Monday, May 24, 2010

Seth Klarman's book

Ok.

Here is Seth Klarman's book "
Margin of Safety" in .pdf format.

As mentioned on i-Cable's Wall Street Express 2010 May 24

Sunday, May 23, 2010

點解美股千點Deep V

上星期四,花旗國股市出現Deep V市,相信大家都知。嗰一刻,大家可能瞓緊覺,所以起身睇新聞知道時,已經過咗去。不過,見有股票如「管理顧問」公司Accenture(ACN),喺十幾分鐘內由40(美元,下同)跌至一仙之後,彈番上40蚊,又或拍賣行蘇富比(BID)由30蚊跳至十萬元一股之後,又撻番落去,真係驚心動魄。

到今日,孫柏文亦見到唔少解釋呢個現象嘅理由。芸芸理由中,當日首先出台嘅,就係最常用嘅解釋,有人手指粗得滯,落錯盤。呢個解釋咁受歡迎嘅原因,因簡潔乾淨,亦因「唔小心」呢三個字由3歲到80歲都識,所以一有異動,就會被人用。不過我一聽呢個解釋,第一個反應係:「千手觀音呀!一次過隊冧咁多隻!」

好,過咗一日,「唔小心」等理由開始冇市場,又要搵其他理由解釋。咁如果唔係唔小心,即係「特登」㗎啦!咁邊個會做呢啲嘢?如果睇我哋特區傳媒,又係股市大跌時嘅model answer,一定係大鱷係幕後黑手,所以啲頭條都係「美查造市」。

講真,因曾喺報紙財經版做全職,所以我係好同情嗰啲要喺上周五交稿、起題、搵解釋原因嘅撰稿員同編輯,當由社長到隔籬娛樂版嘅intern都問你點解時,「大鱷搞事」真係幾好用。

到周末,總統奧巴馬啲政治化妝師仲勁,走出來話:「唔排除係有人搞破壞。」即係首先由「唔小心」,變成「特登,因大鱷損人利己」,到最後美政客最鍾意嘅「特登,仲要係拉登,因恐怖分子損美又不利己」。真係天下烏鴉一樣黑,奧巴馬都要抽反恐水。

咁多個解釋,最服嘅係網站zerohedge。佢話,喺雷曼爆煲後,市場因缺乏買賣盤,一旦啲order側埋一邊,就會大升或大跌。所以紐約交易所就氹啲大行做Supplemental Liquidity Providers,即原有外「整多一層流通量提供者」。每個成功交易,你就要俾佣金,佢哋就收回佣。

咁因呢啲「流通量提供者」接或沽貨俾你,未必能即時搵到另一方去做交易,所以就令銀行本身要坐盤。以前銀行坐盤,就被鬧炒嘢,有呢個計劃時,就揸正牌坐盤。咁計劃行到今年初,就差不多被一間銀行壟斷,你估吓係邊間?冇錯,就係高盛! 原來,據zerohedge預料,到3月底,每日有55%嘅紐交所嘅股票交易,高盛係買賣其中一方。咁近呢一年,zerohedge都經常警告話,如果太依賴單一個買賣家,市場好可能會出現供求嚴重失衡嘅情況,爆啲不尋常嘅成交價。

仲有,原來嗰個「整多一層流通量提供者」計劃,喺上月底完咗,上周明顯因流通量忽然失衡(失蹤?)及投資者近期炒股有玩「冚棉胎」嗰隻心態所至,zerohedge之前嘅告誡,我覺靈驗,佢哋警告會再發生,但deep V真正理由,係發生嗰刻,我搭緊飛機去洛杉磯,剛進入花旗國領空。我呢個淡友一到,美股聞風喪膽,仲唔跌一跌俾個面?

Saturday, May 22, 2010

歐央行焚毀歐元

上周三,孫柏文已經寫咗篇題為「歐央行瘋了!」嘅文。我喺篇文裡面不斷強調,歐元呢樣嘢由八十年代學術討論開始,到千禧年代落實,一路以來都被視為西德馬克的延續。


如果你係位八十後讀者,唔好話馬克係乜,分分鐘會問我:「點解『德』前要加個『西』?」所以,今日都要解釋吓當年嘅西德馬克有幾勁。


故事起源喺第一次世界大戰。1918年德國投降,被迫賠巨款俾戰勝國。因政府除咗還黃金俾其他國家,就冇錢做其他嘢,所以為應付出糧俾公務員等開支,德國政府開始印銀紙照用。


到1924年,通脹差到啲面額有十幾個零嘅鈔票,都係俾人用來火燒取暖,因已冇晒價值。所有儲蓄化為烏有,經濟因價格不穩,令返工和投資等活動停頓而崩潰,國家大亂,令嗰啲話自己係「強政勵治」嘅人上台,亦即係希特拉。希特拉上台,最後令德國人民捲入戰爭中。母親失去丈夫、孩子,德國喺第二次世界大戰後,仲要被分裂,最後成為東、西德兩國。


走自由主義嘅西德,人民達成共識,迫政客唔可以貪一時政治之快,做民粹嘢,最後令制度崩潰,瘋人上台。至於貨幣價值嘅穩定,亦成管治基石,唔可以話經濟唔好,就將貨幣貶值,增加出口。


題外話,特區政客不論直選或功能組別,都係會攞本經濟教科書出來,跟住話:「貨幣貶值好!能推動經濟!」佢哋係歐洲級政客,不過係南歐嗰隻。如果香港民粹政客係希臘人,仲唔係企喺攝影機前、暴徒最前線,「要求」「公義」?火燒銀行職員?你估會好似德國政客咁,要政府量入為出?


所以德國喺二戰後,貨幣穩定嘅教訓,可以話係每個屋企用自己啲小朋友嘅血同命換返嚟,效果係成為國際投資者信賴嘅貨幣。故事的另一教訓係,經濟唔好,都只係食少啲,貨幣不穩係會大規模死人。


到千禧年,歐元面世,大家就假設係馬克嘅延續。試諗吓,如果德國人透過選舉、公投,都能接受放棄馬克,改用歐元,歐元都應該係OK嘅。


點知,到2010年嘅今天,歐元真係應驗咗佛利民十年前嘅預測。佛爺當年話,歐元捱唔過歐洲第一個大衰退,理由係歐央行頂唔順南歐國用貶值減債嘅要求,令德國放棄歐元,或歐央行揸正來做,令南歐國退出。


今時今日,歐洲用緊咁多招,招招都係得一個後果,就係歐元貶值。所以都係繼續沽歐元!因歐元唔係馬克。

Friday, May 21, 2010

歐央行瘋了!

希臘及其他南歐國嘅債務危機,喺上周末卒之「解決」。大家唔好以為,係嗰啲咩國際貨幣基金組織(IMF)、歐盟聲稱會俾嘅好多千億歐元救希臘方案。

咁嘅救市方案永遠都有個死穴,就係錢從何來?若要它國的國民、納稅人救希臘,喺民主政治成熟的國家係很難嘅,咁救完希臘再救西班牙、葡萄牙等,又邊會再有錢?若我係借貸過度嘅政府,都想有枝魔術棒,一揮就有錢還、有錢使。有魔術棒,就唔使俾啲民選國會阻住晒,你啲67歲先退休嘅德國人唔肯救啲60歲就可以有政府老人金嘅希臘人?冇問題。魔術棒呢,就只係喺小朋友童話世界先有。我哋成年人世界,就唔係叫嗰個神奇變錢器做魔術棒,而係叫做印鈔機。係咁印,係咁印。

點解孫柏文話希臘、南歐問題已「解決」?因為歐央行做咗個小改動。不過呢個小改動,係登陸月球太空人岩士唐嗰隻,即係one small step for歐央行、one giant fall for歐元。

呢個小改動,就係之前,如果銀行手緊,可攞抵押品俾歐央行去當,不過歐央行冇「二叔公」驗貨睇價嘅能力,所以就將工作外判俾啲信貸評級公司。啲抵押品嘅信貸評級要達標,歐央行先會受。歐央行剛宣布從本周起,任何希臘國債,都毋須再要信貸評級,都可做抵押品借錢。仲要金額係票面值計。

今時今日,你用例如100蚊問希臘政府買張每年有8厘息嘅十年期國債。跟住就將張債券俾歐央行當抵押品借錢,歐央行即時俾100蚊你,每年收1厘息,不過希臘政府仲係俾8厘利息你,你淨賺7厘。跟住你又攞歐央行借俾你嘅100蚊,又買多張年息8厘嘅希臘國債,又再俾歐央行當抵押品借錢,不斷咁做。你原先嗰100蚊,分分鐘有好多倍利潤。打個比如,有個地產發展商賣危樓,仲要係好多貨。但佢就同買家講話會租番做佢公司嘅辦公室,每年俾相等如購入價8厘嘅租。跟住你就攞張地契做按揭,銀行俾你做十成同只收1厘息,以前銀行會派人驗樓,但依家唔使,你要賺仲唔瘋狂循環咁買樓?

你問邊間銀行會咁唔錫住啲資本?有,咪就係可亂印鈔票嘅歐央行囉!亂印鈔票令現金持有人被秘密地剝削,不過債仔就靜悄悄減債。未有歐元前,啲南歐國好鍾意咁做,所以要氹現金持有人買佢隻貨幣,連短息都要高。

依家歐央行咁做,已與以前南歐啲央行一樣。即係如果你仲妄想歐元等於西德馬克,你就係倒錢落鹹水海。

歐元已等於葡萄牙埃斯庫多、西班牙比塞塔、希臘德拉克馬。倘若嗰啲貨幣得1厘息,仲唔不斷兌美元?如果你仲未,快啲沽歐元啦!歐央行已簽歐元嘅死亡令,依家只係等德國人民發難,德國脫離歐元區。第一站係歐元兌美元一兌一,一注獨沽歐元!

Thursday, May 20, 2010

財長魯賓利疊利

呢個世界,有啲人話投資銀行高盛(Goldman Sachs)玩晒,有啲西方傳媒行家,甚至封佢哋為「吸血八爪魚」,不但無孔不入,仲要勢必搾乾搾淨。


咁佢哋個朵咁勁,裡邊啲人就算唔係三頭六臂,都應係非常有傳奇色彩。多唔使講,就講佢哋前話事人魯賓(Robert Rubin),咁佢除咗喺高盛返工外,仲有回饋社會,做過九十年代克林頓政府嘅財長。


今日講佢嘅原因,係因為魯賓疑似爆性醜聞。話說有個叫Iris Mack(下稱麥小姐)嘅女子,佢曾經喺金融海嘯前,喺最大倒閉公司Enron做過嘢,後來轉會過去哈佛大學信託基金做資產管理。


點知因為喺02年警告,話基金嘅衍生工具投資非常危險,而被魯賓嘅財長接任人、之後02年做咗哈佛校長嘅薩默斯(Larry Summers)炒咗。最後當然麥小姐冇錯,因為哈佛後來喺金融海嘯中,因衍生工具投資輸鑊甘。


麥小姐讀書時已來頭不小,佢係哈佛第二位黑人女性,成為應用數學科嘅博士畢業生。咁原來佢喺香港時間上個禮拜五,喺左翼新聞網站Huffington Post自爆,話有次魯賓約佢喺邁阿密食飯,嗰次只係佢哋第二次見面,第一次見面時,麥小姐佢仲要係素顏。


不過,食完飯之後,行返酒店時,魯賓就問麥小姐想唔想上房cuddle「搞搞震」。麥小姐話,因佢一路以來都係條數學書蟲,對異性提出嘅建議,都係反應比較遲鈍,就算用盡佢哈佛訓練嘅博士級腦袋,都唔知究竟「搞搞震」即係點解。


不過,都未諗完,麥小姐就話魯賓隻手已似八爪魚般周圍「走」。麥小姐仲喺篇自爆文章中,好用心機咁仔細地形容佢哋嘅接吻過程。


可能麥小姐係應用數學科博士,佢哋嘅接吻最好用compound interest來形容,即正式翻譯係「複式利息」,而通俗啲嘅就係「利疊利」。


講到呢度,大家一定喺度估麥小姐幾歲?可以第一次素顏見面,都令財長神魂顛倒。其實,呢度就係點解孫柏文今日要同大家分享呢個故事。故事教訓所在,就係要做到高盛高層,兼任財長,口味唔可以同市井之徒一樣。


想搞搞震嘅,都要搵個學歷高、有膽頂撞上司,同埋唔係後生女。冇錯!麥小姐其實係個熟女,今年已經52歲。不過點都好,呢個周末,魯賓都應該係瞓廳囉。



Iris Mack

歐元跌為何它不升?

星期一,孫柏文為大家繼續分析過為何歐元續跌,係不能抵抗嘅命運,亦喺最後話會喺今日同大家分享一間理應能受惠嘅公司。

睇會考經濟教科書,當一隻貨幣貶值時,入口會因使用貨幣嘅消費者購買力削弱而減少。如果入口商不能加價,但因入貨成本上升,就會賺錢少咗,有時更可能會出現虧損。喺特區上市嘅股票中,因歐元貶值同以上會影響入口嘅因素,所以市場驚佢會賺少咗嘅公司,相信表表者必屬思捷環球(330)。

思捷嘅股價,亦眾望所歸、冇得留低咁喺一個月前今日嘅約60蚊股價,跌到噚日收市嘅47.45元一股,跌幅超過兩成,同期歐元則跌約8%。

思捷股價跌多過歐元其實好正常。點解?例如1歐元兌10港元,一件貨成本100港元,出口德國賣15歐元,即收入係150港元,盈利係50港元。

咁歐元跌8%,每歐元兌9.2港元,不過件貨都仲係賣15歐元,即港元收入就減到138元。

因成本仲係100港元,盈利就得38元,比之前有50元,下跌24%。貨幣跌,盈利跌得更深。

掉轉頭講,出口商就會因以上嘅因素被反轉而收惠,咁特區有冇公司係歐洲貨嘅出口商?有,就係09年11月上市嘅利邦控股(891)。

呢間公司,係利豐(494)嘅姊妹公司,屬同一集團。佢哋嘅業務,就係喺東亞地區,特別係大中華地區,賣歐洲名牌男士服裝同飾物。

大家可能問,咁呢隻股票又因歐元跌,升咗幾多呢?

利邦不但冇得升,仲要跌超過一成。股價係反映公司未來盈利,點解呢間公司擺到明會因匯率轉變而受惠,都要跌?唔通啲教科書dump得?

其實利邦喺呢個歐元跌浪中嘅表現,就係炒股、投資唔可以就咁用啲基本經濟學理論後,就衝埋去做買賣嘅最好例子。

咁點解股價理論上應升,不過又冇?第一,佢嘅估值算高,上月今日嘅市盈率都約超過40倍。即如無盈利增長,你用一蚊買呢隻股,要40年後先回本。上月股市因歐元區動盪下跌,令其他股票抵買咗,咁就算你賺多咗,都可能因市盈率被壓令股價下跌。

第二,睇利邦嘅年報,佢哋話有做外匯對沖,咁即係話匯率對盈利影響細。大家都知利豐出名醒目,同系嘅利邦分分鐘對沖到外匯零影響,所以就算理論上受益,都喺冇佢著數。

第三,利邦賣貨嘅毛利率已經好高,有七成幾。所以就算入貨價平咗,都係少少。而佢哋始終賣非常高檔嘅服飾,如果東亞地區被中央收緊政策影響,收入減少時,成本平咗都係冇用。

所以結論係,買股都係做足功課好啲。


作者為前石油業證券分析員,視股市為終身學習場

Wednesday, May 19, 2010

美股返歷史高位?

今日入正題前,孫柏文想同大家分享前日我聽過嘅一些評語。事緣前日我同張一鳴、胡孟青及黃曉嵐喺公仔箱一齊做節目,講嘅內容係關於中央政府如何冷卻內地炒到㷫烚烚嘅樓市。

咁我就講番話自己記得對上一次中央大力打壓樓市,就係喺07、08奧運會前,直至雷曼兄弟爆煲,先因金融海嘯放鬆貸款。一鳴兄就話,其實嗰次有好多地產界人士唔希望見到中央放鬆手。

咁我就問:「係咩?點解呀?」一鳴兄解釋,原來嗰轉有好多之前風險上保守、儲定大筆資金,等機會食大茶飯嘅香港地產發展商,等緊中央收緊時,將冇實力、做太大槓桿、太進取嘅內地發展商「鍊死」,之後執平貨。

不過,因中央到最後突然放水,仲喺去年推超過幾萬億元人民幣刺激經濟措施,之前愈進取、愈亂來、愈槓桿大,就愈冇事。我哋啲港燦地產發展商就鳴金收兵,呢浪冇肉食。

不過,特區發展商同內地房產嘅關係,就係我哋港人同內地人嘅關係。即係點?咪就係佢哋LV大舉掃貨,啲錢又唔知點來,我哋港人企埋一邊,佢哋瘋癲、我哋齋睇,慨嘆一句:「我哋唔夠鬥。」不過一旦逆轉,佢哋大規模走佬,我哋就無聲無息咁,向要擺平內銀嗰啲呆壞帳嘅資產管理公司,執遺留下來嘅不良資產(distressed assets)。

仲要一路執,一路話自己係港燦。

都係最德高望重,教我最多嘅青姐胡孟青講得最好,佢成日提醒我,內地政策:「一放就亂、一亂就收、一收就死、一死就放。」

入正題,呢幾日喺花旗國有篇分析文章大熱。作者係「指數基金之父」Jeremy Grantham,亦係管理逾1,000億美元(約7,800億港元)資產基金管理公司GMO的主席。從70年代開始,多次成功預測股市方向。亦在06年,頻頻發出信貸泡沫將爆破,及帶來嚴重後果的警告。

佢周末出呢篇文成大熱,係因佢作為淡友,覺得有五成機會美股於2011年年尾前能返歷史高位。咁如果講標普500指數,可以升至1,500點,亦仲有約26%嘅升幅。佢自己信標普500指數只值875點。而就算重返高位之後都會倒跌,仲要跌凸至低過875點。最終要跌市的主要因素,係佢認為經濟根本未曾轉好,數據轉好,因政府嘅大額開支。又因本身美國國債同財政赤字已達人民唔會繼續接受嘅水平,開支都唔會繼續增加。咁以上嘅因素籠罩,點解仲覺會能觸動前歷史高位?

根據佢講,喺「經濟繼續疲弱」情況下,經濟雖差,但係就會有聯儲局繼續零息政策。即係因鈔票氾濫,投資者被迫追求回報,令股市不斷泡沫式上升至之前歷史高位。

咁嘅升市理由,都係嗰句,可以將股神師傅Benjamin Graham啲講價值投資法嘅書掉晒算。

Tuesday, May 18, 2010

有限公司銀行唔安全?

孫柏文除咗係個三流財經演員之外,喺課餘時間,亦喺間討論公共政策、叫「獅子山學會」嘅民間智庫組織裡面,義務咁做研究部總監。

咁呢幾年,我哋都出咗唔少報告俾國際其他智庫組織參考,解釋點解其他地方嘅銀行體制出事,我哋特區就喺系統上大步檻過。最主要嘅原因,我之前喺《大明燈》都講過,就係喺97年,我哋冇救陀地投行百富勤,令啲銀行債主(例如存戶等)知道要睇實銀行搞啲乜。

而花旗國最錯嘅地方,就係喺08年初,包底救晒所有投行Bear Stearns(貝爾斯登)嘅債主同客戶,搞到其他投行嘅債主,冇壓力迫剩餘嘅投行,快速出去集資或減少投資槓桿。

大家可能會問:「咁啲員工同股東呢?點解佢哋唔識死?玩到咁大都唔驚?」講員工先,佢哋好簡單,做完交易,俾會計部計嗰單交易喺會計理論下「將應」出現嘅盈利,之後即刻出晒相關花紅。出年嗰單交易出事?人都走咗囉!所以啲員工一有機會就會去玩火!

啲股東亦都差不多,佢哋計過,只要打後幾年間銀行冇事,仲要如果有盈利增長,持股幾年嘅每季派息,都夠填番個本。大家要記得,就算喺信貸泡沫最誇張時,好多銀行都係賣緊單倍市盈率,即只要盈利水平得以維持,十年內,理論上投資便返本。所以啲股東先俾啲員工去玩火!

最後,就係如果政府吓吓都救債主,又邊會令啲債主話:「我借啲火柴俾你,會唔會搞到你自焚還唔到㗎?」現今社會,淨得債主先會輸入肉,所以得佢哋先會監察。冇計。

不過係咪真係冇計呢?有冇方法迫員工同股東,一旦銀行輸爆廠時,要入肉?唔可以拍拍屁股走呢?不過我咁問,一定有啲讀過吓幾年商科嘅《大明燈》fan屎大大聲鬧:「你識唔識咩叫『有限公司』㗎?」我識。

其實以前,仲要唔係好耐以前,真係有啲銀行如果出事,員工不但係股東,仲要輸埋身家。呢種銀行,當然唔係有限公司,其實佢哋就好似啲律師樓咁,係以合夥人形式運作。即係輸起上嚟時,所有合夥人一齊輸身家。咁樣佢哋又係員工,仲唔小心翼翼?

多唔好講,淨係呢排嘅避雷針投行高盛,都因當年Goldman先生搵埋佢女婿Sachs哥拍檔做合夥人。先搞出呢間投行,而佢哋合夥人嘅營運結構,要去到99年先俾佢哋當時嘅總裁Hank Paulson變成有限公司上市。

之前,政府規定,投行槓桿唔可以做多過公司資本嘅12倍,高盛班合夥人一定支持。因為費事佢哋班有限公司對手亂來,做大槓桿搶市場佔有率。點知當自己都變埋有限公司時,Paulson就喺03年同啲同行去國會,要求放寬槓桿上限,亦得手。最後個個都揸住幾蚊去做一百蚊生意,當市勢一逆轉,全部冚旗。最後08年要邊個救?就係升咗做財長嘅Paulson,游說國會出手營救。合夥人制,都咪話冇用。老人家笑你「有限公司」,唔好諗住佢哋只係玩字唔識嘢。

Monday, May 17, 2010

世上最強的拉丁貨幣

聽聞,希臘政府話可能要告美國華爾街的投資銀行。原因係啲大行當年「幫」希臘借咗啲「唔應該」借嘅錢,所以要還錢嘅今日,就冇錢還。


以前,孫柏文成日覺得,最冇品嘅人,係啲借咗錢,還唔到,仲大聲夾惡。原來最衰係唔還,除咗大聲夾惡之餘,仲要告你。都係嗰句,呢次歐洲國家級嘅財政、冇錢還危機,俾到我哋最大嘅教訓,係啲南歐人冇句真,當使凸時,「老奉」覺得你要救佢。


依家歐元係咁跌,好多人想買博反彈,我聽得最多嗰句係「物極必反,冇理由唔彈」。如果你都係咁諗就要好小心。因為「物極必反」中嘅「物」一字,係假設講緊同一樣嘢,不過昨天嘅歐元,就已經唔係今天嘅歐元。


我之前講過,昨天嘅歐元被視為西德馬克,今天嘅歐元,已經喺歐洲人,包括德國人民心目中變成啲冇保值嘅南歐、拉丁貨幣。例如意大利里拉,西班牙比塞塔,甚至講近啲,菲律賓披索。如果我同你話:「你褲袋裡面嗰啲銀紙,唔係德國馬克,而係菲律賓披索。」你都心照隻貨幣,係可以喺冇反彈嘅情況下不斷貶值。仲會物極必反?


其實,睇貨幣名,都可以大約估到嗰隻貨幣究竟能否保值。啲南歐國同佢哋剩番落嚟,嗰啲前殖民地用嘅貨幣,全部都係兌美元跌、跌、跌。


我辛辛苦苦,先搵到隻保值嘅拉丁貨幣,你估唔估到係邊隻?冇錯!就係澳門葡幣!呢隻貨幣背後就冇乜天然資源撐腰,不過勝在個政府點使、點fing都係有財政盈餘,前景樂觀。


至於歐元,其實係會有小型反彈,不過一彈就係買跌嘅入市良機。下次彈係幾時?希臘喺本月19日(即本周三)有一批大額嘅債要還,咁大家一路驚國際貨幣基金組織(IMF)、歐盟「救國方案」冇料到、冇錢齋talk,咁19號嗰日就知。如果希臘還到錢,歐元應該喺嗰日彈,不過會好快又回落,所以要沽,就要快手。


我呢半年成日話,今年同08年一樣咁炒。但唔同嘅地方,就係嗰年係合埋雙眼沽投資銀行嘅股票,依家就沽歐元就得。以前歐元啱啱誕生時,唔使90美仙已買到1歐元。當年歐元咁平,除咗美元強之外,係因為啲人唔知歐元得唔得,所以幫佢打個折扣。今日,要用約1.25美元先買到1歐元,仲要知道歐元係唔得,咁就唔跌都唔得啦。不過除咗沽歐元外,有冇其他因歐元下跌而受惠嘅投資?有,星期三再同大家分享。

慳電膽2之補貼小輪

前日,特區政府建議用公帑補貼離島居民搭小輪。一出聲,全場譁然。孫柏文已經好耐未見過政府呢啲「明益式」嘅政策出台,輿論會一面倒反對。ok,又唔係真係咁耐,對上一次係舊年年尾嘅慳電膽事件。上次嘅來龍去脈,相信大家唔需要我重複。咁今次又發生咗咩事呢?其實都好簡單。


一,小輪作為交通工具嘅吸引力每況愈下,以前搭船嘅人一係搭其他交通工具,一係就搬去唔使搭小輪嘅地方。


二,小輪公司見呢個情況,又因為有利益保證,就指定動作咁想加價。點知計過數,如果加價會更少人搭船。加價冇用,開一班船就蝕一班錢。


三,小輪公司見加價唔會有用,就當然諗減開支。最直接減開支嘅方法,就係將航班次數減少,令每班船嘅搭客數量增加。


四,呢部分就係大家睇唔到嘅嗰部分。啲離島區議員一聽到呢個消息,即刻為居民約見官員,同小輪公司代表,「強烈要求」維持航班次數。小輪公司代表望住官員話:「蝕本生意冇得做,遲早執笠,到時一夜之間突然冇船搭時………」


五,政府喺無計可施嘅情況下,唯有向「通天後備」納稅人開刀,用公帑接濟啲離島船民。


六,傳媒發現,親戚繁多嘅特首,又有屋企人喺小輪公司返工,即刻反射式咁嗌:「利益輸送!」政府捱轟,要人護駕。


七,呢part就係高潮,之前「強烈要求」嘅議員,喺政府最需要佢哋嘅一刻,有良知就變「快閃黨」,冇品嗰啲就要行出來,大大聲話:「叫咗政府唔好㗎啦!」跟住仲話長遠解決方法係,政府不如自己設立船隊!有啲更加話不如起橋!


離譜?係。起橋呢個建議,喺成本效益上雖然完全唔得,不過,如果你係個政客,唔係冇方法迫政府。方法就係要求自己代表嘅島,割離香港版圖,變成內地一部分,跟住就好似高鐵咁,同政府話,為國家和諧,特區唔變荒島,要起一條「日式冇人行」嘅橋(即如日本起嘅橋,最後都是沒有人行)。政府即時批600億元俾你!講真,如果小輪冇人搭,係應該減班次。如果唔夠客,都要補貼迫船開,淨係從環保角度都唔啱。唔服嘅話,你睇下小輪噴出來嘅廢氣。


如果一日一班都唔夠客,咪隔日先開,如此類推。冇人欠咗離島船民,請佢哋同佢哋啲議員代表自重。