最低工資：＄0

究竟應唔應該有最低工資呢樣嘢，抽水議員同中產小朋友都好支持。你作為大學生嘅中產小朋友，話呢樣嘢幫到人，所以支持，我無話可說，只能慨嘆你未明白最邊緣嘅工人，冇得上車做第一份工，就好難逃離社會安全網。

至於抽水議員，你哋根本無可理喻，民主派嘅，就一路挾民主去推自己啲害人社會主義。建制派嘅，明知會令大批新移民、學生及少數民族等變成結構性失業，不過仲開心，因會令政府投放大量資源俾你哋做職業再培訓。多一個學生上堂學上Facebook做職業培訓，就會喺之後嘅選舉少一票俾民主派。

各懷鬼胎，害咗最邊緣嘅工人。

依家政府現有嘅方案中，孫柏文最睇唔過眼嘅地方，就係邊個享有豁免。如果我問大家，叫大家估吓點解政府要豁免佢哋，你話政府會提供咩理由？

冇錯！政府就係話有好多聲音，話如果唔豁免呢班人，佢哋就會好難入到佢哋心儀嘅行業。咁邊班弱勢社群，咁需要政府嘅保護？等佢哋可以有機會向上爬？

新移民？唔係。學歷低人士？都錯。中、英文都比較弱嘅少數民族？亦都唔係。政府豁免嘅，居然係本地大學生(編按：勞顧會最近列大學生實習工作豁免最低工資)！更需要入職機會嘅中學畢業生咁點？政府、工會和抽水議員異口同聲咁叫你食自己啦！

本地大學生係咩？咪就係住私樓、理論多多、滿腔熱誠、未食過人間煙火、唔知難入職時悲痛嘅中產小朋友！豁免佢哋，等佢哋價錢上贏晒所有其他入職嘅對手，唔怪之得咁支持。人哋冇豁免，就係道德勝利，自己有豁免，就係實質需要。我今日就睇死你哋呢班大學生中，支持政府現有最低工資方案嘅一群。有種嘅，就將自己嘅豁免取消。我，睇死你哋唔會。

不過成個辯論，最可悲嘅係嗰啲明知政策會害人，由最初反對，到突然轉軚嘅人。你話好似張宇人呢啲末日政黨嘅代表，由反對，到支持最低工資定喺20元，我只可以話呢啲就係自由黨。不過有啲我好尊重嘅人，之前曾親眼目睹呢啲勞工政策為工人帶來禍害，由最反對，到一句：「政府已決定做，不如傾最低工資水平。」我就最失望。

呢位我好尊重嘅人係邊個？就係以前信共產、社會主義，不過後來親身感受到自由市場為自己及眼前人帶來生活水平提升，所以信自由市場嘅《am730》主席施永青。呢幾日睇《C觀點》，施老闆，唔好放棄，你知、我知，呢個政策對最邊緣工人嘅禍害，一定要抗爭到底。

就算有呢條法例通過，最低工資嘅水平應該係$0。噚日咁講，今日咁講，聽日都係咁講。因為我唔知我會唔會做中產，我唔想我嘅小朋友到時連博份工返來都唔得。

沒有共產黨 就沒有新香港

上個禮拜日，英超聯賽有曼聯同利物浦對陣，最後曼聯憑韓國籍球員朴智星建功，贏波全取三分。之後領隊費格遜被傳媒訪問時，亦為呢位韓國球員今季演出讚不絕口。

不過，翻睇外國報道，原來當年曼聯從荷蘭球隊PSV燕豪芬簽朴智星時，輿論一面倒，批死佢對球隊嘅貢獻，只會係「賣多啲波衫」。點知原來朴智星不但識踢波，仲要愈踢愈好，愈踢愈全能，原先被睇死，最後可光宗耀祖，抬起頭來貢獻大。

血液中帶著小農DNA嘅我，就喺度諗，咁振奮嘅故事，幾時先會喺此岸發生？點知只係過咗一日，孫柏文就見到奇蹟喺特區出現。

事緣十年前，當時我哋嘅特首董建華，為香港疲於奔命咁，諗點樣經濟轉型。眼見高科技好搵，就大力推一系列措施。例如搞咩股市創業板等一些連網站都仲係「under construction」嘅公司，憑得三個英文字母嘅網址，都可集資百億元。

之後又將靚地割出，俾IT神童搞地產去補貼「Nothing On Web」。跟住再要政府，及使納稅人血汗錢嘅半獨立機構，批出多項計劃，做大量冇人會用嘅程式、軟件，去利誘年輕人入行「轉型」。話佢老人家好心，相信冇人反對。不過十年後回望，當年冇個項目達成高科技經濟轉型嘅心願。

之後董特首因腳痛，被升職做全國政協副主席，輿論就好似曼聯簽朴智星一樣，話呢次舉動，其實係明升暗降。特首做副主席，唔會對特區再有咩貢獻。咁點知到今個禮拜一，董特首一吐烏氣，為特區立下血汗功勞！

花旗國高科技公司Google，喺佢哋嘅加州總部宣布，關閉佢哋內地網站Google.cn。之後亦將所有上嗰個網址嘅人，轉到特區嘅Google.com.hk。Google作為全球首屈一指嘅高科技公司，一夜之間將特區建立成全國高科技嘅中心。

情況同49年上海解放一樣，當時有好多從事紡織、紗廠等嘅工人(包括孫爺爺)、老闆，搬來香港。為一向只做轉口貿易嘅經濟，打造輕工業嘅新世代，成功轉型。

可能董特首係當時呢批來港嘅上海人，知道呢條橋掂，所以就翻炒。其實我相信，之前Google話喺內地營運時不太理想，係一齣董特首透過政協建議，鋪排出來嘅局。等Google呢啲企業遷移到港，去完成董特首想香港高科技經濟轉型嘅願望。董特首，你升職後都睇住我哋，果然係香港隊長，我哋嘅朴智星！

之前，有好多自稱「愛港愛國」人士，話我哋唔背靠祖國，我哋就滅亡。呢啲說話我都一向唔服。不過經此一役，我都要高唱：「(普通話)沒有共產黨、就沒有新香港！」

投資氣氛快要大變

全球投資市場，喺呢幾個禮拜好似香港嘅天氣咁悶。世界各地嘅股市成交量、成交額及波幅都喺低位徘徊。不過，悶咗咁耐，今周相信會有衝擊，仲要係負面嘅。

首先，有花旗國經濟前景，上個禮拜出現好幾個帶有分歧嘅數據，雖然股市睇指數愈升愈有，不過成交量及成交額完全唔配合。

就連之前出現活躍交投情況的板塊，即係傳出會對股價有政策優惠嘅金融業，都喺上周尾段冷卻下來。

市場除冇明確嘅經濟消息外，仲有由09年開始嘅「量化寬鬆政策」印銀紙活動，都會喺呢個禮拜完成。

呢十幾個月印咗近萬五億美元(約11.7萬億港元)去買美國國債同都係美國政府做擔保嘅兩房債券，管理全球最大債券基金PIMCO嘅基金經理格羅斯(Bill Gross)喺近半年都話，唔印新錢，債價跌、長息升。

咁PIMCO嘅部署，由佢哋嘅資金分配，都係同呢個睇法一致。佢哋去到今年年初，現金比例相當之高，就算零息都要保本唔買債。

不過，奇怪嘅係，由上個月開始，明知美國聯儲局就快用完佢哋啲量化寬鬆新銀紙時，PIMCO突然間開始買入美國長期國債，點解？咁就要放眼歐洲嘞。

前周從歐洲傳來嘅消息唔多。希臘債務危機，因早前希臘國會通過減財政赤字方案，被歐盟政府定為「足夠」，所以市場估事件暫告一段落。加埋前周希臘又能借到達50億歐元(約524億港元)嘅新錢，大家就諗住呢個「大力減財赤，就借到錢」嘅方案，將會救晒全個歐洲。

點知到上個禮拜尾，情況又180度轉變。希臘其實仲要借多150億歐元(約1,574億港元)，先可以還下月初到期嘅債，即係今周要借，不過，希臘總理已經話歐盟成員如果唔出手，就會借唔到錢去還。

雖然減財赤減到歐盟都話夠，但原來都係冇人救。死未？到4、5月時，希臘嗰種借唔到錢還舊債嘅問題，將會開始降臨喺其他歐洲國家，特別係被德國政府譽為「大得不能被救」嘅西班牙。

市場依家就係等待看各歐洲國家，能否喺未來數周，成功通過減赤方案後借唔借到錢，如果唔係就有金融海嘯第二波！

一旦爆歐洲政府引致嘅第二波，資金勢必好似08年般，再次擁往美債。雖然美國政府今年要舉債萬幾億，又冇聯儲局印銀紙，不過，當資金因逃亡、避險，不計回報、只計回本時，美債就可升。所以當PIMCO一邊廂話美債將會失去聯儲局呢個大買家時，又自己買美債升，唯一解釋就係將會又有金融大動盪。

試諗吓，如果孫柏文喺08年初同你話：「今年美國投資銀行全出事，不過美元會好強！」你都唔會信。2010年，太似08年。

建基香港 英國監管

孫柏文有個朋友講，話佢細個嘅時候，有日佢阿爸話，曾經「出過事」、讀書讀得唔好嘅表姐要搬去同佢一齊住。因為表姐之前讀書成績突然退步，所以班大人就要佢住喺我一向讀書好嘅朋友屋企裡面，力挽狂瀾。

點知表姐一到埗，就向我朋友父母大大聲話：「雖然我人住呢度，不過都係聽我阿爸話㗎！」冇辦法，朋友舅父咁縱佢表姐，如果搵監管機構，我都搵個鬆手嘅。在08年11月，我有份搞嘅公共政策智庫「獅子山學會」同英國智庫「International Policy Network」出咗份政策研究報告，講今次金融海嘯成因。當中，我哋學會嘅代表再三強調，啲銀行「揀」鬆手嘅監管機構，而投資者又唔知有幾鬆手嘅情況下，最後出事。

點解今日要重提十幾個月前嘅見解？因為幾日前卒之出咗雷曼兄弟倒閉嘅終極驗屍報告。相信大家都記得，金融海嘯喺07年中開始，買家因唔知背後資產價值，令個別債券嘅交投量跌至零，或要賤價先有買家。

咁當時投資者知道好多投資銀行，借咗好多錢，做三四十倍槓桿，買到成手都係呢啲品質成疑，又冇交投嘅債券資產。做30倍槓桿即係點解？即係用一蚊本，再借30蚊返來，跟住買例如一件31元嘅貨。如果升到32元，嗰一蚊本就賺一倍，如果跌到30元，就輸晒嗰一蚊本。咁資產價格就係咁跌，股東紛紛要求呢啲投行嘅管理層，快啲搵方法解決呢個情況。如你係管理層，你會點解決？由07年中拖拖拉拉至08年第一季。乜都冇做自救嘅Bear Stearns就被擠提，之後摩通用賤價收購，仲要收購後頭300億美元(約2,340億港元)虧蝕要聯儲局包底。五大投行死咗間，其餘即做嘢。

高盛就搵AIG做對沖，用財技減風險。美林就係咁集資，每季都集，希望多啲本就可頂得順虧損。雷曼呢？佢哋就好嘢，真心覺得手上資產質素冇問題，就用財技遮住啲資產，希望捱到雨過天晴。佢哋用一樣叫做「Repo 105」嘅方法，喺每季季結前執靚盤數。Repo 105，就有如雷曼喺季結前，走去當舖高價押晒啲出事債券，季結後幾日就還錢贖回。當舖因雷曼係大行，又只係借得幾日，就俾佢亂嗌價借。

雖然係當舖貸款，不過雷曼就話係賣斷資產，所以入帳時，每次季結就突然多咗好多現金，又冇晒垃圾資產，槓桿仲要由幾十倍跌到得25倍。點解雷曼可以將交易定為賣斷資產，而唔係借貸？係因為嗰啲交易喺英國進行，根據英國監管條例係可以咁入帳。英國監管真鬆手啊！仲要今時今日都仲係咁。

雷曼都死咗咁耐，點解今日要重提？因為大家如果有留意，匯豐(005)總裁一月高調番香港上班，被記者問時就話：「匯豐係大銀行，建基香港，不過受英國監管。」嗰日冇端端要講邊個監管，咪就好似我朋友個表姐咁囉！

百年後 都係要買標準石油

昨日，機電工程署嘅「入中石化石油氣突然死火」事件專責小組，就自稱完成調查報告。雖然結果係「都唔知點解死火」，不過起碼有進展。

孫柏文住嘅嗰條街，有好多的士行。咁喺死火事件爆發時期，我有一日落街食晏，就有位交通業嘅老行尊見到我食义鵝飯，坐埋嚟同我傾呢單嘢。

根據呢位老行尊講，業界共識係入中國石化嘅氣先有事。咁我問業界想點，佢話要政府確保中國石化啲氣冇事。咁我多事問，其他石油公司嘅氣呢？佢就話嗰啲冇事。咁我又好傻好天真再問，點解唔直接幫襯其他油公司呢？原來因為中國石化賣得最平。

咁我就唔小心衝口而出話：「光棍佬話齋，便宜莫貪喎。」老行尊笑一笑就重複話，政府都係要保證氣嘅安全嘅。不過，去到呢度，作為前石油業分析員，就諗起第一代石油大王洛克斐勒(Rockefeller)嘅故事。

佢當年創辦嘅油公司，取名Standard Oil，即標準石油。點解揀呢個名？當年石油最重要嘅副產品，唔係用來作運輸燃料嘅電油、柴油，而係用來點燈同煮食嘅火水。不過，當年提煉唔達標、非常危險並會突然爆炸嘅火水充斥市場。

佢老哥專注研究提煉術，令佢嘅火水既穩定又安全，直情係火水嘅標準。所以就將自己間油公司叫標準石油，亦有能力為自己嘅火水收溢價。

估唔到百幾年之後嘅今日，作為石油副產品嘅用家，都係要便宜莫貪，出溢價買靠得住嘅貨，買標準石油氣。

舊樓強拍手掌係肉

一件令我關注嘅事，係立法會就會為50年樓齡以上嘅舊樓，由九成業主同意強制將全棟大廈拍賣嘅門檻，降至八成進行辯論。平時喺好多議題，我都可以壁壘分明咁支持、反對，不過，今次喺強拍議題上，真係嗰句，手掌係肉，手背都係肉。

產權係重要，不過特區幾千棟舊樓，真係唔知有幾多棟會學馬頭圍咁，一下就倒塌。講真，一棟都太多。

至於我作為住緊嗰棟有45年樓齡大廈嘅互委會主席，我可以講俾大家聽，要所有業主同意維修，其實真係好難。令重建易啲係好事，特別係賠償上，私人收購，理論上遠比市建局強搶為佳。

不過，現有機制又唔爭氣，99年強拍出台之後，實在有太多拍賣喺冇競爭情況下，被人收購。

政府如果有誠意，應該將每塊地重建後可起幾高、幾大等，直接影響地皮價值嘅資訊，喺拍賣前公開俾大家知道。令有意競投嘅人，可以容易啲掌握條數，咁就會多啲人參與拍賣，令原業主收到嘅錢多啲，市區重建嘅步伐亦會加快。

不過點都好，真係希望有關官員同議員，特別喺呢個議題上有所羅門王嘅智慧。

求富豪不要玩草民

1995年6月，孫柏文中學畢業。暑假期間，參加咗我住嘅選區立法局議員陸恭蕙嘅選舉拉票團。喺選舉期間，我收到我嘅A level成績，結果係入唔到大學。當時，我非常徬徨，不過，陸恭蕙議員就好好人，安慰我及同我分析出路，鼓勵我重考、再報大學。

諗番起，都真係令我好感動。因為任何參與過選舉拉票嘅人都知，喺選舉期間嘅幾個禮拜，拉票團上上下下，腦海中，只會有一個議題，就係如何令自己支持嘅候選人贏出。

嗰次，陸恭蕙議員抽出寶貴嘅時間，同精神幫我諗我嘅未來，我真係非常感激。

之後陸恭蕙勝出，佢亦好好人咁收留我，做佢社區辦事處嘅見習生。咁到1995年尾，有次我去咗我最鍾意去嘅茶餐廳度，麵包師傅從廚房走出嚟，搵我話：「喂肥仔，你係咪幫議員做嘢？」我話係，咁我哋就開始傾偈。

原來，間茶餐廳係當年啲員工自己夾錢搞，麵包師傅亦係股東之一。當時，生意非常好，所以員工諗住再夾錢搞擴充，師傅亦想夾，不過，佢話攞唔到啲儲蓄出嚟，問我點算。

原來，佢喺80年代尾，買咗「居者有其屋」，做十年按揭。到95年已供咗7年，差唔多供完。不過，佢唔明嘅地方係，佢已經還咗咁多本，點解想做二按，攞錢出嚟都唔得？

當時我乜都唔識，所以返辦事處，問啲同事點解。

後來先發現原來買居屋的人士，唔等於做業主，冇錯，你有好多做業主嘅假象，不過，當你行使財產擁有者嘅權利時，例如自由買賣、放租、做二按融資等等，就乜都唔得，除非你「補地價」。

咁如果要補地價先做真正業主，居屋根本係英國佬發明嘅財技，去綁住香港人。

買家要面對「補地價」，先可享受做業主嘅核心權利，就有如買股票有折扣，不過，收息或賣出股票時，要俾番差價。最慘，就係好似嗰位麵包師傅咁，辛辛苦苦儲埋嘅資金，狠狠地被鎖死。

究竟麵包師傅最後賺少咗，抑或唔使蝕，唔係我最關注(佢結果係賺少咗好多)。我最擔心嘅係，每一間香港大企業，都係由一間細公司起家。

究竟由居屋出現之後，有幾多間今日會變咗成大公司嘅企業，因為個創業家暨居屋買家，因為資金鎖死而冇出現？

又有幾多間老牌公司，因為冇咗呢D競爭對手，繼續可以逍遙地經營？就係因為有好多富豪二代，知道呢D潛在競爭嘅可怕，呢幾日就聽到佢哋講支持復建居屋。

所以新世界嘅鄭家純，同瑞安嘅羅康瑞，我求求你哋，唔好為保自己永遠嘅權貴利益，去要求復建居屋玩死我哋呢D草民。又有幾多間老牌公司，因為冇咗呢啲競爭對手，繼續可以逍遙地經營？

滙控棄盈利保資債表

今周原本係孫柏文放假之時，訂晒機票告晒假。點知臨上機，就病到七彩，遠行告吹，留家養病，街都出唔到，都唔知係咪豬流感。

時間多，就睇到幾段想同大家分享睇法嘅新聞。首先，德國衛星電視台ProSieben，訪問打金公司W.C.Heraeus，話早前有打金師傅，發現某大銀行交來嘅金條，出面包金，裏面係假，用鎢填重。

ProSieben或W.C.Heraeus都冇講究竟有幾多假金，又或者係邊間金融機構交假貨。

不過，我早喺舊年年尾，喺《大明燈》都提過話市場傳言，特區啲打金公司懷疑都有發現呢個情況。大家買咗金條諗住長期持有，就不如攞你啲金條去認證。

第二單新聞，就係通用汽車突然宣布要回收達百萬部車，因為風油軚系統隨時「熄機」，唔夠力就軚都轉唔到。呢個問題就話已引致14宗死亡事件。

早前豐田嘅「突然加速」問題，就話令廿幾人死，亦搞到豐田主席要越洋被花旗國會問話。

依家日本人已覺花旗國會高姿態審豐田，係用來玩貿易保護主義，如果今次國會唔一樣審通用汽車，日本，甚至美國其他貿易伙伴嘅國民都會睇唔過眼。輕則網上留言鬧吓你，重則令各國鷹派抬頭。

最後，就要講前日收市後出業績嘅滙豐控股(005)。淨係睇噚日股價一開已跌6元，之後全日冇乜起色，都知市場對呢份業績覺得麻麻。

原因係好多人嘅焦點，都放喺盈利度。其實，呢份業績就對我呢個喺07年中，叫大家「一注獨沽滙控」嘅明燈來講，係一份我鍾意嘅業績。

點解？都唔知特區股民係咪真係咁善忘，舊年今日先講滙控資本不足要供股，今年已嘈話賺錢唔夠。大家記得，呢場金融海嘯，係世界各大銀行發現手上資產嘅質素，遠比之前所知嘅差。

用原先嘅客戶走數嚟假設，有批貸款可能值100億元。不過之後見啲客，例如花旗業主、杜拜政府等紛紛走數，就要將資產估值重新再做。發現要保守啲時，就要撥咁啲錢做客戶走數準備。唔驚銀行冇錢賺，最驚銀行資產估值冇誠信。

所以，今時今日買滙控呢啲國際級銀行，唔係買佢哋呢幾年有幾多錢賺，而係買佢哋可以幾快為資產估值重新建立誠信。我呢啲大淡友，一向叫大家唔好掂滙控嘅原因，係因為冇人知佢資產值幾多。

不過，經過今次業績後，雖然都係唔知值幾多，資產負債表啲窿填番晒未，不過，我就覺得滙控管理層，就真係有港女最欣賞嘅特徵，即有誠意。

經過舊年會計制度轉變後，啲國際銀行其實話自己賺幾多都得。雖然滙控管理層知交唔到數，股價會受壓，不過都依然硬著頭皮咁做，所以棄盈利保資產負債表誠信，都係件好事。

不過，現價好唔好買滙控？等佢醫資債表醫多幾季先再睇吧。

金管局今鋪衰咗！

孫柏文讀書時，教科書有教，貨幣政策中有個「無敵鐵三角」，如果你隻貨幣係公開買賣，息率、匯率、通脹率之中，只能選一去做目標。因為當你想達到多過一個目標時，最終結果係無一做到，兼貨幣失控。


西方央行，就一向話自己嘅目標，係控制通脹，所以一旦通脹失控，就要迫住咁變息率，同埋要懶理匯率。當然，有啲比較無知或冇脊椎骨嘅央行行長，就會為一時之快感，想魚與熊掌同時兼得。最好嘅例子，就有70年代嘅花旗國。當年，總統尼克遜無視央行獨立嘅重要性，雖然通脹已失控，都落壓力俾聯儲局要佢哋維持低息「托經濟」。


之後失業率短暫受惠，不過最後通脹失控，存戶叫苦連天，經濟開始出現嚴重結構問題。最後要放棄低息，到80年，聯儲局要兩度將息率調升至20厘，先能控制通脹。


香港一路以來，對貨幣政策嘅方向同西方世界唔同。喺頭先個貨幣「無敵鐵三角」中，從1982年起，都只有一個目標。呢個目標，就係唔理息率、通脹率，全個貨幣政策只顧匯率，即係用咗差不多三十年嘅聯繫匯率政策。對聯匯來講，有三次最嚴峻嘅考驗。第一次，喺九十年代初，連續三年出現雙位數字嘅通脹，不過當時離82年嘅動盪不久，所以市民都為聯匯穩定硬食高通脹。


第二次挑戰，就係喺97年。當時係金管局總裁嘅任志剛，被笑為「任一招」，因為佢將同業拆息試過推上至300厘。不過講真，如果唔理價格(即通脹)，特別係資產價格嘅副作用，呢招防衛聯匯確實係最有用。


第三次衝擊，就係喺千禧年代嘅通縮。不過，因之前有田北俊試過話要檢討聯匯，令市場拋售港元後，冇人再敢講聯匯。不過，不等於冇抽水議員要政府「出招」來結束通縮，又係嗰隻，政府要做啲乜，應由政府自己想好了。政府面對「無敵鐵三角」，最後做咗好多大龍鳳，希望捱到冇通縮。不過之前政府做嘅show，都係財政司自己做，金管局為保衛聯匯，繼續做自己嘅事。


但今次金管局總裁陳德霖搞嗰個「最低按揭息率」，係直接危害聯匯穩健。大家都知，依家資金氾濫，因政府自己有個百分百存款保障，你唔去搞嗰樣，反而走去搞最低按揭息率？


咁為民請命，不如搞個儲蓄息率保證？定三厘。如果有三厘，就唔會有迷債添！陳德霖再搞落去，聯匯死硬。

冇百分百存保會點？

大家試想像下，祖國同日本用同一種雙方都不能亂印嘅貨幣。祖國發生金融危機，市場傳話只得日本能相救，不過，日本國民對此舉甚為不滿，仲要有雜誌用電腦改圖技術，幫兵馬俑石像加不雅手勢，以表反對之態。

祖國「憤青」亦不甘示弱，搵到證據話，日本其實仲有好多二戰時的賠款未賠，情況緊張。

天方夜譚？呢個情況咪就係喺希臘同德國之間發生緊。上個禮拜，有德國雜誌將冇手臂嘅愛神維納斯像，用電腦改圖，令維納斯做出不雅動作，仲要玩「設計對白」，叫希臘人食自己。

跟住就有希臘人反駁，話德國未為二次世界大戰賠款。原來，德國當年強搶希臘黃金35億美元(約273億港元)，同盟國亦判德國要加賠希臘70億美元(約546億港元)，總共105億美元(約819億港元)。

不過，到了八十年代，當時仲係西德總理嘅科爾(Helmut Kohl)，就話德國未統一，所以唔知東德賠定係西德賠。咁依家希臘人就話，德國就統一咗，係時候連息咁賠。

不過，如果真係計埋利息的話，估計德國要賠款高達700億美元(約5,460億港元)，夠晒希臘今年需要償還嘅欠款。

但係歐盟依家真係冇晒辦法，因為又傳希臘的「枱底」下面，原來仲有更多冇公布嘅債務，佢哋政府盤數，有如洋蔥一樣，你愈揭得多，就愈要流眼淚。

孫柏文喺上個禮拜六，同大家一樣，都有留意到財政司長曾俊華講，話政府會跟早前宣布嘅一樣，將會準時結束百分百存款保障計劃。

雖然大家主要擔心熱錢因存款保證結束而流出香港，我覺得，更要留意係本地資金會否大規模內部轉移。

例如，由形象上比較危險嘅財務公司，流向分行較多、存款較多嘅大銀行。當這情況出現嘅時候，缺乏存款嘅金融機構，就要向有多餘存款嘅銀行借貸，令到銀行同業互收嘅拆息將會上升。

亦因近期大部分新做按揭，都係同銀行同業拆息掛鈎，又因買家能以半成首期買樓入場，令買家入場成本相對較少，如果銀行同業利息上升時，恐會觸發買家走數潮。如果情況嚴重，存戶勢必再次擔心銀行體制穩健，分分鐘又擠提。

喺呢次嘅樓市升浪，金管局旗下嘅按揭證券公司，前所未有咁提供大量嘅二按保險，令以前要三成首期先買到樓，變成依家半成就得。

如果樓市跌得多過半成，不過又未跌多過三成時，啲負資產業主走數，銀行又有冇意欲追數呢？按證公司又會點？

經濟學家佛利民(Milton Friedman)曾經預言過，佢話因為結構上嘅問題，歐元過唔到成立後，歐洲第一個大型經濟衰退。唔知道按證公司又會唔會過到佢哋推出二按保險後嘅第一次樓市下滑？

撐政府推租金券！

今日，財政司長曾俊華將會宣布新一年嘅財政預算案。每年呢個時候，就會有好多人有好多要求，加開支、減稅等。

聽聞，今年甚至有啲「快閃族」壓力團體及議員(包括行政及立法)，為縮細貧富懸殊距離，要求加稅！冇錯，講多次，係加稅！

點解我會叫呢啲要求加稅嘅團體及議員為「快閃族」？因為當政府一開口推政策，令輿論憤怒衝擊政府時，呢班人會快閃，唔會幫手護駕。

之前有冇試過？有。最佳例子，就係舊年「慳電膽」政策。如果大家有睇特區各大政黨嘅政綱，你就會知道，舊年「慳電膽」政策，其實係政府copy and paste公民黨政綱。大家又或者記得，綠色和平曾於07年試過闖入香港迪士尼，為米老鼠啲水晶吊燈換慳電膽。

咁當輿論因「慳電膽」政策憤怒衝擊政府時，呢兩個團體點？公民黨快閃，綠色和平直情話政府錯，因為慳電膽唔環保，要用LED燈。

對孫柏文來講，呢啲簡直係食碗面、反碗底，忘恩負義，正一反骨仔嘅冇義氣行為。

所以，當有「強烈要求」，政府推時你點都護駕，我雖未必一齊支持，不過絕對尊重。所以今日我呢個「強烈要求」，我一定撐到尾。

記得幾年前喺將軍澳某公共屋邨，有個患有自閉症嘅小朋友，喺屋企因火燭焗死。當時，係得佢未成年嘅家姐湊佢。原來，佢哋屋企先啱啱上樓，之前喺西九住，單位細又舊，不過，因為住喺祖父母附近，所以小朋友就由佢哋湊。點知，政府提供公屋單位，咁就搬咗，小朋友冇人湊。

計數。政府起公屋，淨係計建築成本，塊地當送，每單位都要六千幾蚊。租，就收番住戶千幾蚊。即係每單位補貼4,000元。我作為一個納稅人，忍唔住諗，我交嘅稅，當變成呢位葬身火海小朋友嘅房屋補貼，有冇變幫兇？

試問，有咩比政府使錢，不但幫唔到人，仲要害人更可悲？

錢，橫掂都要使。不如直接將4,000元變成租金券，俾人出去租合邏輯嘅地方，而唔係依家咁，學史太林利誘人住港版西伯利亞嘅天水圍。

當然，政府要每個租金券受益戶，每年做入息審查，一夠入息就要終止補貼，不過唔使驚，之後如果撈唔掂，可以再攞。亦同時訂立一個租戶18至65歲之間60期有彈性嘅月租補貼限制，嗰個月要就攞，唔要就唔使。

最後當然就學當年首次置業貸款計劃，任何參與租金券嘅人，宣誓永遠放棄公屋同清楚明白補貼有期數限制。亦要用攝影機拍低宣誓過程，等60期用完後，受益人唔可以跟住啲抽水議員同那些壓力團體，要求增加月租補貼期數。

曾司長，你今日推租金券，我一定支持撐到底！

摩通的一宗新聞

今日係《大明燈》首次喺虎年同大家見面，孫柏文先同大家拜年，祝大家今年身體健康、青春常駐！

呢個新春假期，都算係多事發生。首先，假期前年廿九收市後，中央將銀行放債額度降低，雖令投資者擔心，假期後開市表現，點知到初四啟市時，都係紅盤高收。開心咗兩日，上禮拜四，花旗央行就珍珠港式偷襲咁加貼現率，即A貨加息，特區於上個禮拜五開市腳軟。雖然花旗股市之後有升，唔知今日內地開市又會點？

歐洲方面，10日前宣布會救希臘嘅歐盟，到今日都係冇實質嘅措施。淨係得希臘工會罷工，搞到燃料進口都受阻，令希臘鬧電油荒，同埋南歐國家派佢哋嘅特工查邊個大鱷「玩緊嘢」。

不過今日，我想同大家分享一件事，關於摩根大通(JP Morgan)運用財技的一則新聞。

事源於07年，當時有間叫Grupo Televisa嘅墨西哥電視廣播企業，想透過佢嘅子公司Cablevision收購一間互聯網寬頻公司。呢場收購就令Televisa借2.2億美元(約17.16億港元)，又因為Televisa幫襯摩通多年，所以就搵佢哋做貸款。

點知到交款日，已經是08年。當時金融海嘯、水深火熱，原本想將風險轉移俾其他人、淨做中間人嘅摩通，就要自己承擔成筆貸款。

摩通當然要想下計，就積極搵人頂。最後就搵到一間叫Inbursa嘅墨西哥銀行肯參與。咁原來摩通搵邊個一齊放債，都要Televisa同意，原因係好似大家借錢時一樣，做債仔嘅Televisa，要向債主披露公司機密。

咁Televisa，一聽到摩通想搵埋Inbursa就即刻說不。點解？因Inbursa銀行嘅老闆，就係墨西哥電訊大王Carlos Slim，即係Televisa最大嘅競爭對手。相信如果要你將公司機密披露俾競爭對手，你都唔會肯制。點知，摩通就用財技，搵到無需Televisa同意嘅方法俾Inbursa參與，仲要照樣將Televisa嘅公司機密俾Inbursa。唔俾機密就可以話Televisa違約，要佢哋賠償。

當Televisa知道摩通要用財技玩嘢時，已想擺和頭酒，同摩通講，話不如Inbursa出咩條件，Televisa就出一樣嘅條件買番呢批貸款。點知摩通唔睬佢，搞到Televisa要告上紐約法庭，摩通仲喺庭上話，財技無罪。

到今年1月有判決，摩通敗訴。摩通最終未能同在墨西哥能隻手遮天嘅Carlos Slim做生意。

不過，最令人失望嘅係，成單新聞，雖有《華爾街日報》同路透社報道，但之前被譽為最有誠信，舊年已被Carlos Slim入股，成為大股東嘅《紐約時報》，就隻字都唔講。