Friday, February 27, 2009

大陸留學生係海嘯元凶

改革開放初期,鄧小平同志將閘門打開,令一批又一批大陸學生成功出國留學。當年,有人批評話閘門咁樣開法,會令大陸人才外流,祖國冇晒叻人建國。

創新方搞亂市

聽聞小平同志好英明咁答,話一百個學生走去學嘢,只要有一個回流,祖國都有賺。咁其中一個呢啲大陸留學生,今時今日喺花旗國人氣急升──佢嘅英文名就係 David X. Li李祥林

佢有咩咁叻?佢就係度咗一條叫Gaussian copula function嘅方程式,去預測兩件事嘅互相關聯率。即係預測如果我一旦失業,我開車撞車嘅機會又會大咗幾多。

曲線收服美帝

未有佢條方之前,大家要睇好多歷史數據,甚至只可靠估。不過條方喺2000年出現之後,就好似解決咗個問題。

方程式勁嘅地方,就係靠睇我份失業保險保費嘅價格變動,亦同時睇埋我汽車保險保費嘅價格變動,去決定兩件事嘅互相關聯率。唔使再慢慢收數據之餘,仲可以喺我未失業前,已推測到我炒車嘅機會。

當機會率有得計,就可以作價做買賣。

例如以前,花旗國啲按揭,因為有啲人會提早還、轉按、有啲人會走數、斷供。

金融機構將好多按揭同時包埋一齊再切開嚟賣,好難掌握咁多變數,幾貴幾平都會冇人買。

有呢條方之後,就好似有得計。最後短短幾年內,衍生出萬億元大嘅衍生工具市場。

當然,條方要準,啲用來計算嘅保價就要準。咁歷史已證明保價完全錯晒,條方出事令英美嘅銀行系統因而危在旦夕。

小平同志當年冇講嘅係,派學生留學,原來係為咗不費一兵一卒,就可以收服英帝、美帝。

--------------------------------

It is exceptionally difficult in trying to explain this in 500 words AND stuff in a gag or two...

So if this piece reads funny... My bad...

But if you want to read the original article from wired.com is here.

And David Li's thesis.

By the way, I heard he came to Hong Kong for a University of Waterloo Alumni event back in December.

Anyone met him and knows his Chinese name? Much appreciated in advance.

Thursday, February 26, 2009

結束港交所壟斷!

今日,財政預算案出台。咁裏面會講乜,其實呢幾個禮拜,都同一貫政府習慣,漏晒風聲。例如叫啲大學生去大陸,學萊溫斯基做見習員。

多都唔使講,呢個「上山下鄉」計劃,一旦有小朋友因食物中毒、車禍意外等原因出事,又嚟場政治風波。到時一定有正義傳媒走出嚟,話政府為咗政治化妝推低失業率,白白犧牲特區嘅未來主人翁。

應棄咳藥水政策

其實,孫柏文好希望政府今日高姿態、大大聲話:「金融海嘯,世界永久改變,所以啲共度時艱、希望以前世界會返嚟嘅咳藥水政策,政府係唔會做。做就只會做啲迎合世界永久改變嘅政策!」

金融海嘯嘅核心,就係現有信貸系統失靈。啲人借唔到錢,經濟下滑。

咁信貸credit financing係乜?咪就係啲有錢不過冇生意橋嘅人,畀錢啲冇錢不過想搞生意嘅人。咁除咗借之外,仲有冇其他方法?

有。就係叫人入股equity financing。金融術語就叫上市集資。

開放交易所發牌

問題係從四會合一之後,香港得番個發牌壟斷嘅港交所(388)。佢哋權力太大,一旦用錯嘅後遺症已有目共睹。

最弊就係當港交所壟斷時,證監就大條道理瘋狂咁落實以「AAA信貸評級為安全」,乜都唔准做,鬼佬顧問話係「最佳管治」嘅政策。

大家仲記唔記得仙士股、禁售期等,證監用嚟攞經費、擴大官僚版圖嘅事件?

財爺、特首,為香港金融業未來着想,唔該畀人申請多幾個交易所牌,結束壟斷打爆證監,用競爭做監管同釋放企業集資嘅新渠道。

Monday, February 23, 2009

點解美市臨尾彈

禮拜五,花旗東岸時間一點幾。反映大市嘅標普500指數,跌緊廿幾點。離舊年11月嘅低位不遠。全市眼光都係睇緊究竟指數挑戰低位時,穿唔穿。

其實,自從舊年11月美市創新低之後,就算由750點不斷反彈升至930點,好多人都覺得要再落番750點,重試低位,唔穿,先算冇事。

炒美國再派錢畀銀行

咁上個禮拜五就重試,由一點幾鐘開始反彈,而低位真係冇穿。不過如果要炒標普500,孫柏文就建議大家睇多幾日先。因為反彈理由,就係美國政府放風話唔會將啲大銀行,例如花旗、美銀等「國有化」。

大家千祈唔好覺得,美市中人有咩自由市場情意結,唔「國有化」就炒高賀賀佢。

其實佢哋炒嘅係,當政府唔將啲銀行收歸國有時,剩番可做嘅「拯救」行動,就係又再送錢畀銀行。

又有嘢送,點都要炒吓。

相信大家都知,標普500喺現水平,除咗係試緊舊年低位之外,喺同一時間仲試緊係02年做嘅10年低位。一穿,下面唔覺有咩支持位。

13年前750點後飆升

可能俾人笑咗十幾年嘅格林斯潘,可以吐氣揚眉。1996年12月5日,被問及佢老人家點睇個市時,佢一句「市場出現非理性亢奮」,令市場目瞪口呆。特別係因之後幾年,個市升咗一倍。

咁1996年12月5日標普500指數幾多點?750點。

小心、小心。

Saturday, February 21, 2009

彌明姐姐,你咬錯人啦!


金升銀又升

金先銀在後

同是貴金屬

相煎何太急


It is indeed rare for someone to go long on gold and turn on someone who is bullish on silver. AND MY NAME IS NOT EVEN 翠翠. ho ho ho

There is a bazillion individuals who have advised buying bank shares all the way down. Go after them my friend, with the same fanatical vigour you have displayed.

Strange indeed.

Well, we all know Erica works in mysterious ways...

Friday, February 20, 2009

汪明荃應為乜流淚

孫柏文好明白我哋作為香港人,係一群好慷慨、好有耐性嘅人。

不過就算係咁,我都想溫馨提示一吓汪阿姐,你只係差一條好幼好幼嘅線,就會令香港人特別係一班後生仔女,因為你嘅行動,覺得八和會館好離譜,甚至覺得粵劇已經變成香港嘅負累,應該盡快令粵劇呢樣嘢喺香港消失。

八和失地有原因

我住喺深水埗天台屋,每日一打開門,就見到北九龍裁判司署(北裁)。政府要搵方法處置裁判司署,對我嚟講,絕對係我嘅社區問題。

作為一個支持自由市場嘅人,我當然支持政府將建築連地,一口氣以拍賣形式賣斷佢。買家如果覺得保留裁判司署大樓有價值嘅話就保留,如果冇就拆。

不過,政府決定以保育形式去處置裁判司署嘅話,就應該以保育為大原則。所以佢判畀一個保育做得好好嘅花旗國美術學院,我可以明白。

就係因為咁,我更加覺得汪明荃因為八和會館攞唔到塊地而流淚,令人反感。老老實實,要贏得香港人嘅支持同尊重,首先要證明畀香港人睇,你做嘢有心機同誠意。

當一件產品因過時而賣唔出,發憤圖強令產品可以再有支持,香港人就會尊重。

不過如果產品賣唔出時,你只係無所不用其極去迫政府用納稅人嘅血汗去補貼你,香港人就會鄙視你、鄙視八和會館、鄙視粵劇。

劇本同時代脫節


試問,粵劇中人最後一次有心寫一齣合乎摩登香港後生仔女口味嘅劇本係幾時?

汪阿姐因八和攞唔到地而流淚,係流錯淚。
其實佢啲眼淚,應該為粵劇中人不肯出一啲觀眾肯睇嘅劇而流。

粵劇嘅Andrew Lloyd Webber在那?

Rick Santelli and the "Rant of the Year"



Rick Santelli, together with Art Cashin as the 'must watch' on CNBC.

Wednesday, February 18, 2009

ICAC聽咗啲咩?

喺01年,花旗國能源公司Enron爆破時,同佢攬住一齊死,仲有big five會計師行,Arthur Anderson(AA)。呢間會計師行死嘅原因,係有AA嘅會計師被人見到將Enron嘅文件,一張一張咁塞入碎紙機。AA爆破之後,孫柏文一路都喺度估,究竟呢啲毀屍滅迹嘅碎紙精英去晒邊?

今日我卒之知道。原來呢班碎紙精英去晒ICAC!

點解?事緣胡國興法官查ICAC紀錄,睇吓佢哋有冇亂咁竊聽,同聽到啲咩。點知懷疑有4次立亂竊聽之後,胡官要聽帶,ICAC竟然話:「Sorry!無咗啦。」

各位金融業從業員,小心。你一旦出事俾人查,查嘅機構一定唔會係差佬嘅商業罪案調查科,因為佢哋已經變成只係調查不誠實使用電腦調查科。要拉你,就一定係ICAC。

毀屍滅迹冇得追

有咩問題?如果ICAC請你上去飲咖啡,點知48小時後,你屋企人發覺你冇返屋企,就算ICAC承認係佢哋整死你,屍體都已經唔見咗。

其實,胡官想杜絕呢啲「毀屍滅迹」行動,可以要求ICAC每次竊聽都留番個copy畀佢,到時候就可以聽番。

最後如果要估嗰4次,究竟ICAC聽咗啲咩,我相信應該係股票貼士。

------------------------------------

I am sure you must have felt this piece's rhythm feels very strange.

Yes, this piece use to be 600 words. But got chopped chopped into 400 by the editor due to 'space constraint'. Alas.

Kids doing some well needed exercise in 愛民邨

Monday, February 16, 2009

I'll drink to that...



With a performance like that, we have to celebrate and have a drink to that!

送花店?靠害呀!

情人節,孫柏文去咗個朋友搞嘅「單身者」聚會。雖然話係情人節節目,點知去到先發覺係德國啤酒節,成場香腸。留咗陣,極冇癮,走。



返到屋企,就執起報紙睇。頭條話有位仁兄,用30萬「買」咗間花店「送」畀自己條女。咁報紙就講到唔知幾浪漫,簡直係好港男嘅樣辦。

仲有好多手尾跟

唉,如果咁簡單就好。

首先,故事起源係個女仔想頂咗間花店,不過唔夠錢,即係融資有問題。其實金融機構唔肯放錢,就係盡在不言中咁同你講:「前景唔明朗,唔好搞生意!」為咗女仔好。

點知,男朋友就背住條女,自己頂咗間花店。

講真,條女想開花店係因為佢係花店呢行嘅人,對行業非常清楚。男朋友突然出30萬,究竟有冇俾人呃?有冇畀多咗?

我都好想知,究竟間花店現有嘅租約係點,幾錢個月又有幾長約。
啲員工嘅薪俸架構又係點?一旦要裁員、減薪,會否令14號歌頌你嘅記者,掉轉槍頭鬧爆你?
同鮮花嘅供應商又有冇合約?
甚至有冇諗過畀客嘅數期,會唔會俾人走數?

叫得做「頂」,等於要承擔間舖所有資產、負債、承諾。

今時今日,如果你肯幫啲供唔起嘅車主,頂咗個汽車貸款,個車主分分鐘送車兼貼錢畀你。

不過,可能就係呢啲憂慮,令呢份禮物更浪漫。送花,好快就凋謝,不過就係男人都知道送嘅嘢越快閃逝、冇用、冇邏輯、勁高成本,女人就越覺得浪漫。今次唔送花,送花店勁浪漫。

越唔實際越浪漫

好彩條女唔係金融業,如果係嘅話,再過6個月,用30萬唔好話頂間花店返嚟,到時成間花旗銀行頂返嚟做都得啦!

Friday, February 13, 2009

情人節快樂!

聽日情人節。

我成日覺得一pair人,最緊要就係溝通渠道要打得開。

今日孫柏文睇到同事溫敏妮篇文

敏妮就講話男人買玩具,一定要同個老婆傾傾。


敏妮Talk:私房錢

... 用錢時採取「先預支,後報賬」嘅辦法,大額付款要先得雙方同意。就係咁,屋企嘅財政年年都有盈餘,佢老婆亦好放心畀佢掌管財政。

敏妮雖然一再強調,夫婦間要財政獨立,但做到互相尊重、互相信任,亦畀到對方信心,家庭嘅財務問題相信會大減。...


不過有時同老婆傾完,原來都可以出事。以下就係一件大家可以借鏡嘅例子。



歐洲賓架點呃港女

Hat Tip to Cecilia for this wonderful observation.

-------------------------------

特區有兩樣嘢多──港女同鬼佬賓架。因港女鍾意男人嘅幾個特質,例如要條友係鬼佬(仲要唔係美、英人,因為唔夠浪漫)、使錢豪爽、睇落收入高等,鬼佬賓架就好似kinder出奇蛋咁,一條友滿足晒所有慾望。

不過孫柏文知道,面對金融海嘯港女可能夢碎,因為賓架不再風光。不過就算金融海嘯,根據blogger朋友beatster供料,原來港女仲未放棄。

富貴全賴福利好

佢寄電郵過嚟話:「仍有許多女子懷有『嫁個好賓架』的想法。搵個好歸宿,係千千萬萬女子的夢想。

作為目擊證人,曾經目睹女子接過歐洲哥兒名片時,雙眼是如何放光。

對呀,他名片上的title是VP,住在大潭某某灣的兩千呎公寓,平日外出消費,刷的是AmEx白金公司卡,而他的座駕,是一輛超型的跑車。

但親愛的,33歲的他,實際年收入不到百萬。在銀行界,不過是一個比小薯更小薯的人物。

他的title及福利,一是因為香港分公司規模細、人數少;二是因為歐盟稅制鼓勵公司出低人工,不過高福利給員工。

低稅率救番港男

當他花的錢大都是公司的,當然豪爽。一旦被裁員,要回祖國找一份合理的工作,稅後所賺的,可能比女子現在實賺的更少。」

唔想又嚟自由市場結論,原來港女死死氣返來溝港男嘅原因,全賴我哋行之有效嘅低稅率政策!

CCTV 大火 + Photoshop



I guess Aliens were pissed with the programming...

More pics here...

香港後生真冇用...


呢排睇到幾段新聞,真係令人為香港嘅未來擔心。

原來香港D下一代、未來嘅主人翁,做野嘅態度有如我老豆話齋:「Bum!」

做野既冇心機、又唔經大腦。


1.



喺隧道打劫?!?唔係嗎?

水警冇潛水艇呀??


2.



邊吸煙邊製炸彈?!?

唔係等吓會死嗎?

睇道指?係婦孺!

作為特區股民,股市大上大落已係呢十幾年嚟嘅平常事,恒指郁千點以上對股民嚟講都唔係大新聞。唔郁先至周身唔聚財。

大細股影響力一樣

不過對花旗股民嚟講,近呢12個月嘅市就真係難頂。以前道瓊斯工業平均指數郁超過100點,已經係新聞,今時今日,幾百點又如何?

不過就係咁,孫柏文要問大家一條問題。如果今晚,美國鋁業、通用汽車、花旗銀行、美銀、通用電氣呢5隻道指成份股,一夜之間咁執笠跌到零,大家估道指會因呢5隻股跌幾多點?

其實只會跌200幾點。

點解?因為道指嘅計算方法,係不論市值,只要成份股股價跌一蚊,道指就跌大約7點。

即係股價42美元,市值310億嘅波音,股價跌1蚊、市值蒸發7億,道指跌7點。
不過股價12.60美元,市值1320億嘅通用電氣股價跌1蚊、市值蒸發104億美元,道指都係跌7點。

冇代表性無謂再講

所以,花旗國金融業從業員都笑話道指見底幾咁難,只要90幾蚊嘅IBM唔跌,以上講過嘅幾間公司執笠都冇事。

不過開完玩笑後,就會好認真咁講,因為已經完全冇代表性,再睇道指分分鐘害死自己,得番啲無知婦孺會覺得道指值得留意。

所以如果你仲睇道指?你就係婦孺!

更重要嘅係各位評論員行家,為婦孺利益着想,唔好再講道指!

Monday, February 09, 2009

奧巴馬出布殊招

喺911恐怖襲擊之後冇耐,花旗國總統小布殊,以國家安全為理由,迫國會通過新嘅國家安全法。當年,小布殊用咗好多「一味靠嚇」嘅手段,例如推出紅、黃、綠色恐襲警報系統,令國民生活喺恐慌中。

挾恐慌迫國會批法案

小布殊挾恐慌,令國會喺冇辯論嘅情況下,以大比數通過名為「愛國者法」嘅新國安法。最後,法例對人權帶來極大嘅衝擊。

講真,如果你係立法會議員,面對一條叫做「愛國者法」嘅法例,「愛國者」一定支持,所以好難投反對票。當時傳媒報道,都係用「愛國者法」嚟形容呢條法例。唔通想俾未來選舉對手話你唔愛國咩?

不過花旗國人可愛嘅地方,就係會從錯誤中學習,所以就支持咗承諾會改變呢個「一味靠嚇」去推政策嘅奧巴馬上台。孫柏文當然覺得係好事。

點知奧巴馬一上台,就變身布殊,用同一「一味靠嚇」嘅招數去推政策。

o依家喺花旗國會,佢哋就係辯論緊8000億美元刺激經濟方案。淨係傾多幾日,都已經迫到奧巴馬出嚟話唔通過,就會出現悲劇。

不過可能因為學咗教訓,想通過法例冇以前咁易。

首先,傳媒冇用方案嘅官方、被政治化妝過嘅名「花旗復興、再投資法」。

之後,參議院又拖慢嚟傾,輿論更理性咁逐行檢討。

o依家情況有少少似舊年10月嘅7000億救銀行方案,市場參與者都已預期刺激經濟方案會通過。

市場真係善忘。

Friday, February 06, 2009

有權鄭家富 窮人冚家富

好幾個月前,當股票日日跌到喊嘅時候,孫柏文因為見估值跌到吸引水平,就開始對啲心儀嘅公司進行更深入調查。亦因當時兵荒馬亂,我就更留意啲防守性強嘅公司。

講到防守性強,就一定包括啲富有特區特色,喺「利潤保證計劃」下嘅公司。因為當時商品,特別係油價亦大幅回落,我就將注意力集中喺用好多油、運輸類別嘅公司身上,最後選咗經營九巴嘅載通(062)。

咁做功課呢樣嘢,啲過往數據上網已睇到,不過要估未來會點,就一定要廣納意見。而睇載通,就令我走咗去問一個將軍澳嘅區議員。

「鐵路優先」有玄機

區議員一聽到我問關於載通嘅嘢,劈頭第一句話:「諗你都唔好諗,立法會有個新界東議員,係又鐵路優先,唔係又鐵路優先。佢不但覺得人人應搭鐵路,仲非常仇恨巴士。」

我問點解佢會咁憎啲巴士,區議員都話唔知,仲話佢連普通司機都憎,連最基本普通法嘅疑點利益歸於被告,都要蹂躪。我聽完冇買。

輾轉幾個月後,我終於知到點解。原來呢個議員好鍾意飛車,以前仲曾經被釘牌。當全人類都「鐵路優先」,馬路冇車佢就有得飛車。佢特別憎巴士司機嘅原因,係因為太龜速,阻住佢飛車,所以力主鐵路優先,趕走啲龜巴!

不過奉勸大家,如果你被告超速,又唔係律師加立法會議員,唔出庭聆訊,你就係新界東立法會議員鄭家富口中嘅「馬路上的計時炸彈」,疑點利益唔歸你,毋須審訊已定罪。

政府縱容700「計時彈」通街走 2008-11-29

鄭家富亦炮轟修例建議有灰色地帶,部分人「刻意唔收傳票,或收到但係話收唔到」。...

鄭汝樺回應稱,以行政措施暫時吊銷牌照,亦令司機無機會在法庭抗辯,牴觸《人權法》,做法不適合。但鄭家富批評鄭汝樺太保守。

不過如果你係律師加立法會議員,只要出張新聞稿、道道歉,就會繼續享有基本普通法人權。

真係太似淫照事件。有權超速鄭家富、窮人超速冚家富。

Wednesday, February 04, 2009

民工歸田概念股

孫柏文睇某美帝大報,發覺佢哋呢排寫關於大陸經濟嘅題材,基本上就係溫總應該會歸類為「唱衰中國」嘅稿。佢哋特別鍾意講啲關於民工回鄉後,返唔到沿岸工廠再搵工做嘅故事。

有次,佢就寫話當好多千萬民工「失業」時,就會爆發社會暴亂,中央官員驚亂,所以係都要「保八」。

開發內陸好時機

睇完忍唔住覆佢,我話沿岸工廠冇工,令民工回鄉邊歸田,就咁一刀切話佢哋「失業」,實在太低估班民工。今次,其實係大陸開發內陸嘅大好時機。

民工,當年離鄉別井、千里迢迢去打工,證明錢雖然冇,不過膽識過人、心中有團火。一班咁嘅人,呢幾年喺沿岸地區打工,希望不但儲咗少少錢,仲要呢幾年有擘大隻眼、小心聆聽,同問咗啲啱嘅問題。

佢哋呢幾年嚟,如果醒目,係會吸收咗好多營商知識,眼界大開。

會似港人富起來

當突然間,佢哋大規模歸田,呢班心中有團火、手上有啲資金、眼界被擴闊咗嘅人,你覺得會甘心失業、無所事事咩?

我呢個民工歸田搞活內陸概念,你唔會喺啲官員、專家、分析師口中聽到,因為唔似啲大興土木投資,冇數據可被測。唯一會信呢個概念就係你,香港人。因為當年我哋就係咁樣富起來。

咁有冇概念股?有,聯想(992)。點解?自己諗諗。

Tuesday, February 03, 2009

溫總 shoe throw

It is a skill for all politicians to master... Message Discipline.

Message Discipline means one has to present the same message no matter the occasion.

Now, Premier Wan is in Europe hoping to tame the fire that is the Financial Tsunami. And surely one of the most pressing issue is to prevent the rise of trade protectionism.

Premier Wan also faced a shoe throwing incident.



Below is 高明輝's suggestion for Premier Wan...

如果我係溫總,一定會話:「我相信隻鞋就算唔係全部made in china,但係一定有部份係由中國生產或加工,最後輾轉賣左畀呢位英國學生。最近有國家大搞保護主義,中國堅決反對,因為如果各國實施保護主義,剛才個位學生一定掟唔落手,因為對鞋一定會好貴。The shoe will be too pricey to throw!」


I think the suggestion reflects 高明輝 training under the Apple Pie banner.

Monday, February 02, 2009

女要高潮?搵有錢佬!

孫柏文睇前宗主國嘅《泰晤士報》報道,話根據一個大型調查,女性性高潮頻率,係同佢男伴收入有直接關係。男伴收入越高,女性性高潮嘅頻率亦越高。

根據觀察,雖然冇性高潮都好似唔影響女性繁殖力,科學家話人類進化得出呢個現象,係因為歷代鍾意有錢佬嘅女人,下代生存機會大大提升。即係喺適者生存嘅世界裏面,邊個DNA可以學愛有錢佬,邊個嘅DNA就可繼續流傳。

適者生存保後代

當然,有好多有錢佬真係好肉酸、難接受,所以人類再進化,提升有錢佬引發女性高潮頻率,女性只要鍾意高潮,就會鍾意有錢佬。所以真係為啲前投行家女伴嘅性生活質素擔心。

女性《金手指》fan屎可能會話:「《泰晤士報》報道嘅調查,肯定係嗰啲英國鬼妹啦!咁cheap。」錯!其實個調查係喺大陸做,訪問咗1500個有男伴嘅大陸女性。

聽完我咁講,港女《金手指》fan屎可能會再話:「仲衰!北姑。」

港女DNA危危乎

不過就係港女們呢個反應,令我非常擔心。因為當有錢佬畀唔到高潮啲大家都知非常清高嘅港女時,港女DNA就會失傳,呢個就會係人類嘅悲劇啊!

最後,我想同一眾兄弟講,下次你老婆或女朋友話:「你搵多啲錢,我就開心。」就唔好懶醒反問:「有幾開心先?」因為就係有高潮咁開心。

Sunday, February 01, 2009

1 加州IOU = 幾錢美金?

California's cash crunch: IOUs coming

..."The truth is that California is in a state of emergency," Schwarzenegger said in his State of the State address on Jan. 15. "The $42 billion deficit is a rock upon our chest and we cannot breathe until we get it off."

To conserve whatever cash remains to fund education and meet debt obligations, the state's controller plans to delay other payments or issue IOUs, which the state hasn't done since officials failed to pass a budget in 1992. This could mean thousands of businesses and millions of people will be left hanging until a budget plan is hammered out...


You know these IOU will be traded for $$ by desperate Californians.

Now the question is, $1 of IOUs will be worth what on the open market.

If the discount is big enough, it could get very interesting. But I have questions...

Are these things legally transferable?

Where does IOU holders rank in the creditor's queue?

What if these IOUs discount to face value gets really big? Payday loans in the US charge double digit % for even a few days of advance.

And if these discounts get big, are there arbitrage opportunity with other State of California related debt instruments?