Tuesday, June 30, 2009

上海冧樓的大贏家

周末時分,孫柏文聽新聞報道話上海有個差唔多完工嘅樓盤,突然有一棟冧咗落嚟。

好彩冧樓暫時係個別事件,如果唔係就有如73年搵到假合和(054)股票一樣,個個投資者對手上嘅貨突然充滿懷疑,唔理好醜先沽後查,最後令價格大跌。

作為一個盡責嘅傳媒工作者,我再深入調查,睇吓邊個係發展商,諗住沽爆佢嘅股票。點知睇睇吓,沽咩就未知,不過就有間公司我好想入股。

反宣傳玻璃襟用


邊間?大家睇啲冧樓相就會發現棟樓雖然瞓低,但本身都幾完整。

《東南西北》宋以朗觀察到啲玻璃都冇乜點爛。十幾層樓高跌落嚟!勁襟用!



可惜發展商唔出名,仲未搵到邊個係玻璃供應商,一查到我會即刻為大家報料。

其實,呢啲貌似壞消息嘅事件,好可能就係你隻產品最好嘅宣傳機會。

不過如果你啲PR廢(特區有好多廢柴PR)就分分鐘幫你倒米。

幾年前喺洛杉磯某路口,一個啱啱喺便利店做世界嘅持槍劫匪搶走一部停低等轉燈嘅 Land Rover。女司機被迫落車後,劫匪就高速逃離現場,同全城嘅差佬展開追逐戰。

呢啲追逐戰,久不久發生,亦係當地電視台最鍾意現場直播嘅「節目」。

當日,電視台用直升機一路直播差佬屢次失敗嘅過程,整地釘、開槍「啡」,架Land Rover得番一條胎都繼續成功避開攔截。

如果Land Rover係用啲特區典型三流PR,填鴨式訓練出嚟,唔做嘢會肚痛,實會即刻打電話畀各大傳媒,希望佢哋唔好做得「咁大」。

一流嘅PR又點?乜都唔做。

事關之後Land Rover喺洛杉磯區嘅銷量升咗4倍。

點解?差佬都要出九牛二虎之力先停到,仲唔襟用咩?

Friday, June 26, 2009

How I became a MJ fan...

5 minutes of pure magic, turned a young man many years ago into his fan.

差佬數示威人數

一般嚟講,Incentive正式譯為「誘因」,但如果你教人嗰陣真係咁譯,只會反映你冇心機。其實,孫柏文自細開始就幫啲讀經濟學嘅人補習,到o依家仲有。

我覺得譯incentive呢個字,譯得最好肯定係陶傑兄嘅「有咩鼓勵」。

咁喺眾多學生當中,有時我會教啲住喺新界,想上進嘅邊青。

我成日同佢哋講,要威、要型就要明白啲嘢點解發生,唔知就柒牌男裝(真係有咁嘅品牌)由頭着到腳。

做得邊青就會出夜街,咁住得新界又出夜街嘅就肯定熟悉小巴運作。

我問佢哋:「我跟住架綠wan喺屯門公路中線開車,見綠wan嘅時速顯示80。突然有3架紅wan喺快線閃過,用經濟學分析,點解?」佢哋每次答:「有incentive!」我就會好安慰。

前日,隔籬嘅同事高明輝突然問:「喂!你話禮拜日遊行《蘋果》數嘅人數,會唔會少過警方公佈嘅人數呢?」事實屢次證明,《蘋果》數示威人數全球最準,特別係比啲差佬準。原因係我哋資源充足,會派人企定數晒所有參與嘅人。

啲差佬就唔同,佢哋唔夠人所以如果遊行喺3:00pm開始,數到3:05pm就要調走數人數嘅同事去做其他嘢。

自己遊行點計數


點都好,用番頭先教邊青嘅例子。如果啲差佬真係為咗海嘯中加薪,自己去遊行(聽講流產咗),喺數人頭方面,一下子由綠wan變紅wan,仲唔去到盡,顯示牌嘟、嘟聲?

中國人不如洋人狗?

前日,孫柏文睇我哋壹網站,睇到條新聞短片關於兩頭由港交所(388)獨立非執董莊偉林養嘅洋狗。話莊偉林一家同佢哋兩隻金毛尋回犬行山(喺熱帶養長毛狗?仲要唔剪毛?仲要33度行山?)點知兩狗中暑,先昏迷,後升仙。

據旁述,莊偉林見狗昏迷所以報警,而政府派出飛行服務隊去拯救。唔知係咪以前做分析員嘅職業病,個腦忍唔住即刻開始計數。根據以前政府叫人唔好濫用救護車嘅 propaganda,救護車每次出動,成本要幾千蚊。

走地嘅都幾千,用直升機至少要兩萬蚊。

雖然冇吊走啲狗,亦冇降落,不過我又諗,如果吊個當值醫生落去,佢一睇到會唔會話:「頂!我醫人唔係醫狗!」

點都好,兩萬蚊呢個數不斷喺我個腦盤旋,之前旺角巴士撞小巴意外,其中一名傷者被送往伊利沙伯醫院急症室後,醫管局要佢屋企人畀兩萬銀先肯用某隻藥去救。唔通中國人不如洋人狗?

各自為政嘥資源

再睇其他媒體,先知莊偉林當時兵荒馬亂(打得999好少唔會),令救急隊誤以為有人出事。之後一知唔關人事,就收起直升機。

最後想講,當飛行服務隊以幾萬蚊成本,成功英勇救人到醫院,最怕係醫院要你畀錢先出急藥。咁可能將飛行隊用咗嘅資源嘥咗。不過冇辦法,拯救隊嘅budget同醫管局嘅budget係分開o架嘛!

Monday, June 22, 2009

Who is the Stig?

My all time favourite show about cars on this planet is Top Gear.


I went to their live show right here in Hong Kong.


Bought a T shirt that says


"I am the Stig" (here is what the Stig does and his role on the show)








For I am the Stig (thats what I tell everyone)


But finally, the Stig's true identity has been revealed.







Or is he really? Is this a hoax by Top Gear on all of its fans?

先北電 後電盈

孫柏文有好幾個朋友細細個移民加拿大。佢哋當然帶咗香港小朋友最優良嘅習慣過去,就係炒炒賣賣

當年我就炒盈科數碼動力,而佢哋都有隻異曲同工嘅high tech、揩嘢泡沫股,就係北電Nortel。

你唔知間嘢以前有幾勁嘅話,自己上網睇。(from wikipedia:At its height, Nortel accounted for more than a third of the total valuation of all the companies listed on the Toronto Stock Exchange (TSX). )



點解今日講北電?之前4月27日,《金手指》寫咗篇題為「電盈目標價:$0」嘅文,之後啲人又喺度鬧「譁眾取寵!」「駁收視!」

噚日,北電宣佈清盤,公司支解。祝電盈股東好運。

「前瞻性指標」

大家今時今日睇數據去估轉勢時,一定要記得今次海嘯嘅源頭花旗國樓市,係由二戰以來第一次下跌而引起。即係所有由二戰之後嘅「前瞻性指標」,啲前瞻功能都可能冇效。

例如,上個禮拜五公佈嘅「持續領取失業救濟金人數」係喺21個禮拜來第一次跌。如果你覺得係好事兼轉勢訊號,咁就大錯特錯。

失業救濟金最長派26周

之前,持續領取失業救濟金人數下跌嘅原因,係因啲人開始搵到工,即經濟轉好。不過今時今日數字跌,係因為花旗國福利制度唔會養人過世,政府平均最長只會派26個禮拜救濟金,用完即止。依家數字跌,係因啲人已開始到冇得再攞嘅階段。

好事?
轉勢?
你諗你囉。

想節能 輪胎能

繼「成龍、崖上的波兒」MTV 推廣策略,成功引我抽一手霸王(1338)之後。


Karaoke Version

又有另一廣告,成功運用互聯網文化去推產品,同令用戶清楚認知產品嘅特點。

咩廣告?就係古天樂賣 Yokohama車胎嘅廣告。我原本仲估係泰文廣告,因為古天樂讀個廣告口號時話:「想杰撚,撚胎撚。」點知原來係普通話。

咁我當然想知究竟古天樂講過乜,所以就再睇。好彩有字幕,完來係「想節能,輪胎能。」

大家可能笑古天樂講普通話唔準,不過大家又要同時承認真係記得Yokohama有隻車胎係特別慳油。仲要已有人扮古天樂個廣告,不斷重複Yokohama想你知嘅訊息。

搵古天樂拍呢個廣告嘅職員,升職加薪啦!

監管改革死硬原因

天下政客一樣黑。大家見到孫柏文咁寫,可能會話:「你都選過立法會,咪即係一樣咁衰!」錯!我唔係政客,我同曾特首一樣都係政治家。仲因我自稱係政治家嘅時間比佢早,所以係佢師兄。

講番啲政客,例如李卓人,政客只有一個目標,就係選舉要贏。而要喺有自由傳媒嘅地方贏選舉,就一定要有錢。

跛腳鴨舉步為艱


因為選舉中,一定有傳媒機構會懶中立咁抹黑你,唯一能夠還自己一個清白嘅方法,就係自己賣廣告繞過傳媒「報道」,直接同選民講自己係點。呢個現象喺花旗國就最明顯。

就係因花旗國選舉要咁多錢,我可以話前晚花旗國奧巴馬政權推出嘅「金融監管機構改革」好大機會通過唔到。

點解?首先,奧巴馬已開始染有濃烈嘅跛腳鴨味道。佢剩番落來嘅政治籌碼,應該喺醫療改革度用盡(仲要失敗而回)。

佢將會成為跛腳鴨嘅其中一個主要原因,係佢一上任之後嘅「加大政府開資去救市嘅方案」,令財赤大到迫長息飆高,令花旗國人更難借錢,選民雖然唔可以好快通過投票箱直接懲罰佢,不過可以出年懲罰嗰啲支持過佢嘅國會議員。

不過更會令「金監改革」敗北嘅理由,係因監管啲監管機構嘅國會(參議院Senate)小組全部唔同晒。你突然話取消小組A監管開嘅機構,畀小組B管,小組A嘅議員一定反對。

都係錢作怪

每一個被機構監管嘅公司,都想被管得輕手啲,所以會捐錢畀有關嘅參議院議員。你突然將權畀咗人,即係斷人米路。最神奇係話將監管權力畀聯儲局。當你都只係將權力由小組中互調,利益都仲留喺參議院中,畀聯儲局就真係冇財路。

所以大家睇到冇監管權嘅眾議院 House議員好鬼熱情去支持呢個方案,不過到參議院就只得共和黨嘅反對聲音,民主黨議員就水靜鵝飛。

Saturday, June 20, 2009

古天樂's 泰文廣告

我第一次喺 Krispycrap 睇呢段片,我真係仲估古天樂有好多泰國 fan 屎,所以 Yokohama 搵佢做泰國市場代言人。

搞到佢要泰文拍廣告。




「想節撚,撚胎撚。」<----------- 仲唔係泰文?

Wednesday, June 17, 2009

撤銷「一注獨贏中油香港」

07年10月25日,嗰日恒指開市報29660點。同日,孫柏文喺《金手指》建議大家「一注獨贏買中油香港(135)」,結果股價喺5.9元裂口高開,之後喺6.49元收市,而嗰日嘅成交量亦係之前或之後三個交易日嘅三倍。同時,三個交易日後,恒指喺31958點見頂。

經過年半多時間,今日就要宣佈撤銷「一注獨贏中油香港」呢個建議。

中油香港之前係間真正嘅開採原油為生意嘅公司,盈利同石油價格嘅敏感度非常高。點知公司宣佈轉型天然氣業務,仲要真係走去收購、投資等。

睇債市走勢預知股災

我一向唔信大陸天然氣業務有大錢搵,仲可能因「要紓解民困」用股東錢去補貼老百姓。依家隻股加埋兩次派息,已番家鄉,係時候說再見。

不過就算你睇好公司嘅遠景,你都最好走咗先。早前有讀者鏟上我哋個網上節目《你貼股 我教路》問我,點解叫人sell in May,我同個讀者對談後,該集嘉賓沈振盈沈大師就話:「以我用之前幾十年嘅統計,喺咁短時間升咁多就得一個結果,就係股災!」

大家要記得David Rosenberg嘅忠告,咁多個市場透過價格「反映未來」,最可信係債市。

今日為大家提供兩個同一年期嘅花旗國長債價格,不過兩個時空嘅走勢圖,走勢係勁似。

一個係今年嘅走勢,當然未知結局,相信大家想知之前債價有同一走勢後結局係點。

另一個係87年,直至當年10月19日,如果我嘅fan屎係小朋友,就去問吓啲老人家之後發生咩事啦!

Monday, June 15, 2009

1340億美債券「可能係堅」

大家可能聽過上個禮拜有兩個揸日本護照嘅人,喺冇報關情況下,嘗試用行李箱偷運票面總共值1340億嘅花旗國債券。冇錯,係1340億,仲要係美元!救AIG都係千幾億之嘛!

孫柏文一聽到呢啲占士邦片先有嘅橋段當然滿腦疑問。
例如,啲債券係堅嘢定A貨?
嗰兩條友係乜水?
究竟為乜運啲債券去瑞士?

意國官僚都唔肯定

當然,咁大單嘢應該好快有答案。雖然意大利官僚出晒名冇效率,點知直至噚日,意大利央行仲未為債券辨別真偽,話「可能係堅」,要成個禮拜先要求花旗國財政部派人去睇。

有戀意大利癖嘅港女可能會話:「咁又唔見花旗國好有效率咁幫手?」我只可以話,有邊個債仔會主動確認自己啲債據?所以花旗國政府慢吞吞係可以理解。

仲有,連當地嘅日本領事館都未能確認嗰兩條友究竟係咪日本人,又爆好多陰謀論。呢個我反而唔怪佢哋,因為日本政府之前都試過唔見50萬國民嘅退休金供款紀錄,不過咁動盪嘅日子,市場少啲疑慮好啲。

如果啲債券係堅嘅,究竟為乜要走私去瑞士?

據報呢批不記名、可自由轉讓嘅債券,每張票面值達5億美元。而呢啲不記名、高面值嘅債,自1969年已冇再發,當年可動用5億嘅機構就唔多,得政府、超級大公司、銀行等。

我諗呢個古仔仲有排搞。不過大家知唔知點解花旗國政府,轉制要啲債券持有人記名?因為其中一個區域聯儲局,喺1962年試過「唔見咗」750萬美元嘅債券。邊個「執」到就發達囉。

Sunday, June 14, 2009

插爆分析員(開名)

孫柏文行街遇到啲讀緊書嘅fan屎時,佢哋都成日問我以前做分析員究竟工作包括啲乜。每次我都會引用前老闆對我哋經常講嘅說話:「股票股票都係估估吓。」

不過我鼓勵啲後生喺今時今日有大把發表意見平台嘅世界裏,分析得比人好兼敢講,唔畀人發掘都好難。

做大行有着數


要比人好,當然就要鬥分析。問題係有啲公司會對某啲分析員「特別着數」。原因係當我喺細行做,你喺大行做,你見到管理層嘅機會都高啲,淨係近距離睇到管理層講佢哋啲大計時手震、標冷汗都已着數好多。

所以我永遠都建議啲後生,開始時揀生意額、收入、成本透明度不但高,仲要即時知嘅公司。免得嗰啲大行分析員,唔係因分析獨到,只係因同啲管理層好熟而贏你。到時大家就會好公平咁純粹鬥預測能力。

咁有冇間咁嘅公司?有,就係港交所(388)。

佢哋有幾多生意,每個交易日每秒即時update,而諗住就算生意數據上冇着數,都可以問吓高層有乜新動向嘅人,我不如問番你,你覺得港交所主席夏佳理講得出幾時有資金自由行咩?

即係大行分析員分析港交所係唔會比你有着數。

大家可能會話:「又話開名插大行分析員?」係,今日想插摩根大通嘅 Michael Chan 陳志豐。

佢前日出報告將港交所嘅投資評級,由「持有」升至「買入」,令股價單日升9.5元,咁佢分析有幾獨到?自己睇圖啦!


Wednesday, June 10, 2009

點解突爆「校內索K」

K,即係Ketamine,呢排做咗好多頭條新聞。鑑於財經版應該冇乜小朋友睇,孫柏文今日坦白講吓究竟K係乜。

K,其實係已發明多年嘅麻醉藥劑。有用程度連特區人管嘅世衞,出指引畀各國政府衞生部時,都列入「最基本一定要有先算有有效醫療制度」嘅藥物,安全程度亦高到被用嚟做小兒科嘅麻醉劑。

點解呢隻由千禧年初已被濫用嘅藥物,突然好似大規模殺入學校呢?其實係政府自己種下嘅禍根。對大多數用家,K原本係喺disco等夜店先會用嘅嘢,即係唔去就好少會接觸到,就算喺夜店買多咗用唔晒攞返屋企,都係等有機會去蒲至用。

不過大約兩年前,警方開始打壓呢啲夜店,不斷查牌又拒絕再續牌,令呢啲場所全面倒閉。

一下子將索K活動迫番同朋友喺屋企做,其實兩年前同朋友傾起已發現有咁嘅情況。

返得屋企就染有「日常做」概念,自自然殺入學校。

不過突然爆嘅原因,係因好多學生冇high嘢都呆滯,老師冇警覺性,依家爆只係揭示根本發生緊嘅現象。做家長好難,就好似牙膏一樣,唧咗出來,好難收番。

Monday, June 08, 2009

我隻股票返家鄉!

2007年10月25日,股市因「資金自由行」概念帶動,牛氣冲天。當時,雖然孫柏文已叫過大家「一注獨沽滙豐」,不過嗰日都係抵不住升勢,建議「一注獨贏」買一隻股票。

計埋派息有微利

嗰日開市隻嘢賣5.9元一股,而恒指就報29660點,高過o依家成萬點。結果係點?我隻嘢上個禮拜五返到家鄉!飲得杯落。

邊隻咁把炮?就係中油香港(135),上個禮拜五收6.05元。如果計埋佢呢兩年派過兩次息,總共0.27元,直情有微利。

當然,又會有人行出來嗌:「機會成本呀呀呀!」我同意,雖然嗰日買恒指熊證都係要死,因為幾日後升到最高位時,所有恒指熊證啪晒,不過如果你當時用咗啲錢買AAA評級嘅兩年期花旗國債,就每年有5厘幾回報。I am sorry!

咁去到呢個位點算?

中油香港股價,曾經喺08年10月27日低見過1.82元,依家個個都係睇佢阿媽點注啲天然氣業務入去。之前,母公司已話過啲天然氣業務,要達某個回報率先會「益」中油香港,而至今注來注去都係啲細嘢,加埋我由之前做石油分析員時已對天然氣業務嘅盈利爆炸力完全冇期望,都係聽住先。

阿媽注資聽住先

不過間嘢始終仲有好多油田,係間暫時現金每年點用都係越嚟越多嘅公司。當年目標價8.05元仲有效,但真係要金睛火眼咁睇實,大市一旦逆轉就要走。

Thursday, June 04, 2009

與讀者駁火

有個讀者就喺 4:30pm show 同我駁吓火... 絕對有火藥味。




不過我同佢傾完之後,先係高潮。沈大師接棒繼續炳!好野!



都係個句,有種就唔沽! Hahahahah

日日升700 月尾32000

如果你係《金手指》嘅fan屎,都知孫柏文喺五月中開始,不斷重複咁叫大家記得要嚴守sell in May。咁都不特止,仲要喺五月最後一個交易日大大聲話嗰日係「最後落車機會」。

五月恒指收大約萬八點,點知六月第一個交易日恒指再升七百幾點。睇啲網友嘅反應,我應該認錯,因牛市已到,無謂死頂。

早排有機會同曾淵滄博士傾究竟咩先係「牛市」,佢話:「真正叫得牛市係要升破之前嘅高位,即係要破31958 點。」

破31958就係牛市

博士嘅說話我當然記在心頭,所以一見前日升勢,我即刻做功課。不過唔係傳統股市分析,因有如禮拜一黃國英做我哋網上節目《你貼股我教路》話齋,個股市升到呢個位都冇乜點可以用傳統分析。

我就諗,冇理由都升700點,咁即係冇理由唔日日升700點。

只要升足二十日,就升14000點,咁14000加六月起步嘅18000點,即係升到32000點。

冇錯!到六月尾就可以終極確認今次係牛市。

當然,網友又肯定話:「不過噚日跌500點喎,即係到唔到32000。」我話錯!因為六月有22個交易日,只要今日升番500點抵銷噚日嘅跌幅,之後繼續每日升700 點,就可以成功抵壘。

我覺得繼 Susan Boyle、LeBron James、Nadal之後,下一個要爆嘅泡沫就係股市。

話我水皮嘅人,夠膽就唔好沽!

Monday, June 01, 2009

五月最牛商品將再升

5月真係勁,只要你有貨喺手,不論股票、外幣、商品,都係升到甩轆,唯一唔得就係啲長債,同有異曲同工之效嘅公用股例如中電(002)。禮拜六我哋《蘋果日報》財經版都係以「港股35年來最牛5月」做頭版頭條。35年前,即1974年,孫柏文都未出世。

港股喺5月升咗17%,淨係買恒指牛證都發達。不過大家知唔知,原來有隻商品喺5月嘅升幅不但贏晒其他商品,仲要贏埋恒指?呢隻商品就係白銀,升咗27%,作為白銀戰隊隊長嘅我,當然鼓舞。

央行失控白銀狂升

咁點解啲白銀咁勁?咪就要多謝以花旗國聯儲局為首嘅紙幣狂魔,開始被圍剿囉。甚至可以話市場開始炒「央行失控概念」。

咩係「央行失控概念」?咪就係央行做唔到想做嘅嘢,或做咗想做嘅嘢,不過不但攞唔到想要嘅結果,仲越做越有反效果。

央行想做啲乜?咪就係㩒低長息,令啲借長錢嘅人例如買樓人士,更有意欲去買嘢托市。

點知喺上個禮拜,債券市場參與者已出現「食唔落」現象。喺供過於求嘅情況之下,長債價不斷下跌,令長債息率係咁上。花旗政府喺上個禮拜發嘅新債數量雖然高,不過喺萬億財赤嘅世界算平常,之後至少一年個個禮拜都會係咁。

㩒低長息事與願違


聯儲局其實已預料到會唔夠買家,所以早前3月18日宣佈,會印3000億美元自己買,即「量化寬鬆政策」。佢話啲錢夠用6個月,呢個冇錯,不過佢冇講嘅就係唔加碼利息就係咁升。

伯南克都唔知自己有咩棋可以行,債王Bill Gross仲話如要平息債市嘅不滿,惟有出年初就開始加息。加息?得咩?仲唔令人覺得佢哋已失控?