插爆分析員（開名）

孫柏文行街遇到啲讀緊書嘅fan屎時，佢哋都成日問我以前做分析員究竟工作包括啲乜。每次我都會引用前老闆對我哋經常講嘅說話：「股票股票都係估估吓。」

不過我鼓勵啲後生喺今時今日有大把發表意見平台嘅世界裏，分析得比人好兼敢講，唔畀人發掘都好難。

做大行有着數

要比人好，當然就要鬥分析。問題係有啲公司會對某啲分析員「特別着數」。原因係當我喺細行做，你喺大行做，你見到管理層嘅機會都高啲，淨係近距離睇到管理層講佢哋啲大計時手震、標冷汗都已着數好多。

所以我永遠都建議啲後生，開始時揀生意額、收入、成本透明度不但高，仲要即時知嘅公司。免得嗰啲大行分析員，唔係因分析獨到，只係因同啲管理層好熟而贏你。到時大家就會好公平咁純粹鬥預測能力。

咁有冇間咁嘅公司？有，就係港交所（388）。

佢哋有幾多生意，每個交易日每秒即時update，而諗住就算生意數據上冇着數，都可以問吓高層有乜新動向嘅人，我不如問番你，你覺得港交所主席夏佳理講得出幾時有資金自由行咩？

即係大行分析員分析港交所係唔會比你有着數。

大家可能會話：「又話開名插大行分析員？」係，今日想插摩根大通嘅 Michael Chan 陳志豐。

佢前日出報告將港交所嘅投資評級，由「持有」升至「買入」，令股價單日升9.5元，咁佢分析有幾獨到？自己睇圖啦！