答老竇揸滙控的問題

尋日，孫柏文睇住個市，由朝早嘅跌市到最後一路升到尾，都真係要寫個服字。國家領導喺周末開嘅會，就算冇政策出台或現政策改變，都可令美聯社嘅報導話人行某官員表態今年國家政策係主要希望經濟增長。老外傳媒就即刻個個喺尋日晏晝市嘅時間，用呢個要點做題。

咁特區股民聽到，又反射式無限想像唔知今次會有幾多萬億人民幣放出來，真係唔掃咗先講都對唔住自己咁。之後冇料到，個市又會躂番落來。大家諗放水前，要玩角色扮演，諗吓如果係領導，會有啲咩考慮。多唔好講，京奧後嘅救市第一炮就係令中國建材（3323）升十幾倍嘅四萬億基建方案。結果係點？哪，我唔係話有直接關係，不過之後真係有好多國內高官嘅related parties，喺特區掃豪宅。喺咁嘅情況下，你會唔會再大力放水？

上個禮拜，我同老豆食飯。傾傾吓應唔應該繼續揸匯豐，老豆就問：「咁啲人就算賣晒手上啲嘢，啲錢都唔會消失？」當我想用彿利民嘅貨幣分析PQ = MV答佢時（噢Sorry，忘記咗第四代香港人同第二代香港人講嘢時係冇「答」呢樣嘢，只有「駁咀」），老豆就繼續話：「啲錢都要買番啲嘢架？」

呢個信念，除咗我個預科經濟合格、不過完全忘記晒fractional reserve banking點運作嘅老豆外，仲應該有唔少人不但一樣信外，仲因呢個信念覺得啲資產價格遲早都有得升番。

老豆有呢個信念嘅其中一個好重要原因，係因為佢用真金白銀買嘢。不過一旦有人借錢來買嘢時，只要放貸單位因睇唔透風險提高準備金，每收入來嘅一百蚊存款，由以前借出95蚊變成只放出90蚊。

仲要以前極速批核變成要諗好耐先放款，加埋以前放貸單位啲準備金可買國債賺息鞏固資本，變成今日連政府都唔信要擺錢喺央行發臭，啲放貸單位們就會總體收縮貨幣供應。即係啲人賣完嘢，還錢俾債主後啲錢係會從市場上消失。依家，你仲敢唔敢等人來接你貨？