溫總為流選開綠燈

尋日凌晨，孫柏文坐喺電腦前做緊功課之際，突然見到各大新聞社報導話JP Morgan宣佈會回購股份。當時花旗國未收市，我第一個反應係：「遲啲唔係要公佈假設再大蕭條嘅銀行壓力測試結果咩？如果JP Morgan，甚至全部銀行被評唔及格，JP Morgan要收番講過嘅嘢，咁咪好冇面？」

再諗，其實今次JP Morgan係狠狠咁星咗聯儲局一把，就係特登喺你未公佈壓力測試結果前講。示意之後你講乜都對我嘅決定冇影響，當你啲說話發噏風。大家可能會問，年終有唔少公司宣佈回購股份，JP Morgan咁話有乜大不了。如果你咁問，不如我掉番轉問你，匯豐（005）聽日走出來話每十七股匯豐，回購五股，用現價，你會點諗？

你就算唔話：「嘩！當年廿八蚊供，依家用差唔多七十蚊買番好抵呀！」你都起碼會安慰自己，咁證明匯豐充足資本做生意，至少唔使再問股東攞錢。不過睇JP Morgan可以更推多步，即係就算唔夠資本，咁又點？你作為政府吹佢脹咩？佢唔掂你就會托錢來救佢㗎啦！政府冇錢？聯儲局都會印！

今次JP Morgan嘅舉動，就係俾市場知，金融海嘯後政府同啲「大得不能不救」或「大得不能救」嘅銀行之間嘅權力同監管角力，銀行已贏晒。以前都仲可以有遐想噤得住啲銀行，依家就面對現實，有錢賺就益bankers、股東同借錢俾銀行做生意嘅債主，輸錢時就call納稅人、未來納稅人同辛苦儲錢嘅乖仔乖女，被抽稅同手上現金購買力被蒸發。

無恥？係。不過面對呢個潮流，如何應對？揸現金，唔得，甚至正版末日博士Marc Faber話係最危險嘅事，因為輸硬。連創「黑天鵝」一詞嘅Nassim Taleb, 都話雖覺現今金融系統有隨時崩潰嘅可能，不過佢都被局賭，買咗唔少股票。就係咁尋日，溫總開口令中國三個股市齊跌，應該係買貨好機會。

溫總話繼續打樓價，因遠遠未落番合理水平，不過又擔心經濟放慢，即係除樓市外，乜都會谷啦！

再講，前日我話希臘被裁為走數後，之後禮拜一個股市發呆。坐喺股票機前，有如以前冷戰時坐喺美國國防部指揮中心，知道蘇聯已發射核子巡行導彈，不過因仲係飛緊過來，所以未知會炸到啲乜嘅感覺。依家真係好似乜都炸唔到咁。

骨牌係咪擺好應一個跟住一個咁冧？係。不過歐央行放水放到好似將啲骨牌擺咗喺個裝滿水嘅魚缸底，你咪推冧希臘囉，睇吓有乜嘢跟住冧？我覺得去到呢點，應該壓重注買唔會再有突然缺水令價格大冧特冧嘅金融危機。個必資產價格走勢係咪會有分歧？係，即係我唔知應唔應該買香港樓，不過現金購買力只會不斷下跌，唔會再有08年尾呢啲入市筍位。買，要快。

最後，尋日溫爺爺亦講起香港，仲搬咗小平同志出來。即係按本子辦事，流選時已有程序handle，為流選開綠燈，因京城已好亂，唔該港人治港，高度自治。

caption：溫總引述鄧小平，提點世人，京城好亂，港事屬港人事。