Thursday, August 27, 2009

飛人保特 人類之恥!

飛人保特是人類之恥?

  好多年前,包括我在內的一班志同道合的人成立獅子山學會時,發現原來成立智庫組織有好多竅門要學。當成員學得好,該智庫就自然會「打得」。

  智庫這個概念在外國已有悠久的歷史,所以已有不少可令人「打得」的招數供本會成員學習。而在眾多竅門中,其中一個必修班,就是如何籌款。

  特別是因本會是一個希望阻止政府好心「做嘢」、最後做壞事的組織,獅子山學會的創會規條包括不能向政府伸手拿納稅人的血汗錢,即就算學成一些「衙門前跪地搖頭、瞓街擰籮」技倆也不能用。要錢,就只可向大眾市民籌募。

  根據外國行家資料,世界上最成功從市民籌款的智庫類別,非「環保」類莫屬。本會成員就曾在出席國際自由智庫論壇時,聽到有個從德國來的代表呻:「只要求其搵隻熊貓、北極熊做自己個智庫嘅logo,就即刻一百幾十萬咁飛入來。」

  不過因「環保」類智庫的籌款能力強,就開始吸引那些掛環保羊頭、賣「低B市民需要我們叫政府改變他們行為」的狗肉智庫。

抽環保水

  香港當然有不少這些抽環保水的人,在獅子山學會中,我們稱這些智庫為「西瓜智庫」,原因是這些組織以環保綠,包裝着要製造比烏托邦更完美的法西斯、黑、白。

  不過看看有些報紙、傳媒將「西瓜新聞稿」copy and paste 當作新聞刊登,就深明以自由市場運作的智庫圈裏,這些「西瓜智庫」大有需求。本會深明適者生存,好「橋」不妨借用,所以最近開始研究同訓練如何在任何情況下,有紀律地抽環保水。直至本會能出新聞稿時,傳媒以反射式手法報道:「……不過對於這個問題,有環保組織指,市民的智慧比較低,有些甚至能被界別為低能。所以為確保市民利益,團體要求政府……」

  我們的訓練方法,就是以角色扮演手法進行網上模擬辯論。每日都會有成員將議題拋出來,然後其他人就「西瓜上身」般辯論。起初因功力不足,拋出來的議題多數包含好多好易見到的抽環保水機會。交通運輸、都市計劃、能源發電等,都是最初用來練功的題材。

  不過,眼見那些「真西瓜組織」愈戰愈勇,開始要市民注視些諗都未諗過、「嗄!咁都算係環保罪人」的社會問題時,我作為研究總監,當然要受訓成員加把勁。所以本會會內亦開始「西瓜上身」般辯論例如「o靚」模食雪糕點解唔環保。

  經過多個星期的訓練,本會班天生骨骼精奇的會員,令我相信他們練成了「點都抽到環保水去迫政府做嘢」的工夫。

  這條「木人行」議題,就是上個星期發生的,有會員A拋出:「保特100米跑9.58秒。睇吓你班友仲抽唔抽到水!」即引來大批回覆,以下是回覆記錄。

  會員B:「保特是個非常自私的人!任何物件要移動都需要能源,可是人類耕種、收割、運輸、煮食、進食、消化、最後變為肌肉動力的過程效率又非常低,所以用雙腳跑步應該是迫不得已才做,例如為保命被猛獸追或搵食追獵物等。保特為自娛跑步,就有如那些暴發大款買大馬力汽車,然後去遊車河!飛人?我呸!保特是人類之恥!殺滅地球的原兇!政府應該做些事,去正視問題!」

務實妥協


  那我問:「政府可以做D乜先?」

  會員C:「我們作為西瓜組織,當然務實和懂得妥協。我們不會要求政府立法禁止為運動娛樂跑步,不過會要求政府每人每跑100米收五毫的跑步環保費。我們亦明白政府可能會遇到不少自私的人,用『我跑步不是為娛樂』的理由來反對,所以最初只會在香港最大的幾個公園推行,不過當然亦有延伸收費的時間表及路線圖。我們亦會要求環境局局長走出來,勸告大家不要走法律罅,在其他地方跑步。」

  我再問:「傳媒會唔會報道㗎?」

  會員D:「這個就易啦!我們張新聞稿會用『政府引至碳排放激增』為題,說政府因要討好那些為自己選區選票的區議員,興建大量優質公園,令市民為娛樂跑步宗數激增。亦會計算因多了人跑步,二氧化碳的排放比97 年升了多少個百分點。港聞記者一見有百分點,就知是科學!一定將我們的新聞稿直接出街,成為新聞報道。」

  我三問:「通過法例要立法會議員支持,夠票咩?」

  會員E:「一定夠!首先講民主派,佢地唔識㗎!今年可以話要為氣候通緝特首,去年就要政府減油稅。要民主派支持,當佢地係小朋友就得,只要爬牆引佢地注目,跟住拉條大大螢光色嘅banner,之後重複又重複話為環保就得!建制派仲簡單,功能組別已由保護政府積極不干預,變成保護政府,當最低工資都支持,就知班友冇腦。而直選班建制派,因知自己土氣太強,要搵支鬼佬環保沐浴露闢味,所以一定會應承 try my best。最多咪又係得社民連嗰幾件反對?」  

我們苦練的成績,變成「吸水西瓜」指日可待,大家說對不對?獅子山學會籌款成功之日,孫柏文定當邀約各方好友,開大冷氣打邊爐賀一賀!

孫柏文
獅子山學會研究部總監


信報 (理財投資 P.31, 2009.8.26)




飛人保特 人類之恥!

Sunday, August 23, 2009

小朋友齊議息

From last Wednesday 19th August 2009 HKEJ Lion Rock Institute's Column...

-------------------------------

「虛擬局長」玩轉聯儲局

8月中,港男喜愛的歐洲足球球季又開鑼。即係周末到酒吧,港男最會聽到的說話,又會由:「嘩睇吓!索!」變為:「有冇搞錯!咁都唔中。我射都入啦!」  

以上的一句說話,當然不是某某衝口而出。港男經過多年從紅白機至PS3的電子模擬訓練,令個個都深信自己有1986年阿根廷球員馬勒當拿連過六個英格蘭球員的腳法。

美聯儲局網上遊戲 玩家當央行行長  

當然,宏觀看特區各大公園球場是看不到的,因雖然我們有心,不過無力,踢波需要的四肢協調,實在要「超電子模擬」的訓練,不是按按制就可以練得成。

雖然好多人,例如那些港女,常批評港男只會對足球專一有興趣,獅子山學會只可話:「那些港女又錯了。」因為除了足球之外,港男亦對美國聯儲局的貨幣政策非常有興趣。各位港男,我說的對不對?

本會作為一個深明獅子山下眾港男思維的組織,絕對明白到體驗任何活動的最佳方法是進行電子模擬訓練。為滿足各位對美國聯儲局貨幣政策的興趣,獅子山學會今日推介一個網上遊戲,等大家都能感受到主宰貨幣政策「落場踢」的感覺。

因早前有隻土產、教大家如何在大學校園如有誤會對人處事方法的遊戲叫《小朋友齊打交》,所以本會亦選擇將這個扮局長遊戲叫《小朋友齊議息》。


小朋友齊打交

這個網上遊戲,就是由三藩市區域聯儲局炮製,等上網參與的人,能「落場」角色扮演做聯儲局公開市場委員會,去釐定聯邦基金利率水平。

自訂利率憑失業通脹率計分  

遊戲開始時,你會有十六季即四年時間去決定利率水平,每六星期調校一次,水平任定。遊戲中的「計分」方法,就是定下利率水平後,程式將模擬失業和通脹率走勢。這「計分」方法相信是反映20世紀中,美國國會設聯儲局希望能助失業和通脹穩定的目標。

程式亦在遊戲中久不久爆些突發事故,例如股災、石油危機等,模仿公開市場委員會平日要面對的挑戰。

港女們可能會話:「你估玩完就識做央行行長咩?」獅子山學會相信,打電子足球遊戲好勁,不代表踢波的技術高;但能成功玩這遊戲,可能真的反映這人做央行行長的適合程度。

點解?因為之前提過,踢波要好,除要有心,還需四肢協調;不過,做央行就不同,根據 Ben Bernanke 貝南奇2002年解釋,就算聯儲局要進行一些遠比落實議息等普通貨幣政策伎倆難的政策,例如終極必殺技「量化寬鬆政策」去抗通縮時,連印刷機都不需要,在電腦鍵盤入指令就可以。沒錯!真是按按制就可以。這遊戲玩得好,做行長沒難度。

微調利率 通脹嚴重

有讚,當然也有彈。這遊戲其中一個美中不足之處,就是除決定利率水平之外,沒其他板斧。沒TAF、TALF、CPFF、MMIFF、PDCF、RP、RRP、TSLF、QE等金寶字母湯罐倒出來的金融海嘯後聯儲局伎倆,美中不足因這些計劃先好玩。

不需多說,因印銀紙沒成本,本會真想知道三藩市區域聯儲局寫的遊戲程式當中,如果把QE即量化政策額度由目前的3000億加大,要加幾多先爆超級通脹。如遊戲有這政策選擇,到時各成功玩這遊戲的港男,就算不能成為央行行長,都起碼能成炒金專家。

作為獅子山學會研究總監,當然負起研究這重擔,「瞓身」般玩這遊戲。結論是當聯儲局主席,難度遠比大家心目中高。遊戲是模擬貝南奇上台時的宏觀經濟情況,但我無論如何有心地微調利率,最終結果都是嚴重滯脹,如果突然任內中途大幅加息壓通脹,只會到任期末出現雙位數字的失業率。

先加息滅通脹後減息助失業  

經過不眠不休的「研究」,卒之發現唯一可令任期末出現漂亮宏觀經濟情況的方法,就是要遊戲開始時學80年代初的聯儲局主席伏爾克 Paul Volcker,上任後即時大幅加息去滅絕通脹,成功後便能大幅減息去推動經濟。本人「最高紀錄」就是這樣締造,在任期結束的一刻,遊戲中的美國失業率只3.8%,而通脹就剛剛過1%。好勁!大家說對不對?

不過有如讀書一樣,打機不是求分數。例如玩《孖寶兄弟》救不到公主,就算最高分也沒用。這個角色扮演聯儲局主席遊戲的最終目標是什麼?話到明扮演被委任的高級官員,最終目標當然是有得被國會再委任,可以成功連任。

不過,就是遊戲中的這個目標,令我更對美國的貨幣政策擔憂。因跟伏爾克政策為唯一能做到最後出現漂亮的宏觀經濟情況時,我的「分數」都未能令國會滿意。3.8%失業率、1%通脹都會拖我下馬,遊戲告訴我知的原因是「過程太痛苦」。

這個沒3D畫像、環迴立體聲的遊戲,實在太寫實了!

孫柏文
獅子山學會研究部總監


My game

後記
你估如果真係 0%息、3.8%失業率、1%通脹,個股市會點?
仲唔似 1982 至 2000年咁升到黐線?
Paul Volcker 個招係 work 㗎!

今年唯一中咗嘅預測...



今年卒之有留意《香港小姐》選舉,原因相信同大家一樣,都係因今年D港姐「太索」。番鬼佬話齋:「Such spectacular vintage!」

之前我仲食緊壹傳媒嘅飯時,喺 newsroom 同同事葉嘉澄傾起今年港姐選舉。



10名候選人,各有喜愛。

雖然我同葉小姐,都覺如果冠軍最需要有代表性,即最代表o個年嘅港姐,今年應該係有「女版許願」之稱嘅林潔瑜贏。

不過我兩深知無線冇咁嘅幽默感,所以喺淨低嘅「佳麗」中再揀邊個應做冠軍。

我已唔記得葉嘉澄揀咗邊個,不過我只係睇咗D「佳麗」嘅 profile 一次,就揀咗最後被封后嘅4號 劉倩婷。

點解?大家睇圖...



好似我以前咁,係 Equity analyst 喎,仲唔贏?hor hor hor

不過真係想知佢以前睇開邊個 sector 嘅股票...

最後加多句,我從依家開始會用「你靚到可以選港姐」去贈D「非主流漂亮」嘅港女...

Saturday, August 22, 2009

面臨破產...一夜翻身!

特區真係一個滿懷希望嘅地方...

【東方日報專訊】債台高築獲頒破產令的落難人,自選七個心水號碼用三十五元投注了一條複式六合彩,結果一注命中今年六月的其中一次超級頭獎六合彩,捧走三千七百多萬元。一夜間由破產漢變成千萬富翁,更為今晚攪珠的三千二百萬元頭獎六合彩增添一個發達傳奇故事。

即還債申撤破產令

據悉,該名超級幸運的破產漢已領取彩金,中獎後已即時清還債務並向法庭申請解除破產令,重過新生活。



不過話時話,申請緊破產仲用35蚊買六合彩,就算唔中呢碗心靈雞湯都抵飲!

Thursday, August 20, 2009

財經 Daily Show

如果 Daily Show 係18至25歲美國後生仔女最有公信力嘅新聞節目...

以下就係特區最有公信力嘅網上財經節目!


Saturday, August 15, 2009

令北京直接管治direct rule香港的政府機構

鑒於驚出現「支筆唔用會生鏽」現象,唔少人叫孫柏文keep住寫野。

以下就係我喺上禮拜三(12 Aug 2009)《信報》出街篇文 (subscription required)。寫作風格同喺《蘋果日報》寫時有少許分別。 ho ho ho


-------------------------------------------


令北京管治香港的政府機構


  2008年立法會選舉期,香港政界和傳媒圈廣泛流傳一篇中聯辦研究部主任曹二寶寫的文章。文章內容能以一句「如何收回港人自治權,令北京直接管治香港的方法」作為結論。

  如果以收回港人自治權為目標,那路線圖會是什麼?收回自治權時,又如何調整港人心態,以達致水到渠成?

  曹二寶的文章中有云:「鄧小平強調指出『中央確實是不干預特別行政區的具體事務的,也不需要干預。』為此他對中央要管的『香港的事情』提出了一項重要原則,就是必須是『沒有中央出頭香港難以解決的事情』。」

  這「原則」如以「阿媽教仔」的邏輯演繹,必然是:「阿仔,警告了你不要在廚房玩火,現在不但嚴重燒傷兼昏迷不醒。就算你常常強調我要尊重你生活自主,現在我幫你叫十字車,到急救後照顧你,負擔你生活開支,你應不會再反對吧?」

守株待兔等出事

  獅子山學會相信,曹二寶發表該想法時,絕對會有人相信他只是為國家、為特區作長遠考慮,一旦爆發「沒有中央出頭香港難以解決的事情」時,有已準備好的機制幫我們香港人出頭,以免將來手忙腳亂。

  當曹二寶文章在港流傳時,我們香港人的焦點往往放在何謂「沒有中央出頭,香港難以解決的事情」?阿爺如何界定?可是,因香港社會其中一個核心價值是有錢能解決天下事;當特區政府坐擁「埃及妖后嫁妝」的財政儲備,真是難以想像有什麼事情港人不能自己解決,於是得出的結論是中央會胡亂界定、在港人非常反對的情況下,收回港人自治權。

  但獅子山學會深信,如果真的有中央為香港「出頭」、結束港人治港這偉大實驗的一天,香港人不但不會抗拒,還會視中央為救世主;只要「守株待兔等出事」,便可以輕輕鬆鬆收回港人自治權。這招數其實已在香港用過,被收回的單位當然不是政府,而是一間上市公司。沒錯!曹二寶至喜愛的上市公司,就是中信泰富(267)。

  大家可能會問:「何出此言?」細想一下,出事前的中信泰富,不是像今天的香港政府,有中央「力挺」,管理上有極大的自主性,同時因有被力挺的形象,成功收集如航空、電力、基建等戰略資產。多年來,中信泰富運作和諧、穩定又繁榮,就算有外人懷著奪權之意,也無法落實。等,成為唯一策略。

  等什麼?就時要等到中信泰富出事。不難相信,當和諧、穩定壓倒一切,成為公司管理方針時,公司架構上,便積極淡化內裏權力制衡單位例如風險管理部、董事局等監察的積極性去達致「合作」。這時公司管理層就會好心為盈利,做些例如澳元 accumulator「一鋪清袋」的壞事。

  中信泰富最後那張拖垮公司的外匯合約,極可能是因事前多次嚐得甜頭、制衡機制不斷腐化下而簽訂的。

全力保護兩制

  試問,當中信泰富因澳元 accumulator 輸清光時,有股東會抗拒中央注資、入股、換管理層直接由北京管理嗎?當時股東不是視北京為救世主嗎?曹二寶,也不是在等特區政府同樣出事嗎?



  如果特區政府的財務狀況,有天如今天的美國加州一樣,面臨破產。我們的立法會議員一定會像加州州政府的議員一樣,懇求中央聯邦政府出手相救。問問加州的老百姓,聯邦政府「出頭」,大幅奪去州政府的權力,去穩定加州州政府的財政權,這是否好事?

  一國兩制、港人治港是需要我們全力保護的。如果曹二寶大方地告知我們中央在什麼情況下,收回我們自治權,那我們要做的事是非常清楚。有如孫爸爸多年來給我的告誡:「Don't fxxk it up。」  例如,有大批建造業工人失業,他們為搵食而轉行,情緒激動,過程痛苦,可是這不會危害一國兩制、港人治港。不過,不斷興建不符合成本效益的大型基建,催生日本式基建既得利益集團,最後不但將財政儲備花光,還要令特區政府負債纍纍,就會見到曹二寶想見到的一天。

  又或者因為金融海嘯,從商的人不但發現生意難做,融資又極困難,令一眾公司出現倒閉潮。這雖然難過,但不會危害一國兩制、港人治港。不過,政府透過行政手段,強迫銀行要拋開風險考慮放貸,最後摧毀銀行體制穩健,那就會見到曹二寶想見到的一天。

  不過,獅子山學會今天想大家特別注視一個能幫港人一鋪清袋的政府部門,那就是香港按揭證券有限公司。

結束按揭證券公司

  有如中信泰富最初定立的澳元合約,香港按揭證券有限公司的原意也是為減低風險而建立。原本按揭證券公司只為減低本地銀行「在貸出按揭貸款時可能引起的資產集中風險及流動資金短缺風險」,即一旦樓價暴跌帶來的銀行結構性風險,但按揭證券公司本身卻盡可能不持貨。

  可是,直到今天,按揭證券公司已「變型」,用香港人血汗錢支持的政府信貸評級借錢,然後再轉借給南韓及馬來西亞人消費、買樓,希望可以賺息差。運作和那些前投資銀行一樣。

  問題是,當獅子山學會問政府為何還要保留按揭證券公司時,聽回來的答案竟然是「因為幫政府賺錢」!

  賺錢好?好。不過如果要承擔的風險是有天一覺醒來,我們會積極要求放棄一國兩制、港人治港,那風險太高了。一個真正的政治家會不但考慮任內之事,還會考慮香港長遠利益,盡量把各計時炸彈拆掉。曾特首,殺掉按揭證券公司吧!

孫柏文
獅子山學會研究部總監

Friday, August 14, 2009

一注獨贏買白銀

下面就係最後一篇《金手指》... 雖然已經被黎智英喺禮拜一炒咗,不過我喺《蘋果日報》財經版阿頭范國忠,就禮拜二叫我寫篇goodbye文。

阿頭范國忠呢幾年來教咗我好多o野... Thank you Alfred!

最尾一篇文同第一篇日日出街嘅題一模一樣,都係「一注獨贏買白銀」...

1. Original

2. Farewell

It was quite a ride... Loved it and will cherish it!

------------------------------------

一注獨贏買白銀


今日係時候講下好耐冇講過嘅白銀。作為白銀戰隊隊長,應該同各位戰隊隊員 update下白銀嘅情況。

由我喺 06年3月6日第一次叫大家「一注獨贏買白銀」後,白銀升咗四成。如果你話:「咁嘅回報超水皮!」咁水皮嗰個係你,因為由第一次買白銀後,我都建議用平均入市法去買。白銀擁有「三線股商品」嘅特性,係一路橫行到最後先呈現暴升走勢。你想越買越貴,定係低價集齊貨先等爆升?

趁低入貨等爆升


原材料大升勢冇變過,有如 87年股災係股票大牛市其中一個入市大良機,舊年白銀跌到落 8美元一盎斯時都係一樣。三年半前提供有十年有效期嘅 120美元一盎斯目標價,剩番六年半當然 stand by my call。

但大家買白銀一定要小心,一定要買實貨。因為實在太多冇貨嘅人,長年拋空或以紙幣做交收。當白銀最後爆升時,到做終極擔保嘅花旗國政府都風聲鶴唳,國債價跌,全球棄美元,聯儲局就要好似 80年代初咁,將美元息口推升至 15厘以上。實貨白銀同紙上白銀價會有越來越大嘅差價。到息口升到咁高,銀價又到我嘅目標價時,就係轉買美股之時。

今日係最尾一篇《金手指》,如果呢幾年來你有睇過孫柏文嘅文,我想多謝你嘅支持。呢三年半喺壹傳媒做嘢,眼界大開,最重要係識到班好好嘅同事。我依家趁機睇下之後有咩搞,不過一定同你哋呢班 fan屎後會有期。

最後講多次,一注獨贏買白銀!

Monday, August 10, 2009

告別了,壹傳媒!

咁大個仔,未試過俾人豉椒炒魷。

今日,卒之試到。

從今日開始,我就再唔係壹傳媒嘅人。

死因?做壹傳媒 web show 時做唔到老闆(都真係幾易同簡單)嘅要求... oops...

由我最初喺《蘋果日報》試過四個禮拜唔放假、通頂幫公司出新野,到最後...ummm 冇咁積極番工... hahahahah 都算係一個經驗。

點都好,呢三年半來,真係獲益良多,特別係識到好多好好嘅同事。

對於現在還回自由身,有種莫名嘅興奮同解脫(唔使再對住壹傳媒裏搞 web content,跟住因網頁嘅 design,搵都搵唔到自己作品嘅沮喪啦!I have honestly never done anything more demoralizing...)

不過有樣野就真係好可惜,冇辦法喺白銀升到 US$120 一盎斯嗰日,喺《金手指》一欄到認屎認屁。 = P

翻版樂基兒?翻版 Ursula Andress!





不過又話時話,究竟有幾多個potential嘅客,會覺得幫襯咗Slim Beauty,會令佢變成周秀娜咁?

舊車換新 油需大跌?

上個禮拜,有個讀者寄電郵畀孫柏文問:「美國政府動用30億美元去推舊車換新計劃,會否令石油需求減少,繼而令油價下跌?」

正式嚟講,個計劃係想達致減少用油,減少花旗國依賴進口石油嘅目標。之前我喺公仔箱都有從多角度講過花旗國舊車換新計劃,不過就真係計漏咗究竟會用少幾多油,今日補番。

依家啲估計,如果行駛里數等不變(ceteris paribus)每架新車比舊車每年會慳大約280加侖油,即大約1060公升。如果以特區13.5港元零售價計,慳萬四蚊。

日慳萬四桶油成效存疑

因平均每架新車有4000美元補貼,30億美元補貼就會有75萬架新車,即係每年總共慳2.1億加侖。

一桶石油有42加侖,即啲新車總共每年慳大約500萬桶石油,即每日用少13700桶。

每日13700桶多定少?全球每日用超過8000萬桶油,淨係花旗國都2000萬。

而花旗國嗰2000萬中,大約950 萬桶係用嚟開車。950萬比13700,相信大家都知成效有幾多。

今時今日,每5個喺花旗國有駕駛執照嘅人,就有6架車,花旗政府仲走去補貼買新車,真係典型凱因斯主義嘅政策。即係完全違反常智,不過有如王帝的新衣,「聰明人」先睇到點解要咁做。

今次真係要挺下啲反對分子,大家知唔知邊啲人最反對呢個計劃?就係啲踩單車嘅花旗國人。

Sunday, August 09, 2009

市要繼續升只要...

港股真係勁,尋日大陸喺特區未開市前已因(又)吹風話祖國迫銀行放債嘅意志有所動搖,(又)即時跌到趴街。不過唔使驚,跌市唔和諧,相信中央會繼續指揮D銀行,隊錢出門口。

孫柏文只怕去到某黐線高位,例如07年尾,又有好似當時嘅平安保險(2318)咁,走出來嚐試做次世紀千億大配股。當時消息一出,一向唔理世界走勢嘅大陸股市,都即時仆直,上証指數最後六千變千六。

不過如果中央要銀行收緊,咁唔使配股或IPO抽水走,現水平都已到黐線高位。究竟抽唔抽水,依家喺大陸政府出現最大政策勢力鬥爭。

一邊廂,代表未來如果有更開放、自由經濟嘅控制者,即係做央行嘅人民銀行。佢地一定反對胡亂借貸,因為雖然經濟差唔和諧,不過有銀行因太多壞賬而出事仲大鑊。試下sms滿天飛時,全國過萬分行同時擠提,場面可其壯觀啊!

令一邊廂,就係代表過去計畫經濟,乜都要政府指點嘅世界中嘅話事單位,即國務院。佢地當然要跑數,無寶不落去「保八」。大家見到人行對國務院互毆,真係一場決戰紫禁之巔。

睇番花旗國,下個禮拜(又)來破記錄國債拍賣。上個禮拜o個次睇落「好成功」,雖然咁抽水,不過息冇升、股又冇跌。

點解息冇升?因為有間央行大手掃貨。邊間?如果你話係人行,咁你就錯。o個次最大買家係聯儲局,買咗o個批接近兩成嘅貨。

點解股又冇跌?因為雖然全球散戶開始拋貨,大戶、有錢佬就繼續買。點解買?因為佢地見到聯儲局咁買,就覺白南克好認真咁摧毀美元,所以一定要買野脫離美元魔爪。

大家睇實美元,弱勢持續,股點升到唔值,有錢佬都要繼續買,市要繼續升就只要咁。

渣打又抽水 下個係滙……

噚日渣打出業績,真係數都唔使睇,淨係又要抽水呢樣嘢已攞你命!佢哋話唔係因咩資本充足比率唔夠,孫柏文淨係知中四生讀經濟科都知,公司印新股出售,就係因為唔夠資金,或覺股價太高。如果唔係印新股為乜?得閒呀?

咁我又忍唔住諗,滙控(005)會唔會又抽水?呢三年嚟,信佢哋管理層真係losing bet。

07年初發盈警,個個話「咁快正視問題,抵讚!買得!」之後每次出業績就有人叫買,話「問題受到控制」。

揸內銀股散戶咪開心

我只係知道,除非你賣股。

如果唔係,你之前每12股用140元供5股,o依家就每季每股畀番0.62蚊過你,即係17股有10.54蚊。十幾季後打個和,長揸就當畀個免息貸款過佢。

一個唔好彩,烏鴉口講中佢哋又要你供,咁就將滙控變成炒股,長揸嗰個正儍仔。

呢隻嘢難睇,最難睇係佢哋資產將會值幾多。你識睇嘅話,就打個電話畀葛霖,因為佢都想知。啲老外銀行,已變成現金焚化爐。

嗰啲買咗大陸銀行股嘅股民唔好咁開心住,你估嗰十萬八千七億嘅貸款出事時,邊間行先幫國家頂?你求神拜佛到時股價跌七成,跌穿每股資產淨值,咁就唔使你供股,因為條例唔畀佢發新股。

最後,求求大家唔好再講咩市升因經濟復蘇。上個禮拜中央只係確定!冇錯確定!話經濟好咗,所以撤錢走,上海、深圳股市即時跌到趴街。唔係經濟復蘇咩?V形反彈咩?大陸股民都純睇資金,你呢?

出賣國家的證監會

特區最自視過高嘅政府法定機構證監會,又有嘢搞去凸顯佢哋擴大官僚版圖嘅野心。

究竟今期佢地又搞乜?上個禮拜五,佢哋因「國際證監會組織」嘅話,要做諮詢研究點樣搞死啲借貨拋空股票做淡嘅人。

佢地明唔明o依家借貨拋空股票已經好難?作為財經口水佬,孫柏文成日都俾啲前輩提醒,叫人借貨拋空股票冇市場。原因唔係因為股民唔睇淡,而係借貨拋空超煩,一般股民做唔到,建議得嚟晒口水。

試問,如果借貨拋空容易得多,恒指當年會害人不淺咁升穿三萬點咩?因為當市場癲都咁時,就會有勇士覺得唔值咁嘅價去拋貨,令市場起碼有一批錢去中和啲瘋癲股價。

再講,跌到落去時又有批人要買貨平淡倉,令股價有支持。

想整死借貨拋空嘅淡友


你可能會話:「不過有啲人係唔平淡倉,沽到零先收手,難拋空好啲。」

先講花旗國,股價係用嚟反映啲公司狀況,舊年例如花旗、美銀等,根本資不抵債,理應執笠。

不過多得淡友出手,先令政府注資或提供一定還錢保證,如果唔係,冇錯股價會暫時唔跌,不過可能一朝起身有銀行出事,股票停牌,即時good bye。

咁特區又點?唔使講最離譜肯定係滙豐(005)質到33蚊。

不過點解33蚊?咪多得啲自視過高嘅人,扮晒傳上帝說話,為綿羊股民搞啲咩競價時段。

如果特區有多過一個交易所,又冇證監呢啲低B劃一嚟搞,「勁假時段」一定喺交易所要競爭下老早消失咗!

咁如果傳話嘅就係證監,上帝呢?咪就係啲硬濕膠「國際證監會組織」。

呢啲鬼佬話事嘅國際組織,最想搞死例如香港呢啲「唔聽話」嘅地方,要我哋做一套,佢地就另一套。最好國企集資一定要去紐約、倫敦。

證監啲人個個心口有個prefect牌,最開心係啲老外「老師」拍拍佢哋話佢地well done。證監啲人係乜?就係一百年前出賣國家,搞到我國被分割嘅庸官。

因住俾人打!

每次被問關於點睇前特首董建華嘅政績時,我都會用我覺得係佢嘅三大德政作為我睇法嘅頭一段。

而董特首嘅三大德政,第一就係亞洲金融風暴中俾百富勤執笠,令胡亂投資嘅銀行家要面對自己做嘅決定衍生出嚟嘅惡果,花旗國嘅奧巴馬、布殊都冇董特首嘅勇氣。

其實,如果上次有救百富勤,我相信今次金融海嘯一定因有「出咗事,政府都會救我」嘅資金,逼啲金融機構管理層亂放債去追業績,令特區金融機構爆煲。

第二,就係肯接受立法會議員(雖然只係功能組別)嘅建議取消遺產稅,令人知道辛苦一生,可以將成果留畀自己心儀嘅人。

第三,就係將長期被政治力強嘅既得利益集團搵笨嘅公屋屋邨商場,一炮過將經營決定割離好鍾意用利益輸送,去換政治支持嘅政府。亦即係今日嘅領匯(823)。

過氣特首三大德政


今日講領匯,係因為前日有新聞報道,話抽水議員梁國雄帶租戶去領匯股東周年大會示威。咁帶啲咩租戶?有個要畀11000元租金嘅租戶話:「我欠領匯六萬六蚊租,仲欠銀行十幾萬債,領匯話我再唔還錢就要封舖,我又冇錢又冇用,死路一條呀。」

首先唔講佢係咪租霸,或佢嘅經營手法有冇進步嘅地方,佢欠債幾十萬,跟梁議員去「爭取」幾千蚊嘅減租係咪救自己盤生意最有效嘅一步?
梁國雄自己係咪又認為叫呢位租戶跟佢去示威,係救生意最有效嘅方法?

點都好,其實去股東大會,要求上市公司自減收入係非常危險。

其他時間,示威者數目遠超維護公司嘅人,不過股東會就唔同。

試諗吓,如果喺電盈股東會,我企起身要求減所有寬頻用戶嘅月費,你估我會唔會俾人打?

如果梁議員有 cojones,下次就要去電盈(008)股東會試吓,一路仲要大嗌:「電盈股東正一吸血鬼!」算啦,cojones始終唔係人人有。

中國是千禧dotcom?

噚日,孫柏文睇花旗國雜誌《Foreign Policy》,裏面有篇Vitaliy Katsenelson寫嘅文章。佢有個比較特別嘅比喻,去形容花旗國同我國關係。

佢話九十年代中,好多電訊設備製造商嘅生意出現高速增長。原因係啲下游前線科技公司生意多咗,當然就要用多啲電訊設備。

不過去到99年,啲人搵創投基金嘅錢開始亂開dotcom最瘋癲時,相信大家都仲記得 Amazon.com總裁嘅名言:「盈利完全唔重要!」咁呢啲dotcom訂電訊設備時會考慮嘅嘢,因資金太容易籌到,自然唔理啲生意應唔應該做。電訊設備定單金額嘅升幅,就開始同經濟現實脫節。

中國變大債主

當然,電訊設備商收到單照做,不知幾開心。令盈利增幅有如日出日落般穩定,亦因而令投資者覺得就算dotcom邊個最後勝利,電訊設備商先係大贏家,所以就將電訊設備商嘅市盈率越推越高。

到dotcom泡沫爆破嘅開端,電訊設備商因為要跑數畀投資者,就想盡辦法賣電訊設備。所以推出vendor financing,即設備商畀買家賒數慢慢還,最緊要設備一出門,就可以book數落簿當盈利,然後同股東講佢哋上季有幾咁勁!

最後點?因為 dotcom執笠,電訊設備商就要大幅撇賬,輸大錢出嚟話:「百年一遇水災呀!」

我國多年嚟靠出口花旗國食糊,最初花旗國因經濟增長令消費入口增加。
不過到九十年代尾,因股市大泡沫,花旗國人消費同進口開始同經濟動力脫鈎,當股市都爆埋,花旗國人借錢度日繼續消費。
邊個係最大債主?咪我哋中國人囉!真係威威!

穿21000要乜?

恒指勢如破竹,淡友仲因一路被殺平倉,變成上升嘅火箭燃料。我早排講過,當今世上已冇人敢再出聲叫人做淡,之前睇淡都係偷偷哋自己去做。費事嗰班跌市時會完全消失唔出聲變鵪鶉嘅人,大大聲笑你。

不過,去到上個禮拜,試問你附近仲有冇人做淡?偷偷哋想做都因彈盡糧絕而有心無力。

去到破萬九後,我覺得下個位將會喺21327點,因根據blogger Money Cafe,嗰個係恒指07年高位差不多32000點,同08年低位穿11000點嘅黃金比率。點解要信黃金比率?唔信,唔通用基本分析咩?點都好,全球任何資產價格齊上升,歸根究柢又可賴美元弱雞。

美滙指數,已由3月高位差不多嘅90點,跌穿79點。基本上,恒指係咪可以完全唔使理啲上市公司未來盈利,繼續盲目咁升,就係睇美元死唔死。

short in August?


美滙指數自從三月到o依家,走勢似典型下降三角形,底為78 點。如果跌穿,已有人話美滙指數會去到67點。當然,美滙指數如果唔穿78點,升破下降三角形,美元又再現強勢,亦遇到恒指到黃金比率,呢個可能係自08 年5月以嚟,最佳拋空機會。

5月18000點叫沽因覺唔值,8月21327點當然覺得更唔值。

唔通sell in May之後,就係short in August?