Monday, April 30, 2007

檸檬茶

致改卷員:孫柏文唔知寫乜嘢好,你肥我啦!

There are other model answers here (apple pie), here (腦花花) here (渣估), here (馬沙) and here (Wan Sez Zit) I encourage everyone to write a piece and publish it, and if you do, please send me the link so that I can link it! = )

This has the biggest proof of our creativity as the people of Hong Kong... Who says we can't write!

Go 腦花花!

Crocs成功原因

鱷魚呢種動物,真係有好多人鍾意用來做公司名。我哋特區有個叫鱷魚恤,花旗國就有賣膠鞋嘅Crocs。早幾日,就有新聞話鱷魚恤已經入稟法院,話要控告Crocs「侵犯商標」。其實,鱷魚恤咁做孫柏文好 支持,因為法例要禁制「侵犯商標」嘅原因,係為咗避免有其他人可以用你嘅品牌「魚目混珠」咁搵錢。

今日,為大家提供咗Crocs喺舊年上市至今嘅股價走勢圖,大家都會見到Crocs嘅股價節節上升。講真,賣啲五顏六色、奇形怪狀、危害兒童嘅膠鞋,又點樣可以咁好賺,不過,佢哋又真係可以季季交出成績。上個 禮拜之前,孫柏文真係諗唔通點解,好想拋空Crocs。

不過,鱷魚恤入稟法院嘅消息一出,我就卒之明白晒。原來,Crocs嘅成功,全因盜用咗林百欣先生多年來辛辛苦苦建立嘅品牌。如果大家睇真啲兩間公司嘅商 標,就會發覺,兩個商標簡直係一模一樣,連條鱷魚望嘅方向都一樣!

當年,有間本地公司見到法國Lacoste嘅商標,因而得到「靈感」,都冇好似 Crocs咁厚顏無恥,連鱷魚望嘅方向都抄埋。所以最後,衷心祝願鱷魚恤,喺法庭可以討回公道,成功禁止Crocs嘅行為。到時官司一贏,所有由舊年至今 睇淡Crocs嘅人,就會得到平反!

銀行版Enron

以前,有個音樂組合LMF,佢哋有隻歌叫做「大懶堂」,隻歌裏面有句歌詞:「想,我都好似想中咗頭獎,有嘢唔想做,老細又吹我唔脹。日日等出糧,冇乜嘢需要緊張。就係咁嘅樣,乜都唔使撈就至理想。」講真,孫柏文相 信大家都同我一樣,唔好話唔想做嘅嘢就唔使做,最好就係完全唔使做都有糧出、有錢賺。不過,原來現在有一門生意,不但唔使做,連錢都唔使收都有得「賺」。

大家可能會問:「嘩!咁勁!不過點解總覺得有啲唔多妥?」其實,近年最出名錢都唔使收都有得「賺」嘅公司,就係花旗國嘅Enron。Enron嘅方法就係 將自己公司旗下嘅資產重新估值,所以Enron當年最「賺錢」嘅部門,就係佢哋嘅會計部,人人都有好多花紅。

今時今日,有個花旗國網站 itulip.com踢爆,話好多做樓宇按揭貸款嘅花旗國銀行都係「唔收錢都有得賺」。喺花旗國買樓,有一種貸款係唔需要還本金,以前都介紹過,叫做 balloon loan,不過原來有種貸款唔好話唔使還本金,連利息都唔使畀晒。當然,如果連利息都唔使還晒,欠款就會越來越大。而欠款嘅增加就叫做negative amortization(neg-am)。

例如,一個人借10萬,不過利息都還唔晒,所以一年之後就欠11萬。多出來嘅1萬,就係neg-am。咁銀行 可以做到「唔收錢都有得賺」嘅原因,就係呢啲neg-am原來可以全數當盈利。

風暴才啱啱開始打

大家可能會話:「只要最終還 款,幾時當盈利,都只係一個時間問題。」係,同意,「只要最終還款」就冇問題。而睇還款紀錄,借咗錢嘅人確實真係每個月還錢。不過我亦提醒大家,如果呢班 人連息都唔使還晒,都出現還款問題,咁就大鑊。

仲有,雖然欠款可以越滾越大,去減低還款壓力,不過始終都有極限,根據行規,個極限就係樓宇價值嘅 120%。極限一到,借款人就要開始還息同還本金,即係每月還款額大幅上升。而現在撞正樓價下跌,借款額越滾越大嘅極限亦細咗,可以話係屋漏兼逢連夜雨。

最後,大家可能會問:「究竟呢啲neg-am收入已經有幾多?」以最大次按銀行Washington Mutual來計,neg-am收入已經佔咗總盈利嘅46%,有啲仲超過100%,即係冇neg-am就會蝕。呢場風,啱啱先開始打,仲會有排煩。

Friday, April 27, 2007

和黃3 又硬膠

前日,孫柏文收到一份新聞稿。作為一個傳媒工作者,平均每日收嘅新聞稿,分分鐘可 以炸爆個電郵In box,所以好多時收到新聞稿之後,掃視一下,發覺唔關我事,就會順手delete。例如,一間巨型上市公司推出新產品,除咗會將新聞稿寄畀「港聞消費 版」同事外,亦會寄埋去財經版,所以好多時我就會收到啲只有消費角度嘅新聞稿。今日想講嘅新聞稿,就係呢種。

實不相瞞,令我細心睇呢張新聞稿嘅原因,係因 為發放嘅公司係和黃3嘅X-Series。我曾經叫過大家「一注獨贏買和黃」,理由係3提出「文化大革命」嘅X-Series,令我覺得3卒之明白,點樣 先至可以成功售賣無線寬頻服務,所以就細心睇咗。不過,我批評過X-Series嘅推銷手法極有問題,而噚日嗰張新聞稿,又再次令我想去和黃,搵負責 marketing嘅話事人,跟住大巴、大巴咁星落去。

3嘅新聞稿話,「獨家推出『Google移動搜尋』」,我第一個反應係:「Google得3有? Google居然封殺其他電訊供應商?Larry,tell me it's not true!又話Do no evil!」所以,我第一時間搵隔籬《案內人隨筆》嘅尹思哲兄問:「3話得佢哋獨家有Google,真定假?」唔係用3嘅思哲兄聽到,就用自己部手機上 網,去咗www.google.com/pda嗰度,跟住就話:「唔係啊,我都得,你睇清楚啲。」我就答:「真係咁寫!」

講得多 反效果

事 件已經昇華為一個疑團,所以我就打電話畀3,問個清楚。原來,「獨家Google」嘅意思,係X-Series嘅瀏覽器,獨家安裝咗個捷徑short cut key,大家只要一按就可以Google,同埋用Google時,佢畀嘅「search result」網頁係唔計入用戶數據傳輸限額裏面。

聽完,我又打電話畀思哲兄,同佢解釋,佢就問番我:「吓,乜3啲手機冇bookmark呢個一按功能 咩?」我問番3,佢哋話部部手機都有。思哲兄再問:「X-Series唔係任瀏覽咩?」冇錯,係unlimited browsing。結論即係3又硬膠,想用Google賣廣告。我曾經多次話過,推銷「無線寬頻上網服務」,根本無需要講上網可以做啲乜。

如果3話「現在 可以用Google」,個反效果就係「原來家先至可以用Google呢啲basic function,咁仲有啲乜唔用得。算,都係遲啲先用3。」其實,3可唔可以簡簡單單學啲普通寬頻服務供應商咁,講有幾快就算,因為雖然和黃負責 marketing嘅話事人唔信,不過我哋真係已經識上網有乜用!

你同我講,究竟有乜分別!!!

迎熊貓 點回禮

早排,孫柏文講過有隻喺德國叫做Knut嘅北極熊大熱,不過就累死咗隔籬隻熊貓。 咁啱得咁蹺,祖國噚日送咗一對熊貓嚟香港,可惜香港市民對熊貓嘅來臨好似唔係好熱烈歡迎。大家可能會問:「點解北極熊就大熱,熊貓就被冷落。」上次都講 過,原因就係中國政府嘅保育政策成功,穩住咗熊貓嘅繁殖率,熊貓就好似90年代嘅科技股一樣,炒完晒之後價值下降;而北極熊就好似e家嘅原材料股一樣,因 為全球暖化而食中個浪,被炒起。

不過,我今日想講嘅唔係IT同原材料股,其實,今日孫柏文想宣布從今開始,會不定期咁做一個「如果孫柏文係特首系列」,就當為自己未來嘅競選政綱鋪路。雖然我仲未到30歲,距離《基本法 》要求嘅40歲仲爭十年多,除非中央釋法,釋到「四十歲」連我都可以做特首。

編號象徵前殖民地

講番正題,孫柏文在 此承諾,如果做特首,見到今次四川送咗兩隻熊貓畀香港,他朝一定回禮,所以未來香港嘅海洋公園會開個「應用生物科技中心」,研究點樣大量繁殖中華白海豚。 事成之後,回番兩條中華白海豚畀四川,同時為咗凸顯香港嘅前殖民地身份,兩條中華白海豚嘅編號,分別係「007」同「008」。最後,希望白海豚保育政策 成功,令到四川人民對中華白海豚,好似香港市民對熊貓一樣。

Thursday, April 26, 2007

王晶 vs BT洪流

王晶先生在電影文化界常被視為二流甚至下流,但我哋唔可以否認,香港人睇佢嘅戲,係會被牽引出喜怒哀樂,呢種能力非一個二流或下流嘅人能夠做到,但佢就有呢種能耐。

王晶作品之所以咁成功,係因為佢嘅電影就係一塊照妖鏡──將香港人最醜陋、最矛盾嘅一面,赤裸裸咁呈現出來。孫柏文都 好似大家一樣,對佢嘅認識,係從電影中佢嘅角色而來,例如老千片中嘅老奸巨滑,或者係追女仔系列中嘅好色之徒,但幾日前,我有機會親睹一面,仲係要做番佢 自己──漢傳媒(491)股東特別大會上,佢以漢傳媒行政總裁嘅身份出席。喺記者發問時間,我好想將心中對於傳媒、對於創意工作嘅問題,問吓呢位前輩。

因 為早前我去立法會,出席3億元電影基金嘅諮詢會,提出目前創意工業面對科技洪流,一個工業如果需要資助先可以生存,不等於呢個工業嘅products根本 冇人要咩?與此同時,政府卻話,要揼水拯救,等同鼓勵後生仔入錯行,到時基金彈盡,呢班入錯行嘅後生仔更加死路一條。當日我喺立法會見到十一個電影人,但 無論佢哋嘅聲線及語氣幾咁積極肯定,但最終都係話,「最重要係政府立法打BT。」所以,我想知王晶呢位喺商業上咁成功嘅前輩,點睇個創意工業,於是就問 佢。

為股東 乜都試

王晶話:我會繼續拍劇拍電影。不過,我覺得拍電影已經冇得做,咁啲劇集同電影會唔會有product placement?王晶:有諗過,為咗股東利益,乜都要試。對於佢嘅積極、開明態度,我都有幾分感動。呢個時候,王晶又補充:我哋主攻大陸市場;大陸市 場龐大,我哋唔可以一條橋食到尾。一個香港藝人無論喺呢度有幾紅,過咗長江以北可能已經唔出名;去到黃河以北,啲人仲以為

唔再用video形式

講到呢度,我忍唔住問佢有冇作品通唔過審查。佢話:未試過,不過為咗股東利益,如果覺得過唔到,會喺度橋嗰陣時決定唔做。

而事實上,王晶過去嘅作品,已經證明佢好夠膽在審查制度下,挑戰香港人嘅價值觀。只不過,喺大陸嘅審查機制下,最可惜嘅就係佢為人民做照妖鏡嘅角色已淡化,嗰種以自嘲去紓緩社會壓力嘅效果降低,祖國人民嗰碗心靈雞湯搞到淡而無味。

我問佢嘅最後一個問題係:在商言商,漢傳媒面對BT及Youtube呢啲科技嘅挑戰,佢會點做?王晶作為資深電影人,當然一開始就講咗個電影從業員嘅「指定答案」:希望政府立法打BT。不過,佢嘅聲線就令我覺得標準答案之下嘅實質層面係──咁易就好!

跟住,佢提出較積極嘅做法:其實,我哋已經唔將劇集或電影以video形式賣畀消費者。如果有個人咁神心,集集睇集集錄,然後製成BT上載同人分享嘅,咁佢咪叻仔囉!

嘩! 一聽到,就已經覺得佢勁!呢個係我第一次聽到一個電影人採取咁積極嘅態度、為咗科技洪流帶來嘅挑戰而去變陣。雖然我知道,呢個唔係百分百完美嘅計劃,但絕 對算好嘅起步點,好嘅開始。佢加入漢傳媒只不過幾個月,所以仲未見特別嘅成績,但作為一個久唔久會扮《精裝追女仔》入面被收縮水揦到四肢抽搐嘅馮淬帆咁猛 叫身邊女性「姐姐,姐姐」嘅麻甩仔,我絕對期待王晶先生嘅佳作。

Wednesday, April 25, 2007

江 西 銅 Own Goal 王

大家作為《金手指》嘅fan屎,都知道孫柏文喺兩個禮拜前4月10日曾經叫大家 「一注獨贏買江銅」。之後,江西銅業(358)就喺4月19日出全年業績(幾好),同埋喺4月23日出07年首季業績(唔好)。噚日,我原先想全神貫注睇 吓點解江銅喺07年首季嘅業績咁差,不過因為好掛住我八歲大嘅姪仔Louis,所以就走咗去探我叔叔同嬸嬸。當然,為咗減少自己「唔做嘢」嘅罪疚感,我就 帶埋嗰份首季業績報告去睇。

我去到叔叔屋企,就見到Louis着緊件紅色波衫。相信大家同我一樣,都好鍾意足球,所以都可能聽過一對叫曼聯 嘅足球隊,而Louis着嘅紅色波衫,就係曼聯嘅波衫。冇辦法,Louis老竇即我堂哥,九十年代喺前宗主國讀書,被當年嘅曼聯深深吸引,所以變成fan 屎,令Louis有好多件曼聯波衫,可以由頭笠到落腳。嬸嬸話,當年Louis嘅屎片都有曼聯嘅logo。

見到Louis件波衫,我就問佢 知唔知乜嘢係「曼聯」,佢望住我,跟住就開始唱:「glory, glory Man United...」我又問佢鍾唔鍾意曼聯,佢就話鍾意巴塞隆拿,不過因為我堂哥迫佢,所以先至着曼聯嘅波衫。跟住我話:「其實,曼聯踢波可以好好睇,等 我畀你睇吓。」講完我哋就走去部電腦度,跟住上Youtube網站,搵晒當年曼聯門將巴夫斯Barthez啲蝦碌鏡頭畀Louis睇。

大 家可能唔知,不過喺千禧年代初,睇曼聯踢波,往往全場波最有娛樂性嘅一刻,就係被稱為「加利仔」嘅後衞Gary Neville,交波畀當年曼聯門將巴夫斯。好多時,就算前鋒、中鋒幫曼聯入波,都會因加利仔同巴夫斯蝦碌、擺烏龍own goal,所以令到球隊最終輸波。Louis一路睇,就一路笑,我見佢睇得咁開心,所以就去咗睇江銅份首季業績報告。

原來,江銅嘅收入升咗 好多,不過因為成本支出升得仲勁,所以令盈利倒退。大家要記得,銅嘅平均價喺07年首季比06年首季升咗23%,開銅礦嘅成本就係買機器、請工人、買燃油 等等,如果一間銅礦公司乖乖地,簡簡單單將自己開採嘅礦石提煉,將銅產品賣出,只要銅價錢升,盈利就會升。因為開礦成本往往比礦產價格波幅細。

大家可能會問:「咁點解江銅嘅成本升咗咁多?」其實,雖然佢哋想將盈利倒退嘅責任推卸落「加稅」度,不過加咗嘅稅連幾千萬都冇,點樣解釋嗰幾十億元嘅開支?睇報告,江銅話係因「相關原料單位價格上升」所以先至令成本升咗咁多。

雖然江銅冇在解釋,其實,應該係因為江銅過份投資喺「可提煉生產量」,遠遠多過自己開採銅礦石嘅需要,所以向其他人買礦石提煉。不過因為礦石價格升幅比起銅價仲勁,所以提煉就要蝕本,情況有啲似中石化。

給江銅的一封信

其 實,提煉成本升,不過又唔可以轉介畀消費者嘅原因,係因為提煉係一門只要有錢就可以做嘅生意。喺祖國資金氾濫嘅情況之下,好多人都可以進入提煉銅嘅生意, 令營商環境非常困難。睇到呢到,Louis見我愁眉苦臉,問我乜嘢事,我將江銅嘅情況講畀佢知。話銅價升等如前鋒入波,不過投資錯誤就等如擺烏龍。 Louis就笑「江叔叔」好似加利仔同巴夫斯,我話真係好似搵咗佢哋做管理層。最後我問Louis究竟知唔知「江叔叔」應該點做,佢就畫出來,我就應承以 公開信形式畀「江叔叔」睇,上面就係Louis嘅信。

Tuesday, April 24, 2007

三歲小童飲咳水出事

啱啱早幾日,發生咗單懷疑醫生開錯藥,話咳藥水入面含酒精,有個三歲小妹妹飲咗覺得唔係好舒服。其實,酒精喺人類歷史上好重要,除咗李白蘇東坡呢啲詩人詞 人,飲完酒吟詩吟得流暢啲,或者靠酒精撮合唔少情侶之外,其他功能仲包括消毒同做揸車嘅燃料。

大家可能會問:「呢幾種酒精有咩分別?」其實酒精分甲、乙同 丙醇,用嚟飲同做揸車燃料嘅都係乙醇,冇乜分別。不過用嚟做開車燃料嘅,俾人刻意咁整到有毒,所以唔飲得。而消毒藥水係丙醇,同甲醇一樣,係唔飲得嘅。

孫柏文
聽到咳藥水入面加入酒精,只要係乙醇,我都覺得冇乜問題,因為,酒精可以話係最原始嘅止痛藥,美國最暢銷嘅咳藥水Nyquil入面,都有10%乙醇。所以,咳藥水入面有酒精,只要係乙醇,孫柏文一 啲都唔覺得出奇。

奇就奇在,嗰位醫生會開有酒精成份嘅藥水,畀三歲大嘅小朋友,佢飲咗酒精覺得「揦」,就好似我細細個第一次用李斯德林漱口一樣,都會覺得 好「揦」,因為李斯德林漱口水有30%係酒精。不過講到尾,都係個醫生唔啱,因為政府化驗完之後,發覺咳藥水入面有70%係外服火酒,唔係可以飲用嘅乙 醇。雖然政府冇講明係唔飲得嘅甲醇或者丙醇,但係作為病人,以後睇醫生都要提出疑問,唔好盲信,每隻藥最好都問清楚,同埋上網check下有咩成份,以策 萬全。



公司賄賂記者的方法

噚日,孫柏文有幸同三位前輩共晉午餐,獲益良多。三位前輩其中兩人仲喺傳媒業工 作,一個去咗上市公司做公關。食飯嘅時候,聽咗好多佢哋喺壕溝戰鬥嘅故事,衝鋒陷陣、有血有淚。佢哋分享當年六四嘅經驗,更令我呢個後輩覺得傳媒業嘅偉 大,不過,講番六四嘅事,就凸顯佢哋食鹽多過我食米。因為其中一位前輩問我:「當年你幾歲?」我就用弱小嘅聲線答:「當年我讀緊中一。」我仲記得問過我老 竇:「今日真係唔使返學?」

其實,除咗六四嘅經驗之外,嗰位去咗上市公司做公關嘅前輩,都有分享內地傳媒業常見嘅習慣。因為佢嗰間公司主要業務都喺內地, 同時經常要同傳媒接觸,所以做公關嘅前輩對內地傳媒業,特別係嗰啲壞習慣瞭如指掌。

原來,內地記者去啲公司開嘅記者招待會都會同香港一樣,收到一份夾喺文 件夾嘅新聞稿。不過唔同香港,呢個文件夾裏面好多時候都會有封利是。前輩話,佢啱啱接任公司公關職位嘅時候,佢老闆曾經問過開記者招待會要唔要封利是,前 輩話:「你唔要我喺呢度打工就可以。」呢位前輩,絕對有份向祖國同胞發揚我哋香港獅子山下嘅ICAC精神。

港人背上四個英文字

聽前輩話,如果係一般嘅記者招待會,利是裏面嘅「公價」係300元,如果係啲「主力推廣活動」就可能有500,最後如果做專題、專訪,可能記者會要求收5元一隻字,如果有今日呢篇《金手指》咁長,就可能已經有六七千元。佢話:「最頂尖嘅專欄作家(作者按:不包括孫柏文) 都係5蚊一隻字,真係邊得可能膽大包天開呢個價?」

以上嘅一句說話,到食完飯散水嘅時候,都喺我腦海中轉。從經濟學角度,點解頂尖嘅專欄作家同一啲出賣專 業尊嚴嘅寫手,可以收同一個價?其實,一張報紙搵個專欄作家或者記者寫嘢,就要迎合市場口味,而喺新聞,特別係財經新聞,就更要準確冇錯。久而久之,張報 紙就會建立一定程度上嘅公信力,而如果有一間公司可以借助呢股公信力,就可以當自己瞞天過海。所以就肯出「高價」,去收買記者。

其實,一間公司借助公信力 去瞞天過海,不僅出現於傳媒業。如果大家記得當年嘅Arthur Anderson會計師行,佢哋就係將自己多年積聚嘅公信力「出賣」畀好似Enron、Waste Management等公司,最後完全敗走公信力之後,間會計師行就執笠。所以奉勸各位要返內地做嘢嘅朋友,每一次過關都要緊記我哋個個香港人,背脊都紋 咗ICAC呢四個英文字母。

Monday, April 23, 2007

Messi vs Maradona

有些球迷,非常有心機

壹傳媒員工必讀

大家作為孝順仔女,都應該明白嚴父出於愛子之心,好多事都會提點下大家做錯嘅嘢。早排,孫柏文同老竇食飯,又一次有如太陽在東邊升起西邊落山般咁,俾老竇省到「立立令」。

老竇鬧我嘅原因,就係因我搬出已久,都仲未改我啲強迫金嘅郵寄地址。大家都知道我對強迫金痛恨入骨,好似好多人咁,已經將供款「撇賬」,所以就連自己喺壹傳媒工作儲蓄強迫金嘅郵寄地址都冇留意要改。老竇遞咗我嗰份強迫金年結單畀我之後,就叮囑我要盡快改地址。

冇利益轉移點成事

返 到屋企,我就將份年結單有意冇意咁放喺叠未開嘅信之上。今時今日,所有銀行月結單、電費單、水費單都已經上網,所以喺屋企嗰叠未開嘅信都好厚,亦喺度積 塵。不過,有一日我突然肚痛,霎時間又搵唔到閱讀刊物,所以就順手喺叠未開嘅信當中,攞咗最大份嘅一封去睇,亦即係嗰份強迫金年結單。

我坐下之後,就開始 睇吓啲強迫金報告,特別係每種基金嘅分別。講真,初頭真係冇乜驚喜,淨係覺得啲基金買滙豐、中移動、ExxonMobil、通用電氣都可以有咁大嘅支出同 管理費,都算神奇。冇辦法,強迫金呢個利益轉移項目,如果冇呢種利益轉移,當年又點會成事?

不過睇睇吓,我睇到有隻基金嘅「十大持有」資產時,就差啲喺馬 桶上面跌咗落嚟。呢隻基金叫做「美元儲蓄基金」US Dollar Savings Fund,話到明係為咗「短至中線」嘅回報,即係唔需要有心理準備坐艇,唔係「長線投資」。

債券出自次按公司

而起初睇呢隻基 金嘅「十大持有」資產類別,除咗現金之外,都係清一色買債券。傳統智慧話,買債券大多數比買股票安全,所以如果只掃視係唔會覺得有問題。點知,睇吓啲債券 名稱就大鑊,原來呢隻基金買嘅債券,有好多嗰啲呢排人氣急升嘅花旗國樓市按揭債券。仲要有啲按揭債券,係啲出自做好多次級subprime按揭嘅公司,不 過因為份強迫金年結單始終冇乜細節,所以真係唔知呢隻基金有冇「投資」次級按揭。雖然冇詳細解釋,不過作為一個分析員,應該可以由「年初至今的累積回報」 估吓佢哋有冇買。

二三十年都算中短線

呢隻基金「年初至今」嘅回報就有3.77%,睇落好似冇事。點知,原來「所有資料截至 2006年12月29日」,即係喺今年2月,次級按揭爆煲之前。有見及此,我就即刻「搞掂」、洗手,然後去電腦上網睇睇。我可以同大家講,各位買咗呢隻基 金嘅同事,我有好消息,買呢隻基金喺呢幾個月都有微利,希望之後都一樣。

最後,我發覺買呢隻基金話除咗現金之外,投資都屬於「短至中線證券」,希望「短至中線」係講緊風險水平。因為我見到有幾隻債券,到期日都係喺二三十年之後,因為如果「短至中線」係講緊啲到期日,唔怪只得連啲反民主派都拍心口話喺「短至中線」之內香港有普選!

Friday, April 20, 2007

Movie Development Council

Ok.

I went to Legco the other day, as representative of the Lion Rock Institute to present our opinion on the HK$300m film development fund.

Here's a sample of the coverage by an industry publication.

Now. The thing was that our message is all about this subsidy will harm the very creative talent that it was designed to help. The HK local press didn't pick up on it while the American press did.

I guess it is hard to spin the local media, because they are not "there" yet.

咪同李澤楷打麻雀

上個禮拜,電盈嘅主席李澤楷增持手頭上嘅電盈股份,買入5578.3萬股,令到佢嘅持股量升到去28.01%,接近全面收購嘅邊緣。

孫柏文睇到呢單新聞就喺度諗,究竟係咪李澤楷知道一啲我哋唔知嘅嘢,例如電盈好做到佢要提出全面收購;抑或係早排炒咗一個阿Jack蘇澤光,之後佢會換另一個阿Jack──Jack Welch嚟做電盈CEO,等佢可以化腐朽為神奇?

不 過喺我嘅腦海當中,我知道李澤楷係一個好神奇嘅人,所有項目到佢手上,都可以奪魁而回、成功落實,不過嗰個項目點解要進行,普通人就冇可能明白。情況就好 似打麻雀嗰陣,李澤楷嘅牌章打法係冇人會明白,但係食糊嗰個又偏偏係佢。我諗起只有邱吉爾形容東歐同蘇聯局勢時講過嘅名言It is a riddle wrapped in a mystery inside an enigma,先至可以形容到李澤楷所做所想嘅嘢。

可惜,上星期有消息話,李澤楷今次之所以增持,只係因為蘇澤光離職之後放番啲股票出嚟,而李澤楷咁啱去接貨。我睇到之後即刻彈起身大叫:「So normal? So rational? What happened to Richard Li?」

後尾我同同事Winery講起呢件事,佢都好同意我嘅講法,仲話:「打牌唔好同李澤楷打,更加唔好坐佢下家,因為佢打牌好似雜亂無章,估唔到佢打乜,萬子索子乜都打,一係叫雞糊,一係食十三么。」孫柏文諗咗一陣,見到e家PCCW都係雜亂無章、乜牌都打,咁下一鋪佢究竟係食雞糊定係十三么呢?

英鎊倖存 靠德總理

上世紀九十年代初,孫柏文仲係個中學生,就讀港島區一間「國際學店」。我間中學不論師生,都充斥住大批前宗主國嘅人,所以當年我都有機會近距離觀察呢班生番嘅起居飲食同文化。

佢 哋其中一個匪夷所思嘅習慣,就係每當前宗主國參加任何大型國際運動錦標賽,不論係木球、欖球、足球等等,面對一定不能奪標嘅情況之下,都會喺每一場賽事進 行當中,不停地、重複又重複咁大叫「two world wars and one world cup」。呢句說話,當年幼小的我仲估係前宗主國嘅球迷,用嚟提醒球場上嘅運動員要全力以赴,為曾經打贏過兩次世界大戰,同贏過一次世界盃嘅大英帝國出盡 全力。

今時今日,我已經比較懂性,所以先至明點解班生番要大叫「two world wars and one world cup」。原來,係班生番為咗互相安慰,知道英格蘭次次都遲早出局,所以就擺出呢碗心靈雞湯,提醒自己大英帝國以前有幾咁勁!

喺 九十年代初,除咗運動之外,其中一個對班前宗主國人有深遠影響嘅事件,就係英鎊喺92年9月大跌。當時由92年9月嘅2.01美元,跌至最後93年2月嘅 1.42美元兌一英鎊,跌幅差啲30%。相信大家都知道,今日英鎊已經重返當時高位,不過我想講番呢件事嘅原因,唔係因為英鎊「返家鄉」,而係想講點解仲 有英鎊呢個貨幣。年輕一代,已經對「馬克」、「里拉」、「法郎」非常陌生,不過就知乜嘢係英鎊。

如果大家記得喺1990 年,英鎊其實只兌1.6美元,之後大升特升嘅原因,係因當時英鎊同德國馬克掛鈎。掛鈎嘅原因,就係為咗建立「歐羅」呢隻貨幣鋪路。當時嘅「遠景」,就係只 要將歐洲貨幣互相掛鈎,到時機成熟就可以一次過用歐羅取替所有歐洲貨幣。不過因為英鎊喺92年9月脫鈎,所以到今時今日仲有英鎊冇被取替。

其 實,當年一英鎊由90年嘅1.6美元升至92年9月嘅2.01美元,唔係因英鎊強勁,而係因馬克節節上升,英鎊掛鈎所以先至搭咗順風車。咁大家知唔知點解 當年馬克咁勁?根據我當年「國際學店」嘅前宗主國老師講,原來當年蘇聯解體,西德總理科爾 Helmut Kohl眼見有機會,就宣布同東德合併。佢其中一個落實嘅措施,就係同時宣布東德同西德馬克以一對一嘅兌換率兌換。

不過,科爾冇察覺喺計劃 經濟中嘅東德,就算有現金都買唔到嘢,所以個個東德人嘅床下底都有好多東德馬克。當人人將東德馬克換成西德馬克時,就令到西德馬克嘅貨幣供應突然大幅飆 升,西德面臨通脹,西德馬克購買力受到威脅。如果大家對歷史有興趣,都知道德國喺上世紀20年代經歷過一場超級通脹,令希特拉上台,繼而爆發世界大戰,所 以現代德國人對通脹非常敏感。

當時嘅德國中央銀行Bundesbank,眼見貨幣供應飆升,就將利息提高去壓抑通脹。後遺症就係熱錢入,令 貨幣大升特升,令英鎊脫鈎,最後到今時今日仲有英鎊。大家可能會問:「推出呢個措施之前,科爾唔通冇諗清楚?」當年,被問及關於決定東西德合併細節嘅時候,科爾曾經講咗一句:「History will take care of the details。」就係咁,令英鎊得存。

地鐵Daisy政治廣告

好多年前,孫柏文試過戇居居咁走去選立法會,結果當然大包尾。雖然,我唔係姓 「賴」,不過,如果真係要賴嘅話,就一定要賴啲選舉條例。我記得,當年遞完張報名表同埋選民簽名,有關官員又核實咗選舉資格之後,就遞番本有電話簿咁厚嘅 選舉條例畀我。

當時收到本選舉條例之後,從一個支持自由市場嘅候選人來講,我心目中第一個反應就係:「唔怪之得,在任議員想連任咁容易。正當一個市場有咁多「監管」,最大受益者就一定係班incumbents(在任者),因為新晉競爭者無法用新嘅方法去競爭。市場中打滾嘅公司係咁,民選議員都一樣。」

其實,大家如果有計算過香港有選舉以來,在任議員連任嘅成功率,一定比國際水平高好多。所以先至令香港在任議員連任失敗,呢啲外國選舉司空見慣嘅嘢喺香港成為大新聞。多我都唔講,淨係要求傳媒要有equal time公平曝光率,畀所有候選人就已經「膠」,呢條例就最能凸顯計劃經濟中「好心做壞事」嘅神髓。

禁廣告好心做壞事

原先,條例係用來保護好似我呢啲三、四線候選人,不過,最後結果就係傳媒面對每一個選區都有好多候選人嘅時候,就會索性連報道都慳番。結果係點?咪就係選舉期間,每個候選人嘅支持率,唔會點變。不過,在眾多選舉條例當中,我覺得最硬膠嘅就一定係「唔可以賣電視廣告」呢條。因為如果就連傳媒都唔可以將你嘅政策建議帶畀選民,撞正冇機會「賣電視廣告」,就會連最後可以直接解釋畀選民政策建議嘅渠道都冇埋。

結果又點?就係議員只鬥「洗樓」、荔枝團、食老本、邊個有多啲專業資格等等,因為選民根本冇機會聽你嘅意見。我仲記得,劉慧卿議員曾經「好好心」咁講過,話批准賣電視廣告,就等如「金權政治」,所以要禁制。最諷刺就係,賣化妝品可以賣電視廣告解釋功能,不過想賣電視廣告,去解釋政策就唔得。孫柏文想問卿姐:「Where's my freedom of speech?」

益咗在任議員連任

所以呢幾日來,孫柏文睇到地鐵(66)賣電視廣告,跟住又抽起廣告,感到非常鼓舞。理由係,地鐵嘅呢個廣告,係特區輿論界新嘅一頁。故事起源,上個禮拜地鐵賣電視廣告,解釋「兩鐵合併」政策,講完合併「好處」之後,就話只要立法會通過,就即刻見到。


地鐵賣電視廣告解釋「兩鐵合併」政策,可能就咁改變香港政壇。

最後,有立法會議員投訴,話唔鍾意有咁嘅壓力,地鐵就用唐英年司長,喺財政預算案 解釋政府計錯數,「唔小心」抽多咗好多稅嘅「假扮膠」態度,話「完全無意畀壓力啲議員」,之後,就抽起個廣告。呢個廣告只係播咗個禮拜,就已令知識、輿論 階級議論紛紛。最重要係借助咗市民心目中對立法會在任議員「阻頭阻勢」嘅形象,成功解釋點解「兩鐵合唔到併」。

以前,香港都有政治廣告,不過全部都冇乜 效,情況有如60年代初嘅花旗國。不過喺1964年,當時美國詹森Johnson總統,賣咗個叫Daisy嘅電視廣告。個廣告就喺完全冇講對手名嘅情況之 下,借助國民心目中對對手支持用原子彈嘅形象,去成功解釋,點解支持佢嘅對手會好危險。個廣告就改寫咗花旗國政壇,之後嘅候選人,就唔可以再完全倚賴競選 機器去爭取選票,就算冇解釋自己有幾好,都要出來解釋對手有乜問題。

賣電視廣告,係唔係「金權政治」,我唔知,不過就肯定係一個市民向另一個市民解釋政策 嘅機會。可能我太樂觀,覺得地鐵個廣告,係香港政壇嘅Daisy廣告,不過,如果立法會通過條例,禁止地鐵賣政治廣告,就肯定保住卿姐嘅議席。


1964年解釋原子彈威脅嘅Daisy電視廣告,改變花旗國政壇。希望從今開始,電 視廣告可以摧毀一池死水嘅選舉形勢。

《壹本便利》free speech

大家呢幾日來如果有行過報攤,睇過吓啲頭條,都應該知道我哋嘅姊妹刊物《壹本便利》刊登14歲李蘊嘅相,冇觸犯《防止兒童色情物品條例》。今日,孫柏文唔 會話當日《便利》登呢幅相係「啱」或者「唔啱」,不過,絕對係tasteless。

如果問我,《便利》今次擺到明想抄日本仔將啲12歲女仔嘅泳衣相刊登, 最弊好似我當年大學嘅南韓裔同房話齋:「On sex, Japanese are fxcked up!」(講到性,啲日本仔真係變態o架!)大家諗諗,以李蘊當時嘅樣,根本同一個未發育少女一模一樣,如果唔知道來龍去脈,真係仲估係個小朋友。《便 利》喺《防止兒童色情物品條例》之下被告,真係唔出奇。

鬼佬官員都會係咁講

我記得1996年,模特兒Rosemary喺14 歲出道嘅時候,影過一輯我到今時今日都仲歷歷在目嘅泳衣相。當時,冇人出聲,我諗係因為如果當時你同港英政府講「要求」引用《防止兒童色情物品條例》告 人,我相信當時嘅鬼佬官員會問你一句:「Exactly which part of her looks like a child?」

大家都應該知道孫柏文絕對支持言論自由,而今次嘅判決就話呢輯照片喺香港可以刊登。不過tasteless都始終係tasteless,就當今次成件事嘅silver lining就係喺香港法例之下,就連tasteless嘅言論都係受保護嘅,都係free speech。


1996年嘅 Rosemary

經濟系與左叔叔

上個星期,《蘋果》名采版GG細語總舵主左丁山叔叔話,浸會大學要殺經濟系,將佢納入商學院,引起咗左叔叔嘅注意,仲問我同李兆富兄點睇。

不如學整車煮嘢

我同李兄都一致認為,e家香港嘅所謂主流經濟學,好多時候都係教緊凱恩斯Keynes嘅理論,讀唔讀都罷,所以浸大要殺經濟系,咪由得佢殺囉。李兄仲話,真係要讀經濟學,不如多睇《蘋果批》、《案內人隨筆》同《金手指》,孫柏文諗 咗一陣,深表同意之餘,仲發覺睇《金手指》,係當中最正確最明智嘅選擇,因為可以當做反面教材!

其實喺美國嘅大學,一般都會要求學生先讀通識嘅科目作為第 一個學位,之先可以再讀技能學科,例如律師、商科或者會計。不過英國人就唔信呢套,咁啱香港又係跟英國嘅制度,所以香港嘅學生都冇乜點接受思考訓練,一讀 就係讀一啲技能科目。

大家可能會問:「咁如果香港冇晒經濟系,我點讀econ呀?」反正香港人重視技能多過思考,最好都係唔好讀經濟,去讀啲所謂「實用科 目」,就算讀唔到會計法律,都去學吓整車煮嘢,話晒都係一技之長,返到屋企唔使俾阿媽問到口啞啞。

Monday, April 16, 2007

鉬 Molybdenum

好,今日孫柏文就學下隔籬方卓如兄嗰種「超簡短、勁搞嘢」嘅起題方法,就用一個「鉬」字為題。

相信大家都知道,今期大熱嘅洛陽欒川鉬業(3993)就快上市,現在做緊公開招股。孫柏文相信大家都喺呢間公司來港之前,應該唔知「鉬」或「欒」係乜,甚至好似我咁,連讀都唔識讀,讀嘅時候唔知點發音。有見及此,我當然「自我增值」,睇下「鉬」究竟係乜同有咩用。

大家都可能學我咁,有睇過「鉬」有咩用,知道「鉬」呢樣嘢原來係用來製造啲非常高檔,非常昂貴嘅機器同用具。喺我做緊research嘅時候,我就搵到花旗國政府地質調查局一份關於「鉬」嘅報告。睇完之後,我就第一時間用電郵寄畀《利字當頭》總舵說利世民兄睇,叫佢喺份報告當中,搜尋 「substitution取代」呢個字。寄完都冇五分鐘,世民兄就回覆話:「我一定會做爆孖展去抽!」

世民兄有咁嘅回覆,絕對唔出奇,原 因係如果你喺份報告搜尋「substitution取代」呢個字,就會搵到句「There is little substitution for molybdenum in its major application當今世上鉬係難以代替」嘅說話。即係話鉬價升多幾倍,啲人都要照用。現在,因為早前招股嘅碧桂園(2007)已經將用咗大量孖展資 金,所以如果你借到孖展,應該相比上易抽到洛鉬。

最後,好多人話我哋香港人「讀書為了求分數」,孫柏文不但只唔同意,仲覺得我哋深信「終身學習」同「通識教學」。原因係我搵關於「鉬」元素資料嘅時候,發現港人網上最流行嘅Yahoo漢英字典,最多搜尋嘅字就 係「鉬」呢個字。大家可能會問:「呢個只可以證明大家相信終身學習,如何證明相信通識教學呢?」

問得好!抽洛陽欒川鉬業嘅新股,就知道佢哋喺洛陽欒川嘅地 方做鉬嘅生意,所以搜尋「鉬」呢個字絕對不足為奇,不過如果大家留意,睇下第二最多搜尋嘅字,原來就係「欒」呢個字。雖然同間公司做乜嘢生意無關,不過我 哋嘅求知欲就強到就連「欒」呢個字都睇埋,咁仲唔係「終身學習」、「通識教學」?

只願One Life One Will

孫柏文相信,如果幾個月前我問大家:「從香港開埠以來,幾百年歷史當中,要大家揀一個會 最關心自己後事嘅人,最想確定自己遺囑清清楚楚,等啲遺產可以根據自己意願去分配,究竟大家會揀邊個?」相信唔使問阿貴,大家都一定會揀華懋集團主席龔如 心。

理由好簡單,龔如心同佢家翁打官司爭產打咗咁多年,為確認一張遺囑嘅真偽,爭啲要人大釋法,所以相信龔如心絕對唔想歷史重演。橫掂都係講龔如心,我就 實不相瞞,自從龔如心去世之後,孫柏文差唔多日日都想寫篇題為「只願One Life One Love」文章。

想寫嘅原因,係因為想抒發我差唔多三十歲嘅心情,嗰種知道自己已經冇咁幼稚,明白一個人一生當中應該乜嘢係最重要。只願他朝可以為一個女 人,喺自己嘅遺囑裏面寫下one life one love 四個字,令我就算已經付出咗餘下嘅生命畀佢,都覺得唔夠,希望可以將僅餘物質上嘅遺產畀晒佢。不過因為可能我寫作功力唔夠,所以遲遲都未能落筆了結我嘅心 願。

最慘就係,喺我落筆之前,尋日本報已經報道,龔如心嘅千億遺產分分鐘會爆發爭奪戰,因為已經有人話佢最少有兩份遺囑。如果就連從香港開埠以來,最想確 定自己遺囑清清楚楚嘅人,都不能喺去世之前「搞掂」自己遺產嘅分配方法,唔通除咗希望「一生一愛one life one love」之外,更重要係大家都要make sure「一生一遺囑one life one will」?


龔如心同王德輝呢對夫婦,生前死後都咁傳奇,不過,既然人已去世,希望有關佢嘅是是非非快啲平息,等小甜甜可以安息。

Saturday, April 14, 2007

LSD needs to purge itself of 勞永樂

Let me be the first to admit. I am proud as Research Director of the Lion Rock Institute (LRI) that we have 社民連 the League of Social Democrats (LSD) in Hong Kong.

They are the only ideologically consistent party. They are consistent in espousing their demand for more government intervention into people's lives to "save the people". We at the LRI of course disagree with their policy proposals, but I believe we shall agree to disagree.

Their existence demonstrates that we live in a tolerant and diverse society, where freedom of speech is enjoyed.

So, when their vice chairman decides to "go on record" against one of their guiding philosophy of wanting a government to redistribute wealth in HK, I was really disappointed. Hence I wrote this.

But wow...

Are my attempts to clean the already polluted stables of LSD that naked and transparent?

They got me quick. But yes, I will be the first to admit that LSD should drive out Dr Lo Wing Lok 勞永樂. His demand to "go on record" to be against wealth distribution makes him far more suitable to be in the sclerotic arm of the democratic camp... He belongs in the Civic or Democratic Party.

"公民黨 hypocrites" leads to civil discourse

There are times, when asked about what I enjoy most when I write, that I answer...

"make people pause and ponder"...

Here is a pretty good example of that.

It is about the Civic Party and how I think of them as hypocrites and here's one particular discussion that it created I think I am really proud of. Everyone of their entries are better, more thoroughly thought through and sharper than my original piece.

Civil discourse of policies is alive and well within our little marginalized SAR.

社民連要聽勞永樂話

「我哋想知道,公民黨嘅梁家傑議員講話佢去參選,係代表「香港人贏咗」……我想問,贏咗乜嘢?」── 社會民主連線代表,3月18日喺政府總部對出嘅講話。

相信大家都有聽過,喺香港旗幟最鮮明、最社會主義派嘅社民連。如果大家有睇開《金手指》或《蘋果批》,都應該知道孫柏文同社民連喺經濟政策上,係兩個極端,我完全反對佢哋,因為佢哋嘅經濟政策,最終只會好心做壞事,禍害弱勢社群。

雖然我非常反對佢哋嘅經濟政策,不過就係憑以上嘅一句說話,贏得了我嘅尊重。理由係又要參選,又要反對小圈子選舉制度,一路抗議制度,不過又一路頌揚今次參加小圈子選舉有得着,擺到明自相矛盾,甚至偽善。

大家都知道孫柏文覺得班「支持競爭嘅大律師」係班oxymoronic hypocrite,所以見到社民連都睇到佢哋嘅硬膠,真係非常安慰。

社民連思路清晰,話一就一、話左就左,敢講敢認。所以,今日見到社民連副主席勞永樂醫生來信,我非常失望。

故事起源,勞醫生大前日喺《壹蘋果直播》,做咗次訪問。跟住我哋就有篇文章,去總結勞醫生同社民連如果執政有什麼經濟政策大方向。其中有一句,從社民連網站炒出來話:「政府要做財富再均分」(1),文章刊登之後,勞醫生就來信澄清:「我並無說過這句話。請作更正,及把我這更正要求存案」(2)。


首先技術上,以上嘅要求係冇問題,因都唔係勞醫生講嘅。

不過,勞永樂作為社民連副主席,高調要求存案「佢冇講過」其中一個社民連最核心嘅經濟政策方向,唔通勞醫生自己都唔支持?所以,《壹蘋果直播》有關人士已經發信畀勞醫生(3),邀請佢自己向社民連黨員澄清,「我唔支持政府要做財富再均分」(4)。



各位頂天立地嘅社民連義氣仔女,你哋仲頂得勞永樂順?其實,佢心底裏究竟信唔信你哋嗰套?

Thursday, April 12, 2007

女講師危機管理

噚日,本報A1版嘅獨家新聞,話一個女講師同蠱惑仔男友提出分手,被男方用性愛片段勒索,最後女事主喺好大壓力之下挺身而出,向傳媒公開事件,然後 報警。

呢位女講師喺大學任教之前,係一位律師,一個喺咁純潔環境長大嘅女仔,即使幾咁清純,心入面都總會諗過,人一世物一世,一個人乜都要試試。喺咁嘅情 況之下,嗰位女講師上網識男仔,都係一件好正常嘅事。

如果好似呢位女講師一樣,有人發難話將你嘅醜聞公開,面對咁嘅打擊,就好應該諗吓應該點做,就好似上 市公司一樣,究竟點樣去應付壞消息。不過,上市公司每半年就要公布一次業績,嗰位女事主就唔同,如果佢甘受勒索,每個月定期畀錢嗰位蠱惑仔,相信件事冇咁 快爆出嚟。

但係大家要明白,呢個世界已經冇乜嘢可以永遠隱瞞,美國有一個網站叫drudgereport.com,每日有一千六百萬嘅點擊,大家可能會 問:「點解佢咁紅咁多人去?」其實呢個網站就係當年踢爆克林頓Clinton同萊溫斯基Monica Lewinsky性醜聞嘅網站,可見要瞞住一啲嘢,以家科技咁先進,都幾難。

令對方無力反擊

所以遇到壞消息就一定要自己公 布,好處係可以主導輿論,控制報道方式同用詞。女講師走出嚟認,兼且做A1頭版故事,走呢個政策嘅時候,都要同自己講一句:「紙係包唔住火。」同上市公司 一樣,自己出嚟認咗衰仔先,好過之後被人亂寫。

呢位女講師最成功嘅地方就係,佢已經將蠱惑仔標籤為「淫窟主持」,條友已經無力反擊,兼且唔可以放片去勒索 女事主。女事主面對嘅最大壓力,就係佢嘅學生同埋屋企人,學生會擔心佢之後能唔能夠「做好呢份工」,而屋企人亦都會驚佢嫁唔出。好彩,yi家香港女性出嫁之 日,都好少仲係完璧之身,呢方面佢屋企人唔使怕。學生方面更加唔會覺得佢嘅工作能力會受影響。

最後,我想話因為bad boy始終係好有吸引力,所以香港各位女性,請小心好似孫柏文呢啲bad boy。

生是香港人 死是香港鬼

呢幾日,大家可能聽過17歲香港學生喺深圳慘變植物人嘅新聞。聽聞,呢位學生鄉下喺沙井,佢同屋企人適逢清明節假期,回鄉掃墓。原先,呢位學生已經身體不適,因為途中病情惡化,出現嘔吐等症狀,所以就去咗附近嘅沙井人民醫院睇病。不過,呢位學生打咗一針之後,身體出現嚴重問題,最後腦死亡變成植物人。其實,孫柏文噚日同幾個分析力同感受力非常強嘅女前輩一起吃飯,過程中都有談及呢段新聞。

其中一位女前輩話:「佢老竇都知道個仔有病,就唔應該迫個仔喺邊境人流咁高嘅假期回鄉探親,增加染病嘅危險。」聽落,非常合邏輯,特別經過SARS 一役,如果個仔有病,真係應該避開人流多嘅地方,費事感染到其他疾病。

不過,我作為一個男人,就要駁嘴:「其實,你唔明男人諗嘢嘅方法。自殘係男人嘅天性,唔殘又點做烈士?好似以前話過食燒牛扒食得多,會影響男性繁殖能力。咁男人聽完點?照食,仲要食多啲,因為食得多都仲可以繁殖嘅話,仲唔勁,仲唔係 alpha male?」

出錯就要罰千祈咪冚住

同一道理,明知個仔有病,如果都可以迫佢掃墓,咁咪可以更加凸顯佢對先人嘅尊敬!佢老竇已經話過,得佢一粒仔,即係話個17歲學生係長子嫡孫,更需要證明對先人嘅尊敬!所以我係完全明白點解個仔有病,老竇都要迫佢回鄉。

講真,我覺得成件事最重要嘅係女前輩嘅下一句話:「家最慘嘅係,完全唔知道發生咗啲乜,真係死咗都唔知乜事。」其實,嗰啲醫院負責人真係好似失咗蹤,死唔認有敏感問題又不能解釋點解「在針藥注射一半時便上身出現大灘紅點,面部也變紅,繼而抽搐,未幾休克昏迷」。

今次,深圳市政府已經開始介入。我覺得深圳市政府為求保住深圳市各大醫院嘅港人生意,一定要提供一個香港人心底裏會接受嘅答案。出錯就要罰,千祈不要蓋住,因為我哋會明白,因為香港都有大把醫療出錯,最緊要就係「死咗都要知乜事」。

好多深圳婦女,都已經翻山越嶺來港生育,即係生要做香港人,千祈唔好迫我哋病成點,病到唔應該舟車勞頓都要返香港。唔通,我哋就算死,都要做香港鬼?

A speech... Must watch.

Wednesday, April 11, 2007

用Web 2.0甄別港女

互聯網係人類發明嘅用具,一件用具幾有用,除了視乎設計之外,仲要睇用戶用得幾好。其實,今時今日叫做Web2.0,即係以前稱為C to C嘅網站當中,真係好有用。復活節假期,孫柏文發現,原來可以甄別「港女」。「港女」唔代表所有香港女性,不過,絕對包括嗰啲知識上舢舨充炮艇嘅女仔。如果好似我咁,係舢舨,咪接受囉!

不過,因為我對「炮艇」情有獨鍾,所以我就上咗friendster,希望搵到啲girls smarter than I。我就諗,究竟佢哋會做啲乜,究竟搵啲有乜嘢特性嘅女仔呢?

最後,我走去搵啲話自己最喜愛嘅書係《Freakonomics》嘅女仔,原來好多「炮艇」都係「靚炮艇」。

其中一個睇《Freakonomics》嘅就係陳見飛。

香港爆企業管治危機?

早排,孫柏文有機會同城市電訊(1137)主席王維基會面同共進午膳,而喺食飯之前,亦有機會睇到城市電訊想推出嘅新服務示範。基本上,城市電訊特別係佢哋嘅上網寬頻服務,最大嘅過人之處就係快,特別係upload speed上載速度。

大家可能會問:「上載速度同街邊見到嘅乜M物M上網速度,有乜分別?」其實,大家上網睇嘢、聽嘢,基本上就是從網上攞嘢落來,嚟到自己部電腦,所以就叫做下載download。大家每日見到嗰班「阻街電訊戰士」嘅廣告牌,寫上嘅乜M物M速度,其實好多時只係講緊下載速度。

如 果你有好多「嘢」,例如短片、自己rip嘅音樂、BT電影等等,要「貢獻」上互聯網畀其他用家,咁就係叫做上載upload。正因為城市電訊過人之處就係 上載速度快其他公司好多,所以,該公司面對嘅最根本問題,就係如何製造誘因,令人好想上載。基本上,如果香港人個個都好想上載,好想上載好多「嘢」,好想 用好快速度上載好多「嘢」,咁王維基先生就會「肥到襪都着唔落」。

有見及此,城電就推出咗個新服務。用戶上網就可以睇到喺其他用戶電腦裏 面,想分享嘅音樂、電影等等,而因為城電唔會畀人自己keep個copy,所以你每睇一次,就要對方上載一次,同你下載一次,情況有如大家上 YouTube睇短片,對方就釋然YouTube嘅角色。咁樣大家就可以靠城電獨一無二嘅上載速度,去慳番自己電腦裏面嘅存儲。個計劃聽落有紋有路,大家就睇吓城電會否成功。

科科攞A一科B

不過,當日令我最驚訝嘅就係王主席話佢現在讀緊書,讀緊工商管理MBA。我即時心諗: 「唔係嘛?MBA唔係畀啲未坐正嘅人讀咩?」王主席仲要話:「為咗搵工易啲。」聽完之後,我都忍唔住大笑。當然,王主席亦有解釋讀MBA嘅真正原因,原來 真係出自一份好學之心,亦因為王主席當日講其他嘢都完全冇保留,好多時政治不正確,所以我都信佢讀MBA係咗份好學之心。

見到佢自我增值,我忍唔住問多兩 句。原來,王主席成績彪炳,一開始時科科攞A,直至到有科慘遭滑鐵盧,得個B。好學生被考起,嗰科一定好難,我當然追問:「邊科咁難?」原來,考起王維基 嗰科,就係corporate governance企業管治。可能因為我輕輕皺眉頭,王主席就覺得我懷疑佢嘅企業管治,所以為咗我呢個喺傳媒工作嘅人,佢就補充:「其實喺05年,香港 董事學會曾經頒發過企業管治獎畀我。」我即時心諗:「唔係嘛?香港上市公司講企業管治啲最好、攞獎嘅董事,原來都係得個B!」

最後,王維基解釋,原來「企 業管治」嗰科要寫好多文,而佢又係個engine仔,計數多個寫嘢,所以就觸礁。咁都好啲,如果唔係香港真係會有深層嘅企業管治危機!哈、哈!

王 維 基 : 講企業管治,我已經係最叻個,都係得個B。   設計對白

New Policy on Phatdat

This is a notice...

I shall be deleting all comments from "anon" or "匿名" that are not clear attempts to celebrate and kiss up to my god like ability and handsome good looks.

Thank you

Shuen

Tuesday, April 10, 2007

一注獨贏買江銅

今日,孫柏文又要再使出「一注獨贏」呢四個大字,如果有睇開《金手指》嘅fan屎,就知道今日我呢個股壇黑氣石又有投資推介。如果你係個盲目支持 《金手指》嘅fan屎,你可以直接去到呢篇文章嘅尾部,即刻睇吓今日嘅投資建議同目標價係乜,跟住即刻落盤去買。不過,如果你係一個要有充份理由同分析先 至買股票嘅人,咁今日你就睇睇呢篇文。

今日我想推介嘅股票,就係江西銅業(358)。如果大家有睇開《金手指》,都可能有印象我曾經講過江銅。其實喺06年11月21日,我已經喺一篇題為《推介一隻升一倍嘅股票》講過江銅有力升一倍。不過,大家可能會問:「點解當時冇用「一注獨贏」呢四個字叫大家去買江銅?如果有叫,當時江銅股價8.1元一股,上個禮拜已經升到10.32元,大家咪可以賺多好多?」

係就係,不過江銅係一隻可以悶死好多人嘅股票,甚至可以話可以激死好多人嘅股票。原因係就算銅價本身大升特升,江銅股價都可以唔郁。例如喺04、05年,銅價雖然升咗差唔多有一倍,不過江銅就一路升唔穿04年初嘅高位。最後要去到06年先至有爆炸性嘅升幅,就係因為江銅有咁樣嘅特質,所以等佢好似要爆上先至叫大家去買(圖C、D、E)。

大家可能會問:「咁點解06年又有爆炸性嘅升幅呢?」

唔爆升都唔得

其實,所有原材料股都面對同一問題,呢個問題就係建制中嘅人,例如投資銀行分析員、中央銀行官員等等,日日重複咁講話「原材料升係因為炒作、係泡沫」。大家聽得多,就唔敢相信原材料升咗其實可以維持喺高價水平。每一次原材料股爆升,都係因為市場突然間到達 tipping point,達成共識,開始敢信原材料上升原來可以高處未算高。當市場開始用新共識嘅原材料高價位,去重新計算原材料公司嘅每股盈利,而公司市盈率冇變,隻股唔爆升都唔得。今日就為大家提供咗04、05年中石油同原油價格走勢關係圖(圖A及B),作為參考。

已返回06年水平

喺11月嘅嗰篇文章,我曾經話過江銅由06年7月至10月嘅第三季業績,三個月就賺0.518人民幣一股。而如果銅價全年都維持喺06年第三季嘅水平,江銅一 年可以每股賺兩元,而如果市盈率係8倍,即係話股價就會16元一股。

雖然經過舊年年尾從今年年初嘅跌幅,今時今日,銅價已經返回06年第三季嘅水平。最重 要係市場已經達成共識,覺得今次「唔係泡沫」,覺得銅價會至少維持喺呢個水平,所以最後要再同大家講多一次,一注獨贏買江銅

建議買入:江西銅業 358
目標價:HK$16
年期:十二個月

Wednesday, April 04, 2007

要同客劈酒…點算?

今日,孫柏文將會施展渾身解數,將我當年做石油分析員學到嘅最寶貴一課同大家分享。今晚開始,相信大家都好有可能放幾日假期,以前做分析員嘅時候,我會把握呢啲長假期去充實自己。

而因為充實自己嘅最有效方法,就係多啲體驗、多啲試驗,所以我好希望大家可以將我今日分享嘅經驗,自己去試一試。

今時今日,因為原材料價格持續高企,好多時候做金融業都會被客人問及有關原材料龍頭——石油嘅問題。仲因好多時,客人都會喺有酒飲嘅情況之下問問題,所以就當今日嘅《金手指》文章有一石二鳥之用。

最後,今日孫柏文原先想將題起為「要同朋友劈酒…點算?」不過為咗安撫嗰啲覺得文章一定要有財經角度嘅fan屎,就用咗呢個題。

Tuesday, April 03, 2007

一夜之間中產變無產

今時今日喺花旗國,好多人成日話:「如要中產變無產,只要一場大病就得!」大家可能會問:「咁關香港乜事?」孫柏文今 日就要問大家,知唔知喺我哋特區裏面,又可以點樣由中產變無產呢?大家可能會答:「炒股票!賭馬!賭波!買樓!」

雖然以上嘅答案全部都啱,參與者真係可以 一夜之間中產變無產,買樓甚至可以負資產,不過一個人是否參與以上嘅活動,就肯定係人嘅選擇。相信當今世上,冇人會希望患病,更冇人會選擇患大病,所以我 話,以上嘅答案冇個啱,因為冇捕捉到嗰種慘況。

所以我話,喺我哋特區裏面,要一夜之間中產變無產,最直截了當嘅方式,就係被人告。冇錯!如要中產變無產, 只要一場官司就得!原因其實好簡單,因為喺我哋特區裏面,大律師好貴。一個大律師,例如湯家驊、梁家傑、余若薇,分分鐘睇吓文件,都要二三十萬,第一日出 庭,就50至100萬,之後每日又十幾萬。如果場官司比預期日數少,一於好少理,錢照收,不過可以減半。所以,如果你唔好彩係一個中產,要打官司,分分鐘 可以雙手拱讓成百萬畀啲大律師。

豁免大律師嘅公平競爭法

孫柏文讀 過幾年經濟學、做得財經口水佬,當然明白「價高」唔等如「貴」。無可否認,大律師收費高,不過更肯定佢哋係掠水。佢哋掠水、唔抵嘅最直接簡單原因,就係因 為冇競爭,所以先至可以當香港市民係水魚,係咁㩒。當然,每個社會都會有人因為有法例保護,所以先至可以做到廣大市民嘅吸血蟲leeching off the sweat and blood of society,我對leeches見怪不怪。

不過,令孫柏文作 嘔到要寫公民黨班大律師嘅原因,就係佢哋居然可以大大聲話,香港需要「(豁免大律師嘅)公平競爭法」。以前已經多次講過,計劃競爭法點樣侵害公民權利,最 後會爆發好多官司,仲因為好多證據會模稜兩可,所以啲官司會打好多日。

我可以保證,如果你係中小企,有人(例如營運手法守舊嘅對手、「社會運動家」、唔鍾 意你去過七一遊行嘅政敵等等)唔鍾意你競爭得太劇烈,想幫你設計同計劃你公司同行業嘅競爭手法,用計劃競爭法告你,相信你計完條數之後,一定投降。

法例之下人人平等,假嘅

其 實,以前香港大律師係有競爭,例如引進其他普通法地區嘅大律師。不過今時今日,一定要證明畀「大律師公會」睇,香港冇嗰種官司嘅大律師,先至可以喺外國 請。記得,呢個本地大律師唔需要叻,最緊要係佢啲同行覺得佢「識」就得。你哋話畀市民有選擇有得揀緊要啲?定係保護同行嘅收入緊要啲?市民冇得揀大律 師,絕對唔係老闆,不過跟住班大律師就話香港需要「鼓勵競爭」,班大律師英文咁好,一定知道咁樣叫做hypocrisy。公民黨班大律師會開放大律師市場 嗎?所以……

湯家驊,hypocrite。

梁家傑,hypocrite。

余若薇,hypocrite。

吳靄儀,hypocrite。

最 大問題就係一條計劃競爭法,一定會豁免大律師,豁免亦即係等如喺法例之下唔係人人平等。有啲人喺法例之下,大律師就above the law。公民黨果然係「港式法治精神」樣辦中嘅樣辦。最後我想問公民黨班大律師:「Exactly from which moral high ground are you asking us to suffer your law?」

Monday, April 02, 2007

第一季金手指貼士表現總結

4月第一個交易日,係時候總結孫柏文隻金手指為大家篤嘅貼士,喺第一季嘅表現。可以用以下七個字做總結,「大上大落,得個吉」。今日因版位有限,所以我會長話短說。以下個成績表可以清楚顯示第一季表現,跟住我會講吓對啲貼士喺來季嘅展望。

金手指07年第一季成績表

建議買入:白銀(盎斯)

建議日期:6/3/06

建議當日開市價:10美元

目標價:120美元

目標價有效期:10年

目標價有效期時限:2016年3月6日

上周五收:13.37美元

首 季變幅:4.20%

迄今變幅:33.70%

建議當日至今波幅:

最高11/5/06 15.22 美元
最低14/6/06 9.48美元

白 銀:睇番對上兩次嘅「貼士表現總結」,原來兩次基本上講白銀都係差唔多講同一樣嘢:「花旗國樓市會繼續爆煲,令全球嘅中央銀行繼續瘋狂印銀紙,去挽救疲弱 經濟,白銀豈能不升?仲要白銀基本供求嚴重錯配未解決,所以白銀必升!」以上因素冇變,作為白銀戰隊隊長「白銀文」,維持原本建議同目標價:強力買入、 120美元一盎斯。

建議買入:和黃(013)

建議日期:22/11/06

建議當日開市價:71.95港元

目標價:100港元

目標價有效期:1年

目標價有效期時限:07年11月21日

上周五收:75.15港元

首季變幅:-5.10%

迄今變幅:4.40%

建議當日至今波幅:

最高2/2/07 81.80港 元
最低28/11/06 71.60港元

和 黃:公司啱啱出業績,股價就冇乜起色。冇辦法,我建議買和黃都係因3G推行「收費文化大革命」X-Series。今年頭兩個半月,3G上70萬個客,比 06年12月尾升5%。講真,我都唔知X-Series救唔救到3,不過如果連X-Series都救唔到3,咁就再冇嘢可以救到3。到時,和黃就要來一次 了斷。點都好,因為市場對3已經到咗絕望嘅階段,「有得救」或者「被了斷」都總好過現在嘅無間地獄limbo。維持原本建議同目標價:強力買入、100 元。

建議買入:H指認沽證3497

建議日期:29/12/06

建議當日開市價:0.17港元

目標價:NA

目標價有效期:07年4月尾

目標價有效期時限:07年04月30日

上周五收:0.163港元

首季變幅:-12.90%

迄今變幅:-16.50%

建議當日至今波幅:

最高5/3/070.305港元
最低22/2/070.113港元

H 指沽證3497:我已經曾經多次講過,舊年同今年嘅H指走勢好似03、04年,今日為大家提供圖2及3,畀大家參考。當年經過03年下半年嘅大升浪之後, H指喺1月初見頂,之後上海A股喺4月初見頂,跟住就大跌。現在A股係泡沫,中央都知。就看看他們如何發功吧!我喺3月初曾經講過話喺4月再檢討呢個投資 建議,經過檢討之後決定維持原本建議:繼續揸到4月尾再檢討(圖1)

History repeats itself?