百年後 都係要買標準石油

昨日，機電工程署嘅「入中石化石油氣突然死火」事件專責小組，就自稱完成調查報告。雖然結果係「都唔知點解死火」，不過起碼有進展。

孫柏文住嘅嗰條街，有好多的士行。咁喺死火事件爆發時期，我有一日落街食晏，就有位交通業嘅老行尊見到我食义鵝飯，坐埋嚟同我傾呢單嘢。

根據呢位老行尊講，業界共識係入中國石化嘅氣先有事。咁我問業界想點，佢話要政府確保中國石化啲氣冇事。咁我多事問，其他石油公司嘅氣呢？佢就話嗰啲冇事。咁我又好傻好天真再問，點解唔直接幫襯其他油公司呢？原來因為中國石化賣得最平。

咁我就唔小心衝口而出話：「光棍佬話齋，便宜莫貪喎。」老行尊笑一笑就重複話，政府都係要保證氣嘅安全嘅。不過，去到呢度，作為前石油業分析員，就諗起第一代石油大王洛克斐勒(Rockefeller)嘅故事。

佢當年創辦嘅油公司，取名Standard Oil，即標準石油。點解揀呢個名？當年石油最重要嘅副產品，唔係用來作運輸燃料嘅電油、柴油，而係用來點燈同煮食嘅火水。不過，當年提煉唔達標、非常危險並會突然爆炸嘅火水充斥市場。

佢老哥專注研究提煉術，令佢嘅火水既穩定又安全，直情係火水嘅標準。所以就將自己間油公司叫標準石油，亦有能力為自己嘅火水收溢價。

估唔到百幾年之後嘅今日，作為石油副產品嘅用家，都係要便宜莫貪，出溢價買靠得住嘅貨，買標準石油氣。