歐洲紅白藍芝士國，又發生學生抗議事件。孫柏文響花旗國大學生活既時候，已經好鍾意睇人搞學運，睇下佢哋嘈乜嘢。求學時期，我母校都好多人搞學運，每一次我都會去睇睇，睇下有無靚女。

當時孫柏文仲以為這些學生運動家一定對真理好執著，亦都唔介意有人會犯顏篤爆佢哋深信的謬論，甚至會欣賞好似我一樣有金手指既人。 當時我同佢地爭拗、去篤爆去玩嘢，其實只是希望多點人欣賞我隻金手指。

不過得到一班麻甩友既欣賞我，對我呢個血氣方剛青年，真是沒有什麼增值的可言。所以，每一次有學運我都會去特別捉住比較靚女既學生運動家，跟著用隻金手指去篤醒佢。諗著佢會好欣賞我既真誠。點知過左四年，要去到大學最後一年的最後一個學期，先至明白點解我讀大學的時候冇拖拍。

自此之後，為了自己生活不會淡而無味，孫柏文見到靚女學生運動家既時候，隻金手指都很少出鞘。最慘係冇篤嘢既時候，我個腦同埋隻金手指都會唔高興，而有篤嘢既時候，荷爾蒙分泌就不平衡。後來身體各部位達成共識，唔係唔可以篤，不過要像奧運會一樣，要到四年一次既立法會選舉先至可以去篤爆靚女社會運動家的謬論。

上個禮拜，孫柏文睇屋企個部公仔箱，見到的芝士國大學生時，便舊病復發。

芝士國熱血青年高叫國號「自由、平等、博愛」，抗議(岩岩)通過既「首次僱用合約」法例。呢條法例容許芝士國的老闆比較容易去大膽起用年青工人，不過就無左以前個種「免炒金牌」。表面上，學生不滿冇咗以前那種有人請便無得炒既「保障」。不過這些學生唔明白，如果老闆請錯人但係又唔可以換人，佢地就連請人都慳返。依家可以老闆試到啱為止，所以亦可以盡情請人試試，對學生實在百利而無一害。

不過孫柏文相信，這條法例生效之後，大家都會減少見到芝士國學生去搞學運。因為到時年青人勞工市場搞活了，大家都會忙著去打履歷，準備面試，又點會好似而家咁失業，大把空閒時間去搞搞震，搞學運？

最後奉勸所有家長，如果你的仔女大把空閒時間去搞搞震，與其鬧佢哋無所事事，不如跟我一起去篤爆立法會內，社會主義政客提倡的那些所謂勞工「保障」。