Friday, June 29, 2007

Yo! Yo! Who are these? YoYo!


WoW...

PS. To our friends over at the commercial crime bureau.

THIS IS A HYPER TEXT LINK TO GOOGLE.

AND TO GOOGLE ONLY.

移民莫問出處(及去向)

今日,孫柏文再挺曾。

前日,我話過非常認同特首曾蔭權,走出來話要將特區打造成千萬人城市。雖然曾特首一講完,就有來自左中右嘅批評,不過我挺曾。有啲人覺得打造千萬人城市,係為咗好硬膠計劃經濟咁,要超英趕美,打造「國際金融中心」。

不過我挺曾嘅原因,只係因為我想有多300萬人,可以呼吸特區嘅自由空氣,把握自由空氣賦予嘅機會。

問題就係,點樣設計一個機制,可以甄選啲嚮往把握機會嘅人。今時今日兩個最大主流移民方案,就係「投資移民」同「技術移民」。

前日,我已經話過特區資金充裕,缺乏嘅係投資機會,所以嗰啲話有「投資移民」就會有多啲投資,所以支持「投資移民」嘅人,正硬膠。

我亦講過,因為政府決定乜嘢「技術」值乜嘢分數,一定出事,一定揀錯。所以話要政府用計分制度,吸引「技術」移民嘅人,正硬膠。

篤爆啲硬膠方案之後。孫柏文當然要分享心目中嘅最理想移民政策。

聽我講之前,大家要問自己,我哋究竟要吸引啲乜嘢人來特區。我最希望吸引到嘅就係年輕版李嘉誠、黎智英等移民。

佢哋當年來港,冇錢、冇學位(所以以上兩個政策正硬膠),再諗深一層,佢哋當年來港嘅一刻,連未來想做邊行,會走邊條路都唔知。即係等如佢哋係「三冇」分子,冇錢、冇學位、冇方向。而喺獅子山下,打造香港神話嘅人,就係呢班上百萬嘅「三冇」分子。

佢哋冇嘅嘢雖然好多,有嘅嘢可能只得番一樣,不過就係呢樣嘢令特區有今時今日。呢樣嘢就係「飢餓」hunger,佢哋就係「好飢餓」hungry嘅人。前日講過,不過今日重申,對機會「好飢餓」,對知識「好飢餓」,對向上爬「好飢餓」嘅人,就係我想見到成為我哋嘅一分子。

咁當年嘅移民政策,點解可以成功甄選 呢啲「飢餓三冇」分子來港呢?年輕嘅《金手指》fan屎,我哋以前有個叫做「抵壘政策」嘅甄選移民機制。「抵壘政策」,就係不論你以乜嘢方法來港,只要你 能夠到達市區,就可以攞身份證,融入社會。即係話,「抵壘政策」嘅神髓,就係殖民政府提供一個24小時任何時間,你都可以考嘅「入學試」。

你可以憑機智聰 明,去玩弄官僚漏洞,成功抵壘。

又可以憑超卓體能、無比勇氣,跳進后海灣避鯊魚,就算唔係機智過人,都可游水過來,成功抵壘。

所以,當年可以成功通過抵壘 政策考驗嘅新移民,差唔多可以話係智勇雙全,香港有呢班人,真係唔發都唔得。就算「三冇」,都出奇迹。

下個禮拜,做完第二季金手指貼士表現總結之後,
孫柏文就會分享我嘅移民政策。既可以捕捉抵壘政策嘅平等機會、莫問出處及去向嘅移民「入學試」神髓,又可以盡量減低,新移民做嗰三樣我哋最驚嘅嘢──就係去打劫、攞綜援、用醫療。到時準備鉸剪,相信你一定想剪低。

Thursday, June 28, 2007

重申一注獨贏買白銀

噚日,孫柏文應承過大家,會解釋點樣吸引啲冇錢、冇學位,年輕版李嘉誠、黎智英等 嘅移民,等我挺曾,為特區打造千萬人城市。不過因為前晚白銀大跌,所以我要推遲分享我嘅空前絕後偉大移民政策。今日,我要再走出來,大大聲咁叫:「重申一 注獨贏買白銀!」

首先,如果問大家:「每次出現危機嘅時候,眾中央銀行嘅終極解決方法係乜?」

如果唔識答,我就要用塊「笑聲拍版」大大力拍你個頭。因為答案係 ──印、銀、紙!

俄羅斯出現金融危機?印銀紙啦!
科技股泡沫爆破?印銀紙啦!
911恐怖襲擊危害信心?印銀紙啦!
扭親隻腳?印銀紙!跟住用啲銀紙敷一敷 啦!

中央銀行亂印銀紙、濫發鈔票,就會引發通脹。投資者為求自保,就會買黃金、白銀。所以只要市場預期未來勢色不對,金銀價應該會飆升。今時今日,花旗國 出現次按subprime危機,令市場猜測好多投資銀行中招。

以前,按揭業務係由被聯儲局監管嘅普通商業銀行做,到爆次按危機,相信聯儲局早已經 啓動印刷機去救啲銀行。現在聯儲局好似慢咗嘅原因,係因為按揭業務已經由投資銀行做,而佢哋做嘢秘密過CIA,所以早排聯儲局對問題嘅嚴重性冇乜頭緒。

又到爆升時

不 過現在有Bear Stearns專炒次按嘅基金出事,相信聯儲局已經將印刷機嘅摩打撻着。如果係咁,大家會問:「點解白銀前晚跌咁多?點解跌穿白銀戰隊隊長好鍾意用嘅 200平均線支持位?」

其實,聯儲局為首嘅紙幣狂魔集團,早知道黃金、白銀戰隊,會推高金銀價去反映濫發鈔票嘅現實。所以喺印銀紙之前,一定要嚇儍金銀支 持者,希望令白銀戰隊士氣低落、潰不成軍。

孫柏文記得喺05年7月倫敦恐怖大爆炸嘅時 候,我深深相信紙幣狂魔會濫發鈔票去「挽救信心」。不過,襲擊發生之後銀價冇即時升(見附圖),仲要去到05年8月嘅時候,狠狠跌穿200平均線。淡友盡 洗好倉,屠殺戰隊成員。不過如果大家記得,紙幣狂魔屠殺完啲用孖展炒白銀嘅人之後,就啓動印刷機。銀價就係喺05年8月開始去到06年4月,由7元升至差 唔多15元。前晚淡友又再次盡洗睇好孖展倉,如果你能揸實貨白銀,捱過呢場戰役,相信白銀戰隊隊長孫柏文,白銀快將又屆爆升時!

1)爆炸後,孫柏文預期央行印銀紙救市

2)好似冇料到

3)淡友仲要清好倉

4)原來真係印銀紙,白銀爆上

5)Bear Stearns出事,央行應該又印銀紙

6)淡友又清好倉

7)白銀再爆上?

Wednesday, June 27, 2007

我 挺 曾!


今日,孫柏文非常罕有地挺曾。點解無端端要挺曾?話說早排,特首曾蔭權走出嚟話要將特區人口大幅提升,由現時嘅700萬提升至1000萬。曾特首一講完,就有來自左中右,排山倒海式嘅批評。雖然批評多多,不過我就完全支持,全力挺曾。


上世紀末,孫柏文喺 花旗國讀大學。我間大學位於密歇根州Michigan嘅底特律市Detroit附近。底特律本身人口從50年代嘅180萬,萎縮到千禧年嘅90萬,跌幅有 一半。如果今時今日底特律市市長走出嚟話要將人口提升五成,我可以肯定佢會被人笑到面都黃,個個都會問佢一句:「底特律憑乜?」如果有睇過90年代初,用 底特律為背景嘅《Robocop》電影三部曲,就可以明白點解啲人會笑佢。

所以,我哋可以自我安慰嘅底線就係如果特區開閘,真係有人想同我哋一樣想做香港 人。不過如果真係開閘,我哋就要決定畀乜嘢人嚟。首先,孫柏文想用隻金手指去篤爆兩個硬膠方案。

應要好飢餓嘅人

第 一個硬膠方案,就係有硬膠人話要吸引投資移民。真係硬膠。

大家只要走去金管局,就會知道特區銀行體制裏面嘅存款量,令特區差唔多成為世上人均存款量最高嘅 地方。硬膠大佬啊!你哋知唔知資金我哋有大Q把!我哋冇嘅係好嘅投資機會。

吸引投資移民?硬膠。

第二個硬膠方案,就係有硬膠人話要政府用計分制度,吸引 「技術」移民。又係硬膠。

大家只要睇吓政府職業培訓計劃當中,小心甄選、受教嘅「技術」課程,就知道政府決定乜嘢「技術」值乜嘢分數,一定出事,一定揀 錯。

吸引「技術」移民?硬膠。

講真,孫柏文心目中嘅移民政策,一定要畀到呢兩位曾經移民 來港嘅人,可以來港。第一個係黎智英,第二個係李嘉誠。如果用以上兩個硬膠移民方案,當年年輕嘅李嘉誠同黎智英一定嚟唔到。當時佢兩個又冇錢,又冇學位。

其實,我哋要吸引嘅人,就係嗰啲「好飢餓」hungry嘅人。對機會「好飢餓」,對知識「好飢餓」,對向上爬「好飢餓」嘅人,就係我想見到成為我哋一分子 嘅人。聽日,我就會解釋點樣吸引啲「好飢餓」嘅移民。同埋如何防止佢哋做嗰三樣,我哋最驚嘅嘢──去打劫、攞綜援、用醫療。

Tuesday, June 26, 2007

點解陳同海「辭職」

祖國石油業呢幾日唔知道發生乜事,突然謠言滿天飛,仲有中石化(386)嘅總經理陳同海突然「辭職」。就連中石油(857)嘅管理層,都被傳話被調查。作為一個前石油分析員,真係一個疑團。中石化仲要畀高盛評為「沽售」。

不過講真,碰正鄧小平同志嗰女鄧林,啱啱為六四平反……I mean為六四屠城平反,今日就為大家提供一個祖國石油業大佬可以出事嘅理由。

相 信大家都知道,喺祖國唔鹹唔淡嘅計劃經濟當中,有啲嘢有價格管制,但有啲嘢係冇。石油業最特別嘅地方,就係地下出來嘅原油冇價格管制,國際市價有幾高,祖 國售價就有幾高。不過煉油廠購買原油,跟住提煉成電油、柴油等等嘅石油副產品,啲副產品就有價格管制。國際市價升咗好多,祖國售價會跟唔住。最後如果原油 價格不斷上升,不過副產品售價唔升,煉油廠就出事,用公司錢補貼用戶。同埋因為售價比市價低,一定出現供不應求、嚴重短缺嘅問題。

不過大家 諗吓,如果冇價格管制,管理層要決定將貨賣畀邊個就會好簡單,只要價高者得就可以。不過如果有價格管制,售價比市價低嘅時候,管理層決定賣畀邊個「幸運買 家」,嗰個「幸運買家」就發達,可以賺取差價。問題就係,管理層如何選擇呢個「幸運買家」呢?又或者如果我想做嗰個「幸運買家」,我又可以做啲乜令管理層 揀我?

仲記得89年,孫柏文曾經問過老竇:「乜嘢叫做『官倒』?」

我托Yumiko

真刺激,Yumiko又走光。實不相瞞,喺呢啲情況之下,孫柏文想開低B玩笑都實在太容易。連我呢個呃稿費嘅專家,都覺得太冇挑戰性,所以今日我唔會用Yumiko嘅乳頭搞爛gag。

不 過,Yumiko今次露點,證明佢能夠經一事、長一智。記得上次Yumiko表演空中飛人甩褲,即時喊苦喊忽,當然冇完成個表演,之後第日又話要「休息」 唔返工。不過今次就唔同,露完點,都繼續唱歌。果然上次被我提點之後 (here and here),Yumiko professional咗好多。大家金融業從業員,如果發現自己有一日,喺公司對住啲客做PowerPoint presentation嘅時候,露點,就一定要秉承Yumiko精神,繼續落去。所以唔好話呢單嘢冇財經angle。

最後,今日原先想話「我挺Yumiko」,不過今次我諗「我托Yumiko」會恰當啲。

Monday, June 25, 2007

Bear Stearns大鑊

今日,孫柏文想為大家用隻金手指去篤吓Bear Stearns專門炒次級subprime按揭債券嘅兩個爆煲對沖基金。不過寫之前,就為大家提供一個股市終極見頂訊號。呢個終極見頂訊號,就係孫柏文喺禮拜五入咗貨,入咗認購證,入咗941中移動嘅認購證。

今次我入市,係因為呢幾個月來,我同《利字當頭》嘅利世民一路反反覆覆研究究竟喺QDII、北水南調嘅世界裏面,應該買乜。而我嘅結論就係應該買中移動,不過我覺得應該等到中移動可以升穿過上市以來嘅歷史高位80蚊,先至去買。

理 由係中移動升穿80蚊嘅時候,就代表當今世上所有中移動上市以來嘅蟹貨,要放嘅都已經放晒。今時今日仲揸住中移動嘅股民,肯定係中移動超級大fan屎,要佢哋畀貨你,就一係pry it out of their cold dead hands,一係就出非常高價。不過就連我呢個黑氣石都入市,股市仲唔見頂?

仲有,我禮拜五入市,禮拜五晚花旗國嘅杜指就即刻跌185點,除咗幫我啲認股證贈興之外,仲要賀一賀同我個朵非常相似嘅Blackstone Group上市。孫柏文以前曾經講過,Blackstone作為smart money之中嘅smart money,賣得股票畀你,都應該唔係好嘢。

點 都好,禮拜五晚花旗國嘅跌勢,真係不尋常。跌市嘅導火線,就係Bear Stearns話會拯救佢哋管理,專門炒subprime次按債券嘅兩個對沖基金嘅其中一個。呢兩個對沖基金嘅名,粗略翻譯的話,一個叫做「借孖展炒次按 基金」,令一個叫做「轆卡去借孖展炒次按基金」。咁Bear Stearns救嘅,就係冇轆卡嗰個基金。邊個借錢畀嗰兩個爆煲對沖基金?咪其他投資銀行囉!

大家可能會問:「對沖基金出事,有人救,唔係好事咩?」其實,呢排興十年回歸、集體回憶,我就用個比喻等大家可以明白點解喺禮拜五晚,花旗國啲投資銀行股票變成跌市火車頭。大家回想97年嘅香港樓 市,Bear Stearns就好似個炒好多樓嘅叔父,見到個細姪走去炒舊山頂道嘅帝景園。個細姪當然借錢去炒,仲要計到盡,靠租金去襟吓啲息。

現在,個租客走佬,個細姪出事,連息都還唔到。借錢畀個細姪嘅貴利佬,當然話要斬倉。咁雖然金錢上唔關個叔父事,不過佢就話因為個細姪唔掂,會「影響」佢嘅形象,所以就出手救佢,而班貴利佬亦都同時轉變死性,肯唔斬倉,唔將層樓拍賣出去做銀主盤。

大 家可能會問:「邊度有咁大隻蛤乸隨街跳?」其實個原因好簡單,個叔父同埋啲貴利佬,自己都有借錢去揸住過百層帝景園。如果將細姪層樓拍賣出去,個價一唔得,佢哋自己全部都會被迫變成負資產。不過,仲有好多個帝景園單位斷供,班投資銀行又接唔接得晒?同樣有好多貨嘅滙控005,又幾時會走出來再發盈警呢?

Friday, June 22, 2007

出得來行 遲早要還

現在,是傍晚的七點鐘。通往將軍澳工業村的唯一通道 - 環保大道,在這一刻被示威者堵塞了。

阻X
住我放工出去溝女!

壹蘋果大廈,走唔X到!

dil dil dil

班示威者,
係長實夢幻之城地盤工作的地盤工人。他媽的,幫得,就預X左出得來行遲早要還

悲劇

今日,孫柏文原先想寫Bear Stearns專門炒次按債券嘅對沖基金。先來美林斬倉,跟住有JP Morgan都想斬,不過因冇人接貨,驚隊冧所有投資銀行已經鐵索連舟嘅次按債券市場,所以JPM被迫「扮nice」,唔斬倉。

不過噚日,孫柏文見 到段新聞令我唔講先唔得,簡直係悲劇,所以今晚就同大家分享我嘅感受。段新聞係話,有個的士司機喺筲箕灣某食肆嘅閣樓食飯,走嘅時候喺樓梯跣親。

雖然係咁,大家可能會問:「日日都有人喺樓梯跣親,點解呢單特別慘?」因為今次個的士司機跣落樓梯,結果癱咗。悲劇。

最慘係根據法庭判決,的士司 機跣落樓後,可能唔會癱咗咁嚴重。不過因為個食肆東主完全違反基本常識,喺冇醫護人員嘅情況之下,將的士司機監粗移去後巷,就係咁令傷勢更嚴重。悲劇。

保險唔包冇得賠

一 個可以喺特區飲食業呢個充滿競爭嘅世界當中,脫穎而出嘅食肆東主,冇理由出於「想幫人」,去違反基本常識,將一個傷者拖去後巷。換轉當日喺樓梯跌落嚟唔係 一個中等身材嘅的士司機,而係重量相若嘅死物,例如罐頭、雜物,如果大家在場見到食肆東主將件「阻住做生意」嘅死物拖出後巷,大家會覺得點解呢?唔通當時 個食肆東主又係為咗同一理由,去違反基本常識,將傷者拖去後巷?悲劇。

人就已經癱咗,相信傷者屋企人最擔心當然係醫藥費同埋傷者以後嘅生活費,而法庭亦裁 定要賠1000萬。雖然食肆東主已經話冇錢,不過照常理,一間食肆應該買咗保險,食肆賠唔起,都仲有保險公司。最慘,原來間食肆嘅有效牌照,只適用於地下 嗰層,所以保險唔包閣樓、樓梯,冇得賠。不過點解個牌得地下嗰層?日日睇報紙報道,見到啲新開嘅商場食肆鋌而走險,就算一早已跟足規例申請,最後都要無牌 經營,唔通……悲劇。

當然,就算癱咗嘅係億萬富豪,都想討回一個公道。拖人出後巷嗰個,到今時今日仲大大聲話自己冇錯,法庭話係佢嘅決定,先至令人癱瘓, 呢個唔係刑事傷人,係乜?點解個食肆東主仲可以大大聲接受人訪問,話自己冇錯?悲劇。

最後,佢有冇試過向傷者講句I'm sorry?No?



筲箕灣某食肆東主 - 翁柏華 - A Free Man

Thursday, June 21, 2007

輪商輸錢 我有快感

孫柏文相信喺特區股壇,輪商係第一被仇視嘅對象。雖然本人就對某輪后有個crush,不過撇除兒女私情,都絕對明白點解大家咁仇視佢哋。孫柏文絕對明白乜乜引伸波幅會影響啲輪嘅定價,不過都仲仇視佢哋嘅原因,就係因為佢哋好似永遠都冇得輸咁。

點知,噚日同法國巴黎銀行窩輪部嘅朋友傾偈,孫柏文條 氣順晒。因為佢話輪商雖然日日都賺你,不過賺埋賺埋可以一鋪過輸晒。例子有中石油,佢話對上六個月,中石油試過三次裂口高開(見附圖),輪商想追做對沖, 點知一路追唔到。佢話相信好多輪商,喺呢三個交易日蝕咗嘅錢,就已經輸晒全年喺中石油出輪嘅盈利。唔好話我黑心,不過見輪商輸錢,真係令我有快感。我係咪 變態?

飛車搶劫  當場擊斃

個禮拜,葉劉淑儀話當年人大,監粗取消基本法保證所有香港居民兒女嘅居港權利,係「好果斷同有必要」。首先,當年殖民政府年代,雖然有好多人好怕共產黨解 放香港,不過憑基本法22、24條,話香港居民兒女就有居港權利,就贏咗好多有非本港子女嘅香港家長歡心。

雖然當時仲有人日日歌頌彭定康,希望可以永遠攬 住英國人嘅大髀,不過呢班家長就日日祈禱,希望解放軍可以快啲嚟,基本法可以快啲落實。經過人大取消權利之後,呢班之前最支持基本法、最期望解放嘅香港人 家長覺得點?孫柏文相信當年放喺灣仔人民入境事務處嘅幾個汽油彈,已經講得好清楚。深愛 一個人,佢又畀咗你好多希望,不過最後俾佢捅一刀嘅感覺,呢班家長就最清楚。

我想問葉劉:「你話嗰百幾萬個非本港子女嘅香港家長,會唔會覺得回歸10年值 得慶祝呢?要睇幾多次『心繫家國』MTV先至會重新愛國愛港?如果有成百幾萬個子女,啲充滿仇恨嘅香港家長,為數又有幾多?」葉劉參選08立法會選舉,就 真係要多謝多議席單票制。

其實,好多喺特區對阿公抱着愚孝處事方法嘅人,都好似葉劉咁好鍾意政府「果斷」。越「果斷」越好。越「果斷」越有效率,越「先 進」。喺葉劉做特首嘅世界當中,唔同意行政部門嘅決定,走去打官司,走去司法覆核,就係一個唔愛國嘅表現。因為會令外國人覺得特區政府無法「果斷」。所以 今日就為大家提供咗一張圖片,畀大家知道葉劉做特首將會幾「果斷」。

Courtesy of zonaeuropa.com

Wednesday, June 20, 2007

South Park vs Final Fantasy

前日,我哋壹傳媒出業績。一份業績報告,就係一間公司嘅倒後鏡,睇到去到邊。不過,今日孫柏文想 講嘅係未來。用紙張印刷嘅傳媒產品,喺1999年前已被當時嘅Intel總裁「溫馨提示」。佢話雖然人類始終要睇新聞報道,不過如果報紙唔諗方法迎合互聯 網,遲早滅亡。壹傳媒當然唔會坐以待斃,根據前輩話,我哋迎合互聯網嘅方法,就係變成兩棲動物。有紙,有網。

當然,淨係將紙上文字擺上網,根本冇「進化過」,問題就係點樣用網嘅多種表達方法去報新聞。有見及此,前輩話要用video報新聞。如果拍唔到事件經過,前輩就話可以做電腦動畫,令讀者、觀眾更投 入故事經過。

其實,孫柏文從第一次聽到呢個「動畫計劃」,已經非常之buy,好想參與將 佢成功催生,所以反覆思考。以下就係諗咗好耐,噚日為止嘅睇法。不過同大家分享之前,我想介紹一個叫做Uncanny Valley嘅概念。首先,Uncanny呢個概念係弗洛伊德發揚光大,指一樣嘢仿人嘅像真度好高,不過因為知道唔係真嘢,喺人嘅心目中會產生一種唔舒 服,甚至有一種抗拒嘅恐怖感覺。即係仿人像真度低番啲,更容易令人接受。用深啲英文就好似係叫做cognitive dissonance。

畫真啲 死快啲

最好例子係,如果有個人因工業意外冇咗隻手臂而要佩戴義肢,伸隻義肢出嚟握手時,你覺得如果隻義肢用木造,仲要一睇就知係木,會令你舒服啲?定係一隻驟眼睇好似真,不過握手起嚟就完全冇體溫嘅矽膠義肢呢?當然,如果可以做到隻義肢摸起嚟呃晒五個感官,當然唔會覺得恐怖。

如 果用圖表(圖A)表達,由像真度係零開始,一個人接受嗰樣嘢似人嘅程度會慢慢提升。不過去到大約七成像真度嘅時候,人就開始會唔接受。去到九成,甚至令人 反感,有要抗拒嘅恐怖感。直到可以欺騙晒五個感官時,甚至百分之一百係真人,人嘅接受程度就會完全唔會唔舒服。正因為圖表有個「谷」,所以叫 Uncanny Valley「抗拒恐怖谷」。而做過好多次整容手術嘅人,就係因越嚟越非human,所以跌落嚟,令人反感。

今日要講呢個 有100年歷史嘅概念,係因為電腦動畫都有同一現象(圖B)。大家可能成日都唔明點解一間擁有超過500個漫畫家,一年先一部110分鐘動畫電影嘅 Pixar「唔畫真啲」。又或者點解嗰啲「畫真啲」嘅電影公司,畫一間、死一間。其實,就係因為就算散盡千金,都未必跳得過呢個Uncanny Valley。跳得過就用咗好多錢,跳唔過就……

講真,死得最慘嘅「畫真啲」電影,一定係有史以來畫得仿人像真度最高,2001年嘅《Final Fantasy》。就算故事被花旗國首屈一指嘅影評人Ebert,評為同Pixar嘅《超人特攻隊》一樣咁好睇,最後都因為Uncanny Valley,搞到公司執笠。

孫柏文曾經喺演藝學院讀過短期編劇課程,深信老師話齋,故事劇本勝於一切。喺電影動畫當中,畫得「最差」嘅一定係South Park《衰仔樂園》,雖然成本只係《Final Fantasy》嘅1/6,不過票房就贏晒。

作為一間要畫動畫嘅公司,如果用多一蚊喺畫真啲到,分分鐘不但無效益,仲要跌落Uncanny Valley。從成本效益角度講,如果好劇本真係勝於一切,不如嗰一蚊就用嚟製造寫得好同肯挑戰難度嘅劇本,可能會仲好?

三齣動畫電影成本及票房

電影:

《衰仔樂園》製作成本(美元) :2100萬票房(美元):5000萬電影

《超人特工隊》製作成本(美元) :9200萬票房(美元):2.61億電影

《Final Fantasy》製作成本(美元):1.2億票房(美元) :3000萬

Monday, June 18, 2007

放下屠刀 慶祝回歸

上個禮拜,昂坪360嘅吊車就成功昇華為希臘神話當中嘅Helen of Troy,一部吊車引發千篇文章。孫柏文當然亦有分享自己嘅見解。今次跌吊車,我話係因果業報,雖然喺寶蓮寺嘅出家人與世無爭、不會上街,不過搞360嘅人,始終逃不過比人類更強嘅裁決者。所以360吊車下墜,係為懲罰嗰啲想將莊嚴嘅宗教聖地,變成澳門賭場般「旅遊景點」嘅人。

盤古開初以來,正邪之戰,一路進行。今次吊車下墜,昂坪360需要完全停駛。大家不能否認,佛門清靜地淪落成廸士尼般「旅遊景點」「煙花」之地嘅速度,明顯係慢咗。就算係呢場永恒戰役當中,正方嘅一次小勝利。

點知,邪方早有準備,唔知佢哋係唔係一早就知正方會有呢次小勝利,所以佢哋就安排咗喺寶蓮寺嘅大佛嗰度,搞個叫做「佛光照耀香港」嘅「慶祝回歸十年」活動。而呢個活動嘅高潮就係放煙花!煙花喎,大佬!寶蓮寺仲唔係煙花之地?

孫柏文想問嗰啲日日掛「旅遊景點」喺口邊嘅人:「你哋幾時先至會識驚?成架吊車跌落來都唔夠?施主們,放下屠刀吧?」


大家可能會話:「慶祝回歸十年嘅嘢,就算係硬膠,不可話唔搞、就唔搞,一定要勇往直前、雷鋒精神!」

大家千祈唔好咁諗。其實,有關團體喺啲「慶祝回歸十年」活動上,已經充份表見過務實嘅彈性,例如,幾個禮拜前電視機日日播放,「好勵志」嘅MTV《始終有你》,經過被修改為《福佳始終有你(路遙知馬力版本)》之後,喺電視機上差唔多已經完全停播。

Taleban爆佛像後下台

冇辦法,孫柏文一 聽《始終有你》,就會不期然諗起《福佳始終有你》裏面嘅歌詞。有關團體都知,所以腰斬播放,盡顯回頭是岸嘅理性。今次如果可以連煙花都停埋,咁上天再出手 嘅機會就應該可以大大減少。

最後,用隻金手指去篤醒啲「慶回歸團體」,最後一個咁唔尊重對待佛像嘅機構,就係03年3月嘅阿富汗Taleban。佢哋用炸 藥炸爆咗啲佛像之後,就因果業報咁喺一年之後下台。最後問多一次,施主們,放下屠刀吧?






Taleban 搞完佛像,不出一年下台。「慶回歸團體」係咪想重蹈覆轍呢?



Friday, June 15, 2007

白銀年報分析

兩個禮拜前,白銀協會Silver Institute出咗一年一度嘅白銀供求報告World Silver Survey 2007。孫柏文作 為白銀戰隊隊長,當然第一時間睇晒,相信眾《金手指》fan屎睇到呢度,可能會問:「點解咁遲先至寫!?」

咁遲先寫,原因有兩個,第一,呢排實在有太多更 緊要嘅事要分析。例如,昂坪360跌吊車,原先分析係因360破壞佛門清靜,所以遭受天譴,不過因佛教係冇「天譴」呢個概念,最後結論修正為「因果孽 報」。又例如好似噚日咁,要分析中大(模擬炒股)女股神,可以幾勁,所以就押後呢篇文。

其次就係白銀價格呢排郁都唔郁,悶到抽筋。孫柏文驚 收視下跌,所以今日先至分享我對白銀供求報告嘅意見。首先,我平時叫大家買白銀,主要原因係怕啲中央銀行濫發鈔票,繼而觸發通脹,為保護自己買白銀。不 過,今日我就想同主流意見一樣,當白銀係一隻普通原材料咁分析。

大家炒原材料,見到隻原材料價格係咁升嘅時候,就當然擔心啲價錢會跌返落來。原材料價跌, 一係供應增加,一係需求下降,呢個連孫媽媽都識。如果睇番05同06年相比,全年平均價就升咗超過50%,不過礦產生產量就只係升咗都冇1%。最重要係, 專注生產白銀嘅礦,生產量仲要跌,白銀總體生產量可以得到維持,全賴啲生產白銀為副產品嘅礦。

即係話,就算銀 價再升,不過其他礦產例如銅嘅需求唔增加,白銀嘅供應都唔會升。


記住一注獨贏買

講需求。雖然銀價喺06年升咗超過50%,不過,需求只下降1.5%。最鼓舞就係,啲好容 易有取代白銀嘅用途,例如攝影、首飾,需求真係大幅下跌,不過,工業用白銀嘅需求大幅增加,首次超過總需求嘅五成。一部機器需要用到白銀做電線,一定係出 於設計上嘅需要,唔用唔得,部機仲要好貴,白銀佔機價成本好少,升多十倍都要繼續用。

仲有,06年全球白銀總需求係9億盎斯,礦產只有6億幾供應,差別就 依賴存貨去填補,而其中一個最大嘅存貨供應商,就係全球各國政府,06年賣咗7000幾萬盎斯。不過,各國政府公開嘅存貨量就只有1億幾盎斯剩低,以06 年嘅售賣速度等如兩年後就會冇晒。大家仲唔一注獨贏買白銀?

請王雅媛收畢菲特為徒

噚日,孫柏文睇到段新聞報道,話有個嚟特區中文大學讀書,叫做王雅媛嘅上海妹參加模擬炒股比賽得到冠軍。模擬炒股比賽日日都有人搞,得冠軍當然唔係新聞,呢個比賽有新聞價值嘅原因,係因為呢個王雅媛可以將100萬變成2000萬。喺個 半月之內炒股賺20倍。

冇錯,係20倍。

冇錯,係喺個半月之內賺20倍。

希望娶佢做老婆

相信同好多睇過呢段新聞嘅fan屎一樣,孫柏文第 一個反應係希望可以畀錢王雅媛,叫佢成立一個基金幫我投資。不過,我幫王股神計一計數之後,就得出一個結論,佢根本冇可能需要成立啲要接客嘅基金,因為賭 自己錢就可以搵食。

原因好簡單,如果呢啲模擬炒股比賽真係可以準確反映參賽者嘅投資能力,可以喺個半月之內賺20倍,就等於一年之內可以賺250億。即係 話大約58個禮拜之後,就可以有錢過微軟主席蓋茨Bill Gates。唔使16個月,王雅媛嘅資產就會大過花旗國國債嘅總和,8.8 trillion。大家可能會問:「要滾到咁大,開始時都要100萬,可能佢冇呢?」

如果大家咁問,我就要用隻金手指篤醒大家,要58個禮拜有錢過蓋茨, 王雅媛只要炒股第一日有1蚊,one Hong Kong dollar去投資就夠。即係話王雅媛只需要喺開市之前嘅禮拜日,喺麥當勞返工一個鐘,賺15蚊,跟住仲可以用14蚊搭車,一年多之後就會成為世界首富。 王雅媛仲唔收畢菲特為徒?

有見及此,孫柏文就退守到第二個希望,希望娶呢個上海妹做老婆,令港女棺材又多一口釘。

連金多寶都識贏

不過講真,呢啲咁嘅比賽可以反映投資能力?大家心中有數。

每一次有主辦機構搞呢啲投資比賽,最能反映嘅當然唔係參賽者嘅投資能力,而係呢啲主辦機構嘅市場推廣部已經江郎才盡,冇晒idea,就不如做啲嘢等唔使cut budget。王雅媛被問及如何得到冠軍嘅心得時,就解釋自己嘅投資策略,話興炒即日鮮,又話投資唔鍾意揸超過一個禮拜,好多理論。

講真,被問及點樣可以 個半月之內贏20倍嘅時候,相信大家唯一可以接受王雅媛嘅答案,一句英文就可以:「These six weeks has been a statistical aberration,an outlier on the bell curve,a limited reflection of my abilities。」可以粗略繙譯成為:「我連端午節金多寶都識贏。」最抵死係,王股神話自己睇年報去揀股,聽落非常合理,不過疑團就係睇年報去炒即日鮮?No,really?

HSBC = Titanic?


噚日,澳洲嘅澳紐銀行(ANZ)出聲明,話撬走咗滙豐銀行特區支部嘅CEO邵銘高Michael Smith,做佢哋嘅CEO。首先,
孫柏文相 信邵銘高應該唔係被炒魷魚,而係自願離職,如果事實真係咁,問題就係點解邵銘高想走。

今次,表面證供就係,邵銘高可以由一間分公司嘅小頭目,搖身一變成為 全公司嘅話事人,又被龐大利誘(人工以倍計咁加)吸引之下離職。如果邵銘高離開嘅係一間普通公司,絕對通情達理。不過,邵銘高離開嘅係滙豐銀行。滙豐噃! 仲有,邵銘高管嘅係滙豐啲核心業務,照理應該可以扶搖直上,點解又要走呢?


Goldman大概就話邵銘高係玩office politics輸咗,所以先至走,不過除咗企業融資部之外,滙豐內部又唔似興玩呢味嘢。唔通邵銘高知啲我哋唔知嘅嘢?令到佢想走?
圖就係孫柏文嘅猜測...

昂坪公司二期計劃

非常偉大嘅馬克思曾經講過:「Religion is the opium of the masses。」粗略咁繙譯就係:「宗教就係社會嘅鴉片。」鴉片會令人點,相信大家都可能知,所以孫柏文相 信毋須分享經驗,亦毋須過份解釋馬克思想點樣對付宗教。

馬克思作為共產主義嘅教父,佢講嘅嘢,當然就係我哋特區「土共」嘅「聖經」,一定要有行動落實。所 以自從我哋特區被共產黨解放之後,政府就開始落實馬克思嘅遺願。當然,要溫水煮蛙就唔可以硬碰勢力強大嘅宗教組織,所以就以最柔嘅方法去對付最祥和嘅宗 教,噚日,孫柏文講過,出家人與世無爭,所以對付佢哋先就最啱喇。

以無神論掛帥嘅土共最 柔手段,當然係將莊嚴嘅宗教變成拉斯維加斯男脫衣舞團式嘅「旅遊景點」。

今次吊車下墜,雖然已經係上天畀呢個無神政府嘅最後通牒,警告佢哋唔好再侮辱宗 教。不過,如果萬一政府真係能夠喺昂坪為無神主義佔到個橋頭堡,股票編號應該加多個6嘅地鐵公司,就會命令佢旗下嘅昂坪360公司,進行第二步計劃。如果 神聖不可侵犯嘅寶蓮寺因吊車而淪為動物園般嘅「旅遊景點」,相信會好快喺梵蒂岡同麥加,興建吊車,繼續服務以十億計嘅無神共產主義自由行旅客。呢隻股仲唔升!



Vatican 梵蒂岡

Mecca 麥加

點解360纜車下墜

孫柏文相信大家都知道,噚日昂坪360有部纜車下墜。我諗大家聽到呢個消息嘅第一 個反應就係:「咁都得?點解可以跌咗落來?」我亦相信,大家可能已經睇咗港聞版嘅分析,訪問啲工程師。佢哋一定話纜車設計上好安全,雖然只需要一條懸掛鋼 纜,不過就有幾條做後備。分析完設計上有冇漏洞之後,仲要追查落去,發覺原來啱啱先做完安全檢查。最後得出嘅結論就係:「根本冇可能跌落嚟!」

不過,我可以同大家講,聽啲工程師分析係冇用,不如睇吓今日我用隻金手指為大家篤出嘅「纜車下墜」真正理由。

其實,孫柏文聽 到下墜消息嘅第一個反應同大家差唔多一樣。我喺度諗,人類早喺差唔多40年前,已擁有足夠嘅科技將人類送上月球,你唔係話我哋人類連整啲纜車上山都做唔 到,吓嘩?如果我哋人類作為萬物之靈,擁有超卓嘅工程科技,都不能擺脫纜車下墜嘅厄運,纜車下墜嘅動力,就一定係來自比人類更強嘅嘢。

冇錯,就係divine intervention。

當年政府興建昂坪360,一心係想為旅遊業發展「做啲嘢」,為咗開發天壇大佛同寶蓮寺作為旅遊景點。不過,將一個地方變成「旅遊景點」即係點解呢?例如,好多地方嘅動物園,都係「旅遊景點」,將寶蓮寺變成「旅遊景點」,即係將啲和尚、師姑變成盈盈、樂樂等動物。

當然,出家人與世無爭,所以就冇反抗。不過,天有眼,人唔反抗,唔等如唔反抗。雖然,今次纜車下墜孫柏文第一個結論係,天譴!不過,《蘋果批》嘅高明輝就話佛教係冇「天譴」呢個概念,而《利字當頭》嘅利世民亦話今次只係一次因果孽報。佛門乃清靜之地,將佢變成廸士尼等嘅煙花之地,報應只係遲早問題。

最後,今次冇人受傷,政府應當將今次纜車下墜視為「最後通牒」。冇普選,人不能收復政府,不過天能,小心、小心。

明光社摸硬膠

花旗國嘅前總統尼克遜,發明咗好多選舉新招,發明一樣叫push polling嘅嘢,push polling表面上係民意調查,實際上係借有偏差嘅問題去改變民意。Push polling雖然卑劣,但係相當有效,所以番鬼佬稱佢為攻擊對方below the belt嘅手段。

例如,如果民意調查只係想問:你覺 得A君適唔適合做立法會議員?喺尼克遜push polling之下,就會變咗:A君曾經有過同十四歲以下女童發生性行為嘅醜聞,會唔會影響你投佢做立法會議員嘅意向?為咗減低你嘅戒心,push polling第一條會問一啲好中性嘅問題,到第二條先會引導你咁問。

噚日,孫柏文發現明光社總幹事蔡志森都用呢招。事緣有人批評佢哋,喺明光社乜嘢都唔得嘅教義之下,有人批評佢哋沾手投資股票,有博彩賭博成份,佢哋當然想辯護,不過就咁話自己冇錯,冇push polling咁有效,所以佢哋就學咗呢招。以下係佢兩條「是非題」:

1. 本地教會自2000年起,開始無選擇地染指金融投資市場。 對/錯

2. 如不妥善選擇教會僱員的強積金,長執可能會陷教會於不義。 對/錯

大家是否同意明光社已經完全觸摸得到尼克遜嗰種below the belt嘅硬膠?

Monday, June 11, 2007

Web 2.0大引爆

恭喜,恭喜!孫柏文今日想首先恭喜隔籬《案內人隨筆》尹思哲兄嘅新書出版!書名叫 做《Web 2.0大引爆》,題材當然圍繞Web 2.0。咁思哲兄基本上將Web 2.0界定為user generated content,即係話如果你嘅網站想追隨Web 2.0模式去運作,你網站上面提供畀用戶嘅內容,都要係由用戶群提供,互相分享。

例如壹傳媒嘅網站,不論文字、相片、短片等等,都由公司提供,所以係百分 百Web 1.0。而壹網站唯一係Web 2.0嘅部份,就係文章嘅尾部,有個叫「我的意見」嘅討論區畀讀者留言。《金手指》嘅「我的意見」討論區,就有啲好似「我唔明一個EQ咁低嘅所謂金手指點 解仲可以響度日日寫嘢……」之類嘅留言。呢啲留言唔係寫畀我睇,係寫畀其他讀者、用戶睇。

Web 2.0靠用戶群提供內容,亦即係話冇其他用戶,個網站就會冇用。例如,壹網站得一個用戶,只要肯燒錢,壹傳媒都可以提供大家日日見到嘅新聞內容。又例如 Amazon.com得一個用戶,只要股東肯燒錢,個網站都可以維持龐大嘅選擇。不過,大家試諗諗如果eBay或AdultFriendFinder得一 個用戶,嗰個用戶又可以同邊個進行買賣同交流呢?(係,eBay同AdultFriendFinder先至係Web 2.0始祖)

賣家玩嘢買家唱衰

不 過,有如思哲兄喺新書話齋,玩Web 2.0唔係新與舊、老與幼嘅分別,而係心態上嘅區別。擺個網站出嚟畀用戶分享文字、相片、短片,不論有幾小眾趣味、露骨、不雅等等,個網站都要尊重佢哋嘅 活動自由。要刪除,都應該由用戶互相制衡,例如,eBay就有個feedback機制,賣家玩嘢,買家就可以寫衰佢。討論區嘅人離題,就有起題嘅用戶板主 刪除。就連YouTube都畀用戶將短片flag做inappropriate。

做唔到咁樣嘅權力下放,例如搞個討論區吓吓驚有人會留粗口,就好難成功, 不如唔搞算數。好多人認為YouTube已經係Web 2.0嘅表表者,不過今日孫柏文想 為大家篤個比YouTube更Web 2.0、更權力下放嘅例子。噚日,我哋姊妹報《台灣蘋果日報》,用咗「台灣版YouTube 『很快會有』」做頭條,即係話好快就有繁體中文版,係指好快就會由YouTube公司提供一個繁體中文版。

其實,我哋特區有個網站叫做 anobii.com,網站係為咗畀用戶有機會分享自己「書櫃有乜嘢書」,畀用戶互相比較。創辦人就係以前寫《蘋果批》嘅宋漢生,佢開呢個網站,都係想拋 磚引玉咁知道其他人睇過啲乜嘢書,同埋佢哋覺得好唔好睇。不過,宋漢生係個「三文兩語」嘅書蟲,所以一開始已經想令個網站有多個語言版本。

意大利版48小時面世

宋 漢生嘅解決方法,就係將繙譯網站嘅工作交畀用戶,anobii將需要繙譯嘅詞彙,整喺個目錄表上面,用戶跟住就可以喺啲詞彙隔籬,一個一個寫上其他語言嘅 繙譯。只要有95%嘅詞彙被用戶用某語言繙譯,anobii就會啓動嗰個語言嘅版本。Anobii現在有九種不同語言版本,除咗中英文之外,其他都係由用 戶繙譯。

我問過宋漢生:「你都唔知佢哋繙譯得啱唔啱,因為你都唔明佢哋寫乜,點搞?」佢話:「如果真係譯錯,啲用戶會自己改。」佢仲話,唔知點解突然間有 好多意大利用戶,每日都有二百個新用戶。結果,從第一個詞彙被繙譯成意大利文到可以啓動意大利文版嘅anobii,只係用咗48小時。

各位,你想搞Web 2.0之前,就問吓自己,有冇宋漢生將權力咁樣下放嘅勇氣?

講相信用戶、權力下放,就連花旗國嘅陳士駿都不及香港嘅宋漢生。

Sunday, June 10, 2007

我D骨好痛 - 朱凌凌

The lyrics starts out strong, did wonder how the song would progress from the massage in Shenzhen...

but then the part about being ill falls a little flat...

However, the harmony is very very good. Also, the ending on TVB is a true text book example of "how to kiss up" hahahah watch and learn.

And most importantly, they have a sense of self deprecating humour. Good job!


Friday, June 08, 2007

買實貨 @ Kitco

一定要謹記,買白銀要買實貨,而喺「《蘋果日報》投資講座」,我應承過教大家點買。喺特區裏面就有間加拿大公司叫做 Kitco 嘅有得賣,佢哋嘅電話係2827 7800。

我冇收錢賣廣告,我只係以前幫襯過,覺得佢哋幾好,所以你哋都可以打去問一問!千祈唔好話我介紹,佢哋根本唔識我。

Thursday, June 07, 2007

強醫金 = 強迫金 = 嘔

嘔。好想嘔。呢排實在有太多嘢令孫柏文想嘔。例如噚日,就有智經研究中心嘅陳德霖 令我想嘔。佢開罐鞋油周圍畀人聞,我又多事幹咁聞咗,所以想嘔。

大家可能會問點解,其實,故事起源於前日。前日,我同尹思哲兄走咗去科技大學,聽2004 年諾貝爾經濟學獎Nobel Prize得主暨聯儲局經濟學家Prescott教授講嘢。個講座本身,就真係覺得比較難明,因為教授啲PowerPoint slide用咗好多我已經畀番晒先生嘅古希臘字母,例如α、φ、σ、Σ、ρ、δ。(大家係唔係同我一樣,似曾相識?)雖然難明,不過都好精采,原先諗住聽 完講座就走,不過Prescott教授喺講座之後繼續同觀眾傾偈。

諾貝爾獎得主都批評

點知,Prescott教授喺講座之後 講嘢,真係易明得多,仲要好有火。原來,佢老人家好關心成日被我標籤為「硬膠」嘅強迫金。呢位諾貝爾經濟學獎得主,劈頭第一句就話:「The management fees seems too high。」大家要記得,因為Prescott教授亦係好似格林斯潘咁,喺聯儲局做嘢,所以啲英文都特別難明,都要分析再分析先至可以得到真理,今日就為 大家繙譯。其實,Prescott教授係話:「Who is the fucking idiot that came up with this shit MPF?」兩句加埋中文可以粗略解釋為:「管理費實在過高,影響最終回報。」

作為一個「報喜不報憂」、「唔會唱衰香港」嘅人,孫柏文當 然冇講係特首曾蔭權喺pet pet度屙出來嘅屎橋。當年推行強迫金,根本就係曾蔭權用一貫嘅圓滑手段,冇勇氣面對殖民地彭定康創造出來嘅福利既得利益者,冇勇氣撥亂歸正。變成今時今 日,將大家血汗錢轉移嘅政策。

雖然強迫金已經塵埃落定,不過有個諾貝爾獎得主開聲,批評呢個政策落實有問題,應該可以阻止同類型嘅政策出現。

陳德霖鞋油血腥味濃

點知噚日,就有智經研究中心嘅陳德霖,整個強醫金出嚟。呢個強醫金就同強迫金一模一樣,每個月供款,仲要越窮就越要畀得多。強迫金已經係收費高、選擇少,不過根據智經嘅強醫金,大家供款嘅投資選擇,就會更加少,因為只准買啲保守嘢。兩厘利息啊陳德霖!

噚日,孫柏文走去問過好幾個人,問點解陳德霖會諗埋啲「曾蔭權式」嘅屎橋,又要抽走我哋嘅血汗錢。原來聽聞陳德霖係好ambitious,而孫柏文覺得有ambition係ok。更加明白有事要履行ambition有時要擦擦鞋。其實,平時啲鞋油我都聞慣,不過今次陳德霖嗰啲就真係令我想嘔,因為太重血腥味。

Wednesday, June 06, 2007

唔還錢 吹咩

噚日,孫柏文聽到個由花旗國傳來嘅奇聞。不過,今日同大家分享之前,一齊重溫花旗 國樓市近年嘅「創新財技」。

以前,喺花旗國做按揭非常簡單。一個人想借錢買樓,會去銀行,跟住,銀行計算還款能力。如果銀行決定借錢出去,債仔就買到樓, 跟住每月還款畀銀行。如果債仔斷供,銀行可以收回物業,然後拍賣。當然,如果成個經濟體系出現斷供潮,銀行可能決定同債仔「講數」,因為如果突然間有大量 物業拍賣,會令樓市雪上加霜,斷供潮更嚴重。

不過今時今日,去銀行借錢買樓,銀行就會「計算」還款能力。跟住,銀行就一定會借錢出去,「計算」還款能力只 係想將按揭分類。銀行將按揭分類之後,就會去啲「有錢單位」例如投資銀行、強積金基金、有錢人等等,問有冇人想代債仔一筆過還錢,之後個債仔嘅每月供款, 就唔會再去銀行,而係去呢啲「有錢單位」。

好多時,強積金基金、有錢人等代債仔還錢,其實只係當投資,希望最終債仔供款帶來嘅回報夠高。不過有時,啲投資 銀行代債仔還錢,其實係想將啲債仔嘅供款再分類。跟住,根據還款前後次序,再賣出。

例如,有100個債仔,根據還款能力計算,每年可能有5個債仔會斷供。 投資銀行就會賣出100張收款有前後次序嘅債券,即係如果你張債券排第一,不論100個債仔當中,邊個首先還款,你就會得到供款。排第二嗰張,就會收到第 二個債仔嘅還款,如此類推。如果你手持第95至100張,而真係有5個債仔斷供,你就會冇供款收。通常出現呢個情況嘅時候,手持排第95至100張就可以 收回物業,然後拍賣。

5號仔滙豐都有份

點知,孫柏文聽個奇 聞,就係原來好多手持呢啲排得好後債券嘅人,向法庭申請收樓令嘅時候,會遞交一份叫做affidavits of lost notes。即係向法庭話雖然自己手持呢啲債券,不過因為經咗好多重中間人,啲供款已經分類、再分類,所以不能證實自己係債主。而好多花旗國嘅斷供債仔, 就係話因為呢啲債券持有人,不能證實自己為債主,冇得收樓。啲斷供債仔真係可以大聲高呼一句:「我唔還錢,吹咩!」

我可以肯定,呢啲手持債券嘅人,因為無 法收樓,所以一定會控告出售債券嘅投資銀行,要佢哋回水。5號仔滙豐銀行喺花旗國做好多呢樣業務,雖然大家都知佢手上都有好多呢類型按揭債券,不過真係唔 知道有冇賣過呢啲債券,如果有,真係可能會被要求回水。如果法庭話要回水,到時滙豐喺花旗國樓按嘅炸彈,分分鐘比起大家預期大好多。花旗國啲律師,真係會 好忙!

Tuesday, June 05, 2007

金融街VS環保大道

自從孫柏文到《蘋果日報》工作之後,一直被一個疑團困擾。大家可能知道,《蘋果日報》嘅 總部位於將軍澳堆填區隔籬嘅工業邨,而進入堆填區或工業邨嘅唯一一條路,叫做「環保大道」。困擾我就係,點解「環保大道」英文名為Wan Po Road。

起初,我估係因為Wan Po同「環保」發音相似,方便啲番鬼佬搭的士時,的士司機可以更容易明白去邊到。不過有一日,孫柏文經 過國際金融中心時,發現喺國金隔籬嘅金融街,英文名為Finance Street。我第一個反應就係:「Why?WHY?What's wrong with Gum Yong?」就係咁,疑團誕生。

經過同好多人討論之後,發現好多人相信,政府冇將堆填區嘅「環保大道」改名為Environment Protection Road嘅原因,係怕被啲洋人媒體破口大罵,話政府硬膠。輕則被話對「環保」輕佻,居然將通往環保分子非常痛恨嘅堆填區馬路,改名為「環保大道」;嚴重則 被洋人話政府已經採納愚民政策,話有條「環保大道」,就等如非常注重環保問題。所以要叫做Wan Po,等啲洋人察覺唔到。

其實,呢個講法係有道理。根據孫柏文以 前喺「國際學店」巴結嘅前宗主國同學,Tuen Mun、Wanchai、Tsim Sha Tsui等等嘅廣東話譯音,基本上同鴨仔呱呱聲(duck quacking)冇分別。Wan Po應該一樣,洋人真係不能察覺。

雖然,我都相信政府係唔想啲鬼佬察覺有條通往堆填區嘅「環保大道」,不過就只係因政府知道鬼佬冇乜幽默感。我哋特區人民 個個都知道「環保大道」is a joke!只不過如果每次有個鬼佬嚟到特區,冬菇都要解釋一次,佢都會好煩,所以索性將「環保大道」成為一個只有特區人民可以明白嘅inside joke算。不過笑話係未開完,因為喺通往堆填區「環保大道」嘅隔籬,就有個取名為「夢幻之城」嘅地產項目。真係唔知第時啲居民會發啲乜嘢夢,一定好有味 道。

要向M小姐道歉

講起幽默感,孫柏文今日真係想向黃大仙嘅(學左丁山叔叔先!)M小姐道歉。事源,前晚M 小姐請我去記者協會嘅ball。當時,我啱啱寫完噚日篇文,話對舊年喺網上寫「我想炸廸廸尼……唔該」,繼而被捕嘅林嘉樂非常失望,因為佢由唔認罪改為認 罪。由一個可以為了言論自由對抗強權嘅戰士,變成另一個屈服於政府白色恐怖之下嘅犧牲品。

不過,作為一個肥仔,食物一到,我就將言論自由等等嘅嚴重議題, 暫時放低。

直至到嘉賓──管科技、網上行為嘅王永平局長上台致辭,對住傳媒工作者,王局長當然要擦擦鞋,講啲啱聽嘅說話。當時,我已經用極速嚥下主菜,可 能食得太快,所以有點作悶。而今日要道歉嘅原因,係當王局長引述Voltaire對言論自由嘅一刻,我嘔咗出來。諗起林嘉樂,聽埋王永平,真係有gag reflex。


Monday, June 04, 2007

勇氣,去了哪?

上個禮拜五,孫柏文嗰篇《金手指》得200幾字。之後,有數名fan屎來電郵問:「孫柏文又呃稿費?!」其實,篇文原本有800幾字,不過被編輯刪改之後,就得番200幾字。被大量刪改嘅原因,就係篇文講禮拜五要開審嘅「炸廸廸尼」案,原來喺審訊期間,為咗保護司法系統不受外間壓力干擾,孫柏文係唔准講呢單嘢。以下就係原先要出嘅文……

我都想炸廸廸尼

舊 年8月26日,22歲男髮型師林嘉樂話自己係「真主教恐怖分子」,走上網上問:「在座有冇人識整炸彈……我想炸廸廸尼……唔該」。跟住就俾人拉咗。當時, 警方話可能觸犯《刑事罪行條例》第54條,企圖導致爆炸意圖危害生命或財產罪,講到有咁大得咁大,講到好似拉咗拉登咁。好勁!

當時,孫柏文都 寫咗篇文,題為「你真係信佢想炸廸廸尼?」,相信毋須要多解釋,大家都知道我嘅論調。不過如果要簡短總結嗰篇文,我當時話差佬喺呢單嘢簡直就係硬膠。我哋 納稅人辛辛苦苦交嘅稅,用嚟去拉呢條友?話呢條友「企圖導致爆炸意圖危害生命或財產」?真係好似俾人抄牌時好多人老土咁講句,捉賊又唔見你咁叻?

不過,可能因為政府知道自己硬膠,呢條友左睇右睇都冇忽似恐怖分子,怕畀外國英文傳媒恥笑,所以就連呢個「經一事、反一智」嘅政府,最後都係要搵個落台階,「只係」告林嘉樂「浪費警力」。

平時,政府揀人拉嘅時候都非常高明,淨係欺善怕惡,專揀啲冇還擊力嘅人。例如,要拉人「不雅」,最好就係拉啲學生,而有明光社呢啲揸正牌支持嘅刊物,就會有特權被豁免。而拉網友嘅時候,就專揀啲「電車男」,因為知道佢哋一定棄甲而逃。

不過,去到今年2月,「真主教恐怖分子」林嘉樂就首次提堂,罕有地唔認罪,要同欺善怕惡嘅政府打官司。當時,我講過,孫柏文全力支持林嘉樂!如果林嘉樂係布殊,你就當孫柏文係貝理雅。

我曾經講過,林嘉樂寫啲咁嘅嘢,只係想運用「諷刺性模仿」parody嘅手法,去紓緩我哋特區人民對世界嘅憂慮。如果林嘉樂有錯,就係錯在搞爛gag唔好笑。如果「搞爛gag唔好笑」都要坐監,孫柏文更加要支持林嘉樂打贏呢場官司,更加要做林嘉樂嘅貝理雅!呵、呵!捍衞搞爛gag自由!

-----------------------------------------------

後記:大家睇完之後,係唔係覺得孫柏文好硬膠?林嘉樂到禮拜五開審嘅時候,突然「熬底」,由唔認罪改為認罪 。估唔到我呢個貝理雅,會遇到一個咁樣嘅布殊。嗰種仲以為搵到戰友,繼而被離棄嘅感覺,只能用眼淚表達。

今日6月4日,年輕人為了自由對抗強權的勇氣,去了哪?

Friday, June 01, 2007

Someone beat me to 壹能源

My original idea to turn 沼氣嘅甲烷 methane,into 天然氣... for 壹傳媒 變身 壹能源

And then 2 days later... from
明報 hahahahahahah

捍衞搞爛gag自由

平時,政府揀人拉嘅時候都非常高明,淨係欺善怕惡,專揀啲冇還擊力嘅人。例如,要拉人「不雅」,最好就係拉啲學生,而有明光社呢啲揸正牌支持嘅刊物, 就……。

而拉網友嘅時候,就專揀啲「電車男」,因為知道佢哋一定棄甲而逃認罪。不過,今日有人要同欺善怕惡嘅政府打官司。我要喺呢度話,孫柏文全力支持!


有網民網上發up風 ,跟住就被人拉咗。

我曾經講過,有啲人喺網上咁做,只係想運用「諷刺性模仿」parody嘅手法,去紓緩我哋特區人民對世界嘅憂慮。如果佢哋有錯,就係錯在搞爛gag唔好笑。呵、呵!捍衞搞爛gag自由!