花旗國初選大贏家：貴金屬

兩日前，花旗國嘅愛荷華州，進行咗佢哋共和黨揀黨代表參選總統選舉嘅第一場初選，亦正式為今年花旗國大選揭幕。初選結果一出，啲老外政治、財經演員紛紛用賽馬旁述嘅角度去分析呢場初選影響。孫柏文一睇，真係覺得超低層次。

其實，今次初選喺金融市場泡製咗班大贏家，相信最開心必定係以聯儲局主席伯南克為首嘅紙幣狂魔集團，又可以為印鈔機加墨加紙。點解我會咁講？簡單答案係因為反印鈔勢力被挫。

朗保羅力抗印鈔

聯儲局印鈔，即佢哋政治化妝下叫嘅「量化寬鬆」，其實由 09年第一次印開始，已經有人狂抦。話呢個政策就係由羅馬帝國開始，所有強國踏上末路嘅第一步。最深刻，一定係 09年 2月，番鬼佬財經台 CNBC嘅 Rick Santelli，喺芝加哥期貨交易所大罵救市措施嘅一幕。亦催生咗反對政府大花灑、反印鈔嘅 Taxed Enough Already運動（簡稱茶黨， TEA Party）。

到 2010年，得到茶黨支持嘅候選人，喺國會選舉中大舉獲勝，矛頭直指「獨立運作」、即不受監控嘅聯儲局。不過因為聯儲局、財政部等，全部都係喺行政機關下運作，得立法功能嘅國會難以插手，就連國會對付行政機關嘅最終極絕招 Cut budget，都因聯儲局有印鈔機而宣告無效。

聯儲局喺咁嘅局勢下一印再印，量化寬鬆有如香港大型樓盤般，一期一期咁推出，金融市場參與者們，迫不得已進行全球性投機活動。為「救市」，花旗國聯邦政府行政機關嘅官員乜都試勻，簡直體驗二戰英揆邱吉爾嗰句：「美國人一定做啱嘅事，不過要試勻晒其他方法先。」即係最終會撥亂反正。

咁可容許花旗國有呢嗰自我治療能力，就係佢哋嘅選舉，包括黨揀參選代表嘅初選機制，令最初係少數嘅聲音，可憑辯論、解釋慢慢咁變成多數聲音，最終執政變成被落實嘅政策。就算代表聲音嘅初選候選人落敗，為箍票，勝出嘅黨代表都要某程度上採納啲政策。

最代表茶黨、反聯儲局印鈔嘅候選人，就肯定係朗．保羅（ Ron Paul）。不過因為佢係「少數聲音」所以好多人都當佢啲政策冇到。點知喺 2010年夏天，剛宣佈參選嘅德州州長，憑一句「伯南克印鈔係叛國行為」，令支持率大升，而喺 10月後，德州州長開始喺民意調查下滑之時，朗．保羅喺自己嘅愛荷華州初選民意調查支持率，開始節節上升。

直到 12月初，呢個支持貨幣同黃金掛鈎嘅候選人直情好似有得贏，市場開始預期聯儲局自由度會被鉗，印鈔結束，令市場憧憬花旗國係咪已經會做「啱嘅事」，令對冲紙幣嘅黃金受壓，由約 1750美元跌至 1550美元水平（見圖）。

不過，兩日前嘅初選結果一開，朗．保羅得個第三，相信聯儲局又可以毋須搞例如放錢畀外國央行，等佢哋再放錢出去嘅檯底量化寬鬆，理直氣壯咁再印鈔。貴金屬作避難所嘅地位，仲有排未玩完。