已買熊證睇跌

週末深夜時分，孫柏文喺網上遊戲世界激烈地為港爭光之際，突然電話收到短訊。一睇電話，原來係梁心欣來訊話：「存款準備金，50點子。」

我諗：「嘩！減存款準備金50點子？咁激！真係估佢唔到，個市仲唔反射式咁升？不過睇淡嘅我就諗，中央係咪知道啲我哋唔知嘅嘢呢？習總遊歐洲，主人揸住兜，哭住嗌求救？唔通真係將會有如一盤糞便將會被拋向掛在天花板上開到最行的風扇般，片地灑金？」

今次人行嘅行動，真係出奇不意，尋日睇財經台，見到我至喜愛嘅丁Sir丁世民話人行已似以前嘅德國央，你估唔到時先做啲例如喺週末減存款準備金嘅動作。大家都知，市場最鍾意先炒利好傳聞，再喺消息出時沽，今次喺冇預期下出好消息，應該升升升。點知，雖裂口高開唔少後，個市居然跌，真係對好友唔係好現象。

其中一樣好多人會留意嘅股市水晶球，就係國際銅價。以前留意係因為銅需求變化能預視世界經濟表現，依家就因銅係風險胃口嘅指標，而銅價喺上週五紐約收市價由跌穿50日平均線。上次跌穿，就係喺舊年八月初，當全世界都覺歐洲問題應會冇事之時。

所以，我尋日就買咗江西銅（358）嘅遠期熊證同價內put輪，諗住係咁坐，坐到希臘單嘢有結局為止。歐央行，因為買咗啲歐洲國家國債之後，要求要喺一眾應平起平坐嘅債主中行先，你做其他債主，不但會唔高興，仲要唔知歐央行會唔會越買越多，你越排越後。希臘嘅結局就係其他國家嘅序，除非歐央行肯一齊平起平坐咁蝕，如果唔係佢哋一係唔買，一買就要買晒因為其他投資者一定唔肯排後。

最後，我想恭喜啲睇好嘅投資者，因為當我呢個大明燈都仲喺到買熊證、put輪時，個市邊到係升完？