健康問題，冇先跑得。要獸醫最後檢驗，原因有兩，第一當然係為隻馬本身，如果唔跑得都俾佢跑，就真係虐畜囉。第二，當然係保護投注人士嘅利益，一旦係因健康問題而隻馬輸咗，咁就好無辜。

人都係咁，好似我哋國寶劉翔，就算佢其實狀況大勇，又天賦神速，不過一旦摟親隻腳都照跑，咁就唔好囉。

咁點解上周梁練會被罰？原來佢有練隻叫「三扒兩撥」嘅馬，咁就去報名出賽。點知獸醫話健康唔及格，唔准跑。情況就好似啲投資銀行咁，想出批投資產品，點知俾信貸評級公司一睇，就話唔達標。

咁如果楂正來做，梁定華就應該等到隻馬好番，先再報名。不過梁練冇咁做，佢將「三扒兩撥」俾令一個獸醫睇，仲要冇同第二個獸醫講話已經睇過亦唔及格。不過第二個獸醫，雖然唔知隻馬曾被檢驗，不過同第一個獸醫一樣，都唔俾隻馬合格。

唔好理梁練為乜咁想隻馬跑，不過睇落佢真係似獸醫shopping。唔鍾意呢個「不及格」評級，就走去揀獸醫揀到啱為止。情況就好似啲投資銀行咁，批投資產品已被話唔達標之後，唔走去檢討吓自己賣緊乜，反而走去令一間評級公司，希望第二間鬆手啲。

咁梁定華同啲投資銀行有咩唔同？就係把關嗰個唔同。馬會獸醫，係馬會請番來，出糧係馬會，仲要係馬會安排邊個獸醫睇邊個馬房。有咁嘅安排，係因由創立至今，馬會將馬匹嘅安危同馬迷嘅利益放喺第一位，所以獸醫唔使驚你練馬師。

不過投資銀行同評級公司就唔同。當投資銀行出產品要評級時，係投資銀行出錢請評級公司。當然，如果間銀行成日都收唔到「鍾意」嘅評級，你間評級公司就會越來越少生意。結果係啲信貸評級亂來，AAA滿天飛。

馬會就係知，個百年金漆招牌一定要全力衛護，所以練馬師梁定華淨係冇同第二個獸醫講過話，其實隻馬已被令一獸醫驗過，都要被馬會重罰。

所以睇到呢段新聞時，孫柏文覺得馬會獸醫遠勝評級公司，做馬迷好過做債券投資者。

梁定華

德被騙救西 股市繼續低

上周，西班牙政府嘅信貸評級，被評級公司惠譽由AAA最高級，降至AA+級。消息一出，令全球市場下挫，香港股票市場亦不能幸免，下試19000點關口。

雖然市場之後出現反彈，不過惠譽作為三大評級公司中，通常走得最前、最快嘅一間，西班牙政府被剩餘兩間標普、穆迪降級嘅日子都指日可待。而從希臘被降級嘅經驗中，被降級唔會係一次嘅事。

降級浪一展現，就會一發不可收什地走下去，直至有新一輪歐洲大國嘅保證、救市行動，情況才會穩定。

不過希臘作為小國，經濟體係能被大國國民「捱義氣」下被救。相對下，西班牙大得不能被拯救，而現在市場傳出沒過半數議席嘅執政政府，將面臨不信任動議，如政府因而倒台，勢必令全球市場面對極大嘅壓力。

賬面上收入、開支嘅數字，西班牙政府已面對難關，不過上周亦揭開令一憂慮，就係西班牙銀行體制面臨倒閉潮。西班牙政府嘅慣常做法，係用軟功迫看來沒事嘅銀行，與出事嘅銀行合拼。但上周便出現第一間政府要接手嘅例子。

因西班牙呢d銀行，究竟賬目中嘅黑洞有多大，沒有人知，所以一但政府為避全國擠提潮爆發而出手注資，財赤勢必急速惡化。現在所有財赤預測，便會全告太樂觀。屆時，除非我國中央政府又再推寬鬆政策，港股必會非常動盪。

西班牙財政危機擴散方法，將會火燒持有西班牙國債嘅銀行。輕則令呢d銀行有集資壓力，重則令它們倒閉。而手持最多希臘、西班牙等國國債嘅銀行係法國d銀行。

因西班牙、希臘等國，就算用了九牛二虎之力之力去全面減財赤，未來數年還係會支出比收入高。亦因之前借下嘅款項達還債之日，如果一但出現不能借新錢嘅情況，法國呢d銀行亦即時資不抵債。法國政府都要出來填銀行嘅氹，而發生在南歐國家嘅死亡循環，都會降臨在法國政府嘅頭上。

剩下來唯一能解困嘅方案，係要歐央行印鈔，直接購買各歐元成員國嘅國債。但呢印鈔買債方案，一但落實，將會帶來不可預計嘅通脹，恐通脹嘅德國政府，都全力反對。

上周，歐央行宣佈會展開購債活動，都得德國支持。呢怪現象，係因為法國帶頭支持救市嘅政府們，向德國政府提出保證，雖然歐央行係印鈔，但因呢鼓購買力嘅出現，市場參與者便會自動重什信心，歐央行無需動用分文，都能令要借新錢嘅政府，能成功而低息借貸。

但係計畫宣佈了數天後，法國嘅一眾銀行，便被揭將手頭上大量嘅希臘國債賣給歐央行，德國官員得悉時即嬲爆想反檯，德國政府極可能爆不客氣嘅反應。大家要記得，每次降評級，市就跌數百，投資者要繼續保持非常審慎嘅部署。

夏佳理成功執死雞？

幾個月前，孫柏文有日楂車聽收音機，聽到一把好慘嘅聲。語氣好似啲爭仔失敗，不過又要扮大方嘅姐仔咁。不過，嗰把聲，係一把男人聲，因為我係訪問播放中途聽，一開始唔知邊個咁慘。

點知聽落，嗰把聲原來係港交所（388）主席夏佳理嘅。佢當時點解搞到，好似啲爭仔失敗嘅姐仔咁？因為喺金融海嘯中香咗嘅AIG，要變賣資產去填氹，其中AIG最靚嘅資產，就係東亞州保險界龍頭嘅友邦保險AIA。

原先，AIG諗住將AIA喺特區上市，首先將少數手頭上嘅股份賣出，之後如遇啱市況，就善價而沽。有隻咁出名嘅股票喺特區上市，作為港交所隊長嘅夏佳理當然好興奮。

點知講講吓，特然殺出個情咬金，英國作基地嘅保險公司保誠，提出全面收購。當日我聽到嘅訪問，就係電台問夏佳理點睇呢單嘢。

不過唔知係咪啊夏隊長腳頭好，保誠原來唔夠錢，所以要集資，而因英國乾塘，就來香港掛牌。咁就多咗間重磅金融股喺港交所買賣，等股民唔使吓吓買中資嗰啲。雖然唔似AIA，會當特區係主要上市地方，不過保誠（2378）都係個唔錯嘅安慰獎。

點知咁都未算鋒迴路轉，保誠集資之後，管理層諗住實食冇黐牙之濟，市況就不斷逆轉。啲嘢嘅價喺咁跌，保誠管理層之前出嘅價，就開始被質疑過高，而最大嘅反對聲音，對管理層好唔好彩地，係來只保誠啲大股東。

咁冇辦法，股東都出到聲時，保誠嘅管理層惟有做衰仔，同AIG大股東花旗政府講話可唔可以減價。咁做都唔係唔合邏輯，因為金融海嘯中，花旗政府係咁俾人噤住搶。大家可能話，保誠係英國公司，美國佬唔會減價益佢，不過大家要記得，08年雷曼爆煲時，啲資產係俾一樣係God save the Queen嘅巴克萊銀行賤價執晒，保誠只係想來個番版。

不過今時唔同往日，花旗政府一聽到保誠還價，就叫佢死開，一於企硬唔減價。呢個消息喺周末傳出，我諗最興奮嘅仲唔係夏隊長？依家分分鐘不但有保誠喺特區買賣，仲可能會有AIG用番原本嘅計劃，羅AIA來香港上市，仲要我地呢度作為主要上市交易場所。如果係咁，真係好似酒吧打烊，俾夏佳理成功執死雞。世杯臨近，有咁嘅腳法，真係應景。夏隊長好嘢！

倒落海都唔俾你用

呢幾日好多新聞，今日孫柏文就同大家分享吓對其中幾單嘅睇法。

首先，有幫蘋果造iPhone、iPad等產品嘅富士康（2038），不斷出現懷疑自殺事件。最弊係冇能平息猜測嘅解釋，搞到眾說紛紜，滿街謠言。

做緊嘢嘅，就估係咪富士康嘅工作環境苛刻，或者壓力太大，搞到啲員工頂唔順，自尋短見。信風水術數嘅，就問係咪廠嗰到啲風水有問題。

跟住就聽到有朋友話國內啲討論區網站，話因發生第一次懷疑自殺事件時，富士康好心俾咗死者屋企人30萬人民幣嘅援助金，就搞到啲網友話：「想自殺，就去富士康做嘢先。」如果真係因為嗰筆30萬人民幣援助金，令有自殺傾向嘅人，被富士康吸引，就真係當時諗住幫死者屋企人，最大嘅不可預計後果！

不過睇番，富士康集團上上下下員工數目有比屯門區居民人數多嘅85萬人，要睇吓究竟死亡人數係咪比平均多。仲要計埋員工人口嘅年齡及其他特性分部，相比下，係咪真係有事。因為如果唔係，公司管理層突然為員工推出新政策，仲係一定要參與嗰隻，我只怕淨低嗰84萬幾嘅員工會非常反感。

例如，公司顧問話啲員工放假唔夠，咁富士康就迫員工放多啲假。點知，啲員工其實係想有咁多做咁多，因為喺廠附近放假冇意思，最好就係快啲搵多啲，跟住過年時早啲返鄉下團年。

點都好，最唔鍾意啲玩貿易保護主義嘅工會、吓吓唔經大腦賴僱主嘅傳媒機構亂估。你鍾意抽水搵著數或求其趕交稿，我都冇所謂，不過一但你根本唔知真正成因，最後令公司為討好你而冇對正下藥，之後再有人真係跳樓自殺時，你對手有份推佢落去。希望大家小心行事。

番來特區，我哋有局長林鄭月娥，話要睇吓有咩方法，等佢可立法強制市民減少用水。

根據政府自己嘅報告，我哋每年問內地買嘅水，根本用唔晒。真金白銀用錢買完多出來嘅，係會倒落鹹水海。林鄭月娥係倒落海都唔俾你用。政府幾時先會明白，公民黨式嘅環保政策，喺香港冇市場㗎！慳電膽嗰次，係公民黨「成功爭取」，佢哋連街板都印咗等掛出街，點知特首一出事，佢哋就閃晒。

喺公共政策層面，人類用水最多係農業，跟住係工業。我哋兩樣都冇，政府你搞乜呀？大家諗吓自己用水最多係為乜？咪就係清潔囉！從公共衛生來說，冇嘢緊要得過食水。立法減用？唔係嗎？

我僅希望議員、局長，唔好因為上期《Economist》羅來做題材，令你哋啲助手話不如抽水，你哋就要亂來。對你哋嘅討厭，就係咁樣慢慢積返來。

功能組別有甚麼好

以前，孫柏文喺股票行做分析員時，久不久老闆就會叫啲同事做presentation，分析吓佢哋睇緊嘅版塊，同講吓佢哋嘅見解。咁每次搞呢啲 presentation時，最後必定有出席嘅同事，就算一早已支持present同事嘅見解，都用盡九牛二虎之力，希望擊破present同事嘅見解，而該同事亦要全力以赴咁守住。有時，火藥味濃。

初時，連我都自問為乜要搞埋啲咁嘅辯論，要搞到咁激。不過到我做過「主角」後，先知原來係不可缺少。點解？真係老土講句，真理越辯越明。被人全力「圍毆」完，自己個見解都能服人時，就知真金不怕洪爐火。

而成個過程最重要係，行得出「木人行」嘅投資建議，都因經過精挑細琢，啲客更會買、更會buy。

早前，公民黨同社民連搞嘅補選變相公投，其實係一個大好良機，俾支持功能組別繼續存在嘅人，解釋點解要保留功能組別。淨係話唔好急，都講吓唔急keep住有乜好呀？如果唔係點服呀？點支持2012keep住功能組別呀？

今次就當我係王祖藍扮魔鬼嘅辯護律師Devil's Advocate，以下就係sell功能組別嘅presentation。

「...反對功能組別嘅市民，反對嘅原因，最主要係因為唔係一人一票，有啲人有兩票。你得一票，佢有兩票，呢啲就係叫做『特權』。

不過當時西方人講嘅一人一票，對付嘅『特權』，其實係因為當時嘅歐洲國家，都係有皇帝、貴族。佢哋要求一人一票，背後係反對世襲制嘅不公，有啲人一生出來因血統關係就有特權。

試問，香港有邊個功能組別嘅選民（除咗鄉議局），一出世就有兩票？佢哋有嘅第二票，都係後天先有，仲有每一個今日得一票嘅香港人，都可以憑努力喺現制度下、未來嘅選舉投多一票。

支持功能組別嘅人，感受到管治一個地方，需要學問。不過冇可能考個統一嘅『選民能力試』先可投票，因為相信冇人寫到張試卷試題。

所以，不如叫社會中憑努力、考試等成功嘅人，分擔比其他人重嘅公民責任，去投多票。要有醫生牌嘅人先可幫你睇症、要有大律師牌先可幫你喺高等法院辯護、達標先能經營巴士公司，第二票就係同一樣嘅『特權』。呢個就係功能組別有咩好。...」

真心希望特首曾蔭權同立法會議員余若薇，為我哋越辯越明。

太刻薄！

社民連偽善鐵證！