Thursday, November 30, 2006

《智英飯局》

黎智英 on TV.

奸險中央銀行的cheap招

噚日,孫柏文為大家提供過「怕中央銀行抽錢走去保衞美元,而抽錢走等於冇資金買股票,令到股票大跌論」,去解釋點解前日全球股票相繼下跌。

首先,大家一定要記得主宰各大中央銀行貨幣政策嘅兩大目標。第一個,就係維持社會、市場對該貨幣長遠購買力嘅信心;第二個,就係盡可能令經濟表現有平穩嘅發展。不過,大眾智慧相信呢兩大目標根本上係對立,中央銀行家每日返工放工,就係喺呢兩個目標當中作出取捨、平衡。

不過,花旗國出現「終極」泡沫爆破,就係佢哋嘅樓市爆煲。所以,所有依賴花旗國消費者繼續消費嘅經濟體系內一班中央銀行,都大量印刷銀紙,希望可以彌補樓市爆煲對經濟表現嘅影響。不過大家可能會問:「咁樣唔係會削弱購買力,引發通脹咩?」

嗰 啲希望中央銀行繼續濫發鈔票嘅人最奸險嘅地方,就係可以令普通市民唔覺得手上嘅美元紙幣購買力被削弱。普通市民一向倚賴兩個數據去衡量手上紙幣購買力嘅轉 變,第一就係睇通脹率,第二就係睇手上貨幣對其他貨幣嘅滙率。所以只要控制上述兩個指標,就可以瞞天過海,令市民唔覺紙幣購買力被削弱。

改通脹計法控滙率

第 一個方法,就係控制通脹率計算方法,毋須講多,睇日本就得。今年4、5月,獨立於政府運作嘅日本中央銀行話要減低貨幣供應,點知到8月,日本政府索性將通 脹率計算方法改變,令日本中央銀行冇藉口加息。通脹率冇變,市民就唔會覺得購買力被削弱。

第二個方法,就係控制滙率。今時今日量度美元滙率強弱嘅有一個叫 做美滙指數US Dollar index。而美滙指數呢幾日係咁跌,跌到從73年美元同黃金脫鈎以來,從未穿破嘅80點範圍。因獨立於政府運作嘅歐洲中央銀行,唔肯好似聯儲局一樣, 「瘋狂」印銀紙,美滙指數比重佔57.6%嘅歐元就大升,所以令美滙指數跌。而如果美滙指數跌穿80點將會引發恐慌性拋售,摧毀全球對美元嘅信心。

中央銀 行有兩個選擇去挽救美滙指數,第一係不惜一切抽錢走去保衞美元,進一步篤爆樓市也在所不惜,第二係強迫對方歐洲中央銀行一齊去印鈔票。大家可能會問:「點 迫?」其實,呢幾日來歐洲各大政府已經開始傳出風聲,用好多政治壓力去迫歐洲中央銀行一齊去印鈔票。甚至話會推出好似祖國嘅外滙管制,唔准資金進入或流 出,去威脅歐洲中央銀行,唔就範就一齊引火自焚。

我相信歐洲中央銀行大多數會屈服,一齊去印鈔票。如果真係一齊印,大家可以預期好多類型嘅資產都會大升特 升。而升最多就一定係冇得濫發嘅貨幣──黃金、白銀。所以我要問大家:「你今日買咗白銀未?」












Bernanke, "ECB? Start printing"

伯南克:「我要你一齊濫發鈔票!」

魔鬼的抉擇:救經濟?救美元?

噚日,孫柏文應承過大家會分析貨幣政策對銀價嘅影響,不過,噚日港股不論恒指或者H股指數都跌好多百點,所以今日我嘅貨幣政策分析會擴大至講埋港股。

首 先,大家一定要記得主宰各大中央銀行貨幣政策嘅兩大目標。第一個目標,就係維持社會、市場對該貨幣長遠購買力嘅信心;第二目標,就係盡可能令經濟表現有平 穩嘅發展。不過,大眾智慧相信呢兩大目標根本上係對立,中央銀行家每日返工放工,就係喺呢兩個目標當中作出取捨、平衡。

而 因為呢幾年驅動全球經濟嘅花旗國消費者,消費額都因樓市爆煲而下跌。我多就唔講,淨係因為少咗人做二按,攞錢出來消費條數,每年就會少3000億美元。少 3000億有幾多?對花旗國經濟來講,相等於油價由今日嘅60美元一桶,升至120美元一桶。所以,花旗國中央銀行聯儲局,同所有依賴出口去花旗國國家啲 中央銀行,例如日本、祖國,都大力將錢推入銀行體系,大量印刷銀紙。希望可以彌補樓市爆煲嘅經濟表現嘅負面影響,等消費者可以繼續消費。亦因有咁多錢湧出 來,所以好多非花旗國樓市資產,例如原材料、黃金、白銀、股票都上升。

問題就喺度,正當聯儲局大量印刷銀紙,美元購買力就會削弱。今時今日,歐洲中央銀行唔肯好似聯儲局一樣,「瘋狂」印銀紙,所以大家見到量度美元強弱嘅美滙指數US Dollar index(歐元比重佔50%)係咁跌。

聯儲局:美滙指數80點不能穿

原 先由今年中至今,美滙指數都穩步上揚,給空間聯儲局繼續濫發鈔票。點知喺短短幾日之內,市場開始覺得聯儲局如果要彌補樓市爆煲對經濟表現嘅影響,就要印更 多銀紙。有更多銀紙就等如購買力會下跌,所以市場相繼拋售美元、買歐元。大家可能會問:「咁關股市乜事?點解會跌咁多?」股市跌嘅原因唔係市場怕美元跌, 其實愈跌愈好,股市跌係怕美元跌,聯儲局會開始收斂,唔濫發鈔票甚至有大反應將錢抽走。

最關鍵嘅係,美滙指數已經開始逼近自從73年美元同黃金脫鈎以來, 從未跌穿過嘅80點範圍。而因為市場相信,聯儲局覺得如果美滙指數跌穿80點將會引發恐慌性拋售,摧毀全球對美元嘅信心。所以市場亦相信,聯儲局會不惜一 切抽錢走去保衛美元,篤爆樓市也在所不辭。市場就係要聯儲局揀,究竟救經濟?或救美元?就係因為咁,股市就跌。不過,就算大家唔信上述嘅解釋,淡友都會用 來試圖推低股市,因為用最簡單嘅技術分析,恒指升離200日平均線好多,就算下跌到16800點,「牛市」都算未停。大家應該運用衍生工具,去做啲對沖, 以策安全。

Tuesday, November 28, 2006

白銀戰隊又上場

今日,孫柏文變身成為大家久別重逢嘅「白銀文」,同大家「白銀戰隊」講吓 近期白銀走勢。首先,大家都知道,今時今日喺我哋特區財經吹水佬界裏面,冇一個比我對白銀更有信心。原先,本欄每星期出一次,跟住因有大家嘅支持,《金手指》一欄就變為日日出街。本欄變成日日出街嘅第一日,2006年3月6日(大家可以去《蘋果日報》網站嘅「昔日文章」睇吓),我記得為了報答大家嘅支持, 我為大家提供咗一個長線投資建議,就係叫大家買白銀,而當日白銀賣10美元一盎斯。當時,我亦有提供對白銀嘅目標價,同埋可能需要嘅時間。

目標價:每盎斯120美元 年期:十年

噚 日,小弟落筆嘅一刻,白銀就賣緊13.50美元一盎斯,升幅有35%。當然,就算升咗35%,白銀市價仲離孫柏文為大家篤嘅120美元一盎斯目標價好遠。 我建議大家買白銀之後,一路都有解釋點解白銀會升12倍。最基本理由係白銀多年來都係求過於供,每年從世界各大石礦場開採出嚟嘅白銀,有大約5至6億盎 斯,而每年全球消耗就高達8億盎斯。

曾經有個 fan屎問:「孫柏文,根據最基本嘅經濟學,一旦有求過於供嘅情況出現,價錢就會出現調節。價錢只要升到某一個價位,就會減低需求,同埋刺激供應量上升。 最後將求過於供嘅情況消滅,價錢亦會下調。白銀真係可以推翻呢條經濟學理論?」推翻我就唔敢講,不過我可以同大家分析。

首 先同大家講供應。白銀喺礦場開採出嚟嘅供應,可以話同白銀價完全無關。因為,極高純度嘅銀礦,自古至今已經開採到七七八八,今時今日白銀已經淪為礦場開採 出嚟嘅「副產品」。如果其他一齊開採嘅主要礦產價格唔升,白銀價就算再高,都唔會有新嘅銀礦。所以,大家要知道白銀供應,唔會因白銀價高而增加。

再 同大家講需求。當今世上,白銀消耗量最多嘅三大用途,就係用嚟做首飾,做機械零件,同埋攝影有關嘅菲林film同相紙photographic paper。用白銀做零件嘅機械,就算銀價升12倍,佔機械嘅總成本都仲係非常少,亦如果機械設計容許,一早已經用咗銅,如果繼續用白銀,就代表做機械零 件嘅白銀需求,唔會隨着白銀價高而減少。

攝影嘅白銀需求有增無減

又 有好多人話,因為數碼相機嘅普及,與攝影有關嘅白銀需求,會漸漸減少。冇錯,攝影菲林差唔多銷聲匿迹,不過如果睇數據,因為有數碼相機,消費者拍照嘅數目 大大增加,而因消費者拍照之後,好喜歡將照片印出來,而能夠印得好照片嘅紙張亦需要一層薄薄嘅白銀。與攝影有關嘅白銀需求,其實有增無減。而因相紙上嘅白 銀真係好薄,佔總成本唔多,代表與攝影有關嘅白銀需求,唔會隨着白銀價高而減少。

最後,用嚟做首飾嘅白銀需求,確確實實喺呢幾年減少,不過講真,大家最後 一次聽到女人話因有樣嘢「貴」,所以就唔扮靚係幾時?甚至乎,只要「白銀價高」變成街知巷聞嘅時候,做首飾嘅白銀需求分分鐘可能增加。聽日,再同大家重溫 貨幣政策對銀價嘅影響。

Monday, November 27, 2006

和黃應殺掉「3」呢個品牌

呢幾日,孫柏文差不多日日都寫13和黃同3,冇辦法,和黃嘅3已經冇水,又走到懸崖邊,管理層眼望前面嘅深淵,又望見到深淵對面有一片水份充足嘅綠洲亦知道唔跳就陰乾死,所以就起跑希望運用X-Series跳過深淵,去到對面崖嘅綠洲。

孫柏文今次見到和黃起跳嘅速度,深信佢哋可以跳到對面。不過,「跳深淵」呢味藝高人膽大嘅嘢,愈跳愈遠就愈好。因為「跳深淵」唔去到盡,跌咗落去咁就唔抵。今日,我會同大家講和黃點樣可以再去盡啲。

首 先,和黃已經講過會將3變成一個簡簡單單嘅互聯網寬頻服務供應商,X-Series亦已經做咗很多配合呢個理念嘅改變,例如改革收費模式。不過,和黃嘅3 仲遺留下來好多「舊telco」(古老石化電話公司)嘅壞習慣。例如,有人喺和黃個blog問:「我可唔可以用手提電腦無線上網,當X-Series寬頻 服務為modem?」和黃嘅人就答:「冇打算俾人當X-Series為modem,要手提電腦無線上網就去買一張datacard。」而我睇過,UK3嘅 datacard服務,就係典型舊telco嘅收費模式,完全推翻兩個禮拜前,和黃CFO Frank Sixt講嘅「唔可以吓吓數住用戶下載咗幾多byte嚟收錢」一番話。

我 想問和黃:網上行、有線寬頻同埋HGC寬頻服務,會唔會理啲用戶將條寬頻線插落乜嘢機去上網?如果唔理,點解X-Series嘅無線寬頻又要理?你覺得用 戶聽到:「手機得!手提電腦就唔得!」仲會用X-Series咩?我真係想走去和黃,大巴大巴掌摑嗰個好似患瘋狗症一樣,大聲叫 「cannibalize!cannibalize!」嘅高層。

再講,Frank Sixt應該睇實3嘅marketing,我都講過唔好再用function去sell 3,因為當今世上冇人唔識用互聯網,和黃應該focus喺「無限無線寬頻上網」呢個message。不過,噚日孫柏文喺 地鐵站,見到3用MSN個「綠色頭」去sell 3(圖),真係失敗,完全解釋唔到點解要用3或者無限上網嘅彈性。和黃最好學當年被批評助長「侵犯版權」嘅Apple MP3口號「Rip. Mix. Burn.」,例如想標榜寬頻速度可以用「Leech. Peer. Seed.」,如果想標榜因為互聯網帶來多種function功能,可以用「Download. Install. Run.」

搵李小龍揮拳sell無線寬頻

用MSN? 用「綠色頭」?真係sad到嘔。我真係又想走去和黃,大巴大巴掌摑每一個有份決定呢條橋嘅marketing committee成員,呢啲marketing,只有喺冇人要孭鑊嘅committee先至可以作出。

最後,雖然我上個禮拜講過3亦應該改名叫 「X3」。不過諗諗吓,和黃其實應該殺咗「3」呢個品牌。點解?首先大家要了解「3」係用來代表3G(第三代)服務,1G就係analog,2G就係 digital數碼傳訊,3G都係digital數碼傳訊,同2G冇分別。我用2G都可以無線上網,之不過3G快好多,3G一路以來都係一個行銷用詞 marketing term,根本消費者唔清楚。所以,如果有其他公司叫自己嘅無線寬頻3.5G、4G,「3」呢個品牌就即刻倒米。不如,「3」改名「Wham!POA!」 搵李小龍揮拳sell無線寬頻,喺歐洲一定大受歡迎。到時候,寬頻速度係每秒1.8M好,3.6M又好,甚至100M都好,都可以繼續「Wham! POA!Wham!POA!」Yeah!

Saturday, November 25, 2006

A story told with just 6 words

Well... was reading Wired yesterday and attended a Cantonese "speech giving competition"at Shue Yan.

Now, as I was reading Wired, this piece particularly intrigued me. It is about writing a story, a whole story with 6 words. Now, it all started because Hemingway wrote a story with 6 words "and is said to have called it his best work".

Ok, before telling you all (or if you have read the piece at Wired), let me paint you a scenario. Please put yourself into the shoes of an husband, who in a desperate attempt to wipe out all shreds of reminder of a heart breaking event, visits his local newspaper, walks up to the counter that accepts classified advertisements and hands over the form for the following ad to be placed into the newspaper (which is also what Hemingway wrote)...


"For sale: baby shoes, never worn."


Damn... powerful. You might have a better scenario that one I painted above, and thats the whole point, 6 words, can create a whole world of tension, drama and hits the message home.

Now what does it have to do with the "speech competition" I attended at Shue Yan College? Well, the competition was based on the GST (Goods and Services Tax - or Sales Tax) debate in Hong Kong. One of the rules of this competition is that competitors will be penalized on points by having a speech shorter than 4 minutes.

Yes... I also said "WTF?"

Speech/debates competition in Hong Kong is all about "correct pronunciation" 「咬字要正確」, "correct tonal control" 「語調正確」, "correct body language" 姿勢正確 (I am not kidding here, supposedly how high you hold your cue cards or even holding cue cards will get you penalized, I guess the competitions never entered the age of the telepromtper) etc... If thats the case, I do not think any of the speeches made by John F Kennedy or even Lincoln will qualify.



If the art of speech giving and debating, is to give the audience an emotional "punch in the stomach", what we here in Hong Kong in martial art parlance, is one of those wushu competition 南拳武術表演比賽. Where the participants dress up in the most delicate silk dresses.



But in comparison, in the real world of message delivery, news spinning, controlling the news cycle etc, how you speak and debate is a whole lot more like Streetfighting. Silk dress? Hell, you are lucky that they didn't aim for your loins with a broken Carlsberg beer bottle, and they probably would have "came from behind".




Imagine a typical Fox News dialogue between a Republican and Democratic "Strategist" debating Iraq. All you will hear from the Republican is an ad nauseam repeating of the line "Why do you want the terrorists to win??" (8 words) over and over and over again.

Will it win you any points at Shue Yan yesterday or at any other University level debates in Hong Kong?

No... You will be lucky not to be laughed out of the hall by the "expert" judge panels and the self-aggrandizing participants in these competition.

But do a survey of the TV audience watching that Fox News debate, and I can assure you when asked the question "Who do you trust more on Homeland Security? Democrats or Republicans?" They will say Republicans. Hands down.


So what does this all mean? It probably means that the public forum in Hong Kong is still pretty much green pasture. That there are MASSIVE amount of these debating aspirants that are blank books waiting to be filled, with style, with techniques and most importantly with ideology. I am tempted to do something about this. But perhaps I have to work on my own communication skills first. hehe~~

Friday, November 24, 2006

獻計和黃sell「X」3

噚日,《金手指》上面,尹思哲兄嘅《案內人隨筆》專欄裏面,講番孫柏文啲 「威水史」。重提我用「一注獨贏」呢四個字,為大家提供過嘅投資建議。自從《金手指》一欄3月面世,計埋前日,我都之不過用過「一注獨贏」呢四個字去叫大 家買過五樣嘢。呢五樣嘢就係白銀(建議至今升31%)、中石油、世界盃買花旗國贏小組冠軍(輸100%)、恒指熊證6204(輸100%)同埋前日建議嘅 和記黃埔。

無獨有偶,噚日思哲兄重提我啲「山埃貼士」之後,我喺3月21日叫過大家買嘅中石油857,噚日亦到達我當時為大家提供嘅目標價$9.8。由我叫大家買嘅價位$7.8計,中石油升幅有25.6%,都可以算係《金手指》篤出「遍地山埃、有嚿金」。

講 完《金手指》啲貼士成績之後,講番前日嘅建議13和黃。大家都知道,呢兩日來我叫大家買和黃嘅理由,係因和黃卒之面對現實,3來咗場文化(收費模式)大革 命,會令3G不但有救,仲會大紅大紫。呢場革命就係將3變成一個簡簡單單嘅無線寬頻供應商。其實,和黃上個禮拜已經公布呢場X-series革命,不過, 要到我呢個文筆好有問題嘅半文盲出手解釋,和黃股價要喺我篇文章出街之後先至開始郁(係,今次我死好彩!哈、哈!)

不 過,和黃股價有呢個現象,正正反映咗和黃sell新3嘅難處。如果大家問自己:「究竟3係乜?」大家可能回答:「Crap that I don't use」(一堆我唔用嘅廢物)。如果我同你講上個禮拜和黃sell新3嘅event裏面,和黃邀請咗一大堆「至潮」高科技公司嘅高層,講解新3可以做啲 乜,我相信大家會同我講:「More crap that I don't use」(更大堆我唔用嘅廢物)。所以,和黃sell新3第一件要做嘅事係──唔好再用function同application(功能)去sell 3。

點 解?因為當今世上個個人都識用互聯網,再簡單啲講,大家唔會見到日日企街班網上行同有線寬頻sales,同你講上網可以做啲乜。用同一邏輯,和黃從今開始 每一次講3,只可以講3可以提供嘅寬頻速度,淨係講究竟有1.5M,3M等等。消費者一聽到寬頻速度,就會自己對號入座,無需要再多解釋。和黃從今亦毋須 嘥心機時間,再諗提供啲乜嘢功能畀用戶,因為互聯網自發明之後,點樣用都係「自發秩序」。如果當年發明world wide web嘅人,好似和黃以前對3一樣run,今時今日嘅web都仲係被人用來交換大學論文。扮思哲兄,請科技公司嘅高層來講synergy,不但只係tired直 情係expired。

最後,和黃將3反璞歸真之後,一定要rebrand,橫掂場革命叫X-series,3亦應該改名叫「X3」。有如漫畫書中嘅X- Men,X3可以代表3已經經過基因突變。到時候,可能連股市都會重新畀面和黃嘅3。

Thursday, November 23, 2006

點解一注獨贏買和黃

噚日,孫柏文寫咗篇題目為《一注獨贏買和黃》嘅文章。係fan屎都知道,孫柏文一出「一注獨贏」呢四個字,就等如我要為大家提供一個投資建議。

孫柏文噚 日亦應承大家,今日繼續分析點解要買和黃,而因為市場覺得3G有好大機會拖垮和黃,所以我今日會繼續講和黃3G不但有救,仲會大紅大紫嘅原因。首先,和黃 完全拋棄以前嘅經營模式,來咗場文化大革命,佢哋高姿態話會畀用戶使用skype同instant messaging,即係互聯網電話同互聯網短訊,亦無論用戶用幾多或者幾少,和黃都唔會再干涉,或嘗試收取費用。試問,當今世上電訊界中,有乜嘢比起打 電話voice同短訊sms更加「不可侵犯」、「神聖」,今次和黃揮刀斬呢兩隻「神牛」holy cows,已經足以證明佢哋卒之明白3G點樣先可以吸引用戶。

3G=PC anywhere

簡 單來說,和黃嘅3G就會同大家熟悉嘅網上行、有線同香港寬頻服務一模一樣,唯一分別就係3G冇線。大家買上述三間公司嘅寬頻服務時,只會問一句寬頻服務有 幾快?3M?6M?100M?絕對唔會接受佢哋強迫大家每一次上網做嘢、睇嘢、玩嘢要額外畀錢,如果有,大家一定會同寬頻供應商講:「你賣條線畀我,我點 用關你乜事?」問題就係呢個非常簡單嘅邏輯,啲流動電訊供應商係完全唔明!所以先至輸咗咁多百億。和黃卒之明白,仲唔係入市時機?仲有,如果他朝和黃嘅 3G寬頻服務,可以好似今時今日嘅流動電話服務,開始完全取代固網寬頻,英國、意大利嘅固網寬頻仲唔死?

不過,和黃今次不但想做寬頻服務供應商,佢哋話到 明今次改革,要達到用戶只需要付出一個固定價,可以感受到Your PC where you are嘅經驗。即係點解?簡單來說,大家坐喺電腦面前,有時個鍵盤、滑鼠、螢光幕等等離開個電腦太遠,所以會買一條延長線加長鍵盤、滑鼠等嘅接駁線。例 如,有人怕自己部電腦太嘈,想將部電腦放喺隔籬房,只要買幾條伸長線就可以。和黃3G想做到嘅係變成一條「終極」延長線,只要你可以搵到一部手提裝置,可 以複製鍵盤、滑鼠、螢光幕、耳筒、咪等等嘅功能,你就可以隨時隨地、隔山隔海咁用自己部電腦。真係PC anywhere,重要全部一個固定價就可以!聽日同大家再分析,和黃點樣可以sell盡啲。

Wednesday, November 22, 2006

一注獨贏買和黃

噚日,孫柏文約 咗朋友去睇醫生,因為個朋友有「睇醫生恐懼症」。點知,皆因前晚小弟食咗太多咳藥水同感冒藥,所以起身嘅時候已經過咗約定嘅時間。又撞正我嘅手機收短訊信 箱已經爆滿,所以收唔到朋友send過嚟話「不要來,已走了」嘅短訊。我就喺呢個情況之下,落咗街搭的士去搵個朋友,上車前就買咗份《蘋果日報》,一路搭 車一路睇。

點知,正當我開始睇財經版《金手指》上 面,尹思哲兄嘅《案內人隨筆》專欄,我就大嗌出嚟,因為經過鏟除了多餘嘅短訊,我卒之收到朋友send過嚟叫我唔好搵佢嘅短訊。我嘅叫聲大得連司機先生都 投訴差點兒撞車,我亦答應不再大叫,當時我最擔心嘅當然係個朋友冇睇醫生會唔會出事,不過打電話畀個朋友,佢又唔肯聽。而我又諗,如果今日都冇能力陪個朋 友睇醫生,他朝如果我有老婆,而佢話「生得」,我衷心明白點解會有人擔心我無能力盡老公嘅責任。心情真係既感擔心,又感失敗,淚在心裏流。我亦繼續睇報 紙,希望用文字麻醉自己。

經過數分鐘之後,我睇完 《案內人隨筆》,我又再一次大嗌。無他嘅,因為噚日題為「李嘉誠頭馬終於夢醒」嘅文章中,思哲兄居然「打倒昨日的我」,高姿態話和黃3G嘅新搞作X- Series會好勁,話和黃開始咗一場「改寫全球電訊歷史的革命」。思哲兄一路以來都係我鬧啲「古老石化電訊公司」嘅最佳戰友,而和黃就3G嘅經營模式就 係最典型嘅電訊公司經營模式,今次思哲兄挺和黃,我真係好驚訝。一日之內,兩次打擊,淚又再心裏流。

返 回公司,我第一時間打開思哲兄講過嘅xseries.three.com/webcast。睇完,我只得三個字,就係「Ho」、「Lee」、 「Shit」。我同大家講,和黃差唔多完全拋棄以前嘅經營模式,卒之明白自己賣嘅係「無線寬頻上網服務」,而唔係voice、data、 proprietary services之類之類嘅「無端端將上網服務分類」冇價值嘅「增值服務」。今次,和黃真係誠懇咁嘗試去貫徹,孫柏文講到自己都覺得悶嘅Everything on Internet Protocol (EOIP)理念。


和 黃將唔會理消費者如何上網,鍾意上網打免費長途電話得,鍾意上網睇電視又得,鍾意上網打機都得。只需要你畀上網費,消費者上咗網之後做任何嘢,和黃都不會 再干涉,或嘗試收取費用。和黃卒之面對現實,有如我喺6月30日嘅《金手指》裏面講過,知道冇人用3G上網嘅原因係因為供應商提供嘅服務亦都冇用,大家自 然就會搵其他方法上網。市場已經對和黃3G完全絕望,覺得會變賣資產去繼續流血,今次和黃3G不但有救,仲會大紅大紫,和黃一定會大升特升。所以,孫柏文今日呼籲大家要「一注獨贏買和黃」!聽日同大家再分析,和黃點樣可以去盡啲。










To Frank Sixt, CFO Hutchison Whampoa 0013.HK

Well Done... Well Done... You're my hero!!!~~~*&**~~~


推介一隻升一倍嘅股票

噚日,東亞地區股市都卒之肯聽孫柏文嘅話,大力推低啲倚靠出口商品去花旗國嘅公司股價。我哋特區出口商中嘅表表者,當然係494利豐,股價跌3.6%。我都曾經多次講過,花旗國樓市爆煲,一定會嚴重影響花旗國整體經濟表現,如果消費者「投降」,出口商仲唔大鑊?

大 家可能會問:「除咗嗰啲出口商之外,仲有冇其他股票因為擔心花旗國經濟表現會逆轉,所以出現下跌壓力?」當然有,就係呢排差不多冇人信會再一次上升嘅原材 料。跌得最「甘」就係原材料龍頭──石油,已經由英國石油公司BP喺阿拉斯加出事時候嘅79.86美元一桶石油,跌至噚日嘅58美元。

花 旗國人淨係用嚟開車嘅石油,每日1000萬桶,佔全球每日石油生產量嘅1/8,如果花旗國經濟唔好,花旗國人開車少咗、用少咗油,而其他地方經濟增長、石 油需求增長速度不能彌補花旗國需求量減少,油價就會下跌。大家都知道花旗國經濟表現會唔好,不過原材料會否繼續下跌,呢個問題嘅關鍵在於其他地方經濟增長 可不可以彌補花旗國需求量減少。

仲有就係各大中央銀行(特別係日本),眼見花旗國消費者「投降」,會有甚麼政策配套。喺日本,大家覺得佢哋嘅中央銀行會否加息?還是繼續開動印鈔票嘅印刷機,繼續令銀紙氾濫?孫柏文覺得,今時今日最有趣嘅原材料就一定係銅copper。上個禮拜,銅價跌穿200日平均線(圖2),好多倚靠技術分析去決定入市時機嘅原材料好友,都好鍾意喺呢啲機會入市。

江西銅可見16元

大 家不妨留意銅價可不可以重返升軌,好似上一次05年5月,銅價跌穿200日平均線,不過兩個禮拜之後重返升軌,市場確定升軌繼續,銅價就一支箭咁升(圖 1)。當然,我唔會咁貪心希望銅價再一次呈現同樣嘅升幅。我只希望銅價可以維持喺呢個水平,因為睇358江西銅業由7月至10月嘅第三季業績,只要銅價維 持喺呢個水平,佢哋可以三個月就賺0.518人民幣一股。即係話每年每股盈利達到2元一股。如果江銅可以喺呢個情況之下,有八倍嘅市盈率,即係話股價就會 16元一股。噚日收市,江銅股價就係8.1元一股。

大家最緊要留意,喺花旗國禮拜五時間收市嘅銅價,能否重返200日平均線之上,只要市場確定升軌繼續,江銅股價就會爆炸性咁上。到時,孫柏文當然會提吓大家。




樓市爆煲搵人祭旗

輸錢,當然冇人想,不過真係發生喺你身上嘅時候,你會點?我相信作為《金手指》嘅fan屎,輸錢時就當然想知道點輸,同埋點解會輸,學得到教訓之後就盡量不要重蹈覆轍。大家可能覺得,檢討自己做過嘅錯誤投資決定,當輸錢係「交學費」,係一啲「阿媽係女人」嘅大眾智慧,孫柏文講嚟都係浪費時間,呃稿費。

雖 然,我都承認對於我哋特區一眾身經百戰嘅投資者嚟講,輸錢時「檢討自己做過嘅決定」真係冇乜出奇。不過,對於遠在花旗國嘅投資者嚟講,佢哋輸錢嘅時候,就 好鍾意賴人。輸錢唔係因為自己錯,一定係有人「呃」佢哋。而亦會有信奉機會主義嘅政客,好合作咁交人出來,為投資者錯誤嘅決定祭旗。最明顯嘅例子,就係科 網股時代嘅一班分析員同埋被「屈」入獄嘅Martha Stewart。

不 過,上一次個泡沫,都係啲好多人都唔明白嘅高科技同business model,真係有買呢類股票嘅投資者,頂籠打垮一兩間好似Arthur Anderson嘅企業,同埋會要求通過一兩條好似Sarbox嘅法例。我相信好快,大家就會見到一啲「拉人」、祭旗嘅行動,令上述科網現象有如在中學見 訓導主任一樣般小事。

大 家可能會問:「係唔係花旗國樓市爆煲衍生出來嘅後遺症呢?」係。地產發展商、經紀、估值測量師,通通都有動機希望你「不負責任」咁買樓,呢個就算我哋特區 都係一樣,因為一賣咗樓佢哋個個就袋袋平安。不過,同我哋唔同嘅係,花旗國放債嘅一班人都唔需要你「負責任」咁買樓。大家可能會問:「放債人唔需要你抱着 一個負責任嘅態度去借錢買樓?到時還唔起錢咁點算?」

問 得好!問題就出在這裏,以前做樓宇按揭,花旗國放債嗰班人要承受債仔還唔起錢嘅風險,不過,因為花旗國政府希望分散風險,所以令到決定放唔放債嘅一班人, 由要承受風險嘅債主,變成冇需要承受風險嘅「按揭經紀」。只要有測量師話層樓值,放債嘅人就會借錢。樓市冇大變動,或者欣欣向榮,做錯按揭嘅風險亦唔高, 不過如果大跌市,好多借錢買樓嘅人就會面對輸清光、要破產嘅情況。

喺 花旗國賭股票輸清光破產,係毋須將自己自住物業變賣去還債,不過因買樓而破產嘅人,就會變成無家可歸,甚至乎會露宿街頭。到時候,花旗國裏面好似 Eliot Spitzer嘅政客,就會瘋狂「拉人」去祭旗,政府亦因為想「防止」同樣炒樓輸清光嘅情況出現,立法粗暴干預樓宇市場運作。為大家打個比喻,如果97年 至到03年嘅特區樓市表現喺花旗國發生,所有大地產商可能已經被國有化,測量師行中的分析員已經鋃鐺入獄。所有喺公開場合或私人聚會講過樓市會升嘅政客, 都會被轟下台,而嗰啲公開場合話樓市會升,不過私低下話樓唔好買嘅政客?大家自己諗吓,佢哋嘅收場會點。

Milton Friedman R.I.P - 佛老精神長存

I still remember when I first read the book Free to Choose. In it, Milton Friedman used us, the people of Hong Kong, to demonstrate a fail-safe method of improving the standards of living right across society, especially the most needy. Providing a beacon of hope to the desperate and a beacon of direction for government officials who are lost.

Our way of life here or more importantly, the way of life of our earlier generations in Hong Kong, the simple act of making a living under unbridled competition not only within, but with the world, has made everyone here a hero in my mind. I am proud to be, to live as a breathing example of what can, and will happen, if only the right policy choices are made.

For those who say "he will be missed", all I can say is that I already miss him.

所有從未經歷過連飯都沒得吃年代的香港年輕一輩,如要明白年長一代,當年日日返工放工,默默耕耘,到底有何偉大,只需要閱讀佛利民的著作《Free to Choose》,看看香港經濟是怎麼成功起來的。

上一代香港人偉大的理由,不但是因製造了一個經濟神話令香港現在一輩毋須擔心極貧飢餓,而是能證實給全世界所有人看,一個極貧的社會,是絕對有一種萬試萬靈的脫貧方法。

如果沒有一個像佛利民的人來解釋香港人成功的原因的話,相信今天世界上被貧困所煎熬的人會更多。

逃離李國章魔爪?移民澳門

噚日,澳門特首何厚鏵發表2007年度施政報告。有留意澳門嘅朋友,都知佢哋主流意見覺得面對最大嘅問題,應該係失業。不過長遠來講唔算係問題,反而係如何提升勞工質素,等到如果可以做到就算一夜之間澳門冇咗博彩說,未來嘅主人翁──兒童都唔會餓死。

而 想做到又有呢樣效果,澳門政府一定要大力推動教育。不過因為缺乏教育嘅供應,如果將教育投資局限一定要喺境內,嗰筆投資教育嘅資金,就唔可能發揮得到。所 以我相信,澳門政府遲早都會將啲學生送出外國讀書。澳門政府應該大力捐錢畀外國一流學府,當係為澳門學生「買位」。試想想,如果可以每年喺全球100大學 府買100個位,咁就已經每年送10000個學生出外國讀書,成績遲早有目共睹。

當然,如果澳門真係推出呢個政策,孫柏文相 信,好多香港有適齡兒童嘅父母,都可能移民過去,因為可以逃離李國章嘅魔爪。我亦唔會怪責嗰啲父母,因為李國章就算搞學券制,都要搞個「保障官僚控制權」 為首要考慮嘅A貨學券制。講起「A貨學券制」呢個名詞,我相信,都應該係(我有時都寫嘅)《蘋果批》宋漢生發明同發揚光大嘅。我見佢發明新名詞,都幾好 玩,所以今日我都想coin個新字,叫做「youtubable」。呢個字嘅解釋,就係用來形容一段可拍攝,引人入勝嘅事件,例如有個搭巴士嘅叔叔鬧個後 生仔乘客。

噚 日早上十點幾,中國人壽突然宣布停牌,H股指數亦因投資者恐防中資股出現配股潮,突然大幅下跌。不過數分鐘之後,H股指數大幅反彈,不單止收復失地,收市 時仲要升。如果當時個幾分鐘,你喺銀行排隊等候服務,最理想就係可以拍攝到當時在股票機嘅人啲反應。「國壽停牌啊!」、「H股指數大跌啊!」、「冇啦!冇 啦!放晒啲股票啊!」、「大反彈啊!冇晒貨啊!」孫柏文只得一句說話:「This is oh-so-youtubable!」Oh yeah。

Thursday, November 16, 2006

不要再鬧勾地機制吧!

今日,孫柏文首先想同大家講吓特區政府賣地嘅機制。政府作為特區大地主,喺提供新住宅樓宇方面,有多個途徑發放地皮,例如,免費提供地皮畀房委會起公屋,又或者賣地畀私人發展商起樓。而相信大家都知道今時今日,政府賣地畀發展商係用一個叫做「勾地」嘅機制。

不 過講「勾地」機制之前,我想同大家快速回顧以前政府點樣決定賣地,特別係點樣決定賣幾多地。由1984年中英聯合聲明簽署至到97年特區被解放嘅13年, 因為聯合聲明當中硬性規定每年只可以售賣50公頃土地,所以香港政府亦毋須自己煩點樣決定賣幾多地。到特首董建華上台之後,因為推出「八萬五」政策成功 「冷卻」樓市,所以就算特區政府決定賣幾多地都好,發展商都唔會買。

最 後因政府用最嚴肅姿態,最遺憾態度,好得體咁「宣布」冇咗八萬五,所以政府又要重新諗吓點樣決定賣幾多地。政府知道97年前後硬性規定賣地數量或者賣樓數 量,一旦同市場需求有分歧,就會出現價格大幅波動。例如97年前賣得太少,樓市就出現泡沫,97年後賣得太多,就出現大跌市。所以政府為求唔想再做上帝, 獨斷決定供應,就推出「勾地」嘅機制,希望用市場機制去決定土地供應。

「勾地」基本上係需求主導供應,政府提供一籃子土地,設一個唔公開嘅最低賣價,如果發展商估計市民有需求,就攞嚿錢去問政府攞地。如果嚿錢比起政府嘅最低賣價高,政府就會攞塊地皮出來拍賣。其實,孫柏文覺得「勾地」機制,係一項97年後政府極少有「有經過大腦」,能夠運用基本經濟學去達到市場機制去決定供應嘅政策。令到唔會因供應同需求有分歧,而引至到價格出現大幅波動。

不 過,發展商多年來都投訴「勾地」機制「有好多問題」,其中投訴最多嘅係勾地「好難」。大家可能會話:「機制就係特登設計到要有某程度嘅需求,先至可以勾 地,如果發展商勾唔到地,只係代表需求不足。如果喺呢個情況之下都有地賣,就會推翻『勾地』嘅原意。」同意。不過,我相信天才橫溢、人才濟濟嘅地產發展 界,都深深明白呢個道理。

大家可能會問:「如果佢哋咁叻,點解又會話勾地好難?」其實,應該話發展商覺得勾地唔係「好難」,而係「好煩」。因為就算好似孫柏文咁 叻嘅人,都會睇錯,所以正當發展商低估咗政府所需嘅底價,而要再重新申請勾地,真係「好煩」。佢哋鬧「勾地」機制,我係絕對可以明白嘅。最後如果大家讀經 濟學嘅朋友有留意,政府嘅「自定車牌」計劃,其實同「勾地」機制非常相似。亦可以解釋點解原有車牌價格未出現大幅波動。

樂隊搭沉船 Titanic vs Lusitania


睇新聞報道,電盈嘅 now TV用咗10億元去買英超聯獨家轉播權。大家都議論紛紛話有線電視,今次大件事。大家都知道孫柏文係 「互聯網打倒電視平台」嘅信徒。所以要同大家講,我覺得今次now TV同有線電視爭英超聯獨家轉播權,就有如20世紀初,橫跨大西洋嘅超級郵輪Titanic同Lusitania爭請超級樂隊上船表演,為爭取乘客一樣咁 無謂。

不 過,今次有線電視話爭取轉播權「唔合乎成本效益」,唔知道係唔係做咗《金手指》嘅fan屎。知道ppstream.com之類嘅網站點對點鼻哥 peer to peer軟件,加埋速度愈來愈快嘅寬頻網路,可以令到大家無需要訂取任何收費電視,只要有寬頻互聯網就可以睇到英超聯。到時,大家望住now TV沉沒都仲可以慨歎一句:「Well, at least the band played on.」

當時打世界盃時,孫柏文曾經預言唔會再有人肯仲用高昂嘅價錢買體育運動獨家轉播權,最起碼有線有聽我嘅說話。有線應該淡化收費電視角色,從此就真係百分之一百可以叫自己做「有線寬頻」!

睇落,末代主席李澤楷今次有如馬世民Simon Murray話齋,再一次一間好多人房裏面,留下一個手榴彈,將安全針拔出,然後離開間房,等留房裏面人「興奮一番」。哈、哈!

Wednesday, November 15, 2006

李澤楷應該上Oprah

呢排,我哋特區各大報章嘅財經版,都一路有報道關於電訊盈科PCCW大股東賣股嘅新聞。首先,孫柏文想問大家,究竟仲有乜嘢古仔比電盈更yesterday、更out?講真嗰句,我哋特區市民同股民對電盈呢間公司啲古仔已經聽到好攰,可以話筋疲力盡。

邊 個邊個賣盤賣股?又邊個邊個走去買?買嗰陣時點樣借錢?問邊個借?慷慨借錢嘅人又有冇控制權?如果今日個買家只係一名泊車仔,「終極」買家係邊個?「終 極」買家又想點同點解買?甚至今日個買家問人借錢究竟有冇特登講大話或隱瞞真相?如果有特登講大話,點解港交所同證監會好似碌木咁?如果冇特登講大話,點 解港交所同證監會都係好似碌木咁?喺港交所同證監會返工班「千方百計、為求自保(今日同明日飯碗)」嘅人,究竟佢哋部印特權狀嘅印機刷,印到出煙未?呢啲 問題,甚至呢啲問題嘅答案,畀我哋特區市民同股民聽到,都只會擘大個口「打呵欠」。頂多學我朋友Rapiere咁問一句:「Who fxcking cares?」

因為好似班做心理輔導嘅朋友話齋,我哋特區對1186又好,對8號又仔,已經某程度上有closure,或者俗語話齋「睇得開、睇化咗」。不過講真,雖然我哋對電盈冇乜興趣,孫柏文相信我哋真係好想知,究竟李澤楷同佢老竇之間what has happened同what's going on?當然,孫柏文唔係話李澤楷欠咗我哋一個交代,因為兩父子嘅嘢,始終都係佢哋嘅嘢。

邊個仔未試過頂撞老竇

不 過,如果李澤楷當年做咁多嘢,例如攞數碼港令股民瘋狂賠上千億,原因唔係為錢,又唔係為國家做事,而係要證明畀老竇睇「一定要讀完大學先至可以出頭」呢個 conventional wisdom傳統智慧係錯,咁都最好同我哋講吓。兩父子,個仔搞啲嘢出來,事前老竇叫咗佢唔好做,個仔唔聽,最後個老竇要出來「解決」個仔根本唔覺得係 「問題」嘅「問題」。有邊個未見過?之不過今次,有成千上萬嘅人、成億上兆嘅錢,一齊同李澤楷走過路,我哋就算冇權知,都應該睇在我哋為你流過咁多眼淚嘅 份上,出嚟同我哋講。試問,一個仔特登做啲嘢去頂撞老竇,有邊個做仔嘅未試過身同感受?又試問邊個做老竇嘅唔會明白?孫柏文話, 最慘我哋特區冇好似花旗國Oprah Winfrey咁,喺電視中能善解人意、做心理輔助嘅清談節目主持人。如果有,李澤楷應該上去,真心同我哋講佢同佢老竇嘅嘢。如果到時李澤楷有需要,等 Oprah可以攬實佢講一句:「Richard,it took courage to tell us what you told us today。If you want to let it out,let it out...」

Tuesday, November 14, 2006

Powell's Doctrine

Ok, it is obvious now that in order for this to be a Bilingual blog, I need to have more posts in English. So here's one.

There are two principles in military warfare that are attributable to Colin Powell, ex general, ex Secretary of State of the US. Together, they are called the "Powell's Doctrine"

When planning to use military force

1. Always have an exit strategy

2. Always engage with overwhelming force

Here's an example of principle #2

















Dicewar rocks! try it. (you might have to click "reload" on your explorer for it to load properly)
But be warned... It is Addictive... I have known many a good productive men, reduced to being just good men.

http://www.games1.org/games/dicewars.swf

八折的士 VS 加十蚊叫車

噚日,孫柏文有機會約埋一班對公共政策有興趣嘅人,同一位的士業界朋友食飯,聽吓問吓關於的士業近期嘅動向。約我食飯嘅人都知道,因為我多數時間個口會用嚟進食,所以剩落嚟講嘢嘅時間比較少。所以每次遇到任何業界朋友,都會細心從一大堆問題中,挑選一兩條比較重要嘅去問。

今 次食飯,我原先都係諗住問關於的士後座乘客車門「Auto door」自動開關門系統,會否因乘客自己開關,而令系統受破壞。我想問呢個問題嘅原因,係因自己多年來見過一連串嘅事所引致。事緣於1997年暑假,當 時有位日本籍大學同學來港,想同我哋港人一齊慶祝共產黨解放香港。我呢位同學雖然係航天工程學系嘅頂尖學生,不過因為雙眼生得比較笨拙,所以周不時都會有 人覺得佢IQ唔高。

佢嚟到香港之後,我老竇就請佢 食上海菜,一路食老竇就一路用廣東話同我話:「個日本仔個樣真係好似好鈍咁。」老竇一路咁講我當然一路咁駁嘴。食完之後,我哋就上的士返歸,順便送個日本 同學返酒店。我記得好清楚,個日本同學最後上車,不過上車之後就冇好似我哋香港人一樣,用手拉埋度門,佢就咁坐喺度,老竇同我就望住度未關嘅門。正當佢呆 坐嘅時候,我老竇就用廣東話問我:「條友真係唔蠢?」後來,我問個日本同學點解冇拉埋度門,佢話喺日本如果的士車門貼有「Auto door」標記,乘客就唔可以自己開門或關門,要由司機操作。

時代廣場經濟學怪現象

最近,孫柏文有 機會去日本出席嗰位同學嘅婚禮,亦有機會搭日本的士。我當然把握機會問個司機關於開門關門嘅習慣,根據司機嘅答案,原來乘客用手開關門,會「搞壞」自動開 關門系統。不過,有與其他交通工具嘅駕駛員,例如航空飛機師一樣,我知道佢哋大話連篇,專呃乘客,所以今次一定要問呢位的士業界朋友。

點知,話題一路圍繞 住香港出現大量「八折收費」的士呢個問題。呢位業界朋友覺得「八折」的士最大嘅問題,就係令到最肯付出高昂的士費用嘅長途客,可以用比較低廉嘅價錢去到目 的地,令到總體的士司機收入下降。第二就係,收取「八折車費」本身屬於議價活動,係違法行為,因為政府冇打擊違法嘅司機,令奉公守法嘅司機完全冇機會做長 途客生意,做到會有「違法有着數」嘅情況出現。

首先,我覺得香港交通政策最終目的係令香港人可以最快、最有效率咁由A點去到B點。每一次見到有人冇車 shortage或有車冇人surplus嘅情況出現,都係一定因價格出現問題。其實,最好就係的士車費可以有彈性,第一步就係將現有自發出來嘅議價活動 非刑事化。例如「八折收費」的士,打電話上call台話「加30蚊」叫的士同樣唔再違法。記得以前過海收單程都係違法,今日合法化之後都冇問題啦!最起碼 冇理由肯付幾百元嘅人,喺中環放工嘅時間冇車。

不過最後,我想同大家講一個車龍人龍同時出現嘅怪情況。如果大家有留意喺時代廣場,好多時候都會出現大量的 士同乘客同時間排隊,根據經濟學有需求demand、有供應supply都冇成交no transactions就多數係有政府介入令到冇成交或者成交速度好慢。大家唔信可以去時代廣場睇吓?

Monday, November 13, 2006

見頂訊號在此尋


見頂訊號在此尋

上個禮拜,孫柏文同大家講過關於「泡沫」呢個詞,幾時開始同點解會被人用來形容,一樣去到被瘋狂炒賣投資項目。事源於1720年前宗主國,當時有一間叫做South Sea Company公司,因財技同有卓越塑造特權能力,幾個月之內股價有以倍計升幅。

睇番當年,South Sea Company股價見頂一刻,其實係可以從睇投機熱錢湧入湧出來判定。其實自古至今,好多時要知道一個泡沫見頂一刻,真係從睇投機熱錢走勢就可以。例如,17世紀鬱金香狂熱tulip mania,見頂一刻都係因為當時荷蘭政府頒佈話鬱金香花唔係一樣「投資項目」,而係一樣「消費品」,所以命令所有銀行要立刻停止借錢畀人買鬱金香。「錢源」一斷,泡沫亦爆煲。

又或者睇番千禧年花旗國科技股。當年,因花旗國中央銀行聯儲局,擔心電腦會有千年蟲現象出現,繼而影響經濟表現,所以將大量現金推入銀行體系裏面。最重要係,電腦千年蟲現象唔係只限於99年12月31號變成00年1月1號一刻咁簡單,根據當年研究,世界各國電腦系統係要去到過3月之後,先至算完全過危險期。

所以聯儲局不斷推現金入銀行體系動作,就一直做到3月先至停,3月之後就開始抽錢走,而代表美國花旗股納斯達克指數,亦係3月5000點見頂。如果大家再細心留意,其實當年由1月至3月,納指由4000點升至5000點,新進入市熱錢量,就相等於當時同一時間聯儲局推入銀行體系現金數量一樣。

今時今日,大家如果要估個股市幾時見頂,就不如留意熱錢同資金究竟有冇流走。首先,最緊要睇下世界各國中央銀行有冇抽錢走,特別係花旗國同日本中央銀行。因為,聯儲局由3、4月開始到現在都冇增加熱錢數量表現穩定,所以最緊要睇日本點做。如果全球投機者覺得日本會抽錢走,大家就會見到好似今年4、5月日圓短時間之內有大升幅。

不過,就算投機者覺得日本會抽錢走,佢都會順次序去賣,要賣晒手頭上「難貨」,跟住睇定先,如果有需要至賣「好」。好似我特區股市5月下跌,發生時間日圓升浪之後,代表特區股市係國際投機者「好唔情願」之下賣股。不過,例如冰島股市2月已經開始下跌。咁冰島股市到現在11月已經升番好多,今次估特區股市幾時見頂絕對可以用番好似冰島股市呢類「難貨」股市去作警號。

Thursday, November 09, 2006

「有智慧不如趁勢!」


泡沫,泡沫。孫柏文相信大家都聽過有人用過呢個詞,去形容某一樣投資項目投機成分去到瘋狂階段。究竟點解人會用「泡沫」呢個詞,去形容瘋狂炒賣活動?其實,人類第一次用「泡沫」去形容瘋狂炒賣,係去形容一間成功塑造同政府有千絲萬縷關係,繼而令人相信有特權,透過頂尖財技將股價翻十翻,不過最後股價狂瀉公司。大家可能會問:「泡沫呢個詞,好似盈科數碼動力出現之前已經有,孫柏文你有冇搞錯?」你估盈科係第一間公司依靠塑造「有特權」形象、財技等等手法,令股民如痴如醉咁將股價炒起,跟住夢碎後股價狂瀉咩?

1720年前宗主國,有一間叫做South Sea Company公司。首先,呢間公司成功奪得英皇御准專利權,壟斷經營由非洲運往西班牙控制南美洲新大陸奴隸貿易業務。跟住大玩財技,進行多次股債重組,仲要大派認股証畀國會議員、政府高官、王室成員令全國權力核心從公司股價上升得到利益。公司當然仲有咁大力得咁大力去煲大南美洲潛能,話商機無限,又叫財經口水佬同分析員計天文數字出來。最後,仲要撞正法國都有一個叫做John Law人成功炒起「新大陸」概念,令前宗主國股民更加相信South Sea會賺大錢。就係咁,South Sea股價由1月128英鎊炒到7月超過1000英鎊一股。

不過最後醜婦都終需見家翁,South Sea股價開始狂瀉,1720年12月股價淨番150英鎊一股。當時有一個評論員則曾經講過:「South Sea股價有如南方海洋上的泡沫一樣,一篤即破。」因為South Sea泡沫出現於1720年,所以早一百年鬱金香狂熱tulip mania,都係叫做「狂熱」。

今日同大家分享呢個故事,係因為今時今日恆生指數19000點高位,孫柏文覺得係一個不折不扣泡沫。不過有如South Sea Company股價一樣,如果你1720年6月,股價800英鎊一股時候問我:「你估仲有冇得升?」我會話:「有。」不過如果你再問我:「究竟抵唔抵買?」我就一定回答:「絕對唔抵買。」不過我相信,就算你絕對唔抵買都好,都可能因為仲信有得升而入市,呢個就係人類本性當中貪念。

呢幾日來,孫柏文都有話過恆指上二萬點,提供過班大鱷點解會將中移動炒上80元一股,最後仲要話上二萬點動力會來自地產股。有人話孫柏文咁高都仲要話有得升會害人,雖然我明白人個個都可能因貪念而「出事」,不過孫柏文絕對對讀者有信心,能控制貪念,而不致於引火自焚。之不過如果要問我:「你估仲有冇得升?」我就答:「有。」

如果大家有讀晒《蘋果日報》財經版所有專欄,相信大家都會覺得除《金手指》一欄之外,好多個欄都充滿智慧。而1720年前宗主國,相信最有智慧人就肯定係牛頓Sir Isaac Newton。佢South Sea一役當中都輸二萬英鎊,令佢當年都慨嘆一句:「我能預測星體運行,不過對人類瘋狂就毫無頭緒。」所以好似《信報》曹仁超先生話齋:「有智慧不如趁勢!」

Wednesday, November 08, 2006

淡友吹配股 Smells like Desperation


孫柏文因呢排玩得太緊要,患上感冒病,所以尋日食完晏晝就曠工去睇醫生。點知,正當我候診室等醫生,大約下午3時45分時候,電話突然響起收到短信鈴聲。我當然第一時間睇下又有邊個靚女send短信畀我,點知一睇短信我就「嗎」聲四起。原來係我一個男性舊同學send短信畀我,要我知道恆指由升二百點變成倒跌,我睇到呢就第一時間問自己:「唔係嗎?我先至同全世界話恆指好快會上二萬點,今次仲唔畀孫柏文畀被人叫做山埃組組長?今次仲唔大鑊嗎?」

我一睇完個短信就即刻想打電話俾湊女忙碌《利字當頭》一欄總舵主利世民兄,問下佢發生乜事。點知電話未接通,姑娘已經叫我入去見醫生。入到房,醫生就開始問我關於患病,一路問就一路量血壓,點知,佢一睇到我血壓就即刻靜下來。經過無聲片刻,一個足夠令我思量「自己係唔係死得」時間之後,醫生祇係個句:「你血壓好似好高,係唔係工作有壓力?」原先我想答:「醫生…今晚我開電腦上網,就會見到成千上萬網友話我係山埃組組長,試問點會冇壓力?」

不過為求可以盡快打電話俾利世民,我答:「醫生…香港地打工,你話呢?」醫生聽我說話之後,就將一個好似係冰箱出來聽筒,壓向我心口,我當堂「精神一陣」。經過呢個半SM動作之後,我就乖乖地完成睇醫生程序。跟住就打電話俾利世民。

電話一接通,我都未開聲,利世民就好似見到來電顯示咁,破口大罵:「孫柏文!你知唔知道班想跌市淡友係到講乜?佢係到傳中移動941會配股!搞到個市由升二百點差變成倒跌。」原來傳配股,唔怪之得個市差倒跌。

我第一時間安撫佢話:「今年已經係第八次有人傳中移動會配股,結果最終股價大家都有目共睹。我今日要用番上次形容澳搏送叉燒飯,去迎戰永利賭場開幕一句說話,就係今次淡友吹中移動配股去做低個市,Smells like Desperation。」

最後,就算中移動真係配股又點?中移動始終都係國企,05年9月中石油都係公司現金非常充裕情況之下配股,結過9個月之內升50%。上次配股都照升,今次仲係傳言,唔通中移動真係好快到$80?

Tuesday, November 07, 2006

恒指上二萬 靠乜股

今日,花旗國就會舉行國會Congress選舉,選出新一批參眾議員。首 先,任期長兩年嘅眾議院House,全體議員都要每兩年面對選舉嘅洗禮,而參議院Senate,議員任期就長6年,而每兩年只有三分一嘅議員任期屆滿要再 面對選舉。大家可能會問:「點解眾議員House Representatives嘅任期會咁短,仲要每兩年全體選舉,好似選得好密同分分鐘會大換班?點解參議員一做就做6年,而每次選舉都只可以最多換三 分一嘅議員?」

其實,花旗國班國父 founding fathers,知道政府強權唔可以亂用,而班國父又知道喺司法、行政、立法互相獨立制衡嘅機制之下,可以改變寫憲法嘅立法機關,最終會有最大權力,所以 將立法機關一分為二,在立法機關當中製造兩個互相制衡嘅議院。而兩個議院要產生制衡作用,就一定要由兩種非常唔同嘅代表組成。

班國父希望見到第一類嘅代表,可以「好貼市」咁爭取市民訴求,市民要求有幾激進,呢類代表就會有幾激進,亦應該充滿「後生仔」嘅衝勁。所以班國父就成立眾議院,將議員任期定為短短兩年,要佢哋經常受到選舉洗禮,令到佢哋總體上一定要走在民意最尖端先至可以喺選舉中勝出。

相 反,班國父希望見到第二類嘅代表,可以保持一個保守嘅態度,去審慎考慮,甚至抗拒有絕大多數市民支持不過好激進嘅要求。呢類代表應該充滿「老人家」嘅智 慧,議院亦喺有民意基礎之下最好盡量保守,盡量穩定。所以班國父就成立參議院,將議員任期定為6年長,而每兩年最多換三分一嘅議員。

大 家可能會問:「有呢兩個議院,佢哋點樣互相制衡令到只有好嘅法例被通過?」大家試想想,要通過一條法例,既要有走在民意最尖端嘅「後生仔」支持,又要有要 求平穩、安定嘅「老人家」贊成,所以都會比單議院困難好多。如果一條法例真係可以過到呢兩關,都應該某程度上係一條好法例。

其 實,我哋特區都東施效顰,立法會議員啲私人草案要通過都係要有過半數直選(代表民意最尖端?)議員同過半數「畸」選(代表審慎智慧?What?)議員支 持,先至可通過。不過,我哋特區學人學得最肉酸、無能嘅地方,就係政府本身提出法案冇需要經過兩重考驗,所以先至一次又一次通過垃圾法例,或者有機會推出 對經濟有強大破壞力嘅八萬五。仲有,班「畸」選議員完全冇民意基礎,所以每次扮演「老人家」角色嘅時候,就會被批評為擦鞋仔、保皇黨。不過,孫柏文講咁多都很冇用,政改喺特區有如我哋班財經口水佬話齋「候突破技術阻力位」。

噚日,滙豐同中銀都相繼減息,今次股票升浪亦正式踏入全民皆股、瘋狂階段,因為今次就連地產股都升,恒指亦冇需要再被人稱為「中移指數」。連孫柏文呢 個大淡友,都要喺我嘅熊熊頭上戴兩隻牛角,扮公牛,而現在上升速度2萬點好快就會到,相信我都係第一個睇2萬點。

今次地產股升,除咗有減息支持之外,其實 特區啲豪宅價錢已經超過97年最高位。金管局總裁任志剛出來話銀行要堅守審慎政策,對風險管理不能鬆懈,所以要銀行堅持最多可以借按揭七成嘅錢。不過,孫柏文即刻要問:「七成按揭唔係用來打擊炒家嗎?點解無端端會用來做銀行風險管理?孫柏文今日儲唔到錢做首期,難圓置業夢,就係為咗班億萬富豪銀行家?」

Friday, November 03, 2006

熱錢將中移動當Google咁炒

近個月來,恆生指數屢創新高,冇跟開股市朋友可能會覺得一片歌舞昇平。不過,孫柏文相信好多金手指fan屎同我一樣,都係對「恆指屢創新高」呢個現象充滿戒心。無他,股市升浪要畀到人信心係一個不折不扣大牛市,最緊要係市場裏面乜股都升,不過睇番我特區恆生指數,升來升去都係得幾隻股票帶動恆指創新高。呢得幾隻股票帶動升浪,番鬼佬會形容為「poor market internals」,即係我特區股民叫「虛火」。

不過無辦法,雖然我一路以來對後市睇得非常淡,幾個月前叫大家賭跌市、買熊証,仲要有以身作則同大家一齊呢場升浪當中被「殺」(被「殺」方法就係恆指升到熊証「強行回收價」,所以令熊証一個遠比入市價底價位被回收),不過因為個市都仲係繼續升,所以今日我都要同大家解釋下恆指升動力點來。

到同大家講過,恆指近排屢創新高,都係倚靠幾隻股票。而呢幾隻股票股票當中,升得最漂亮就一定係差唔多有專利權,祖國提供流動電話服務941「中移動」。中移動升得有幾快?快到出現五年難得一見「所有買跌認沽証行使價之外」現象。大家可能會問:「點解孫柏文會話呢個現象係五年難得一見?」原因係當孫柏文同老友《利字當頭》一欄總舵主利世民兄講起呢個現象時候,佢話最後一次出現呢個情況出現,係千禧年1186盈科數碼動力。

大家可能會再問:「嘩!今次中移動唔會學千禧年盈科嗎?」要答中移動會唔會大跌呢個問題,首先要知道中移動點解會升得咁快。大家要謹記,今次中移動大升浪係靠熱錢湧入。你話佢係大鱷好,對沖基金又好,今期全球熱錢確實最鍾意炒祖國重磅股「China Large Cap」。而最好就係可以受惠於祖國經濟持續急速增長公司。因為花旗國樓市爆煲,世界經濟火車頭地位就會係祖國飾演,就連經濟學人雜誌The Economist都係咁講時候,仲唔炒起China Large Cap?

大家可能會加問:「孫柏文好成功解釋點解中移動升到60幾蚊,不過好似冇解釋點解仲可以再升到70、80蚊喎?」去到呢度,我就要同大家分享一段對答,呢段係同一個對沖基金做舊同學對答。當時同佢傾,就係05年初,佢好出力咁叫我買Google,我又好出咁叫佢買白銀。大家都知道我會點樣叫佢買白銀,所以我唔會重複,今日就同大家分享佢點樣叫我買Google。

當時Google仲係200蚊一股,佢話只要Google每年盈利增長有50%,市場就可以接受P/E 50市盈率,所以如果市盈率唔變盈利又升50%,股價就可以隨著盈利增幅升50%好快去到300蚊。跟住如果Google令到市場覺得盈利增長可以維持有50%,市場就會開始用來年估計會上升50%盈利做基礎,再乘50倍市盈率,即係將股價由300蚊進一步推到去450蚊。當時我問:「就係咁簡單?」佢話千祈唔好高估對沖基金,佢就係咁簡單決定炒乜。結果Google真係05年由200蚊升到上450蚊一股。

用同一條方程式,中移動令人相信可以每年盈利增長有20%,所以可以接受P/E 20倍市盈率。如果市場開始憧憬中移動可以06年賺$3.25(多05年20%),跟住07年賺$3.9甚至$4,到時再乘20倍市盈率,中移動就會被推到去80蚊一股。大家最後可能會問:「就係咁簡單?」有時,炒就係咁簡單。

Thursday, November 02, 2006

香港超越紐約的啟示


尋日,孫柏文聽到我特區司長許仕仁講話我特區股票市場,今年公司新上市集資金額已超越紐約。雖然唔知道許司長講呢番說話態度係點,不過而我哋特區政府一向好大喜功、為求連任「冇寶不落」心態,你話呢?哈、哈!

雖然我冇能夠解讀我特區官員態度第一手資料,不過遠在花旗國紐約,紐約市市長Bloomberg同代表紐約州參議院議員Chuck Schumer,就華爾街日報出一篇題為「拯救紐約,要學倫敦」文章講同一樣。當然,兩位代表被超越股票市場寫文,文中滲透出來態度,可以算是大家心目中司長許仕仁態度相反。

如果大家有機會睇下兩位花旗國「政治家」聯處寫文章,應該都會同我一樣覺得佢對花旗國總體金融市場憂心忡忡。無他,事實上05年,24間最大型新公司上市集資裏面,得一間公司紐約上,到今年,我特區集資金額都真係超越紐約。不過講真,司長許仕仁話我特區集資金額超越紐約,就好似一個矮仔指住一個被斬去雙腿高佬話:「哈、哈!今年我卒之高過你。」

大家可能會問:「點解孫柏文要將紐約被喻為一個被斬去雙腿高佬?」其實,花旗國人民好多時面對醜聞或重大問題時候,都會要求政府好「嚴厲」咁「做」。正當人民有這樣要求,花旗國作為一個民主社會,佢哋立法機關代表當然會「順應民意」去「做」,通過法例去希望可以杜絕醜聞再次發生。不過,好多時候花旗國立法機關通過法例,會去得太盡,形成一個「斬大脾、避沙蟲」情況。

02年,花旗國人民經過Enron突然執笠痛苦經驗洗禮之後,國會亦隨即通過一條由參議院議員Sarbanes 同眾議院議員Oxley提出,叫做Sarbanes-Oxley(簡稱為Sarbox)法例,希望可以杜絕未來再有Enron出現。Sarbox呢條法例最厲害地方,就係如果上市公司有乜風吹草動,會令到上市公司高層「Go To Jail,Do Not Pass Go,Do Not Collect $200」。

以前,上市公司年報中會計出錯,好多時候只需要從民事訴訟賠錢,就可以被擺平。不過有Sarbox之後,如果上市公司會計出錯,公司高層就要負上刑事責任,隨時會狼當入獄,刑期分分鐘長過殺人犯。有咁樣「下屬出錯、你要坐監」法例,又邊到會有公司想花旗國上市?

股票市場最終一個資金集散地,對於資金充裕人可以尋找更高回報,而需要資金人亦可集資,你情我願、你賣我買。Sarbox呢類法例,話「保護」投資者,不過因嚇怕好多企業唔上市,最終投資者選擇少,回報率都會相繼降低。最終受害者就係原先想保護一群。我特區咁樣贏人,實在太可悲!