1340億美債券「可能係堅」

大家可能聽過上個禮拜有兩個揸日本護照嘅人，喺冇報關情況下，嘗試用行李箱偷運票面總共值1340億嘅花旗國債券。冇錯，係1340億，仲要係美元！救AIG都係千幾億之嘛！

孫柏文一聽到呢啲占士邦片先有嘅橋段當然滿腦疑問。
例如，啲債券係堅嘢定A貨？
嗰兩條友係乜水？
究竟為乜運啲債券去瑞士？

意國官僚都唔肯定

當然，咁大單嘢應該好快有答案。雖然意大利官僚出晒名冇效率，點知直至噚日，意大利央行仲未為債券辨別真偽，話「可能係堅」，要成個禮拜先要求花旗國財政部派人去睇。

有戀意大利癖嘅港女可能會話：「咁又唔見花旗國好有效率咁幫手？」我只可以話，有邊個債仔會主動確認自己啲債據？所以花旗國政府慢吞吞係可以理解。

仲有，連當地嘅日本領事館都未能確認嗰兩條友究竟係咪日本人，又爆好多陰謀論。呢個我反而唔怪佢哋，因為日本政府之前都試過唔見50萬國民嘅退休金供款紀錄，不過咁動盪嘅日子，市場少啲疑慮好啲。

如果啲債券係堅嘅，究竟為乜要走私去瑞士？

據報呢批不記名、可自由轉讓嘅債券，每張票面值達5億美元。而呢啲不記名、高面值嘅債，自1969年已冇再發，當年可動用5億嘅機構就唔多，得政府、超級大公司、銀行等。

我諗呢個古仔仲有排搞。不過大家知唔知點解花旗國政府，轉制要啲債券持有人記名？因為其中一個區域聯儲局，喺1962年試過「唔見咗」750萬美元嘅債券。邊個「執」到就發達囉。