我隻股票返家鄉！

2007年10月25日，股市因「資金自由行」概念帶動，牛氣冲天。當時，雖然孫柏文已叫過大家「一注獨沽滙豐」，不過嗰日都係抵不住升勢，建議「一注獨贏」買一隻股票。

計埋派息有微利

嗰日開市隻嘢賣5.9元一股，而恒指就報29660點，高過o依家成萬點。結果係點？我隻嘢上個禮拜五返到家鄉！飲得杯落。

邊隻咁把炮？就係中油香港（135），上個禮拜五收6.05元。如果計埋佢呢兩年派過兩次息，總共0.27元，直情有微利。

當然，又會有人行出來嗌：「機會成本呀呀呀！」我同意，雖然嗰日買恒指熊證都係要死，因為幾日後升到最高位時，所有恒指熊證啪晒，不過如果你當時用咗啲錢買AAA評級嘅兩年期花旗國債，就每年有5厘幾回報。I am sorry！

咁去到呢個位點算？

中油香港股價，曾經喺08年10月27日低見過1.82元，依家個個都係睇佢阿媽點注啲天然氣業務入去。之前，母公司已話過啲天然氣業務，要達某個回報率先會「益」中油香港，而至今注來注去都係啲細嘢，加埋我由之前做石油分析員時已對天然氣業務嘅盈利爆炸力完全冇期望，都係聽住先。

阿媽注資聽住先

不過間嘢始終仲有好多油田，係間暫時現金每年點用都係越嚟越多嘅公司。當年目標價8.05元仲有效，但真係要金睛火眼咁睇實，大市一旦逆轉就要走。