Thursday, February 28, 2008

測盈餘錯晒 測醫費啱晒?



好多人批評特區政府,面對一大批市民有逼切需要時,往往會做事慢、冇反應。孫柏文相信,噚日財政司司長曾俊華份財政預算案,就算不能完全改變呢個感覺,起碼證明對某啲訴求,政府反應都可以好快。

數碼鴻溝出現

試問,對上幾個禮拜,特區最大單新聞係乜?冇錯,就係陳冠希先生嘅「生活照」事件。喺呢件事中,大家有冇發現特區市民已經被分化成兩種人,第一種人睇到相,第二種人睇唔到。呢個分別,源自有啲人識上網,有啲人唔識。識上網同唔識上網,就係叫做「數碼鴻溝」(Digital Divide)。

有見及此,曾司長就宣佈喺各區成立「數碼中心」,亦即平民百姓稱為嘅「網bar」。曾司長明白上網其實都幾複雜,新手上路,需要教導。而今時今日都未識上網嘅人,好多都係啲叔叔伯伯,所以曾司長就會喺天水圍徵募啲結構性雙失少女,成為「上網輔導員」。

雙失少女教上網

亦因政府一路以嚟都希望社會和諧,開開心心,而呢啲官立網bar亦能幫助達到呢個目標。所以政府將網bar改名為「溫馨網bar」或「快活網bar」。到時候,啲叔叔伯伯就可以喺「上網輔導員」嘅指導之下,向佢哋啲朋友發放陳冠希嘅「生活照」。政府反應仲唔快?

仲有,曾司長話攞油麻地戲院嚟搞音樂。原先聽得唔清楚,搞到我好開心。我仲估政府撥亂反正,停止打壓fing頭文化,攞油麻地戲院改建成的士高,為促進音樂文化,補貼DJ捽碟,聽真啲先知原來搞粵劇。

不過認真而言。我最不滿今次財政預算案嘅地方,就係曾司長又想將強迫金伸延,又想搞強醫金。曾司長大大聲話2033年會點會點,實牙實齒預見25年後嘅未來。大佬呀!今年財政盈餘都估錯晒,25年後你又估得啱?唔好玩啦。

就算你覺得每年政府估盈餘會特登錯,不能作準,咁我又問你,有邊個喺1983年做嘅政府預測係啱嘅?多我都唔講,如果1983年對人口變化走勢嘅預測係啱,今時今日都唔會有咁多發電capacity啦!大家一定要繼續齊心反對強醫金!

Wednesday, February 27, 2008

長實賣首都 敗露叛國心




噚日,因為一宗嚴重意外,「環保大道」出現交通癱瘓。孫柏文喺同事架車上,一早已經收到消息「環保大道」唔行得車。不過,同事照樣要塞入去,白白等咗一小時。

大家可能會問:「點解明知唔行得,都唔兜路?」唔兜路嘅原因,係因為「環保大道」係去《蘋果日報》總部嘅唯一條路。大家可能會繼續問:「你哋嘅總部係咪自成一國,所以得一條路去?」錯!「環保大道」係往返將軍澳工業村(上萬人返工)、長實新盤「日出康城」(幾萬人會住)嘅唯一條路。

首都在將軍澳

以噚日經驗,求神拜佛千祈唔好出現山泥傾瀉等會封路嘅事件,又遇上幾萬人當中同時有幾個人要call白車。真係冇咁多架直升機去救人。

點都好,橫掂要留喺車廂內,就不如做啲有意義嘅事。作為《金手指》嘅fan屎,你都知道我一向非常關注本地教育政策。特別係愛國教育。所以,我就把握機會打電話畀我八歲大姪仔 Louis,睇吓佢學成點。

電話接通之後,我就考吓Louis:「首都喺邊?」佢好快咁答:「將軍澳!」嗰一刻,我非常憤怒。Louis講緊嘅「首都」,就係長實新盤「日出康城」嘅第一期住宅。

我今日要好認真咁問長實,你哋究竟有冇將胡主席放喺眼內?

你哋係咪見Kosovo搞獨立搞得好過癮,所以就另起爐灶搞多個首都,為他朝港獨鋪路?

仲要知道班環保硬膠一定會繼續阻撓填海工程,添馬艦難起政府總部,所以索性遷都到將軍澳?

如果你哋成功搞港獨,第一個政策係咪想立法禁止用中文,人人都要用日文?強迫啲人接受「城中馬尺」呢個名?

其實「日出康城」呢個名已經敗露你哋嘅陰謀!揀「日出康城」個名咪就係你哋向東瀛天皇住嘅東京秘密地致敬!

買定防毒面罩

就是你哋呢種叛國心態,所以遭天譴。就喺你哋開盤銷售之前幾日,被各大傳媒大幅報道,往返「日出康城」只得一條好多垃圾車出出入入嘅路。最弊,你哋賣樓冇得押後,因為暖天氣一到,隔籬垃圾堆填區就會吹來陣陣惡臭。到時就算提供十一成按揭,都要減價一半先賣得出。幾日後想買「日出康城」單位嘅朋友,買定防毒面罩等夏天吧!真係好臭!

Tuesday, February 26, 2008

07年白銀 = 90年滙豐?



大家睇得財經版,相信喺日常人與人之間嘅對話,都可能會講吓股票、投資。有時,除咗搵短炒機會之外,仲會更深入討論吓長遠投資嘅部署。

當然,講理財、長遠投資,日日睇理財版靚女,溫敏妮嘅《敏妮Talk》專欄,一定比睇《金手指》有用。因為本欄除咗啲爛gag之外,就只有為大家提供一盞能夠照亮黑夜嘅「明燈」。

優質投資唔使擇日

不過,2006年4月3日,孫柏文寫過以下嘅對話…

諗吓,你有冇聽過人講:「如果我喺1990年,某月某日,買滙豐就好啦。」你只會聽過人講:「如果我喺1990年,買滙豐就好啦。」


差不多兩年前我寫呢個對話,係想提醒大家,要買入繼而長揸一隻優質投資項目,係唔使擇日。試想像吓,喺1990年任何一個交易日買入滙豐,經過亞洲金融風暴、 dotcom泡沫爆破、沙士,到今時今日次按引發嘅金融危機,仲揸住滙豐就會肥仔。甚至比做「肥仔」更勁,做曾淵滄教授。

當然,當日我叫大家長揸嘅投資項目就唔係滙豐,而係白銀。

其他嘢跌佢卒之升

大家可能會問:「突然攞番嗰日寫嘅嘢出嚟,為乜?」係因為呢幾個禮拜,街邊經常撞到非常熱情嘅女fans,佢哋用充滿感激嘅眼神,同我話:「孫柏文,好在舊年我有跟你嘅建議,買咗白銀。其他嘢跌,佢卒之升啦!」

好多時,熱情女fans經過一輪讚美之後,就會命令企喺佢隔籬,唔係讀緊大學就係做緊嘢嘅仔女,幫我哋合照。

其實,睇番07年嘅銀價走勢,雖然波幅大,不過都算打橫行。今年,銀價就節節上升。唔通,幾年之後,就有人會話:「冇聽過人講:『如果我喺2007年,某月某日,買白銀就好啦。』只會聽過人講:『如果我喺2007年,買白銀就好啦。』」

07年嘅白銀,就係90年嘅滙豐?

Music to relax to...

尹光 - 少理阿爸




Fatboy Slim - Push The Tempo




MP4 - 老豆咪索K




fatboy slim - weapon of choice



Pink - Get the party started




Christina Aguilera - Fighter (substantial arm waving in this MTV, but for some reason, I don't seem bothered)




Alien Ant Farm - Smooth Criminal

Monday, February 25, 2008

家族風雨 阿哥下台

禮拜五,燈謎日。估一個家族。呢個禮拜,各大報章大篇幅報道關於一個有權有勢家族裏嘅風風雨雨。表面上,個家族只係宣佈,做咗領導人好耐嘅阿哥會退下火線;個家族管理嘅單位,由弟弟接管。其實,自從90年代初,單位失去咗「終極方向提供者」之後,外面已經傳咗好耐,兄弟之間對於個單位未來應該走乜嘢路,有分歧。不過最後「阿哥揸fit」嘅情況,要捱到2008年先至完結。

唔講郭家講古巴


大家如果估個謎底係某間本地大藍籌地產發展商,姓郭家族,咁你哋就估錯。孫柏文其實講緊古巴嘅卡斯特羅家族。由1959年起,自從共產黨叛軍成功推翻當時古巴政府之後,卡斯特羅都係該國嘅領導人。而附近嘅花旗國政府,就卡斯特羅上台不久之後,差唔多立刻實施經濟制裁。花旗國制裁,不過就有蘇聯嘅支持,卡斯特羅就繼續佢嘅烏托邦實驗。不過90年代初,蘇聯瓦解之後,古巴冇咗平價能源,經濟面對巨大危機。卡斯特羅最後迫於無奈,要聽佢細佬建議,小量採納有中國特色嘅社會主義。花旗國政府亦覺得到咗呢個時勢,經濟制裁應該見效,卡斯特羅投降。點知,搞搞吓佢老人家又唔開心,停止再走中國特色社會主義之路。不過卡斯特羅都仲安坐總統府。經濟制裁實施快近半個世紀,卡斯特羅居然可以 outlast十個花旗國總統。嗌幾多次Cuba Libre,經濟制裁都係唔掂。當年,花旗國甘迺廸總統實施經濟制裁有段小插曲,亦能反映當年佢嘅心態。原來,官員一早已準備好實施經濟制裁嘅文件。萬事俱備,只欠總統簽名。國家大事,如果覺得要做就應該即刻做。

經濟制裁得啖笑

不過當年甘迺廸就等咗一晚時間。大家不要以為甘迺廸進行最後斡旋。其實,甘迺廸鍾意食雪茄,最喜愛食H. Upmann 牌Petit Corona型號。佢等咗一晚時間先簽嘅原因,就係因為叫咗佢嘅助手Pierre Salinger一晚之內買晒華盛頓市中嘅嗰隻雪茄。買到1000口就簽。第二朝,Salinger畀咗1200口雪茄甘迺廸。甘迺廸收咗後就簽紙。經濟制裁實施,亦變成歷史。

Thursday, February 21, 2008

美證監面前 中國人含忍

2月10日,孫柏文走咗去維園參加遊行。嗰次遊行,就係網民抗議「生活照」事件爆發之後,特區差佬夾硬嚟,搞到未審過就要坐監。抗議行政執法機關,想繞過司法制度,夾硬進行私刑。抗議執法機關,為達到覺得佢哋「做咗嘢」嘅政治目的,放棄一個被告人應有嘅公義同保障。

噚日,有好多人問我:「孫柏文,點解你要為李國寶同美國證監會單嘢咁嬲?」我可以話,當日我為鍾亦天走出嚟遊行,今日就要為李國寶申寃。我已經到咗開始會諗成家立室嘅年齡;開始會諗如果有小朋友嘅話,佢哋會喺一個乜嘢樣嘅社會長大。

鍾意耍手段迫投降

多,我都唔要求。我只係想啲小朋友能夠喺一個「法律面前,人人平等」嘅世界長大。「法律面前,窮人含忍」或者「美證監面前,中國人含忍」都要全力反對。

噚日我都講過,美證監最鍾意嘅手段係迫你妥協投降,跟住要你封嘴,佢就出一份鍾意寫乜就乜調查報告。最緊要繞過司法制度,達到「做咗嘢」嘅政治目的,用輿論行私刑。

美證監用呢啲手段,已經好多年。花旗國輿論當然唔會照單全收,好多時狠批證監亂嚟。花旗國家政女皇Martha Stewart當年因為唔肯妥協投降,雖然證監原本想砌佢「內幕交易」,點知就連起訴都唔夠證據。之後夾硬告佢「阻擾調查程序」,最後都要坐監做人辦。

好多特區硬膠,例如余若薇、田北俊等等,都叫李國寶辭職、辭職、再辭職。而呢啲硬膠,全因中晒「殖民地自卑毒」,跟咗帶頭要處李國寶私刑嘅pied piper David Webb。而David Webb自己,就當美證監份調查報告係聖經。

為政治目的乜都寫


我講畀大家知,花旗國政府係一個可以為咗達到政治目的,乜嘢報告都可以寫出嚟。求其寫啲嘢,跟住要外國高官下台,你估係第一次咩?不如就去問吓有家歸不得,駐守伊拉克嘅美軍小士兵。

David Webb作為港交所嘅董事,年年都會提供股票貼士。最驚係輸錢,有人入稟美國法院,要告佢。雖然冇牴觸香港或英國法例,最怕佢好似「NatWest 3」三位英國銀行家,Webb返祖家度假時,被引導去花旗國受審。到時就真係報應。

恒隆主席陳啓宗可能以前因為同美證監交過手,知道群情洶湧時佢哋可以幾咁無賴。關於李國寶佢一矢中的咁話:「賠錢送賊」。完全冇錯。

Wednesday, February 20, 2008

李國寶 = 鍾亦天

噚日,孫柏文講過特區執法機關對付「生活照」事件嘅手法。求求其其捉幾個「鍾亦天」,未判監就要坐,就係一個最典型執法機關想繞過司法制度,夾硬進行私刑,對付佢哋眼中釘嘅手法。行私刑後,就可以走出嚟話自己有幾咁勁,做咗嘢。最弊,呢個現象除特區外,全世界都見得到。今日,就為大家提供個外國例子。

2001年,一間叫做Imclone研究抗癌藥物嘅公司,收到花旗國食物及藥物管理局通知,佢哋嗰隻旗艦研究藥Erbitux,需要延遲推出市場。管理局出決定之後嗰日,記得連《華爾街日報》嘅社論都大肆批評管理局「害死」啲需要呢隻藥嘅病人。Imclone嘅股價當然應聲下挫。

點知,當時身家有十億美元,教人煮餸嘅Martha Stewart,就喺管理局宣佈決定之前幾日,賣咗手頭上Imclone嘅股票。億萬富豪Martha蝕少幾多?四萬幾蚊。

跟住點?大家要知道,花旗國人民耐不耐就會瀰漫着一種憎人富貴厭人貧嘅怨氣。同金融業有關嘅執法機關,就爆發「暴徒審判式」嘅執法手段,夾硬嚟,用盡一切方法,都要搵人祭旗。

曾幾何時,Martha同Imclone嘅總裁拍過拖。所以就用以上嘅表面證據,話Martha涉嫌進行「內幕交易」。Martha喺花旗國出咗名硬淨,唔鍾意俾人屈,所以就決定唔妥協。

執法機關一路都搵唔到「內幕交易」證據,最後夾硬屈Martha犯咗幾條「阻擾調查程序」嘅法例。Martha最後都要坐監。至於「內幕交易」?就當冇發生過。不過Martha就變成人辦。就算冇犯法,不過你唔投降,唔肯俾佢任屈,都要死。手法唔似特區啲差佬咩?

就係因我記得Martha Stewart單嘢。我第一次聽到,李國寶被花旗國執法機關話涉嫌「內幕交易」,我已為李國寶擔心。佢哋根本就係暴徒,仲要好毒。最好就係迫你投降,跟住要你封嘴,佢就出一份鍾意寫乜就乜,「伊拉克有大殺傷力武器」式嘅調查報告。最緊要繞過司法制度,達到「做咗嘢」嘅政治目的,用輿論行私刑。

原先,特區人民知道因為根本沒有審過,疑點歸於李國寶。點知David Webb揸住未經法庭審過嘅調查報告,就當係聖經。David Webb真係要三思不同地方有不同執法標準。

Plus ca change...

有時世界越變,有D野就越


現代港女 - Hotcha



第一代港女 - 四朵金花

Tuesday, February 19, 2008

對抗胡亂執法的方法

2006年,世界盃決賽,法國對意大利。加時階段,法國隊隊長施丹,頭槌頂落意大利馬達拉斯嘅心口。雖然,睇番以法文做旁述嘅YouTube短片,聽到旁述員重複又重複咁喊着話:「Mais pourquoi?」真係啓發到寫作題材。

不過,當時我好天真咁諗,一個頭槌又可以有幾多個寫作角度?點知,之後嘅十日,陶傑先生寫咗六篇,從不同角度談論施丹頭槌嘅文章。現在,孫柏文睇番嗰六篇文,都仲會不斷發出「係喎!」聲。同時敬佩陶傑先生嗰種將題材發揮得淋漓盡致嘅能力。一個頭槌,六篇文。

尊重司法制度


到今時今日,問大家有乜嘢話題同當年嘅施丹頭槌一樣,個個知發生咗,不過唔會令戰爭爆發、股市升跌?冇錯,就係「明星生活照」事件。

翻查紀錄,原來呢篇已經係我第五篇講呢件事嘅文。真係希望有一日,能達到我嘅終身目標,能夠有陶傑先生一成嘅功力。

入正題。今次「生活照」事件,其中一個令民憤飆升嘅原因,就係因為警方嘅執法態度。我哋香港人,其實骨子裏非常尊重司法制度,而對任何用手段進行私刑,都會走出嚟抗議。

例如,一個人被警方拘捕,律政司決定控訴,之後被法庭裁定有罪,所以需要坐監,香港人絕對覺得天公地道。不過當警方同律政司,令一個人未被裁定有罪,一個橫睇掂睇都唔似會棄保潛逃,一個好難信會即時威脅社會安全嘅人坐監,我哋就會非常鄙視執法機關。

權宜計失民心

我明白警方為求達到殺一儆百嘅效果,用權宜之計。特別因為以前用同一手段,攻擊啲例如玩黑色幽默「話會炸廸廸尼」嘅人非常有效,所以今次照辦煮碗。不過有如當年拿破崙嘅軍隊一樣,有時會走得太遠,去到莫斯科之後,要夾着尾巴撤退。最後誠信破產,威嚴完全崩潰,市民唔再覺得可以倚靠佢哋。

當然,如今次可以揭警方手段,全賴傳媒、網民嘅齊心協力。不過一旦冇人理,執法機關就會繼續繞過司法制度打壓市民。聽日,就提供一個例子。

「生活照」揭網上樽頸位

今日,孫柏文首先想問,大家有冇集齊啲「明星生活照」?如果有,我想問大家係點樣集齊啲相?從收到第一幅相,到最後嘅幾百幅照片集,收相嘅渠道有冇變?有變,又點解變?

其實,從「生活照」事件第一日爆發。照片嘅傳播方式,不斷在變。首先,事件爆發嘅第一、二日,相得兩張,檔案大小只有幾百kilo,網上討論區就係最有效率嘅傳播途徑。

終極方法燒落光碟

到事件爆發嘅第五日,有十幾張相,檔案大小有幾個mega byte,已經冇乜人去網上討論區傳播照片。

原因當然唔係因啲差佬有效率,而係因太多人瀏覽,所以辦討論區網站嘅server頂唔順,啲人去到個討論區都 load唔到嘢。所以電郵就成為傳播照片嘅主要渠道,亦同時促進港人之間嘅友誼。

事件進展到第二個禮拜,忽然喺兩日之內,有如黃河決堤般,有幾百幅相出現。檔案已大到好多電郵服務收唔到,或者拒收。取而代之就係啲人對人(MSN),點對點(Foxy)嘅軟件。又或者用最終極嘅方法,鬼佬稱之為「sneakernet波鞋網」。即係將啲相燒落隻光碟,跟住着波鞋落街攞畀個朋友。

大家見到,正當要傳遞嘅檔案越來越大,就會不停遇到網上嘅樽頸位。不過問題係每個繞過樽頸位嘅方法,要越來越多嘅科技知識。原先只要識上網就得,之後就要有一個稱職嘅電郵服務。最後就係要識用啲特別軟件。

推動科技最佳環境

雖然,喺呢個情況之下,應該係推動唔識嘅人,學用科技嘅最理想環境。不過一個理性嘅用戶,應該信啲相唔會源源不絕,最終唔學用。

最後,點解唔係上面尹思哲兄寫呢個題材?因為我問過佢,集齊啲相未?佢不單止未有,仲好似漠不關心。試問,唔係想集齊,唔係想即時有最新嘅相,又點會遇到樽頸位?遇唔到樽頸位,又點會寫到呢個題材?

Monday, February 18, 2008

與聯滙之父面談



Come!

Contact: Nicole Alpert at 8101-2112
E-Mail: nicole.alpert@lionrockinstitute.org

獅子山學會舉辦:與聯滙之父 John Greenwood 面談(英文)

詳情:

日期:08年2月19日(星期二)
時間:下午7時至9時
地點:西洋會(中環雪廠街)
費用:每位$250(會員)/$290(非會員)

On: Tuesday February 19, 2008 HKT
Location: Club Lusitano, Central.

John Greenwood, the architect of the linked rate between the Hong Kong Dollar and the US Dollar.

The Lion Rock Institute is delighted to host Mr. Greenwood at an exclusive cocktail party. We hope you will join us

DETAILS:

Date: 19 February 2008 (Tuesday)

Time: 19:00—21:00

Venue: Club Lusitano
27/F, 16 Ice House Street, Central, Hong Kong

Fee: $250/person (Member)
$290/person (Non-Member)


Sunday, February 17, 2008

多謝渣打 債市快蘇醒

今時今日,大家都知世界出現金融危機。相信好多人都問:「究竟啲監管機構以前係咪白糧、瞓晒覺?」我只可以話,佢哋當時冇瞓覺,有履行監管銀行體制嘅責任。其實大家要問嘅,係點解今日唔履行該責任。

例如,監管機構一向以來都有規定啲銀行,收到每100元存款,可以放幾多債。又會規定可以放邊種債,同點放。而啲銀行本身呢幾年嚟都聽聽話話。

擬似銀行系統

大家可能會問:「如果有監管,規定有道理,銀行又聽話,咁點解又會爆發金融危機?」因為呢幾年,啲銀行就創造咗個「擬似銀行系統」。

呢個「擬似銀行系統」理論上同「受監管銀行系統」冇風險關係。不過,就係呢個「擬似銀行系統」出事,而忽然牽連到「受監管銀行系統」,所以先咁大鑊。

例如,銀行為繞過之前講過關於收存款同放債嘅規定,就走出去搞間獨立公司。首先,搵人夾錢做股東,跟住間獨立公司就瘋狂出短期債券,向市場有咁多借咁多。

有錢喺手,間獨立公司就買啲利息收入比自己融資成本高嘅長期債券。最後間獨立公司因發短期債券借錢,所以要不斷還錢。不過只要不斷借到新錢,成本又低過利息收入,間獨立公司就印銀紙。銀行賺乜?分紅、管理費囉。

置死地而後生

如果市場突然唔信間獨立公司手上長期債券嘅價值,間獨立公司借唔到新錢,不過舊債又到期,點算?間獨立公司拍賣手上資產,盡量還錢畀啲債權人。理論上,唔關銀行事。就係因為理論上唔關銀行事,所以監管機構冇得監管。

呢啲銀行搞嘅「獨立公司」,就係大家熟悉嘅SIV。問題就係點解啲監管機構,今時今日容許好多SIV資產同負債,被放入啲銀行。監管機構係咪瞓晒覺?

相信大家都知道點解啲監管機構容許呢個情況出現,就係好多SIV買咗嘅長期債券唔值錢,不過如果全世界都要將自己手上債券以真正價值入賬,大家就會一齊死,因為大家都資不抵債。

不過,如果冇真正市價,那裏會有成交?債市因此心臟病發,完全停頓。

所以今日孫柏文一定要多謝渣打銀行,早幾日決定跟隨規定唔救佢哋個SIV。個SIV就需要清盤,資產出賣,甚至公開拍賣。到時就算非常賤價,起碼有價。債市就可以像火鳳凰般,置諸死地而後生。


Saturday, February 16, 2008

勝利!

We sure wiped that smirk off that face.
hor hor hor...



Photograph on 4th of Feb 2008



Headline on the 5th of Feb...
Time sure flies by fast doesn't it?

Thursday, February 14, 2008

債保商必向畢菲特say no

孫柏文相信,同我同一日生日嘅畢菲特喺大家心目中,一向以來只係一個「股神」。佢只係個識揀平股,跟住揸一世嘅投資者,盡量避免做買賣。我可以同大家講,畢菲特已經成功呃咗你。

畢菲特,冇錯係個非常精明嘅投資者,而如果有能力揀得到平股,長揸係最好嘅策略。不過,如果有好機會,畢菲特可以好似啲大鱷一樣玩財技。甚至比啲大鱷玩得叻。呢幾日就有個好例子。

冇得你情我願

前晚,畢菲特突然向啲債保商話:「你哋受保嘅債券,一旦發債借錢嘅單位冇能力還,你哋根本冇能力賠錢。不如咁,你哋呢班債保商畀錢我,搵我受保晒一旦出事、你哋冇能力賠錢嘅各省市債券。條件係你當日收嘅保費,我要收1.5倍。」

作為一個債保商,冇能力賠就係冇能力賠,根本就係執笠收場,點解要再畀錢畢菲特?

債券有得賠,益嘅係債券持有人,債保商根本冇着數。所以債保商一定向畢菲特say no。噚日已經有債保商叫畢菲特fuck off。

大家可能會問:「畢菲特咁醒目,點解會向債保商提議,一個佢哋一定唔會接受嘅方案?」理由係畢菲特知道,債保商喺你情我願嘅情況下,一定唔接受。不過,啲債保商冇得你情我願,佢哋面對好多監管機構。

畢菲特可以拯救好多債券持有人,啲監管機構一定希望救得幾多就幾多。所以畢菲特知道債保商將會面對監管機構嘅壓力,送錢畀畢菲特白袋。雖然人人知道啲債保商已患絕症,不過裏面嘅人未來都要搵工。搞寸個party,就連可以上救生艇嘅人,都要拉埋落水,未來就冇運行。畢菲特真係好勁。

支持環保武器?

最後,有個朋友話:「你前日笑啲環保分子笑得唔啱。佢哋唔係反對啲女性覺得最浪漫,例如鮮花嘅『無謂』禮物,佢哋只係反對唔環保。

例如,冇乜嘢比戰爭更無謂,古希臘有個儍佬,佢為咗條女Helen揮軍打Troy。因為話到明係木馬屠城記,啲木可以循環再用。環保分子一定支持!」Green weapons就ok?

Tuesday, February 12, 2008

Selma vs. Gill



VS.


Lies will always catch up to you...

Retribution will always come to those who sets themselves up for it.
No matter how late it comes.

送花 環保 經濟學

孫柏文以前讀大學時係主修經濟學。一個人讀經濟學,只要個心態係為學嘢而唔係為成績,就會慢慢開始擁有一套能分析世界現象工具。特別係遇上睇落啲人「非理性」嘅現象,都可能經過經濟學分析之後,發覺係完全理性。

噚日,就有個驚天地泣鬼神嘅新聞,令我啲分析能力有機會出鞘。呢單新聞就係被《金手指》一欄譽為全特區「至硬膠」組織──環保觸覺,做咗個關於情人節送花嘅調查。

各大報章,都以調查最搶眼嘅結論「75%女士情人節不想收花」為題。大家第一個反應可能係:「環保組織做調查,一定係想用本來『非常中立』嘅調查,推動組織嘅目標。只要令買花嘅男人,覺得香港女性有強烈環保訴求,唔想收本身非常無謂嘅花,就自然少啲花出售。」

如果你真係咁諗,小心!環保觸覺今次凸顯嘅唔係香港女性嘅環保訴求,而係佢哋強烈嘅港女特質。兜口兜面問就一定話「唔要」,不過到情人節當日你哋試吓唔送?冇錯,會引起事故。

咁點解環保觸覺要為特區社會製造不安?好多環保硬膠都覺得,人類就係污染嘅唯一源頭。亦即等如滅絕人類,就係解決污染嘅最好方法。唔送花,又點媾女?媾唔到女,又點繁殖呀?其實環保觸覺先至係最高明嘅環保組織。

又或者只要將所有「想收花」、「鍾意被人tum」嘅女性DNA滅絕,世界上就會剩下環保觸覺女性成員嘅DNA存在。環保觸覺最想見到嘅世界,就係嗰啲災難片中嘅世界。就係早排Will Smith有份演,講述人類絕種嘅電影《I am legend》。電影嘅口號就係「The last man on earth is not alone」,最後一個男人同怪獸戰鬥。

啲怪獸咪就係環保觸覺嘅女性成員!因為佢哋唔會咁偽善,有任何化妝品,鞋唔會多過一對,冲凉家用肥皂,絕對唔會搭車等等…

我來點醒高盛CFO

首先,孫柏文想同大家拜年,祝大家今年金銀滿屋。因為啲國際銀行、金融機構喺鼠年都會繼續「有壓力」,所以買實貨金銀擺屋企,都係有根有據。

上個禮拜嘅春節假期,亦係滙豐(005)因次按發出該公司歷史以來第一次盈警嘅一周年紀念。咁就一年。相信就算可以用個腦預測到有咁多風風雨雨,都冇可能令個心安然接受。

去馬場驚買錯馬

事態發展至今,債市嘅心臟病仲未醫番好。唔好話價差,就連成交都冇乜。可能因為咁,上個禮拜四投行高盛嘅財務總監David Viniar就出嚟,公開哀求搵人幫佢指點迷津。

Viniar話,債券價格現在預測緊「worst recession最差嘅經濟衰退」。唔係「好差」,係「最差」。佢仲話:「Total disconnect between the equities market and the credit market股價同債價反映嘅未來背道而馳。」

我見到Viniar總監咁可憐,唔明點解股價雖然差勁,不過債價仲衰,所以今日就點醒吓佢。有如隔籬《國際視野》嘅王冠一兄成日搞笑咁話,每一個資產市場,就有如一個賭場、投注站。呢排股市面對嘅壓力,就係因為啲賭仔擔心盈利下跌。即係去馬場驚買錯馬。

買莊閒都賠三倍


如果用「百家樂」來比喻債市,今時今日債券嘅回報率,就係買「莊」或「閒」都有三倍。

大家可能會話:「兩邊都賠三倍?咁咪好着數?唔落注咪唔理性?」大家以上嘅問題,就係困擾Viniar嘅問題。

啲人唔玩「債市百家樂」,係因為唔知道買中有冇得賠。唔係驚賭場執笠,就係驚啲啤牌有事。甚至驚等收錢時啲差佬冚檔(希拉莉講過,希望見到持有次按債權嘅人,就算對方停供,都唔可以收番啲屋)。

所以淨係睇債價,跟住就話債市預測緊啲乜乜物物,根本上仲係生活喺爆發金融風暴前嘅「正常」世界。Viniar叔叔,希望你睇完呢篇文之後,可以同現實接軌。

新相續浮面 差佬續做show

厲害!

前日,孫柏文先至啱啱懇求過警務處處長鄧竟成,唔好硬膠。唔好求求其其,為咗做show、做「做啲嘢」,拉啲冇能力打官司反抗,拉咗都解決唔到根本問題嘅人嚟祭旗。點知篇文一出街,最鍾意逮捕14歲小朋友嘅商業罪案調查科,就即刻見功!

班高級差佬即刻開記者招待會,仲要搵咗警務處助理處長(刑事)黃福全出嚟講嘢。我睇電視,見到黃福全,就發覺佢好鬼似花旗國總統小布殊。佢兩個面上都經常呈現嗰種忍不住沾沾自喜嘅smirk。

不過黃福全咁得戚,都唔係冇理由。警方一眾神探,以高速度將「明星影相」案破解,將佢哋覺得係「源頭」嘅人拉咗。速度之快,有如03年花旗軍成功「佔領」伊拉克。

其實,前日警方開嘅記者招待會,大家只要想像改喺航空母艦嘅甲板上舉行,再加條大大寫咗「Mission Accomplished」嘅橫額喺後面。黃福全根本就係港版小布殊。

利世民話黃福全「有官威」,我有啲怕被差佬搞嘅「相片朋友」直情話佢寸。我話:「So what?」寸,ok。做到嘢就得。做到嘢加寸,只係「有性格」。只要開完記招之後,再冇新相浮面,就等如做到嘢。不過如果做唔到嘢,只得寸,咁就硬膠。

有人批評警方,處理呢件事「太過高調」,理由係製造白色恐怖。我完全唔同意。警方處理呢件事冇錯係「太過高調」,冇錯製造白色恐怖。不過呢啲統統都唔係批評警方嘅理由。

真正要批評「太過高調」嘅理由,係正當警方不斷「做啲嘢」,不斷開記招報喜,不過不斷有新相浮面,警方就等於高調落自己面。啲差佬係咁「高調」被兜巴星,會影響警隊喺市民心目中嘅威信!不過我相信,新相一日繼續浮面,黃福全就算拉晒特區所有會上網嘅人,都冇所謂。

所以初四嗰日,為保衞互聯網自由,維園見!

Friday, February 08, 2008

二月十日遊行.反對警方選擇性執法



遊行資料

集合時間:二月十日(星期日、初四) 下午一時 (請各位準時出席!)

集合地點:維園南亭(近皇室堡)

出發時間:下午一時半

遊行路線:沿怡和街及軒尼詩道 [地圖]

遊行終點:軍器廠街警察總部門外

完結時間:下午三時至三時半

衣著:不限

孫柏文 is going, See You There!


Tuesday, February 05, 2008

預祝大家新年廣結良緣!

「如果只係畀個copy朋友睇,咁就唔算發布」

點隻歌畀黃福全聽...去片!



重申一注獨贏買白銀

舊年,孫柏文作為一個財經口水佬,有時感受到一份深層次嘅孤獨感。7月尾叫大家沽滙豐,定112.5元目標價。除咗我非常尊敬嘅王冠一兄之外(多謝冠一兄!)不但冇人附和,仲要上電視台畀青姐胡孟青用雞毛掃打屎忽。

再講,我一向自稱為「白銀戰隊隊長」。對於招攬新隊員嘅難度嚟講,舊年我諗除咗美軍之外,就到「白銀戰隊」。就算到8月開始爆發國際信貸危機,白銀同其他例如股票嘅資產一樣,價格受壓,冇乜支持。

沽滙豐獲認同

唯一有好多人信嘅建議,就係我叫大家買中油香港(135)。不過,呢隻由建議日嘅6元一股,就好唔順利咁跌至噚日收市嘅3.84元。

不過今年嘅第一個月,我嘅預測能力好似有啲轉機。雖然中油香港仲係令大家同埋自己非常失望,不過滙豐跌同白銀升嘅預測,就越來越多人認同。

「一注獨沽滙豐」差不多到目標價時都講過,我由全香港睇滙豐睇得最淡嗰個,已變成一個溫和派。理由唔係我改變睇法或目標價,原因係因為其他財經口水佬比我睇仲淡,啲目標價越出越低,相比之下我就變成個溫和派。

美元跌金銀升

最後,今時今日我已經毋須要積極招攬「白銀戰隊新隊員」。孫柏文去到任何地方,都有人想入伍對抗「紙幣狂魔」。呢一刻,花旗國面對4%通脹,利息就三厘,負利率仲加埋世人對銀行體制出現信心危機,白銀跟黃金就變成資產避難所。

以前出於貪念買金銀嘅日子,已經正式畫上句號。上世紀80年代,金銀最後爆升嘅動力,係來自世人對美元信心開始崩潰,來自恐懼。大家已經開始見到呢個現象,所以08年至今,金銀走勢比股票強。



所以,重申一注獨贏買白銀。

建議有效限期:2016年3月6日 目標價:120美元一盎斯。

Monday, February 04, 2008

咁叻又唔拉影相嘅人?




鄧竟成,你唔好硬膠得唔得?呢次「影相」事件,已經有個好明顯嘅效果。邊個講大話,屎忽就被打,邊個正硬膠,即刻冇得拗。

上個禮拜日,第一幅相流出。相中女藝人唱片公司,一個100%互聯網興起前訓練出來嘅公關,就大大聲… I mean指定動作咁話:「移花接木照!」翌日,個個照單全收。

原本冇互聯網,主流傳媒控制嘅世界,故事就會完。

就算唔信報章報道,淨係聽收音機娛樂圈評論權威查小欣,都信係移花接木照。佢都係好似新聞稿讀稿員一樣,照單全收完,就嘔番出嚟畀聽眾。唔好話經過大腦,大腸都未到。就係有互聯
網,你哋話係個別移花接木照,相中嘅事冇發生過。佢就會出連環圖去踢爆。

有人話《蘋果日報》公信力「唔係第一」,我只可話「公信力」係主觀意見,啱定錯就係客觀現實。如果遇上公信力第一,不過報道錯晒,就會有班全香港最gullible嘅長期讀者被騙。

正當一個又一個obsolete嘅前輿論領導「中招」。佢哋就轉移戰線,大大聲要求政府「做啲嘢」。唔係要迫互聯網供應商記錄所有網上互動,就係要差佬拉人。

「做啲嘢」基本上就係一個大話。即係政府作出一些,完全解決唔到根本問題嘅行動。只係做show。「拉親祭旗,都係冇得反抗嘅人」根本無需要主流傳媒話。各位阿sir只要問吓自己嘅小朋友就聽到。

事件發展到現在,已達非常嚴重嘅地步。

我想提醒鄧竟成同政府,特區後生嘅一代,現在非常憤怒。
個個估換轉係岳少攞唔攞到bail?法律面前,人人平等?咁叻又唔拉真正源頭,影呢啲相嘅人?

今時今日最嬲嘅,就係識I.T. 嗰班後生仔。佢哋已經滲透入特區各大機構。想支持政府繼續做show嘅人,你嘅email戶口安全嗎?

Sunday, February 03, 2008

後勤緊張 前線遭殃

噚日,孫柏文同以前股票行一個靚女舊同事食晏晝。當年我係分析員,佢就係日日對住啲客嘅sales。雖然我已轉做財經口水佬,不過佢仲係sales,只係啱啱轉咗股票行。佢話以下對白出街,就會同我去date,今日原諒我公器私用。

孫柏文:點啊你?好嘢啦!轉咗入去全香港最好嘅股票行。

靚女:原本真係好好,不過呢排好難做。

孫:What's wrong?

靚女:哎。都唔知道公司發生乜事,會計部、settlement、盤房受到好大壓力。啲back office一緊張起上嚟,我哋前線sales好難做。

你知,我賣好多結構產品畀啲客,咁以前公司一路對買賣交收都有指引。例如,關於「時間」嘅指引,就會話sales、盤房、交收等嘅每一步,應該喺某段時間內完成某啲工序。

好多時兵荒馬亂,自己又手腳慢,跟唔住啲指引嘅deadline,當然唔想,始終希望做得成買賣。聽聞,交收部聲稱唔夠人。成交量一升,後勤就打交,個個就按本子辦事,「最理想指引」變成金科玉律。上個禮拜,我就做慢一步,原本已同個客話做成咗買賣,點知後勤話違規,唔算數。仲要直接出電郵畀個客,話我違規所以先至做唔成交易。

孫:跟住點啊?

靚女:跟住點啊?可以點啊?俾個客鬧到瞓低,佢仲話要換sales。

孫:咁大鑊?

靚女:哎哎。總體上sales係一間股票行嘅靈魂。不過,任何sales都係可以取代,冇一個sales大過公司。喺後勤手忙腳亂之際,惟有一齊按本子辦事。今時今日,所有sales就算見到啲非主流、貼市嘅套戥機會,都唔會叫客買,費事做唔切。家個個填定form,做canned trades算。哎哎。唔開心嘅嘢唔想再講,咁你呢排點?

孫:嘩大姐!好彩轉咗行,做報紙撰稿員。股票行真係難撈。