吸取2010年最大的教訓

各位 fan屎，真係有一排冇見，大家咁掛住孫柏文，辛苦晒！今日作為全年第一個交易日，相信隔離左右好多嘅前輩，都會為今年作前瞻。我今日就唔會做住，因為想睇晒其他人嘅文，先一次過 copy& paste俾大家啲最正嘅預測。

今日，我想講舊年對我最大單嘅新聞。大家可能會估，係咪關歐洲事？如果你咁估，就錯了，因為有關歐洲嘅嘢都係排第二。舊年最大單新聞，必屬馬會山光道會所泳池發生嘅一場鄺其志水戰劉鳴煒事件。

微觀上，事件起因一定有一百幾十個理由，不過拉後宏觀睇，水戰必定係因泳客與泳客之間嘅泳線過度擠迫，游得太近而爆發。其實呢次水戰可避免，特區好多泳池都係泳客完全霸佔一條自己嘅泳線，最多都係條泳線一分為二，如果再密啲就會有機爆水戰。即係一個有六條泳線嘅泳池，最多容納十二個泳客，效率非常低。

如果係私募基金接管泳池，佢哋應該會明白，泳池嘅固定資本投資好高，有如航空公司買飛機。所以就會度橋點樣令個泳池可任何時間俾更多人同時游。

最有效方法，就係每條泳線分速度，然後每泳客要單向兜圈咁游。只要每條線嘅兜圈泳客速度差唔多，就可大大提升泳池容量及效率，呢個制度喺好多學校都有用。不過，機制嘅關鍵，係一旦有泳客游得太慢，就要有方法「溫馨提示」佢提速或轉線，如果唔係機制就會崩潰。我作為喺馬會沙田會所泳池嘅常客，其實已見到馬會有嘅「兜圈」安排，不過因為冇執行最低限速，所以效率未達至最高。做咗，不過冇效。

呢個情況，極似 2011年嘅歐洲。減赤、救市法案一個又一個咁通過，最後係點？都係執行無力而令危機未解。講，你可以天下無敵，不過當做，係有心無力時，都係遲早爆危機，你追一鑊死一鑊。呢個就係舊年對投資嘅最大教訓。

最後，有好多人話鄺其志被暫停會員權益，係因為第二個事主係大劉個仔。我知喺2012年嘅特區，好難相信有地方仲係公平公正，不過信我，就算鄺其志大戰嗰個唔係劉鳴煒而係我，都係會同樣被罰，香港真係有地方仲係咁。