Friday, March 30, 2007

地鐵 超高能 冇搞笑

睇見早排「軟硬」喺紅磡體育館開嘅show,令孫柏文最百感交集嘅一個環節,就係林海峰先生用咗句「經一事、反一智」形容今時今日的香港。真係笑中有淚。

日前,地鐵無啦啦宣布,佢哋會將地鐵車廂門關閉訊號嘅時間拉長。唔知道大家點睇,不過我公司就有好多同事討論呢個新措施。驟眼看,呢個新措施真係有少少「超低能、勁搞笑」,不過講畀大家知,呢個新措施絕對有科學根據。

地鐵做咁多嘢,最終只希望啲乘客可以「小心車門please mind the door」,而地鐵將地鐵車廂門關閉訊號嘅八聲「嘟、嘟」時間拉長,都係為咗達成同一目標。

其 實,我喺花旗國密芝根大學讀書嘅時候,有個同房喺我大學嘅Transportation Research Institute交通研究中心做研究。佢有日問我:「知唔知政府最能夠減低車輛衝紅燈嘅措施係乜?」我話:「燈位設影相機?」佢話,其實最能夠減低衝紅 燈嘅措施,就係將黃燈時間加長,就係咁簡單。咁啲相機,做乜?增稅收囉!

地鐵「嘟、嘟」聲其實同紅綠燈嘅黃燈,有異曲同工之用,應該令乘客更能準確地判斷究竟應該衝,定係唔衝,最後減少衝門嘅意外(圖)。所以地鐵今次可以話有做功課,超高能、冇搞笑。

不要再迫我交稅養消委會

噚日,孫柏文睇 到消費者委員會最新嘅新聞發布,睇完之後感到非常傷心。因為,以前嘅消委會,喺你同我心目中正義嘅消委會,係一個踢爆奸商賣危險產品、係一個維護消費者嘅 守護神。不過,唔知道喺幾時開始,消委會開始變質。

噚日嗰份消委會新聞發布,矛頭直指我哋特區嘅銀行。因為享受銀行服務嘅消費者人數非常之大,而有時有啲 銀行服務真係可能有點取巧,所以孫柏文第一眼見到消委會出新聞發布去鬧佢哋,真係一啲都 唔出奇。

大家可能會問:「如果係咁又點解會覺得非常傷心呢?」真心問大家,如果要你估,你話消委會鬧銀行啲乜?如果係以前嘅消委會,佢哋可能會踢爆某啲固 定回報投資產品嘅真實回報,比起印喺宣傳小冊子上嘅少。又或者消委會會踢爆某啲私人貸款嘅真實利息,比銀行廣告中宣傳嘅利息高得多。以上兩個例子,相信大 家都覺得係啲以前嘅消委會會做嘅事。

因為以前嘅消委會,非常尊重消費者嘅智慧,消委會嘅角色就係將關於商品嘅真實狀況,解釋畀消費者知。跟住廣大嘅香港消 費者,就會自行分析同衡量包括消委會報告嘅所有資訊,然後作出消費決定。究竟一份產品,係如何生產,喺邊度賣,通通都唔關以前嘅消委會事。所以就係咁,噚 日消委會份新聞發布,就令我非常傷心,原因係消委會鬧啲銀行關閉分行及增加收費。

消費者不分階級

唔通銀行關閉分行,消費者唔 知?唔通有銀行顧客被職員蒙騙,因為個職員話喺嗰間銀行開戶後,間分行係永遠都喺度?銀行增加非利息收費,係因為金管局希望啲銀行可以分散收入來源,令銀 行毋須完全依賴利息收入。理由係當銀行有好多唔同收入來源,就可以將收入嘅風險分散,也等如銀行運作風險亦同時得到分散,最後令銀行同銀行體制更加健全, 減低倒閉風險。即係大家可以見到「弱勢社群」存戶,失去僅有一生積蓄嘅機會減低。

再講,以前消委會不會分階級,消費者就係消費者,噚日嗰份消委會新聞發布裏面,重複又重複用「弱勢社群」呢四個字。即係消費者有等級,例如盲目要求增加冇成本效益嘅分行,即係要求一群消費者去補貼另一群。

不如消委員講埋畀我知,究竟佢哋想存戶收到少啲利息?借錢嘅人畀多啲利息?想銀行增加非利息收費?定係銀行應該將自己嘅capital攞出來補貼?我相信除咗我之外,任志剛都好想知。

如 果有其他市民,用自己嘅錢同精神,出呢啲「超硬膠」新聞發布,雖然唔會支持,但係會絕對尊重佢哋嘅意見。不過正當一間機構,用我辛辛苦苦,每日捱更抵夜搵 錢交嘅稅,出呢啲「超硬膠」新聞發布,咁就真係非常唔公平。消委會原先嘅raison d'etre(存在理由),因為傳媒發達已經不再存在,e家消委會已經超越晒佢哋嘅mandate,危害消費者權益。特首曾蔭權,係時候做 statesmen,係時候殺掉消委會。

啤啤熊都係炒供求

大家如果有留意國際新聞,就會知道今期喺德國,最大熱嘅係一隻叫Knut嘅北極熊。熊氣急升嘅原因有兩個解釋方法。

第一個解釋,係 Knut完全篤爆環保分子嘅謬論,故事起源Knut出生嘅時候被熊媽媽遺棄,環保分子話要尊重大自然定律,所以反對動物園介入去拯救必會死亡嘅Knut。 動物園職員唔理班環保分子,收養咗Knut,令Knut繼續生存。最後事件被大眾知道,引起民憤,圍堵班「反文明進步、盲目支持天生天養」嘅環保分子。

第二個解釋,係Knut真係好Q。大家自己睇相。

我當然覺得後者解釋比較合邏輯,因為孫柏文咁 多fan屎,都係因同一個理由。不過,Knut嘅熊氣就好似殺死咗另一隻熊。原來,動物園開始展出Knut之後,引來大批觀光旅客,佢哋睇完Knut之 後,就走去睇其他動物,其中有一隻22歲大嘅熊貓Yan Yan。點知,Yan Yan頂唔順咁多人,香咗。最慘,就係冇新聞傳媒報道佢嘅死訊。

以 前,熊貓係環保人士嘅焦點,一隻熊貓出生,都會變成頭條新聞。不過始終物以罕為貴,今時今日,祖國政府保育熊貓非常成功,擊退絕種危機,所以有隻熊貓死都 冇人理。大家可能會問:「咁點解Knut會咁紅?」當然,除咗佢有我咁Q之外,大家要問一問自己,當今世上全球最多人講嘅環保「問題」係乜?冇錯,就係溫 室效應,全球暖化。四川可能有嚴重污染,起碼有陸地,不過如果北極溶咗,北極熊就會死硬。

我諗只要全球溫度繼續升高,「北極熊熱」仲有排炒。熊貓就留畀我哋算囉。


中石油的巨大新油田

噚日,祖國傳媒報道,中石油(857)喺祖國東北對出嘅渤海搵到個巨型新油田。油田存量達220億桶石油,而根據新華社報道,中石油裏面某個高層話應該可以喺三年之內,令油田每日生產「20萬桶石油」。


大家可能會問:「20萬桶一日,即係等如幾多?」如果「20萬桶石油」,全部都係液體石油,而冇天然氣嘅話,呢個新油田就可以將中石油嘅石油生產量推高20%。大家要記得,中石油自上市至今,石油生產量差唔多冇升過,中石油股價升,都只係倚靠油價本身嘅升幅。

記得以前,孫柏文仲 係石油股分析員嘅時候,曾經喺我啲分析報告裏面,用「一隻冇到期日嘅原油call輪」去形容中石油。因為石油生產量唔升,公司盈利增長只可以靠原油價本身 嘅升幅。不過,如果今次渤海個油田係液體石油,對中石油股價絕對有利,因為只要油價唔跌,中石油都會有盈利增長。正當一間資源公司盈利增長,係因公司本身 嘅因素(增加生產量),而唔係因外圍因素(資源價格上升),投資者可以接受嘅市盈率就會升。

今時今日,中石油嘅股價係9元,每股盈利有 0.79元,即市盈率係11.4倍,同石油生產量一樣冇乜增長嘅Exxon Mobil一樣。到時就算油價不變,不過市盈率上升,中石油嘅股價都會升。不過最後要警告大家,如果嗰「20萬桶石油」,其實係天然氣,咁就應該冇盈利貢 獻,因為天然氣冇得走私,所以祖國政府可以控制價格喺世界價格之下,世界市價升都冇中石油着數。

Wednesday, March 28, 2007

你玩官僚?官僚玩你!

唔知道大家有冇好似孫柏文咁,喺公司、學校、政府等等,試過面對一位好官僚嘅人,希望同佢傾吓睇吓可唔可以落實一啲action。如果有,我相信大家講都未講個idea之前,已經會聽到:「唔好講住,有冇budget先?如果有,有幾多先?」

對於官僚嚟講,冇嘢大得過budget,大家都應該聽過,政府好多部門嘅第一個考慮,唔係點樣「做好呢份工」,而係點樣「可以令出年嘅budget唔少過今年」。其實,官僚有呢種心態一啲都唔出奇,因為有咗呢種心態,就可以令到個官僚架構有強大嘅生命力。

Stockman's Revenge

當年,花旗國列根總統Ronald Reagan面對蘇聯核子武器威脅,喺全球生物可以隨時毀滅之下,佢曾經講過:「The hardest thing to kill is a government program once it has been created.」好粗略繙譯成「官僚係最難消滅」。不過,因為列根總統經過多年經驗,明白到官僚嘅最大弱點,就係吓吓都講budget,所以明白到殺死官僚嘅最佳方法,就係cut佢budget。

列根總統為求落實「殺官僚」呢個「真強政勵治」嘅管治方針,就搵咗個叫做David Stockman嘅人返嚟,做佢個花旗國政府Budget Director。Stockman可能知道,就算係冇普選嘅社會,行政部門管理層只要一有錢,就會為咗自己嘅官途,去花錢落啲「繼續令佢有份工」嘅 project上。如果有人問關於個project嘅成本效益,行政部門只要拖幾個有幾百個title嘅「專家顧問」,就可以繼續上馬。

如果班「專家顧問」都唔可以擺平啲反對聲音,就可以話啲覺得冇成本效益嘅反對聲音「唔愛國」。所以為咗徹底打擊官僚,Stockman就提倡大力減稅、甚至特登製造非常嚴重嘅財政赤字,去達成「真強政勵治」,因為只要政府冇錢冇budget,甚至要借錢,就可一一「殺死」啲浪費社會資源嘅官僚。當時,呢個「減稅殺官僚」嘅行動,就被稱為Stockman's Revenge。

就係咁,好多政府部門嘅膨脹速度開始慢落嚟,而喺政府工作嘅官僚當然唔開心,覺得Stockman玩佢哋。不過,大家可能察覺到我只係話官僚「膨脹速度慢下來」,冇話過被殺死,所以只要有足夠嘅時間,都可以報仇雪恨。到今時今日,官僚卒之報復,因Stockman早前加入私募基金,亦投資介入一間就快執笠嘅公司,希望力挽狂瀾。點知,間公司最後都執笠,令好多人蝕錢,政府官僚就把握機會告佢「詐騙」。所以,大家如果想「殺官僚」,就要明白今日你玩官僚?他朝官僚玩你!

趁好消息出貨

噚日,孫柏文話過畫卡通片嘅意馬國際(585),可以繼續短炒。因為佢哋齣處女電影《忍者龜》,上個禮拜五開畫成為花旗國票房冠軍。不過,噚日意馬不單只冇升,仲要跌。睇番啲講意馬嘅分析文章,都有好多「醒目仔」話「趁好消息出貨」,所以令意馬有沽售壓力。

其實講真,孫柏文以前都係呢類型「醒目仔」,記得03年,當時Pixar嘅《Finding Nemo》就嚟上畫。因為上畫之前,Pixar已經升咗好多,所以我就喺《Nemo》上畫嗰日拋空Pixar,諗住最少都可以因為有班人會「趁好消息出貨」,搭順風車。不過,我心底裏諗,邊到會有人睇呢齣戲,講一條魚啊大佬,it's about a bloody fish!

之後禮拜一,真係有輕微沽售壓力,不過我冇平倉,最後由貪變貧。因為Pixar股價之後節節上升,「醒目仔」嘅我就咁中招!

Tuesday, March 27, 2007

大摩投降搵人接火棒

呢排有好多fan屎來信問:「孫柏文,你呢排成日都喺度講美國樓市出事,又要講到好似好大鑊,不過究竟關我哋乜事?你睇吓個股市都繼續升啦。」其實,呢班fan屎問嘅問題,都問得好公平。因為花旗國樓市,又真係好似未大規模爆煲。就算爆煲,都未必會波及我哋有祖國支持嘅特區經濟,最後就算特區經濟有影響,因股市已經同本地經濟完全脫節,都真係可以繼續升。

不過,我覺得特區人今日睇花旗國樓市嘅心態,有點似曾相識。真係有少少似97年7、8月嘅時候,我哋特區人眼見泰國出事、泰銖大幅貶值時,滿心歡喜,因為可以去曼谷shopping買平嘢一樣。之後如何,大家心照。

如果大家記得當年,我哋特區曾幾何時有間土產國際級投資銀行,叫做百富勤Peregrine,不過最後執笠收場。而執笠嘅原因,就係百富勤創辦人話:「美國佬成日講『法治』,佢哋知唔知喺亞洲,有權『告人』唔重要,最重要係有『關係guanxi』,咁先至可以搵錢。」

大家可能會話:「呢個邊度係執笠原因,只係百富勤嘅營運原則。」大家咁諗就錯咗,因為百富勤執笠,係佢哋靠「關係」搵到個客,幫個客借錢。原先,幫個客出債券,點知唔夠街客買,所以百富勤要買剩下來、賣唔出嘅債券,而因為自己公司唔夠錢,所以就用自己名義去借錢買呢個客戶嘅債券。

話唔賣轉頭又賣

點知個客因為借美元,但收入係本地貨幣,所以貨幣大幅貶值,就冇美元還。當然,有人借錢唔還,應該可以告佢攞番啲資產都好,不過,因為冇「法治」,個客又有好多本地政治力量,所以唔還就唔還。百富勤因為收唔到美元,所以還唔到錢,最後當然要執笠。其實,花旗國投資銀行Morgan Stanley大摩,都用咗自己錢借畀人去放債做按揭。借咗25億美元畀次按subprime最大嘅獨立公司New Century,New Century就將一批有1.35萬單按揭嘅債券做抵押。

不過New Century出事,呢批按揭債券就畀咗大摩。有好多人當然好關心呢批按揭債券有冇錯出事,所以有人喺3月初問大摩,當時大摩管理層話:「完全冇錯!大家放心!」不過只係過咗幾個禮拜,大摩賣廣告話會舉行拍賣,賣掉呢批按揭債券。可能,大摩唔想步百富勤後塵。不過,究竟要有幾大嘅折扣,先至可以搵人接火棒呢?

金手指全港獨家消息

呢排個股市有如天氣一樣,好lup,成交量少過400億。不過,噚日就有兩隻升咗嘅股票,我覺得值得一提。第一隻就係江西銅業(358),以前孫柏文講過只要銅價令市場覺得重拾升軌,江銅就會大升特升。

所以,今日為大家提供咗個圖,同大家分享我對江銅嘅睇法。以前江銅賣8元嘅時候,我話過佢可以升一倍,只要銅價重拾升軌就可以,今次,如果銅價升穿200日平均線,江銅真係可以見16元。



第二隻值得一提嘅股票,就係畫動畫嘅意馬國際(585),噚日已經高開,不過繼續有得升,我噚日都有叫大家開市時買啲,當短炒。其實,噚日全香港得《金手指》有講話意馬齣處女電影《忍者龜》,成為花旗國票房冠軍,擊敗對手《戰狼300》。不過,因為《金手指》讀者人數少,所以到今日有其他報章開始報《忍者龜》嘅表現時,意馬都會繼續升。噚日有聽我話嘅朋友,就畀佢升埋今日先。


噚日有讀者投訴話孫柏文係肥仔,金手指面唔應該有六腹肌。噚日我係抄《戰狼300》,而《戰狼300》腹肌,都係用電腦執過。不過徇眾要求,今日畫番寫實啦!

忍者龜冠軍 意馬炒上

意馬國際(585),係近年嘅神話股。佢哋做嘅生意就係畫卡通片,而喺上禮拜五佢哋有一齣處女電影,喺花旗國上畫。喺花旗國,第一個周末嘅票房差唔多可以話會定呢齣電影嘅生死,而孫柏文落筆嘅一刻,仲係花旗國嘅禮拜日,所以未有周末票房數據。

不過,意馬齣處女電影《忍者龜》,就成功喺上禮拜五成為花旗國票房冠軍,擊敗對手《戰狼300》,根據花旗國分析員分析,《忍者龜》可以喺五個禮拜內總共收過億美元。

淨係炒「《忍者龜》係票房冠軍」,相信意馬又會繼續炒上。雖然現今股價,需要意馬不停地製造高質素卡通片,唔可以斷纜,不過《忍者龜》今次嘅表現,相信會繼續令人對意馬如癡如醉。大家不妨喺禮拜一開市時買啲,當短炒。



上禮拜五,意馬齣處女電影《忍者龜》,擊敗對手《戰狼300》。

重申一注獨贏買和黃

呢幾日,都已經有好多分析和黃(013)業績嘅文章,孫柏文都唔多講。我覺得最重要嘅數據,就係自從和黃3G推行「收費文化大革命」X-Series之後,3G嘅上客量數據。我記得,和黃主席李嘉誠曾經喺1月初講過,話3G全球上客量達到1400萬。到出業績報告,和黃話到3月21日,3G有1470萬客,不過不失。

始終X-Series推出不久,如果下次報告嘅上客量好差,就等如X-Series冇用,而因為X-Series已經係最終極嘅收費模式, X-Series救唔到3,就真係冇嘢救到,執咗佢算。我建議大家繼續持有和黃,到下次中期業績出街時再作決定。

胡錦濤介入小圈子競爭?

呢幾日,孫柏文唔知點解總係喺骨子裏覺得,國家主席胡錦濤有介入小圈子競爭。雖然絕對冇公開介入,我就連一啲證據都冇,而同時因今次個「competition」都已經有一個好清晰「欽點」咗嘅「贏家」,所以孫柏文覺得,就算國家主席真係介入,都只係希望個「competition」可以「毫無驚喜」。

大家聽完我講之後,可能會問:「孫柏文,你又喺度講我哋特區嘅特首選舉?好悶啊大佬!唔通你又想《金手指》收視仆直?」有如我哋前特首董建華話齋,大家問得咁膚淺。如果大家有留意新聞報道,胡錦濤主席呢幾日其實喺俄羅斯。而俄羅斯政府又咁啱正在舉行世紀大拍賣,所以孫柏文先至有咁樣嘅感覺。

故事起源,幾年前有間俄羅斯私人石油公司叫做Yukos,間公司係當時俄羅斯最大嘅石油公司,個老闆亦係俄羅斯最有錢嘅富豪。不過,Yukos老闆就好唔聽話咁公開挑戰俄羅斯總統,所以俄羅斯總統決定「對付」佢。大家都知,Yukos老闆可以「玩嘢」嘅原因,係因為佢控制Yukos,所以有財力同總統對抗。只要將Yukos控制權攞走或搶走,個老闆就即刻要就範。

平時一個政府最喜愛搶走市民資產嘅方法,就係通過抽稅,今次亦唔例外。Yukos 接二連三收到稅單,差唔多日日都收到,亦因唔夠現金找數,俄羅斯政府就大條道理咁接管Yukos啲資產。Yukos股東手持嘅股票變牆紙,最後個「玩嘢」老闆亦鋃鐺入獄。Yukos啲股東當然唔開心,抗議到今日。

大家可能會再問:「咁關胡主席乜事?」問得好。故事發展下去,俄羅斯政府知道官僚會管理不善,所以要將Yukos嘅資產民營化。不過就算係民營化,政府都想接管Yukos資產嘅公司聽聽話話,所以就要搵啲「信得過嘅人」。不過,俄羅斯人民經過以前嘅經驗,唔容許再有「數碼港式」嘅利益轉移、官商勾結,要為「資產轉移畀啲信得過嘅人」建立「公平、公開」嘅形象,所以就唔可以送,只可以拍賣。

今次拍賣Yukos資產,已經有間被「欽點」咗嘅公司叫做Rosneft會「贏」,所以好多人相信競投唔會熱烈。俄羅斯政府都知道,如果到時得Rosneft「爭」,冇對手,俄羅斯市民分分鐘會唔服。點知,喺俄羅斯僅有嘅外資石油公司BP英國石油(其他例如ExxonMobil同Shell,已經撤資),就突然宣布會參加呢場拍賣。第一批批評BP嘅人,就當然係Yukos啲股東,有一個直情話BP參與「偽拍賣」,只會令今次小圈子拍賣得到合理化,情況有如長毛梁國雄鬧梁家傑一樣。而我覺得胡主席有介入嘅理由,Yukos就係嗰間原先想起一條油管,由俄羅斯直接輸油去大慶嘅石油公司。

雖然,今時今日計畫擱置,胡主席始終都希望有條新油管,所以如果可以出一點力,令個「拍賣」可以「毫無驚喜」,他朝可能如願以償。不過講起特首選舉,孫柏文都有去「投票」,去咗投模擬選舉票。因為如果真係2012普選特首,就當今次係練習機會!

Saturday, March 24, 2007

禮拜日齊投票反對最低工資!

今個禮拜日,大家一定要去投票。孫柏文一定去投,亦希望你哋都會去。

大家可能會問:「我唔係800人小圈子選委會嘅其中一個委員,冇票,投屁?」我都唔係選委,不過「全民投票實踐計劃」就會喺全港各區28個票站,舉行「平行選舉」,大家只要係成年人同埋係香港永久性居民就可以投票。當日投票,會有三個議題。

(1) 選行政長官──梁家傑vs曾蔭權

(2) 支持或反對不遲於2012年由普及而平等選舉產生行政長官

(3) 支持或反對立法制訂最低工資

孫柏文希望大家禮拜日去投票,為嘅唔係梁家傑或曾蔭權,或者更清晰向世人表達我哋香港人對民主普選嘅訴求。大家去投票,為嘅係去保護年輕人、新移民、同婦女,方法就係喺以上第三個議題,投票反對最低工資。

為咗保護下一代

最 低工資會令最低經驗工人難入職、難轉行、難重投勞動人口,所以最大受害者就係年輕人、新移民、同選擇生育嘅婦女。喺「保護工人」嘅法國,佢哋啲公屋居民, 特別係啲冇經驗嘅年輕人,面對高達50%嘅失業率,已經去到「nothing to lose」,對自己冇希望,到30歲都未有融入過社會就已完全脫離,所以對參與暴動都毫無保留。大家真係想喺香港見到同樣嘅絕望咩?

香港 地,人人都會三衰六旺,今日如日方中嘅工業,他朝可能不再存在,到時如果你要再搵工,你懇求老闆畀你一次機會,雖然佢對你完全冇信心,不過你同佢哭訴: 「老闆,畀次機會!畀次機會!我開頭唔要人工都可以,試用吓我!得嘅,先至畀人工。」佢可能會畀機會你,不過他朝有最低工資,佢畀機會你就會犯法。

講真,一個雙失青年,真係為咗自己前途,懇求老闆「畀次機會」,唔係一向以嚟我哋香港人覺得可驕傲嘅事咩?我哋點解要將一個雙失青年自救行動刑事化?唔肯放棄、唔肯攞更高回報嘅綜援、唔肯將自己同社會僅有嘅連繫斬斷,唔通咁都錯?

他朝如果我有小朋友,到佢十幾歲嘅時候,又發現佢唔係讀書材料,唔想見到佢就算肯低聲下氣,希望有人「畀次機會」,會有老闆因為法例所限所以「唔畀機會」。到時,我相信淨係擔心究竟佢會唔會爭番啖氣,會唔會「生性」,都應該擔心夠,希望唔需要擔心埋啲害人法例。

今日點解孫柏文要 大家去投票反對最低工資,係因為想大家向民主派大大聲講:「支持民主、反對最低工資!」多年來,民主派當中嘅社會主義派,已經「老奉」覺得只要你係一個支 持民主嘅香港人,就一定支持最低工資。最低工資如果真正可以幫到低經驗工人,我會絕對支持,不過只會過害佢哋,大家一定要禮拜日投票保護佢哋。

以下提供埋孫柏文喺其他兩個方案會點投票:

(1)選行政長官

其實,孫柏文真係好想投「白票」,不過真真正正睇完兩個候選人嘅政綱,同埋衡量兩個候選人嘅性格,孫柏文今日呼籲各位投票支持曾蔭權with the heaviest of hearts, I endorse Sir Donald(以上全句非常難寫出來,可能係成世人最難寫出來嘅一句)。

社會主義fxck off

原因係雖然兩個人嘅政綱,都有好多有如「八萬五」式嘅「非常好心咁做非常壞事」,例如最低工資、計劃競爭等等,不過希望以曾蔭權有嘅「彈性」,嗰種「放棄銷售稅」嘅勇氣,佢唔會落實啲會害佢自己未來孫兒嘅政策。

(2)支持或反對不遲於2012年由普及而平等選舉產生行政長官

孫柏文絕對支持。

當 日,你只要去到票站(票站地址可以喺www.civilreferendum.org搵到)出示身份證,主辦單位就會喺你隻左手蓋上24小時內不褪色記印,跟住就會畀三張選票你去填。就算你唔想投票支持梁家傑或曾蔭權,又或者對政制冇意見,你都要去反對最低工資,向民主派當中嘅社會主義派,向佢哋害下一 代嘅政策say 「fxck off」。希望大家到禮拜日晚,個個左手都有隻記印啦!

大家呢個星期日要跟孫柏文去投票,反對最低工資,保護年輕人、新移民,同選擇生育嘅婦女。

Friday, March 23, 2007

你願為港人捐軀嗎?

今日,孫柏文要徵召一位勇士,男女均可。呢位勇士,一定要深愛香港,可以為保衞鄧小平同志有「願景」地建立出嚟嘅五十年不變資本主義特區付出一切。 如果你真係可以為咗一眾香港人幸福,站出來捐軀嘅人,咁今日孫柏文畀你嘅挑戰,絕對唔會令你卻步。因為嘗試落實挑戰中需要嘅行動,最壞只會令你被毆打同埋 被判入獄。

不過,就算你最終被判入獄,你都已經成功為眾港人服務,成功為特區建立一個案例,為我哋僅有嘅普通法制司法制度出力。大家可能會問:「孫柏文今日要我做啲乜,講到咁大鑊。」

今 日,我要呢位勇士,為特區解答一個非常重要嘅問題,就係乜嘢叫做「法定貨幣」(legal tender)。喺我讀經濟學嘅時候,我記得曾經問過老師:「如果我爭人錢,用法定貨幣去還,不過佢唔肯收,咁點?」老師答:「所有債務即時取消(all debts cancelled)。」所以今日希望可以搵人嚟試試。

大家都應該知道,特區呢排出現紙幣恐慌,有假鈔票流通,令好多商戶唔肯接受一千元面額鈔票。所以今日希望有人可以去幫襯一間「拒收千元鈔票」嘅酒樓食肆,飲茶好、食飯又好,最緊要係食晒啲嘢落肚之後,埋單嘅時候,用滙豐00、02年千元鈔票找數。

到 時候,如果侍應生拒絕收你嗰張鈔票,你就要大大聲問佢一句:「係唔係真係唔收?」如果佢話係,咁即係拒絕legal tender去結算同支付應還債務,到時你就應將鈔票放回自己個袋,跟住起身向出口進發。相信侍應生亦會「吹雞」,搵人攔截你,而你一定要平心靜氣向佢哋 講:「有乜嘢問題就報警啦!」不過大家要緊記,到呢一刻,千祈、一定要平心靜氣,稍有差池就被人圍毆。

警察嚟到時,就將情況解釋畀佢聽,亦要再次重申唔會再支付任何錢,因為所有債務已經取消。你亦要解釋話歡迎警察落案起訴,因為最終上庭嘅時候,法官就可以做裁決,到時候就會知道究竟任志剛總裁同唐英年司長,有冇欺騙我哋。

大家要記得,一定要將全程用攝錄機拍落嚟。將短片email嚟《蘋果日報》,或者放上YouTube,然後將網址寄嚟都得。孫柏文在此承諾,成功落實同有video紀錄,酬勞一千元,仲要係分開兩張五百元鈔票畀你。邊位勇士為特區未來努力?

和黃業績

Results came out today... I will comment on that on Monday = )

--------------------------

今日和黃(013)出06年業績,點樣都好,孫柏文最關注當然係究竟是否一如我所料,和黃嘅3G業務,因為有「收費文化大革命」嘅X-series服務所以有得救。特別係1、2月喺3歐洲嘅上客數字。

最衰和黃淨係畀每份報紙派兩位記者出席,我呢個相信「一注獨贏買和黃」嘅財經口水佬就冇份。不過點都好,我想向董事總經理霍建寧先生講:「I'm watching you, Mr. Fok.」


繼續睇樓按學英文


今日講「balloon mortgage」。Mortgage就係按揭,balloon就係氣球,呢種「氣球按揭」就係一種債仔借錢,跟住可以只係還利息,到時限嘅時候就要將剩 餘未還嘅本金,一次過還晒。亦因為最後還本金嘅嗰一次還款,叫做balloon payment,所以呢隻按揭就叫做balloon mortgage。當然,如果一切照舊,樓價唔升唔跌,就可以做新按揭,用新借嘅錢還番本金。

不過如果樓價下跌,業主就要首先還咗第一次嘅 按揭,如果新做按揭不能填滿本金,咁佢就要賣樓。大家可能想知道點解叫做balloon payment,以前最後嘅還款其實叫bullet payment。叫bullet(子彈)可能因為要債仔一次過還晒本金,有如打靶,所以「推廣部marketing」就將佢改為balloon。亦有可能 以前叫bullet,係來自法文嘅billet(票券),經過班冇文化嘅Anglo Saxon用咗之後,就變成bullet囉。

Wednesday, March 21, 2007

Blackstone上市 股民小心

噚日,孫柏文拜讀鄰居《國金眺望》方卓如兄嘅文章,獲益良多,有好多啓發,今日想同大家分享。卓如兄噚日話:「私募基金Blackstone Group最近高調得有點反常,原來是要為上市鋪路……公司上市,主要不外乎三個原因。

一、籌錢。

二、(冇份參與管理嘅)股東要求公司增加透明度。

三、必 定與私募將旗下項目上市的原因一樣──改裝完成,是時候套現走人。」

而卓如兄嘅分析結論係Blackstone上市,應該係原因三,股東覺得係「時候套現 走人」。卓如兄嘅結論,我都好同意,因為一、Blackstone根本冇上市融資需要,連Blackstone總裁都曾經講過,話佢打幾個電話,就可以籌 200億美元資金。二、有如卓如兄話:「私募通常都是以合
夥人形式經營,各位老闆對公司賬簿瞭如指掌,沒道理要上市求透明。」所以,唯一結論就肯定係股東 想套現。

已接近泡沫頂

大家可能覺得,一間花旗國私募基金想上市套現,唔關自己事,不過如果大家真係咁諗,就大錯特錯。理由好 簡單,冇上市融資壓力嘅公司,如果想為套現上市,就一定係股東覺得「價啱」,或者「價到位」,先至會上市。而其中一個可以主宰股東是否覺得「價到位」嘅因 素,就係股市大圍情況,股東可能覺得,大市已升得七七八八,所以就趁機會上市,「放貨」畀街客。

孫柏文甚至相信,原有股東非常討厭將公司透明度提高,而作 為上市公司就某程度上一定要公開公司啲秘密,所以除非公司上市「放貨」時,出售價比起心中嘅價高得多,有「放棄私隱」嘅溢價,Blackstone根本唔 會上市。大家可能會問:「Blackstone覺得個市升得七七八八,唔等如Blackstone真係睇得咁準,唔等如Blackstone上市之後個市 就即刻見頂?」

如果大家想買Blackstone睇錯市,我建議千祈咪制,因為Blackstone係smart money中嘅smart money。佢賣得自己公司嘅股票畀你,都應該冇「死錯人」,大圍股市真係升得七七八八,甚至可能已經接近多年難得一見嘅股市泡沫頂。

歷史會否重演

其 實,smart money中嘅smart money趁股市泡沫賣自己公司股票畀你,絕對唔係第一次。喺99年,「至醒」投資銀行高盛Goldman Sachs,卒之決定解散有百多年歷史嘅合夥人經營模式去上市。當年我讀大學有同學問我好唔好買,當時我答:「買唔買就唔知,不過肯定呢個係多年難得一見 嘅股市泡沫。More downside than upside,如果有股票都要小心。」

雖然股市之後都仲有升,不個冇乜值博率,而最終熊市來臨嘅時候,真係跌到趴地。今日就為大家提供個走勢圖(圖 一),大家見到最終熊市來臨之後,要去到06年尾先至升番上來。今日Blackstone上市,唔知道歷史會否重演呢?

未必等如唔好買

最 後,我個同學最終都有去抽高盛嘅新股,不過抽唔到,結果等上市嗰日走去追買。問佢點解,佢話:「如果去酒吧見到班高盛banker,而佢哋又『寸我』的 話,我可以指住佢哋嘅頭,大大聲話『我係你老闆啊!』所以就算貴一貴都要買。」

我嘅朋友都幾好,雖然標普500指數,今時今日比起高盛上市時升咗少少,不 過高盛GS嘅股價就比起我朋友嘅買入價76美元,升咗差唔多三倍,見202美元(圖二)。所以最終就算係股市泡沫頂,都未必等如唔好買。

Tuesday, March 20, 2007

中石油業績

噚日,中石油857公 布06年嘅業績,相信今日都已經有好多人會分析。不過,如果要孫柏文呢個前石油分析員去做總結,我只可以話啲業績「不尋常地差」。中石油喺06年嘅全年盈 利增長只有6.7%,搞到我以前啲同行,一眾分析員、個個面懵懵,因為最保守嗰個都好似話盈利最少會有雙位數字嘅增長。

中石油話係因為有「原油暴利稅」,令上游原油開採盈利下跌,而將原油提煉成石油副產品例如電油、油渣等等,跟住拎去賣都要蝕本,令下游生意出現嚴重虧損,所以兩個因素加埋令盈利增長得咁少。

不 過,呢啲因素就連孫柏文都知,冇理由我以前啲同行個個計錯數。其實,今次業績「不尋常地差」,係因為中石油「不尋常地玩嘢」,抗議國家政策。祖國政府對能 源只有兩個政策,第一就係盡量搵多啲供應,第二就係為了民間疾苦,盡可能控制能源價格。以上政策實行時,就會出現原油緊貼世界市價,令油公司盡量有誘因去 發掘新供應,不過會同時出現石油副產品有價格控制,令提煉嘅單位面對節節上升嘅成本,不過就唔可以調節產品零售價。

但 係提煉單位冇可能無止境咁蝕本,而因為祖國政府唔想放棄電油、油渣嘅價格控制,所以就推出「原油暴利稅」呢個權宜之計,希望上游可以補貼下游。中石油當然 對「原油暴利稅」唔開心,希望可以放寬石油副產品價格限制去解決提煉單位嘅虧損問題,所以就「玩嘢」,話自己嘅盈利增長快速放慢,想畀全世界嘅人一個「中 石油會冇錢開發或買新油田」嘅感覺,去威脅中央。

同行難齊心反對

當 然,放寬石油副產品價格限制係所有石油公司都想見到嘅,不過「價格限制」係共產主義者最喜歡嘅概念,唔係咁輕易放棄,所以中石油可能係想迫中央政府去減 「原油暴利稅」。不過減「暴利稅」,有好多提煉業務嘅中石化(386),就一定唔likey,所以就會有中石油打中石化嘅情況出現,而唔係齊心反對石油副 產品嘅「價格限制」。最慘,就係正當油公司喺「原油暴利稅」上角力,最死嘅就係得上游業務嘅中海油(883)。最後,噚日應承過今日繼續教花旗國按揭字彙 嘅英文,不過版位有限,聽日先繼續。

今日又會跌停板?

This was published this morning in Apple Daily. I guess it didn't happen. =P

--------------------------------------------------------

又放假,祖國政府又趁假期推出「宏觀調控」措施,目的係為咗壓抑已經擁有 全球最高市盈率嘅股票泡沫,而喺假期前宣布可以等市場消化。不過,因為祖國政府喺呢幾年成功建立咗「務實、理性」嘅形象,即係話唔會「不惜一切、走到天涯 海角」咁大力打壓,所以祖國同胞可能已經「當佢冇到」,喺宣布措施嘅假期後第一個交易日,將股價進一步推高。股民一於當政府「講就天下無敵、做就有心無 力」。

大家作為聰明嘅fan屎,一定仲估孫柏文講緊啱啱過咗嘅禮拜六,祖國政府將利息提高0.27厘,跟住噚日禮拜一,上海A股指數上升2.88%。就連特區H股指數都升1.23%,所以祖國同胞、特區股民站喺同一陣線。不過如果大家真係咁諗,你哋就錯、錯、錯!

孫柏文講緊嘅「宏觀調控」措施,係喺2月農曆新年黃金周提高存款準備金比率。雖然好多人都唔明提高存款準備金比率點樣可以冷卻股市,但如果孫柏文要解釋,就要講埋好複雜嘅fractional banking system係點運作,所以留待他朝先至講解。不過大家可以信我,提高存款準備金比率係一種可以冷卻股市嘅措施。而喺黃金周之後嘅第一個交易日,上海A股指數亦有上升。

不過,如果大家記憶力好似我咁,超乎常人,就會記得喺黃金周之後嘅第二個交易日,上海股市一千幾百隻股票當中,有八百幾九百隻股票跌停板。之後仲要嚟一場「大國崛起」式嘅骨牌效應,令全球股市跌到仆直。

其 實,好似梁家傑議員話齋,祖國政府係「務實、理性」嘅,會「摸石過河」咁做「宏觀調控」,除非……。除非祖國同胞唔聽話、唔畀面,中央講話佢當耳邊風,咁 中央就會大大力打壓,而示權威。好似2月新年黃金周咁,中央已經叫你哋唔好炒股票炒得咁興奮,點知一開市嗰日就唔畀面咁照升,所以孫柏文相信,嗰晚中央有開會,決定第二日要跌,仲要係大跌。

孫柏文唔知今日會否歷史重演,不過就當呢篇文章係通告,就當大家已經be warned。

Monday, March 19, 2007

花旗國樓市爆煲學英文

上個禮拜,孫柏文小休一周,亦因為小弟想發掘多啲新一代嘅財經口水佬,所以就搵咗好鍾意《世說新經》嘅方嘉誠,同埋有好多《高明邏輯》嘅高明輝寫吓財經大事。孫柏文當然有同大家一樣,睇咗呢兩位後輩寫嘅嘢,而我只可以話:「長江後浪推前浪、青出於藍勝於藍!」

如 果唔係因為我有雄厚嘅忠實、忠誠fan屎支持,就算我寫得幾差都不離不棄,相信我今日都有可能冇得再用隻《金手指》為大家篤、篤、篤。不過,我相信對一啲 比較保守嘅讀者嚟講,上個禮拜睇呢個欄位,可能畀咗大家一個「the slightly insane running the asylum 青山醫院被輕度思覺失調人士接管咗」嘅感覺。不過,我已經番咗來,青山醫院已經俾我呢個thoroughly insane接管番,所以大家唔使擔心。

入正題之前,最後想同掛住我嘅fan屎講:「I've missed you too!」

今 日,我想同大家分享上個禮拜小休時,學過嘅英文。其實,小弟嘅父母親,被殖民政府薰陶同洗腦,覺得學英文大晒,所以就喺我小時候推咗我去讀啲「國際學 店」,亦令我變成個啱啱好、僅僅可以照顧自己嘅雙語文盲functioning bilingual illiterate。所以我就要終身學習,希望可以彌補小時候嘅不足。

Subprime啱啱低過頂級

第 一個想同大家分享嘅英文字,就係subprime。相信絕大部份香港人,一生人裏第一次接觸prime呢個字,肯定係喺扒房。Prime beef,即係「頂級牛肉」,prime亦即係「頂級」。而sub呢個字,就係解釋為「啱啱低過」,所以subprime就可以繙譯成為「啱啱低過頂 級」。大家今時今日見到subprime呢個字,只因花旗國樓市當中有呢樣嘅按揭貸款類別。大家都知道,金融投資「毋需係好嘢,只需要抵買」,如果大家去 扒房食飯,叫prime beef要300元,不過侍應生同你講:「啱啱低過頂級嘅牛肉subprime beef,只係差少少,不過平好多。」相信大家都可能心郁郁,會去叫。

不過如果大家有機會去廚房睇睇,先至知原來所謂subprime meat,係用老鼠肉做嘅。而大家要謹記用subprime meat去形容老鼠肉同prime beef頂級牛肉嘅分別,技術上係冇錯。所以孫柏文都要讚一讚諗呢個「subprime按揭」,去形容一啲完全唔應該借錢嘅人,佢哋嘅按揭貸款風險。

Alt-A另類頂級

不 過subprime都尚算好,起碼明刀明槍話自己係sub。今日,再同大家講下一環將會爆發斷供潮嘅花旗國按揭貸款,Alt-A按揭。相信大家都知乜嘢叫 「A」,如果係A級,亦即等如頂級,A級貸款亦即等如借錢畀啲薪高糧準,大把還款能力嘅人。而「Alt」就係alternative縮寫, alternative可以解釋為「另類」,即係話「Alt-A按揭」可以繙譯成「另類頂級按揭」。

大 家可能會問:「頂級就頂級,何必要搞個『另類』出嚟?」問得好!點解「Alt-A按揭」要加個「Alt」上去,係因為申請Alt-A按揭嘅人,申請時毋須 提供入息證明,申請人話自己薪金(stated income)係一就一,係二就二,話自己有錢過李嘉誠都得。所以,如果個個人都係講真話,呢批按揭就係A級,不會因為唔同傳統A級,申請人冇提供入息證明,所以就要加「另類」上去,變成Alt-A「另類頂級按揭」。

大家要謹記,Alt-A同subprime按揭喺05、06年已佔花旗國按揭市場超過30%,好多千億美元,所以我問大家係唔係仲有排煩?

今日就解釋住Alt-A同subprime呢兩個英文字,聽日再繼續。

Sunday, March 18, 2007

特首選舉辯論

This is the CE debate review done by Dr Yuen, Mr Gum and Me.

Take a listen , it is about 25 mins long. And please do leave comments if you think there could be any thing we can do better. = )

Thursday, March 15, 2007

霍英東 saying "我挺董"

Anyone know where online can I see the video footage of 霍英東 saying "我挺董"?

I can't find it anywhere. Not on youtube, google etc...

Any help will be much appreciated.

Monday, March 12, 2007

No 金手指 for a week

Dear all,

I will be off work this week. Will still be online and might blog. But no daily goldfinger from Apple Daily.

Thanks all!

Shuen
PS might be heading to Macau... umm... will be doing some grand eating.. food, I am talking about of course. hehe

Friday, March 09, 2007

破解格老發炮之謎

呢幾日,相信大家同孫柏文一樣,覺得前聯儲局主席格林斯潘,好似啲過氣歌手一樣,沉寂多時、忽然復出,跟住連環發炮,亂噏廿四。

首先有上個禮拜一,用衞星視像電話,向我哋班特區人話花旗國經濟「有可能possible」會喺07年尾衰退。跟住,喺上個禮拜二花旗國股市大跌之後,就出嚟解畫,話只係「有可能possible」,而唔係「有好大可能probable」經濟會喺07年尾衰退。

解 畫之後都冇兩日。前主席又出嚟話花旗國經濟「有33%機會」會喺07年衰退。經過一輪股市大上大落之後,市場參與者好似對前主席嘅話多咗心理準備,所以股 市波動幅度亦都降番落來。可能,市場參與者知道前主席始終都係經濟學家economist,知道經濟學家對經濟走勢有意見唔講就會肚痛,所以算數。

點知,格老前日又再發功,今次仲要唔係講大圍經濟手勢,而係講當今股民最驚嘅現象──日圓套息交易carry trade平倉。格老話做套息交易嘅人,借咗咁多日圓去買其他投資工具,遲早都要還,唔可以無止境咁做。如果真係好似佢老人家咁講,股市就會更動盪。

不過,大家可能會問:「點解格林斯潘忽然復出,仲要好似惟恐天下不亂咁,日日發炮?」孫柏文嘅答案就係佢老人家就快出書,書名叫《The Age of Turbulence》,叫得turbulence(湍流),又點可以喺一個風平浪靜嘅世界成功熱賣。所以先至會突然人氣急升,日日出來搞搞震囉!

大佬啊!唔好再講得唔得?

細路,唔講又點賣書?

典型香港自大狂

上星期四國金眺望一欄嘅總舵主方卓如兄話,佢喺內地電視台見到有位基金業 界朋友,見到上個星期大陸股市大跌,唔單止冇揦埋口面,亦都冇講一啲托市或者叫人趁低入貨嘅說話,反而嗰位大陸基金人士仲沾沾自喜,同電視節目主持人講中 國經濟有幾威水,點解家中國有能力拖低環球股市,大陸股市跌8%,花旗國跟住跌400點,仲唔係中國已經「和平崛起」之類嘅題目,所以,方卓如兄「定 性」呢位大陸老兄為自大狂。

我當然非常同意方卓如兄嘅講法,不過,諗番起孫柏文仲喺花旗國讀書嘅時候,亦都曾經出現過好似家大陸基金人士有嘅「非理性亢奮」。話說喺97年秋季嘅時候,孫柏文中午返學時,聽到財經啦啦隊台CNBC嘅新聞話,個市跌咗百幾點,到我四點幾放學嘅時候,撞到當時兼職做緊reception desk嘅花旗國黑人同學,佢劈頭第一句就問我:「Dude,what happened in Hong Kong?」

我:「Yo!What's up?香港大跌!」

黑人同學:「花旗國股市跌停板!」

我:「Oh no!really?」

年輕與無知

當時,孫柏文身為香港仔,都不期然沾沾自喜咗一陣,因為嗰時我覺得,美國當年自87年有停板機制之後首次停板,係因為受到香港股市拖累,證明香港都幾有影響力。不過,97年嗰次香港跌市,其實係之後折磨香港多年金融風暴嘅開端。

現在諗番起,孫柏文嗰時真係太過young and naive。大家可能會問:「咁同今日有咩唔同?」今日孫柏文已經好咗一半,就係已經冇咁年輕!

Thursday, March 08, 2007

比人民幣強的貨幣

今時今日,你落街走去問十個對財經熟悉嘅人:「當今世上,邊隻貨幣升值能力最強?」相信十居其九都會話:「梗係人民幣啦!」不過今日,孫柏文想為大家推介一隻比人民幣更強嘅貨幣,相信大家聽到都會心郁郁。大家撲出去買呢隻貨幣之前,我想同大家講,大家不單止可以買呢隻貨幣,仲可以買埋發行呢隻貨幣嘅中央銀行股票,相信大家聽到都可能會問:「有冇咁筍?」

當真錢用交電話費

大家仲可能會話:「比人民幣呢啲紙幣更強嘅貨幣?真係仲估孫柏文今 日一定係又想講黃金、白銀。不過金銀係神靈賜給凡人嘅貨幣,未見到有教會集資上市,可以買埋發行貨幣中央銀行嘅股票,唔通梵蒂岡、麥加、耶路撒冷等等搞 REIT?」錯!今日介紹呢隻比人民幣更強嘅貨幣就係「Q幣」,係一種虛擬貨幣,原先係用嚟喺啲網上遊戲交易場裏面做買賣,發行貨幣中央銀行嘅官方兌換率 係同人民幣掛鈎一兌一。

到今日,「Q幣」已經可以用嚟當人民幣交電話費,甚至已經有其他商人,為咗方便顧客,自發性喺佢哋啲賣實物嘅非虛擬商店,接受「Q 幣」去取代人民幣。大家可能會問:「如果『Q幣』係同人民幣掛鈎,點解孫柏文會覺得比人 民幣強?」賬面上,呢條問題問得好好,邏輯合理,我都唔識答。不過如果「Q幣」唔係比人民幣強,點解發行人民幣嘅中國人民銀行,要高姿態走出來話關注虛擬 貨幣?如果「Q幣」唔係成功同人民幣競爭,開始取代人民幣,威脅人民幣喺祖國「壟斷貨幣」地位,人行根本毋須要打壓「Q幣」啦?

無限兌換繞過封鎖

雖 然,「Q幣」嘅「官方」兌換率係同人民幣一兌一,某些產品「Q幣」購買力等同人民幣,不過因為大量「Q幣」得來「不易」需要「使乾淨」,所以令到「Q幣」 嘅黑市(真正市)價喺5毫至8毫之間浮動。所以,大家應該大手大手購入「Q幣」,跟住用呢個「劣幣」去買一啲「Q幣」同人民幣同等價值嘅商品服務,去套利。

講咗咁耐,係時候揭曉誰是發行呢隻貨幣嘅中央銀行。發行「Q幣」嘅就係特區上市公司(700)騰訊。其實,騰訊可以好容易將黑市價推上一兌一,甚至更 高。方法就係,騰訊宣布「Q幣」可以無限量一兌一兌換做人民幣,甚至可以兌換成其他貨幣,淨係可以繞過外滙封鎖,「Q幣」都可以升穿一兌一。

跟住,騰訊又 可以宣布「Q幣」會對人民幣有「每年10%嘅升幅」,淨係吸引班carry trade都足夠。當然,好容易會俾人誤會「Q幣」係層壓式推銷pyramid scheme。不過,「Q幣」最大隱憂就係騰訊從未公開過「Q幣」係市面嘅總流通量,如果騰訊濫發「Q幣」,令「Q幣」購買力下降,都會神不知鬼不覺。當 然,花旗國聯儲局都係同騰訊一樣,唔公開美元喺市面嘅總流通量,所以相信聯儲局等同相信騰訊一樣。

唔怕太強只怕濫發

不 過,作為騰訊股東,就要知道騰訊嘅威力。聽聞喺大陸,一個人可以用「Q幣」買好多電腦零件,如果騰訊發「Q幣」畀自己嘅子公司,跟住大手購買電腦零件轉 售,雖然「Q幣」嘅購買力會下降,爆發通脹,不過就可以毋須流一滴血,去輸送畀自己所有現今擁有「Q幣」者嘅購買力。可能就係呢點,中國人民銀行要打壓 「Q幣」。唔係怕佢太強,只怕佢濫發。

Wednesday, March 07, 2007

睇美樓市爆煲的Ring Side Seat

呢幾日來,因滙豐公布業績,孫柏文都 同大家研究,喺花旗國放債畀啲「還款能力低、信譽不良」嘅人去買樓嘅公司(下稱「次質按揭放債公司」subprime lender)。大家都應該知道,呢啲「次質按揭放債公司」都相繼出事。不過,因為「呢齣戲」有太多「角色」,所以就算大家都有留意開財經新聞,都可能覺 得眼花繚亂,跟唔到「劇情」。

睇呢啲血肉模糊,有如拳擊比賽嘅show,當然要搵個「第一排」嘅位坐,先至睇得清楚。而番鬼佬叫「第一排位」為Ring Side Seat。有見及此,孫柏文今日想向大家推介一個網站。呢個網站嘅網址係ml-implode.com,名叫做 Mortgage Lender Implode-O-meter,即係「按揭放債公司爆煲計量儀」。

一 開呢個網頁,大家會睇到嘅第一樣嘢就係自從06年年底,已經有幾多間「次質按揭放債公司」死咗(直至前日有32間)。當然,如果呢個網站淨係講啲「魚毛蝦 仔」,當然唔會浪費大家嘅時間去推薦畀你哋。所以大家一定要留意「死亡counter」下面嘅「25最大次質按揭放債公司大事目錄」,呢度先至精采。以下 為大家提供一啲比較精采嘅片段,以公司次質按揭放債規模分先後。

1.最大嘅Wells Fargo(未有話出事)

2.第二大滙豐(2月8日發盈警、話要幾年先解決問題貸款)

3.New Century(首先發盈警,跟住2月8日話捲入民事訴訟漩渦,最新消息3月5日話政府展開刑事調查。以下為大家提供一個New Century股價走勢圖)

5.Fremont General(3月2日話捲入訴訟漩渦,同時宣布完全撤出次質按揭放債業務)

8.通用電氣GE放債部(未有話出事)

10.花旗銀行(未有話出事)

11.First Franklin(美林Merrill Lynch喺06年用13億美元收購咗,不過高盛Goldman Sachs分析員話今日只係值3億)

12.通用汽車GM放債部(已開始大幅裁員,孫柏文相信有機會拖垮母公司)

13.Accredited Home(宣布需要押後業績公布日)

16.Novastar(2月20日發盈警話未來五年會冇盈利)

第17、19、21、24、25大嘅按揭放債公司,全部投降,由06年12月開始結業、賣盤、被迫拍賣

當 然,有「醒目仔」見到以上咁多間公司出事被迫賣盤,一定諗緊有冇撈平嘢嘅機會。不過,睇吓我為大家提供嘅New Century股價走勢圖,呢間公司股價由06年高位51元跌到1月嘅30元時,你有膽去撈?喺2月8日話捲入民事訴訟時,你有膽喺18元去撈?到今日得 番4.5元,由1月到現在跌咗85%,你又有冇膽撈?大家可能話:「New Century係大公司,不過好似係賊,冇理由其他公司都係咁。」大家如果係咁諗,就祝你好運!


以上第5大嘅Fremont股價由1月到現在跌咗62%。

以上第13大嘅Accredited Home股價由1月到現在跌咗37%。

以上第16大嘅Novastar股價由1月到現在跌咗82%。

好戲在後頭

最 後,呢次災難一定有餘波,應該就係借咗錢畀呢啲「次質按揭放債公司」嘅銀行。巴克萊銀行Barclays、瑞銀UBS、Credit Suisse瑞信、高盛、大摩Morgan Stanley等全部都有,做開普通銀行就應該只會大傷元氣,資本薄弱嘅投資銀行就應該會好慘。就算投資銀行大哥高盛,佢哋自己公司借錢嘅債券,已經開始 下跌,反映市場對高盛還款能力信心動搖。「呢齣戲」啱啱進入第一個高潮,應該仲有接二連三嘅好戲在後頭。而大結局會係點?中央銀行再次濫發鈔票囉!到時, 黃金、白銀仲唔升、升、升!

Tuesday, March 06, 2007

多謝讀者支持

今日係《金手指》每日版面世一周年,我想多謝大家呢一年嚟嘅支持。我承諾會繼續努力,做到最好,就算幫唔到大家賺錢,都希望可以為大家提供一啲娛樂。再一次,多謝大家!

如果出年仲有《金手指》,孫柏文會搵人唱生日歌慶祝。「Happy Birthday Mr. 金手指 … … 」

滙豐未驅魔

噚日滙豐(005)公布06年全年業績,真係再次賺好多個億。基本上,滙 豐份06年業績冇乜驚喜,除咗花旗國市場之外,個個部門都交出成績,達到預期。而因市場覺得喺未來(除花旗國之外),個個部門都會繼續交出成績,所以,我 相信今時今日最影響滙豐股價嘅因素,就係滙豐喺花旗國嘅業務07年會點。

雖然,孫柏文曾 經呼籲滙豐管理層,不如嚟一次痛痛快快嘅「驅魔」,為花旗國業務做一次非常保守(即係好多)嘅壞賬撥備。最好就係多到全世界都覺得去得太盡,做得太多。到 時候,股價雖然會大跌,不過就會一次過見底,然後可以開始反彈,因為投資者毋須要為花旗國業務再擔心。而噚日,聽聞真係有人問過滙豐管理層可唔可以咁做, 不過滙豐主席就答話:「喺新嘅會計制度之下,唔可以做一啲市場預期之外嘅預測,繼而落實相應嘅措施。」

孫柏文聽 落都覺得滙豐好慘,今時今日嘅會計制度有咁樣嘅準則,令上市公司「唔可以做一啲市場預期之外嘅預測」係因為以前90年代尾,世界上好多上市公司,都會用一 啲被市場預期之外好得多嘅預測,去衡量一啲資產價值。跟住即刻將資產升值,撥入盈利,就算未有現金到手,都已經話自己賺咗好多錢。所以先至會有咁樣嘅新會 計準則。

股價有壓力

當 然,如果一間上市公司唔可以做比市場預期樂觀嘅預測,就當然唔可以做啲比市場預期悲觀嘅預測。即係如果仲有人成功供樓,就唔可以為佢哋嘅按揭做定撥備。如 果喺呢個情況之下,滙豐管理層只可以將盈利預測調低,最終極當然可以學專門做「還款能力低」嘅花旗國人按揭公司Novastar Financial咁,話未來五年都唔會有盈利。不過,咁樣都係下下策,因為只要市場唔覺得係「一次過」解決晒啲問題,就會令花旗國業務繼續好似「魔鬼」 上身咁,繼續纏擾滙豐。即係話噚日滙豐驅魔失敗,股價繼續會因花旗國業務有壓力。

不過,滙豐噚日都有話過會有四大因素,主宰花旗國已經放咗嘅債會否喺未來變成壞賬。今日為大家逐一分析。

1.大圍經濟情況economic conditions。你可以信會好,亦可以信會唔好,雖然大圍經濟情況一定會對壞賬水平有影響,不過我絕對覺得其他因素更重要。

2.花旗國樓市狀況state of the housing market。係《金手指》嘅fan屎,都應該記得我曾經講過花旗國樓市會比「八萬五」仲差,所以我相信都冇需要再講。

3.利息走勢level of interest rates。呢個因素嘅影響就好難講,因為現在市場長息同短息都差唔多,所以做定息或浮動息率按揭,短期之內面對嘅每個月供款都差唔多。所以如果供唔起定息按揭,浮動息按揭都係會供唔起,一樣會斷供。

4. 究竟「還款能力低」嘅花旗國人仲可唔可以做按揭availability of financing options for sub-prime borrowers。我覺得呢個因素先至係最重要,一年前,一個「信譽不良」嘅人一定可以做到按揭,而利息只會高過人哋「有信用」嘅人少少。現在,「信譽 不良」嘅人如果可以借到錢,比「有信用」嘅人要付出嘅利息已經多很多。不過,花旗國已經出現按揭中介人爆煲潮,剩下來嘅放債單位仲要宣布完全撤出「信譽不 良」按揭業務。喺07年將會有好多「還款能力低、信譽不良」嘅人需要轉按,如果冇得轉按就只會令樓市面對更大壓力。

所以,滙豐股東仲會有排煩。希望滙豐同花旗國業務HSBC Finance嘅關係,最終唔會被市場定位為(013)和黃同3G嘅關係。


Monday, March 05, 2007

滙豐今應盡驅魔

今日,滙豐(005)就會公布業績,相信又會再次賺好多個億。不過滙豐喺06年幾好賺都好,孫柏文相信市場今日最終嘅焦點,都會放喺滙豐對未來業務情況嘅預測,特別係佢哋喺花旗國嘅業務。即係現稱為HSBC Finance,03年收購嘅 Household International(HI)。

相 信冇人可以反對,經過上次「處女盈利警告」之後,滙豐今時今日嘅花旗國業務,已開始變成市場認為係個「流血不止嘅傷口」。如果要打個比喻,市場將會覺得滙 豐同 HSBC Finance嘅關係,有如(13)和黃同3G嘅關係。呢種「公司傷口」流嘅不單止係公司嘅錢咁簡單,乜嘢公司都會輸錢,最重要係,究竟「輸錢」係唔係反 映一啲更深層次嘅公司文化、管理問題。

滙豐喺短短 嘅四年前,即03年,買專做放債畀啲「還款能力低債仔」subprime lending生意嘅花旗國HI,到04、05年大量放債畀「還款能力低」嘅花旗國人買樓。當時,已經有好多外國嘅財經口水佬警告,話呢班「還款能力低」 嘅人,還款能力好似好強嘅理由,係因為有一個節節上升嘅樓市,令呢班債仔可以將自己間屋變成提款機去還錢。只要樓市升到頂,開始逆轉,呢班「還款能力低」 嘅人就會開始走數。借錢畀佢哋嘅單位,就自自然然會出現好多壞帳。

當然,滙豐呢幾年來都冇聽呢啲忠告做事,可能因為滙豐覺得以上嘅分析係錯。不過,現在公司花旗國業務開始出事,市場絕對可以好持平咁問滙豐:「歸根究柢,係唔係買錯HI?係唔係根本唔應該喺花旗國面對40年以來,最低嘅1%利息,去買一壇『樓市逆轉就大鑊』嘅生意?」

「魔鬼」已經上身

一 間公司管理層做咗錯嘅決定時,最極端嘅解決方法,就係更換管理層。大家可能會問:「滙豐唔係啱啱換咗花旗國業務嘅總裁咩?」係就係換咗,不過被炒嘅人係 HI啲舊將,問題根本唔係邊個人可以避免HI車毀人亡,問題係邊個人叫股東上呢部車先?當時拍板要買HI嘅滙豐管理層,除咗走咗去Vodafone嘅 John Bond前主席之外,其他嘅人都仲喺度。一路以來,好多香港人深信不疑「長線買滙豐必勝」,而且亦因為呢個信念豐衣足食。其實點解「長線買滙豐必勝」?背 後真正原因係滙豐嘅管理班底,可以不斷喺公司發掘、製造有實力嘅新領導班子──「滙豐人」。

而滙豐股價除咗賬面值之外有嘅溢價,某程度上都係反映「滙豐 人」存在嘅價值。如果市場開始發覺,「滙豐人」機制出現問題,冇辦法再信呢個系統,不過又因滙豐股權分散,根本冇可能從投票方法取替「滙豐人」。唯一方法 「投不信任票」,就係將股票賣出,到時公司同股價都會幾有問題。

最後,滙豐已被HSBC Finance呢隻「魔鬼」上身,今日,管理層要面對投資者,希望佢哋把握呢個機會,大大力幫公司驅魔!股價一次過見底,好過慢慢出現「不信任」危機。

圍毆美樓啦啦隊

孫柏文相信, 當今世上最支持「無時無刻都應該買花旗國樓」嘅機構,就肯定係花旗國地產經紀協會National Association of Realtors(NAR)。即係話最支持「無時無刻都應該買花旗國樓」嘅人,就應該係佢哋嘅發言人。

好多時,我覺得網上有好多「非《金手指》fan 屎」,出嚟點名批評孫柏文,例如有啲網友耐不耐就會講吓舊年7月,我叫人買熊證。雖然有 時我都覺得吃不消,不過比起花旗國地產經紀協會嘅發言人,我諗我嘅待遇比佢好好多。呢個發言人叫David Lereah,無時無刻都叫人去買樓,不過因為咁就觸怒好多網友。有個網友甚至開咗個網上日誌(www.davidlereahwatch.com),去 「監察」David Lereah嘅啦啦隊言論。

我見到David Lereah「咁紅」,當然即刻幫佢起起底,睇吓點樣先至可以「咁紅」。

原來,一睇Amazon.com嘅紀錄,David Lereah喺05年寫咗本《買樓必勝》嘅書。見到時,我心諗:「任何人都會睇錯市,何必要圍毆佢呢?」

再睇Amazon.com嘅紀錄,David Lereah原來喺00年都寫咗本《買科技股必勝》嘅書。見到時我再諗:「任何人都會睇錯一兩次市,何必要圍毆佢呢?」

不過睇到最後,原來,David Lereah喺今年4月又有一本新書出版,主題就係「熟悉地區趨勢,任何市況都買樓必勝」。大家明白點解啲網友要圍毆佢啦?

Sunday, March 04, 2007

Blogger back again...

Seems like Blogger is back.

Below is a piece by 袁彌明. I had something to do on Thursday and she had an experience to share with you all. So she took over for a day = )

------------------------------------

投資100萬 收入300元

昨日,孫柏文兄 有要事在身,又剛巧我想同大家分享一個經歷,所以今日柏文兄讓了這個在方卓如先生隔籬的版位給我。話說日前獅子山學會搞了一個午餐會議,邀請了施永青先生 作主講嘉賓。為表尊重,我特意挑了西裝外套及高踭鞋赴會。經過一輪集合歷史背景、統計資料、各人觀點和立場的房屋政策討論後,我帶着一些得着和疑問趕到銅 鑼灣,去會一位來自不遠方──深圳的朋友,一盡地主之誼,也為了促進本地旅遊業,所以帶她吃喝買東西。冇錯,我作了一次「零團費」的嚮導。

我先帶這18歲 小妮子買電話卡,吃章魚丸,去許留山,接着直闖連卡佛,橫掃大半化妝護膚品專櫃,帶着十幾廿支「乜」膏「物」霜,重得要命。再沿着時代廣場的扶手電梯,逐 層攻陷。時裝、皮鞋、手袋,一件她都不能少。然後繼續直搗百老滙買手機、相機。此時我那雙踩着高踭鞋的腿已痛得失去知覺,小妮子卻嚷着要我幫口講價,將大 陸的「圍毆」零售議價文化在銅鑼灣落實。講了兩講,Sales哥哥沒好氣的說:「袁小姐,我認得你,不過真係冇得平喇。」面紅耳赤的我等不及她結賬,已拖 着那十幾斤重的「零團費戰利品」到店外去。

複雜網頁介紹「身遊使」

為 本地旅遊業出力,狼狽得像個「咕喱」的我,偏偏在前往晚膳途中分別碰上五個朋友,四個是男的,未婚。迴轉壽司店未到7點已大排長龍,那雙快不屬於我的腳教 我求其找另一家頂檔。之後的一天一直在拉肚子,是這原因吧。最後回到家中,幫荷包結數,發覺做嚮導都要花上300元。我這個「咕喱」旅遊大使,自問為了服 務遊客,身體力行,出錢出力,可謂啞子吃黃蓮、有苦自己知。

不過,我想一定有人笑我笨,話其實有一班人舒舒服服坐office,發明新服務,都自稱一樣可 以促進旅遊業。話說旅遊發展局推出了一項打電話問旅遊資訊的服務,叫做「隨身旅遊大使」。相信大家得悉它的功能之後,都會同意我為他改的簡稱──「身遊 使」。旅客只須於指定地點購買一張價值60蚊的電話Sim卡,便可以72小時任打*454,聽景點、購物、飲食等資訊。注意!這張Sim卡並不支援撥出或 接收本地及國際長途電話,亦沒有「冧巴」。旅客使用時是要將自己原先的電話Sim卡拿出來,換入這張「身遊使」Sim卡,方可使用。

想了解多些「身遊使」 的服務,可以到旅發局網站去找。「身遊使」的首頁要用上Flash player,查詢購買地點要開pdf,簡直就是下五載、開六檔。原本簡單不過的服務何以弄出個複雜的網頁去介紹它?看此網頁,旅客不如直接從網上找旅遊 資訊?

半年賣出五大張Sim卡

整 個網頁最引人入勝的地方是FAQ(常見問題),問道誰人應該使用「身遊使」和「為甚麼要使用身遊使」。我們平民百姓或許會想不出答案,但旅發局竟然可以。 當然,答案是有,不過最能形容他們答案的詞彙,就必定是柏文兄常常掛在口中──「膠」,這個字。

這個「身遊使」產物,原來花了納稅人100萬元去研製。說 到這裏,大家應該對旅發局每年花上幾億元有些眉目了吧。「身遊使」的效用有多大,到底有幾多人受惠?「身遊使」最讓大家發怒必定是這一環,聽說半年來只賣 出五大張Sim卡,盛惠300元,大家要記得300元不是盈利,是top line,是revenue。用100萬元投資去換取300元的收入,這就是我們的旅發局。反觀「咕喱零團費」旅遊大使,以300元為香港帶來了兩萬元收 入,可有一日能以促進旅遊業之名,申請數億元納稅人血汗錢來補貼?

最後,大家如果覺得自己血壓偏低,需要稍作刺激,可以用自己的本地流動電話隨時打 *454。聽聽這用100萬元鑄造的傑作,包你聽到一肚火,你話454?

Thursday, March 01, 2007

重申一注獨贏買H指沽證3497

今日首先要同大家講,孫柏文噚 日落筆寫呢篇文章嘅一刻,花旗國未開市。而因我會喺呢篇文裏,估計噚晚花旗國股市走勢,所以到大家睇呢篇文嘅時候,可能又會再一次慨歎:「個死仔包又估 錯!」不過,就算估錯,都希望可以為大家提供一啲另類分析。

大家一定知道,呢幾日嚟全球股市大跌。就算龍頭花旗國股市,都喺前晚一樣中招,而我相信噚晚都 有繼續跌。而因日圓呢幾日都有升,表面證供似係以低息借咗日圓買其他投資工具嘅人,放咗貨買番日圓。不過,如果呢班人純粹覺得日圓會升,所以將資產調配, 我哋係應該見到以日圓計算嘅投資工具升,例如東京股市。不過,如果睇番噚日亞洲股市,東京比香港跌得仲多。所以,借咗日圓買嘢嘅人,相信係日本啲銀行強迫 還錢,所以先至放貨。

其實,控制「紙幣狂魔」嘅「建制」,知道要濫發鈔票去對抗花旗國樓市爆煲。不過「建制」亦知道如果就咁開印刷機,就會令金銀暴升,最終令人對紙幣失去信心, 所以開印刷機前要做足「事前功夫」,就係短期之內,大大力打壓所有(包括金銀)資產價格,製造紙幣購買力強嘅假象。「建制」黨當然包括全球各大中央銀行。 如果「建制」真係為對抗花旗國樓市爆煲,做「事前功夫」,咁「建制」仲會喺短期之內大大力抽錢走。早排越升得勁嘅投資工具,就應該會越跌得甘,我覺得升得最勁嘅就係H股。

06年最後一個交易日,即H指10300點,孫柏文曾經叫大家「一注獨贏買H指沽證3497」,話揸到1月尾,原因係06年尾嘅升勢,實在太似03年。後來到1月尾,我建議繼續持有,亦「重申一注獨贏買H指沽證3497」, 喺2月尾再檢討。今日,我「重申一注獨贏買H指沽證3497」,到3月尾再檢討。最後,我為大家提供兩個H指圖表,去解釋點解我覺得H指會繼續跌。

必定有雙糧的行業

「今年畀多一個月糧你!」相信大家喺呢個金融風暴後嘅世界,聽到老闆講呢 句話,都應該高興。高興嘅原因,不單止因有額外嘅錢到手,亦係因你嘅工作表現被老闆肯定。所以噚日,我上網聽財政司司長唐英年嘅財政預算案時,聽到唐司長 話,政府會用納稅人嘅錢,向攞綜援同福利嘅人,畀多一個月嘅bonus。


孫柏文
講咗句: 「唔係話?」我諗唐司長講嘅時候,漏咗話:「畀多一個月嘅bonus,係為咗鼓勵大家繼續努力失業,越失業越得到政府用金錢獎賞。不過,為咗確保攞 bonus嘅人,對失業大軍呢個團隊有忠誠,所以亦同時間宣布失業少過一年嘅人,唔可以攞。如果你做咗失業大軍嘅「二五仔」,喺幾個月之內搵到工,就冇 份。」

有乜值得驕傲

孫柏文建議唐司長,企喺勞工處職業介紹所出面,同每一個想行入去搵工嘅人解釋點樣攞呢個bonus。最後,我明白現今政府最鍾意學孫柏文之 流,出嚟認屎認屁,例如乜乜政策「製造」幾多幾多就業職位,或者物物政策之下有幾多幾多人「受惠」。不過,唐司長講呢個鼓勵繼續失業嘅「攞綜bonus」 時,話會有100萬人攞到,佢真係覺得係一個achievement咩?

我哋特區有100萬人攞福利,真係咁值得驕傲?

唔通,唐司長知道呢個「攞綜 bonus」會減少攞福利嘅人數?

I think I have to retire from this game...

This is it from this game.

46.716 Seconds...

No point you all trying this game now... I don't think you can beat this.