Thursday, November 21, 2013

我最proud嘅一集 Money Café

幾年前,當年我仲有幸做《Money Cafe》時。

我喺英國己成放射科Radiology 顧問級醫生嘅阿妺孫慧文返港放假。

我就捉佢上 《Money Cafe》講點解當Radiology呢科喺香港在缺之時,我個香港土生土長,手持三粒星,當年用香港私人(我哋老豆)資金去讀書,居然因本地醫療及大學既得利益集團唔俾好似97回港出力。

我成日都話,香港其中一個最大嘅結構性問題,就係九七年之後,好多專業界別已經唔俾富有外國執業經驗嘅人來港。等香港無機會吸收世界級best practice。

好,就喺我個妹上完《Money Cafe》冇三日,醫管局主席胡定旭就宣布話考慮積極推動俾係海外執業嘅香港醫生回港執業。

之後聽聞Medical Council怕政府收返醫生發牌權,俾衛生署,所以減低玩嘢程度,由每年只得十幾人可以通過考試回流返港,升至2012年百幾二百人。

我唔識醫學,只識少少經濟學。呢班嘗試回流嘅人,都唔需要通過考試階段,淨喺考試過程中,已經提升香港醫學practice質素。

我點知?以下就係一名港大醫學院final year學生post喺關於回港考試Facebook page嘅一個post。

所以我只可以話,let them come home!

PS. 嗰集係我最proud嘅一集。比起被梁展文喺佢嗰封公開信quote更proud。


Thursday, November 14, 2013

長策會之「撚手小菜」個「撚」?





早幾個月前,有日孫柏文坐咗喺獅子山學會全球總部,因知資金湧入該板塊,所以就細心研究以flash制式寫嘅網上遊戲。點知研研吓,同事W突然打斷我思路話:「喂,收到個fax,政府好似話想請你去唔知咩諮詢會喎。」

我就問:「係咩?諮詢啲咩?」同事W見我望都唔望佢咁聚精會神研究,就讀出原來係長遠房屋策略督導委員會想叫我哋一齊討論吓房屋策略。咁我聽完再問:「幾時呀?」同事W就話:「佢哋有四場諮詢會俾你揀。」佢講到呢到,我就冇辦法繼續研究,惟有pause機,對吓長策會啲日期同自己個schedule。

點知一睇,唔掂,工作太忙,個個期都撞,唯一得一場夜晚七點半喺私人起、政府營運嘅禮頓山社區會堂舉行,我可能可以喺公司鼠出來出席。咁我就即刻寄個短訊俾我個監製,同佢話嗰日我要遲一大陣先返到公司同埋遲返理由。佢過咗幾分鐘之後覆:「你去完盡快返,如果唔係事頭婆咋型嘅話,大家難受。」

就係咁,我雖然滿腦有好多對房屋政策嘅構思,不過都喺獅子山學會內部廣納意見,睇吓班兄弟姊妹有何高見幫政策或民怨搵解決方法。一搞,就搞咗好多日兼精神。不過,創辦得智庫組織,都係想為社會出點力,辛苦、煩瑣都係值得。

展轉咁去到上個禮拜初,諮詢會之前幾日,長策會有位熱心嘅職員來電,提我一定要準時到,否則所有餘位將會俾場外walk in嘅市民。我一聽,就諗:「大鑊,我嗰喺上環日開會都要開到六點九,七點半要去到跑馬地,求神拜彿塞車有個譜。」

卒只去到諮詢會嗰日,我要開嘅嗰個會喺六點十完,因知道要撲去跑馬地,所以就嗰日揸車。為避塞車,我就喺上環頭遙又尾擺咁上山,去到舊山頂道再上馬己仙峽道,之後沿司徒拔道、落活道落山。真係豈止九曲十三彎?

踏正七點半,我泊好車氣喘喘咁跑到門口,就見到社區會堂外有十幾個屬同一團體嘅人,喺示威區威。我霎眼淨係見到佢哋嘅橫幄寫住「區區起」,就急急腳咁去接待處登記。

原來,嗰晚每位出席者都有個寫咗編號嘅牌,咁我嗰個就係一百幾廿號。喺頸掛好個牌之後,我就入場搵位坐。再過咗陣,長策會、運輸及房屋局常任秘書長栢志高加主持人十幾人嘅panel就坐。

主持人話,諮詢會發言嘅規則就係佢會隨機抽出一名出席者嘅篇號,抽中就介紹自己及組織,跟住可以發言三分鐘。咁定咗規則,我就等睇吓抽唔抽到獅子山學會嘅我。

第一輪,抽出五個。第一位被揀中發言嘅,因為我認得坐佢隔離附近啲人揸住寫有「區區起」嘅紙牌,係一位之前有份出面企,名叫吳好嘅老婆婆。佢話:「我叫吳好,你好。我住鰂魚涌。」跟住就停咗。Dead air咗幾秒,坐佢隔離、揸住紙牌嘅一班三四十歲嘅人,就開始提佢要講啲乜,不過我諗可能因為婆婆弱聽,所以聽唔到,所以提佢嘅嗰啲人就越提越大聲,話:「妳話妳好慘呀!申請咗好多年都冇公屋呀!」

雖然已經大聲到全場都聽到,不過婆婆都係冇反應,主持見到咁嘅情況,就用咪問:「婆婆,妳係咪想話妳申請咗好多年都未有公屋呀?」婆婆卒只聽到,就話:「係係。」咁主持人就問婆婆仲有冇其他,婆婆話冇,三分鐘可發言時間都用咗冇一分鐘嘅情況下,下位發言。我同自己話,有驚喜,如果以呢個速度,一百幾廿人,可能連我都可以發言。

之後幾個發言嘅人,都係圍繞「劏房好慘呀!有木蝨呀!好耐都上唔到樓呀!政府快啲呀!」之類肯定需求,不過唔講供應,兼令我血壓飆升嘅意見。點知,原來經過每輪發言後,長策會主席張炳良局長係會逐個答。

張局長對住吳好婆婆,用我當年曳曳完見housemaster嘅聲線話:「婆婆,六十五歲以上人士,應該唔使好多年就可以上樓,你係咪因為想留喺原區?咁喺妳個區,真係少公...」就講到呢到,婆婆週圍嘅人即刻高舉紙牌,大聲喧嘩話:「公屋區區起!公屋區區起!」直至主持人勸大家冷靜,佢哋先冷靜落來。我坐喺佢哋附近諗:「係囉。區區起囉,俾幅地圖你,你圈地話我知灣仔喺邊起囉。司徒拔道或會展隔離好未?再唔係拆埋馬場囉,橫掂快活谷比沙田難度咁多,睇啲馬迷圍政總支持都好啊!」



最新公屋地

到第二輪仲谷氣,呢班「區區起」人士又有位伯伯被抽中發言,點知一抽到佢嘅編號時,佢隔離嗰位仁兄,即刻叫佢除牌,交俾佢後面一位同黨。我見到咁,就到主持嗌嗰個編號時,我企起話:「主持,點可以將牌遞來遞去㗎?佢哋咁疊馬,俾次機會我哋呢啲講吓呀?」

點知,主持冇出聲,收咗牌嘅仁兄就發言,講原區安置嘅重要性。細節已經唔記得,因為我已經嬲到火屎都飆。可能主持見到咁,就宣佈話如果再抽到同一組織,就要將嗰位發言人撥到最尾先可以發言。

當我差啲掹到爆之際,就卒只聽到啲興奮啲嘅嘢。跟住嗰位發言就係我全晚高潮,原來係一位「寬敞戶」。佢鬧話十幾年前俾房署「氹」咗住天水圍,依家因為有屋企人去世,所以唔夠人住個單位,被標籤做「寬敞戶」,被迫遷。我一聽,真係台灣人嗰隻窩心,好開心諗原來政府都仲記得我哋納稅人嘅血汗錢唔係陰撕紙,仲會迫人搬更有效使用公屋資源。

點知,高潮咗冇一陣,成盤冷水淋。張局長答寬敞戶話,佢哋要迫遷,係因為幾年前審計署話佢哋唔善用房屋資源。我一聽,又血壓飆升諗:「咩話?審計署話先做?有冇搞錯呀?真係當血汗錢做陰撕紙呀!房署老做應該自己做咗啦!頂!」

第二輪完咗,主持就好大聲話第三輪將會係最後一輪,點知佢又抽到區區起嘅朋友。唔知係咪我坐得前兼面色差,主持見到,就問佢可唔可以俾其他組織發言,點知嗰位仁兄話:「我代表自己!點解唔俾我發言?」係囉,我都問緊同一條問題。嗰位仁兄冇讓步,主持惟有俾佢講,我睇前前後後廿個發言,冇一個講啲納稅納到痛嘅人會講嘅說話。我見到最咁兼冇得發言,就喺panel前突然企起身,除掛頸塊牌,一抌抌落張凳到。公司鼠出來,仲要徙晒啲時間,真係俾人呃咁,只可怨有工番嘅人冇佢哋咁疊馬。

最後,嗰晚零晨兩點幾放工番屋企,路過樓下間小菜館,見到老闆企咗喺門口等客人走收檔。我就走埋去分享去諮詢會嘅經歷兼所見所聞,我講到最尾,想同佢翻譯話啲人有種好難頂嘅sense of entitlement之際,佢就一句:「老奉呀?好似欠撚咗佢咁!」我一聽,同佢話我想寫呢個經歷出來,問可唔可以引述佢。佢話可以,咁我就指住館內張手寫海報問:「係咪撚手小菜個撚?」




Wednesday, October 23, 2013

相信好多人已忍夠班左膠


( 信報財經新聞  |  B15  |   經管智慧  |   獅子山學會  |  By 孫柏文  |   2013-10-23 )

好多年前,比現在更無知嘅我,成日跟老豆企喺沙田馬場沙圈旁嘅馬主區傾計聯絡感情。我哋兩父子多年來喺沙圈旁乜都傾,由影響天下嘅大事到買邊隻一注獨贏都有。

咁有次,我就問: 「老豆,我想問吓當年韓戰,點解美國佬講到話係自由世界對邪惡嘅一場戰爭,香港都可以有愛國商人喺后海灣上落貨,運嘢番大陸抗美援朝嘅?」佢右手夾住份馬經同眼鏡,左隻手揭頁,兩目全神咁研究各馬匹嘅往績冇答我。

港英治港三條天條

咁我就繼續問: 「仲有,唔係韓戰之前幾年,美國人救番英國咩?仲要韓戰嗰幾年唔係邱吉爾話事咩?佢唔係話過美國同英國有咩Special Relationship?連我都知發生過嘅走私活動,冇理由當年殖民地政府唔知喎?佢哋唔係有咩MI6嘅咩?」

就係問到呢刻,我老豆開始有反應,眼神離開馬經,瞻向某隻毛出梅花點、步姿彈吓彈吓嘅出賽馬匹答:「占士邦冇你想像中咁好打。」我再想出聲之際,老豆就加多句:「唔好駁咀。」

之後多年,我都全盤接受老豆當年好明顯深思熟慮過嘅答案,即香港有人可成功不斷咁抗美援朝運物資番大陸,都係因大英帝國當年嗰刻廢廢哋。直至幾年前有一日。

嗰日,我如常坐喺位於上環獅子山學會總部嘅圖書館隔離。OK,即office 個書櫃旁,見當年我哋圖書館管長兼創辦人之一李兆富執緊個櫃時,擺咗棟書喺枱。

棟書最頂,就係Ferguson嗰本講大英帝國嘅Empire我一見呢本書就諗起當年我老豆傾計時佢俾我嘅答案。

我向李兆富重複番當年啲問題,結尾punchline 就引述我老豆嗰句。點知,李兆富就話: 「根本唔係政府唔知或者唔理,呢個係我哋嘅政策。」政策?咩政策?

原來,香港喺19 世紀被英帝強搶後,ok,根據港英國民教育,叫開埠,第一個總督砵甸乍為呢個位於中國南方嘅新殖民地定下三條天條。即係香港將會零關稅、准各國,包括敵國人民自由貿易買賣、並尊重華人本地習俗文化。李兆富推段當年愛國商人能運貨番大陸抗美援朝,都係因當年殖民政府堅守第二天條。

大家可能會問: 「講咁多歷史,為乜?」原因係今時今日好多被冠或自冠為守護香港核心價值嘅人,跟本只係個technician,唔明當年英帝班 engineers 設計出個系統背後嘅原因。Technician 同 engineer嘅分別,就係俾部iPhone 個 technician,佢會乜嘢功能都識用,仲要係因佢係個香港填鴨,所以仲要用得好熟。不過一但你問:「點解個掣擺咗喺呢個位?」佢就會擘大個口得個窿唔識答。

當年,最後一個港督彭定康喺佢最後一份施政報告內曾警告:「我感到憂慮的,不是香港的自主權會被北京剝奪,而是這項權利會一點一滴地斷送在香港某些人手裏。」講緊邊啲 人? 咪就係嗰啲要改iPhone隻掣擺位嘅一班 technician 囉!到最後,改吓郁吓搞到部電話唔好用、唔work 時,就同一班人問點解出事!

例如,限奶令。嗰啲想郁掣嘅左膠technician,會問咩砵甸乍天條呀?Who cares 咁鬧點解政府做得咁慢。不過睇事實,喺限奶令出台前,可以百分百依賴佢哋會貪錢嘅商人們已作出反應,入口香港嘅奶粉量喺數年升咗十倍。不但量升,仲要種類愈來愈多,起碼我依家知嗰啲可以笑張家輝細隻嘅韓星,當年飲咩奶粉大。呢個就係天條嘅威力。即係呀!你愈係因想保護香港去仇視強國人,你就愈要俾佢哋買奶粉攞番大陸呀!

外來競爭從何而來?

當年嘅殖民政府,一定會抵禦因幾隻牌子奶粉出現短缺嘅壓力,好似英佔亞丁嘅最後一個總督話齋,叫嗰啲要限奶出口嘅 technicians 「Fuck off」。同一道理,再講啲樓市特別印花稅。浸會大學經濟學系副教授巫伯雄作為一名典型左膠 technician,喺本會周年晚會到話支持買家印花稅,因為可以減少外來競爭。「外來競爭」係乜啫?咪就係強國人囉!

你可能會話,殖民政府都打炒家啦!Oh really?從帝國級管治角度,樓價飆升唔係一個問題,因為價格信號可以更有效分配房屋俾人住,即啱人住啱樓。驚嘅其實係如果之後大跌,啲人唔還按揭,銀行執笠,全城擠提。所以當年郁親都係貸款有關,例如首期嘅事。殖民政府錯嘅,就係見班填鴨已升上神枱,知話「你哋用咗三年時間儲一成首期呀?為保護銀行家,用多六年再儲啦!」sell 唔到,所以就sell 打擊炒家。

焦點唔打按揭而用特別印花稅打樓價時,就會有愈來愈多諗住住私樓可以就自己返工返學探父母搬屋嘅人,焗死淪為冇得搬嘅公屋戶咁,錯人住錯樓。民怨?你話呢?

不過,我哋香港唔係冇希望。我幾日前喺網上,見到位撐香港電視嘅仁兄,喺政總出面一條紫底白字寫住「獅子山下精神」嘅橫額下話:「相信好多人已忍夠班左膠!」講完台下拍掌歡呼。如果你同意仁兄嗰句,作為多年受盡左膠攻擊嘅獅子山學會研究總監,我只可以話,好開心,大家醒啦。同埋,welcome to the club!

獅子山學會研究總監


孫柏文

Wednesday, May 02, 2012

Advances in textile science.

I have watched this video repeatedly, so as to fully appreciate the advances in textile material technology.

The structural integrity of the garment was never in doubt.

Tuesday, May 01, 2012

昂山素姬「嚇怕中國」概念股

2012年04月26日 



大家呢排如果有睇《蘋果日報》「兩岸國際」版,應該都知道緬甸近期有好多消息。大家睇完可能覺得冇乜嘢,睇完得個知字,最多可能祝緬甸人民成功結束軍人執政。不過對於中國中央來講,緬甸呢排嘅局勢發展,一定令我哋嘅領導人驚到瞓唔着。 啲消息係乜?就係由舊年起,緬甸軍政府逐步開放嗰度嘅極權統治。先有舊年尾開放互聯網,到今年 4月軍政府宣佈,喺 45個議會議席補選,反政府嘅全國民主聯盟贏咗 40個各級議會議席,長期被軟禁嘅反對派領袖昂山素姬都當國會議員。最重要係軍政府承認選舉結果,畀佢哋做議員。

中共怕大家唔依賴佢

大家可能會問:「咁我哋偉大嘅中國共產黨領導驚啲咩呢?係咪好似舊年中東吹來嘅茉莉花香咁,驚人民被呢次改變感染,造反呢?」你咁估,就錯了。

因為緬甸本身政府權力分佈係點,冇人知。國會有冇權力先?就算有,一招功能組別、分組點票都做瓜你,可能今次只係一場 Show。 中國最嚇怕嘅地方,就係世界各國對呢場 Show嘅反應。基本上係忽然春天咁,有英國首相話想去行吓,又有歐盟解除經濟封鎖。簡單咁講,即係唔使依賴中國。

中國共產黨最驚亂,普通人日常生活受到擾亂或終止就最終會爆騷亂同示威。而冇嘢快得過冇能源令社會秩序出事,淨係人返唔到工,食物供應鏈撕裂都夠大鑊。咁家中國每日用 900萬桶石油,超過一半要進口。進口油就來自中東,只要一招斷你石油入口, CCP Bye Bye。 海路由中東到中國,就要經馬六甲海峽,而馬六甲海峽話事人就係新加坡。嗰度話事嘅李氏家族,一吓嗌停,就冇船可以經過。大家要記得,李顯龍做新加坡總理前最後外訪地方喺邊?台灣。



就係咁,中央就好想緬甸聽聽話話,其中係如果可以,就起條油管由緬甸印度洋沿岸運入中國,毋須經馬六甲海峽。

孫柏文唔知究竟新加坡有冇喺背後拉攏,令緬甸軍政府搞開放,不過如果緬甸唔使靠中國,就可以唔起呢條石油繞道。如果長遠要諗方法,入口石油擺脫新加坡對中國政權嘅威脅,就要靠陸路,最好當然係能源可以唔使進口,自給自足。

珠管擴產能速度慢

所以我哋就要返去幾個禮拜前 3月 7日 22日,我講過嘅頁岩天然氣 Shale Gas。中國眼見緬甸局勢,一定因危迫感、政權生死存亡,所以盡快大力發展呢隻能源。咁有乜概念股?天然氣運輸難,最好靠管道,不過接駁管道後冇得做二手買賣,所以發改委可以定啲超低冇得賺嘅價。

不過冇得賺,就冇人投資,所以點都要喺鋪管網時做 Show,令人有錯覺有得賺,仲要暴利。所以最純正炒昂山素姬強勢回歸,就係鋪管時受惠公司。最好就係製造管道嗰啲,亦即係我叫過大家一注獨贏買嘅珠江鋼管( 1938),我覺得呢間公司唯一瑕疵,就係可生產量擴大速度太慢。係,公司已經話會將可生產量每年幾十 percent咁升,我都係嫌慢。

最後,昂山素姬究竟係咪對中共政權咁大威脅?一,佢可能學劉江華,轉投中共懷抱。二,幾日前昂山素姬啲人,喺宣誓就職時,因唔 likey誓詞用詞,話想玩杯葛。

《華爾街日報》炮轟佢哋唔認真、做 Show、 Grandstanding,即係佢可能唔係李柱銘、司徒華嗰隻,而係社民連、人民力量。大家諗諗。


Wednesday, April 25, 2012

法選舉投資策略

上周末,我見到陀地同老外傳媒,紛紛分析法國選舉可能為資產市場帶來嘅衝擊,噚日同《利字當頭》嘅利世民傾起,佢話呢個法國總統挑戰者,有好多「根正苗紅」嘅政策,落實後果不但嚴重,仲要好快就見「成效」。


對世民來講,挑戰者同現總統最令人擔憂嘅政策分別,係挑戰者唔會減財赤。外國嗰啲財演一樣係好多分析,話挑戰者當選嘅話,法國同德國喺財政救市嘅決心會被摧毀,好難再會有個肯拍心口幫歐豬或啲救市基金做借錢擔保人嘅法國。

講完其他人,孫柏文點睇?邊個贏都係 plus ça change, plus c'est la même chose(啲嘢越變,啲嘢越唔變)啦。要講政策首先先講政府開支。兩個候選人講就唔同,到做嘅時候,兩個都會年頭拋個赤字唔超標嘅預算,到年尾兩個都會 je suis désolé(對唔住,我錯),道歉話赤字超標。唯一係「右」嗰個話減開支遜預期,「左」嗰個話加稅後稅收增幅唔達標,所以兩條友都係冇分別。


même même

再講老外擔心嘅救市措施,呢個係呃人嘅,如果救市方案同基金咁勁,舊年暑假就唔使嚇到全球腳軟啦。最後成功拖遲爆煲,咪又係靠歐央行印鈔票,所以法國新總統係邊個有乜分別?歐洲咪一樣係歐央行,即高盛啲舊生玩晒。大家唔好俾選舉呢啲煙幕干擾投資決定,記得買股只係等印鈔,印完就要快手走,走晒等佢係咁跌,跌到見危又會再印鈔。

青姐係我心中女神
最後,見上個星期四青姐胡孟青講大家應該睇啲乜,更勸盛女如何提高戰鬥力。唔知其他男人喜好,我只係個有集中力貧乏症嘅人,所以想搵個可以 Occupy我個腦嘅女人,所以先話搵個睇 Economist嘅女仔,等佢有知識同有態度。咁邊個係人辦?咪就係青姐囉!所以我成日話佢係我心中女神,你明我唔係 BS緊啦!

 

女神o奪咀呀!

為曾特首土地供應平反!

2012年04月19日 前日孫柏文睇電視,見到恒隆地產( 101)主席陳啟宗評特首曾蔭權下嘅土地政策。陳啟宗話:「 06年開始, 06、 07、 08、 09、 10,五、六年冇賣過地,乜原因?只有兩個。一係呢,佢錯囉,蠢呀?一係呢就係,有其他原因。」講完,全場喺度笑。

睇台下反應,應該係信陳啟宗第二個答案。咁乜係「其他原因」?我估個解讀又係嗰啲「政策傾斜」、「利益輸送」、「明益地產商」等填鴨式教育 model answer。

其實成功做咗政治家 咁陳啟宗講土地政策,係因為不能否認嘅事實,係呢幾年香港樓價升咗好多。我今日為曾特首辯護,首先想講係連我都承政府係有 under supply。不過曾特首咁做,真係因為佢貪小便宜後想「益啲人」?令佢作出對香港由政府財政、民意民怨、銀行體制穩健等咁多緊要範疇影響深遠嘅決定?大佬,唔好玩啦。

大家可唔可以接受,其實曾特首呢鋪可能真係成功做咗政治家?要諗點解佢做呢個決定,首先,大家要明白佢自己嘅經驗。 97年前土地供應,由 84年中英聯合聲明之後,就係每年 50公頃。點解定 50公頃?肯定當時曾特首冇被 brief,佢嗰陣仲係喺沙田處理地區事務。

「 50公頃」啱唔啱?從一個政治家來講當然唔啱,唔係因為得 50公頃時係咪唔夠或太少,而係任何可以製造一場可以拖垮銀行體制嘅地產泡沫,背後嘅土地供應量就係一定錯、錯、錯! 如果唔好造泡沫係第一個教訓,第二個教訓就係喺 97年之後亞洲金融風暴後學到。個教訓就係當外圍出現因泡沫爆破衍生嘅金融危機時,要非常小心咁對付香港樓價。唔可以 7月 2日見泰銖脫鈎貶值, 10月仲推「八萬五」,令人去燒炭,銀行要倒閉。

相信大家對以上兩個教訓都冇異議,就算陳啟宗係特首,都唔會話係錯。不過,曾特首真係錯咗,依家樓價係升咗好多,不過點解會咁?

首先, 06、 07年初,香港樓市,特別係俾人住嘅樓,郁都唔郁。悶蛋程度係連最鍾意乜都抽水嘅「飯民」、廢青們,都冇話買唔到樓。屯門、深井、深水埗單位,百萬有找,仲要二按保險下,半成首期上車。冇人批評政府土地供應。

07年尾,有批人喺港股直通車執咗筆後轉買樓,樓市升咗一升。相信到 08年初,曾特首已有諗出手,唔想見樓價出泡沫。不過 08年夏季後發生嘅事,一定令曾特首覺又來 97年嗰隻,所以佢學咗教訓,一、冇推八萬五,二、冇話到聖誕冇事。

估唔到全球央行印鈔

97年,印尼、泰國、馬來西亞、南韓呢啲加埋人口媲美美國或歐洲嘅國家出事,啲白人話事嘅 IMF等組織點做?咪就係要啲銀行搞掂啲呆壞賬,計數後資不抵債就執笠,政府財政要收支平衡等會短期對幾億人極苦,換長遠穩健嘅對策。仲要係到十年後嘅 07年,印泰馬韓經濟好,喺 90年代唔肯食苦藥嘅日本仲係一鑊粥,相信就算係陳啟宗做特首,都會覺得苦藥係對付泡沫爆破嘅 model answer,一旦歐洲、美國發生,都會咁做捱幾年甘,跟住回正軌。

曾特首錯嘅地方,就係居然信白人喺 97年迫有色人種飲嘅苦藥,到 08年時,係會畀自己飲。點知對策居然會係史無前例全球央行齊印鈔,連改革道路堅定嘅我國中央,都居然合埋眼斷 10萬億元咁借出,搞到香港樓需求大增!如果陳啟宗叻過曾特首,會預見印鈔,恒隆 08年中就會瘋狂入市買大陸啲 project啦。

炳曾特首唔係唔得,不過 Fair啲呀大佬!吓吓都話因「有其他原因」,就太過美式陰謀論囉。

Thursday, April 19, 2012

金手指:揀女揀股有異同

2012年04月17日

「嘩!成隻狗公咁!」以上一句說話,好多女人喺我背後講過。

今日要喺投資版到同大家分享呢句,係因孫柏文對上幾日收到好多人轉寄原本喺背後講嘅網上流言,關於上周我喺 TVB節目《盛女愛作戰》中嗰幾十秒嘅說話。

段片好簡單,就係我被問到第一次約女仔會去邊,同有冇其他女仔有嘅特質我覺得好。咁我就話第一次,可以約食晏去老麥,同埋因以前遇過令我覺得好正嘅女仔,之後發現都有睇 Economist同網上短片 TED.com,所以我都講話自己覺得有呢啲閱讀習慣嘅女仔好正,就係咁簡單。

食晏去老麥變潮語

嘩!點知「食晏去老麥」變咗潮語同 Inside joke,原本發霉嘅 TED app喺蘋果 App store銷售全港第四,「孫柏文」更成為 Google搜尋第一最多人查嘅詞。

當我仲諗住冇可能 Top到舊年貓咗上直播電視,原來可以更 Notorious。

不過就係咁,多年來對住唔同嘅女仔,我都會走去傾計,當中有索有豬扒,不過點解好似狗公般,乜女都上前傾,就係因為 Turn me on嘅嘢,個女仔要開口我先知。

揀股唔係一樣咩?你間嘢係咁吹概念,同女仔執正嗰樣有乜分別。

係,我認會吸引我上港交所( 388)網站睇你份年報,不過,睇完盤數之後發覺你唔掂,跟住就會行開唔買唔 Recommend。

分別只係多睇唔同公司嘅年報,唔會俾人嗌狗公,同埋我睇年報時間公司管理層唔會自我陶醉話:「孫柏文追緊我!」