Friday, May 30, 2008

點解我最後冇移民

我老竇係個典型經過殖民政府統治嘅人。一方面深深知道,自己係個因為英國殖民制度,所以有得上位嘅人,不過因為種族又受到軟性欺壓。

佢靠做普通法制下嘅律師養妻活兒,令佢對任何執法機關,例如警察、海關、證監、廉政公署等嘅執法人員,毫無白色恐懼。

不過我老竇話廿幾年前,律師公會仲係鬼佬揸fit 時,公會開年會,廖瑤珠企起身,成為香港律師公會歷史以嚟,第一個用廣東話喺年會發言嘅人。講冇兩句,啲鬼佬唔畀佢用廣東話,廖瑤珠反問:「中國人地方,點解唔可以用中文?」我老竇諗起仲拍爛手掌,對廖瑤珠非常敬佩。

91年加拿大置業

我老竇作為一個70年代開始工作,80、90年代有份延續經濟神話嘅香港人。有咁嘅背景,孫柏文話佢冇諗過、冇做過啲嘢去搞移民、攞多一本護照,你都唔會信我。

91年,我老竇已經喺加拿大溫哥華置業。因為「時辰就到」,我父母知道要決定究竟去唔去加拿大。所以同年暑假,老竇同我就去咗次做觀察。

我老竇喺溫哥華有個當時已經移咗民廿幾年嘅中學同學,佢帶我哋行溫哥華,話夏天「最好住」,當時我老竇只係點頭回應。之後回港,老竇一句:「咁已經係最好住?真係唔可以移民加拿大。」

大家一定以為就係咁,所以我冇移民。講香港人移民嘅故事,邊有可能咁簡單?

其中一個唔去加拿大嘅原因,就係因為我老竇想住喺個華人社會裏面。所以佢就開始諗,移民去新加坡。最後喺92年,佢決定參與一個計劃,就係新加坡政府畀我哋一家各人,十年時間去報到。報到之後,先攞居留權,後入籍。

拒往新加坡報到

去到千禧年,一家五口,都冇人選擇去報到。

不過有個禮拜日,老竇同我入沙田馬場跑馬,我哋企喺沙圈旁嘅馬主看台,老竇突然問我:「你大個喇,有冇諗過移民新加坡,去報到?」我話一定唔會,仲反問佢點解自己唔去。

佢話:「我老喇,你要諗吓未來。董建華咁搞法……」佢就喺呢刻使出《迫男兒漢做嘢招式譜》上排第二嘅cheap招,佢話:「係咪驚要服兵役呢? Chicken?」

有其父必有其子,所以我就用排第一cheap招答:「唔驚服兵役。不過一旦有事,你想你個仔副棺材上,冚嘅係新加坡國旗咩?」

就係咁,我就得番本特區護照。

Thursday, May 29, 2008

「加油」如何繙譯做英文

當年,日本同南韓舉辦世界盃。孫柏文因為當時非常得閒,所以就去咗南韓睇波,睇咗中國隊兩場小組賽事。未去南韓之前,我就去佐丹奴,買咗一件支持國家隊嘅T恤。

因為當年花旗國讀大學時識咗好多韓仔(無錯,佢哋真係好鍾意打交),所以去到南韓,就有位大學同學同我入場,一齊睇中國對巴西。入場前,我着咗嗰件紅黃色佐丹奴T恤。佢見到就問:「Hey,what does your shirt say?」問我究竟印喺T恤上嗰四隻中文字點解。嗰四隻中文字就係「中國加油」。

逆境用「come on」


記得當年讀大學,我間大學嘅校色就係藍色。而我哋校隊同其他學校比賽時,我哋都會大嗌「Go Blue」。所以我就同個韓仔話,嗰隻四字就係「Go China」。

究竟繙譯得啱唔啱,我就唔知。兩個英語都唔係母語嘅人,一講到要繙譯啲不能直譯嘅嘢,都係搵啲reference point好啲。

到今時今日,四川大地震後。全國好多地方都有人為鼓勵大家,自發咁話「中國加油」。因為啲鬼佬最鍾意呢啲自發現象,所以就有好多英文傳媒,爭相報道。不過去到「中國加油」呢四個字,繙譯上,我就發現好大分別。

首先,就有大陸學者形容為「大英帝國主義最後一個碉堡」嘅《經濟學人》新聞報,將「中國加油」譯成「come on China」。我喺中學讀書時,就有好多英國仔同學,用「come on」嚟打氣,往往會用喺啲面對逆境、落後嘅球隊上。

究竟「come on」係咪只適用於四川地震,呢種逆境嘅情況我就唔知,因為同啲英國仔睇波,英格蘭冇次唔係落後。

「press on」變施壓


再講,美帝旗艦嘅《華爾街日報》,就將「中國加油」繙譯成「press on China」。《華爾街日報》叫一個人或者一個國家去「press」啲嘢,絕對唔係第一次。李柱銘都試過,不過嗰次就被特區土共繙譯成「施壓」。

其實,如果今次「press on China」等於「中國加油」。上次李柱銘只係希望布殊總統,向國家領導人講:「喺人權議題上,中國政府加油!」

講真,我哋已經係全球一體化嘅社會。大家都生活、工作喺石油推動嘅hydrocarbon economy裏面。而油價徘徊喺130美元一桶嘅水平,可能今時今日用互聯網短訊程式,例如MSN嘅小朋友繙譯得最傳神。叫人哋「加油」,可能真係一句「add oil」就夠。

Tuesday, May 27, 2008

要搞3G?188個貨櫃救中移

噚日,特區股市嘅主題,肯定係中央重組中國電訊業。基本上,政策令所有電訊公司,做晒所有業務。間間都做流動電話、固網等嘅生意,即係全面重叠。

有咁嘅政策,肯定唔係曾特首、鄭家富或九巴前揸fit人陳祖澤諗出嚟。因為佢哋三個都親身感受過,全面計劃經濟帶嚟嘅喜悅,所以深信政府設立多個壟斷性機構瓜分市場。

曾特首、鄭家富就最鍾意「得番鐵路」政策,陳祖澤就希望政府可以更有效瓜分市場,等資源毋須重叠。如果佢哋三個人真正愛國,就應該放下一國兩制、河水不犯井水嘅包袱,大聲勸喻溫總理,即刻喝停今次會引嚟資源重叠嘅電訊業重組。

如果成功,就繼續要向中國石油業出力。因為中石油(857)做提煉、零售,中石化(386)擴大開採業務,中海油(883)走番上岸,三個成為全面競爭對手,業務重叠係浪費!

業務重叠陡浪費

如果溫總覺得要引入競爭,先可以提高效率,就係承認冇管治能力。佢老人家應該退位,畀曾特首、鄭家富或陳祖澤上位,因為佢哋掂!

不過噚日知道重組安排後,中移動(941)跌咗超過10蚊。睇牌面,中移一吞條鐵通,即刻腸穿肚爛。

好多人一路以嚟買中移,都係因為佢有太陽由東邊升起,西邊下山般穩定嘅上客量同盈利增長。大家驚嘅就係究竟電訊業重組後,中移GSM會否被割肉,同埋如果要走出3G呢個黑洞,究竟要燒多少錢。

硬食3G買唔過

我唔覺得重組會動搖中移流動電話龍頭位置,睇到3G有冇得搞,先至係之後幾年嘅重點。

我以前曾經推介過「一注獨贏買和黃(013)」,因為當時和黃3G推出 X-Series終極收費計劃,已經做晒電訊商可以做嘅嘢,去推3G。不過推咗X-Series七個月後,我見到和黃都上唔到客,就惟有撤銷「一注獨贏買和黃」嘅建議。因為3G唔得,唔係電訊商嘅問題,係手機嘅問題。噚日中移動跌咁多,就因為可能要硬食3G。

不過好彩救星到。上個禮拜,花旗國蘋果電腦,已經收到188個bill of lading寫咗electric computer嘅貨櫃,應該就係3G iPhone。我自己用過iPhone上網,只可以話,如果iPhone都唔可以令人大規模用手機上網,咁就冇手機得。可能就係蘋果電腦救中移。

Monday, May 26, 2008

助理纏傳媒 曾特首好嘢!

記得911之後不久,花旗國國會通過佢哋嘅「23條」Patriots Act。當時,有好多從事電腦保安、通訊加密嘅研究員,被花旗國政府瘋狂調查。如果唔肯為政府效力,堅持獨立運作,花旗國政府就會用盡辦法終止研究員嘅工作。

唔肯就範嘅研究員,惟有放棄美籍。不過喺花旗國政府眼中,放棄國籍,精神上等同叛國,有十年唔畀返花旗國。

今日同大家分享,花旗國政府如何處置放棄美籍嘅人,係因為上個禮拜五,我做咗次客席講師,內容係講公關危機管理。當日我話,危機會否變成公關災難,視乎製造危機嘅人,大家對佢嘅預期係點。

控制社會預期


早前艷照事件,雖然啲女角喺照片中動作差唔多,但最後社會對佢哋嘅反應就非常唔同。有個女角,大家見到佢啲艷照時只會話:「好激!不過睇佢以前嗰種敢作敢為嘅個性,都算係預咗。」另一個女角,大家就會話:「乜佢唔係小朋友嘅偶像咩?上次影到個膊頭,已經出疹有allergic reaction,今次咪大鑊!」

所以公關危機管理,除咗發生壞事後嘅反應重要,仲要事前不斷控制社會嘅預期,即係expectations management。

講咁耐,入正題。上個禮拜,政府新搵番嚟嘅局長助理中,有民建聯嘅副主席蘇錦樑,被揭擁有加拿大國籍。我同大家一樣,一向對民建聯嘅預期,係佢哋愛港愛國。我覺得,如果你話有外國國籍,民建聯嘅人就連搭巴士都唔想同你同一部。

睇冰球學政治

現在搞到,如果有小朋友問我:「點樣先至學到民建聯愛港愛國嘅嗰種愛?」我會答:「好似隔籬屋嘅叔叔一樣,放工搵完二奶姐姐,買紮花番屋企,跟住話好愛老婆囉!」

不過我都好佩服蘇錦樑。好多時,香港人移民外國唔會入鄉隨俗。估唔到佢居然學會加拿大人最喜歡嘅冰上曲棍球。

喺冰球裏面,除咗睇入球刺激,仲有睇一樣叫做 body check嘅嘢。即係一個球員以高速撞到第二隊嘅球員,令對方頭破血流。

作為傳媒,就算冇能力將球射入政府隊嘅龍門,不過都body check咗「冰球蘇」。因為政治助理嘅出現,傳媒已經唔挑戰政府政策。助理纏傳媒,冇人鬧政策,功效已展現,曾特首好嘢!

Friday, May 23, 2008

計劃經濟下攞着數

今日,孫柏文想為呢幾日嚟睇過嘅兩篇文章作回應。

第一篇,係老牌時事評論員王岸然喺5月21日《信報》寫嘅文章。佢老人家,高度肯定咗例如曾淵滄同我等信奉自由經濟嘅人,成功解釋「計劃營商法」(又稱「競爭法」)嘅害處。肯定我哋成功迫使呢個死要面、唔妥協嘅政府,將呢條「經濟二十三條」法例包括嘅範圍縮減。

王岸然見到我哋努力向市民、小企業解釋後,都忍唔住話:「難怪法例經諮詢後大為縮水,由七宗罪減為四宗。」佢特別表揚,我哋自由主義者對政府立法,往往會衍生出嚟unintended consequence(非原先設想嘅後果)嘅憂慮。所以佢特別喺文章提到:「法例原意固然是保護小企業的競爭空間。」

所以今日,我想同反對呢條法例嘅戰友話,我哋用心解釋,不但會令政府取消立惡法。我哋嘅努力,仲會被人肯定。在此向王岸然發誓,七項減到四項,只等於仲有四項要更出力解釋,我哋會不負所託繼續努力!

第二篇,就係尋日喺《金手指》樓上、《兩岸三地》專欄Uncle Ray嘅文章。佢喺篇文分享咗佢對位於馬料水嘅科學園,有乜嘢感想。佢見到科學園裏「三、四幢辦公大樓,全幢丟空」,有人嘅大樓就「十室五空」,最後仲話科學園係「一片寧靜的樂土,而不是繁囂的科技中心。」

雖然,Uncle Ray知道:「數碼港及科學園都是董建華年代留下來的產物,右派經濟學家對這類的政府行為,深感厭惡。」不過都繼續話:「作為小納稅人,我倒認為科學園是一個不錯的項目,在那裏,找不到自由行的影子,沒有最『Hip』的LV、Prada等名牌的店舖,遠離都市繁囂,只有吐露港的海風,明媚的陽光,在香港,這都是已經很難得的一點點空間。」

政府強迫市民補貼

我想作嘅回應就係,喺計劃經濟之下嘅國營雜貨舖,因為價格有政府補貼,所以好平,不過搞到供不應求,排隊排第一個就好着數,但最尾嘅人往往就買唔到。變相政府強迫其他市民補貼排第一嘅人。

我作為一個以前好喜歡去數碼港流連嘅人。喺香港,如果你要感受到計劃經濟之下「排第一」嘅滋味。Uncle Ray就話去科學園,我就話去數碼港。你會感覺到社會資源絕對錯配,不過對個人就非常着數。

A video that launches a thousand lawsuits

Ok. This footage created quite a stir over at 8 Chun Ying Street.

Anyhow, this is the only channel I can find this video.

Highly politically incorrect for me, I know.

Mr Li Ka Shing of Cheung Kong and Hutchison Whampoa...

Thursday, May 22, 2008

做局長老婆要辭職?

前日,政府宣佈新一批副局長人選名單。噚日孫柏文講過,政府只係平均用咗150字去介紹啲副局長。所以我哋作為傳媒,就可以為啲副局長喺大家心目中塑造「第一個印象」first impression。

噚日,我講過環境局嘅潘潔女士。話佢嘅環保方針,應該用「西瓜膠」嚟形容。出面綠色,裏面紅色嘅硬膠。未來,本欄將會以「西瓜潔」嚟稱呼潘潔副局長。

我亦講過民政事務局嘅34歲許曉暉。話政府用150隻字講佢過去嘅功績,居然要「填窿」,連佢喺邊度讀過,啲有錢就可以讀嘅幾日課程,都要用埋。許曉暉個樣,確實同我一樣,比真實年齡成熟得多,好似經歷過好多事。最弊「經歷過好多事」呢樣嘢,只係個樣,唔係功績。未來,本欄會以「熟女暉」稱許曉暉副局長。

今日,我要為運輸及房屋局副局長邱誠武辯護。佢係《經濟日報》嘅執行總編輯,仲係86年「最佳記者」(see pic and caption),佢老婆就係《明報》投資理財版負責人,金童玉女。不過,因為邱誠武將會管啲有上市嘅運輸企業,而佢老婆因工作關係,又同嗰啲企業嘅管理層「好熟」,所以我噚日聽到有人話,咁樣有利益衝突。就係因為有咁嘅指控,我就要為邱副局長辯護。

各人都有職業操守

首先,只不過因為兩個人有老公、老婆嘅關係,唔等於啲人即刻忘記自己嘅專業操守。香港有咁多夫婦,同時都有自己嘅career,一旦老公任局長,老婆就要辭職,咁樣對任何局長嘅配偶都唔公平。

如果一定要配偶離職,一個人先至可以做局長,願意接受咁嘅安排嘅人,你覺得佢嘅品格配得起做局長咩?不如咁樣諗,經過呢篇文之後,邱誠武同佢老婆知道傳媒會睇實。多都唔講,一旦出事,《明報》將會誠信破產,所以就算我唔睇實,《明報》啲股東都會睇實。

最後,花旗國有對夫婦,老公叫做James Carville,老婆叫Mary Matalin。兩個都係選舉政治顧問,不過一個共和黨,一個民主黨。1992年,佢哋不但為自己嘅黨出盡全力去擊敗對手,仲要喺總統選舉戰面對面對壘。兩個花旗國總統可以信夫婦能夠尊重職業操守,唔通你唔得?

Says who you ask? As anointed by god himself of course.

Wednesday, May 21, 2008

副局長第一個印象

克林頓係美國歷史中,兩個被彈劾總統其中一個。

被彈劾原因係想隱瞞同萊溫斯基做過嘅嘢。

被揭發係因為一個原先為咗「白水門」事件,被邀請查案嘅檢察官,因為「白水門」冇料到,所以將調查範圍擴大。

點解冇料到都要請檢察官?因為第一日,《紐約時報》記者問白宮關於「白水門」嘅嘢。白宮冇覆,記者自由發揮。第二日出街,即刻群情洶湧。

點知,原來寫錯晒,個記者之後都認錯。不過因為公眾對「白水門」第一個印象建基於第一篇文,所以結論係,白宮最初放唔夠料,總統最終被彈劾。

孫柏文同大家講「第一個印象」嘅重要性,係因為特區政府宣佈第一批副局長名單,但每個用咗平均150字介紹。政府放唔夠料,所以經過摷料,今日我嚟提供大家心裏對啲副局長嘅「第一個印象」。

先講環境局潘潔女士。佢係「西瓜膠」。硬膠大家都明,「西瓜」代表出面綠色,裏面紅色。我預計就算膠袋稅被證明破壞環境,佢一定照推。

再講民政事務局許曉暉。150隻字講埋佢喺邊度讀過啲有錢就可以讀嘅課程。好彩唔係160隻字,否則分分鐘連佢喺駕駛學院學過車都知。明續。

Tuesday, May 20, 2008

水牛 雌獅 鱷魚 Battle at Kruger - A victorious story of the exploited proletariat

近日,孫柏文睇到段Youtube短片,今日想同大家分享我嘅睇法。其實,呢段片已經放咗上Youtube有成年,要到對上幾日先至知佢嘅存在,我自認都幾out。不過,我始終覺得好嘅嘢一定要分享,呢段短片一年累積超過3200萬點擊率,所以算係網上其中一段「必睇」短片。

今日分享我嘅睇法前,我好希望大家可以睇咗段短片先。你上Youtube,搜尋「Battle at Kruger」,嗰段有3200萬點擊率嘅短片就係今日嘅討論題目。最後忠告,真係要睇咗先至繼續讀呢篇文。



大家睇咗段片,應該同意,就算特登度劇本,搵負責《侏羅紀公園》特技嘅人嚟,當animation咁畫,都冇呢段片咁有戲劇性。

段片就係非洲草原上嘅一個故事。拍攝者就係一個來自花旗國德州嘅遊客。段片開始時,先有幾隻水牛喺水邊嘅草原上做自己嘅嘢,慢慢行路。跟住個鏡頭就影住六隻伏低咗嘅雌獅。

突然間,啲水牛見到啲獅子,開始逃跑,其中一隻係隻小牛仔。獅子見水牛掉頭走,亦開始追捕。其中有一隻跑得比較快嘅獅子,就追到隻全力奔跑嘅小牛仔,亦撲埋去。

點知因為喺水邊,隻獅子又過份進取,所以連牛帶獅,一齊跌落水。

幾秒之後,其他獅子趕到。平時啲獅子必定會用最快時間,殺死獵物。不過今次,啲獅子只係用爪,按實隻小牛仔,跟住一齊望住水裏面。突然,水裏面撲出一隻鱷魚,想搶走隻小牛仔。啲獅子知道鱷魚喺水中有利,即刻齊心將牛仔拉上陸地,鱷魚亦游開。

投機者要識時務

點知,到啲獅子可以埋手殺獵物之際,突然出現過百隻水牛,重重圍住嗰幾隻獅子。啲大水牛亦開始攻擊啲獅子,隻小牛仔見有機會,即刻衝返牛群。最後啲獅子亦散去。

我唔知大家有乜教訓。

不過我覺得啲獅子就係資本家,啲水牛就係工人。就算係弱肉強食嘅世界,工人只要團結,就會成功擊退想剝削、獵殺佢哋嘅資本家。

呢段片亦教訓資本家做事,千祈唔好太過進取,一旦跌落水,就會有大鱷投機者想搶走你嘅食物。

最後,如果你係投機者,就要識時務,獵物已被扯上,就不要高追。

真是一段非常有深度嘅大自然短片。

Monday, May 19, 2008

挺挺曾 走多步

過去呢個禮拜,孫柏文只能感受到揮之不去嘅沮喪。四川地震已經過咗一個禮拜,救災工作第一階段,亦因時間被迫中止。中央政府因而面對,對佢哋救災取捨決定嘅第一個挑戰。

記得當年911發生後,所有花旗國電視新聞台,每日24小時不斷從雙子塔附近報道最新消息。由發生當天,救援員盡忠職守嘅反應,到之後陸陸續續「奇迹地」搵到生還者,同見到花旗國人民慷慨、團結嘅反應,都係災難黑暗中嘅一道曙光。

行動中止希望終結

不過,911發生之後大約一個禮拜,新聞台突然報告,話在場嘅警員同消防員發生暴力衝突。原來,當時政府決定,埋喺瓦礫下生還者嘅生存機會近乎零,為免疫症爆發,命令警員清場。眾多紀律部隊當中,最多同袍困喺雙子塔裏面,就係消防員。當拯救行動仲喺進行當中,都仲有一線生機。當拯救行動中止時,亦代表希望嘅盡頭。

今次四川地震,已到同一階段。就算理性覺得要中止,作為父母、子女、朋友,又有誰能夠放棄?

講地震講到非常沮喪,不如講番特區。特區政府最近放寬咗外國留學生嘅留港限制,方便佢哋搵工。孫柏文非常支持政府咁做。不過,孫柏文始終覺得,政府唔應該局限本地大學嘅留學生,應該連外國大學生都可用同樣方式來港搵工。因為本地大學始終都係政府搞晒,唔係話唔好,但係教出嚟嘅大學生就算唔係一樣,都好有可能係差唔多。

標籤係特區教育DNA


用牛扒嚟做比喻,特區學生就好似entrecote。Entrecote雖然係高級,但係始終都係同一個cut,唔夠多元化。所以我都係覺得,應該畀外國例如100間「最好」嘅大學學生嚟特區搵工、創業。到時候有entrecote,又會有filet mignon。

大家會問:「『100間最好』嘅外國大學?點揀先?咁咪會有好主觀、唔公平嘅標籤?」自從97年一役,特區政府主觀咁將中學標籤為「可以用英文教」同「唔可以用英文教」,標籤呢樣嘢已經係特區教育嘅DNA,想搣都搣唔甩。

其實,多個始終好過少個,畀佢哋嚟又有乜所謂。所以挺曾走多步,等外國大學嘅filet mignon都可以來港「做好呢份工」!他朝做埋香港人!

兩段讀白

噚日,孫柏文同兩個朋友傾偈,第一個就係《政治不正確》專欄作家黃牛。佢話:「有時一啲所謂嘅『環保』新聞,內容真係幾難頂。好似星期日有篇報道,大字標題《空氣污染殺低下階層》,睇落至知原來得啖笑。...

呢篇報道引述香港大學一個研究,話空氣污染物嘅濃度越高,公屋居民同藍領階層啲額外死亡風險就越大,但係住私人樓嘅同白領一族就冇乜事,所以政府應該針對性咁制訂一套政策去幫窮人。唔通『空氣污染』真係識得跟紅頂日,專蝦窮人?...

其實,睇來睇去,個研究基本上只係講出兩個係人都知啲事實:收入較低人士,接受嘅醫療服務冇有錢人咁好,死亡風險自然高啲;另外,佢哋生前常到嘅地方,通常亦無有錢人去啲咁乾淨。當然,如果咁樣present畀老總,條題同版位唔會好似e家咁搶啦。」

害苦內地新移民


跟住就有《蘋果批》嘅高明輝。佢話:「噚日,真名係龔耀輝嘅方卓如,喺《信報》發表文章,或明或暗咁表態支持最低工資。講過好多次,最低工資危害新移民、婦女同年輕人,特別係喺美國二十世紀初,為咗保住白人男性嘅工作,要實施最低工資趕絕包括華人在內嘅外人。如果套用喺香港,立法最低工資之後,最高危就係一班內地新移民,亦係最需要幫助嘅一群人。...

同災民比非恰當

最近特區一班「高等華人」、「社會精英」,都趕潮流咁支持當年用嚟對付新移民嘅最低工資。佢哋支持立法嘅用心係為咗安撫自己搵得太多,定係班「社會精英」從心入面睇唔起佢哋可以向上爬,所以要政府幫,高明輝唔知,亦都唔想估。...

之不過,龔耀輝篇文,否定所有討論,只係用地震做例,話所有討論等同「講呀講,被壓在瓦礫的災民,都已經在一片專家討論研究聲中一命嗚呼。」先唔理拎香港低收入人士同地震災民比較係咪適當,如此立論,就好似同大家講「唔好講咁多,是但立咗法先算啦」,而唔理有冇對症下藥。聽講龔耀輝有志參選今年立法會會計界功能組別。立法趕絕最需要幫助嘅一群人呢個擔子,會計界想唔想攬上身,會計界嘅選民,真係要諗清楚。

影相一定要高炒

Friday, May 16, 2008

Have you seen a blue whale swim?

I have mentioned in a show that was aired on Thurs 29 May 2008, that I have placed a video of me swimming butterfly style online.



This was last year... In our Nextmedia company pool.

Just want to share this, as the swimming season begins once again at TKO industrial Estate.

Not a composite pic 不是合成照



Here's Maggie's blog.

Thursday, May 15, 2008

又有公關炒魷魚

英國樂隊披頭四成員Paul McCartney係一個務實嘅環保分子,成日都叫人盡量唔好浪費。佢一向以嚟都係日本Toyota車廠Lexus部門嘅「大好友」,因為佢覺得Lexus生產嘅車能源效益做得好。

高壓管治終惹笑柄

最近,Lexus出咗最新型號LS600H,係一架hybrid vehicle混合汽車,當你踩break嘅時候會變成電流,將電流傳送到電池度,咁架車就有足夠電力去作低速或者起動,而毋須用電油,咁就可以增加每公升電油可行走里數。

新車既然咁乎合能源效益,於是Lexus諗住送一部畀Paul McCartney,以多謝佢一路以嚟咁支持Lexus嘅車。點之送到去英國之後,Paul McCartney見到架車就叫咗一聲:「What?」原來,部車係經空運過去,排放出嚟嘅二氧化碳比用船運多出100倍。連貨運公司Swissport 都話,雖然好開心有生意做,但係二氧化碳嘅排放真係多好多。

呢個Lexus公關PR一定係好受公司重用,對下屬要求做嘢要「快狠準」及要有效率。今次送禮畀Paul McCartney,就算唔係個PR自己親自落order要空運,又或者佢長期同下屬講做嘢要「爽手啲」,結果員工條件反射咁選擇用空運,佢嘅高壓管治都有問題。最後成為國際公關界笑柄,呢個PR,炒得。

有線電視 呂炳權

呢幾日,相信大家同孫柏文一樣,都係繼續留意四川地震新聞。噚日,我話過地震呢單嘢,啲股價仲未反映呢次災情。因為唔好話究竟政府有乜反應、有乜嘢政策出台,其實,呢次災情有幾嚴重,就連政府都未知。

噚日我亦講過:「呢場災情,小則影響貨幣政策,大則影響領導人管治權威。」有fan屎噚日來信,話地震係不能防預嘅天災,四川又唔係地震活躍區,只要政府嘅救災工作,令人覺得佢哋係全心全力,管治權威應該冇事。

地震仲有下文

救災工作做成點,係未知之數。不過就算係100分,相信都會有好多人,永遠仇視政府,同政府一路以嚟嘅政策。點解?畀條方程式大家睇,你就會明──

豆腐渣學校 + 地震 + 一孩政策 = X。

作為家長,X又可以係乜呢?

噚日,有線電視記者呂炳權,喺四川現場瓦礫中,即時訪問個被困嘅小朋友。呂炳權被人抨擊,因為個小朋友不斷要求飲水,呂炳權就冇畀水佢飲。有線電視最後澄清,話附近救災嘅工作人員因為怕被困嘅人有內傷,不適宜飲水,所以唔准呂炳權畀水個小朋友飲。講真,好彩我喺傳媒只係個財經口水佬,因為如果係我對住個小朋友,唔好話係水,個小朋友要兩飛煙,我都會畀佢。

Wednesday, May 14, 2008

天災人禍

噚日晏晝,孫柏文睇電視新聞報道四川地震嘅最新消息。除咗災區嘅圖片,電視台都講咗啲本地權貴嘅反應。其中就有特首曾蔭權,話會撥款賑災,攞三億元出嚟幫手。天災人禍,冇人想,所以幫得就幫,今次我絕對支持曾特首。

不過,噚日曾特首講地震時,話地震發生得非常「突然」。我聽到都呆一呆,乜有「唔突然」、可以預測嘅地震咩?可能呢排我為咗反對「計劃營商法」(又稱競爭法),日日打政府,所以對特首嘅說話反應有少少過敏。

支持曾特首撥款賑災


噚日,上海交易所就宣佈66間同四川有關係嘅上市公司,啲股票要暫停買賣。港交所就話冇需要強制停牌,因為啲公司本身都冇要求停牌。法新社就話上交所停牌嘅原因,就係因為上交所嘅職員,冇辦法聯絡到啲上市公司。

睇完法新社嘅解釋,我就諗,如果我間四川公司喺港交所上市。經過地震之後,我想暫時停牌,點算吓破壞有幾嚴重之後,先至復牌。不過攞起電話,冇 dial tone。點先至可以聯絡到港交所呢?聯絡唔到又會點?

仲有,好多人話地震就只係十幾秒,又喺禮拜一已經發生咗。所以喺噚日禮拜二嘅股市買賣,股價已經反映咗呢次災情。我話肯定冇咁快,一定要睇埋政府反應。因為呢場災情,小則影響貨幣政策,大則影響領導人管治權威。一旦好似花旗國政府,對於新奧爾良打風嘅反應,真係可以對黨有好大影響。


滙豐大你唔識會計制度


星期一滙豐宣佈佢喺花旗國嘅業務撥備比預期少,由原先預期嘅40幾億美元下降至家嘅32億。有個叫Vinke嘅人就話,滙豐冇做夠,應該撥備三百億。

如果你係滙豐嘅管理層,見到有條友喺度阿吱阿左,你會點做?話滙豐已經做得啱?抑或係講滙豐將來有好好嘅前景?定係當佢透明?不過滙豐嘅管理層用咗最有效嘅方法,就係好似中學生咁話你唔明,唔識會計制度。滙豐管理層Flint 話現行會計制度之下,滙豐唔可以學Vinke咁做(We wouldn't be permitted by current rules to account for our loan book in the way Knight Vinke suggests we should.),直情當佢流,當佢低能。孫柏文只可以話,滙豐果然勁!

What Bob Barr have to say to raise campaign $$



Just read Bob Barr's platform on his website. He is ex-Republican, current US Presidential candidate for the Libertarian Party.

As anyone in sales would say, "no hook".

This is what I think Bob Barr has to say to raise money.

1. Hit the Federal Reserve to reel in the big campaign dollars. Worked for Ron Paul. A lot of moneyed men loves this stance. Is it esoteric for most? Yes. But for those who cares, they will open their wallet fast. Really Fast. Issue salience my friends.

2. Have to be more creative about Iraq. How about the first thing a Bob Barr presidency can do, is to have a referendum in Iraq. Asking simply, "Do you want the US to stay?". If yes, you can legitimacy and stays as welcomed guests. If no, well, then you can cut and run.

3. On healthcare, hit the FDA. 'nuff said.

Will add more if things pop in my mind. This would be an interesting run. Let's face it, if Barr can do a Ron Paul and raise a ton of cash. He would be legit.

Interesting news promo

Tuesday, May 13, 2008

愛國陣營都要反競爭法

上個禮拜五,孫柏文同大家講過,政府提出嘅「計劃營商法」(又稱競爭法),係97 年後,僅次於23條立法,政府權力大幅膨脹嘅法例。

又解釋過,一旦有咗法例,因為全香港嘅中文報紙都賣6蚊。只要有人投訴,話合謀定價,24小時後,政府調查員將會進駐各大報館,將高層啲電郵、文件,全部攞走。喺白色恐怖下,永久壓制新聞自由。所以當日懇求民主派嘅人,千祈唔好支持呢條「計劃營商法」,唔可以畀政府咁大嘅權力。

獨立機構成後患

上次就講點解民主派要反對,今日就講點解「愛國陣營」都要反對。

大家可能會話:「班左仔唔係好鍾意政府有咁大權得咁大權?當年只要『皇室訓令』,改名叫做『共和訓令』,佢哋舉腳支持。23條?簡直係佢哋嘅綺夢啦!」不過,如果4年前我話:「喺不久嘅將來,外界對香港特首嘅評價,將會遠高過澳門特首。」大家可能會話:「冇可能。」

點解今時今日又會咁?咪就係港英餘孽政治家,針對中央眼中嘅紅人,玩制度搞出嚟。玩制度玩到,仲唔需要上身,賴晒啲「獨立機構」。

歐銀龍、何厚批出事,係因為獨立機構金管局,發覺有啲可疑資金流動。跟住講畀獨立機構廉政公署,之後就轉介畀澳門嘅廉政公署。因為有太多人知道,最後就要查。政治家知道喺香港,能夠挑戰香港政府嘅權力,只有中聯辦。

中聯辦嘅力量,來自「愛國陣營」嘅政壇前線戰士。呢啲戰士係要食奶水,啲奶水就來自喺香港嘅「愛國企業」。呢啲企業,絕大部份從事壟斷性生意。政治家要搞掂挑戰政府嘅權力中心,就要斷絕奶水供應。

最厲害係第時呢個斷奶水「競爭委員會」,又係獨立機構。就算有盟友做律政司,都死。所以各位「愛國陣營」嘅人,呢條法例將會畀港英餘孽控制嘅香港政府,好大權力。後果自負。

今年係多事之年

噚日孫柏文食完晏晝,去咗瞓晏晝覺。瞌埋眼之後,發覺有太多嘢諗,瞓唔到覺。諗諗吓,發覺張床擙吓擙吓。孫柏文當時心諗,都成30歲人,諗埋啲衰嘢居然都仲可以令個心跳到張床擙吓擙吓。

返工之後,先知原來係四川地震。同事利世民話:「今年都將會幾麻煩。正月初一日蝕,初十五就月蝕。對上一次係咁?1989年。」睇嚟今年都係多事之年。

Whose got time to write wikipedia? Provide content? Make Web 2.0 Work?

Friday, May 09, 2008

民主派要反競爭法

政府宣佈再次為「計劃營商法」(又稱競爭法)進行諮詢。孫柏文用咗幾日時間,研究份諮詢文件,所以今日先至同大家分享我嘅睇法。

相信大家作為《金手指》嘅fan屎,都知道今次係政府第二次進行諮詢。上次失敗嘅原因,係因為政府列出7項「營商思維」,諗咗可能會犯法。

惡法之下諗吓都有罪


大家可能會問:「乜嘢叫營商思維?同實際行動有乜嘢分別?」

好嘅法例,即係大家都能明白嘅法例,就會清楚講明乜嘢實際行動做得同唔做得。例如,話到明不能進行婚前性行為,就係好法例。

咁壞嘅法例呢?就係大律師講到似層層,不過就連佢哋都唔明嘅法例,好多時唔會講乜嘢實際行動唔做得,只會話乜都做得。但做嘅時候,諗嘅嘢就會令你犯法。

例如,立法禁止當女仔為性玩偶──即係做愛可以,不過做嘅時候就唔可以諗住o趙完鬆。你可能覺得以上法例係好法例,咁乜嘢先至算當個女仔為性玩偶?你同個女仔搞完之後,你冇打電話畀佢,佢用以上法例去報警,咁又啱唔啱?做愛合法,唔打電話畀人都係合法,不過做愛加唔打電話就可能犯法?重點就係「可能」。

如果你畀得起錢,請公民黨啲大律師,佢哋幫你證明,唔打電話唔係因為你當個女仔係性玩偶,咁就冇犯法。現在你知點解公民黨咁支持「計劃營商法」。

界線模糊易主觀判決

大家可能會繼續問:「諗吓都犯法?香港有咁多維護思想自由嘅人,唔怪之得上次失敗。不過今次同上次有乜嘢分別?」分別就係上次嘅方案不夠含糊,不能瞞天過海,所以今次嘅方案,政府特登將界定犯法嘅線,盡量模糊。到時政府將會非常主觀咁,決定進行調查。

所以,我在此希望所有民主派嘅人,反對呢條法例。試諗諗,全香港嘅中文報紙都賣6蚊。一旦由淫審處、消委會等官僚,控制進行調查嘅大關,只要有愛國組織投訴,話合謀定價,24小時之後,各大報館將會有政府調查員進駐,將高層啲電郵、文件全部攞走,你話到時新聞自由又如何?傳媒挑戰政府嘅勇氣會去咗邊?Oh yeah,有香港電台就毋須要擔心,right?

所以,民主派嘅人,千祈唔可以畀政府咁大嘅權力。現有方案,就係97年後,僅次於23條立法,政府膨脹權力嘅法例。冇民主政制嘅監察,實在權太大,太危險。

張超雄捐身家!



前晚,孫柏文交咗稿之後,就打開電郵信箱睇吓有冇新訊息。一睇,就見到朋友利世民寄嚟嘅電郵。一睇就見到嘅原因,係個電郵用咗好多垃圾電郵常用嘅感嘆號。今日,我想同大家講呢封電郵,不過講之前,想分享吓我呢排嘅感受。

早排,無綫電視播咗輯叫《一百萬人的故事》嘅節目。大家唔好估點解無綫要播呢個節目。因為乜嘢理由都好,呢個節目真係變成一塊驗身鏡,令我哋香港人睇到我哋最慘嘅地方。全特區社會都有迴響,先至可以正視貧窮問題。

正視問題才能解決


之前都講過,幾年前我參與成立獅子山學會,就係因為睇到有咁多包括貧窮嘅社會問題。所以,任何人或東西能令社會重視貧窮問題,我非常感激。再一次,多謝《一百萬人的故事》。

而令我不斷努力提供解決社會問題嘅動力,就係因為見到好多非常好心嘅人,提出咗好多更加會傷害窮人嘅方案。其中一個最儍最天真,同時最能夠傷害窮人嘅方案,就喺討論《一百萬人的故事》嘅特備節目當中,由立法會議員張超雄提出。

佢話如果將香港人啲財富平均分配,每人有十幾萬,幾咁烏托邦。首先,都唔講嗰啲靠執紙皮、汽水罐幾十年,辛辛苦苦儲咗幾十萬,又唔識將錢放喺離岸銀行戶口嘅公公婆婆會點。如果係其他人話要搞財富再分配,我知道係學術思考活動,不過張超雄講,大家可以相信我,佢真係相信財富再分配係長遠解決貧窮問題嘅方法。

財富再分配 太「左」

大家係咪覺得佢係不可接受咁「左」。講真,聽聞張超雄喺9月立法會選舉,會放棄社工界功能組別。原因係張超雄反對畀社會服務機構營辦自由嘅「一筆過撥款」機制,佢要求政府完全控制服務機構營運嘅每一細節。營辦自由都想攞走,所以令最左傾功能組別嘅社工都頂佢唔順,嫌佢太鍾意膨脹政府權力,太「左」。

咁點解今日講利世民封電郵?因為佢寄咗張超雄議員辦事處代郵,題為「改革稅制,拉近貧富差距,由我做起」嘅訊息。不過利世民就加咗句「張超雄捐身家!」仲要重複8次。最後利世民仲問:「張超雄捐身家?如果唔係,講乜『改革稅制,拉近貧富差距,由我做起』。」各位同行,係時候問吓張超雄有冇做榜樣,捐身家。

Tuesday, May 06, 2008

忠心英雌 戰死沙場

「死都幫你死番嚟。」孫柏文相信,大家平日喺自己嘅工作單位裏,都聽到唔少人講呢句話。不過,講得出又做得到嘅,究竟又有幾多人?上個周末,就有一個例子。

禮拜六,喺花旗國嘅肯德基州舉行一年一度最重要嘅賽馬賽事—肯德基打吡(Kentucky Derby)。經過咁多年香港賽馬會嘅「教導」,大家可能知道一匹馬一生只能跑打吡一次。不過,大家未必知嘅係,打比多數係男仔跑嘅。女仔跑嘅「一生一次賽」,就係叫橡樹賽Oaks。

雖然有咁嘅傳統,但並不表示冇女仔跑打吡。當一匹雌馬幕後嘅人,覺得佢有足夠嘅競爭能力贏男仔,分分鐘就會攞匹雌馬跑打吡。所謂巾幗不讓鬚眉。

禮拜六就係有匹叫Eight Belles嘅雌馬,競逐肯德基打吡。最後跑第二。不過一過終點後,Eight Belles就跪低、訓咗喺跑道上。獸醫走過去睇吓乜事之後,就決定要即時人道毀滅,原因係Eight Belles對前腳腳跟的骨原來完全碎裂。

鞠躬盡瘁死而後已

呢件事,已經有動物組織PETA出嚟示威。佢哋話Eight Belles喺過終點前,已經骨折,個騎師冇理由唔知,都仲要畀佢繼續跑,非常唔人道。

人唔人道我就唔知,人類繁殖佢哋嘅原因,始終都係要佢哋喺沙場上出戰。不過如果真係終點前已骨節,我只可話Eight Belles係百分之百嘅忠心英雌。死,都要贏。

其實呢種忠心英雌,大家喺自己嘅工作單位裏都會見到。佢哋就係公司入面嗰個三十幾歲、未結婚、冇拖拍嘅中女。佢哋有嗰種對工作嘅責任心。上頭要佢做嘅嘢,無論幾難都好,佢「死都幫佢死番嚟」。當下屬做唔到佢要嘅嘢,下屬就會俾佢鬧死,鬧到佢哋將件事做好為止。

甚至好似Eight Belles咁,只要未過終點,喺沙場上必定戰鬥到底,死而後已。就連拍拖機會都可能因為工作而幻滅,都在所不辭。

可能好似我有個鬼佬同事Mark S.話齋:「三十幾歲、未結婚、冇拖拍嘅女人,佢哋嘅生命,只係得番工作同佢嗰幾隻貓。」孫柏文唔知呢個係咪佢哋盡忠職守嘅理由,只係知道忠心悍將,公司英雌。

Monday, May 05, 2008

分化港女的公眾假期

噚日,孫柏文接到一個經常到內地公幹、熟悉國情嘅朋友電話,傾傾吓偈,佢話:「今年實施新例,今日5月4日喺內地就有個青年節,凡14歲至28歲的職員可以放假。」

孫柏文即刻話:「嘩,咁咪嚴重搞分化!歧視我呢啲30歲冇耐嘅『青年』?」

朋友就答:「最慘係嗰啲20到『忟』、30歲嘅單身中女OL,你話嗰日返到公司原來得自己一個女職員要返工,你話佢幾咁式凄凉呀!」聽到呢度,孫柏文即時抹一把汗,因為好彩香港仲未有呢個節日,毋需要面對咁嘅分化。

屋企忽然有事

收線之後,同《蘋果批》高明輝講起呢個「不平等條例」。我問佢:「咁嗰啲被問及幾多歲時,會答:『關你乜事?』嘅港女。又會點?」

佢諗咗一陣就話:「咁如果香港係咁,我相信嗰日會有好多港女特登請假,就算要拎annual leave都要去放!至怕到時全個office冇晒女同事。到咗第二日,老闆一定會『的』個HR經理入房,問佢:『乜我哋請咗咁多細過28歲嘅女同事咩?點解我平時行開行埋都唔多覺眼嘅?』」

當我哋仲討論緊個青年節係咪會嚴重削弱嗰日嘅生產力之際,朋友又來電補充,佢話:「喂,係放半日、半日喎!唔係一日。」

於是我同高明輝講,得半日假放喎,咁annual leave可唔可以放半日o架?佢又諗咗一陣,話:「我諗,嗰日會好多港女忽然『屋企有事』,同公司講要遲到或早退,要放半日。然後再同同事話要放青年節,就好似有啲港女特登喺情人節訂花畀自己一樣!不過,我都仲有樣嘢唔明……」

咩呀?

「究竟學生有冇得放青年節假?如果香港啲大學有得放,好似沈詩鈞呢類神童,咁咪分分鐘個課室靜英英,得佢一個要上堂?甚至乎連個讀MPhil嘅Tutor都有得放,但係神童冇份。」

一國兩制萬歲

孫柏文覺得,神童始終都係比較少見,不過遲入學嘅新移民學生就多啲。佢哋有好多嚟到香港,因為種種問題,要到14歲先讀小六,咁嗰日,可能成班得佢一個有假放,上上吓堂,要同Missie講:「老師,我要走,要去放青年節假呀。」個港女班主任遇到咁嘅情況,都唔知放佢走好,定話「屋企有事」跟埋佢一齊走好……

講咗咁耐,孫柏文始終都覺得,香港人唔使面對呢種分化,真係好彩。一國兩制萬歲

有危機點算?造更大危機


如果孫柏文問大家:「平時,一間公司批股,對股價會點?」多都唔講,大家淨係睇吓大陸股市,呢幾個月有好多公司嘅大股東禁售期到期,股價已經……。唔好話真係批股,淨係可以批股都嚇死人。

再問:「嗰間公司批嘅股係新股,不過管理層話到明唔係用嚟做新嘅業務,股價會點?」咁就仲大鑊。一係間公司財政有壓力,一係就管理層覺得現水平股價實在高得離譜,所以批股。

執笠比批股嚴重

不過,如果你係一個呢幾個月先至啱啱開始炒股嘅人,你可能會駁嘴話:「唔係喎。股價好似係批股先至升,仲好似你唔批股,股價反而會跌。今年全球最大嘅批股活動,好似最後股價會升。」咁我就推斷你見到嘅批股活動,全部都係啲鬼佬銀行做嘅。唔怪之得你有咁樣嘅結論。

要批股雖然係一個危機、壞消息,不過正當你面對一個更大危機,之前嘅危機就會被蓋過。今時今日啲鬼佬銀行,如果冇中央銀行撐住,個個因為現時嘅金融危機,分分鐘執笠。作為一個股東,執笠當然比批股嚴重得多,所以先至見到呢幾個月,批股但公司股價反而升嘅怪現象。

大家作為《金手指》嘅fan屎,一定明白以上嘅道理。所以如果面對危機,一定會製造更大嘅危機,蓋過之前嘅難題。

扮失憶免肥佬

噚日,我睇到段新聞,就有一個fan屎會考生,用咗呢個策略。

事緣,呢個fan屎考緊會考經濟科考試,點知考考吓突然失憶。佢媽媽嚟到試場,個fan屎連親生亞媽都認唔出,跟住送院。最後情況好轉,認得番佢亞媽。亞媽之後被形容為「放下心頭大石」。

好多人有好多揣測,不過我只有一個解釋。如果我考考吓試,發現自己一定肥佬,亦知道亞媽一定會因而殺死我。我面對住呢個危機,就會製造更大嘅危機。原本我會假扮心臟病發。失憶?仲好。冇得check又可以即時好番。果然係我嘅fan屎。

There's hope still for the American home owner



"Kiss from a Rose"

Yes... Even those with jumbo mortgages are praying for this...

Saturday, May 03, 2008

考評局應多啲睇《金手指》

呢排係學生哥嘅考試期。對於好多不能逃離香港教育制度嘅中五學生,佢哋就會第一次面對一場影響終生嘅考驗。正當呢場考試影響深遠,出試題時,就要做到能夠服眾考生。

繼05年考評局用咗我哋《蘋果日報》董橋社長,一篇題為「中年是下午茶」文章,裏面嘅一句「攪一杯往事,切一塊鄉愁,榨幾滴希望」,去考啲學生引嚟不滿之後(考生嫌太深)。最近考評局又因為一條試題出事。

喺啱啱考咗嘅綜合能力試卷,裏面就要啲考生分析啲年輕人潮流用語。試卷就列出咗十個呢啲潮語。

孫柏文第一眼睇呢十個潮語,已覺得有問題。因為話到明係當今潮流用語,居然連「硬膠」都冇份。

再睇,試卷除咗列出啲潮語之外,仲講晒啲潮語嘅定義,但就係喺呢到出咗事。今日特別想講試卷中講過嘅「屈機」。

潮語「屈機」定義出事


考評局話「屈機」嘅定義係:「『屈』指屈服,『機』是電子遊戲機。『屈機』指玩遊戲者因無力取勝而屈服。」作為fan屎嘅你,睇開《金手指》都知考評局嘅定義係錯、錯、錯。

如果你嘅前途,係因為呢張答錯加分、答啱肥佬嘅出錯試卷而變成崛頭路。你只可以怨你父母唔係考評局高官,因為如果佢哋係考評局高官,你根本毋須考會考。因為你已經一早逃離香港教育制度,唔係喺外國留學,就係喺國際學校讀書。

我以前都講過,「屈機」嘅定義係:「一個人發現機制嘅漏洞,重複又重複進行同一個行動去攞着數。」

「屈機」嘅起源應該係來自電視遊戲機。當玩家發現遊戲中有漏洞,就可以重複咁做一個動作去贏。90年代初,就有《快打旋風 2》裏面嘅「軍佬Guile」角色,狂出「亞力箍」一招,成為「屈機」嘅第一代代表。

如果你問我「軍佬」今時今日撈緊乜。我估佢退役之後,應該轉行入投資銀行,做次按債券業務。

我以前都講過,因為啲投資銀行,發現啲債券評級機制嘅漏洞,重複又重複咁瘋狂出AAA次按債券。搵咗好多錢。亦用過「屈機」去形容呢個情況。

我知道點解考評局唔包括「硬膠」喺潮語之內。因為驚啲考生用嚟形容考評局本身。

Last week on Britains got talent

Thursday, May 01, 2008

多謝《一百萬人的故事》(暫時置頂)

This blog entry is now 暫時置頂. For newer pieces, please read below this blog entry.

-----------------------------------------


「只想問:你生第一胎,經濟很好嗎?不然,為甚麼三年抱兩?六年抱四?你有沒有想過用錢養兒育女,是自己的責任?屋小,兩個人住剛好,為甚麼要再生四個人?」

- 鍾偉民2007年12月30日《蘋果日報》名采論壇

今日,孫柏文攞番鍾偉民先生問過嘅問題,係因為我哋嘅未來—小朋友非常沮喪。呢排,無綫電視有個節目叫做《一百萬人的故事》,基本上係個催淚彈型嘅節目。佢哋節目嘅目標就係搵啲好慘嘅人,令社會知道佢哋有幾慘。

點解咁慘仲生

就係呢個節目提醒我,當年一齊成立獅子山學會嘅決定完全正確,而仲要繼續努力去杜絕社會慘況。

前晚,無綫電視就請咗幾個有份量嘅嘉賓做節目,討論「好慘」人士嘅生活。嗰個節目有台下觀眾,一齊分享佢哋有幾慘。今日我就攞番一兩個個案出嚟,講吓自己嘅感受。

有一個女事主,話自己好慘、好窮。跟住就由今天嘅生活向後數,話當年佢嘅老公間歇式咁打佢。話當年要養三個小朋友好慘。話未結婚之前,已經生活迫人,因為只能做啲穿膠花嘅工作。基本上由出世以嚟都好慘。就係呢個個案,令我諗起鍾偉民問過嘅問題。

慘,唔係佢,係佢嗰三個小朋友。

押掉未來換今日之快

跟住就有個四肢健全嘅年輕人,話自己好慘。佢話現在薪金低微,不過以前就有份做保安嘅工作,月薪6000元。點解唔做?因為份工喺九龍,佢住喺天水圍,工作時間12小時,來回路程就3小時。「頂」咗8個月,就連佢啲朋友都話佢叻。之後頂唔順,冇做。就係呢個個案,令我覺得成立獅子山學會完全正確。

正當政府提供大幅補貼,迫人住喺啲佢哋唔會自由選擇住嘅地方。納稅人嘅錢就用咗,點解會攞嚟害咗人?

之後啲嘉賓就開始討論。佢哋嘅解決方法,就係押掉未來,換今日之快。

用高稅率進行財富轉移。將財富轉移到窮人手。今日之快。冇人肯搵錢上進。押掉未來。
用最低工資推高收入。一定有工人因而工資上升今日之快。不過難入職、難入行、難轉行,害咗新移民、學生、重返勞動人口嘅婦人。押掉未來。

係咁嘅社會下,究竟我對未來嘅執着,唔通係錯?