Wednesday, May 02, 2012

Advances in textile science.

I have watched this video repeatedly, so as to fully appreciate the advances in textile material technology.

The structural integrity of the garment was never in doubt.

Tuesday, May 01, 2012

昂山素姬「嚇怕中國」概念股

2012年04月26日 



大家呢排如果有睇《蘋果日報》「兩岸國際」版,應該都知道緬甸近期有好多消息。大家睇完可能覺得冇乜嘢,睇完得個知字,最多可能祝緬甸人民成功結束軍人執政。不過對於中國中央來講,緬甸呢排嘅局勢發展,一定令我哋嘅領導人驚到瞓唔着。 啲消息係乜?就係由舊年起,緬甸軍政府逐步開放嗰度嘅極權統治。先有舊年尾開放互聯網,到今年 4月軍政府宣佈,喺 45個議會議席補選,反政府嘅全國民主聯盟贏咗 40個各級議會議席,長期被軟禁嘅反對派領袖昂山素姬都當國會議員。最重要係軍政府承認選舉結果,畀佢哋做議員。

中共怕大家唔依賴佢

大家可能會問:「咁我哋偉大嘅中國共產黨領導驚啲咩呢?係咪好似舊年中東吹來嘅茉莉花香咁,驚人民被呢次改變感染,造反呢?」你咁估,就錯了。

因為緬甸本身政府權力分佈係點,冇人知。國會有冇權力先?就算有,一招功能組別、分組點票都做瓜你,可能今次只係一場 Show。 中國最嚇怕嘅地方,就係世界各國對呢場 Show嘅反應。基本上係忽然春天咁,有英國首相話想去行吓,又有歐盟解除經濟封鎖。簡單咁講,即係唔使依賴中國。

中國共產黨最驚亂,普通人日常生活受到擾亂或終止就最終會爆騷亂同示威。而冇嘢快得過冇能源令社會秩序出事,淨係人返唔到工,食物供應鏈撕裂都夠大鑊。咁家中國每日用 900萬桶石油,超過一半要進口。進口油就來自中東,只要一招斷你石油入口, CCP Bye Bye。 海路由中東到中國,就要經馬六甲海峽,而馬六甲海峽話事人就係新加坡。嗰度話事嘅李氏家族,一吓嗌停,就冇船可以經過。大家要記得,李顯龍做新加坡總理前最後外訪地方喺邊?台灣。



就係咁,中央就好想緬甸聽聽話話,其中係如果可以,就起條油管由緬甸印度洋沿岸運入中國,毋須經馬六甲海峽。

孫柏文唔知究竟新加坡有冇喺背後拉攏,令緬甸軍政府搞開放,不過如果緬甸唔使靠中國,就可以唔起呢條石油繞道。如果長遠要諗方法,入口石油擺脫新加坡對中國政權嘅威脅,就要靠陸路,最好當然係能源可以唔使進口,自給自足。

珠管擴產能速度慢

所以我哋就要返去幾個禮拜前 3月 7日 22日,我講過嘅頁岩天然氣 Shale Gas。中國眼見緬甸局勢,一定因危迫感、政權生死存亡,所以盡快大力發展呢隻能源。咁有乜概念股?天然氣運輸難,最好靠管道,不過接駁管道後冇得做二手買賣,所以發改委可以定啲超低冇得賺嘅價。

不過冇得賺,就冇人投資,所以點都要喺鋪管網時做 Show,令人有錯覺有得賺,仲要暴利。所以最純正炒昂山素姬強勢回歸,就係鋪管時受惠公司。最好就係製造管道嗰啲,亦即係我叫過大家一注獨贏買嘅珠江鋼管( 1938),我覺得呢間公司唯一瑕疵,就係可生產量擴大速度太慢。係,公司已經話會將可生產量每年幾十 percent咁升,我都係嫌慢。

最後,昂山素姬究竟係咪對中共政權咁大威脅?一,佢可能學劉江華,轉投中共懷抱。二,幾日前昂山素姬啲人,喺宣誓就職時,因唔 likey誓詞用詞,話想玩杯葛。

《華爾街日報》炮轟佢哋唔認真、做 Show、 Grandstanding,即係佢可能唔係李柱銘、司徒華嗰隻,而係社民連、人民力量。大家諗諗。


Wednesday, April 25, 2012

法選舉投資策略

上周末,我見到陀地同老外傳媒,紛紛分析法國選舉可能為資產市場帶來嘅衝擊,噚日同《利字當頭》嘅利世民傾起,佢話呢個法國總統挑戰者,有好多「根正苗紅」嘅政策,落實後果不但嚴重,仲要好快就見「成效」。


對世民來講,挑戰者同現總統最令人擔憂嘅政策分別,係挑戰者唔會減財赤。外國嗰啲財演一樣係好多分析,話挑戰者當選嘅話,法國同德國喺財政救市嘅決心會被摧毀,好難再會有個肯拍心口幫歐豬或啲救市基金做借錢擔保人嘅法國。

講完其他人,孫柏文點睇?邊個贏都係 plus ça change, plus c'est la même chose(啲嘢越變,啲嘢越唔變)啦。要講政策首先先講政府開支。兩個候選人講就唔同,到做嘅時候,兩個都會年頭拋個赤字唔超標嘅預算,到年尾兩個都會 je suis désolé(對唔住,我錯),道歉話赤字超標。唯一係「右」嗰個話減開支遜預期,「左」嗰個話加稅後稅收增幅唔達標,所以兩條友都係冇分別。


même même

再講老外擔心嘅救市措施,呢個係呃人嘅,如果救市方案同基金咁勁,舊年暑假就唔使嚇到全球腳軟啦。最後成功拖遲爆煲,咪又係靠歐央行印鈔票,所以法國新總統係邊個有乜分別?歐洲咪一樣係歐央行,即高盛啲舊生玩晒。大家唔好俾選舉呢啲煙幕干擾投資決定,記得買股只係等印鈔,印完就要快手走,走晒等佢係咁跌,跌到見危又會再印鈔。

青姐係我心中女神
最後,見上個星期四青姐胡孟青講大家應該睇啲乜,更勸盛女如何提高戰鬥力。唔知其他男人喜好,我只係個有集中力貧乏症嘅人,所以想搵個可以 Occupy我個腦嘅女人,所以先話搵個睇 Economist嘅女仔,等佢有知識同有態度。咁邊個係人辦?咪就係青姐囉!所以我成日話佢係我心中女神,你明我唔係 BS緊啦!

 

女神o奪咀呀!

為曾特首土地供應平反!

2012年04月19日 前日孫柏文睇電視,見到恒隆地產( 101)主席陳啟宗評特首曾蔭權下嘅土地政策。陳啟宗話:「 06年開始, 06、 07、 08、 09、 10,五、六年冇賣過地,乜原因?只有兩個。一係呢,佢錯囉,蠢呀?一係呢就係,有其他原因。」講完,全場喺度笑。

睇台下反應,應該係信陳啟宗第二個答案。咁乜係「其他原因」?我估個解讀又係嗰啲「政策傾斜」、「利益輸送」、「明益地產商」等填鴨式教育 model answer。

其實成功做咗政治家 咁陳啟宗講土地政策,係因為不能否認嘅事實,係呢幾年香港樓價升咗好多。我今日為曾特首辯護,首先想講係連我都承政府係有 under supply。不過曾特首咁做,真係因為佢貪小便宜後想「益啲人」?令佢作出對香港由政府財政、民意民怨、銀行體制穩健等咁多緊要範疇影響深遠嘅決定?大佬,唔好玩啦。

大家可唔可以接受,其實曾特首呢鋪可能真係成功做咗政治家?要諗點解佢做呢個決定,首先,大家要明白佢自己嘅經驗。 97年前土地供應,由 84年中英聯合聲明之後,就係每年 50公頃。點解定 50公頃?肯定當時曾特首冇被 brief,佢嗰陣仲係喺沙田處理地區事務。

「 50公頃」啱唔啱?從一個政治家來講當然唔啱,唔係因為得 50公頃時係咪唔夠或太少,而係任何可以製造一場可以拖垮銀行體制嘅地產泡沫,背後嘅土地供應量就係一定錯、錯、錯! 如果唔好造泡沫係第一個教訓,第二個教訓就係喺 97年之後亞洲金融風暴後學到。個教訓就係當外圍出現因泡沫爆破衍生嘅金融危機時,要非常小心咁對付香港樓價。唔可以 7月 2日見泰銖脫鈎貶值, 10月仲推「八萬五」,令人去燒炭,銀行要倒閉。

相信大家對以上兩個教訓都冇異議,就算陳啟宗係特首,都唔會話係錯。不過,曾特首真係錯咗,依家樓價係升咗好多,不過點解會咁?

首先, 06、 07年初,香港樓市,特別係俾人住嘅樓,郁都唔郁。悶蛋程度係連最鍾意乜都抽水嘅「飯民」、廢青們,都冇話買唔到樓。屯門、深井、深水埗單位,百萬有找,仲要二按保險下,半成首期上車。冇人批評政府土地供應。

07年尾,有批人喺港股直通車執咗筆後轉買樓,樓市升咗一升。相信到 08年初,曾特首已有諗出手,唔想見樓價出泡沫。不過 08年夏季後發生嘅事,一定令曾特首覺又來 97年嗰隻,所以佢學咗教訓,一、冇推八萬五,二、冇話到聖誕冇事。

估唔到全球央行印鈔

97年,印尼、泰國、馬來西亞、南韓呢啲加埋人口媲美美國或歐洲嘅國家出事,啲白人話事嘅 IMF等組織點做?咪就係要啲銀行搞掂啲呆壞賬,計數後資不抵債就執笠,政府財政要收支平衡等會短期對幾億人極苦,換長遠穩健嘅對策。仲要係到十年後嘅 07年,印泰馬韓經濟好,喺 90年代唔肯食苦藥嘅日本仲係一鑊粥,相信就算係陳啟宗做特首,都會覺得苦藥係對付泡沫爆破嘅 model answer,一旦歐洲、美國發生,都會咁做捱幾年甘,跟住回正軌。

曾特首錯嘅地方,就係居然信白人喺 97年迫有色人種飲嘅苦藥,到 08年時,係會畀自己飲。點知對策居然會係史無前例全球央行齊印鈔,連改革道路堅定嘅我國中央,都居然合埋眼斷 10萬億元咁借出,搞到香港樓需求大增!如果陳啟宗叻過曾特首,會預見印鈔,恒隆 08年中就會瘋狂入市買大陸啲 project啦。

炳曾特首唔係唔得,不過 Fair啲呀大佬!吓吓都話因「有其他原因」,就太過美式陰謀論囉。

Thursday, April 19, 2012

金手指:揀女揀股有異同

2012年04月17日

「嘩!成隻狗公咁!」以上一句說話,好多女人喺我背後講過。

今日要喺投資版到同大家分享呢句,係因孫柏文對上幾日收到好多人轉寄原本喺背後講嘅網上流言,關於上周我喺 TVB節目《盛女愛作戰》中嗰幾十秒嘅說話。

段片好簡單,就係我被問到第一次約女仔會去邊,同有冇其他女仔有嘅特質我覺得好。咁我就話第一次,可以約食晏去老麥,同埋因以前遇過令我覺得好正嘅女仔,之後發現都有睇 Economist同網上短片 TED.com,所以我都講話自己覺得有呢啲閱讀習慣嘅女仔好正,就係咁簡單。

食晏去老麥變潮語

嘩!點知「食晏去老麥」變咗潮語同 Inside joke,原本發霉嘅 TED app喺蘋果 App store銷售全港第四,「孫柏文」更成為 Google搜尋第一最多人查嘅詞。

當我仲諗住冇可能 Top到舊年貓咗上直播電視,原來可以更 Notorious。

不過就係咁,多年來對住唔同嘅女仔,我都會走去傾計,當中有索有豬扒,不過點解好似狗公般,乜女都上前傾,就係因為 Turn me on嘅嘢,個女仔要開口我先知。

揀股唔係一樣咩?你間嘢係咁吹概念,同女仔執正嗰樣有乜分別。

係,我認會吸引我上港交所( 388)網站睇你份年報,不過,睇完盤數之後發覺你唔掂,跟住就會行開唔買唔 Recommend。

分別只係多睇唔同公司嘅年報,唔會俾人嗌狗公,同埋我睇年報時間公司管理層唔會自我陶醉話:「孫柏文追緊我!」

Sunday, April 15, 2012

所以林煥光話:「為盛女們,我會多遊東京!」

From 平等機會委員會主席林煥光...

林煥光﹕「剩女」節目貶女性形象

【明報專訊】平等機會委員會主席林煥光昨出席電台節目時表示,對近日某電視台的「剩女」節目(即無線《盛女愛作戰》)反感,認為是標籤﹕「點解一個三十幾四十歲具專業背景未結婚的男士,你叫做鑽石王老五;但係同樣三十幾四十歲的專業背景未婚女士,你叫做盛女(剩女)?」他說,這反映編導嘩眾取寵,標籤貶低女性形象,從而爭取收視。他呼籲市民應認真考慮應否繼續收看。據他了解,該節目已有很多投訴,應由廣管局處理。(link)


當然,林煥光除會開口救盛女只外,仲會身體力行舒緩盛女之孤獨。

林煥光惹緋聞辭特首辦主任 董班底再削弱

2005-01-07

  林煥光的辭職,緣于週刊《忽然一週》圖文並茂地報道了其婚外情的新聞。報導披露了林煥光在除夕至元旦期間,與傳聞中的女友布穎琪大律師同遊東京,並偷拍得林煥光與布穎琪入住東京六本木凱悅酒店時在酒店大堂的照片,清楚見到林煥光與布穎琪的容貌,以及林煥光替布穎琪拿取衣物。《忽然一週》還將照片交予林煥光的太太袁轉好,袁轉好對《忽然一週》表示,她不會因此與林煥光離婚,她認為林煥光亦不會為了第三者而主動向她提出離婚。該週刊發行後三個小時,董建華宣佈,特首辦公室主任林煥光以私人理由辭職,並即時生效。(link)

所以林煥光話:「為盛女們,我會多遊東京!」唔知,身體力行舒緩盛女之孤獨,係咪都要出口呢?Lick that loneliness away...


我隊冧咗城市電訊(1137)嘅股價?

禮拜三城市電訊(1137)宣佈賣佢哋嘅光纖網絡。

我有感而發寫咗篇文,禮拜四朝喺《蘋果》出現。

以下就係嗰幾日嘅股價就勢。

一注獨沽城市電訊,除非……

2012年04月12日

噚日起身一擘大眼,孫柏文就見到城市電訊( 1137)出售佢哋嘅本業,將成個電訊網絡賣斷。記得好多年前,我啱啱入行做財演,有日收到城市電訊嘅電郵,話請我同佢哋嘅主席王維基見見面。見面時,講到城市電訊嘅長遠策略,當然就要講佢哋嘅光纖網絡。因為喺 90年代中,我中學畢業之後,幫當時係立法會議員嘅陸恭惠做咗一年 intern,有日跟住佢嘅助理去聽政府 Briefing,關於當時做咗冇幾年嘅有線電視。咁嗰陣聽完 Briefing後,我忍唔住舉手問:「點解鋪網嘅線,唔用 Fibre optics(光纖)?」當時係用 Coaxial cable。

王維基賣網要交代

當時政府個官嘅解釋,光纖本身好平,亦係最快,不過線兩端插嘅嗰部機就好貴,收費電視呢個用途用光纖唔合乎成本效益。唔係好多人會喺 95年想像到之後互聯網勁得咁緊要,如果唔係,相信有線寬頻( 1097)當年就算都係揀鋪 Coaxial cable時,橫掂掘路咁煩同咁貴,一次過同時鋪埋光纖,最多只係擺喺到 Unlit唔着燈,之後等光纖終端機機價跌先用光纖。

就係有呢個記憶,我見王維基時話:「光纖有幾快,唔係條線本身,而係部終端機。個網一鋪好,就唔使再掘路都可以不斷增速,只要冇嘢快過光,光纖網就係最快。」王維基聽到,就笑一笑話 Agree,亦話所以如果要複製同一個網絡,就要同佢哋一樣全港咁掘。我最記得佢嗰句就係:「所以我做緊嘅生意係百年基業,之後個網係可以交畀子子孫孫。」

就係因為咁,噚日睇見城市電訊賣網呢單新聞,對我確實幾震撼。因為王維基賣網,有如李家仁醫生拋棄「小明」, Apple唔再用個「 i」字咁。所以,因為光纖咁掂,前景一片光明嘅話,城電就要向股東交代點解賣網。

第一個理由當然就係因為價好。城電市值 40億元,除手上現金後嘅負債一億幾,家賣個網同其他業務就賣 50億元,理論上,如果股價淨係同交易完畢後每股現金一樣,隻股都應該升兩成半,噚日埋單只升半成,究竟係啲人未瞓醒,定係覺得王維基係會摧毀價值,燒銀紙?

搞電視比想像中難


講到燒錢就要講賣網嘅第二個可能,就係因王維基搞網搞到悶,想搞其他嘢,價好唔好係其次,最緊要有錢玩。咁大家都知佢想大搞電視,以前已話會揼 25億元出來咁做,亦因如壹傳媒( 282)搞電視,都比想像中困難同貴,睇住王維基講電視,好似見佢企喺焚化爐旁般。

相信有唔少城電股東,其實係唔想王維基搞電視,原本買你隻嘢,就係想好似買公用股咁,光纖真係可以係百年基業,當然賣網唔係唔好,價啱當然賣。不過賣完點可以變身變成咁?

光纖係啱,電視就唔係。所以如果真係咁搞,應該一注獨沽城市電訊,除非梁特首救佢。點救?就係唔發電視牌畀佢。呢幾年「香港營」背後有關勢力咁難先收到 TVB同亞視嘅話事權,突然多咗個控制唔到嘅頻道,點算呢?所以,一注獨沽城市電訊,除非攞唔到牌。

陰跌至央行出手

2012年04月10日

大家可能知道,喺我哋份姊妹報《爽報》度孫柏文同被譽為「有線劉央」嘅梁心欣有個投資倉。而同好多特區人一樣,佢就喺復活節遠行放假,去咗花旗國。我亦聽過佢話會約隔離版《利字當頭》嘅利世民一家大細,去花旗首都逛逛。

咁噚日早上起身時,一攞起電話,就見到梁心欣寄來同利世民嘅合照。原來佢哋一大班人走咗去花旗國嘅最中央權力核心、真正左右世界嘅總部度。冇錯,佢哋去咗聯儲局。

雖然幅相睇唔清楚,但以佢兩個作為香港財經傳媒嘅中堅,有理由相信喺相中正在示威。如果以本報解讀總理溫家寶評特首選舉咁解讀,先有濛眼嘅利世民,代表一眾手持同美元掛鈎港元嘅香港人,示意「冇眼睇」,仿如迷債苦主般以無聲高喊「還錢!還錢!」。

不過見心欣姐隻手豎高兩隻手指,展出「港女十式」中第二式 V型手勢,應該係想多謝量化寬鬆二期 QE2期間為股民帶來大升市,仿如想勸聯儲局快推 QE3。佢哋點示威都好,聯儲局可以再做嘢嘅時辰無多。坊間猜聯儲局如果要郁手,要喺最遲 6月前做,如果唔係就除非好似 08年咁,有大悲劇,否則唔想做嘢谷市,費事一旦共和黨上場,玩秋後算帳。





銅價窄幅橫行待爆

睇我覺得有預測世界經濟走勢嘅銅價,已喺窄幅橫行咗好多個月,似拉到盡嘅橡膠圈咁,待爆。心想入市嘅 fan屎,應該等到銅價有明確方向時,先入市都未遲,到時不但可坐順風車,仲可重手咁買。不過如果要我估,都係覺得大市似會陰跌至央行出手,大跌則央行出手會快啲。

最後想賣個小廣告,我幫港台節目《放馬過來》做咗次客席主持辯護以前港府嘅積極不干預政策,今晚亞視本港台七點。睇完,希望大家俾啲意見。

今季炒股基本六步法

七個禮拜前,孫柏文話過「晒冷買希臘 4月脫歐」。咁依家就已經係 4月,希臘就仲未脫歐,我錯咗。我估唔到希臘走數下,寧可學冰島咁火鳳凰般重新洗牌復活,都唔把握機會,政客們寧願做北方勢力嘅棋子,繼續 Kick The Can Down The Road咁拖。

估再印鈔未必錯

民主,喺發源地已死。我懷疑希臘幾時先再會有個民選領袖呢?依家意大利都係咁,領袖內閣全都係北方欽點兼委任嘅建制派,所以當西班牙民選總理講財赤果陣,話睬歐盟都傻時,應就快被「 Henry Tanged」。

點都好,周二香港凌晨,聯儲局就公開之前嘅 FOMC會議紀錄,點知一出後花旗國股市、黃金白銀等商品價格等全線下滑。因為紀錄中講到聯儲局裡個個都想收水,話到明經濟轉好唔使再出手,咁之前(至呢刻)嗰啲話聯儲局會喺 6月時再印鈔之人,例如高盛等,都面懵。

當然, 6月仲未到,高盛仍未錯,雖然呢排全球 ex南歐嘅採購經理人指數( PMI)個個向好,不過高盛仲有大把時間可以啱。當喺政治裡面「一個禮拜係好長時間」時,各市場都係央行專政嘅世界,兩個月係足夠時間,可令好多最終「逼」央行出手嘅事發生。

現正重返第一步

大家現在可能會問:「咁啲資金即係點部署呀?」呢個就簡單啦。無他嘅,由 08年雷曼爆煲後,炒股基本六步法就係順序:(一)資產市場暴跌;(二)經濟前景惡劣;(三)全球央行印鈔;(四)資產市場飆升;(五)經濟前景看穩;(六)全球央行停印。咁我哋啱啱過咗第六步,又要循環返去第一步。

以上六步,我今日喺《爽報》都有分享,不過你畀得六蚊買份《蘋果》,當然有更多,等我幫壹傳媒( 282)試驗吓 Freemium Model。喺《爽報》度話依家返去第一步,即市場要跌,只係請人食餐飯,喺《蘋果》當然就係教大家點樣搵食啦,授人以魚不如授人以漁。

所以,今日喺呢篇文隔離有幅圖,喺畀大家剪出來 Keep喺銀包度。每次你對投資部署有好多疑惑時,就攞出來睇睇。因為我相信,一睇你就知點做。淨喺呢幅圖都值六蚊啦!其餘曾博士、沈大師、陸叔、青姐嘅文就當係送畀大家點話。

國進民退害國企


噚日,孫柏文一直被一個怪現象纏繞住個腦,呢個怪現象就係同 PMI、即採購經理指數有關。咁好多人都覺得呢個指數可預測未來經濟活動,因為各企業負責採購嘅經理人,應該係睇需求最清楚嘅一群。咁喺大陸啱啱出嘅半官方 PMI,就話呢班經理人連續幾個月都睇好。

不過令人費解嘅係點解都係大陸 PMI,不過滙豐計嘅指數,就連續幾個月都係話經理人睇淡。究竟發生乜事?大家都知舊年,特別係下半年,上邊銀行收水收到通街借大耳窿,就算唔係資不抵債,都會因周轉不靈而要走佬,有 Spare cash嘅就個個走去放數。

屈機空間收縮

喺呢段時間,滙豐同半官方計嘅 PMI,走勢相似,兩個都係下滑。不過近呢幾個月背道而馳嘅走勢,引出好多唔同嘅解釋。

我覺得最好嘅解釋,係半官方嘅 PMI比較多大型,即就算唔係國企,都會被國家睇實嘅企業。呢啲企業喺國家計劃經濟式分配資金,仲要因為政策,面對有限度競爭,一定遠易過冇背景企業。同時,呢啲企業嘅客人,多數係國內同胞,所以話佢哋睇好啲唔出奇。

而滙豐嗰個指數就多啲問中小企、民企,難集資,個採購經理如果喺咁嘅情況仲話自己樂觀,直情係對公司及其股東不負責任。

喺呢個睇落似「國進民退」嘅情況下,對任何國企,特別係香港上市嘅國企來說都唔係好事。我哋香港人呢 20年來對國企如癡如醉,係因為當經濟越來越多部份開放,惹來激烈競爭,越來越有效率時,淨番落來,受政府保護嘅企業,屈機搵錢嘅機會就越豐厚。

不過當經濟活動越來越多強制性控制時,本身表現就會越來越差,到時呢啲受政府保護企業屈機嘅空間大大收縮,國進民退先最害國企盈利。

Saturday, March 31, 2012

通識恩恤金計畫

孫柏文將會為所有2012新高中考生提供$30,000「通識恩恤金」

條件:

1. 新高中考試考5科或以上
2. 除通識科外全A
3. 通識科要考,考完成績不合格。

成績公佈之日,達以上條件者,請聯絡我。人數不限,所有達標者均有$30000

Thursday, March 29, 2012

一注獨贏梁振英連任




今日孫柏文同大家講,梁振英將會喺 2017年成功連任做特首。

講未來,先講歷史。咁如果同啲玩開大國政治嘅人,例如彭定康(肥彭)傾大趨勢同地緣政治,往往都會由冇雷公咁遠開始,例如由 1648年嘅 Peace of Westphalia講起。咁大家都話呢次梁振英當選,係香港遊戲規則嘅大改變。大家一定同我一樣咁問,改就改,不過會點改先?中央話事人睇香港,究竟我哋一路以來為國家帶來乜嘢影響。所以我哋就要睇番 19世紀香港被英帝強搶之後嘅事(「開埠」一詞係英帝嘅 spin)。

香港往績案底累累

我哋香港曾出過孫中山,最後推翻清朝,根據陸恭惠所講,喺 1949年前,曾經係中國共產黨喺華南地區最大基地。睇往績,香港案底累累,多年來一次又一次顛覆當時嘅中國政權。如果係玩真正嘅大國政治,香港一定要被收復,仲要收復嘅係人心,解放軍坦克唔可以硬來。要做到坦克來時行彌敦道,兩旁港人自發性咁搖旗歡迎。

大家可能話,我哋已經好靠大陸,冇佢哋已死。咁我要解釋,你哋講緊嘅就係我哋香港有如一個好勁嘅外科醫生,依家絕大部份都係睇大陸病人,冇咗佢哋搵少好多嘅嗰隻「背靠祖國」。我講緊係要做到呢個外科醫生,借到盡揸咗四層豪宅,一個浪冚埋嚟,負資產兼被人 Call loan,問老竇老母撲錢簽賣身契嘅嗰隻「依賴祖國」。

一路以來香港可以選擇性被收復,要搞啲乜嘢一國兩制畀我哋,就係因為唔使其他人接濟。自己搵自己食,當然唔使聽你支笛。即係我哋香港嘅財政儲備,亦成為保障我哋選擇性被收復嘅金盾。如果冇計算錯,有關人士出到咁盡嘅招去控制特區政府,就係要拆散呢隻金盾。有如希臘般,德國毋須一兵一卒,連總理都幫你揀埋,財政點使亦寫晒。所以梁振英將會用盡全力去燒走儲備。

大家會話,即係勁使啦!啱緊部份,我敢預測,如果世界各央行繼續係又印唔係又印,梁特首勁使,佢第一屆任期都可以年年有財政盈餘,方法就係收入更多就得。大家聽到必問,年年有餘又如何燒走儲備呢?

本地零售大升特升

我相信,梁特首將會大規模增加政府做貸款擔保,斷萬億計嗰隻,又會入股(經特區主權基金?)公司,甚至學董特首整隻盈動(當年嘅 1186)畀你炒。買樓?學生?生意佬?通通借錢都有政府擔保,銀行每放貸有如買咗香港政府出嘅債券。當債仔們嘅利息開始狂跌,個個就會勁借,谷行經濟,稅收狂升。甚至現有居屋唔使補地價下「正常化」,業權同私樓睇齊,可以按上按。

就同房利美、愛爾蘭政府一樣,信貸泡沫未爆前,話事人萬人愛戴,香港人要乜有乜,最驚你冇「強烈要求」。守財奴?冇㗎啦,連度橋嘅政務官( AO)都因冇財政束縛愛振英。仲要年年盈餘,梁振英嘅第一屆任期將會比彭定康更輝煌。儲備,用有利嘅會計制度,更可越來越多。仲因政府畀錢你,唔同市場制嘅顧客,唔係因為你做得好,而係政治力量多,所以示威會有回報。大家未來呢五年,就係要 position自己去攞呢筆錢。唔易,不過將會搵一轉,就可以個孫打跛腳都無憂。做本地客嘅本地銀行,將大受惠,本地客零售例如領匯( 823)將會大升特升。

咁 2017連任後香港會點?問榮智健啦。

Sunday, March 25, 2012

仲有冇「香港」?呢個問題,今日來個了斷。

保衛香港核心價值,我哋已經派出最強陣容。

我哋出到李嘉誠做隊長都保唔住,就真係game over。

傷心?係。不過起碼有個了斷。

God Bless 香港。

Thursday, March 22, 2012

自封頁岩氣解放軍司令

2012年03月22日 

今日未入正題之前,孫柏文想為本欄禮拜二題為「富士康大獲全勝」一文中,提及組織「大學師生監察無良企業行動」 SACOM嘅部份道歉。

篇文話,個幾月前有個喺美國全國公共廣播電台播放 NPR,有位叫 Mike Daisey製作嘅報道話幫蘋果( AAPL)做代工嘅富士康( 2038)虐待啲員工。

之後 NPR罕有收回全集報道,仲話報道違反記者操守。而當日我話 Mike Daisey靠我哋香港 SACOM啲料做報道。

事實係調番轉。啲踢爆 Daisey嘅人,其實係用 SACOM啲料去指證 Daisey嘅不盡不實。 SACOM啲料其實救咗富士康,而唔係鋤死佢。我錯咗, Sorry。

科技進步開採成本降

好,入正題。大家作為《金手指》 Fan屎,都知道我係白銀大好友。六年前,即未有金融海嘯時,《金手指》開欄嗰日已講話聯儲局為首嘅「紙幣狂魔」會不斷攻擊紙幣購買力,所以,要買白銀保護自己,變成白銀戰隊一份子,我就成為白銀戰隊隊長,亦於同日話白銀將會喺十年之內升 12倍。

今日,我要宣佈另一長買長勝概念,就係大陸 Shale Gas頁岩氣!早兩個禮拜,其實我已提過頁岩氣呢樣嘢。頁岩氣,其實只係喺頁岩石中開採嘅天然氣。傳統天然氣,喺地底時有如氣球裏面嘅氣體,插支管入去就攞到出來。

而頁岩氣就係好似焗蛋糕時,原本係液體嘅蛋白,拂起變泡時內藏嘅氣體。你焗過蛋糕的話,就會問:「點樣釋放啲氣出來呀?」其實同我當年家政堂老師所講,拂蛋白唔好振個容器嘅原理一樣,只要個 Structure開始微裂,內藏嘅氣體就會被釋放(冇錯, 90年代初我中學已教 molecular gastronomy)。個問題係點微振啲藏有天然氣嘅頁岩石。

之前,頁岩氣同加拿大嘅油砂,都係面對太高成本嘅問題,所以冇被開發,亦被標籤為「科幻小說」先會用嘅能源。不過亦同近十年嘅油砂一樣,不但需求帶動令價格上升至有得做嘅地步,仲要微振頁岩石嘅科技,令開採成本不斷下滑。到臨爆金融海嘯時,大量項目喺花旗國拍板上馬。

中華煤氣唔會被壓價

到 2010年,開發項目開始投產,令就算有一浪接一浪嘅央行「量化寬鬆」印鈔下,天然氣價格越跌越低,天然氣價喺花旗國每單位由 6蚊美金跌到依家兩個幾,同時中國油價敏感度好高嘅布蘭特期油價就升咗五成。畀你做我國中央,睇見都流口水,根本就想大做特做。



有咩公司受惠? 3月 7日我已嗌一注獨贏珠江鋼管( 1938),因為內地天然氣零售價一定被發改委壓住,賣氣冇得賺,網絡營運商都冇,要賺就只得鋪網嗰啲公司。

不過有間公司,不但可以買氣時越買越平,仲可以唔使畀發改委壓。呢間係乜嘢公司?咪就係因一國兩制,所以可喺香港自由定價嘅中華煤氣( 003)囉!所以,除打購買力防衞戰嘅白銀戰隊隊長外,今日我就自封兼任頁岩氣解放軍司令!全力釋放頁岩中嘅天然氣!

Saturday, March 17, 2012

特首辯論 : 新潮語的誕生!



主場,呢個新潮語,就係靠一場特首辯論中誕生。最先用者,就係港台主持(即真係可以話個場係自己主場)謝志峰。

呢到係我主場!

如果你好似我咁冇睇live,以下就係足本版嘅特首辯論。

Friday, March 16, 2012

估溫總手號,難過玩draw something

估溫總手號,難過玩draw something

原來,溫總手號事件未了。



之前先有《蘋果》以一指定天下話溫總叫選委投1號梁振英。

再有我解釋話要睇hand signal,就要睇晒兩隻手,即加埋係2號何俊仁。

原來,唔係睇相咁簡單,要解讀得準,係要睇video!

因為,有人睇到溫總其實係用隻手指揮動咗三吓。即係3號唐英年呀!

都係祥實李嘉誠睇得最準!不愧為香港首富!



李 嘉 誠 開 腔 撐 唐 英 年   吳 康 民 : 唐 營 選 情 嚴 峻

2012-03-16 HKT 16:59
對 於 長 實 主 席 李 嘉 誠 表 示 , 個 人 繼 續 支 持 候 選 人 唐 英 年 , 前 港 區 人 大 代 表 吳 康 民 認 為 , 反 映 唐 營 的 選 情 嚴 峻 。
吳 康 民 說 , 屬 於 唐 營 「 幕 後 大 老 闆 」 的 李 嘉 誠 走 到 幕 前 , 是 非 常 罕 見 , 但 認 為 效 果 見 仁 見 智 , 可 能 會 為 唐 英 年 鞏 固 票 源 , 但 亦 可 能 有 反 效 果 , 他 又 相 信 , 無 論 最 終 誰 人 當 選 , 李 嘉 誠 也 不 會 撤 資 。

時 事 評 論 員 李 鵬 飛 認 為 , 李 嘉 誠 的 表 態 純 粹 反 映 他 個 人 不 會 「 轉 軚 」 , 會 繼 續 支 持 唐 英 年 , 相 信 沒 有 其 他 含 意 。

解釋MPF的四格漫畫


有日,荒木茂搭地鐵見到迫金局推咗個sell MPF嘅廣告,解釋MPF啲嘢。

原本個廣告有三格(如下):










荒木茂覺得未講晒故事嘅全部,所以幫佢哋加多格 haha

溫總為流選開綠燈

尋日凌晨,孫柏文坐喺電腦前做緊功課之際,突然見到各大新聞社報導話JP Morgan宣佈會回購股份。當時花旗國未收市,我第一個反應係:「遲啲唔係要公佈假設再大蕭條嘅銀行壓力測試結果咩?如果JP Morgan,甚至全部銀行被評唔及格,JP Morgan要收番講過嘅嘢,咁咪好冇面?」

再諗,其實今次JP Morgan係狠狠咁星咗聯儲局一把,就係特登喺你未公佈壓力測試結果前講。示意之後你講乜都對我嘅決定冇影響,當你啲說話發噏風。大家可能會問,年終有唔少公司宣佈回購股份,JP Morgan咁話有乜大不了。如果你咁問,不如我掉番轉問你,匯豐(005)聽日走出來話每十七股匯豐,回購五股,用現價,你會點諗?

你就算唔話:「嘩!當年廿八蚊供,依家用差唔多七十蚊買番好抵呀!」你都起碼會安慰自己,咁證明匯豐充足資本做生意,至少唔使再問股東攞錢。不過睇JP Morgan可以更推多步,即係就算唔夠資本,咁又點?你作為政府吹佢脹咩?佢唔掂你就會托錢來救佢㗎啦!政府冇錢?聯儲局都會印!

今次JP Morgan嘅舉動,就係俾市場知,金融海嘯後政府同啲「大得不能不救」或「大得不能救」嘅銀行之間嘅權力同監管角力,銀行已贏晒。以前都仲可以有遐想噤得住啲銀行,依家就面對現實,有錢賺就益bankers、股東同借錢俾銀行做生意嘅債主,輸錢時就call納稅人、未來納稅人同辛苦儲錢嘅乖仔乖女,被抽稅同手上現金購買力被蒸發。

無恥?係。不過面對呢個潮流,如何應對?揸現金,唔得,甚至正版末日博士Marc Faber話係最危險嘅事,因為輸硬。連創「黑天鵝」一詞嘅Nassim Taleb, 都話雖覺現今金融系統有隨時崩潰嘅可能,不過佢都被局賭,買咗唔少股票。就係咁尋日,溫總開口令中國三個股市齊跌,應該係買貨好機會。

溫總話繼續打樓價,因遠遠未落番合理水平,不過又擔心經濟放慢,即係除樓市外,乜都會谷啦!

再講,前日我話希臘被裁為走數後,之後禮拜一個股市發呆。坐喺股票機前,有如以前冷戰時坐喺美國國防部指揮中心,知道蘇聯已發射核子巡行導彈,不過因仲係飛緊過來,所以未知會炸到啲乜嘅感覺。依家真係好似乜都炸唔到咁。

骨牌係咪擺好應一個跟住一個咁冧?係。不過歐央行放水放到好似將啲骨牌擺咗喺個裝滿水嘅魚缸底,你咪推冧希臘囉,睇吓有乜嘢跟住冧?我覺得去到呢點,應該壓重注買唔會再有突然缺水令價格大冧特冧嘅金融危機。個必資產價格走勢係咪會有分歧?係,即係我唔知應唔應該買香港樓,不過現金購買力只會不斷下跌,唔會再有08年尾呢啲入市筍位。買,要快。

最後,尋日溫爺爺亦講起香港,仲搬咗小平同志出來。即係按本子辦事,流選時已有程序handle,為流選開綠燈,因京城已好亂,唔該港人治港,高度自治。

caption:溫總引述鄧小平,提點世人,京城好亂,港事屬港人事。

Thursday, March 15, 2012

分析《蘋果》話中央挺梁 揭溫總真係揀邊個

今日《蘋果》A1頭條就話中央挺梁。

【本報訊】中央挺梁,特首選舉大局已定。總理溫家寶昨表示,香港定能選出一位為多數港人擁護的特首,變相為民望較高的梁振英「吹雞」,籲選委歸隊支持,避免梁不夠 601票當選。溫總金口一開,「俊傑」紛至沓來;如獲至寶的挺梁陣營評估,至少近百名唐營支持者會轉軚,成就疑似共產黨員提早治港的大業。blah, blah, blah

首先,大家都知我覺得「中央」同「北京」作為一個單位,已經喺香港人心目中幻滅。根本冇呢樣咁團結嘅嘢。甚至我可以話,中央有人郁你,你必定喺中央有fan屎。

又或者有人喺中央挺你,你必定喺中央都有人想郁你。

中央咁簡單,土共就唔使好似deer caught in an headlights咁啦!

點都好,《蘋果》憑乜話中央挺梁?

就係憑呢幅相。



《蘋果》解讀話:

《溫家寶密碼?》
中央挺梁大局已定,溫家寶昨天不單出口術,暗籲選委歸隊支持民望較高的候選人,更在記者會上不時豎起一隻手指。 1號特首候選人正是梁振英。


啱唔啱?

當然係錯啦!

《蘋果》又再一次敗露佢哋國情唔了解嘅弱點。唔識,又要亂估...

睇中共領導人嘅hand signal,係睇晒兩隻咖!



而用正確嘅解讀,溫總嗌投2號,何俊仁!

中央都係ABC,Albert better than CY!

好彩得三個候選人,如果有十個,又要欽點何俊仁,溫總真係要學齊港女十式?



---------------------------

PS. 呢啲嘢冇人知,不過以前我哋同事之間都估某幾個高層係團派。挺梁?一場特首選舉就被揭身份。Hope it is worth compromising your secret identity!

PPS. 日月方面,佢哋高層都似已被tuen paai'ed。不過前線撰稿嗰班就似係真心膠。5000蚊個月,係咁咖啦。

Wednesday, March 14, 2012

梁營必勝已幻滅

多事幹,入正題。希臘卒只走數,不過尋日港股波幅細。孫柏文諗坐喺股票機前,有如以前冷戰時坐喺美國國防部指揮中心,知道蘇聯已發射核子巡行導彈,不過因仲係飛緊過來,所以未知會炸到啲乜嘅感覺。

第一個未預見嘅後果,就係原來喺正式公佈嘅希臘政府負債以外,政府幫其他單位,例如鐵路部等擔保嘅債,條款中原來寫咗話如果國債走數,不論原先還款期係幾時,都要即刻還錢。我唔知邊個揸住呢啲債,不過個額就係過千億歐元,你係監管機構,你知唔知你啲銀行除國債外,有冇揸呢啲附屬機構嘅債呢?睇定啲先,因依家入市,贏就唔知贏唔贏到粒糖,不過輸就肯定唔只一間廠。

講特首選舉。首先,呢次為港人上咗一堂政治課。「北京」作為一個概念幻滅。例如,「北京係唔會容許XYZ」,大家第一個反應係,「北京」根本唔係個單位,以前睇落係,只係個海市晨樓。「北京」已等同當年嘅Molotov Ribbentrop盟約。我知,何俊仁仲係「北京」前、「北京」後,只証明飯民高層生活喺個parallel universe,喺佢哋個世界,林峰隻《chok》真係金曲。

再講,睇我Facebook留言呢個非正式調查,近日民望急升得最快嘅就係何柱國。利世民兄post:「流選?香港就是欠霸氣。何柱國參選,我做義工又點話。」

到林偉強。依家好似邊個陣營都見佢啲手指模,真係hedge得好靚,先來和婚,再來茶樓搞跨界別圓桌會議。唔怪只得,不論係滿清、大英、日軍或中共下,原居民嘅生活模式都係屹立不倒。

最後講梁營。佢哋一路靠air of inevitability去拉票,點知啲人問一句:「Secret ballot喎?你唔係話俾我知有得查話?」就全盤棋散晒。701提名、腳痛、效忠英帝,全都冇滅小平同志嘅遠景,拖遲知特首係邊個幾個禮拜,又選係啲乜?中原立立亂,我哋西涼慢啲做嘢又點會係問題呢?要揀地產股,再等吓先囉!

Saturday, March 10, 2012

又有先兆馬雅人將估中

孫柏文相信大家都聽過南美已絕種嘅馬雅族,當年幾百年前定落嘅日曆,計算只係去到2012年嘅12月。我雖然一路相信只計到嗰日,係因為當年馬雅族經濟衰退,政府加大開支去振興經濟,大幅增加包括「馬雅統計處」嘅預算,等佢哋可以請啲失業學者去降低失業率。

咁因到年尾都用唔晒啲錢,馬雅統計處就拿拿臨有咁遠得咁遠咁計日曆,希望使晒啲錢唔使之後嗰年俾人cut budget。點知政府加大開支後經濟都係一蹶不振,財赤日趨嚴重,馬雅族行政長官派「馬雅審計署」徹查統計處,發覺日曆已計到五、六百年之後咁遠。馬雅特首一睇審計署報告,即刻cut budget勒令停止日曆再計落去,咁公務員一見冇budget,當然唔再做,而喝停之前就係計到2012年嘅12月。

我就有咁嘅推論,不過坊間普遍嘅解釋就係示意馬雅族覺得日曆再計都冇用,因為世界將會喺嗰日滅亡。如果坊間嘅解釋係啱,世界滅亡應該有先兆,而呢排有好多現象,真係令我百思不得其解,似係馬雅族將估中嘅預兆。

例如,呢排嘅日圓走勢就係最佳例子。炒日圓,有如當年董驃形容馬場一樣,係一個「專收叻仔」嘅地方,係一個不節不扣嘅英雄塚。我試過98年暑期工「全職沽Yen」,都可以輸到爆廠,連我好敬仰、入咗白銀戰隊做領軍嘅丁Sir丁世民,都話未試過炒日圓贏過錢。

原因係根據經濟學課本,日本嚴重財赤、經濟不振,日圓對美元匯率應該早已跌到一個七皮。點知日圓居然可以長時間違反地心吸力,同古人買月亮會跌落地球一樣,係都唔跌。甚至日央行干預推低日圓之時,就係買日圓升嘅大好時機。呢個反地心吸力嘅強道,連神安排一場史無前例嘅大地震都震唔散嗰Yen。

不過近排,日圓匯率喺冇央行干預呢啲人為因素下開始自然下跌,究竟係咪現今金融秩序滅亡之先兆?有好多人話,只要日本一日外貿結算有盈餘,佢哋仲可繼續唔爆煲。點知公佈2011年嘅數據,日本係自從1963年來第一次有外貿赤字,當你有超過GDP兩倍嘅國債,要崩潰起來可以好快。日本呢個炸彈爆破,威力相比下會令雷曼事件似以前澳門街頭有得買嘅pop pop沙炮,港女會話:「馬雅人估中咗囉。」



日圓之後,跟住有中共放棄「保八」。國家主席胡錦濤曾經向花旗總統講過,如果有議題會令佢夜晚瞓唔著,一定係點樣每年揾二千萬份工俾加入勞動人口嘅老百姓,「保八」撐就業成硬道理。「保八」喺我哋心目中嘅不變程度,只僅次於「7.8」,依家冇,港女會話:「馬雅人估中咗啦!」

希臘安排將會禮拜五凌晨宣佈債務重組究竟夠唔夠債權人自願同意,唔夠人同意就會觸動好多衍生工具,星火燎原。唔好話2012年嘅12月,可能廿四小時後,連我都話:「馬雅人估中咗!」

Thursday, March 08, 2012

Lady gaga... I've Toldya

之前加到三場時都話咗啦...

Draghi = Bernanke = Gaga Lady

你睇吓... 有咩印出來嘅嘢,都可以量化寬鬆。


美國百變天后 Lady GaGa 5月首度來港開騷,最貴的 1,580元門票最高被炒至 30,000元,令一眾黃牛黨趨之若鶩,但加至第 3場的門票炒價已漸見回軟,昨日主辦商宣佈加開 5月 7日第 4場,大前日黃牛黨已出現散飛潮。而明日發售的加場門票只供網上及電話發售,不設門市售票,以趕絕排隊黨。(h/t Quin)





Wednesday, March 07, 2012

Leung Chun Ying's Cabinet 梁振英的三司十二局



Leung has been doing everything they can to project an air of inevitability...

Opinion leaders are bombarded on a daily basis, with titbits, anecdotes on a mano a mano basis, all in an effort to project an air of inevitability.

Anyhow, it is an electoral college of 1200 voters, most of them self made men and women. What the dark forces are doing to Henry Tang might best be summed up by Hillary Clinton, this truly is the politics of personal destruction.

1200 voters, a lot of them are personal friends with Henry Tang. I don't know, but I just got a feeling that they believe friends don't let friends get slaughtered without consequence.

It is after all, a secret ballot.

一注獨贏珠江鋼管

孫柏文記得九年前,同事傾起油價,我就興奮話:「油價會升到你唔信!呢個世界有樣嘢叫油沙,不過係固體,瞓身啦!」佢哋望住我呢個新入職雙失青年,冇人信。

今日,繼油沙後咁多年,第一次又有嗰種預見能源業將大突破嘅興奮,就係因為Shale Gas式天然氣。平時啲氣田係好似吹波氣球,其實SG都係天然氣,不過就好似拂到變泡嘅蛋白,裡面係好多氣體,不過以前無法開採。不過近年,美國開採SG式天然氣有突破兼上軌,典型一個計劃由諗到出產短過兩年都得。令呢兩年美國天然氣價跌超五成,銷量大升(油價同期升兩成)。

早前,有人吹中國都有,我聽到啲第一次有幾多嘅估計,只記不信。因為呢啲預測要等第二輪,啲保守人士再睇,降低早前嘅估計先準。點知,上週尾真係出,就算降低,都會將中國天然氣儲備量升十倍!不過點賭呢?

供應大升,必然,不過價將會暴跌。國家俾加價,係想增加供應,之後都咁多,賭兩會加價係廢,即千其唔好買採氣商。買管網營運商都係唔得,因為油公司經驗,最初話開放,賺推暴利稅。要買就買舖氣管概念,因舖管網時要扮市場主導,暴利ok氹資金入局。而冇嘢乾淨過買做鋼管嘅公司。做天然氣管唔同做屎渠,漏會死人,所以科技上門檻高,要買買管道龍頭,即珠江鋼管(1938)。

珠江鋼管品質高到外國會向世貿組織投訴話非法傾銷,仲要珠管只係收加工費,鋼價全轉駕俾管網商。我國最怕被人能源封鎖,因會即倒台,有呢隻新能源,一定會比高鐵更快落實。珠江鋼管升咗唔少,係因為業務過10年低處,原全未price in 中國shale gas。現價3.15元,我十二個月目標價係7元,一注獨贏珠江鋼管!

Saturday, March 03, 2012

客家話唱Sexy and I know it



講真,十幾年前同我阿媽去馬來亞探朋友,咁佢朋友問我有咩想做。

睇啲古蹟就唔啱我,所以問可唔可以見識吓當地啲disco、club、pub等。

裡面啲仔,真係video呢隻。

呢個video幾Authentic。

Friday, March 02, 2012

LTRO完股民應如何再部署

尋日,歐央行宣佈第二批,即聲稱係最後一批嘅三年期一厘LTRO貸款有幾多人申請。結果?有800間銀行,借咗超過5000億歐元。銀碼同上次差唔多,不過上次就只得五百幾間銀行申請。

點多好,孫柏文相信市場現階段似舊年花旗國聯儲局「量化寬鬆QE二期」末段。提提大家,QE二喺2010年尾正式開動,到2011年四月結束,股市喺QE二宣佈後不過落實前嘅幾個月大升。落實初期已見頂,之後有波幅下橫行至四月完結時,跟住就恆指由24000點喺五個月之內跌穿16000點。

即係如果歷史重演,班央行組成嘅紙幣狂魔集團暫時停止印鈔,股市已升完。而今次LTRO似QE二嘅另一現象,就係我至喜愛,不過又係每個浪中嘅藍燈籠,即白銀都有大升勢。我同一眾白銀戰隊成員,每見白銀開始勁升,就會開始預期呢次全球資產升浪完結在即。

今次歐央行行動,有冇幫助,我只可話有啲有有啲冇。先講有用,最受惠之國必定係意大利。因為佢哋之前嘅政府財政,如果撇開國債利息開支,其實係有盈餘。即只要利息開支夠低,其實係可以過關。咁因為之前香港輸出最球至勁嘅政治制度俾佢哋用(總理,即行政長官唔係選出來。內閣,即局長們唔係選出來,不過係「精英technocrat」。國會,即立法會,審理班「精英」拋出來嘅方案後,因受到歐盟布魯塞爾,即北來中央嘅壓力,橡皮圖章般通過。)令市場覺得意大利香港化後,可推動艱辛嘅改革。

不過其他國家,就冇咁有用。先講希臘,就算經過兩輪LTRO,佢哋仲係完全冇錢,仲係等緊人打救。隔離版利世民都講過話俾希臘嘅錢,希臘政府冇得過水濕腳,直接攞來還錢。公務員唔係減薪三幾個百分點咁簡單,而係要嘔番錢俾政府。而每次長期患病嘅死亡徵兆,又已出現。

呢啲臨死徵兆,就係國家系統嘅供應商,拒絕再供應。例如舊年希臘煉油廠只得15%原油來只伊朗,到今年年初就去到超過80%,不過早幾日,伊朗話因歐盟抵制佢,所以唔出口原油俾希臘。抵咩制呀,根本就係伊朗供油俾希臘要俾數期佢,不過你依家揸住希臘政府嘅receivables去銀行借錢,銀行都叫你FO啦。咁點賣油俾佢呀?

仲有,藥廠都停止供藥俾希臘。如果你係啲典型唔做功課嘅80、90後道德超人,千其唔好鬧住,因為藥廠咁做,係因為供藥俾佢時,不但唔找數,仲要有關人士攞啲藥離開希臘,賣出國。

德國話通過俾錢希臘,全是假象。因為德國好似啲英國大學咁,對希臘呢個申請人。特區JUPAS,就係你先報大學,跟住考試放榜後,大學要你就出鐵一般offer。花旗國係考晒試,先報大學,之後大學要你都係出鐵一般offer。英國就你申請,佢出個有條件offer,例如要你考到某個成績,你之後考到先收你。

依家德國國會幾百票對幾十票通過救希臘offer,考到六支A就救佢。希臘答,不過我只係考四科,市場淨係見德國國會嘅offer,就已開心一陣,唔拋空真係對唔住自己。唯一問題係,近排,越沽越被夾。點搞?

Thursday, March 01, 2012

Bernanke, Draghi, Gaga Lady

咖咖小姐聽聞又加場, 由兩場變到總共3場。May 5th。

佢個official website未有消息,所以唔知係咪流料。

不過佢咁樣加場,真係量化寬鬆!啲坐貨嘅炒家,仲唔,含Gaga!哈哈!

好!跳番隻舞賀賀佢先!




仲有,我諗佢哋咁早預售,係因為俾大家啲時間去做啲Gaga costume。去concert時都型啲!

以下係我啲服裝建議...



Poker face's Blue swimsuit, on sale here.

-------------------


Bad Romance, doable mix and match...
Maybe need a trip to a custom seamstress.
(if you are a custom seamstress that can make this,
please contact me so I can hook you up with ppl who needs your service)

----------------------------



This final one is from Telephone.
Which is the easiest and the hardest at the same time.
Easiest as it really is a bra/underwear set + fishnet stocking with standard high heels
Hardest as you better be that fit. hor hor hor



Wednesday, February 29, 2012

小巴如何行快到211km/h

尋日,我post咗以下呢幅相上我facebook到。

咁就引來唔少comment。

冇辦法,211km/h等於差不多130mph,講緊嘅係啲要唔少錢先買到嘅跑車限速。

大家有問:「孫柏文,你係咪搭咗呢架小巴,忍唔住佢開得咁快所以影相呀?」



其實,我唔係搭小巴影到呢個速度。我係睇呢段Youtube片,去到1min10sec個位後噤screencap。haha


認真便輸了。

梁振英下的最佳投資

孫柏文記得九十年代初讀中學時,聽啲大人傾計,成日都話當年嘅股市係「政治市」,魯平一句「千古罪人」,咁就做低你幾百點。

之後,「政治市」呢個形容詞因特區被解放後,因話事人係邊個好清晰,所以就開始被淡忘。不過又因話事人嘅方向常變,本港亦越來越多國內公司,所以取而代之就係「政策市」。最估唔到嘅係去到差唔多解放後十五年嘅今日,「政治市」強勢回歸。不過都算好,起碼我哋香港人卒只醒覺,唔同話事人有唔同結果,而唔係一味話:「就算政綱唔同,都係咁架啦!」

當然,有如英揆韋爾遜話齋A week is a long time in politics。真係上個禮拜今日,本報頭條仲係「亂到阿爺都頭痕」時,到尋日已係「梁振英當選在望」。股市對「梁振英」,之前睇佢入唔到閘,點知現要面對「梁特首」。相信大馬沙到小股民都問,佢做會點?

我覺得,今次上邊唔好話講唔掂數,睇人呢排放料,應該係反晒檯嗰隻,真係團派同太子黨兩大社團喺香港呢個球場開片。團派,最唔妥太子黨,就係因錢,而特區好多服務,都係服務太子黨啲錢,由private banking到豪宅買賣。

試問,如果團派喺特區話事,你又係個喺特區泊咗好多錢嘅太子黨,你會點?仲唔即刻攞錢走!新錢亦會避港。貨幣供應跌,資產價格亦會下調。仲有,97年前香港資產因不論咩民情,政策非常穩定,所以被外邊人視為資金避風塘,點知一個「八萬五」令世人覺得政策會變,仲要一變時威力龐大。

團派骨子裡個個唔信彿利民,咁梁振英呢?喺咁嘅情況下,所有資產需求都會跌,現金話晒事。所以梁下最佳投資?現金。不過咩貨幣呢?仲使講,一定係神賜貨幣實貨白銀也。



八萬五記念花園 also known as 紅灣半島

Monday, February 27, 2012

情人節: 我同女banker的一段對話

是日情人節,同意同之前blind date 過嘅女banker見見面。

見花價貴,我又嚴重開工不足,所以淨係買咗一支紅玫瑰,諗住送俾佢,應應節。



見到佢送花時,先知原來,一支花係唔夠。點知,佢仲要買咗嘢送俾我。

佢唔係完全開心嘅情況下,遞咗個印有Dunhill一字嘅紙袋俾我,我一開袋內嘅盒,就見一個新銀包。

我一見就同佢話:「哎呀!我唔收得呀!好邪架!成世人都未試過唔見銀包,點知喺2010年唔見兩次,兩次都係收到人送新銀包後冇耐就唔見!我博唔過呀!」

女banker:「不過你用緊個銀包好殘吓喎。」

我:「殘咩?(拉出我個銀包)啲車線都未斷,呢啲叫broken in。我唔要妳份禮物啦。」

殘咩

原本勢危嘅情況,急轉直下。

女:「咁點呀?」

我:「有冇得攞番錢呀?唔得就不如攞番去換其他嘢囉。」

女:「咁換啲咩呀?」

我:「不如換啲呔啦。」

女:「你日日t-shirt、短褲、croc屎,都唔見你打呔,換來做咩呀?」



我:「我有話用來戴咩?」

女:「......」

我:「瞓喺到時用來綁住呀,for nothing beats the feeling of fine silk around one's wrist。」

女:「嘩!乜咁變態架!綁住人哋。」

我:「我有話過綁人咩?我未試過,所以想試吓俾人綁住咋。」

女:「...um...幾多條先夠?你話個銀包可以換幾多條?...」

Sunday, February 26, 2012

Lady Gaga comes to Hong Kong 咖咖小姐來香港


I want to go to Lady Gaga's concert in Hong Kong.

2nd hand market price is SUPPOSEDLY going through the roof with a lot of professional queuers involved.

Anyhow, I don't believe the price of say a HKD$1580 (Approx USD$200) face value ticket is going for HKD$30000 (USD$3850). The concert will be in 2 months, I plan to buy those tickets off speculators at par when the expiry date nears.

But if those crazy prices hold. I guess I only have Bernanke and Draghi to thank.

我想去Lady Gaga香港演唱會。

二手市場價因排隊黨參與好似好勁。

無論如何,我唔信,賣港幣$1580(約200美元)嘅飛賣HKD$ 30000(USD$3850)。演唱會仲有2個月,我打算到時按票面值購買投機者拋出嘅門票,哈哈。

不過如果呢啲瘋價唔跌,我只能多謝伯南克和德拉吉。

Thursday, February 23, 2012

追瑞房?

講起撈嘢,就要講地產股,講地產股就要講「亂到阿劍都頭痕」嘅特首選舉。咁亂,我都想博大霧入政府做,例如日日打flash game、月入十數萬嘅政治助理。做得政助,可能要寫演詞,如果歐洲年中爆,新特首嘅第一份施政報告我會咁開始:「I want to overcome all the obstacles that lay ahead of us. It's not going to be easy, as we are all aware of the challenges, but I will make every effort to resolve them together with you. I understand that not everything is under my control in my unique circumstances. But I will share my thinking with you. I want to walk this path together with you.」奧巴馬級呵?其實,我都係直接抄人。我抄邊個?咪就係司長唐英年啲情信囉!

睇佢啲情信,如果係真,一,中環政府合署政務司司長個office亂改土地用途,變成豹房。佢哋一定唔係第一對咁做,如果他朝我做司長,佢哋亦唔會係最後一對咁做。

二,證明我個唐唐一路扮傻論冇錯。寫得出佢情信嗰隻級數嘅字,係唔會唔小心講「條條fing」同「saam luk ling」,佢係辦傻,如果唔係點對付你班民粹派議員,唔明你要求就唔使做啦。邊個教佢?當年我個教授話六四後江澤民未坐正嘅時候,都要扮傻喺美國唱歌,減低殺氣,所以係江主席教。最後,我係ABC,anyone but Chun Ying。不過我明點解羅康瑞支持梁振英,唐出事令瑞房(272)升。佢都冇特區項目,等梁又搞八萬五冧樓市後,咪可以回歸特區囉!仲唔追瑞房?

反馬雲

講阿里巴巴(1688)以上市價私有化除牌單嘢。講真,我哋港人個個嘅血都有張保仔DNA,我哋係大盜,點知遇上個向大盜打劫嘅阿里巴巴。佢哋講到好公平,喺上市價收番,咁都講得出口。當年,我記得有位電視台做嘢嘅前輩,高價買佢,明知要揸好耐都冇所謂,依家馬雲對得住呢為前輩嗎?

同舟共濟唔通就係有咁嘅報應?你當年市盈率100倍上市,今日都應該以同一市盈率私有化,即係用11年每股41仙人民幣盈利計,50港元私有化。冇五十,投反對。唔通唯一懲罰嘅方法,似對付Santorum咁?喺我個blog到寫篇「不要讓女兒嫁入馬雲家」,叫友好link過來,等十年八載後,搜「馬雲」時就算百度搵唔到,篇文喺Google都仲係名列前茅。

Web 1.0出咗個李澤楷,web 2.0出咗個馬雲,唔通個個做IT嘅都係咁?唔通真係high tech揩嘢,要low tech先撈嘢?

沽匯豐

呢期太多事發生,少廢話入正題。先講匯豐(005),兩日前《華爾街日報》話匯豐有消息傳出,話為唔減手頭上現金資本去應付監管機構,又想派現金做職員花紅,所以諗住要批股集資。

老實,孫柏文唔理你匯豐集資為乜,唔夠錢就係唔夠錢。攞員工同監管機構出來,根本係想啲記者搬字過紙咁俾籍口,任何記者以填鴨式教育咁報導都係失職。等我角色辦演:「員工?幫我哋搵錢碼!少財唔出大財又點入呀,被攤薄都抵啦!監管機構?民粹囉,冇計呀!」如果真係批股集資,之後又派花紅同股息,你仲揸匯豐?有冇搞錯呀?佢哋冇錢呀,沽清啦!

Wednesday, February 22, 2012

已買熊證睇跌

週末深夜時分,孫柏文喺網上遊戲世界激烈地為港爭光之際,突然電話收到短訊。一睇電話,原來係梁心欣來訊話:「存款準備金,50點子。」

我諗:「嘩!減存款準備金50點子?咁激!真係估佢唔到,個市仲唔反射式咁升?不過睇淡嘅我就諗,中央係咪知道啲我哋唔知嘅嘢呢?習總遊歐洲,主人揸住兜,哭住嗌求救?唔通真係將會有如一盤糞便將會被拋向掛在天花板上開到最行的風扇般,片地灑金?」

今次人行嘅行動,真係出奇不意,尋日睇財經台,見到我至喜愛嘅丁Sir丁世民話人行已似以前嘅德國央,你估唔到時先做啲例如喺週末減存款準備金嘅動作。大家都知,市場最鍾意先炒利好傳聞,再喺消息出時沽,今次喺冇預期下出好消息,應該升升升。點知,雖裂口高開唔少後,個市居然跌,真係對好友唔係好現象。

其中一樣好多人會留意嘅股市水晶球,就係國際銅價。以前留意係因為銅需求變化能預視世界經濟表現,依家就因銅係風險胃口嘅指標,而銅價喺上週五紐約收市價由跌穿50日平均線。上次跌穿,就係喺舊年八月初,當全世界都覺歐洲問題應會冇事之時。

所以,我尋日就買咗江西銅(358)嘅遠期熊證同價內put輪,諗住係咁坐,坐到希臘單嘢有結局為止。歐央行,因為買咗啲歐洲國家國債之後,要求要喺一眾應平起平坐嘅債主中行先,你做其他債主,不但會唔高興,仲要唔知歐央行會唔會越買越多,你越排越後。希臘嘅結局就係其他國家嘅序,除非歐央行肯一齊平起平坐咁蝕,如果唔係佢哋一係唔買,一買就要買晒因為其他投資者一定唔肯排後。

最後,我想恭喜啲睇好嘅投資者,因為當我呢個大明燈都仲喺到買熊證、put輪時,個市邊到係升完?

Tuesday, February 21, 2012

填充題...



An email between Tang and his "baby"...

我想問嘅係,究竟唐司長同佢嘅baby HAVE 咗啲咩呢?

點解馬生啲兄弟要幫佢份email打格?


大家可以幫吓我估吓嗎?留留言等我禮拜四《金手指》篇文可以寫吓。

仲有,睇唐司長嘅文筆,小弟真係甘拜下風。我要學嘢、學嘢。He is quite good...

Monday, February 20, 2012

Short 咗!

Well, cut RRR still market down.

Copper broke below 50 day moving average last Friday.

So I bought 358 bear.

The beacon is emitting signal again!

晒冷買希臘四月脫歐

翻查記錄,特區一眾精英股評人行家中,對歐洲同歐元嘅睇法都係主要話遲早出事,現有嘅結構冇可能延續。呢個預測,同外國嗰啲我最信嘅投資、分析高人係一模一樣。不過有如尋日喺獅子山學會同利世民、王弼討論時嘅結論一樣,個問題係幾時。

而因到今日都未有人肯一句講到尾咁話幾時,就等我做呢個預測嘅「數碼通(315)」,等我行先死先捱轟先。孫柏文今日話:「希臘將會2012年四月脫離歐元區。」

大家作為《金手指》fan屎,都知我做過好多攞膽嘅預測,06年話白銀十年升十二倍,07年匯豐賣百四蚊一股時叫大家沽清。不過今次呢個預測相信係最攞膽,原因係四月之係六個禮拜之後嘅事。

咁究竟呢六個禮拜會點?首先,希臘政府本身已誠信破產,再通過咩減赤方案已經係冇意思。雖然大家一早都知通過咩法案都係對政府財政嘅爛局冇幫助,不過之前大家都知佢哋通過法案就可以交差攞救濟。

而依家係通過咗都攞唔到,因為連歐洲其他政府都唔信會做,更唔信會做到,最殘酷係就算減到開支,因經濟急速萎縮,就算收支平衡,國債對GDP只會都會擴大,還債能力由冇得還變更冇得還。

亦因呢陣東風根本冇得擋,就不如借東風達政治目的。禮拜二,我講過話德國領導如要德國人民就範,傾國傾城咁放大政客權力去「救」歐元區,佢哋要學花旗國政府咁做個「雷曼」嚇人嚇到見棺材流眼淚。喺咁嘅incentive推動下,希臘唔會有方案能滿足德國政府。所以再加碼救希臘唔會發生,三月希臘政府將會走國債數。

大家可能話:「唔還國債錢,唔等於要離開歐元區。甚至係唔使還國債會令未來希臘財政更穩健,更能留喺歐元區。」問題係政府「債主」唔止係國債債券持有人,公務員呢?每個月喺「全民退休派錢」政策下攞錢嘅人呢?全部都要出糧,出福利。

所以有如獅子山學會同事王弼話,希臘要自己發鈔,首先迫所有可以迫嘅人,例如銀行存戶、所有合約簽署人、公務員薪津、攞福利嘅人等,將歐元定個匯率後強制用新希臘貨幣做計算。之後就開波買賣俾佢自由浮動,等新貨幣可以跌至搵到應有對換率。

仲有,歐洲各國好多政客,都好似特區嘅工聯會、李卓人,真心覺得銀行家吓吓搵笨,草木皆兵咁反任何措施。而唔同特區,佢哋呢啲人真係執政話事。仲有,歐央行話自己唔蝕得,不過希臘唔俾時,好似當年史太林講梵蒂岡一樣,希臘亦問歐央行:「你有幾多架坦克?」到歐央行都中招,下一步又點?

當然,好似06年我話「花旗國樓市將慘過八萬五」一樣,就算俾我講中,又應該點落注?因為連我都應,我冇能力叫你一注獨沽雷曼兄弟,最多都係叫你拋空兩房。

講落注,大家嘅反應可能係:「瞓身沽歐元!」不過如果希臘脫歐元,係其他歐豬國家嘅先例,即示意留喺歐元區嘅國家將會係德國為首,甚至得番德國。咁嘅馬克2.0仲唔大升特升?

仲要轉身要快,因為一旦希臘離開後,歐洲各國人民唔敢再反對任何「非一般」救市措施時,例如印印印,歐元又會點?又或者係其他歐豬國家存戶見希臘存戶嘅遭遇,開始擠提,歐元流轉velocity暴跌,歐元又點?唔通美元、美債及同美元掛勾貨幣又係避難所?

尋日,因中國話「支持」歐元區及歐盟(中央都多次表態支持香港民主進程),港股無啦啦大升,地產股好似間間都被梁振英賜地起紅灣半島式住宅咁飆,我只可話呢場party冇我份玩,你玩繼續玩,我就戥你高興。

Wednesday, February 15, 2012

Bounce.

德國想製歐洲「雷曼」





事,發生時係得一個版本。不過記載嘅歷史,就可以同一件事為後人帶來百花齊放咁多個版本。到2012年嘅今天,大家應該對2008年投行雷曼兄弟爆煲嘅前因後果都略知一二,不過今時今日,上至曾特首下至我,都係唔知exactly點解當時唔救雷曼。

可能係疏忽、陰謀、或按本子辦啱嘅事。點都好,「08唔救雷曼」令我拗頭嘅程度,絕對喺「07港股直通車邊個幕後搞出來」同埋「邊個度數碼港條橋踢英帝走」嘅水平,全都係我他朝去之前想知真相嘅嘢。

不過人類係會學習嘅一群,就算某件事真係意外唔小心發生,當見到結果後,未來想造同一結果時,就會知點做。當年,因雷曼爆破之後,一輪又一輪嘅「救市」政府措施出台。令有權力嘅人,越亂越得益。

花旗國有俾行政長官8000億亂使,國會冇得過問嘅TARP,令識人攞到錢嘅承包商發過豬頭。國內就好多萬億嘅基建計劃,令坐正嘅人喺特區買88樓豪宅。你今日灌醉呢啲得益者,問佢哋最想要啲乜,一定答:「can I have one more Lehman please?」

當然,唔係個個都滿身銅臭,淨係講錢。權,始終係一樣更多人要嘅嘢,歐洲就係最好嘅例子。

歐洲充滿想支配其他人生命選擇嘅社會主義者,最幣係有民主呢件產物阻住成大業。所以每當有危機時,社會主義者就會磨拳擦掌話想利用大好機會去擴充權力。佢哋都係想再有「雷曼」,去壓制民意後攞着數。上週,德國財長被傳媒見到同葡萄牙財長話唔使驚。佢唯一可以咁做,就係因知「雷曼2.0」來緊,因以依家情況,德人民一定反檯。德國想製歐洲「雷曼」究竟係咪真,我只可以學Charles Munger話齋:「Show me the incentives and I will show you the outcome。」

Monday, February 13, 2012

同胞 自駕遊

為香港總體著想,留番樓花俾啲...



請睇咗以上嘅新聞報導先...

睇完?ok,以下就係我嘅comments。

呢個世界冇toxic資產,只有toxic價。即係垃圾,只要夠平,都抵買。

樓,當然一樣。只要個單位夠平,就會有人覺得值。

成日話一手樓銷售有問題,好似「吸煙危害健康」咁,講咗咁叉多年你都要走去盅個頭埋去,可以點講?如何立法,都係解決唔到「蠢」同埋「死硬頸」呢樣嘢。

所以可唔可以為香港總體著想,留番樓花俾啲非本港居民買呢?

我哋買,就買人哋沽出來嘅蝕讓盤啦!

Thursday, February 09, 2012

One Kong Girl at a time

My column at Apple Daily today

前晚,孫柏文有幸被邀到葉潔馨同香樹輝每年一度嘅春茗馨香宴。席上有好多前輩,我獲益良多,例如老總沙膽虹、青姐胡孟青同埋八達通嘅左丁山叔叔。最令我感動,就係前輩們都有關心我嘅近況,而我亦好誠實咁答:「依家冇嘢做,時間多咗好多,所以走去為齊家出力。以前打電話俾女仔約食飯,唔係佢呢日唔得,就係我嗰日要做節目。依家就唔同,我可以做到倪震嘅KPI,打電話來我十五分鐘就到。」

咁啱,我就喺一次約會中同一名靚港女喺尖東海旁傾計,因為勝在嗰到冇香港人認得我。因佢喺約會前Google過我個名,所以知我有個blog,亦有睇我啲post,就問:「點解你個post話我哋呢啲八十後,要求『B&O平權』就係naive?關電視係平嘅咩事?」

我:「嗰個係Bang and Olufsen,我講嘅係BN(O),護照呀。」咁個女仔就好似好明咁點頭,話:「哦......」因為知道佢有嚴重職業病,唔識都舢舨充砲艇,我就問:「咁妳都有本,BN(O)嗰三個英文字母代表啲咩?」港女:「吖吖British吖,唔知。」

嗰刻,諗住成晚流流長,就睇吓件港女對呢啲話題嘅耐性有幾多,佢嘅好奇心有幾強。咁講到大英帝國對殖民地人民意願嘅尊重程度有出入,我就想先同佢講英揆金馬倫啱啱講點對福克蘭群島。當然,費事佢有嘢唔明跟唔到個story,我就問佢啲最基本嘅嘢,先來係知唔知福克蘭群島喺邊。

佢話唔知,咁我就攞部手機出來,開Google Map,跟住狂zoom out至見到世界地圖。我用手指撥去大西洋後,就俾佢睇部機嘅畫面,開始話福克蘭群島喺阿根廷對出。不過我一開口,又見佢點頭扮晒明咁話:「哦。」我就問:「唔講福克蘭群島同阿根廷住,妳知唔知英國喺邊?不如指俾我睇。」原來係唔知。

算,有如千禧年代拒接受OBE銜頭嘅人兄話齋,都冇empire,有如英國嘅小國,港女真係可能唔知喺邊。咁為建佢嘅信心唔好吓吓唔識,我就zoom in到北美問:「美國呢?」佢好有自信咁指住畫面話:「呢度囉。」我答:「呢個係加拿大喎。」咁我指住阿拉斯加問佢,佢話:「呢個唔係美國,因為我知美國喺加拿大南邊。呢個應該係墨西哥!」

聽到呢到我就話:「係呀,所以當好多墨西哥人湧入美國生仔,美國人同我哋香港人一樣話北方飛來蝗蟲,哎。」之後佢知我笑佢時,佢就話唔識係因為冇接觸,學校冇教,返工冇用等等。

咁大家可能會問,呢件港女咩料?佢咪就係友報《信報》裡最鍾意女神化嘅港女囉,靚、「talk得」、月薪直迫六位數、後生、跨國銀行做,最諷刺嘅地方係佢間行嘅總部喺倫敦,所以我問:「如果妳它朝做咗銀行話事人,啲手下話邊到邊到出事,妳會點呀?」

女性嘅內心世界當然係我弱項,不過拯救港女係我哋港男應做嘅事,one Kong girl at a time。

---------------------------


後記:SNB blogger 牛頭角陳冠希對我以上篇文有見解...

講真, 靚嘅港女根本唔需要有學識, 靚就有人要啦 --- 呢個係社會現實.

談心唔應該談對手唔識嘅話題, 否則就搞到人地好唔好開心或者自卑. 作為一個吹得之人, 你應該收聲, 俾佢開話題, 否則只係自說自話, 一啲情趣都無. 咩福克蘭群島同大英帝國, 根本唔會係港女想講嘅話題.

佢嘅結論係...呢到有得睇

Wednesday, February 08, 2012

搭牛市順風車港交所

對上幾個交易日,孫柏文見到好多魚缸健將紛紛湧入個市。問我至喜愛支溫度針,即Q版劉央梁心欣,佢話感受到唔買就走雞嘅大勢,甚至到和雀亂飛之局,個個股民都好似對希臘財政問題冇到。

不過除咗股民,根據我落筆前最新消息,連希臘啲政黨都好似對希臘財政問題冇到,完先自定減赤協定嘅限期,原本應該係尋日特區時間旁晚。點知政府忽然行出來話:「乜我哋有定過限期咩?」勁。

雖然呢幾日,冇人落揸單時提希臘,不過經過過去五年嘅經歷,邊會有人唔睇住事態發展。我都承認,上個禮拜個股市走勢係令到我心郁郁,所以過去週末我就棟高床板,從根本因素再睇。

首先,大家都睇話中央鬆手會放錢。聽話呢幾個禮拜真係冇咁難借錢,不過真係唔知仲有冇啲重點項目好炒。因為如果俾我做下屆領導,我真係會提提溫爺爺要搞掂之前幾十萬億貸款衍生出來嘅壞賬。依家咁多省市級搞嘅project,現金流少到連利息開支都襟唔住,唔夠煲蓋之下,溫爺爺要睇睇佢,你話會唔會由呢刻一路放錢?

之後睇希臘。希臘政府爆就大家預咗,一向以來都係之後啲債主點。希臘啲銀行理論上應即時爆煲,咁歐洲啲官會點收科呢?真係大印特印,唔好話咩貴金屬,淨係沽歐元買美元都賺硬,不過點解要印先冇事嘅情況之下,歐元仲咁硬唔跌呢?

花旗國又係拗頭,用入息稅數據睇,十二同一月加埋應少兩百萬份工。不過佢哋勞工局計就話係咁多咗職位,啲季節性調整係咪化腐朽為神奇咁勁先?

點都好,有順風車好難忍手唔搭。不過我勸大家應買啲流通量一向多嘅股票,所以如果要我揀順風車,都係買港交所(388),因為到要跳車時,都仲有人肯接貨。

I don't buy this rally, but it is hard to fight the tape.

Friday, February 03, 2012

曾爵士如何埋炸彈害人

當年差幾日就要宣誓效忠人民共和國嘅曾蔭權,真係冇被揀錯跪喺因條命生得正而有得做世襲王室成員嘅查理斯面前,效忠英女皇、誓保大英帝國之餘,仲被冊封為爵士。因為淨係睇佢話事卸任前最後一份財政預算案,就見到曾爵士貫徹此終大英帝國施政宗旨,就係臨拍拍屁股走前,幫接任嗰個埋下拆唔晒嘅炸彈。時辰一到,炸到下手眼坦坦。




點解孫柏文會咁講?不如就跟住呢份財政預算案內嘅次序,慢慢睇。首先,預算案內講話要送錢俾生意佬,oh sorry I mean「支援企業」。方法係點?咪就係我上一篇《金手指》嚴重警告話唔好搞嘅政府做擔保。

點做?就係「支持政府企業」去銀行每借一百,官就用我哋啲血汗錢做擔保,保足八十蚊。政府收嘅保險費,只係利息嘅百分之十。有班被差佬支槍指住頭嘅納稅人做擔保,銀行仲唔個個放水?不過我有冇得借呀?冇。不過有人走數時,還就有我份還。

仲有,居然話係俾「中小企」。嗰啲日日叫你利得稅分「稅階」嘅人聽到,就會問:「你話唔可以推行利得稅分稅階嘅原因,係因為啲人可將大公司重組成好多個小公司避稅,所以無法知對方究竟係咩規模。咁依家又可咬牙切齒咁認定邊個係中小企,再利益轉移?」佢哋如果咁問,我就只會話,唐英年,你最好諗定點答。

官仲話根據佢哋壞帳率計算,擔保一千億,要納稅人輸一百一十億元。點計呢?啊,我知,其實政府咁講,唔係對我哋呢啲納稅人講,因為計錯政府要輸更多俾銀行時,我哋連聲都唔可以出,淨係被當提款機咁噤,頂多落匯豐總行下紮營,佔領中環。有得還就銀行贏晒,冇得還就我哋硬食,仲要鼓勵啲唔應該借錢嘅生意佬,老奉攞錢先。

官喺呢份末代預算話有咁嘅計算,其實係面試緊入標普、穆迪做嘢,因為歷史證明信貸評級公司做唔到,不過啲官自覺得。再唔係,就喺博去布魯塞爾,教歐盟啲官點吹水呃人。

聽啲姨媽姑姐話,男人大使都有個譜,最怕義氣去做擔保。即係開支大下,都係預算之內,不過一旦做貸款擔保人時,就可能發生黑天鵝。最佳例子係千禧年代,年年財政有大額盈餘嘅愛爾蘭政府,因為幾年前一句「擔保所有銀行」,令全國大幅減人工、失業率飛升、走得嘅著草。不過因人民未來賤如泥,臨拍屁股嘅人又點會理?不過愛爾蘭及其他因擔保而出事嘅地方,啲以前次次選舉後執政嘅大黨,再選時差不多滅黨。我哋特區終極話事嘅係共產黨,曾爵士真係勁過James Bond咁玩嘢。

我相信,未爆煲前,仲會有啲政棍行出來,話呢個計劃有幾咁成功,政府收保險費收到手軟。呢啲政郡似乜?咪就係當年喺花旗國話兩房好成功嘅人囉!爆咗之後先潛水當冇支持過。

仲有,呢份預算案令一埋炸彈嘅位,就係佢話,政府大力投資基建,建造業對工人需求大增,失業率現百分之五點二,比08年百分之十二點八低。仲話政府會叫新人投身建造業。And you are proud of this?當年08年,一班社運份子叫紮鐵工人罷工,起因係特區總體對工人嘅需求減少。你依家就政府起嘢,話叫後生入行?唔係碼?害人都唔好咁玩得唔得呀?各位社運份子,政府明知冇point起第三條跑道都要起,係因為你哋「成功爭取」咋!

點都好,我日日睇住日曆,希望快啲換屆。唐英年,希望你上任後盡快拆彈。

Tuesday, January 31, 2012

如任內爆煲 特首會點做

Below is the longer version of my column today in Apple. Unfortunately, neither version can capture the actions the CE will take in a banking crisis...

For after all, the first thing he will do is arrest anyone who is 不誠實使用電腦...

-------------------------------------------

喺香港特區歷史,如孫柏文冇記錯,係得兩個人曾話自己係政治家。其中一個就係特首曾蔭權。各位fan屎都應該知上週末,特首喺瑞士世界經濟論壇年會到話「從未對全球經濟前景如此驚恐」,呢句對大家就冇驚喜,因為前瞻唔係97年被譽為「聖誕權」曾特首嘅強行。

如果係,就會好似第二個自稱為政治家嘅人(即係我)咁,06年已經開始發警號話「美樓市將慘過八萬五」,亦會同時將特區嘅財政儲備撥咁啲去白銀,不過後知後覺總好過唔覺。

特首亦話如果歐洲爆煲,最好快爆,最好喺佢卸任前爆,等佢「有機會可以處理,唔好等轉屆時發生,增添麻煩」。咁報導就話有好多人批評佢不自量力、憑香港人之力點擺平海嘯等blah blah blah。相信除咗依家搞BNO平權運動嘅八、九十後外,冇人會naive到信特首話「處理」時,係講緊特區能令希臘還錢,法國成功加稅,歐洲經濟增長快到能減債。佢講緊嘅係特區內會點。

我唔知佢喺Davos聽到啲乜,不過如果被特首罕有地講中,真係爆煲,佢會做啲乜?低級政客就會話,舒解民困、批錢六千、擔保中少企貸款等。政治家一聽就會問:「呢啲擺得平,就唔會係驚到瞓唔著嘅危機啦!」

試諗以下一刻你係特首。希臘宣佈唔還錢,有間歐洲銀行被擠提,該國政府冇財力擔保,所以嗰間銀行爆。市傳匯控係個好大嘅對手所以5號股價開始大幅下滑。香港亦傳倫敦匯控出現電子擠提潮。ok,你點做?

如果睇曾特首話希望佢任內爆,相信佢會再來「政府擔保所有存款」。原因係呢個擔保,一旦喺新特首選舉後、不過就任前發,鬼信你煲太。如果係新特首,我會說不,原因係呢場海嘯中第一個咁做嘅國家係愛爾蘭,08年確實冇事,不過2012年呢?所以最好任內爆,因為都拍拍屁股走,擔保埋孫柏文酒吧條數都冇所謂。

仲有,客買嘅匯控產品係倫敦發嘅,你淨係擔保香港匯豐存款,一旦係倫敦有事咁點呢?最後,擔保、泵錢,全都要個危機係周轉不靈而唔係資不抵債,不過因之前你吓吓都擔保,存戶都唔睇銀行做風險幾大嘅生意,最後係因你之前鼓勵最後爆資不抵債危機又點?都冇所謂,因為我已卸任了。

Sunday, January 29, 2012

我有冇唔小心推低電視廣播股價呢?

上個禮拜四朝,我喺我個Apple Daily欄度同fan屎們分享過「無線頒金曲金獎俾林峰隻《chok》,係電視廣播(511)新老闆,特登來激D觀眾,去試探固定收視有幾堅固」論

我仲要話呢次係一次「國王的壓力測試」,stress test吓啲凝成固定收視嘅觀眾群反應。係一個好高明嘅管理招數。



點知...唔知係咪有電視廣播嘅股東唔get,搞到喺白南克宣佈2014年尾都唔加息下,全日恆指升幾百點,電視廣播當日以比平時多唔少嘅成交量、股價跌...

嗰日check過,電視廣播冇新聞、冇announcement、冇分析員講嘢...

我有冇唔小心推低電視廣播股價呢?





不過好彩,電視廣播嘅股價之後升番。haha

Friday, January 27, 2012

點解我哋咁憎 林峰...A Theory

同靚女博客荒木茂傾起,佢話:「林峰幾靚仔,唱歌又唔係特別難聽。

我即問:「你係咪on record先?」

荒:「係咁又點?啲人唔妥林峰係因為妒忌佢靚仔兼有錢。

我話:「都係解釋點解港男唔妥佢,港女呢?(大家一靜,我繼續)我知!因為林峰係D&G!」

荒:「D&G?

我:「睇《壹週刊》,潘霜霜呢啲國內同胞,可以喺林峯張床上任影相,妳哋啲港女得唔得?唔好話張床,妳行埋帝景園已經有食Q趕妳啦!港女為保港人尊嚴咪唔妥佢囉!哈哈!」



(最後呢段原本喺尋日篇文到...不過因字數爆額被刪走,可惜。因為我覺得係全篇文最有insight嘅point。)哈哈

林峰《chok》金獎背後的管理啟示

My column for 26th of Jan 2012

過年前,孫柏文同利世民傾我復工嘅嘢,我就問:「你估我上次咁樣炒鑊甘,仲有冇得做電視?」一問,世民話:「電視呢行應該係meritocracy,你係『得』嘅,就有人會揾你。」我心諗,即係叫我死咗條心啦!不過我就話:「就算我真係收得,都有個台唔會搵我,因為唔覺要talent!」世民諗一諗就笑住答:「TVB?哈哈!」

攞電視廣播(511)嘅TVB來笑,我呢代人或更後生嘅喺一月初都經常做。點解?因為就算好似我呢啲劇集、娛樂節目完全唔睇嘅人,呢幾年一月初開Facebook,就會忽然見到啲朋友,好似洗版咁百樣人講同一樣嘢,就係:「林峰?noooooo!憑乜呀?」有一個直情話:「《chok》?證明馬雅人全中!」

點解?因為呢幾年,TVB都喺年初勁歌頒獎禮封佢做「亞太區最唱得男歌手」。今年仲要俾林先生隻《chok》一曲攞埋劉德華同郭富城都未攞過嘅「金曲金獎」。

我Facebook上對TVB點解會咁做就有好多理論,例如因同唱片公司講唔掂數,所以要格硬捧。不過所有理論,通通都係建基於TVB雖覺咁做有問題,不過冇選擇或希望啲人唔係好覺。呢啲理論,我完全唔同意。

有朋友話,TVB好似聯儲局,八十年代嘅勁歌獎,就係Volcker嘅聯儲局,依家啲獎已量化寬鬆(當然,新城直情係津巴布韋央行)。不過同美國十年國債喺兩厘一樣,點解TVB嘅收視仲係咁硬?我係信有慣性收視呢樣嘢,呢個係TVB歷代台前幕後努力儲埋,同美元一模一樣。

其實,我覺得電視廣播嘅管理層,係明知咁樣攞林峰出來會有極大反響,都特登咁做,原因就係要試。為乜?大家都知舊年年初,電視廣播嘅控制性股權轉手,有如聯儲局換主席。如果我係新話事者,其中一個我想知嘅就係,我買來嘅資產,個個都話有「點都唔會走」嘅客,咁啲客對公司嘅支持有幾堅定?亦即似白南克問:「QE做到第幾期你先放美元、美債?」

如果舊年一月尾我同你講,2011年中林峰會有隻新歌,而歌將會成TVB全年金曲,呢件雖離譜但非意料之外。所以,電視廣播新班主就出林峰隻《chok》,一隻冇可能贏嘅歌,去探慣性收視嘅底線,即係一場壓力測試。你嗰班師奶,就有如我國中央政府人民銀行咁,一路鬧咪一路唔改習慣,師奶繼續睇,人行繼續揸美債。

當然,為長線做咁嘅壓力測試係有代價,因為啲人聽完《chok》,係難明點做金曲。第一,因為係同一個頻道播,咁樣摧毀誠信,就會連累其他節目嘅誠信都一齊跌。輕則唔信間餐廳隻雞有雞味,重則新聞被視為CCTVB。第二,就係啲唔聰明嘅投資者,睇唔明你玩緊「國王的壓力測試」,開始拋售你隻股票,所以喺林峰《chok》舊年年中出街後,電視廣播股價嘅走勢就冇運行。



如果我個理論係真,林峰其實好無辜,同JP Morgan嘅Jamie Dimon一樣,冇話要你幫,係都要塞啲嘢來,搞到有「佔領XX」嘅怨憤。

Thursday, January 26, 2012

白南克:「2014先加息!」

How to trade the Hang Seng Index in view of Bernanke's new 'transparent communication' strategy unveiled just now?

Well, first of all Gold and silver going nuts tonight, melting up.


Guess when the statement was released by the FOMC



Completely logical, as a majority of the FOMC committee members "think" it will be late 2014 till interest rate is raised. Though Bernanke has said this is merely what they think and not what they will do, until the 'opinion poll' of when interest rates will be raised moves decisively towards the hawkish camp, this 2014 date will be viewed as what WILL HAPPEN.

Anyhow, we all know Zero Interest Rate Policy (ZIRP) is viewed as increasingly ineffectual, it should provide a nice pop when Hong Kong market opens in a few hours time.

I would chase this, for a few days, especially precious metals related investments. Go silver!

祝大家開市順利!

祝大家今年得心應手!身手敏捷!

就點呢段片俾所有今日開工嘅fan屎!


Friday, January 20, 2012

中國全通 update



咁喺篇文到,我話過買嘅其中一個原因,係因為睇以前記錄,佢哋喺半年同全年結數後數週就會發盈喜。咁就不如買轉博一博佢發盈喜。

我喺篇文到亦話如今週唔發盈喜,就今日走。

依家佢哋就冇發盈喜,我亦見唔少人放貨離場。我就冇放過,繼續揸,因為我覺佢哋嘅盈利繼續升唔少,同派息應超五厘。不過你今日放咗我都支持,因為中途轉game plan,除非真係有好compelling嘅理由,都唔係上策。

點都好,大家如果有好股想我研究同埋同讀者分享,就留低股票冧巴同理由啦!



中國全通股價走勢圖

Thursday, January 19, 2012

煙場歸故土 半島也相同


前日,孫柏文走咗去幫親開嘅上海理髮店度,為新年剪髮兼修鬚。師父剪剪吓,忽然話:「依家啲日本妹都好搏噢?玩埋啲冇剎掣賽車。」我聽到就問:「有冇咁誇張呀?邊度聽番嚟㗎?」

師父二話不說,放低絞剪,喺衫袋掹張報紙出嚟遞俾我話:「咪你哋份《蘋果》囉!」

原來嗰日《蘋果》 A疊底版嘅國際新聞,真係有段講一個日本姑娘玩冇剎掣電單車賽時歸西嘅報道。我睇完,就順便睇埋喺同一張紙嘅 A1頭版新聞。

頭版講 Lafite,雖然喺 Youtube睇過「水泡孫柏文」一片嘅 fan屎,都可能會估我對呢段新聞有興趣,不過因我對紅酒唔識,所以就揭去 A2。

平機會係冇答案

一睇,哈!原來有段新聞講大酒店( 045)旗艦,半島酒店裡面嘅餐廳瑞樵閣,唔招呼一對姓林帶埋得 11個月大 BB仔嘅夫婦。咁嘅安排令呢個林太好嬲,嬲到幅相唔使打格仔喺報紙出樣。

點解餐廳有呢個規定,大家心照,不過平機會就話:「或觸犯家庭崗位歧視條例。」我諗,咩叫「或」呀大佬?唔俾細路仔入係咪犯法先?好彩,原來隔離版《利字當頭》嘅利世民,同日喺電台節目捉咗個平機會代表,問同一條問題。

世民兄問,歌劇院唔俾 BB入算唔算犯法?係咪香港開古典音樂會係一定要俾啲攜 B人士入場?平機會代表重複又重複話要睇「個別情況」。世民兄點劃清例子,平機會都答唔到,結論係平機會唔係睇「個別情況」,而係冇答案。

不過今次大酒店都抵死,因為之前唔肯為原則而戰。我講啲乜?幾年前,特區吹禁煙風,私人開嘅餐廳、酒吧、按摩院通通禁煙。嗰場戰役我當然打到底,因為食煙又唔係犯法,我開嗰間餐廳就係我自己嘅地方,喺自己私人地方同其他人做合法嘅嘢,都唔俾?有冇搞錯?產權何在?

而嗰次最刺耳嘅說話,就係立法會議員余若薇話:「嗰啲係公眾地方。」對產權意識咁薄弱,只可做 SC,唔好話係等同 QC。

好啦,你大酒店管理層想做人民英雄,所以咪唔撐其他想保留食煙權嘅場所。心諗,唔支持「錯」嘅事,應該萬人愛戴!點知到你做你覺得啱嘅事,人哋覺得錯嘅時候,就冇人撐你。

就好似上世紀 50年代嘅德國,尼莫拉牧師講過:「起初納粹追殺共產主義者,你不說話,因為你不是共產主義者。接着他們追殺社會民主主義者,你不說話,因為你不是社會民主主義者。後來他們追殺工會成員,你不說話,因為你不是工會成員。」咁最後追殺你嘅時候,就冇人企出來為你講嘢。

私有產權被蠶食

其他本地企業為公關方便,搞咩「企業責任」,而唔跟以上嘅道理我係絕對明,因為可能好似成龍大哥話齋,中國人係要管嘅。不過大酒店老闆係咩?係猶太人啊!好啦,嗰次你冇出嚟撐酒吧、骨場,今次有冇人出嚟撐你?

嗰個 complain嘅林太應唔應該有咁嘅要求,根本唔使研究,因為每日都有千千萬萬個「林太」想借政府力量去蠶食你嘅私有產權,去推翻你為自己地方定嘅規矩。

「林太」們下一個投訴,就係點解半島阻止佢個 B喺廁所洗手盆便便。呢個蠶食浪,係要所有產業擁有者團結咁去撐,因為呢單嘢證明,昨夕煙場歸故土,今朝半島也相同。



林太:點解半島唔俾我個 B喺廁所洗手盆便便?

--------------------------------------

PS. 做咗今日嘅「是日金句」添...

Wednesday, January 18, 2012

iMoney:前iBanker轉行後令我有的迷思

今日,孫柏文食完晏後行過便利店,見到iMoney 今期嘅封面搵咗幾個前銀行職員轉工嘅故事。

忍唔住影咗幅相。

點解?因為呢位Janet小姐,以前跟Jamie Dimon搵食,依家就係整蛋糕。

整蛋糕好,我都鍾意食。原來啲蛋糕特別之處,就係3D,three dimensional,即 X x Y x Z...中文好似叫「立體」

Janet,ex JPM, 現為3D蛋糕餅師

原來除電影之外,蛋糕都可以立體做綽頭。Janet果然係外資行精英!香港女性典範!咁嘅橋都俾佢度到。

不過我再諗,如果佢啲蛋糕唔同之處係立體,咁以前嗰啲呢?

唔知係咪iMoney玩嘢,定係呢個Janet小姐真係咁定位,以前嗰啲咪個個都係賣pancake?


2D Cake.

水馬真係有水架...

屯門公路...


Tuesday, January 17, 2012

瞞稅走佬不能用鑽石

My Column : 2012 - 01 - 17

週六下午孫柏文去友人家,被佢七歲大嘅女挑機,問我識唔識用英文串歐洲國家名。問第一題,我已被小朋友笑,因為佢問點串「意大利」時,我就寫ITBBB+LY。見佢老竇老母唔喺附近,我就同小朋友講:「我係大學畢業生,妳係小學雞。唔好駁咀,罰抄100次!」咁嘅學習態度,都唔知個friend點教女嘅。

講開意大利,大家都知佢哋呢排點。政府收入低過支出,低息舊債到期要借高息新錢還,仲要分分鐘借唔到新錢還唔到舊債。令政府最大班債主,即意大利啲銀行都冇人信,啲人唔肯擺錢喺啲銀行到。

咁就搞到意大利唔係民選嘅行政首長同局長們,聯同一眾大受北方(布魯塞爾)壓力嘅立法會議員,要用超技術嘅方法迫啲人擺錢入意大利嘅銀行。

例如,佢哋已禁止一千歐元以上嘅交易用現金,迫啲人用銀行系統做交收。佢哋又要全球所有發信用卡機構,只要個客係意大利籍,就要將所有交易記錄交俾意大利政府,甚至喺意大利同瑞士邊境,有專聞鈔票嘅警犬駐守,等啲人唔可以走私鈔票出境。因為政府只要check到你啲錢喺邊,就可保留向你攞嘅能力。

如果你係啲有錢人面對政府呢啲新措施,你會點?硬係更快攞錢走啦!不過如果你係《蘋果》典型讀者,一定會問:「我啲可動產就算變最大額鈔票,真係成個貨櫃咁多,攞來攞去會好揚喎,點算?」

如果你問你個private banker,佢就好大可能建議買鑽石,因細細粒已含大價值。跟住驚狗狗嘅話,就過關前將鑽石塞入支牙膏到,睇吓佢聞到啲乜。不過我就非常反對呢個建議,除咗我喺2006年3月8日篇《金手指》講過嘅原因外,上週有段新聞更令我反鑽石作走佬糧草。

事源五年前,珠寶商Graff嘅倫敦分店被劫,贓物中有一粒16卡黃鑽。最近,有個喺特區大埔嘅當舖,攞咗粒斷當後已再被切割嘅黃鑽俾GIA紐約評鑑,點知原來Graff一早一樣有咁做。而GIA根據粒鑽嘅物理結構「指模」記錄,通知Graff,Graff亦告上法庭要攞番。

鑽石好多都有顯微鏡先見到嘅雷射註號,你諗住割走去就「乾淨」,原來可靠結構「指模」追查,即各地政府要摷出來係得。所以如果你要瞞稅、走佬,都係買啲溶得再凝固變「乾淨」嘅嘢好啲,即係買金銀,做白銀戰隊啦!

Friday, January 13, 2012

Graff vs. HK Pawn Shop: Lesson of this case...

This is going to be one heck of a case: Graff is suing Yau On 押...

Hong Kong's very own Yau On 押 presented a “16.28 carat modified cushion cut diamond” to the GIA valuation centre in New York.

The valuation centre supposedly had assessed the same stone before, when it was still owned by Graff and had detailed information about its grade and structure on file.

Graff suffered a robbery 5 years ago which the diamond was part of the loot.

Graff wants it back.

------------------------------

Lesson is,

1. Diamonds have its own unique identifiable "finger prints"... traceable... ie. notice to all private bankers... taxman can now come after it... advice your clients to buy things that can be melted and untraceable... like silver haha

------------------------------

Here's the article...

Stolen diamond 'in Hong Kong'



A 16-carat diamond that was stolen in a £13 million jewellery heist in London five years ago has turned up in a Hong Kong pawn shop, according to court papers.

Large Diamond; A 16-carat diamond was stolen in a £13 million jewellery heist in London five years ago

By Amy Willis, Los Angeles7:24AM GMT 13 Jan 2012

The gem, a rare yellow stone, was discovered during a valuation at the Gemological Institute of America (GIC), a non-profit organisation in New York that grades and certifies valuable stones.

The jewel is believed to have been among dozens of precious items stolen from the Graff jewellery store in Sloane Street in London five years ago.

Two smartly-dressed men walked into the high-end store and pulled out silver handguns after passing through the shop’s security airlock.

The pair then helped themselves to millions of pounds worth of necklaces, pendants, rings and jewels before leaping into their £85,000 Bentley and speeding away.

No arrests were made after the incident despite CCTV footage of the men being released.

None of the jewels have been recovered since the theft.

The suspect gem was discovered after the Yau On pawn shop in Hong Kong presented a “16.28 carat modified cushion cut diamond” to the GIA valuation centre in New York, the court papers said.

However, the valuation centre had assessed the stone before the theft and had detailed information about its grade and structure on file. The 16.68-carat gem had been recut but it was still identifiable, the court papers said.

Graff diamonds is now suing the pawn shop to recover the jewel.

"Graff is and was the true owner of the diamond and entitled to immediate possession of the diamond," but the pawn shop won't let the institute return the gem, the lawsuit says.
The yellow diamond is being kept at the GIA’s laboratory while the outcome of the court battle is decided. The pawn shop insists the gem belongs to them.

The value of the rare stone remains a mystery.