一百億桶油，又如可？

孫柏文以前做分析員時候，睇見好多行家每日都出好多買賣建議。大多數建議都算有根有據，不過有時的山埃就唔知道佢地究竟係唔係想害人。個陣金手指只不過係業餘嗜好，只會茶餘飯後去篤爆同行(的)害人建議。每一次發表完我啲偉論之後，我都會問一句：「囂！我就唔信佢自己會買勒！」

後來，自己做分析員做得耐，發現就算分析員跟自己既建議做買賣，亦唔代表分析員對自己既建議有100%既信心。如果大家真係要知道究竟分析員對買賣建議係唔係有100%信心，最好就睇一睇該分析員既母親有冇跟建議就得勒。因為如果建議錯咗，呢位分析員一定被煩到無覺好(目訓)。所以如果有機會響互動情況下同分析員傾佢地的建議，記著問：「令壽堂有冇買先？」咁就知道買賣建議係唔係堅料。

孫柏文以前做石油股分析員既時候，耐唔耐就會篤隻石油股叫阿媽買，我阿媽亦耐唔耐執到的，畀佢可以落茶餐廳享受一下Afternoon Tea加蛋撻。不過，分析員母親們始終不是熟行的分析員，她們所注意的新聞往往同貼市分析員睇個啲唔同。例如早排祖國中央政府宣布，計劃用上千億元去投資核子能源，搞到我阿媽即刻捉住我問：「咁多核子能源，石油公司咪死羅？」

好彩我阿媽係醒目人，我畀左些少中央政府的能源數據，佢就識得話︰「車！原來得個幾個巴仙核能，祖國真係仲需好多石油。」

上周又有一單咁誤導既新聞。話說中美洲Tequila國總統宣布響離岸海域發現一個蘊藏一百億桶石油既超級油田。如果大家唔熟識石油業，就可能會覺得呢個油田一定可以解決世界能源危機，令到石油股大跌。
不過睇真啲，每日世界平均消耗八千萬多桶石油，一百億桶亦只可以維持世界一百多天的消耗量。仲有Tequila國政府對石油業一向採取封關鎖國既態度，令到好多外國尖端科技都無法引入。呢個油田最少5至7年先投產，所以有排都唔會影響石油價格。金手指篤這個故事出來，都係希望大家睇新聞唔好淨係睇頭條，一定要分析清楚先好買賣。