晒冷買希臘四月脫歐

翻查記錄，特區一眾精英股評人行家中，對歐洲同歐元嘅睇法都係主要話遲早出事，現有嘅結構冇可能延續。呢個預測，同外國嗰啲我最信嘅投資、分析高人係一模一樣。不過有如尋日喺獅子山學會同利世民、王弼討論時嘅結論一樣，個問題係幾時。

而因到今日都未有人肯一句講到尾咁話幾時，就等我做呢個預測嘅「數碼通（315）」，等我行先死先捱轟先。孫柏文今日話：「希臘將會2012年四月脫離歐元區。」

大家作為《金手指》fan屎，都知我做過好多攞膽嘅預測，06年話白銀十年升十二倍，07年匯豐賣百四蚊一股時叫大家沽清。不過今次呢個預測相信係最攞膽，原因係四月之係六個禮拜之後嘅事。

咁究竟呢六個禮拜會點？首先，希臘政府本身已誠信破產，再通過咩減赤方案已經係冇意思。雖然大家一早都知通過咩法案都係對政府財政嘅爛局冇幫助，不過之前大家都知佢哋通過法案就可以交差攞救濟。

而依家係通過咗都攞唔到，因為連歐洲其他政府都唔信會做，更唔信會做到，最殘酷係就算減到開支，因經濟急速萎縮，就算收支平衡，國債對GDP只會都會擴大，還債能力由冇得還變更冇得還。

亦因呢陣東風根本冇得擋，就不如借東風達政治目的。禮拜二，我講過話德國領導如要德國人民就範，傾國傾城咁放大政客權力去「救」歐元區，佢哋要學花旗國政府咁做個「雷曼」嚇人嚇到見棺材流眼淚。喺咁嘅incentive推動下，希臘唔會有方案能滿足德國政府。所以再加碼救希臘唔會發生，三月希臘政府將會走國債數。

大家可能話：「唔還國債錢，唔等於要離開歐元區。甚至係唔使還國債會令未來希臘財政更穩健，更能留喺歐元區。」問題係政府「債主」唔止係國債債券持有人，公務員呢？每個月喺「全民退休派錢」政策下攞錢嘅人呢？全部都要出糧，出福利。

所以有如獅子山學會同事王弼話，希臘要自己發鈔，首先迫所有可以迫嘅人，例如銀行存戶、所有合約簽署人、公務員薪津、攞福利嘅人等，將歐元定個匯率後強制用新希臘貨幣做計算。之後就開波買賣俾佢自由浮動，等新貨幣可以跌至搵到應有對換率。

仲有，歐洲各國好多政客，都好似特區嘅工聯會、李卓人，真心覺得銀行家吓吓搵笨，草木皆兵咁反任何措施。而唔同特區，佢哋呢啲人真係執政話事。仲有，歐央行話自己唔蝕得，不過希臘唔俾時，好似當年史太林講梵蒂岡一樣，希臘亦問歐央行：「你有幾多架坦克？」到歐央行都中招，下一步又點？

當然，好似06年我話「花旗國樓市將慘過八萬五」一樣，就算俾我講中，又應該點落注？因為連我都應，我冇能力叫你一注獨沽雷曼兄弟，最多都係叫你拋空兩房。

講落注，大家嘅反應可能係：「瞓身沽歐元！」不過如果希臘脫歐元，係其他歐豬國家嘅先例，即示意留喺歐元區嘅國家將會係德國為首，甚至得番德國。咁嘅馬克2.0仲唔大升特升？

仲要轉身要快，因為一旦希臘離開後，歐洲各國人民唔敢再反對任何「非一般」救市措施時，例如印印印，歐元又會點？又或者係其他歐豬國家存戶見希臘存戶嘅遭遇，開始擠提，歐元流轉velocity暴跌，歐元又點？唔通美元、美債及同美元掛勾貨幣又係避難所？

尋日，因中國話「支持」歐元區及歐盟（中央都多次表態支持香港民主進程），港股無啦啦大升，地產股好似間間都被梁振英賜地起紅灣半島式住宅咁飆，我只可話呢場party冇我份玩，你玩繼續玩，我就戥你高興。