LTRO完股民應如何再部署

尋日，歐央行宣佈第二批，即聲稱係最後一批嘅三年期一厘LTRO貸款有幾多人申請。結果？有800間銀行，借咗超過5000億歐元。銀碼同上次差唔多，不過上次就只得五百幾間銀行申請。

點多好，孫柏文相信市場現階段似舊年花旗國聯儲局「量化寬鬆QE二期」末段。提提大家，QE二喺2010年尾正式開動，到2011年四月結束，股市喺QE二宣佈後不過落實前嘅幾個月大升。落實初期已見頂，之後有波幅下橫行至四月完結時，跟住就恆指由24000點喺五個月之內跌穿16000點。

即係如果歷史重演，班央行組成嘅紙幣狂魔集團暫時停止印鈔，股市已升完。而今次LTRO似QE二嘅另一現象，就係我至喜愛，不過又係每個浪中嘅藍燈籠，即白銀都有大升勢。我同一眾白銀戰隊成員，每見白銀開始勁升，就會開始預期呢次全球資產升浪完結在即。

今次歐央行行動，有冇幫助，我只可話有啲有有啲冇。先講有用，最受惠之國必定係意大利。因為佢哋之前嘅政府財政，如果撇開國債利息開支，其實係有盈餘。即只要利息開支夠低，其實係可以過關。咁因為之前香港輸出最球至勁嘅政治制度俾佢哋用（總理，即行政長官唔係選出來。內閣，即局長們唔係選出來，不過係「精英technocrat」。國會，即立法會，審理班「精英」拋出來嘅方案後，因受到歐盟布魯塞爾，即北來中央嘅壓力，橡皮圖章般通過。）令市場覺得意大利香港化後，可推動艱辛嘅改革。

不過其他國家，就冇咁有用。先講希臘，就算經過兩輪LTRO，佢哋仲係完全冇錢，仲係等緊人打救。隔離版利世民都講過話俾希臘嘅錢，希臘政府冇得過水濕腳，直接攞來還錢。公務員唔係減薪三幾個百分點咁簡單，而係要嘔番錢俾政府。而每次長期患病嘅死亡徵兆，又已出現。

呢啲臨死徵兆，就係國家系統嘅供應商，拒絕再供應。例如舊年希臘煉油廠只得15％原油來只伊朗，到今年年初就去到超過80％，不過早幾日，伊朗話因歐盟抵制佢，所以唔出口原油俾希臘。抵咩制呀，根本就係伊朗供油俾希臘要俾數期佢，不過你依家揸住希臘政府嘅receivables去銀行借錢，銀行都叫你FO啦。咁點賣油俾佢呀？

仲有，藥廠都停止供藥俾希臘。如果你係啲典型唔做功課嘅80、90後道德超人，千其唔好鬧住，因為藥廠咁做，係因為供藥俾佢時，不但唔找數，仲要有關人士攞啲藥離開希臘，賣出國。

德國話通過俾錢希臘，全是假象。因為德國好似啲英國大學咁，對希臘呢個申請人。特區JUPAS，就係你先報大學，跟住考試放榜後，大學要你就出鐵一般offer。花旗國係考晒試，先報大學，之後大學要你都係出鐵一般offer。英國就你申請，佢出個有條件offer，例如要你考到某個成績，你之後考到先收你。

依家德國國會幾百票對幾十票通過救希臘offer，考到六支A就救佢。希臘答，不過我只係考四科，市場淨係見德國國會嘅offer，就已開心一陣，唔拋空真係對唔住自己。唯一問題係，近排，越沽越被夾。點搞？