From my am730 column 大明燈...
辭職吧，邱騰華！
各位《am730》嘅讀者你哋好！小弟嘅名叫孫柏文，今日第一次寫本欄《大明燈》。原本我諗住趁今日係《大明燈》出世之日，同大家解釋，點解要揀呢個名做我個欄名。不過，未解釋之前，已見有識貨又有勢力之人士，為本欄全力造勢。
佢哋係邊個？咪就係曾特首同環境局長邱騰華。佢哋一知到我個欄叫《大明燈》，就即刻搞個「燈泡事件」，瞓身支持。我只可以向佢兩位話：「孫柏文係唔會辜負您兩位老人家嘅心機！」
等等先。咩話？你唔同意？你覺得「燈泡事件」純粹係特首、政府出事，而唔係幫《大明燈》造勢？雖然你哋會咁諗，已敗露了你冇我有分析能力強嘅殘酷現實，不過，我今次就假設你啱，幫你分析一下點解會出事，同點樣避免再令特首「揩嘢」。
其實，今次出事百分百係邱騰華嘅錯。我曾經形容佢為a young man in a hurry，好趕時間博上位。就係因啊局長喺官場公路嘅快線飆車，一撞到就搞到車毀人亡。
每年，各大政府部門，都會收到唔少西洋人寫嘅顧問報告，環境局當然亦唔例外。不過，唔同其他局，環境局有個好想上位嘅邱騰華話事，搞到佢好想有政績。有政績，即係要做嘢，而官員要做嘢，只需解決兩個問題。就係做啲乜先？同邊個反對？
「做啲乜」，就只需倚靠西洋人顧問報告，而「邊個反對」，對環保局唔算係難題。因為「環保」喎！你敢反對「環保」咩？
所以之前就成功將膠袋稅，塞落要親身去超市買嘢一群人嘅喉嚨，要我哋硬吞。「環保」喎，所以有幾多怨氣我哋都要啞忍。
不過，呢啲顧問報告，就好似信貸評級公司嘅報告一樣，佢千計萬計，話明百年先出事一次。投資銀行信佢，所以會用一蚊本，借40元去炒啲債券，點知一遇黑天鵝事件，連銀行都執埋。
邱騰華一樣，數口精明，大力做嘢，點知點計，就係計唔到有「特首親家做慳電膽生意」呢隻黑天鵝。仲要因人人都仲記得你迫抽膠袋稅呢個仇未報，今次仲唔打政府打到瞓街？
邱騰華本質愛上位。江山易改、本性難移，就算今次冇事，佢遲早又搞大鑊嘢，損害特首同政府管治能力。邱局長，為特首，你係時候走。辭職吧，邱騰華！
Subscribe to:
Post Comments (Atom)
邱騰華,辭職吧!
ReplyDelete只識挑着環保口號，硬推不合理的環保政策，膠袋罪惡稅(膠原料用多咗＋極其擾民，有錢有得用，無錢要翻用)，失敗慳電膽(阿婆話光管無得換,仲要加電費？)；遲下仲有未掉先比嘅電器廢物處置費（話知你送去慈善機構定回收再造），高溫停車熄匙(有司機中暑就做鬼都唔放過你)，俾錢買藍天(順嫂都識嘅屎橋，做乜都問市民攞錢)；但係需要到你呢充就唔見你做到D乜,回收無支援（剩係識周圍擺Ｄ回收垃圾箱），想用環保柴油私家車囉喎,又設關卡重重(人哋歐盟用左不知幾耐），用電動車咩(嘥氣啦！搵個插頭都無！)，非法傾倒又管佢唔到．．．
只識減粒糖，唔識閂間廠，邱騰華,辭職吧! 不要阻住香港真正的環保發展！
反對偽環保份子！
我成日諗,點解邱騰華做到咁高位置,應該做左唔少時間政府工,做左唔少年人,讀左唔少年書,有唔少人幫佢做research,但係點解都會出呢種可預料的錯誤? 原因有二,首先是他智商高,但懶惰走精面.其次就係有人想佢落台。
ReplyDelete突然間覺得邱騰華有少少可悲
ReplyDelete佢幫左綠膠份子做旗手咁耐, 家下出事, 一眾綠膠即刻割席,
"筆者翻查資料，綠色和平、地球之友和環保觸覺都贊成採用慳電膽"
綠色和平、地球之友割席
環保觸覺變左長實觸角
真係人情冷暖.
不過邱騰華揀做綠膠打手, 咁死蠢, 抵死!