教佢炒人　教你買銀

嘩！孫柏文今次真係醒！隻金手指真係冇得頂！話說前日，我響公仔箱睇見二少和「黎．古惑拉」，來了場贊人熱淚的「斷背握」。又見到冬姑識做，遇到呢個情況，企埋一邊比佢哋兩個繼續纏綿。令到我有感而發，問了一句：「這場鬧劇不是這樣收場嗎？有冇搞錯，炒左個編劇啦！」搞到我即刻諗下其他領導人會點，結過寫了昨天的「九鐵事件，列根會點做」。

孫柏文只不過是利用前花旗國總統列根炒晒搞事份子的例子，去暗示給特區領導層有關人仕，唔可以縱容造反，以及殺一警百的重要性。點知，有關人仕真係聰明，一睇完我編嘢，被我隻金手指篤醒之後，即刻造嘢。攞番「黎．古惑拉」一早已經簽了的辭職信出黎，叫「實Q」睇住佢執嘢，然後拉閘放狗。所以如果大家想睇有前瞻性的文章，就一定要睇我孫柏文的金手指。剎有介事話這呢件事「峰迴路轉」，只係是的無遠見，同無睇我孫柏文金手指既人先會說。

幫自己賣完廣告之後，想用今日的機會，去解答一些讀者的問題。有讀者問，如果想買實貨白銀，可以去邊度買。所以金手指亦做了點功課，為大家去篤一些買實貨白銀的渠道。抄左一陣，孫柏文可以同大家講，原來香港很多金行，都可以為大家用現金實貨去進行黃金白銀買賣。一舊cash，一舊白銀。要賣既時候，就掉翻轉，一舊白銀，一舊cash。我條針話︰「金行朋友好均真，又有彈性，賣金又得，賣銀又得，飾金都收。小至四錢一條鏈，大至一條十公斤金磚，統統有交易。」

最衰香港實在有太多間金行，金手指唔可以淨係篤一間。大家都知我係全世界對實貨白銀最睇好既財經口水佬，所以希望睇到呢篇文既金行，自己識做在金手指專欄附近登廣告，謝謝！